ସମ୍ବଲପୁର: ସମ୍ବଲପୁର ମହାନଗର ନିଗମରେ କାର୍ଯ୍ୟରତ ଜଣେ କିନ୍ନରଙ୍କୁ ଦୁର୍ବ୍ୟବହାର ଅଭିଯୋଗ । ମହାନଗର ନିଗମରେ କାର୍ଯ୍ୟରତ ଷ୍ଟେନୋ ମିନତି ପଣ୍ଡାଙ୍କ ବ୍ୟକ୍ତିଗତ ଡ୍ରାଇଭର ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି l ଏନେଇ କିନ୍ନର ଯୋଗେଶ୍ବର ଓରାମ ଡେପୁଟି କମିଶନରଙ୍କ ନକଟରେ ଲିଖିତ ଅଭିଯୋଗ କରିବା ସହ କ୍ଷେତରାଜପୁର ଥାନାରେ FIR ଦେଇଛନ୍ତି । ଜିଲ୍ଲା କିନ୍ନର ସଂଘ ସଭାପତିଙ୍କ ସହ ଜିଲ୍ଲାପାଳଙ୍କୁ ମଧ୍ୟ ଏକ ଲିଖିତ ଅଭିଯୋଗ କରିଛନ୍ତି । ନିଧି ମେହେତା ଓରାମ ସମ୍ବଲପୁର ସିଟି ମିଶନ ମେନେଜର ପୋଷ୍ଟରେ କାର୍ଯ୍ୟ କରନ୍ତି । ମହାନଗର ନିଗମର ଷ୍ଟେନୋ ମିନତି ପଣ୍ଡାଙ୍କ ବ୍ୟକ୍ତିଗତ ଡ୍ରାଇଭର ତାଙ୍କ କାର୍ଯ୍ୟାଳୟକୁ ଆସି ନିଧିଙ୍କ ଫୋଟ ଉଠାଉଥିଲା l ନିଧି ତାର ପ୍ରତିବାଦ କରିବାରୁ ତାଙ୍କୁ ଅସଭ୍ୟ ଭାଷାରେ ଗାଳି କରିବା ସହ ଅଶ୍ଳୀଳ ଭିଡିଓ ଦେଖେଇବାକୁ ଚେଷ୍ଟା କରିଥିଲା l ଘଟଣା ବିଷୟରେ ଷ୍ଟେନୋ ମିନତି ପଣ୍ଡାଙ୍କୁ ଜଣାଇଥିଲେ ନିଧି । ତେବେ ଏନେଇ ପାଟି ନକରି ଚୁପ ରହିବାକୁ ସେ କହିବା ସହ ଅଭିଯୋଗ କଲେ ଚାକିରି ନେଇଯିବାକୁ ଧମକ ଦେଇଥିବା ସେ ଅଭିଯୋଗ କରିଛନ୍ତି ।
ଖାଉଟିଙ୍କୁ ମିଳିଲା ଆଶ୍ବସ୍ତି, ଖସୁଛି ଟମାଟୋ ଦର
ଭୁବନେଶ୍ବର: ଖାଉଟିଙ୍କୁ ମିଳିଲା ଆଶ୍ବସ୍ତି । ଧିରେ ଧିରେ ଖସୁଛି ଟମାଟୋ ଦର । ମହଙ୍ଗା ଟମାଟୋ ଏବେ କ୍ରମାଗତ ଭାବରେ ଶସ୍ତା ହେଉଛି । ଗତ ୨ ମାସ ହେଲା ଟମାଟୋ ଦର ଲୋକଙ୍କୁ କନ୍ଦାଉଥିଲା । ବର୍ତ୍ତମାନ ବଜାରରେ ଟମାଟର କିଲୋଗ୍ରାମ୍ ପ୍ରତି ୫୦ ଟଙ୍କାରେ ମିଳୁଛି । କିଛି ସ୍ଥାନରେ ପରିବହନ ଖର୍ଚ୍ଚ କାରଣରୁ ଦାମ ୬୦ ଟଙ୍କା କିମ୍ବା ୭୦ ଟଙ୍କା ପର୍ଯ୍ୟନ୍ତ ରହୁଛି । କିଛି ସ୍ଥାନରେ ଏହା ୮୦ ଟଙ୍କାରେ ମଧ୍ୟ ରହିଛି । ଏହାରି ମଧ୍ୟରେ ଆଉ ଏକ ବଡ଼ ଘୋଷଣା କରିଛନ୍ତି କେନ୍ଦ୍ର ସରକାର । ଦେଶରେ ଟମାଟୋର ଦାମ୍ ସାମାନ୍ୟ ସ୍ତରକୁ ନଆସିବା ଯାଏଁ ସବସିଡି ହାରରେ ଟମାଟୋ ବିକ୍ରି ଜାରି ରହିବ । ବିଗତ ଦିନରେ ବର୍ଷା ଓ ବନ୍ୟା କାରଣରୁ ଫସଲ ନଷ୍ଟ ହୋଇଥିଲା । ଦେଶର ଅନେକ ରାଜ୍ୟରେ ଟମାଟୋ କେଜି ପିଛା ୨୫୦ ଟଙ୍କା ପର୍ଯ୍ୟନ୍ତ ପହଞ୍ଚି ଯାଇଥିଲା । ରୋଷେଇ ଘରୁ ଟମାଟୋ ଉଭାନ୍ ହୋଇଯାଇଥିଲା । ମଧ୍ୟବିତ୍ତ, ଧନୀ ସବୁ ବର୍ଗର ଲୋକଙ୍କୁ ପ୍ରଭାବିତ କରିଥିଲା ଟମାଟୋ ଦର ।
ଡିଏମଏଫ କାର୍ଯ୍ୟକାରିତାର ସମୀକ୍ଷା
ଭୁବନେଶ୍ବର: ଜିଲ୍ଲା ଖଣିଜ ପ୍ରତିଷ୍ଠାନ ପାଣ୍ଠି (ଡିଏମ୍ଏଫ୍)ର କାର୍ଯ୍ୟକାରିତା ସମ୍ପର୍କରେ ତଦାରଖ ଓ ସମୀକ୍ଷା ବୈଠକ ରାଜ୍ୟସ୍ତରୀୟ କମିଟି ଦ୍ୱାରା ସୋମବାର ଅପରାହ୍ନରେ ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଡିଏମ୍ଏଫ୍ ପାଣ୍ଠି ଦ୍ୱାରା ଯେପରି ଖଣିଜ ଅଂଚଳର ଲୋକେ ଅଧିକ ଉପକୃତ ହେବେ, ମୁଖ୍ୟ ଶାସନ ସଚିବ ସେଥିପ୍ରତି ଗୁରୁତ୍ୱ ଦେଇଥିଲେ । ପାନୀୟଜଳ, ଅଙ୍ଗନୱାଡିକେନ୍ଦ୍ର, ଜୀବିକାର୍ଜନ କାର୍ଯ୍ୟକ୍ରମ, ଭିତ୍ତିଭୂମି ବିକାଶ ପ୍ରକଳ୍ପ ଆଦିଗୁଡ଼ିକ ଉପରେ ଗୁରୁତ୍ୱ ଦେଇଛନ୍ତି । ଡିଏମଏଫ୍ ପାଣ୍ଠିରେ ସଂପୃକ୍ତ ଅଂଚଳରେ ଗ୍ରାମ୍ୟ ଉନ୍ନୟନ, ପୂର୍ତ୍ତ ବିଭାଗ ଓ ପଞ୍ଚାୟତ ସଡ଼କଗୁଡିକୁ ଭଲ ଭାବରେ କରାଯାଇପାରିବ, ସେ ସଂପର୍କରେ ଗୁରୁତ୍ୱାରୋପ କରାଯାଇଥିଲା । ଫସଲ ଅମଳ ପରବର୍ତ୍ତୀ ସଂରକ୍ଷଣ ଏବଂ “ମା ଗୃହ” ପ୍ରକଳ୍ପ ଉପରେ ସେ ଗୁରୁତ୍ୱ ଦେଇଛନ୍ତି । ପାଣ୍ଠି ପ୍ରଦାନ ଓ ଖର୍ଚ୍ଚ ସଂବନ୍ଧୀୟ ତଥ୍ୟ ଓ ପ୍ରକଳ୍ପ ପରିଚାଳନା ତଥ୍ୟକୁ ସଠିକ ରଖି ଯୋଜନା ଅନୁମୋଦନ ମୁତାବକ କାର୍ଯ୍ୟକରି ଖର୍ଚ୍ଚ ବୃଦ୍ଧି କରିବାକୁ ସେ ଗୁରୁତ୍ୱ ଦେଇଛନ୍ତି । ଜଳସେଚନ ଉତ୍ସର ସୁବିଧା ନିଆଯାଇ ସଂପୃକ୍ତ ଅଂଚଳରେ ଜଳସେଚନ ସୁବିଧା ପ୍ରକଳ୍ପକୁ ଗୁରୁତ୍ୱ ଦେଇଛନ୍ତି । ଅନୁଗୋଳ, ଯାଜପୁର, ଝାରସୁଗୁଡ଼ା, କେନ୍ଦୁଝର ଓ ସୁନ୍ଦରଗଡ଼ ଆଦିରେ ପ୍ରମୁଖ ଡିଏମ୍ଏଫ୍ ଜିଲ୍ଲାଗୁଡିକୁ ଓଏଏସ୍ ଏବଂ ଓଡ଼ିଶା ଅର୍ଥସେବା ବା ଓଟିଏସ୍ରୁ ଅଧିକାରୀମାନେ ନିୟୋଜିତ କରିବାକୁ ପରାମର୍ଶ ଦେଇଛନ୍ତି । ସଂପୃକ୍ତ ସଚିବ ଓ ଜିଲ୍ଲାପାଳମାନଙ୍କ ଉପସ୍ଥିତିରେ ଆଗାମୀ ସେପ୍ଟେମ୍ବର ୨ୟ ସପ୍ତାହରେ ଡିଏମ୍ଏଫ୍ ଏବଂ ଓମ୍ବାଡସି ଅଂଚଳର ବିକାଶ ପାଇଁ ବ୍ୟାପକ ଯୋଜନା ସଂପର୍କରେ ସ୍ୱତନ୍ତ୍ର ବୈଠକରେ ଆଲୋଚନା କରିବାକୁ ସେ କହିଥିଲେ । ଜିଲ୍ଲାଗୁଡ଼ିକର ଡିଏମ୍ସ୍ ପାଣ୍ଠି ଉପଯୋଗର ଅଡିଟ୍ ରିପୋର୍ଟ ଓ ବାର୍ଷିକ ରିପୋର୍ଟ ପ୍ରଦାନ ପାଇଁ ଗୁରୁତ୍ୱାରୋପ କରାଯାଇଥିଲା ।
ବୈଠକରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗ, ଗ୍ରାମ୍ୟ ଉନ୍ନୟନ ତଥା ସୂଚନା ଓ ଲୋକସଂପର୍କ ପ୍ରମୁଖ ଶାସନ ସଚିବ ସଂଜୟ କୁମାର ସିଂ , ସ୍ୱାସ୍ଥ୍ୟ ସଚିବ ଶାଳିନୀ ପଣ୍ଡିତ , ବିଦ୍ୟାଳୟ ଓ ଗଣଶିକ୍ଷା ବିଭାଗ କମିଶନର ତଥା ଶାସନ ସଚିବ ଆଶ୍ୱତୀ ଏସ୍, ଯୋଜନା ଓ ସଂଯୋଜନ ବିଭାଗ ସ୍ୱତନ୍ତ୍ର ଶାସନ ସଚିବ ଭାସ୍କର ଜ୍ୟୋତି ଶର୍ମାଙ୍କ ସମେତ କମିଟିର ଅନ୍ୟ ସଦସ୍ୟମାନେ ଉପସ୍ଥିତ ଥିଲେ ।
ନିଯୁକ୍ତି ହେବେ ୨୦ ହଜାର କନିଷ୍ଠ ଶିକ୍ଷକ
ଭୁବନେଶ୍ବର: କନିଷ୍ଠ ଶିକ୍ଷକ ନିଯୁକ୍ତି ନେଇ ରାଜ୍ୟ ସରକାରଙ୍କ ବଡ଼ ଘୋଷଣା । ନିଯୁକ୍ତି ହେବେ ୨୦ ହଜାର କନିଷ୍ଠ ଶିକ୍ଷକ । କନିଷ୍ଠ ଶିକ୍ଷକ ନିଯୁକ୍ତି ନିୟମାବଳୀରେ ସଂଶୋଧନ ହୋଇଛି । ଏନେଇ ବିଦ୍ୟାଳୟ ଗଣଶିକ୍ଷା ବିଭାଗରୁ ବିଜ୍ଞପ୍ତି ପ୍ରକାଶ ପାଇଛି ।
ଘର ସଜାଡ଼ିବାକୁ କଂଗ୍ରେସର ପ୍ରୟାସ ଆରମ୍ଭ
ଭୁବନେଶ୍ବର: ଘର ସଜାଡ଼ିବାକୁ ପ୍ରୟାସ ଆରମ୍ଭ କରିଛି କଂଗ୍ରେସ । କିପରି ତୃଣମୂଳସ୍ତରରୁ ସଂଗଠନ ସଜଡ଼ାଯିବ ସେ ନେଇ ହାଇକମାଣ୍ଡଙ୍କ ନିର୍ଦ୍ଦେଶରେ CWC ସଦସ୍ୟ କେ. ରାଜୁ ଜିଲ୍ଲା ସଭାପତିଙ୍କ ଠାରୁ ନେଇ ରାଜ୍ୟ ମଙ୍ଗୁଆଳ ମାନଙ୍କ ସହ ଆଲୋଚନା କରିଛନ୍ତି । ଆଉ ଏହାରି ଭିତରେ କେ. ରାଜୁଙ୍କ ଆଗରେ ପିସିସି ସଭାପତିଙ୍କ ନେତୃତ୍ବକୁ ନେଇ ଅସନ୍ତୋଷ ଜାହିର କରିଛନ୍ତି ଦଳୀୟ ନେତା । ସମସ୍ତଙ୍କୁ ନେଇ ଦଳ ଆଗକୁ ବଢିବା କଥା କେନ୍ଦ୍ରୀୟ ନେତାଙ୍କୁ କଥାକୁ ସୁର ରାଉତରାୟ ଦୋହରାଇଥିବା ବେଳେ ସଂଗଠନ ନୂଆ ରୂପ ନେବାକୁ ଯାଉଥିବା ସଙ୍କେତ ଦେଇଛନ୍ତି ତାରା ବାହିନୀପତି । ଯାହା ଶରତଙ୍କ ପାଇଁ ଅଡୁଆ ସୃଷ୍ଟି କରିବ ।
ସମସ୍ତଙ୍କୁ ନେଲେ ଦଳ ଜିତିବ, ନହେଲେ ହାରିବ । କଂଗ୍ରେସ ଏକଜୁଟ ହେବା ଆବଶ୍ୟକ । CWC ସଦସ୍ୟ କେ. ରାଜୁ ଦୁଇଦିନ ଧରି ଦଳୀୟ ନେତାଙ୍କୁ ଦେଇଥିବା ଏପରି ଏକ ମନ୍ତବ୍ୟ ପିସିସି ସଭାପତି ଶରତ ପଟ୍ଟନାୟକଙ୍କ ନେତୃତ୍ବକୁ ଆଡକୁ ଉଠାଇଛି ଆଙ୍ଗୁଳି । କଂଗ୍ରେସ ଏବେ ବିଜେପିର ବି-ଟିମ ହୋଇ କାମ କରୁଥିବା ଅଭିଯୋଗ ହୋଇଛି । ପିସିସି ସଭାପତିଙ୍କ ଏକପାଖିଆ ନିଷ୍ପତ୍ତିକୁ ନେଇ ଦଳ ଭିତରେ ଥିବା ଅସନ୍ତୋଷ, କେନ୍ଦ୍ରୀୟ ନେତା କେଉଁଠି ନା କେଉଁଠଟି ଅନୁଭବ କରିଥିବା ସୁରଙ୍କ ବୟାନରୁ ସ୍ପଷ୍ଟ ଜଣାପଡ଼ୁଛି । ଅନ୍ୟପଟେ କଂଗ୍ରେସର ଅସନ୍ତୋଷ ନେତା ମଧ୍ୟ ଗଣମାଧ୍ୟମ ଆଗରେ ଖୋଲାଖୋଲି ଭାବେ ପିପିସି ସଭାପତି ବିଜେପି କଥାରେ ପରିଚାଳିତ ବୋଲି ଅଭିଯୋଗ କରିଛନ୍ତି । ଏ ବିଷୟରେ ହାଇକମାଣ୍ଡ ଅବଗତ ଥିବାରୁ ଖୁବଶୀଘ୍ର ଓଡ଼ିଶା କଂଗ୍ରେସରେ ବଡ଼ ପରିବର୍ତ୍ତନ ହେବାକୁ ଯାଉଥିବା କହିଛନ୍ତି ଅସନ୍ତୋଷ କଂଗ୍ରେସ ନେତା ।
ଅନ୍ୟପଟେ କଂଗ୍ରେସ ୨୦୨୪ ପାଇଁ ପ୍ରସ୍ତୁତି ଆରମ୍ଭ କରିଦେଇଥିବା ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି । ସବୁ ଜିଲ୍ଲା ସଭାପତିଙ୍କୁ ନେଇ କଂଗ୍ରେସ ଭବନରେ ତାଲିମ ଦିଆଯାଉଛି। ଲକ୍ଷ୍ୟ ରହିଛି, କେମିତି ତୃଣମୂଳସ୍ତରରୁ ସଂଗଠନକୁ ସଜଡ଼ା ଯିବ । କଂଗ୍ରେସକୁ ନୂଆ ରୂପ ଦେବାକୁ ହାଇକମାଣ୍ଡ ଫୋକସ କରିଥିବା ତାରା କହିଛନ୍ତି । ସେ ପିସିସି ସଭାପତି ରେସରେ ନାହାନ୍ତି । ସୋନିଆ ଗାନ୍ଧୀ, ରାହୁଲ ଗାନ୍ଧୀ ଯାହାକୁ ଚାହିବେ ସେ ପିସିସି ସଭାପତି ହେବେ ବୋଲି ତାରା କହିଛନ୍ତି ।
ପିସିସି ସଭାପତିଙ୍କ ବିଜେପି ସହ ଭିତିରିଆ ସମ୍ପର୍କ ଏବଂ କଂଗ୍ରେସ ସଂଗଠନ କୋମାକୁ ଚାଲିଯାଉଥିବା ଅଭିଯୋଗ କରି ଦଳର ହେଭିଓ୍ବେଟ ଗୋଷ୍ଠୀ ଭୁବେନଶ୍ବରରୁ ଦିଲ୍ଲୀ ଯାଏ ମାନସ ମନ୍ଥନ କରୁଛନ୍ତି । ଏହାରି ଭିତର ଏଆଇସିସି ଅଧ୍ୟକ୍ଷ ଖଡ଼ଗେଙ୍କ ୩୯ ଜଣିଆ ଟିମରେ ଓଡ଼ିଶାରେ କେହିନେତା ସାମିଲ ନହେବାକୁ ନେଇ ରାଜ୍ୟ କଂଗ୍ରେସରେ ଅସନ୍ତୋଷ ଉଗ୍ରରୂପ ନେଇଛି । କେ. ରାଜୁଙ୍କ ଗସ୍ତ ରାଜ୍ୟ କଂଗ୍ରେସରେ ବଡ଼ ଧରଣର ପରିବର୍ତ୍ତନର ବାଟ ଫିଟାଉଛି ବୋଲି କଂଗ୍ରେସ ଅନ୍ଦର ମହଲରେ ଜୋରଦାର ଚର୍ଚ୍ଚା ହେଉଛି ।
ଦେବଭୂମିରେ କମୁନି ପ୍ରକୃତିର ତାଣ୍ଡବ
ନନ୍ଦିଘୋଷ ବ୍ୟୁରୋ: ଦେବଭୂମିରେ ପ୍ରକୃତିର ତାଣ୍ଡବ । ସପ୍ତାହେ ଧରି ପ୍ରଳୟଙ୍କରୀ ବନ୍ୟା, ଭୂସ୍ଖଳନ ପରେ ଆଜି ପୁଣି ଆରମ୍ଭ ହୋଇଛି ବର୍ଷା । ପ୍ରବଳ ବର୍ଷା ସହ ଭୂସ୍ଖଳନ ଯୋଗୁ ଉତ୍ତରାଖଣ୍ଡର ତେହରି ଜିଲ୍ଲାରେ ୪ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଜଣେ ମହିଳା ଓ ଜଣେ ୪ବର୍ଷର ଶିଶୁ ରହିଛନ୍ତି । ଚାମ୍ବା ପୋଲିସ ଷ୍ଟେସନ ନିକଟର ଟାକ୍ସି ଷ୍ଟାଣ୍ଡ ପାର୍ଶ୍ବରେ ଭୟଙ୍କର ଭୂସ୍ଖଳନ ଯୋଗୁ ଆହୁରି ଏକାଧିକ ଗାଡ଼ି ମାଟି ତଳେ ଦବି ରହିଛି । ଫଳରେ ଅନେକ ଲୋକ ଫସି ରହିଥିବା ଆଶଙ୍କା କରାଯାଉଛି । ସ୍ଥାନୀୟ ପ୍ରଶାସନ ଓ ଅଗ୍ନିଶମ ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛଇ । ଲ୍ୟାଣ୍ଡସ୍ଲାଇଡ ଯୋଗୁ ତେହରି-ଚାମ୍ବା ରାସ୍ତାରେ ଯାତାୟାତ ବନ୍ଦ ରହିଛି । SDRF ପକ୍ଷରୁ ରାସ୍ତା ସଫେଇ କାର୍ଯ୍ୟ ଚାଲିଛି । ଆଗାମୀ ଦୁଇ ଦିନ ପାଇଁ ରାଜ୍ୟର ଅଧିକାଂଶ ଜିଲ୍ଲାରେ ଅତି ପ୍ରବଳ ବର୍ଷା ନେଇ ସତର୍କତା ଜାରି କରାଯାଇଥିବା ବେଳେ ସମସ୍ତ ସ୍କୁଲ, କଲେଜ ଓ ଅଙ୍ଗନଓ୍ବାଡି କେନ୍ଦ୍ର ବନ୍ଦ ରଖାଯାଇଛି । ଆଜି ସକାଳୁ ଅଧିକାଂଶ ଜିଲ୍ଲାରେ ବର୍ଷା ସହ ଭୂସ୍ଖଳନ ଜାରି ରହିଛି । ଆଜି ପାଇଁ ଡେରାଡୁନ, ପଉରୀ, ନୈନିତାଲ, ଚମ୍ବାଓ୍ବତ ଓ ବାଗେଶ୍ବର ଜିଲ୍ଲାକୁ ପାଣିପାଗ ବିଭାଗ ପକ୍ଷରୁ ଅରେଞ୍ଜ ଆଲର୍ଟ ଜାରି କରାଯାଇଛି । ଋଷିକେଶ-ବଦ୍ରିନାଥ ୫୮ନମ୍ବର ଜାତୀୟ ରାଜପଥ ଚମୋଲି ନିକଟରେ ୨୫୦ ମିଟର ଧସିଯାଇଛି । ଫଳରେ ସେହି ରାସ୍ତା ଦେଇ ଗାଡ଼ିମୋଟର ଚଳାଚଳ ବନ୍ଦ ରହିଛି । ହିମାଚଳ ପ୍ରଦେଶରେ ବି ଆଜି ଓ ଆସନ୍ତାକାଲି ପ୍ରବଳୁ ଅତି ପ୍ରବଳ ବର୍ଷା ନେଇ ସତର୍କ କରିଛି ପାଣିପାଗ ବିଭାଗ । ଦୁଇ ଦିନ ଧରି ସାରାରାଜ୍ୟରେ ପ୍ରବଳ ବର୍ଷା ସହ ଭୂସ୍ଖଳନ ହୋଇପାରେ । ଭୂସ୍ଖଳନ ଜୋନରେ ରେସ୍କ୍ୟୁ ଟିମ୍ ଆଲର୍ଟ ରଖିବାକୁ ନିର୍ଦ୍ଦେଶ ଦିଆଯାଇଛି । ସୋଲନରେ ମାଜରୀ ଗାଁ ସମ୍ପୂର୍ଣ୍ଣ ମାଟିରେ ମିଶି ଯାଇଥିବା ବେଳେ କଟଲ ପକୌଟି ଗାଁରେ ଅନେକ ଘର ବିପଦସଙ୍କୁଳ ଅବସ୍ଥାରେ ରହିଛି । ୧୭ ପରିବାର ବାସିହିନ ହୋଇଛନ୍ତି । ଅଗଷ୍ଟ ଶେଷ ସପ୍ତାହରେ ବି ରାଜ୍ୟରେ ବର୍ଷା ବିପତ୍ତି ଜାରି ରହିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ ।
ଚନ୍ଦ୍ରଯାନ ଲ୍ୟାଣ୍ଡିଂର କାଉଣ୍ଟଡାଉନ, ବିଶ୍ବ ଦେଖିବ ଭାରତର ଐତିହାସିକ ସଫଳତା
ନନ୍ଦିଘୋଷ ବ୍ୟୁରୋ: ଚନ୍ଦ୍ରଯାନ ଲ୍ୟାଣ୍ଡିଂର କାଉଣ୍ଟଡାଉନ । ବିଶ୍ବ ଦେଖିବ ଭାରତର ଐତିହାସିକ ସଫଳତା । ମହାକାଶ ବିଜ୍ଞାନ ଇତିହାସରେ ସ୍ବର୍ଣ୍ଣିମ ଫର୍ଦ୍ଦ ଯୋଡ଼ିବ ଇସ୍ରୋ । ଆସନ୍ତାକାଲି ଚନ୍ଦ୍ରରେ ଗୃହପ୍ରବେଶ କରିବ ଚନ୍ଦ୍ରଯାନ-୩ । ସାଉଥ ପୋଲରେ ସଫ୍ଟ ଲ୍ୟାଣ୍ଡିଂ କରିବ ଚନ୍ଦ୍ରଯାନ । ପ୍ରତିକୂଳ ପରିସ୍ଥିତି ପାଇଁ ପ୍ଲାନ-ବି ପ୍ରସ୍ତୁତ ରଖିଛି ଇସ୍ରୋ । ମୁନ ମିଶନର ସଫଳତା କାମନା କରି ବିଭିନ୍ନ ମନ୍ଦିରରେ ହୋମଯଜ୍ଞ ସହ ଜଳଲାଗି କରାଯାଇଛି ।
ଆସନ୍ତାକାଲି ଚନ୍ଦ୍ରରେ ଗୃହପ୍ରବେଶ କରିବ ଚନ୍ଦ୍ରୟାନ-୩ । ସଂଶୟ ସମ୍ଭାବନାର ମୁହୂର୍ତ୍ତ । ଆଉ କିଛି ଘଣ୍ଟାର ଅପେକ୍ଷା । ସଫଳତାର ଶୀର୍ଷ ଛୁଇଁବ ଇସ୍ରୋ । ମହାକାଶ ବିଜ୍ଞାନ ଇତିହାସରେ ଯୋଡ଼ି ହେବ ନୂଆ ଫର୍ଦ୍ଦ । ପାର୍ଟସ ଚେକିଂ ସହ ଚାଲିଛି ସିଷ୍ଟମ ଭେରିଫେକେସନ । କଣ୍ଟ୍ରୋଲ ରୁମରେ ଅନବରତ ପ୍ରଚେଷ୍ଟା । ପ୍ରତିକୂଳ ପରିସ୍ଥିତି ପାଇଁ ପ୍ଲାନ-ବି ପ୍ରସ୍ତୁତ ।… କାଲି ସନ୍ଧ୍ୟାରେ ଚନ୍ଦ୍ରପୃଷ୍ଠରେ ସଫ୍ଟ ଲ୍ୟାଣ୍ଡିଂ କରିବ ଚନ୍ଦ୍ରଯାନ । ଋଷ, ଆମେରିକା, ଚୀନ ପରେ ଭାରତ ସାଜିବ ଚତୁର୍ଥ ସୁପର ପାଓ୍ବାର । ଇସ୍ରୋ ବୈଜ୍ଞାନିକଙ୍କ ଐତିହାସିକ ଓ ମହତ୍ତ୍ବାକାଂକ୍ଷୀ ମିଶନ ଉପରେ ସାରାବିଶ୍ବର ନଜର ରହିଛି । କାଲି ସନ୍ଧ୍ୟା ୬ଟା ୪ମିନିଟରେ ସଫ୍ଟ ଲ୍ୟାଣ୍ଡିଂ ପାଇଁ ସବୁ ପ୍ରସ୍ତୁତି ଶେଷ ହୋଇଛି । ପ୍ରତିକୂଳ ପରିସ୍ଥିତିରେ ଲ୍ୟାଣ୍ଡିଂ ପ୍ରକ୍ରିୟା ଘୁଞ୍ଚାଇବାକୁ ଯୋଜନା ରଖିଛି ଇସ୍ରୋ । କାଲି ଚନ୍ଦ୍ରଯାନ ଅବତରଣରେ ସମସ୍ୟା ଉପୁଜିଲେ ଆସନ୍ତା ୨୭ ତାରିଖରେ ଲ୍ୟାଣ୍ଡିଂ କରାଯିବାକୁ ଯୋଜନା କରାଯାଇଛି । ଆଜି ଚନ୍ଦ୍ରପୃଷ୍ଠରୁ କିଛି ନୂଆ ଭିଡିଓ ପଠାଇଛି ଚନ୍ଦ୍ରଯାନ-୩ । ଲ୍ୟାଣ୍ଡର କ୍ୟାମେରାରେ ରେକର୍ଡ ଭିଡିଓ ସୋସିଆଲ ମିଡିଆରେ ସେୟାର କରିଛି ଇସ୍ରୋ ।
ମୁନ ମିଶନର ସଫଳତା ପାଇଁ ହୋମଯଜ୍ଞ । ମନ୍ଦିରରେ ଜଳଲାଗି ସହ ହୋମଯଜ୍ଞ କରି ଐତିହାସିକ ମିଶନର ସଫଳତା କାମନା କରିଛନ୍ତି ଦେଶବାସୀ । ବାରାଣସୀର କାମାକ୍ଷା ମନ୍ଦିରରେ ପୂଜାର୍ଚ୍ଚନା କରାଯାଈ ଇସ୍ରୋ ପ୍ରୋଜେକ୍ଟର ସଫଳତା କାମନା କରାଯାଇଛି । ମୁମ୍ବାଇର ଚନ୍ଦ୍ରମୌଳେଶ୍ବର ମନ୍ଦିରରେ ଶିବସେନା ଉଦ୍ଧବ ଗୋଷ୍ଠୀ ପକ୍ଷରୁ ପୂଜାର୍ଚ୍ଚନା କରାଯାଇଛି । ପ୍ରୟାଗରାଜ ଓ ଭୋପାଳର ବୈଷ୍ଣୋଧାମ ଆଦର୍ଶ ନବଦୁର୍ଗା ମନ୍ଦିରରେ ଜଳ ଲାଗି କରି ଚନ୍ଦ୍ରଯାନ-୩ର ସଫଳତା କାମନା କରାଯାଇଛି । ସେପଟେ ଅହମ୍ମଦାବାଦରେ ଛାତ୍ରଛାତ୍ରୀମାନେ ଭାରତ ସଫଳତାର ଶୀର୍ଷରେ ପହଞ୍ଚୁ ବୋଲି ପ୍ରାର୍ଥନା କରିଛନ୍ତି । ଉତ୍ତରପ୍ରଦେଶର ଲକ୍ଷ୍ନୌରେ ବିଭିନ୍ନ ମସଜିଦରେ ଚନ୍ଦ୍ରୟାନ-୩ର ସଫଳତା ପାଇଁ ନମାଜ ପାଠ ମଧ୍ୟ କରାଯାଇଛି ।
ସୁନ୍ଦରଗଡ଼ ଜିଲ୍ଲାରେ ମାତିଛନ୍ତି ଜମି ମାଫିଆ
ସୁନ୍ଦରଗଡ଼: ସୁନ୍ଦରଗଡ଼ ଜିଲ୍ଲାରେ ମାତିଛନ୍ତି ଜମି ମାଫିଆ । ମୃତ ବ୍ୟକ୍ତିଙ୍କ ନାଁରେ ଜାଲ ଡକ୍ୟୁମଣ୍ଟ କରି ହଡ଼ପ କରିବା ସହ ଅନ୍ୟକୁ ବିକ୍ରି କରୁଛନ୍ତି । ବ୍ରାହ୍ମଣତରଙ୍ଗ ଥାନାରେ ଏମିତି ଅଭିଯୋଗ ଆସିବା ପରେ ତତ୍ପରତା ଦେଖାଇଛି ପୋଲିସ୍ । ଲାଠିକଟା ତହସିଲ ଅନ୍ତର୍ଗତ ରୁତୁକୁପିଢି ଗ୍ରାମରେ ୫ ଏକର ୧୭ ଡିସମିଲ ଜମିକୁ ଜମି ମାଲିକଙ୍କ ଅଗୋଚରରେ ଜାଲିଆତି କରି ବିକ୍ରୀ କରାଯାଇଥିବା ଅଭିଯୋଗ ହୋଇଛି । ଏହି ଜାଲିଆତି ଘଟଣାରେ ତହସିଲର କିଛି କର୍ମଚାରୀଙ୍କ ସଂପୃକ୍ତି ରହିଥିବା ଅଭିଯୋଗ କରିଛନ୍ତି ଜମି ମାଲିକ ।
ମାଲିକଙ୍କ ୪୦ ବର୍ଷ ତଳେ ମୃତ୍ୟୁ ହୋଇଛି । ହେଲେ ସ୍ବର୍ଗରୁ ଆସି ଦସ୍ତଖତ କରି ଜମି ବିକ୍ରି କରୁଛନ୍ତି । ଏକଥା ଆମେ କହୁନୁ । ଖତିଆନ ନମ୍ବର ୪୩, ଲାଠିକଟା ତହସିଲ । ସର୍ବମୋଟ ୧୦ ଏକର ୬୮ ଡେସିମିଲ ଜମି । ଯାହା ସ୍ବର୍ଗତ ସନାତନ ଗୌଡଙ୍କ ନାଁରେ ରହିଛି । ହେଲେ ୪୦ ବର୍ଷ ତଳେ ତାଙ୍କର ମୃତ୍ୟୁ ଘଟିଥିଲେ ସୁଦ୍ଧା ୨୦୨୨ ଏପ୍ରିଲ ୨୬ରେ ସେଥିରୁ ସେ ୫ ଏକର ୧୭ ଡେସିମିଲ ଜମି ବିକ୍ରି କରିଛନ୍ତି । ଏଠି ପ୍ରଶ୍ନ ଉଠୁଛି, ୪୦ ବର୍ଷ ତଳେ ତାଙ୍କର ମୃତ୍ୟୁ ହୋଇଥିବାବେଳେ ସେ ୨୦୨୨ରେ ଜମି ବିକ୍ରି କଲେ କିପରି ? ଜାଲିଆତି କରି ତାଙ୍କ ଜମିକୁ ବିକ୍ରି କରାଯାଇଥିବା ସୁନ୍ଦରଗଡ଼ ଜିଲ୍ଲା ବ୍ରାହ୍ମଣୀ ତରଙ୍ଗ ଥାନାରେ ଅଭିଯୋଗ ହୋଇଛି ।
ସାବିନା ଟପୋ ନିଜ ନାମରେ ଜମି ପଟ୍ଟା କରି ନେଇଥିବା ଅଭିଯୋଗ ହେଵା ସହ ବିକ୍ରିବେଳେ ଜଵାନ୍ଦୁ ଟିଗା, ସରୋଜ କୁମର ଟପୋ, ସାକ୍ଷୀ ଭାଵେ ରହିଥିବା ଅଭିଯୋଗ ହୋଇଛି । ଏହି ଜାଲିଆତି ଘଟଣାରେ ଲାଠିକଟା ତହସିଲ କାର୍ଯ୍ୟାଳୟର ଅଧିକାରୀଙ୍କ ସହ କିଛି କର୍ମଚାରୀଙ୍କ ସମ୍ପୃକ୍ତ ଥିବା ବ୍ରାହ୍ମଣୀ ତରଙ୍ଗ ଥାନାରେ ଅଭିଯୋଗ ହୋଇଛି । ପୋଲିସ ଏନେଇ ଏକ ମାମଲା ରୁଜୁ କରିଥିବାବେଳେ ଜାଲିଆତି ଘଟଣାରେ ସଂପୃକ୍ତ ଲୋକଙ୍କ ବିରୋଧର ଦୃଢ କାର୍ଯ୍ୟାନୁଷ୍ଠାନ ନେଇ ଦାବି ହୋଇଛି ।
ଖାଲି ଏହି ଗୋଟିଏ ଘଟଣା ନୁହେଁ ଜିଲ୍ଲାରେ ଜମି ମାଫିଆମାନେ ଜାଲିଆତି କରି ସାଧାରଣ ଲୋକ ଓ ସରକାରୀ ଜମି ହଡ଼ପ କରୁଛନ୍ତି । ଉପଯୁକ୍ତ ତଦନ୍ତ ହେଲେ ସବୁ ଦୁର୍ନୀତି ପଦାକୁ ଆସିପାରନ୍ତା ବୋଲି କହିଛନ୍ତି ସ୍ଥାନୀୟ ଲୋକ ।
ଓଡ଼ିଶାର ଏହି ସ୍ଥାନରେ ରାତିରେ ଚାଲେ ପରିବା ହାଟ
ବଲାଙ୍ଗୀର: ରାତିରେ ଚାଲେ ପରିବା ହାଟ । ସକାଳ ପାଇଲେ ସବୁ ପସରା ଖାଲି । ଆଶ୍ଚର୍ଯ୍ୟ ଲାଗିଲେ ବି ସତ । ସାଧାରଣତଃ ସକାଳୁ ଲୋକେ ପରିବା କଣିବାକୁ ପାଇ ଯାଇଥାନ୍ତି । ସକାଳୁ ସକାଳୁ ସଜ ପରିବା କିଣିବା ସହ ବୁଲାବୁଲି କରି ଘରକୁ ଫେରିବାକୁ ଲୋକେ ପସନ୍ଦ କରନ୍ତି । କିନ୍ତୁ ଏମିତି ଏକ ପରିବା ହାଟ କଥା ଆମେ ଆଜି କହୁଛୁ ଯାହା ରାତିରେ ହୁଏ ବେପାର । ଆଉ ସକାଳ ହେଲେ ହାଟର ବେପାରି ଠେଲା ଉଠାଇ ଘରକୁ ଫେରନ୍ତି ।
ସବୁଠି ଅନ୍ଧାରର ରାଜୁତି । ଷ୍ଟ୍ରିଟ ଲାଇଟର କ୍ଷୀଣ ଆଲୋକ । ଆଉ ତାରି ଭିତରେ ଚାଲିଛି ପରିବା ହାଟ । ଅନ୍ଧାର ରାତିରେ ଗ୍ରାହକ ଓ ବେପାରିଙ୍କ ଚାଲେ ମୁଲଚାଲ । ଏହି ସ୍ଥାନଟି ହେଉଛି ବଲାଙ୍ଗୀର ଜିଲ୍ଲାର ଚନ୍ଦନଭାଟି ଗାଁ । ଯେଉଁଠି ଦିନରେ ନୁହେଁ ରାତିରେ ଚାଲେ ପରିବା ହାଟ । ସଂଧ୍ୟା ନଇଁବା ପରେ ଗାଁ ଦାଣ୍ଡରେ ଆରମ୍ଭ ହୁଏ ଗହଳି । ଜଣକ ବରେ ଜଣେ ପରିବା ଧରି ପହଞ୍ଚି ଯାଆନ୍ତି । କିଏ ସାଇକେଲରେ ତ କିଏ ବାଇକରେ ବୋହି ଆଣିନ୍ତି ପରିବା । ଆଉ କେଇ ମିନିଟ ଭିତରେ ପରିବାରେ ଭରିଯାଏ ପୁରା ହାଟ । ଆଉ ବ୍ୟବସାୟୀ ଓ ଗ୍ରାହକଙ୍କ ମଧ୍ୟରେ କିଣାବିକା ।
ସବୁଠି ଦିନରେ ପରିବା ବଜାର ବସୁଥିବାବେଳେ ଚନ୍ଦନଭାଟିର ଏହି ପରିବା ହାଟ କିନ୍ତୁ ରାତିରେ ବସେ । ପ୍ରତିଦିନ ପ୍ରାୟ ୨ ହଜାର ଲୋକ ଏହି ପରିବା ହାଟ ଉପରେ ନିର୍ଭର କରନ୍ତି । ଆଖପାଖ ୨୫ଟି ଗାଁରୁ ଚାଷୀ ନିଜ ଜମିରୁ ପରିବା ଆଣି ସିଧାସଳଖ ବଜାରରେ ବିକ୍ରି କରନ୍ତି । ଆଉ ତଟକା ପରିବା ପାଇବାକୁ ଗ୍ରାହକମାନେ ମଧ୍ୟ ଚାହିଁ ବସିଥାନ୍ତି । ବିଶେଷ କରି ଦେଶୀ ପୋଟଳ, ଜହ୍ନି, ବାଇଗଣ, କୁନ୍ଦୁରି, କୋବି ଓ ଟମାଟୋର ଏହି ବଜାରରେ ଚାହିଦା ଅଧିକ । ଲୋକାଲ ଚାଷୀ ସିଧାସଳଖ ନିଜ ବାଡି ପରିବା ବିକ୍ରି କରୁଥିବାରୁ ଦର ବି ସାଧାରଣ ବଜାରଠାରୁ ଟିକିଏ କମ ରହିଥାଏ । ଆଉ ସିଧାସଳଖ ନିଜ ପରିବା ବିକି ଚାଷୀ ବି ଦିନକୁ ୧୫ ଶହରୁ ୨ହଜାର ଟଙ୍କା ପର୍ଯ୍ୟନ୍ତ ଲାଭ ପାଆନ୍ତି ।
ହାଟକୁ ଆସିବା ପୂର୍ବରୁ ଦିନରେ ପରିବା ତୋଳି ପ୍ୟାକିଂ କରନ୍ତି ଚାଷୀ । ସଂଧ୍ୟା ସୁଦ୍ଧା ପରିବା ସଂଗ୍ରର ସରିବା ପରେ ରାତିରେ ହୁଏ ବିକ୍ରି । ପରିବା ଚାଷ ଯୋଗୁଁ ଆତ୍ମନିର୍ଭରଶୀଳ ବଲାଙ୍ଗୀର ଚନ୍ଦଭାଟିର ଶହଶହ ଚାଷୀ ପରିବାର । ଆଉ ଏମାନଙ୍କ ପାଇଁ ନୂଆ ସମ୍ଭବାନା ସୃଷ୍ଟି କରିଛି ଲୋୟର ସୁକତେଲ ପ୍ରକଳ୍ପ । ଲୋୟର ସୁକତେଲର କ୍ୟାନାଲ ପାଣି ପ୍ରଥମେ ଏହି ଅଞ୍ଚଳକୁ ଜଳସେଚିତ କରିବ । ଯାହାକୁ ନେଇ ଖୁସି ହେଇପଡ଼ିଛନ୍ତି ଏହି ଅଞ୍ଚଳର ଚାଷୀ ।
୫ ଠକଙ୍କୁ ବାନ୍ଧିଲା ପୁଲିସ
ସମ୍ବଲପୁର: ସମ୍ବଲପୁର ପୋଲିସକୁ ସଫଳତା । କ୍ଷେତରାଜପୁର ଅଞ୍ଚଳରେ ଫେକ ଡକ୍ୟୁମେଣ୍ଟ ତିଆରି କରି ଜାଲିଆତି କରୁଥିବା ଅଭିଯୋଗରେ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ବିଲ୍ଡିଂ ପ୍ଲାନିଂ ଆପ୍ରୁଭାଲ ପାଇଁ କାଗଜପତ୍ର ଜାଲିଆତି କରି ଟଙ୍କା ନେଉଥିଲେ । ଏହାସହ ନକଲି ସିଲ୍ ତିଆରି କରି ବ୍ୟବହାର କରୁଥିଲେ । ୩ କୋଟି ୩୧ ଲକ୍ଷ ଜବତ କରିଛି ସମ୍ବଲପୁର ପୋଲିସ । ଏମାନେ ସମ୍ବଲପୁର ସହରର ୫୪ ଜଣଙ୍କୁ ଠକିଥିବା କହିଛି ପୋଲିସ୍ । ବିଲ୍ଡିଂ ପ୍ଲାନ ଅନୁମତି ପାଇଁ ଏସଡିଏରେ ଚାଲୁଥିଲା ସିଣ୍ଡିକେଟ ।ମିଛ ଦସ୍ତାବିଜ ତିଆରି କରି ଦେଉଥିଲେ ମିଛ ବିଲ୍ଡିଂ ପ୍ଲାନ ଅନୁମତି । ନକଲି ରବର ଷ୍ଟାମ୍ପ, ନକଲି ଦସ୍ତାବିଜ, ନକଲି ଦସ୍ତଖତ କରି ଦେଉଥିଲେ ବିଲ୍ଡିଂ ପ୍ଲାନ ଆପ୍ରୁଭାଲ । ମୁଖ୍ଯ ଅଭିଯୁକ୍ତ ଏସଡିଏର ଡିଲିଂ ଆସିଷ୍ଟାଣ୍ଟ ଲକ୍ଷ୍ମୀ ନାରାୟଣ ସାମଲ ଓ ବୁଲୁଙ୍କ ସମେତ ୫ଜଣଙ୍କୁ ଗିରଫ କରିବା ସହ ମିଛ ଡକ୍ଯୁମେଣ୍ଟ ଜବତ କରିଛି ପୋଲିସ ।ଅଭିଯୁକ୍ତଙ୍କ ଆକାଉଣ୍ଟରୁ ୩ କୋଟି ୩୧ ଲକ୍ଷ ୯୬ ହଜାର ୨୨୭ ଟଙ୍କା ସିଜ୍ କରିଛି ପୋଲିସ । ୩ଟି ଆକାଉଣ୍ଟରରେ ଏହି ଟଙ୍କା ଥିବାବେଳେ ୨ଟି କାର୍, ଗୋଟିଏ ମଟର ସାଇକେଲ, କମ୍ପ୍ଯୁଟର, ଖତିଆନ, ଘର, ପ୍ଲଟ, ଡୁପ୍ଲିକେଟ ରବର ଷ୍ଟାମ୍ପ ଜବତ କରିଛି ପୋଲିସ । ଘଟଣାରେ ଏସଡିଏର ପୂଜକଙ୍କ ଆକାଉଣ୍ଟରେ ପଇସା ନେଣଦେଣ ହେଉଥିବାବେଳେ ବୁଲୁ ସାମଲ ସାଜିଥିଲା ମାଷ୍ଟର ମାଇଣ୍ଡ ।….