ନୂଆଦିଲ୍ଲୀ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ରେପୋ ରେଟ୍ ଅପରିବର୍ତ୍ତିତ ରଖିଛନ୍ତି। କ୍ରମାଗତ ଚତୁର୍ଥ ଥର ପାଇଁ RBI ରେପୋ ରେଟରେ କୌଣସି ବୃଦ୍ଧି କରିନାହାନ୍ତି। RBIର ମନିଟାରୀ ପଲିସି କମିଟି ବୈଠକ ପରେ ରେପୋ ରେଟକୁ ପୂର୍ବଭଳି ୬.୫ପ୍ରତିଶତରେ ରଖିବାକୁ ନିଷ୍ପତ୍ତି ନିଆଯାଇଛି। ଏବେ ଲୋନ୍ ଏବଂ ଇଏମଆଇରେ କୌଣସି ବୃଦ୍ଧି ହେବ ନାହିଁ।

ଅଶୋଧିକ ତୈଳ ଦରରେ ବୃଦ୍ଧି, ବିଶ୍ବ ବଜାରରେ ଖାଦ୍ୟ ସାମଗ୍ରୀ ଓ ଶକ୍ତି ଦରରେ ବୃଦ୍ଧି, ଭାରତରେ ବିଭିନ୍ନ ଡାଲି ଜାତୀୟ ସାମଗ୍ରୀର ଉତ୍ପାଦନରେ ହ୍ରାସ ଏବଂ  ଅନିଶ୍ଚିତ ମୁଦ୍ରାସ୍ଫିତିକୁ ଦୃଷ୍ଟିରେ ରଖି ରିଜର୍ଭ ବ୍ୟାଙ୍କ ଏଭଳି ପଦକ୍ଷେପ ନେଇଥିବା ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି।

ତେବେ ଚଳିତ ଆର୍ଥିକ ବର୍ଷରେ ଖୁଚୁରା ମୁଦ୍ରାସ୍ଫିତି ୫.୪ ପ୍ରତିଶତରେ ରଖିବାକୁ RBI ଆଶା କରିଥିବା ବେଳେ ଆସନ୍ତାବର୍ଷ ଏହାକୁ ୫.୨ ପ୍ରତିଶତ ମଧ୍ୟରେ ରଖିବାକୁ ଲକ୍ଷ୍ୟ ରଖାଯାଇଛି।