କଟକ: ବର୍ଷା ପରେ ମାତିଛନ୍ତି ଏଡିସ୍ ମଶା । ମୌସୁମୀ ବର୍ଷା ପରେ ଡେଙ୍ଗୁ ମୁକାବିଲା ପାଇଁ ସିଏମସି ଆରମ୍ଭ କରିଥିଲା ପ୍ରସ୍ତୁତି । ଓ୍ବାର୍ଡ ଓ ବିଦ୍ୟାଳୟ ସ୍ତରରେ ସଚେତନତା କାର୍ଯ୍ୟକ୍ରମ ଜାରି ରହିଛି । ମଶା ତେଲ ସିଞ୍ଚନ କରାଯାଉଛି । ସିଏମସି ସ୍ବାସ୍ଥ୍ୟ ବିଭାଗର ତଥ୍ୟ ଅନୁସାରେ ଏବେ ସହରରେ ୧୦୨ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ବିଶେଷକରି ସିଡିଏ ଅଞ୍ଚଳରେ ଡେଙ୍ଗୁ ମୁକାବିଲା ପାଇଁ ବିଭାଗ 4 ଜଣ ନୋଡାଲ ଅଫିସରଙ୍କ ସହ 4ଟି ଟିମ ନିୟୋଜିତ କରିଛି । ଘରକୁ ଘର ବୁଲି ଯାଞ୍ଚ କରୁଛନ୍ତି ଟିମ୍ । ତେବେ ଲୋକମାନଙ୍କ ସଚେତନତା ଅଭାବରୁ ଡେଙ୍ଗୁ ଅଧିକ ବ୍ୟାପୁଥିବା କହିଛନ୍ତି ସ୍ବାସ୍ଥ୍ୟ ଅଧିକାରୀ ।
କଟକ: ଗୋଟିଏ ମାସ ବ୍ୟବଧାନ ପରେ ପୁଣି ଚଳଚଞ୍ଚଳ ନଦୀ ଘାଟ । ମଳମାସ ସରିଥିବାରୁ ଶ୍ରାବଣର ଶେଷ ଦୁଇ ସୋମବାର ହେବ ଜଳଲାଗି । ମହାଦେବଙ୍କୁ ଜଳାଭିଷେକ କରିବେ କାଉଡ଼ିଆ । ଏଥିପାଇଁ ଚଳଚଞ୍ଚଳ ହୋଇଛି କଟକ ଗଡ଼କଡ଼ିଆ ଘାଟ । ରାଜ୍ୟର ବିଭିନ୍ନ ପ୍ରାନ୍ତରୁ କାଉଡ଼ିଆମାନେ ଏକାଠି ହୋଇ ଅସ୍ଥାୟୀ ଶିବଲିଙ୍ଗଙ୍କୁ ପୂଜା କରିବା ସହ ଗଡ଼େଶ୍ବର ମହାନଦୀ କୂଳରୁ ପାଣି ଉଠାଇଛନ୍ତି । ବିଶ୍ବାସ ଓ ଭକ୍ତିର ଏକ ମହାମିଳନ ଦେଖିବାକୁ ମିଳିଛି । ପୂଜାର୍ଚ୍ଚନା ପରେ ପାଣିଭାର ନେଇ ଶୈବପୀଠ ଅଭିମୁଖେ ଯାତ୍ରା କରିଛନ୍ତି କାଉଡ଼ିଆ ।
ମାସର ପ୍ରଥମ ଦୁଇ ସୋମବାର ହୋଇଥିଲା ଜଳଲାଗି । ତେବେ ଯୋଡ଼ା ଶ୍ରାବଣ ପଡିବାକୁ ମଝିରେ ମଳମାସ ପାଇଁ ଜଳଲାଗି ବନ୍ଦ ରହିଥିଲା । ମଳମାସ ଶେଷ ହେବା ପରେ ଅଗଷ୍ଟ ମାସର ଶେଷକୁ ଦୁଇଟି ସୋମବାର 21 ତାରିଖ ଓ 28ତାରିଖ ଦିନ ଜଳଲାଗିର ବ୍ୟବସ୍ଥା ରହିଥିବା ସଂସ୍କୃତି ଗବେଷକ ମାନେ କହିଥିଲେ । ତେଣୁ ରବିବାର ପବିତ୍ର ଗଡ଼କଡ଼ିଆରୁ ଜଳାଭାରର ଧରି ଉତ୍ସାହର ସହ ଲିଙ୍ଗରାଜ, ଧବଳେଶ୍ଵର, ସର୍ପେଶ୍ବର ଆଦି ଶୈବପୀଠ ଅଭିମୁଖେ ଯାତ୍ରା କରିଛନ୍ତି କାଉଡ଼ିଆ ।
ଜଳ ଉଠାଣ ପାଇଁ ନଦୀ ପଠାରେ ପୋଲିସ, ଅଗ୍ନିଶମ ଓ ଓଡ୍ରାଫ ପକ୍ଷରୁ ନଜର ରଖାଯାଇଛି । ବର୍ଷା ପରେ ନଦୀର ପାଣି ଅଧିକ ଥିବାରୁ ସୁରକ୍ଷା ପାଇଁ ସମସ୍ତ ବ୍ୟବସ୍ଥା କରାଯାଇଛି । ଏକମାସ ପରେ ପୁଣି ଜଳଲାଗି ଯୋଗ ପଡ଼ିଥିବାରୁ ଅଧିକ ଭିଡ଼ ହେବା ଆଶା କରାଯାଉଛି ।
ଭୁବନେଶ୍ବର: ଠକେଇ ଟଙ୍କାରେ ଥାଇଲାଣ୍ଡରେ ମସାଜ୍ । କରିତକର୍ମା କାହ୍ନୁଚରଣ ଗିରଫ ପରେ ଫିଟୁଛି ଗୁମର । ମିଛ ଆଇକାର୍ଡ ଓ ଫେକ୍ ନୋଟିଫିକେସନ ଜରିଆରେ ଲୁଟିଛନ୍ତି କୋଟି କୋଟି ଟଙ୍କା । ସୂଚନା ଅଧିକାର କର୍ମୀ ନାଁରେ ଘୁରି ବୁଲୁଛନ୍ତି ୨୫ ରୁ ଉର୍ଦ୍ଧ୍ବ ଦଲାଲ । କାହାକୁ ପଞ୍ଚାୟତରାଜ ସେକ୍ରେଟାରୀ ତ ଆଉ କାହାକୁ ପୁର୍ତ୍ତ ବିଭାଗର ଆଡ଼ିସିନାଲ ସେକ୍ରେଟାରୀ । ଭିନ୍ନ ଭିନ୍ନ ପରିଚୟରେ ଲୋକଙ୍କୁ ବ୍ଲାକମେଲ କରି କୋଟି କୋଟି ଟଙ୍କା ଲୁଟୁଥିବା ବେଳେ ଭୁବନେଶ୍ବରରୁ ନକଲି ଆରଟିଆଇ କର୍ମୀ କାହ୍ନୁ ଚରଣ ପ୍ରଧାନକୁ ଗିରଫ କରିଛି STF । କାହ୍ନୁର ଘର ଖୋର୍ଦ୍ଧା ଟାଙ୍ଗି ହୋଇଥିବା ବେଳେ ଅନ୍ଧାରୁଆରେ ସେ ରହୁଥିଲା । ପଞ୍ଚାୟତିରାଜ ବିଭାଗରେ VLW ଚାକିରି କରାଇବା, ମଦ ଦୋକାନ ଲାଇସେନ୍ସ, କ୍ରସର ଲାଇସେନ୍ସ ଓ ଟ୍ରାନ୍ସଫର ପୋଷ୍ଟିଂ କରାଇବା ପାଇଁ ଟଙ୍କା ନେଉଥିଲା । ଠକେଇ ଟଙ୍କାରେ ୬ ମାସରେ ଥରେ ଥାଇଲାଣ୍ଡ ଯାଇ ମଉଜମସ୍ତି କରୁଥିଲା ଏହି ଦଲାଲ । ଚାନ୍ଦପୁର ଥାନାରେ କାହ୍ନୁ ନାଁ ରେ ୪ଟି ଅପରାଧିକ ମାମଲା ରହିଛି । ଗିରଫ ବେଳେ ତା ଠାରୁ ସରକାରୀ ଚାକିରି ନୋଟିଫିକେସନ ଓ ଅର୍ଡର ଜବତ ହୋଇଥିବା କହିଛନ୍ତି STF ଏସପି ।
ଶୁକ୍ରବାର କାହ୍ନୁ ଲିଙ୍କରେ ରହି କୋରାପୁଟରେ ଦଳାଲି କରୁଥିବା ବ୍ରହ୍ମପୁରର କିଶୋର ମିଶ୍ରକୁ ଗିରଫ କରାଯାଇଥିଲା । କିଶୋର ଓ କାହ୍ନୁ ଆକାଉଣ୍ଟରେ ୪କୋଟିରୁ ଉର୍ଦ୍ଧ ଟଙ୍କା କାରବାର ହୋଇଛି । କୋରାପୁଟ ବସଷ୍ଟାଣ୍ଡରେ ସୂଚନା ଓ ଲୋକ ସମ୍ପର୍କ ବିଭାଗର ଆଇକାର୍ଡ ପକାଇ ଜଣେ ବ୍ୟବସାୟୀଙ୍କୁ ବ୍ଲାକମେଲ କରୁଥିବା ବେଳେ ମାଡିବସିଥିଲା ପୋଲିସ । ଅଭିଯୁକ୍ତଙ୍କୁ ଖୁବଶୀଘ୍ର ରିମାଣ୍ଡରେ ଆଣି ଏ ଗ୍ରୁପରେ କେତେ ଦଲାଲ ଅଛନ୍ତି ସେ ନେଇ ତଦନ୍ତ ହେବ । ଅନ୍ୟପକ୍ଷରେ ଯଦି କେହି ଏଭଳି ଠକାମୀର ଶିକାର ହୋଇଥାନ୍ତି ତେବେ ତୁରନ୍ତ ଥାନାରେ ଏତଲା ଦେବାକୁ କହିଛନ୍ତି ଏସପି ।
କଟକ: କମିଶନରେଟ୍ ପୁଲିସର କଡ଼ା ଚେତାବନୀ । ଗଜାନନଙ୍କ ବିକୃତ ମୂର୍ତ୍ତି କଲେ ରକ୍ଷାନାହିଁ । ଜବରଦସ୍ତ ଚାନ୍ଦା ଆଦାୟ ଅଭିଯୋଗ ଆସିଲେ କାର୍ଯ୍ୟାନୁଷ୍ଠାନ । ପାର୍ବଣ ପୂର୍ବରୁ କଡ଼ା ଚେତାବନୀ ଦେଇଛି କମିଶନରେଟ୍ ପୋଲିସ୍ । ଆଉ କିଛିଦିନ ପରେ ଧରାବତରଣ କରିବେ ପ୍ରଭୁ ଗଜାନନ । ପାର୍ବଣ ଋତୁ ପାଇଁ କଟକର ସବୁ ପୂଜା ମଣ୍ଡପ ପ୍ରସ୍ତୁତି ଆରମ୍ଭ କରିଦେଇଛନ୍ତି । ଖାଲି ଗଣେଶ ପୂଜା ନୁହେଁ ପଛକୁ ପଛ ଲକ୍ଷ୍ମୀପୂଜା, କାଳୀପୂଜା, କାର୍ତ୍ତିକେଶ୍ବର ପୂଜା ପାଇଁ ମଧ୍ୟ ପ୍ରସ୍ତୁତି ଆରମ୍ଭ ହୋଇଛି । ପୂଜାକୁ ଶାନ୍ତିଶୃଙ୍ଖଳାର ସହ ଆୟୋଜନ କରିବାକୁ ପୋଲିସ ମଧ୍ୟ ପ୍ରସ୍ତୁତି କରିଛି । ସମସ୍ତ ପୂଜା କମିଟି ସହ ପୋଲିସ ଆଲୋଚନା କରିଛି । ସାଂସ୍କୃତିକ କାର୍ଯ୍ୟକ୍ରମ ଠାରୁ ଆରମ୍ଭ କରି ଭସାଣି ଉତ୍ସବ ନେଇ କମିଟି ଓ କ୍ଲବ ସହ ଆଲୋଚନା କରିଛି ପୋଲିସ୍ ।
ସେପ୍ଟେମ୍ବର 19ରେ ପୂଜା ପାଇବେ ପ୍ରଭୁ ଗଜାନନ । ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ପୂଜା ପରେ ସେପ୍ଟେମ୍ବର 24, ଅକ୍ଟୋବର 1 ଓ 8 ତାରିଖରେ ଭସାଣ ଉତ୍ସବ ଅନୁଷ୍ଠିତ ହେବ । ପ୍ରଭୁ ଗଣେଶଙ୍କ ବିକୃତ ମୂର୍ତ୍ତି ତିଆରି କଲେ ଆୟୋଜକ ଓ ମୂର୍ତ୍ତି କାରୀଗରଙ୍କ ଉପରେ ନିଆଯିବ କଡା କାର୍ଯ୍ୟାନୁଷ୍ଠାନ । ଏହାସର ଜବରଦସ୍ତ ଚାନ୍ଦା ଆଦାୟ ନେଇ ଅଭିଯୋଗ ଆସିଲେ ଜିରୋ ଟଲେରାନ୍ସ ନୀତି ଆପଣେଇବାକୁ ପୋଲିସ ଚେତାଇ ଦେଇଛି । ସେପଟେ ପୂଜା ପୂର୍ବରୁ ସବୁ ବିଭାଗ ସହ ଆଲୋଚନା କରାଯାଇ ସହରର ରାସ୍ତାଘାଟ ମରାମତି, ଅଲୋକୀକରଣ ସହ ବିସର୍ଜନ ପାଇଁ ଅସ୍ଥାୟୀ ପୋଖରୀ ନିର୍ମାଣ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖିଚି CMC।
ପୁରୀ: ଗତକାଲି ସତ୍ୟବାଦୀରେ 5T ସଚିବଙ୍କ ଉପରେ କାଳିମାଡ଼ ଘଟଣାକୁ ସବୁ ମହଲରେ ନିନ୍ଦା କରାଯାଉଛି । ସୁପ୍ରଶାସନିକ ବ୍ୟବସ୍ଥା ଗଠନରେ ରାଜ୍ୟ ସରକାର କାର୍ଯ୍ୟ କରୁଥିବା ବେଳେ ସଚିବଙ୍କ ଉପରକୁ ଏପରି ଆକ୍ରମଣ ନିନ୍ଦନୀୟ ଓ ଅସହିଷ୍ଣୁତାର ନମୂନା ବୋଲି କହିଛି ପୁରୀ ଜିଲ୍ଲା ଅମଲା ସଂଘ । ସେହିପରି ଘଟଣାକୁ ଦୃଢ ନିନ୍ଦା କରିନ୍ତି ସେବାୟତ । ଏହାସତ୍ତ୍ବେ ଅଭିଯୁକ୍ତ ଭାସ୍କରକୁ କ୍ଷମା ଦେଇ 5T ସଚିବ ତାଙ୍କର ବଦାନ୍ୟତା ଦେଖାଇଥିବାରୁ ଏହାକୁ ସ୍ବାଗତ କରାଯାଇଛି ।
ଘଟଣାକୁ ପୁରୀ ଅମଲା ସଂଘ ପକ୍ଷରୁ ନିନ୍ଦା କରାଯାଇଥିବାବେଳେ ଯେଉଁଭଳି ଭାବେ ଆକ୍ରୋଶ ମୂଳକ ଚିନ୍ତାଧାରା ପ୍ରକଟ କରି ଏପରି କାର୍ଯ୍ୟ କରାଯାଇଛି ତାହା ଦୁଃଖଦାୟକ ବୋଲି କହିଛି । ଏହା ବିରୋଧୀଙ୍କ ଅସହିଷ୍ଣୁତାକୁ ପଦାରେ ପକାଇଛି । ତେବେ ଘଟଣା ପରେ ଅଭିଯୁକ୍ତ ଭାସ୍କରକୁ କ୍ଷମା ଦେବା ସହ ଛାଡ଼ିଦେବା 5T ସଚିବଙ୍କ ବଦାନ୍ୟତାର ପ୍ରମାଣ ଦେଇଛି । ବିକାଶ ଦିଗରେ କାର୍ଯ୍ୟ କରୁଥିବା ଅଧିକାରୀଙ୍କ ପ୍ରତି ଏପରି କାଳିମାଡ଼ ହିନମାନ୍ୟତା, ହତାଶର ପ୍ରତିଫଳନ ହୋଇଥିବା ସତ୍ୱେ ଲୋକଙ୍କ ଭଲ ପାଇବା ଜିତିବ ବୋଲି ମତ ପ୍ରକାଶ ପାଇଛି ।
ଘଟଣାକୁ ପୁରୀରେ ଥିବା ସେବାୟତ ମାନେ ମଧ୍ୟ ତୀବ୍ର ନିନ୍ଦା କରିଛନ୍ତି । ମହାପ୍ରଭୁଙ୍କ ପରମ ସେବକ ଭି.କେ. ପଣ୍ଡିଆନଙ୍କୁ ପ୍ରଭୁ ସୁରକ୍ଷା ଦେଇଛନ୍ତି । ରାଜ୍ୟରେ ସୁବର୍ଣ ଇତିହାସ ସୃଷ୍ଟି କରିବା ପାଇଁ ସରକାର କାର୍ଯ୍ୟ କରୁଥିବା ବେଳେ ଏପରି ଘୃଣ୍ୟ କାର୍ଯ୍ୟ ବିକାଶ କୁ ରୋକି ପାରିବ ନାହିଁ । ବିଶାଳ ହୃଦୟର ମଣିଷ ହୋଇଥିବାରୁ ଭାସ୍କରକୁ ସେ କ୍ଷମା ଦେଇଛନ୍ତି । ତାଙ୍କ ପ୍ରତିଥିବା ଲୋକଙ୍କ ପ୍ରବଳ ସମର୍ଥନ ରହିଛି ।
ନୂଆଦିଲ୍ଲୀ: ନିର୍ବାଚନ ପାଖେଇ ଆସୁଥିବାବେଳେ ସମସ୍ତ ଦଳ ନିଜର ରଣନୀତି ପ୍ରସ୍ତୁତ କରୁଛନ୍ତି । କଂଗ୍ରେସ ଆଉ ଏକ ପାଦ ଆଗକୁ ବଢ଼ିଛି । ରବିବାର କଂଗ୍ରେସ ଅଧ୍ୟକ୍ଷ ସିଡବ୍ଲୁସି କମିଟି ଗଠନ କରିଛନ୍ତି । ଯେଉଁଥିରେ ୩୯ ଜଣ ନେତାଙ୍କ ନାମ ସାମିଲ ରହିଛି । କଂଗ୍ରେସର ଏହି କାର୍ଯ୍ୟକାରୀ କମିଟିରେ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ନାମ ରହିଛି । ଗତବର୍ଷ ଅକ୍ଟୋବର ୨୬ ତାରିଖରେ ମଲ୍ଲିକାର୍ଜୁନ ଖଡ଼ଗେ ଦାୟିତ୍ବ ନେଇଥିବାବେଳେ ୧୦ ମାସ ପରେ ଏହି କମିଟି ଗଠନ କରିଛନ୍ତି । ତେବେ ଏହି ୩୯ଜଣ ସଦସ୍ୟଙ୍କ ମଧ୍ୟରେ ରହିଛନ୍ତି ମଲ୍ଲିକାର୍ଜୁନ ଖଡ଼ଗେ, ସୋନିଆ ଗାନ୍ଧୀ, ମନମୋହନ ସିଂ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ, ଏ.କେ ଆଣ୍ଟୋନି, ଅମ୍ବିକା ସୋନି, ଅଧିର ରଂଜନ ଚୌଧୁରୀ, ଦିଗବିଜୟ ସିଂ, ଚରଣଜିତ ସିଂ ଚନ୍ନି, ଆନନ୍ଦ ଶର୍ମାଙ୍କ ସମେତ ମୋଟ ୩୯ ନେତା ଅଛନ୍ତି। ଏହା ବ୍ୟତୀତ ୩୨ ଜଣ ସ୍ଥାୟୀ ନିମନ୍ତ୍ରିତ ସଦସ୍ୟ, ୯ ଜଣ ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ, ଯୁବ କଂଗ୍ରେସ, ଏନଏସୟୁଆଇ, ମହିଲା କଂଗ୍ରେସ ଏବଂ ସେବା ଦଳ ସଭାପତିଙ୍କୁ ମଧ୍ୟ ସ୍ଥାନ ଦିଆଯାଇଛି। ସିଡବ୍ଲ୍ୟୁସିରେ ସଚିନ ପାଇଲଟ, ଶଶି ଥରୁର, ଅଶୋକ ଚୌହାନ, ଦୀପକ ବାୱରିଆଙ୍କ ନାମ ନୂତନ ଭାବେ ପ୍ରକାଶ ପାଇଛି। ଗୌରବ ଗୋଗୋଇ, ନାସିର ହୁସେନ୍, ଦୀପା ଦାସ ମୁନସୀ ମଧ୍ୟ ସିଡବ୍ଲ୍ୟୁସିରେ ଅନ୍ତର୍ଭୁକ୍ତ ହୋଇଛନ୍ତି | ସେହିପରି ସ୍ୱତନ୍ତ୍ର ନିମନ୍ତ୍ରିତ ସଦସ୍ୟଙ୍କ ମଧ୍ୟରେ ପୱନ ଖେଡା, ସୁପ୍ରିୟା ଶ୍ରୀନେତ ଏବଂ ଅଳକା ଲାମ୍ବା ଅଛନ୍ତି।
ନବରଙ୍ଗପୁର: ରୋଗଶଯ୍ୟାରେ ଦୁଇ ପିଲା । ପୁଅର ଦୃଷ୍ଟିଶକ୍ତି କମୁଥିବା ବେଳେ ଝିଅ କାନରେ ହୋଇଛି ଘା । ସ୍ବାମୀଙ୍କୁ ହରାଇବା ପରେ କଷ୍ଟେ ମଷ୍ଟେ ଚଳୁଥିଲା ପରିବାର । ଏବେ ପିଲାଙ୍କ ଚିକିତ୍ସା ମୁଣ୍ଡ ଉପରେ ପାହାଡ଼ ଭଳି ଲଦି ହୋଇଛି । କେମିତି ଦୁଇ ପିଲାଙ୍କର ଚିକିତ୍ସା ହେବ । ସେହି ଚିନ୍ତାରେ ନବରଙ୍ଗପୁର ପାପଡାହାଣ୍ଡିର ସୁଭଦ୍ରା ଜାନୀ । ସ୍ବାମୀଙ୍କୁ ହରାଇବା ପରେ ମୂଲ ଲାଗି ଯାହା ରୋଜଗାର କରୁଥିଲେ ସେଥିରେ ଦୁଇ ଓଳି ଖାଇବା କଷ୍ଟ ହୋଇପଡିଥିଲା । କିଛି ମାସ ତଳେ ହଠାତ୍ ବଡ ପୁଅ ବୈଦ୍ୟନାଥର କାନମୁଣ୍ଡାରେ ଏକ ଘାଆ ହୋଇଥିଲା । ଧୀରେ ଧୀରେ ତାହା ବଢିବାକୁ ଲାଗିଥିଲା । ଫଳରେ ଏହାର ପ୍ରଭାବ ଆଖି ଉପରେ ପଡିଥିଲା । ସୁଭଦ୍ରା ପୁଅକୁ ପ୍ରଥମେ ନବରଙ୍ଗପୁର ମୁଖ୍ୟ ଚିକିତ୍ସାଳୟକୁ ନେଇଥିଲେ । ଡାକ୍ତରଙ୍କ ପରାମର୍ଶକ୍ରମେ ଭୁବନେଶ୍ବରକୁ ନେଇ ଡାକ୍ତରଙ୍କୁ ଦେଖାଇଥିଲେ । ଏବେ ଅଧିକ ଚକିତ୍ସା ପାଇଁ ଅର୍ଥ ସାଜିଛି ବାଧକ ।
ସେତିକିରେ ସରିନି ଦୁଃଖ । ଅଳ୍ପ ଅଳ୍ପ କରି ଝିଅର କାନମୁଣ୍ଡରେ ଘାଆ ସୃଷ୍ଟି ହୋଇଛି । ମୁରବି ହୀନ ପରିବାରରେ ଚିକିତ୍ସା ଖର୍ଚ୍ଚ ବହନ କରିବା ଅସମ୍ଭବ ହୋଇପଡିଥିବା ବେଳେ ସରକାରୀ ସାହାଯ୍ୟ ଅପେକ୍ଷାରେ ରହିଛନ୍ତି ପରିବାର । ପରିବାରର ଦୁଇଜଣ ଶିଶୁଙ୍କ ଚିକିତ୍ସା କରାଯିବ ଏବଂ ଆବଶ୍ୟକ ପଡ଼ିଲେ ବାହାରକୁ ପଠାଇ ସେମାନଙ୍କ ସ୍ବତନ୍ତ୍ର ଚିକିତ୍ସା କରାଯିବ ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ।
ଖୋର୍ଦ୍ଧା: ପାଖେଇ ଆସିଲାଣି ରାକ୍ଷୀ ପୂର୍ଣିମା। ଭାଇ ଭଉଣୀଙ୍କ ପାଇଁ ଏହି ଦିନଟି ବେଶ ମହତ୍ବ ହୋଇଥାଏ । ଭାଇ ହାତରେ ରାକ୍ଷୀ ବାନ୍ଧିବ ଭଉଣୀ ଆଉ ଲୋଡିବ ସୁରକ୍ଷାର ପ୍ରତିଶ୍ରୃତି । ଏଥିପାଇଁ ବଜାର ମାନଙ୍କରେ ରାକ୍ଷୀ ବ୍ୟବସାୟ ଜମିଛି । ରଙ୍ଗ ବେରଙ୍ଗ ବିଭିନ୍ନ ଡିଜାଇନର ରାଖି ରହିଛି ଦୋକାନରେ । ଭଉଣୀ ମାନେ ଆସି ତାଙ୍କ ମନପସନ୍ଦର ରାକ୍ଷୀ ନେଇ ଯାଉଛନ୍ତି ଘରକୁ ।
ଚଳିତ ବର୍ଷ ଦୁଇଟା ଶ୍ରାବଣ ପଡୁଥିବାରୁ ବହୁତ୍ ଦିନ ଆଗରୁ ଜଟଣୀ ବଜାର ରେ ରାକ୍ଷୀ ଗୋଦାମ ଖୋଲିଛି। କଲିକତା, ବମ୍ବେରୁ ରାକ୍ଷୀ ଆଣି ଜଟଣୀର ବ୍ୟବସାୟୀ ମାନେ ସାରା ଓଡ଼ିଶାରେ ବିଭିନ୍ନ ଷ୍ଟଲ୍କୁ ଯୋଗାଇଥାନ୍ତି। ଚଳିତ ବର୍ଷ, ତୁଳା ରାକ୍ଷୀ, ମାଳି ରାକ୍ଷୀ, ଲୁମ୍ବା ରାକ୍ଷୀ, ସହ ଚନ୍ଦନ ସିନ୍ଦୂର ରାକ୍ଷୀ ମଧ୍ୟ ମିଳୁଛି । ୫ ଟଙ୍କାରୁ ଆରମ୍ଭ କରି ୫୦୦ଟଙ୍କା ପର୍ଯ୍ୟନ୍ତ ରାକ୍ଷୀ ରହିଛି । ଚଳିତ ବର୍ଷ ଭୟ ବ୍ୟବସାୟ ହେଉଥିବାରୁ ବ୍ୟବସାୟୀ ବି ଖୁସି ।
ଆସ୍କା: ଜରାଜୀର୍ଣ୍ଣ ଅବସ୍ଥାରେ ପଡିଛି ଗଞ୍ଜାମ କବିସୂର୍ଯ୍ୟନଗରର ଗାନ୍ଧିଜୀ ସଙ୍ଗୀତ କଳା ମନ୍ଦିର । ଦିନେ ଶିକ୍ଷାର୍ଥୀଙ୍କ ଗହଳି ଜମୁଥିବା ଘର ଆଜି ଅସାମାଜିକ ବ୍ୟକ୍ତିଙ୍କର ଆଡ୍ଡାସ୍ଥଳୀ ପାଲଟିଛି । ନାଁ ଶୁଭୁଛି ବୀଣାର ସ୍ୱର ନାଁ ବାଜୁଛି ବାଦ୍ୟ । ଅଧାଭଙ୍ଗା ଅନୁଷ୍ଠାନରେ ଲକ୍ଷ ଲକ୍ଷ ଟଙ୍କାର ସରଞ୍ଜାମ ମାଟିରେ ମିଶିବାକୁ ବସିଲାଣି l
ସଙ୍ଗୀତ ଶିକ୍ଷା କରି ଦେଶ ବିଦେଶରେ ସୁନାମ ଅର୍ଜନ କରୁଥିଲେ ବିଦ୍ୟାର୍ଥୀ । ଗଞ୍ଜାମ ଜିଲ୍ଲା କବିସୂର୍ଯ୍ୟନଗରର ଏହି ଗାନ୍ଧିଜୀ ସଙ୍ଗୀତ କଳା ମନ୍ଦିରରେ ପଢୁଥିଲେ ଅନେକ ଛାତ୍ର । କିନ୍ତୁ ଆଜି ଅବହେଳିତ ହୋଇ ପଡିଛି ଏହି ପୂରାତନ ଅନୁଷ୍ଠାନ । ଫଳରେ ଅସାମାଜିକ ବ୍ୟକ୍ତିଙ୍କର ଏହା ଆଡ୍ଡାସ୍ଥଳୀ ପାଲଟିଛି । ଘଞ୍ଚ ଜଙ୍ଗଲରେ ପରିପୂର୍ଣ୍ଣ ଗାନ୍ଧିଜୀ ସଙ୍ଗୀତ କଳା ମନ୍ଦିର ଆଜି ଭଗ୍ନ ଅବସ୍ଥାରେ ପଡ଼ିଥିବା ବେଳେ ଲକ୍ଷ ଲକ୍ଷ ଟଙ୍କାର ସରଞ୍ଜାମ ମାଟିରେ ମିଶିବାକୁ ବସିଗଲାଣି l
୧୯୯୯ ମସିହା ମହାବାତ୍ୟା ପରଠାରୁ ଅବହେଳିତ ଅବସ୍ଥାରେ ପଡିଛି ଗାନ୍ଧିଜୀ ସଙ୍ଗୀତ କଳା ମନ୍ଦିର । ବାରମ୍ବାର ଅଭିଯୋଗ ପରେ ବି ପ୍ରଶାସନ ପକ୍ଷରୁ ଏଥିପ୍ରତି କାହାରି ନିଘା ନାହିଁ । ଜିଲ୍ଲା ପ୍ରଶାସନ ପକ୍ଷରୁ ଖୁବଶୀଘ୍ର ଲୁଚି ଯାଇଥିବା ଗାନ୍ଧିଜୀ କଳା ମନ୍ଦିର ପ୍ରତି ଦୃଷ୍ଟି ଦେଲେ ପୁଣି ଏହି ସ୍ଥାନ ପୁର୍ବ ଅବସ୍ଥାକୁ ଫେରି ଆସିବ ବୋଲି ସ୍ଥାନୀୟ ଲୋକେ କହିଛନ୍ତି l ଜରାଜୀର୍ଣ୍ଣ ଅବସ୍ଥାରେ ପଡ଼ିଥିବା ଗାନ୍ଧିଜୀ କଳା ମନ୍ଦିରକୁ ଖୁବଶୀଘ୍ର କାର୍ଯ୍ୟକାରୀ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ଦାୟିତ୍ୱରେ ଥିବା କାର୍ଯ୍ୟନିର୍ବାହୀ ଅଧିକାରୀ l
ଦେବଗଡ଼: ପକ୍କା ପୋଲ ଭାଙ୍ଗିଯିବା ପରେ ହନ୍ତସନ୍ତ ଗ୍ରାମବାସୀ । ଅସ୍ଥାୟୀ କାଠ ପୋଲ ଦେଇ ଯିବା ଆସିବା କରୁଛନ୍ତି ପିଲାରୁ ବୟସ୍କ। ସେଇ ରାସ୍ତା ଦେଇ ଯିବାକୁ ହୁଏ ସ୍କୁଲ ଏବଂ ବଜାର । କେତେବେଳେ ଏହି କାଠ ପୋଲ ଭାଙ୍ଗି ଅଘଟଣ ଘଟିବ ତାହା କହିବା ମୁସକିଲ୍ । ଦେବଗଡ଼ ତିଳେଇବଣି ବ୍ଲକ ଦେଓଶୁଙ୍କୁଳି ଗାଁରୁ ଆସିଛି ଏଭଳି ଖବର । ୪ ବର୍ଷ ହେବ ଏଠାରେ ପକ୍କା ପୋଲ ଭାଙ୍ଗିଯିବା ପରେ ଏଇ କାଠ ପୋଲ ସାଜିଛି ଲୋକଙ୍କ ଦୈନ୍ଦନ୍ଦିନ ଯିବା ଆସିବାର ବିପଦପୂର୍ଣ୍ଣ ମାଧ୍ୟମ ।
ଗାଁର ପକ୍କା ପୋଲ ଭାଙ୍ଗିଯିବାରୁ ଧସିବାରେ ଲାଗିଛି ମାଟି ଅତଡ଼ା । ଯାହାଫଳରେ ଗାଁକୁ ଆମ୍ବୁଲାନ୍ସ ପହଞ୍ଚିପାରୁନି । ଜରୁରୀକାଳିନ ସେବାରୁ ବଞ୍ଚିତ ହେଉଛନ୍ତି ରୋଗୀ । ଉତ୍ପାଦିତ ଧାନ ଚାଉଳ ହେଉ କି ପନିପରିବା ବଜାରକୁ ବିକ୍ରି ପାଇଁ ନେବାରେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି । ପ୍ରଶାସନିକ ଅଧିକାରୀଙ୍କୁ ଅଭିଯୋଗ ପରେ ବି ଏପର୍ଯ୍ୟନ୍ତ କୌଣସି ସୁବିଧା ହୋଇପାରିନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଗାଁରେ ରାସ୍ତା ଓ ପୋଲ ନିର୍ମାଣ ପାଇଁ ବିଭାଗୀୟ ମଞ୍ଜୁରୀ ପାଇଁ ପଠା ଯାଇଥିଲେ ମଧ୍ୟ ଅର୍ଥ ଅଭାବ କାରଣରୁ ଏହା ନିର୍ମାଣ କରାଯାଇ ପାରିନଥିବା କହିଛନ୍ତି ତିଳେଇବଣି ବ୍ଲକ ସହକାରୀ ଯନ୍ତ୍ରୀ ।
