ଭୁବନେଶ୍ବର: ପ୍ରିୟବ୍ରତ ମାଝୀ ହେଲେ ବିଜେଡି ଗଣମାଧ୍ୟମ ସଂଯୋଜକ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଗଣମାଧ୍ୟମ ସଂଯୋଜକ ଭାବେ ନିଯୁକ୍ତ ହୋଇଛନ୍ତି । ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ସୂଚନା ଦେଇଛନ୍ତି । ପ୍ରିୟବ୍ରତ ମାଝୀ ଦଳର ଜଣେ ଶୃଙ୍ଖଳିତ ନେତା । ଜଣେ ଉଚ୍ଚଶିକ୍ଷିତ ବ୍ୟକ୍ତି । ଜେଏନୟୁରେ ଅଧ୍ୟକ୍ଷନ କରିଛନ୍ତି । ତାଙ୍କ ଭଳି ବ୍ୟକ୍ତିତ୍ବଙ୍କୁ ଗଣମାଧ୍ୟମ ସଂଯୋଜକ ଭାବେ ଦାୟିତ୍ବ ମିଳିଛି ।
ମାନସିକ ରୋଗର ସମ୍ପୂର୍ଣ୍ଣ ଚିକିତ୍ସା ଅଧାରୁ ଫେରାର ହୋଇଯାଇଛନ୍ତି ଜୟନାରାୟଣ: ଶ୍ରୀମୟୀ ମିଶ୍ର
ଭୁବନେଶ୍ବର: ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କୁ କଟାକ୍ଷ କଲେ ବିଜେଡି ମୁଖପାତ୍ର ଶ୍ରୀମୟୀ ମିଶ୍ର । ଜୟନାରାୟଣ ମାନସିକ ରୋଗର ଚିକିତ୍ସିତ ହେଉଥିବା ଶୁଣିବାକୁ ପାଇଥିଲୁ ବୋଲି କହିଛନ୍ତି । ବୋଧ ହୁଏ ସମ୍ପୂର୍ଣ୍ଣ ଚିକିତ୍ସା ନକରି ଅଧାରୁ ଫେରାର ହୋଇଯାଇଛନ୍ତି ଜୟନାରାୟଣ । ଏଭଳି ସନ୍ଦେହ ପ୍ରକାଶ କରିଛନ୍ତି ଶ୍ରୀମୟୀ । ଜୟନାରାୟଣଙ୍କ ଆଶୁ ଆରୋଗ୍ୟ କାମନା କରିବା ସହ ତାଙ୍କଠାରୁ ନିରାପଦ ଦୂରତା ବଜାୟ ରଖିବାକୁ ଗଣମାଧ୍ୟମ ଓ ରାଜ୍ୟ ବିଜେପି ନେତାଙ୍କୁ ସେ ପରାମର୍ଶ ଦେଇଛନ୍ତି ।
ବିଜ୍ଞାନ କ୍ଷେତ୍ରରେ ବିପ୍ଳବ ଆଣୁଛନ୍ତି ରାଜ୍ୟ ସରକାର
ଭୁବନେଶ୍ବର: ବିଜ୍ଞାନ କ୍ଷେତ୍ରରେ ବିପ୍ଳବ ଆଣିବାକୁ ଯାଉଛନ୍ତି ରାଜ୍ୟ ସରକାର । କୁନି ଆଷ୍ଟ୍ରୋନଟ ଯିବେ ଆମେରିକା । ନାସାରେ ନେବେ ଟ୍ରେନିଂ । ମହାକାଶଚାରୀ ହେବାର ସ୍ବପ୍ନକୁ ମିଳିବ ଉଡାଣ । ବିଜ୍ଞାନ ଓ ଗଣିତରେ ଉଚ୍ଚମାନର ଶିକ୍ଷାଦାନ ପାଇଁ ସ୍କୁଲ ଶିକ୍ଷକ ମାନଙ୍କୁ IISC ବାଙ୍ଗାଲୋର ପଠାଉଛନ୍ତି । ସେଠାରୁ ୧୧ ଦିନିଆ ଟ୍ରେନିଂ ନେଇ ଓଡ଼ିଶା ଫେରିବା ପରେ ନିଆଯିବ ଫିଡ଼ବ୍ୟାକ । ସମସ୍ତ ଖର୍ଚ୍ଚ ବହନ କରିବ ବିଜ୍ଞାନ ଓ କାରିଗରୀ ବିଭାଗ ।
ମହାକାଶ ସମ୍ପର୍କରେ ଜାଣିବେ କୁନି ଆଷ୍ଟ୍ରୋନଟ । ଆମେରିକା ପଠାଇ ନାସାରେ ଟ୍ରେନିଂ ଦେବାକୁ ଯୋଜନା । ଏକ୍ସପୋଜର ପାଇବେ ୟଙ୍ଗ ଆଷ୍ଟ୍ରୋନଟ । ଟ୍ୟାଲେଣ୍ଟ ସର୍ଚ୍ଚ ପ୍ରୋଗ୍ରାମରେ ପୂର୍ବରୁ 20ଜଣ ଚୟନ ହେଉଥିଲେ । ଏଣିକି ୧୦ ଜଣ ଚୟନ କରିବାକୁ ଅନୁମୋଦନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେଥିରୁ ପ୍ରଥମ ୧୦ ଜଣ ଯିବେ ନାସା । ଭାରତ ଚନ୍ଦ୍ରକୁ ଗଲାଣି, ଏହି ସମୟରେ ବିଜ୍ଞାନ ସହ ଅଧିକରୁ ଅଧିକ ଜଡ଼ିତ ହେବାର ଆବଶ୍ୟକତା ରହିଛି । ପ୍ରତିବର୍ଷ ନୂଆ ଜ୍ଞାନକୌଶଳ ବିକଶିତ ହେଉଛି ।
ସେଥିରେ ଛୋଟରୁ ବଡ଼ ସମସ୍ତେ ସାମିଲ ହେଲେ ଜ୍ଞାନର ବିକାଶ ହୋଇ ପାରିବ । ଏହି କ୍ରମରେ ୧୨୦ ଜଣ ସ୍କୁଲ ଶିକ୍ଷକ ଓ ୪୮୦ ଜଣ ଆଦର୍ଶ ବିଦ୍ୟାଳୟ ଶିକ୍ଷକଙ୍କୁ IISC ବାଙ୍ଗାଲୋର ଚ୍ୟାଲକର କ୍ୟାମ୍ପସରେ ୧୧ ଦିନିଆ ଟ୍ରେନିଂ ଦିଆଯିବ । ରାଜ୍ୟ ସରକାରଙ୍କ ବିଜ୍ଞାନ ଓ କାରିଗରୀ ବିଭାଗ ଏବଂ ଟ୍ୟାଲେଣ୍ଟ ଡେଭେଲପମେଣ୍ଟ ସେଣ୍ଟର ଜରିଆରେ ଏହା କରାଯାଉଛି । ପ୍ରତି ଶିକ୍ଷକଙ୍କ ପାଇଁ ଖର୍ଚ୍ଚ ହେବ ୧୦ ହଜାରରୁ ଅଧିକ ଟଙ୍କା । ସେମାନେ ଓଡ଼ିଶା ଫେରିବା ପରେ ଟେଷ୍ଟ ଦେବେ । ପରୀକ୍ଷା କରିବାକୁ ଓଡ଼ିଶା ଆସିବେ IISC ବାଙ୍ଗାଲୋରର ପ୍ରଶିକ୍ଷକ । ବିଜ୍ଞାନ ଓ କାରିଗରୀ ବିଭାଗ, ବିଦ୍ୟାଳୟ ଓ ଗଣଶିକ୍ଷା ବିଭାଗ ଏବଂ ଏସସି ଏସଟି ବିକାଶ ବିଭାଗ ସାମ୍ନାରେ ହେବ ପରୀକ୍ଷା ।
ନାସାକୁ ଏକ୍ସପୋଜର ଭିଜିଟ ଦ୍ବାରା ମହାକାଶ ବିଜ୍ଞାନର ବିକାଶ ହେବ । ଛୋଟ ବୟସରୁ ଏପିଜେ ଅବଦୁଲ କଲାମ ଓ ସତୀଶ ଧାୱନଙ୍କ ଭଳି ବ୍ୟକ୍ତିତ୍ବ ହେବାକୁ ପିଲାଙ୍କ ଭିତରେ ଆଗ୍ରହ ସୃଷ୍ଟି ହେବ । ଆମେରିକାର ନୂଆ ଟେକନୋଲୋଜି ସମ୍ପର୍କରେ ଜାଣି ଭାରତରେ କାର୍ଯ୍ୟକାରୀ କରିହେବ । ଛାତ୍ରଛାତ୍ରୀମାନଙ୍କୁ ନାସା ଏକ୍ସପୋଜର ପାଇଁ ଶିକ୍ଷାଦାନ ବି ଉଚ୍ଚକୋଟିରେ ହେବା ଦରକାର । ବାଙ୍ଗାଲୋରର ପ୍ରତିଷ୍ଠିତ ଅନୁଷ୍ଠାନରେ ଶିକ୍ଷକଙ୍କ ଟ୍ରେନିଂ ଏହି ଦିଗରେ ସହାୟକ ହେବ ।
ଆଧୁନିକ ଯୁଗ ପରମ୍ପରା ସହ ବିଜ୍ଞାନର ଯୁଗ । ଏହି ସମୟରେ ବିକଶିତ ବିଜ୍ଞାନ ନୂତନ ଜ୍ଞାନକୌଶଳ ସହ ପରିଚିତ ହେବାର ଆବଶ୍ୟକତା ରହିଛି । ଚନ୍ଦ୍ରାୟନ ସଫଳତାରେ ବି ଓଡ଼ିଶା ଯୁବକଙ୍କ ଭୂମିକା ରହିଛି । ବିଜ୍ଞାନର ବିକାଶରେ ଓଡ଼ିଶାକୁ ଅଧିକ ଅଧିକ ଯୋଡିବାକୁ ରାଜ୍ୟ ସରକାର ଶିକ୍ଷାର ବିକାଶ କରିବାରେ ଲାଗି ପଡିଛନ୍ତି ।
ବଳପୂର୍ବକ ଚାନ୍ଦା ମାଗିଲେ କଡା କାର୍ଯ୍ୟାନୁଷ୍ଠାନ
କଟକ: ଦୁର୍ଗାପୂଜା ପୂର୍ବରୁ ବସିଲା କଟକ ପୂର୍ବାଞ୍ଚଳ ଶାନ୍ତି କମିଟି ବୈଠକ । ଶାନ୍ତି ଶୃଙ୍ଖଳା ସହ ପୂଜା ସମ୍ପାଦନ ପାଇଁ ହୋଇଛି ବିସ୍ତୃତ ଆଲୋଚନା । ପୂଜା ପୂର୍ବରୁ ରାସ୍ତାଘାଟ ଓ ଅନ୍ୟ ମରାମତି କାମ ଶୀଘ୍ର ସାରିବାକୁ କହିଛନ୍ତି ମେୟର । ସେପଟେ ଚଳିତ ପାର୍ବଣ ସମୟରେ ଜବରଦସ୍ତ ଚାନ୍ଦା ଆଦାୟ ଓ ଦାଦାବଟିକୁ ପ୍ରଶ୍ରୟ ଦିଆଯିବ ନାହିଁ ଚେତାଇ ଦେଇଛନ୍ତି ପୋଲିସ କମିଶନର । କଟକ ଶିଖରପୁର, ଗଣ୍ଡରପୁର, ମହାନଦୀବିହାର ପୂଜା କମିଟି ଏହି ବୈଠକକୁ ଆୟୋଜନ କରିଥିଲା ।
କଟକରେ ପାର୍ବଣର ମାହୋଲ । ଆଉ ୧୫ ଦିନ ପରେ ଧରାବତର କରିବେ ଅଗ୍ରପୂଜ୍ୟ ଶ୍ରୀଗଣେଶ । ଏହାର ମାସକ ପରେ ଜଗତ ଜନନୀ ମାଆ ଦୂର୍ଗାଙ୍କ ପୂଜା । ଦୁଲୁକିବ ରୌପ୍ୟ ନଗରୀ । ପୂଜାକୁ କିପରି ସୁରୁଖୁରୁରେ ପାଳନ କରାଯିବ ସେଥିପାଇଁ କଟକ ପୂର୍ବାଞ୍ଚଳ ଶାନ୍ତି କମିଟି ପକ୍ଷରୁ ଦୂର୍ଗାପୂଜା ଓ ଭସାଣି ନେଇ ପ୍ରସ୍ତୁତି ସଭା କରାଯାଇଛି । ଏଥିରେ କଟକ ସାଂସଦ, ମେୟର, ବିଧାୟକ, ପୋଲିସ କମିଶନର, କଟକ ଡିସିପି, ଏସିପି , ଥାନା ଅଧିକାରୀ, କର୍ପୋରେଟର ଓ କଟକ ପୂର୍ବାଞ୍ଚଳ ଶାନ୍ତି କମିଟିର ସଦସ୍ୟ ଓ ସାହି ମୂରବୀ ଉପସ୍ଥିତ ଥିଲେ ।
ବିଶେଷ କରି ରାସ୍ତାଘାଟ ସମସ୍ୟା କୁ ପୂଜା ପୂର୍ବରୁ କିପରି ସମାଧାନ କରାଯିବ । ସାହି ସାହି ମଧ୍ୟରେ କିଭଳି ଉତ୍ତମ ସମ୍ପର୍କ ରଖାଯାଇ ପୂଜାକୁ ପାଳନ କରାଯିବ, ସେନେଇ ଆଲୋଚନା କରାଯାଇଛି । ତେବେ ପୂଜା ପୂର୍ବରୁ ରାସ୍ତାର ମରାମତି ଓ ଜାଇକା କାର୍ଯ୍ୟ ତୁରନ୍ତ ସରିବା ପାଇଁ ନିର୍ଦ୍ଦେଶ ଦିଆଯାଇଛି ବୋଲି କହିଛନ୍ତି କଟକ ମେୟର ।
ଅନ୍ୟପଟେ ପୂଜା ସମୟରେ ଦାଦା ବଟି ଓ ଜବରଦସ୍ତ ଚାନ୍ଦା ଉପରେ କଡା ଆଭିମୁଖ୍ୟ ଗ୍ରହଣ କରିଛି କମିଶନରେଟ ପୋଲିସ୍ । ଯଦି କେହି ବଳପୂର୍ବକ ଚାନ୍ଦା ଯଦି ମାଗନ୍ତି ତେବେ କଡା କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ପୋଲିସ୍ କମିଶନର । ଏହା ସହ ଅପରାଧ ଦମନର ସମାନ ପନ୍ଥା ପୂଜା ସମୟରେ ମଧ୍ୟ ଗ୍ରହଣ କରାଯିବ ବୋଲି କହିଛନ୍ତି ।
ବାରବାଟୀର କବାଡି କମ୍ପ୍ଲେକ୍ସରେ ଦମ ଦେଖାଇବେ ଓଡ଼ିଆ ଖେଳାଳି
କଟକ : କଟକ ବାରବାଟୀ ଷ୍ଟାଡିୟମ କବାଡି କମ୍ପ୍ଲେକ୍ସ ରେ ଆୟୋଜିତ ହେଉଛି 49 ତମ ଜାତୀୟ ଜୁନିୟର କବାଡ଼ି ଚାମ୍ପିଅନସିପ । ଏଥିପାଇଁ ଓଡିଶା ପୁରୁଷ ଓ ମହିଳା ଟିମର ଚୟନ ଶିବିର ଅନୁଷ୍ଠିତ ହୋଇଛି । ଏଥିରେ ରାଜ୍ୟର 30 ଟି ଜିଲ୍ଲାରୁ 430 ଖେଳାଳି ଭାଗ ନେଇ ନିଜର ଶ୍ରେଷ୍ଠ ପ୍ରଦର୍ଶନ କରିଛନ୍ତି । ଏମାନଙ୍କ ମଧ୍ଯରୁ 25 ଜଣ ପୁରୁଷ ଓ 25 ଜଣ ମହିଳା ଖେଳାଳି ବଛା ଯାଇ ପ୍ରଶିକ୍ଷଣ ଶିବିର ଆୟୋଜିତ ହେବ । ଅକ୍ଟୋବର ପ୍ରଥମ ସପ୍ତାହରେ ତେଲେଙ୍ଗାନା ଓ ଦିଲ୍ଲୀରେ ଜାତୀୟ କବାଡି ଚାମ୍ପିଅନସିପରେ ଓଡିଶାର ଚୂଡାନ୍ତ ଟିମ ଭାଗ ନେବ ।
ଦମ ଦେଖାଇବେ ଓଡ଼ିଶା ଖେଳାଳି । କବାଡ଼ି ମୈଦାନରେ ପ୍ରଦର୍ଶନ ହେବ ରଣ କୌଶଳ । କଟକ ବାରବାଟୀରେ କବାଡ଼ି ଚାମ୍ପିଅନସିପ୍ । ପୁରୁଷ ଓ ମହିଳା ଟିମର ଚୟନ ଶିବିର । ଅକ୍ଟୋବର ପ୍ରଥମ ସପ୍ତାହରେ ତେଲେଙ୍ଗାନା ଓ ଦିଲ୍ଲୀଠାରେ ଆୟୋଜିତ ହେବ 49ତମ ଜାତୀୟ ଜୁନିୟର କବାଡି ଚାମ୍ପିଅନସିପ । ଏଥିପାଇଁ କଟକ ବାରବାଟୀ ଷ୍ଟାଡିୟମ କବାଡି କମ୍ପ୍ଲେକ୍ସରେ ଓଡିଶା କବାଡି ଆସୋସିଏସନ ଆନୁକୂଲ୍ୟରେ ଅନୁଷ୍ଠିତ ହୋଇଛି ଖେଳାଳି ଚୟନ । ଏଥିରେ ରାଜ୍ୟର 30 ଟି ଜିଲ୍ଲାର 430 ପୁରୁଷ ଓ ମହିଳା ଖେଳାଳି ଭାଗ ନେଇଛନ୍ତି । ଏଥିରୁ ଦୁଇ ଦିନରେ 25 ପୁରୁଷ ଓ 25 ମହିଳା ଖେଳାଳିଙ୍କୁ ପ୍ରଶିକ୍ଷଣ ଶିବିର ପାଇଁ ଚୟନ କରାଯିବ। ପରେ ସେମାନଙ୍କୁ ଦୁଇ ସପ୍ତାହ ବ୍ୟାପୀ ପ୍ରଶିକ୍ଷଣ ଦିଆଯିବା ପରେ ଚୂଡାନ୍ତ 12 ଜଣିଆ ପୁରୁଷ ଓ 12 ଜଣିଆ ଓଡିଶା ଟିମ ଚୟନ କରାଯିବ।
ଗତବର୍ଷ ଅନୁଷ୍ଠିତ 48 ତମ ଜାତୀୟ ଜୁନିୟର କବାଡି ଚାମ୍ପିଅନସିପରେ ଓଡିଶାର ପୁରୁଷ ଟିମ ପ୍ରି କ୍ବାଟର ଫାଇନାଲକୁ ପ୍ରବେଶ କରିଥିଲା । ସେହିପରି ମହିଳା ଟିମ କ୍ବାଟର ଫାଇନାଲ କୁ ପ୍ରବେଶ କରିଥିଲା । ଏଥର ଚୟନ ଶିବିରରେ ଅଧିକ ପ୍ରତିଭାବାନ ଖେଳାଳି ଥିବାରୁ ଓଡିଶାର ଦୁଇଟି ଟିମ ଜାତୀୟ ଚାମ୍ପିଅନସିପରେ ଭଲ କରିବ ବୋଲି ଖେଳାଳିମାନେ ଆଶା ରଖିଛନ୍ତି ।
ଦିଲ୍ଲୀ ଏବଂ ବେଙ୍ଗାଲୁରୁରେ ଖୋଲିବ ଓଡ଼ିଟିସିର ନିମନ୍ତ୍ରଣ ରେଷ୍ଟୁରାଣ୍ଟ
ଭୁବନେଶ୍ବର: ପର୍ଯ୍ୟଟନର ବିକାଶ ସାଙ୍ଗକୁ ଓ ପାରମ୍ପରିକ ଖାଦ୍ୟରେ ବିଶ୍ବରେ ସ୍ବତନ୍ତ୍ର ପରିଚୟ ସୃଷ୍ଟି କରିଛି ଓଡିଶା । ଦିଲ୍ଲୀ ଓ ବେଙ୍ଗାଲୁରୁରେ ଖୋଲିବ ଓଡ଼ିଟିସିର ନିମନ୍ତ୍ରଣ ରେଷ୍ଟୁରାଣ୍ଟ । ଦୁବାଇ, ସିଙ୍ଗାପୁର ଓ ବ୍ୟଙ୍କକକକୁ ଯୋଗାଯୋଗ ପରେ ଓଡିଶା ମୁହାଁ ପର୍ଯ୍ୟଟକ । ଆସନ୍ତା ୫ ବର୍ଷରେ ୨୦ରୁ ୩୦ କୋଟି ଲାଭ କରିବାକୁ ଓଟିଡିସି ଲକ୍ଷ ରଖିଛି ବୋଲି କହିଛନ୍ତି ଅଧ୍ୟକ୍ଷ । ଭୁବନେଶ୍ବର ପାନ୍ଥନିବାସରେ ପାଳିତ ହୋଇଛି ଓଡିଶା ପର୍ଯ୍ୟଟନ ଉନ୍ନୟନ ନିଗମର ୪୪ ତମ ପ୍ରତିଷ୍ଠା ଦିବସ । କାର୍ଯ୍ୟକ୍ରମରେ ଅତିଥି ଭାବେ ରାଜ୍ୟ ମହିଳା କମିଶନ ଅଧ୍ୟକ୍ଷା ମିନତି ବେହେରା ଓ ସମ୍ନାନିତ ଅତିଥି ଭାବରେ ଯୋଗ ଦେଇଥିଲେ ଓଡିଶା ପର୍ଯ୍ୟଟନ ବିଭାଗ ତଥା ଓଟିଡିସିର ଏମଡି ସଚିନ ଆର. ଯାଦବ ।
5T ଅଧିନରେ ଚାଲିଛି ପର୍ଯ୍ୟଟନର ବିକାଶ । ମାଆ ହାତ ରନ୍ଧା ଖାଉଛନ୍ତି ପର୍ଯ୍ୟଟକ । ଦିଲ୍ଲୀ ଓ ବାଙ୍ଗାଲୋରରେ ଖୋଲିବ ନିମନ୍ତ୍ରଣ । ଓଡିଶା ମୁହାଁ ବିଦେଶୀ ପର୍ଯ୍ୟଟକ । ଓଡିଶାରେ ଆଡଭେଞ୍ଚର ସ୍ପୋର୍ଟସ ସାଙ୍ଗକୁ ଖାଇବା ର ମଜା ନେଉଛନ୍ତି ପର୍ଯ୍ୟଟକ । ମେଟ୍ରୋ ସିଟିରେ ଓଡ଼ିଆ ପାରମ୍ପରିକ ଖାଦ୍ୟ ଯୋଗାଇ ଦେବାପାଇଁ ଓଟିଡିସି ଖୋଲିବାକୁ ଯାଉଛି ନିମନ୍ତ୍ରଣ ରେଷ୍ଟୁରାଣ୍ଟ ।
ଖୁବଶୀଘ୍ର ଦିଲ୍ଲୀ ଓ ବେଙ୍ଗାଳୁରୁରେ ଖୋଲିବ ଓଟିଡିସିର ନିମନ୍ତ୍ରଣ ରେଷ୍ଟୁରାଣ୍ଟ । ଏହାଛଡ଼ା ପିଠାପଣା ପ୍ରତି ମଧ୍ୟ ରାଜ୍ୟବାସୀଙ୍କ ଆଗ୍ରହ ରହିଛି । ତେବେ ପାନ୍ଥନିବାସରେ ବର୍ଷକୁ ଥରେ ରଜ ବେଳେ ମିଳୁଥିବା ପିଠା ଆଇଟମ ବର୍ତ୍ତମାନ ବର୍ଷ ତମାମ ମିଳିବାକୁ ଯାଉଛି । ଖୁବଶୀଘ୍ର ରାଜ୍ୟର ବିଭିନ୍ନ ପାନ୍ଥନିବାସରେ ସ୍ବତନ୍ତ୍ର ଆଉଟଲେଟ ଖୋଲିବ ଓଡ଼ିଡିସି । ରାଜ୍ୟରେ ପୂର୍ଣାଙ୍ଗ ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ବିଭିନ୍ନ ପଦକ୍ଷେପ ହାତକୁ ନିଆଯଇଛି । ବର୍ତମାନ ଓଡ଼ିଶା ପିଲିଗ୍ରିମ ପର୍ଯ୍ୟଟନସ୍ଥଳୀ ସହ ଆଡଭେଞ୍ଚର ଟୁରିଷ୍ଟ ପ୍ଲେସରେ ମଧ୍ୟ ପରିଣତ ହୋଇଛି ବୋଲି ଓଟିଡିସି ଅଧ୍ୟକ୍ଷ କହିଛନ୍ତି ।
ଆନ୍ତଜାତୀୟ ବିମାନସେବା ଯୋଗୁଁ ବିଦେଶୀ ପର୍ଯ୍ୟଟଙ୍କ ସଂଖ୍ୟା ବୃଦ୍ଧି ପାଇଛି। ୮୭୫ ପ୍ରତିଶତ ବିଦେଶୀ ପର୍ଯ୍ୟଟକ ସଂଖ୍ୟା ବୃଦ୍ଧି ପାଇଥିବାବେଳେ ଘରୋଇ ପର୍ଯ୍ୟଟକଙ୍କ ସଂଖ୍ୟା ୧୧୦ ପ୍ରତିଶତ ବୃଦ୍ଧି ପାଇଛି । ଏହାସହ ବିଭିନ୍ନ ଜିଲ୍ଲାରେ ଥିବା ପାନ୍ଥନିବାସକୁ ଅପଗ୍ରେଡେସନ କରାଯାଇଛି । ଗୋଲଡେନ ଟ୍ରାଏଙ୍ଗଲ ଛଡ଼ା, ଇକୋ ରିଟ୍ରିଟ, ଆଡଭେଞ୍ଚର ଟୁରିଷ୍ଟ ପ୍ଲେସ, ବୋଟ କ୍ଲବ ଯୋଗୁଁ ରାଜ୍ୟରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇଛି । ଉଭୟ ବିଦେଶୀ ଓ ଦେଶ ଭିତରେ ଥିବା ପର୍ଯ୍ୟଟକ ମାନେ ଓଡ଼ିଶାକୁ ବେଶ ପସନ୍ଦ କରୁଛନ୍ତି ।
ନନ୍ଦିଘୋଷ ଟିଭିର ମହାପ୍ରଭାବ, ଖବର ପ୍ରସାରଣ ପରେ ବନ ବିଭାଗର ଚଢ଼ାଉ
ଢ଼େଙ୍କନାଳ: ନନ୍ଦିଘୋଷ ଟିଭିର ପ୍ରଭାବ । ଖବର ପ୍ରସାରଣ ପରେ ବନ ବିଭାଗର ଚଢାଉ । ଢେଙ୍କନାଳ ରାଜପଥ କଡ଼ରେ ଥିବା ବିଭିନ୍ନ ଢାବାରେ ବେଆଇନ ଭାବେ କଇଁଛ ରଖାଯାଇଥିବା ନେଇ ହୋଇଥିଲା ଖବର ପ୍ରସରଣ । ଏହାର ମାତ୍ର କିଛି ଘଣ୍ଟା ନଯାଉଣୁ ଚେତିଛି ବନବିଭାଗ । ବନ୍ ବିଭାଗ ପକ୍ଷରୁ ଦୁଇଟି ଟିମ୍ ଗଠନ କରାଯାଇ ତୁରନ୍ତ ସେହି ଢ଼ାବା ଗୁଡ଼ିକରେ ଚଢାଉ କରା ଯାଇଛି । ହେଲେ ପୂର୍ବରୁ ଭିଜୁଆଲରେ ଥିବା ଢାବାଗୁଡିକରୁ କଇଁଛ ଗାୟବ ହୋଇଯାଇଛନ୍ତି । ଘଟଣାକୁ ନେଇ ପୁଣି ସନ୍ଦେହ ବଢିଛି । ଗୋଟିଏ ଦିନ ପୂର୍ବରୁ ନନ୍ଦିଘୋଷ ଟିଭି ହାତରେ ଲାଗିଥିବା କଇଁଛ ଖବର ପ୍ରସାରଣ ପରେ କୁଆଡେ ଗଲା ସବୁ ରଖା ଯାଇଥିବା କଇଁଛ ? ବୁଦ୍ଧିଜୀବଙ୍କ ମହଲରେ ଏନେଇ ପ୍ରଶ୍ନ ଉଠିଥିବା ବେଳେ ବନ ବିଭାଗର କାର୍ଯ୍ୟଦକ୍ଷତା ଉପରେ ସନ୍ଦେହ ସୃଷ୍ଟି ହୋଇଛି । ତେବେ କଇଁଛ ସଉକ ନା ସଉଦା ପାଇଁ ଡାବା ଗୁଡିକରେ ରଖାଯାଇଥିଲା ତାହାର ଉଚ୍ଚସ୍ତରୀୟ ତଦନ୍ତ ଦାବି ହୋଇଛି ।
ସଫଳ ହେଉଛି ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଯୋଜନା, 5Tରେ ସାମିଲ ପରେ ବଦଳୁଛି ଧର୍ମଗଡ଼ ହସ୍ପିଟାଲର ରୂପରେଖ
ଧର୍ମଗଡ଼: ପ୍ରତି ଜୀବନ ମୂଲ୍ୟବାନ । ସଫଳ ହେଉଛି ରାଜ୍ୟ ସରକାରଙ୍କ ସ୍ବାସ୍ଥ୍ୟ ଯୋଜନା । 5Tରେ ସାମିଲ ପରେ ବଦଳୁଛି କଳାହାଣ୍ଡି ଜିଲ୍ଲା ଧର୍ମଗଡ ହସ୍ପିଟାଲର ରୂପ ରେଖ । ପ୍ରତିଟି ରୋଗୀଙ୍କୁ ଏଠାରେ ମିଳିବ ଉପଯୁକ୍ତ ଚିକିତ୍ସା । ମାଆ ଓ ଶିଶୁ ପାଇଁ ୯ କୋଟିରୁ ଅଧିକ ଟଙ୍କାରେ ସ୍ବତନ୍ତ୍ର ବ୍ୟବସ୍ଥା ହେଉଛି l ଚିକିତ୍ସା ପାଇଁ ଏହି ହସ୍ପିଟାଲ ଉପରେ ନିର୍ଭର କରନ୍ତି ପଡୋଶୀ ଛତିଶଗଡ଼, ନବରଙ୍ଗପୁର, କଳାହାଣ୍ଡି ସାଙ୍ଗକୁ ନୂଆପଡ଼ାର ଲୋକ l ଏହାକୁ ଦୃଷ୍ଟିରେ ରଖି ମେଡିକାଲର ଉନ୍ନତିକରଣ ଆରମ୍ଭ ହୋଇଛି । ୬ ଜଣ ଡାକ୍ତର ମେଡିକଲରେ ନିଯୁକ୍ତି ପାଇଥିବା ବେଳେ ଆହୁରି ଡାକ୍ତର ସଂଖ୍ୟା ବଢାଇବାକୁ ଲକ୍ଷ୍ୟ ରଖାଯାଇଛି ।
ହସ୍ପିଟାଲରେ ଚକ୍ଷୁ, ଦାନ୍ତ ରୋଗ, ଶୈଲ୍ୟ ଚିକିତ୍ସା ଭେଷଜ ଚିକିତ୍ସା ହୋଇପାରୁଛି । ଅତ୍ୟାଧୁନିକ ଏକ୍ସରେ ଓ ଯକୃତ ରୋଗ ଭଳି ଟେଷ୍ଟ ସେବା ବି ଏଠାରେ ଉପଲବ୍ଧ ହୋଇଛି l ପୂର୍ବରୁ ଚିକିତ୍ସା ପାଇଁ ଦୂର ଦୁରାନ୍ତ ତଥା ବିଶାଖାପାଟଣା, ରାୟପୁର ଯାଉଥିଲେ ଲୋକେ । ହେଲେ ଏବେ ଚିକିତ୍ସା ସେବା ଲୋକଙ୍କ ହାତ ମୁଠାରେ l ରାଜ୍ୟ ସରକାର କଥାରେ ନୁହେଁ କାମରେ ବିଶ୍ବାସ କରନ୍ତି । ତାହା ଧର୍ମଗଡରେ ଦେଖିବାକୁ ମିଳିଛି l ପ୍ରଥମେ କୃଷି ପାଇଁ ଜଳସେଚନ, ପରେ ପାନୀୟ ଜଳ, ଯାତ୍ରୀଙ୍କ ପାଇଁ ବସଷ୍ଟାଣ୍ଡ, ଶିକ୍ଷା ପାଇଁ ଏକ ମାତ୍ର ମହିଳା ବିଦ୍ୟାଳୟକୁ ଆମ କଲେଜରେ ସାମିଲ ଆଉ ଏବେ ବଦଳୁଛି ମେଡିକାଲର ରୂପ ରେଖ l
ଆସନ୍ତାକାଲି ୫ ଘଣ୍ଟା ବନ୍ଦ ରହିବ ସାଧାରଣ ଦର୍ଶନ
ପୁରୀ: ସୋମବାର ଭାଦ୍ରବ-କୃଷ୍ଣ ପଞ୍ଚମୀ ତିଥି ଅବସରରେ ଶ୍ରୀମନ୍ଦିରରେ ଶ୍ରୀବିଗ୍ରହମାନଙ୍କ ଅନୁଷ୍ଠିତ ହେବ ରାହୁରେଖା ଲାଗି ନୀତି। ପ୍ରଥମ ଭୋଗମଣ୍ଡପ ନୀତି ଶେଷ ହେବାପରେ ଏହି ଗୁପ୍ତ ନୀତି ଅନୁଷ୍ଠିତ ହେବ। ଏହି ନୀତି ଆପାତତଃ ଅପରାହ୍ନ 3ଟା ରୁ ଆରମ୍ଭ ହେବା ସହ ରାତ୍ର 8 ଟା ପର୍ଯ୍ୟନ୍ତ ଚାଲୁ ରହିବ । ଏଣୁ ପ୍ରାୟ 5 ଘଣ୍ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ଦୁଇ ଛାତ୍ରଙ୍କ ଜୀବନରେ ବଇରୀ ସାଜିଛି ରୋଗ
ନନ୍ଦିଘୋଷ ବ୍ୟୁରୋ: ରୋଗ ଦୁଇ ଛାତ୍ରଙ୍କ ଜୀବନରେ ଦୁଃଖ ଭରିଛି । ପାଠ ପଢାରେ ଡୋରି ପକାଇବାକୁ ବାଧ୍ୟକରିଛି । ଜଣେ ଆଦିବାସୀ ମେଧାବୀ ଯୁବକର ଭବିଷ୍ୟତ ଏବେ ଅନ୍ଧାରକୁ ଠେଲି ହୋଇଯାଇଛି। ଆଉଜଣେ ଷଷ୍ଠ ଶ୍ରେଣୀରେ ପଢୁଥିବା ଛାତ୍ରଙ୍କ ଜୀବନ ଯନ୍ତ୍ରଣାରେ ଜର୍ଜରିତ ହୋଇଛି । କୋରାପୁଟ ଜିଲ୍ଲା ଜୟପୁର ବ୍ଲକର ବଡପଡା ଗାଁର ୨୭ ବର୍ଷୀୟ ଆଦିବାସୀ ଯୁବକ ଜଗନ୍ନାଥ ଗାଦବାଙ୍କ ହସଖୁସିର ସଂସାରରେ ନିରାଶ ଭରିଯାଇଛି । ଜଗନ୍ନାଥ ବାପା ଜଣେ କ୍ଷୁଦ୍ର ଚାଷୀ । ଦୁଇଭାଇ, ଦୁଇ ଭଉଣୀଙ୍କୁ ମିଶାଇ 7 ପ୍ରାଣୀ କୁଟୁମ୍ବ । ଜଗନ୍ନାଥ ହେଉଛନ୍ତି ବଡ ପୁଅ । ବାପା ଅତି କଷ୍ଟରେ ପାଠ ପଢାଇଥିଲେ । ଜଗନ୍ନାଥ ମଧ୍ୟ ଭଲ ପାଠ ପଢି ଯୁକ୍ତ 3ରେ ଅର୍ଥନୀତି ବିଜ୍ଞାନରେ ପ୍ରଥମ ଶ୍ରେଣୀରେ ପାସ କରିଥିଲେ । ଆଶା କରିଥିଲେ ପାଠ ପଢି ପରିବାର ଓ ସମାଜ ପାଇଁ କିଛି କରିବେ । କିନ୍ତୁ ହଠାତ୍ କଳା ବାଦଲ ଛାଇଗଲା ଜଗନ୍ନାଥଙ୍କ ଜୀବନରେ । ତାଙ୍କ ଦୁଇ ଗୋଡ ଅକାମୀ ହୋଇ ଚଲାବୁଲା କରିପାରିଲେ ନାହିଁ । ସାମର୍ଥ୍ୟ ଅନୁଯାୟୀ ପରିବାର ଲୋକେ ବିଭିନ୍ନ ଆଡେ ଦେଖାଇଲେ ମଧ୍ୟ କୌଣସି ସୁଫଳ ମିଳିଲାନାହିଁ । ଏବେ BSKY କାର୍ଡରେ ଚିକିତ୍ସା ପାଇଁ ଅଣ୍ଟା ଭିଡିଛନ୍ତି ଜଗନ୍ନାଥ । ହେଲେ ଗସ୍ତ ଖର୍ଚ୍ଚ ମଧ୍ୟ ଗରିବ ପରିବାର ପାଖରେ ନଥିବାରୁ ରାଜ୍ୟ ସରକାରଙ୍କୁ ସହାୟତା ପାଇଁ ନିବେଦନ କରିଛନ୍ତି ।
ସେହିପରି ଷଷ୍ଠ ଶ୍ରେଣୀରେ ପଢୁଥିବା ପ୍ରେମ କୁମାରଙ୍କ ଜୀବନରେ ଭରିଯାଇଛି ଦୁଃଖ । ରୋଗର ଯନ୍ତ୍ରଣା ତାଙ୍କୁ ପାଠ ପଢାରେ ଡୋରି ବାନ୍ଧିବାକୁ ବାଧ୍ୟ କରୁଛି । ଗଞ୍ଜାମ ଜିଲ୍ଲା ଶେରଗଡ଼ ବ୍ଲକର ବର ମୁଣ୍ଡଳୀ ଗାଁର ଏହି ଶିଶୁକୁ ଦେଖିଲେ ମନ ବିଚଳିତ ହୋଇଯାଉଛି । ପ୍ରେମର ବୟସ ବଢିବା ସହ ବଢିଚାଲିଛି ବାମ ହାତର ମାଂସ ପିଣ୍ଡୁଳା । ବାପା କରୁଣାକର ଦିନ ମଜୁରିଆ ଭାବେ କାମ କରି ଯାହା ଆଣନ୍ତି ସେତିକିରେ ସାତ ପ୍ରାଣୀ କୁଟୁମ୍ବ ଚଳୁଛି । ଏମିତିରେ ପୁଅର ଚିକିତ୍ସା କରାଇ ସର୍ବସ୍ବାନ୍ତ ହୋଇପଡିଛନ୍ତି କରୁଣାକର । ଏବେ ପ୍ରେମର ଚିକତ୍ସା ପାଇଁ ସରକାରଙ୍କ ସହାୟତା ଲୋଡିଛନ୍ତି ପରିବାର ।