କଳାହାଣ୍ଡି: ରାଜ୍ୟ ସରକାରଙ୍କ ମିଶନ ଶକ୍ତି ଗ୍ରାମାଞ୍ଚଳ ମହିଳାଙ୍କୁ ଯୋଗାଇଛି ରୋଜଗାର l ଉନ୍ନତ ମାନର ଛତୁଆ ପ୍ରସ୍ତୁତ କରି ନିଜେ ସ୍ବାବଲମ୍ବୀ ହେବା ସହ ଅନ୍ୟକୁ ବି ଯୋଗାଇପାରିଛନ୍ତି ନିଯୁକ୍ତି । କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକ କୁଲିହାରି ଗାଁର ମିଶନ ଶକ୍ତି ମହିଳାଙ୍କୁ ସ୍ବାବଲମ୍ବୀ କରିଛି ଛତୁଆ ତିଆାରି ।
ଶସକ୍ତ ମହିଳା, ପ୍ରଗତିଶୀଳ ଓଡ଼ିଶା । ମା’ଙ୍କୁ ଏବେ ସ୍ବାବଲମ୍ବୀ କରିଛନ୍ତି ରାଜ୍ୟସରକାର । ମିଶନ ଶକ୍ତି ସହାୟତାରେ ଏବେ ରୋଜଗାରକ୍ଷମ ହୋଇଛନ୍ତି ମହିଳା । କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକର ଉପାନ୍ତ ଗାଁ କୁଲିହରି l ଏହି ଗାଁରେ ରହିଛି ମା ସର୍ବ ମଙ୍ଗଳା ସ୍ଵୟଂ ସହାୟକ ଗୋଷ୍ଠୀ l 10ଜଣ ମହିଳାକୁ ନେଇ 2010 ମସିହାରେ ଗଠିତ ହୋଇଥିଲା ଏହି ଏସଏଚଜି । ଏହି ଏସଏଚଜି ମହିଳା ମାନେ ଛତୁଆ ପ୍ରସ୍ତୁତ ପ୍ଲାଣ୍ଟ ବସାଇ ଭଲ ରୋଜଗାର କରୁଛନ୍ତି । ଏହି ପ୍ଲାଣ୍ଟ ପାଇଁ ରାଜ୍ୟ ସରକାର ଦୁଇ ଲକ୍ଷ ଟଙ୍କା ଋଣ ମଧ୍ୟ ଯୋଗାଇ ଦେଇଛନ୍ତି । ଏବେ ଏସଏଚଜି ମହିଳା ଛତୁଆ ପ୍ରସ୍ତୁତ କରି ନିଜେ ସ୍ବାବଲମ୍ବୀ ହେବା ସହ 10ରୁ ଅଧିକ ଲୋକଙ୍କୁ ଦେଇଛନ୍ତି ନିଯୁକ୍ତି ।
ଦିନ ଥିଲା ଏହି ଗାଁର ମହିଳା ମାନେ ଘରେ ବସି ରହୁଥିଲେ l ଏବେ ଏହି ମହିଳା ମାନେ ମିଶନ ଶକ୍ତିରେ ସାମିଲ ହୋଇ ଉନ୍ନତ ମାନର ଛତୁଆ ତିଆରି କରି ରୋଜଗାରକ୍ଷମ ହୋଇପାରିଛନ୍ତି । ଜୁନାଗଡ଼ ବ୍ଲକର 7ଟି ସେକ୍ଟରର 182 ଅଙ୍ଗନବାଡି କେନ୍ଦ୍ରକୁ ଛତୁଆ ଯୋଗାଉଛନ୍ତି । ଉନ୍ନତ ମାନର ଛତୁଆ ପ୍ରସ୍ତୁତ କରୁଥିବା ଯୋଗୁଁ ରାଜ୍ୟ ସରକାରଙ୍କ ଠାରୁ ଏହି ଏସଏଚଜି ପୁରସ୍କାର ମଧ୍ୟ ପାଇଛି ।
