ଭୁବନେଶ୍ବର: ଏସିଆନ ଗେମ୍ସ ପାଇଁ ଚୟନ ହୋଇଥିବା ୧୩ ଖେଳାଳିଙ୍କ ପାଇଁ ସହାୟତା ଘୋଷଣା । ପ୍ରତି ଖେଳାଳିଙ୍କ ପାଇଁ ୧୦ ଲକ୍ଷ ଲେଖାଏଁ ସହାୟତା ଘୋଷଣା ହୋଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ସହାୟତା ରାଶି ଘୋଷଣା କରିଛନ୍ତି ।
ଟ୍ରେନିଂ ଓ ପ୍ରସ୍ତୁତି ପାଇଁ ସହାୟତା ରାଶି ଘୋଷଣା ହୋଇଛି । ଆସନ୍ତା ୨୩ରୁ ଅକ୍ଟୋବର ୮ ତାରିଖ ପର୍ଯ୍ୟନ୍ତ ଚାଲିବ ଏସିଆନ ଗେମ୍ସ ।
ସୋର: ସାମ୍ବାଦିକଙ୍କ ପରିବାରକୁ ମିଳିଲା ସରକାରୀ ସହାୟତା । ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଲେ ମୃତ ସାମ୍ବାଦିକଙ୍କ ପରିବାର। ସୋର କାର୍ଯ୍ୟରତ ଥିବା ସାମ୍ବାଦିକ ଧୀରେଶ ଚନ୍ଦ୍ର ବେହେରାଙ୍କ ମୃତ୍ୟୁ ପରେ ତାଙ୍କ ପରିବାରକୁ ୪ ଲକ୍ଷ ଟଙ୍କାର ସହାୟତା ରାଶି ମିଳିଛି। ରାଜ୍ୟ ସରକାରଙ୍କ ସୂଚନା ଓ ଲୋକସମ୍ପର୍କ ବିଭାଗ ମାଧ୍ୟମରେ ସାମ୍ବାଦିକ କଲ୍ୟାଣ ପାଣ୍ଠିରୁ ଏହି ସହାୟତା ରାଶି ପ୍ରଦାନ କରାଯାଇଛି। ସହାୟତା ରାଶି ପାଇବା ପରେ ମୁଖ୍ୟମନ୍ତ୍ରୀଙ୍କୁ ମୃତକଙ୍କ ପରିବାର ଲୋକେ ଧନ୍ୟବାଦ ଜଣାଇଛନ୍ତି ।
ଗଞ୍ଜାମ: ରାଜ୍ୟ ବିଜେପିକୁ ଶକ୍ତ ଝଟକା । ବିଜେପି ଛାଡ଼ିଲେ ଗଞ୍ଜାମର ଯୁବ ବିଜେପି ନେତା ରଞ୍ଜନ ପଲାଇ । ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ରଞ୍ଜନ ପଲାଇ । ବିଧାୟକ ପ୍ରାର୍ଥୀ ତଥା ରାଜ୍ୟ କାର୍ଯ୍ୟକାରିଣୀ ସଦସ୍ୟ ଥିଲେ ରଞ୍ଜନ ପଲାଇ । ଗତ ନିର୍ବାଚନରେ କବିସୂର୍ଯ୍ୟନଗରରୁ ହୋଇଥିଲେ ବିଧାୟକ ପ୍ରାର୍ଥୀ । କବିସୂର୍ଯ୍ୟନଗରର ଜଣେ ଦକ୍ଷ ସଙ୍ଗଠକ ଭାବେ ପରିଚିତ ରଞ୍ଜନ ପଲାଇ ।
ସାରା ଜିଲ୍ଲାରେ ବିଜେପିକୁ ଆଗକୁ ନେବାରେ ଗୁରୁତ୍ବପୂର୍ଣ୍ଣ ଭୂମିକା ନେଇଥିଲେ ରଞ୍ଜନ । ଦଳୀୟ ବିଶୃଙ୍ଖଳା ସହିତ ରାଜ୍ୟ ବିଜେପି ସଭାପତିଙ୍କ ନୈରାଶ୍ୟଜନକ ମନ୍ତବ୍ୟକୁ ବିରୋଧ କରି ସମସ୍ତେ ଦଳ ଛାଡିଛନ୍ତି । ରଞ୍ଜନଙ୍କ ସହ ମଣ୍ଡଳ ସଭାପତି ଅଶୋକ ସାହୁ, ଅଶୋକ ପ୍ରଧାନ, ମୀନକେତନ ପାଣିଗ୍ରାହୀ, ସୁଦର୍ଶନ ସାହୁ ଓ ପ୍ରଶାନ୍ତ ସାହୁ ମଧ୍ୟ ବିଜେପି ଛାଡ଼ିଛନ୍ତି ।
ସେହିପରି କୋଦଳା ଏନଏସିର ୫ କାଉନସିଲରଙ୍କ ପ୍ରତିନିଧିଙ୍କ ସହ ପଞ୍ଚାୟତ ଓ ବୁଥ୍ ସଭାପତି, ବିଭିନ୍ନ ମୋର୍ଚ୍ଚା ସଭାପତିଙ୍କ ସହ ଶତାଧିକ କର୍ମୀ ବିଜେପିରୁ ଇସ୍ତଫା ଦେଇଛନ୍ତି ।
ଭୁବନେଶ୍ବର: ଲଘୁଚାପର ରୂପ ନେଲା ବଙ୍ଗୋପସାଗରରେ ସୃଷ୍ଟ ଘୂର୍ଣ୍ଣିବଳୟ । ଉତ୍ତର ବଙ୍ଗୋପସାଗରର ମଧ୍ୟଭାଗରେ କେନ୍ଦ୍ରୀଭୂତ ହୋଇଛି ଲଘୁଚାପ । ୨୪ ଘଣ୍ଟାରେ ଓ୍ବେଲମାର୍କ ଲୋପ୍ରେସରରେ ପରିଣତ ହେବ । ପରେ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତିକରି ଦକ୍ଷିଣ ଓଡିଶା, ଉତ୍ତର ଆନ୍ଧ୍ରପ୍ରଦେଶ ଏବଂ ଦକ୍ଷିଣ ଛତିଶଗଡ଼ ମୁହାଁ ହେବ ।
ପ୍ରଭାବରେ ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାରେ ପ୍ରବଳରୁ ଅତିପ୍ରବଳ ବର୍ଷା ନେଇ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏଥିପାଇଁ ୨୨ ଜିଲ୍ଲାକୁ ସତର୍କତା ଜାରି ହୋଇଛି । ୮ଟି ଜିଲ୍ଲାକୁ ରେଡ ଆଲର୍ଟ ଜାରି କରାଯାଇଛି । ସୋନପୁର, ବୌଦ୍ଧ, କନ୍ଧମାଳ, ଅନୁଗୁଳ, ନୟାଗଡ଼, ଗଞ୍ଜାମ, ଢେଙ୍କାନାଳ ଓ କଟକରେ ଭୀଷଣ ବର୍ଷା ନେଇ ରେଡ୍ ଆଲର୍ଟ ଜାରି କରାଯାଇଛି ।
ସେହିପରି ୧୨ ଜିଲ୍ଲାରେ ଅତିପ୍ରବଳ ବର୍ଷା ପାଇଁ ଅରେଞ୍ଜ ଏବଂ ୭ ଜିଲ୍ଲାରେ ପ୍ରବଳ ବର୍ଷା ପାଇଁ ୟେଲୋ ଆଲର୍ଟ ଜାରି କରାଯାଇଛି ।
ବାରିପଦା: ଭିଜିଲାନ୍ସ ଜାଲରେ ବାରିପଦା ପି.ଏଚ ଡିଭିଜନ-୧ ସହକାରୀ ଯନ୍ତ୍ରୀ । ସହକାରୀ ଯନ୍ତ୍ରୀ ବାଣେଶ୍ବର ନାଏକଙ୍କ ଘରେ ଚଢ଼ାଉ କରିଛି ଭିଜିଲାନ୍ସ । ଆୟ ବହିର୍ଭୂତ ସଂପତ୍ତି ଠୁଳ ଅଭିଯୋଗରେ ଚାଲିଛି ଚଢ଼ାଉ ।
ଏକକାଳୀନ ୫ଟି ସ୍ଥାନରେ ଚଢାଉ କରିଛି ଭିଜିଲାନ୍ସ ଟିମ୍ । ରଘୁନାଥପୁରରେ ଥିବା ୩ ମହଲା କୋଠା, ତାଳନ୍ଦାରେ ଥିବା ଦୁଇ ମହଲା କୋଠା ଓ ବାସଭବନରେ ଚଢ଼ାଉ ହୋଇଛି । ସେହିପରି ମାଣିତ୍ରୀରେ ଥିବା ସଂପର୍କୀୟଙ୍କ ଘର ସମେତ ଅଫିସରେ ଚାଲିଛି ଛାନିବନ୍ । ଚଢ଼ାଉରେ ୨ ASP, ୩ DSP, ୭ IIC, ଜଣେ SI, ୭ ASI ସାମିଲ ହୋଇଛନ୍ତି ।
ଭୁବନେଶ୍ବର: ଆଜି ଲୋକସେବା କନଭେନସନରେ ସମସ୍ତ ସରକାରୀ ଓ ବେସରକାରୀ କଲେଜ ଅଧ୍ୟକ୍ଷମାନଙ୍କ କର୍ମଶାଳା ବସିବ । ଏଥିରେ ଉଚ୍ଚଶିକ୍ଷା ବ୍ୟବସ୍ଥାର ସମୀକ୍ଷା କରାଯିବ । କର୍ମଶାଳା ଜରିଆରେ କଲେଜର ସମସ୍ୟା ଉପରେ ଆଲୋଚନା ହେବା ସହ ଡିଗ୍ରୀ କଲେଜ ଗୁଡ଼ିକରେ ରାଜ୍ୟ ସରକାରଙ୍କ ଯୋଜନାର କାର୍ଯ୍ୟକାରିତା ନେଇ ମନିଟରିଂ କରାଯିବ ।
ପାଖାପାଖି ୩୦୦ ସରକାରୀ ଓ ବେସରକାରୀ ଡିଗ୍ରୀ କଲେଜର ଅଧ୍ୟକ୍ଷ କର୍ମଶାଳାରେ ଯୋଗଦେବେ । କାର୍ଯ୍ୟକ୍ରମରେ ଶିକ୍ଷା ବ୍ୟବସ୍ଥାକୁ ନେଇ ଉଠିଥିବା ସମସ୍ୟାର ସମାଧାନ ଦିଗରେ ବାଟ ବାହାର କରାଯିବ । ଉଚ୍ଚଶିକ୍ଷା ପାଇଁ 5T ରୂପାନ୍ତର ପରି ରାଜ୍ୟ ସରକାରଙ୍କ ଯୁଗାନ୍ତକାରୀ ପଦକ୍ଷେପର କାର୍ଯ୍ୟକାରିତା ଉପରେ ବି ସମୀକ୍ଷା କରାଯିବ । କଲେଜକୁ ନିୟମାନୁଯାୟୀ ସମୟ ଦେଇ ରିସର୍ଚ୍ଚ ଅନୁକୁଳ ବାତାବରଣ ସୃଷ୍ଟି କରିବା ନେଇ ବି କର୍ମଶାଳାରେ ବିସ୍ତୃତ ରୋଡମ୍ୟାପ୍ ପ୍ରସ୍ତୁତ କରାଯାଇ ପାରିବ ।
ରାଜ୍ୟ ସରକାର ଶିକ୍ଷାରେ କୌଣସି ବ୍ୟତିକ୍ରମକୁ ବରଦାସ୍ତ କରିବା ମୁଡରେ ନାହାନ୍ତି । ବହୁ ଦିନ ବ୍ୟବଧାନ ପରେ ଅଧ୍ୟକ୍ଷ କର୍ମଶାଳା ହେଉଥିବାରୁ ଅଧ୍ୟକ୍ଷମାନେ ସ୍ବାଗତ କରିଛନ୍ତି ।
କଲମ୍ବୋ: ଟିମ ଇଣ୍ଡିଆର ଦମଦାର ପ୍ରଦର୍ଶନ । ଶ୍ରୀଲଙ୍କାକୁ ହରାଇ ଏସିଆ କପ ଫାଇନାଲରେ ରୋହିତ ବାହିନୀ । କୁଲଦୀପ ଯାଜବଙ୍କ ଦମଦାର ବୋଲିଂ ଏବଂ ୪ ଓ୍ବିକେଟ ଦଳକୁ ବିଜୟରେ ସହାୟକ ହୋଇଛି । ୪୧ ରନରେ ଭାରଜ ଜିତିଥିବାବେଳେ ପ୍ରଥମ ଦଳ ଭାବେ ଫାଇନାଲରେ ପ୍ରବେଶ କରିଛି । ଭାରତ ପକ୍ଷରୁ ଶ୍ରୀଲଙ୍କା ଆଗରେ ୨୧୪ ରନର ବିଜୟ ଲକ୍ଷ୍ୟ ରଖାଯାଇଥିବାବେଳେ ଶ୍ରୀଲଙ୍କା ୪୧.୩ ଓଭରରେ ୧୭୨ ରନ କରି ଅଲଆଉଟ ହୋଇଯାଇଥିଲା । ଶ୍ରୀଲଙ୍କା ପକ୍ଷରୁ ଦୁନିଥ ଓ୍ବାଲାଲାଙ୍ଗେ ସର୍ବାଧିକ ୪୨ ରନ କରିଥିବାବେଳେ ଧନଞ୍ଜୟ ଡିସିଲଭା ୪୧ ରନ କରିଥିଲେ । ଭାରତ ପକ୍ଷରୁ କୂଳଦୀପ ଯାଦବ ୪ଟି ଓ୍ବିକେଟ ନେଇଥିବାବେଳେ ଯଶପ୍ରୀତ ବୁମରା ଓ ରବୀନ୍ଦ୍ର ଜାଦେଜା ୨ଟି ଲେଖାଏଁ ଓ୍ବିକେଟ ନେଇଥିଲେ ।
ଭୁବନେଶ୍ବର: କଷ୍ଟ ଅର୍ଜିତ ଅର୍ଥରେ ଘର କିଣିବାର ସ୍ବପ୍ନ କେମିତି ପାଣିଫୋଟକା ପରି ମିଳେଇଯାଏ, ତାର ପ୍ରକୃଷ୍ଟ ଉଦାହାରଣ ହେଉଛି ‘ଜେଡ୍ ଓ୍ବାନ ହାଉସିଂ’ ପ୍ରକଳ୍ପ । ମହାକାଳ ଫଳ ଭଳି ଜେଡ ଇଷ୍ଟେଟ ଲୋକଙ୍କୁ ଏକ ରଙ୍ଗୀନ ଚିତ୍ର ଦେଖାଇ ଠକି ଦେଇଛି । ଜେଡ୍ ଓ୍ବାନ ମାଲିକ ସଂଘ ପକ୍ଷରୁ ଏଭଳି ଅଭିଯୋଗ ଆସିଛି । ଏନେଇ ଇଓଡବ୍ଲୁରେ ମଧ୍ୟ ଏକ ଅଭିଯୋଗ ହୋଇଛି । ୨୦୧୧ରେ ୨୬ ଏକର ୧୮୪ ଡିସିମିଲ ଜମିରେ ଜେଡ୍ ୱାନ ପ୍ରକଳ୍ପ ପାଇଁ ବିଡିଏରୁ ଅନୁମତି ମିଳିଥିଲା । ୨୧ଟି ଟାୱାର, ୨୬ଟି ଭିଲା, କ୍ଲବ ହାଉସ, କମ୍ୟୁନିଟି ସେଣ୍ଟର, କ୍ରେଚ୍ ଓ ଅନ୍ୟାନ କମନ ଅମେନିଟି ପାଇଁ ଅନୁମତି ମିଳିଥିଲା । ବୁକିଂ ସମୟରେ ଫେଜୱାରୀ କାମ ହେବ ବୋଲି କୁହାଯାଇଥିଲା ।
ଏଗ୍ରିମେଣ୍ଟ ଅନୁଯାୟୀ ଘରର ମାଲିକାନା ସହ କମନ ଏରିଆରେ ମଧ୍ୟ ସେୟାର ରହିବ ବୋଲି କୁହାଯାଇଥିଲା । ନିର୍ଦ୍ଧାରିତ ସମୟର ବର୍ଷେ ପରେ ସେଲ ଡିଡ୍ ଆରମ୍ଭ ହୋଇଥିଲା । ଯେଉଁ ଆଧାରରେ ସେଲ ଡିଡ୍ ହେବା କଥା ତାର ଉଲଂଘନ କରାଯାଉଥିଲା । ଏକଥା ଘର କ୍ରୟ କରୁଥିବା ବ୍ୟକ୍ତିମାନେ ଜାଣୁଥିଲେ ମଧ୍ୟ ବାଧ୍ୟବାଧକତାରେ ସେଲ ଡିଡ୍ କରିଥିବା ଅଭିଯୋଗ ହୋଇଛି । ଘର କିଣିବା ପରେ ଆସୋସିଏସନ ମଧ୍ୟ ଗଠନ କରାଗଲା ନାହିଁ । ରାଜ୍ୟ ମାନବାଧିକାର କମିଶନଙ୍କ ହସ୍ତକ୍ଷେପ ପରେ ୨୦୨୧ରେ ଆସୋସିଏସନ ଗଠନ କରାଗଲା । କିନ୍ତୁ ଘରର ମାଲିକାନା ସତ୍ତ୍ବ ଦିଆଗଲାନି । ଏଭିତରେ ବିଡିଏରେ ମୂଳ ପ୍ଲାନ ପରିବର୍ତ୍ତନ ମଧ୍ୟ କରାଯାଇଛି ।
ଏନେଇ ବିଡିଏରେ ଅଭିଯୋଗ ସହ ହାଇକୋର୍ଟରେ ଏକ ମାମଲା କରିଥିଲେ ଜେଡ୍ ୱାନ ଓନର୍ସ ଆସୋସିଏସନ । ପରିବର୍ଦ୍ଧିତ ପ୍ରକଳ୍ପରେ ମଧ୍ୟ ଆଇନର ଉଲଂଘନ କରାଯାଇଥିବାରୁ ରେରା ମଧ୍ୟ ନିଜ ଆଡୁ ମାମଲା କରିଛି । ଏନଜିଟି ଆଇନ ଅନୁଯାୟୀ ପ୍ରକଳ୍ପ ଏରିଆର ୨୦ ପ୍ରତିଶତ ଅର୍ଥାତ ୫ ଏକର ଜାଗାରେ ଗ୍ରୀନ ବେଲ୍ଟ କରିବା କଥା । ୫ ପ୍ରତିଶତ ବିଦ୍ୟୁତ ସୋଲାରରୁ ଉତ୍ପାଦିତ ହେବା କଥା । ରେନ ୱାଟର ହାର୍ଭେଷ୍ଟ ବି ହୋଇନି ।
ଏନେଇ ଏନଜିଟିରେ ମଧ୍ୟ ଏକ ମାମଲା ରୁଜୁ ହୋଇଛି । ଘର ମାଲିକଙ୍କ ପ୍ରତି ଜେଡ୍ ଇଷ୍ଟେଟର ବେପରୁଆ ମନୋଭାବ ସହ ଲୋକଙ୍କୁ ସିଧାସଳଖ ଠକୁଥିବା ଅଭିଯୋଗ କରିଛନ୍ତି ଓନର୍ସ ଆସୋସିଏସନ । ବିଡିଏରୁ ଅନୁମତିପ୍ରାପ୍ତ ବିଲ୍ଟ ଅପ ଏରିଆ ଓ ୟୁଟିନୱାରୀ ଫ୍ଲାଟ ବିକ୍ରିକୁ ହିସାବ କଲେ ମଧ୍ୟ ବିଡିଏ ଆଇନର ଉଲଂଘନ କରି ଗ୍ରାହକଙ୍କୁ ଠକାଯାଇଛି । ୮ ଲକ୍ଷ ୩୬ ହଜାର ୬୫୨ ବର୍ଗ ଫୁଟ ଅଞ୍ଚଳ ବିକ୍ରି କରାଯାଇଛି । କିନ୍ତୁ ବିଡିଏରେ ୭ ଲକ୍ଷ ୪୬ ହଜାର ବର୍ଗଫୁଟ ନିର୍ମାଣର ହିସାବ ଦିଆଯାଇଛି । ଆଇନର ଗୋଲକ ଧନ୍ଦାରେ ବିନା ପ୍ଲାନ ଅନୁମୋଦନରେ କ୍ଲବ ଟାଉନ ପ୍ରକଳ୍ପ ତିଆରି କରି ବିକ୍ରି କରାଯାଇଛି ବୋଲି ଓନର୍ସ ଆସୋସିଏସନ ଅଭିଯୋଗ କରିଛି ।
ଜେନ ୱାନ ପ୍ରକଳ୍ପରେ ଏଫଡିଆଇ ଇନଭେଷ୍ଟମେଣ୍ଟ ହୋଇଥିବା ଦାବି କରାଯାଉଛି । କିନ୍ତୁ ଏଫଡିଆଇ ଇନଭେଷ୍ଟମେଣ୍ଟ କେଉଁଠି ବିନିଯୋଗ ହୋଇଛି ତାର ହିସାବ ମାଗୁଛନ୍ତି ଘର କିଣିଥିବା ବ୍ୟକ୍ତି । କ୍ଲବ ହାଉସ ପାଇଁ ପ୍ରତ୍ୟେକ କ୍ରେତାଙ୍କ ଠାରୁ ୭୫ ହଜାର ଟଙ୍କା ଲେଖାଏଁ ଆଦାୟ କରାଯାଇଛି । କିନ୍ତୁ କ୍ଲବରେ କ୍ରେତାଙ୍କ ମାଲିକାନା ନାହିଁ । ପାର୍କିଂ ଏରିଆକୁ ମଧ୍ୟ ବିକ୍ରି କରାଯାଇଛି । କମ୍ୟୁନିଟି ହଲକୁ ମଧ୍ୟ ବାଉନସର ଲଗେଇ ବନ୍ଦ କରାଗଲା । ଏନେଇ ଅର୍ଥନୈତିକ ଅପରାଧ ଶାଖାରେ ଅଭିଯୋଗ ହୋଇଛି । ଫନିରେ ହୋଇଥିବା କ୍ଷୟକ୍ଷତି ଅର୍ଥ ବି ଘର ମାଲିକଙ୍କୁ ଦେବା ବଦଳରେ ଜେଡ୍ ଇଷ୍ଟେଟ ମାଲିକ ନିଜେ ଆତ୍ମସାତ କରିଦେଇଛନ୍ତି । ରାଜନୈତିକ ଓ ମିଡିଆ ବଳରେ ସେ ଗ୍ରାହକଙ୍କୁ ଧମକଚମକ ଦେଉଛନ୍ତି । ଅଭିଯୋଗ କରିବାରୁ ଅନେକ ପରିବାରକୁ ଜାଣିଶୁଣି ହଇରାଣ କରାଯାଉଛି ବୋଲି ଓନର୍ସ ଆସୋସିଏସନ ଅଭିଯୋଗ କରିଛି । ଜେଡ୍ ୱାନ ବିରୋଧରେ ଏମିତି ମାଳ ମାଳ ଅଭିଯୋଗ ସାମ୍ନାକୁ ଆସିଛି ।
ଭୁବନେଶ୍ବର: ଚୀନ ପ୍ରେମରେ କେନ୍ଦ୍ର । ସୀମାରେ ବିବାଦ ନେଇ ଡ୍ରାଗନ ସହ ମୁହାଁମୁହିଁ ସ୍ଥିତି ଉପୁଜିଛି । ଅନ୍ୟପଟେ ବେଧଡ଼କ ଭାବେ ଚୀନ୍ ସାମଗ୍ରୀ ଭାରତକୁ ଆମଦାନୀ ହେଉଛି । ସ୍ଥିତି ଏମିତି ହେଲାଣି, ଆମଦାନୀ ପରିମାଣ ୮ ଲକ୍ଷ ୧୭ ହଜାର କୋଟି ଟଙ୍କାରେ ପହଞ୍ଚିଲାଣି । ଆମଦାନୀ ତୁଳନାରେ ରପ୍ତାନୀ କମ୍ ଯୋଗୁ ଦେଶର ବାଣିଜ୍ୟିକ ନିଅଣ୍ଟ ୪.୭ ବିଲିୟନ୍ ଡଲାରରେ ପହଞ୍ଚିଛି । ବାଣିଜ୍ୟିକ ଚୁକ୍ତି ରଦ୍ଦ ନ କରି ଲୋକଙ୍କୁ ଚୀନ ଉତ୍ପାଦ ବର୍ଜନ କରିବା ଆହ୍ବାନ କେନ୍ଦ୍ର ସରକାରଙ୍କ ଦୋମୁହାଁ ନୀତି ବୋଲି ବିରୋଧୀ ଅଭିଯୋଗ କରିଛନ୍ତି ।
ଚୀନ ସହିତ ଲାଗି ରହିଛି ସୀମା ବିବାଦ । ତଥାପି ଡ୍ରାଗନ୍ ପ୍ରେମରେ କେନ୍ଦ୍ର ସରକାର । ଚୀନ ସହିତ ତୁଟାଇ ନାହାନ୍ତି ବାଣିଜ୍ୟିକ ସମ୍ପର୍କ । ଦିନକୁ ଦିନ ବଢୁଛି ଚୀନ ଉପରେ ନିର୍ଭରଶୀଳତା । ରେଳ ଉପକରଣଠୁ ଆରମ୍ଭ କରି ଇଲେକ୍ଟ୍ରୋନିକ୍ସ୍ ସାମଗ୍ରୀ, ମୋବାଇଲ ସମେତ ବିଭିନ୍ନ ଖାଉଟି ଉତ୍ପାଦନ ଆମଦାନୀ ବୃଦ୍ଧି ହେବାରେ ଲାଗିଛି । ୨୦୨୩ ମାର୍ଚ୍ଚ ସୁଦ୍ଧା ଚୀନରୁ ଆମଦାନୀ ପରିମାଣ ୮ ଲକ୍ଷ ୧୭ ହଜାର ୨୮୪ କୋଟି ୧୬ ଲକ୍ଷ ଟଙ୍କାରେ ପହଞ୍ଚିଲାଣି । ଯାହାକି ଗତ ଆର୍ଥିକ ବର୍ଷ ଅପେକ୍ଷା ୪.୧୬ ପ୍ରତିଶତ ଅଧିକ ।
ଅନ୍ୟପଟେ ଚୀନକୁ ରପ୍ତାନୀ ପରିମାଣ କମିବାରେ ଲାଗିଛି । ରିପୋର୍ଟ ଅନୁଯାୟୀ ଭାରତୀୟ ସାମଗ୍ରୀର ରପ୍ତାନୀ ପରିମାଣ ୨୮ ପ୍ରତିଶତ କମିଛି । ସ୍ଥିତି ଏମିତି ହେଲାଣି ଚୀନ ସହିତ ବାଣିଜ୍ୟିକ କାରବାର ଯୋଗୁ ଦେଶରେ ସାଂଘାତିକ ବାଣିଜ୍ୟିକ ନିଅଣ୍ଟ ବଢିଛାଲିଛି । ରପ୍ତାନୀ କମ୍ ହେଉଥିବାରୁ ବାଣିଜ୍ୟିକ ନିଅଣ୍ଟ ପରିମାଣ ୭୨.୯ ବିଲିୟନ୍ ଡଲାରରୁ ବୃଦ୍ଧି ଘଟି ୭୭.୬ ବିଲିୟନ୍ ଡଲାରରେ ପହଞ୍ଚିଲାଣି । ବିରୋଧୀ ଅଭିଯୋଗ କରିଛନ୍ତି, ସୀମା ବିବାଦ ଲାଗି ରହିଥିବା ବେଳେ ଭାରତର ସୀମାବର୍ତ୍ତୀ ଅଞ୍ଚଳକୁ ନିଜ ମାନଚିତ୍ରରେ ଦେଖାଉଛି ଚୀନ । ଲୋକଙ୍କୁ ଚୀନ ସାମଗ୍ରୀ ବର୍ଜନ ପାଇଁ କହୁଥିବା କେନ୍ଦ୍ର ସରକାର ଚୀନ ସହିତ ବାଣିଜ୍ୟିକ ସଂପର୍କ ଛିନ୍ନ ନ କରିବା ଦୁର୍ଭାଗ୍ୟଜନକ । ଏହା ହିଁ କେନ୍ଦ୍ର ସରକାରଙ୍କ ଦୋମୁହାଁ ନୀତି ।
ରପ୍ତାନୀ ତୁଳନାରେ ଆମଦାନୀ ବୃଦ୍ଧି ନେଇ ଚିନ୍ତା ପ୍ରକଟ କରିଛନ୍ତି ଅର୍ଥନୀତିଜ୍ଞ । ଏପରି ହେଲେ ଦେଶର ବାଲାନସ୍ ଅଫ୍ ପେମେଣ୍ଟ୍ ବିଗିଡିଯିବ । ଷ୍ଟାଣ୍ଡ୍ ଅପ୍ ଇଣ୍ଡିଆ, ଷ୍ଟାର୍ଟ୍ ଅପ୍ ଇଣ୍ଡିଆ, ଆତ୍ମ ନିର୍ଭର ଭାରତ କାର୍ଯ୍ୟକ୍ରମ ଚାଲୁ କଲେ ବି ଏ ପର୍ଯ୍ୟନ୍ତ କେନ୍ଦ୍ର ସରକାର ଚୀନ ଉପରେ ନିର୍ଭରଶୀଳତାକୁ ଛାଡ଼ିପାରିନାହାନ୍ତି । ଚୀନରୁ କମ୍ ଦାମରେ କଞ୍ଚାମାଲ ମିଳୁଥିବାରୁ ଭାରତୀୟ ବ୍ୟବସାୟୀ ବେଧଡ଼କ ଚୀନରୁ ଆମଦାନୀ କରୁଛନ୍ତି । ଯେତେ ପରିମାଣରେ ଆମଦାନୀ ହେଉଛି ସେହି ତୁଳନାରେ ଯଦି ରପ୍ତାନୀ ହୁଅନ୍ତା ତାହେଲେ ବାଣିଜ୍ୟିକ ନିଅଣ୍ଟ ହୁଅନ୍ତା ନାହିଁ । ଏପରି ସ୍ଥିତି ଜାରି ରହିଲେ ଚୀନର ବଡ଼ ଭାଇ ପଣିଆ ଆହୁରି ବଢିଯିବ ବୋଲି ସମୀକ୍ଷକ ଆଶଙ୍କା ପ୍ରକାଶ କରିଛନ୍ତି ।
ସିଏମ୍ଆଇ ରିପୋର୍ଟ ଅନୁଯାୟୀ ଚଳିତ ଆର୍ଥିକ ବର୍ଷରେ ଚୀନରୁ ଆମଦାନୀ ବୃଦ୍ଧି ଯୋଗୁ ବାଣିଜ୍ୟିକ ନିଅଣ୍ଟ ଆହୁରି ବୃଦ୍ଧି ହୋଇଚାଲିଛି । ଗତ ଜୁଲାଇ ସୁଦ୍ଧା ଏହି ନିଅଣ୍ଟ ୨୦.୭ ବିଲିୟନ୍ ଡଲାରରେ ପହଞ୍ଚିଛି । ଏହି ହିସାବ କହୁଛି ଏବେ ବି ଭାରତୀୟମାନେ କେତେ ପରିମାଣରେ ଚୀନ ସାମଗ୍ରୀ ବ୍ୟବହାର କରୁଛନ୍ତି । ତାହେଲେ କେନ୍ଦ୍ର ସରକାରଙ୍କ ଚୀନ ସାମଗ୍ରୀ ବର୍ଜନ କଣ କେବଳ ସ୍ଲୋଗାନ୍ରେ ସୀମିତ? ତାକୁ ନେଇ ଉଠିଛି ପ୍ରଶ୍ନ ।
ନନ୍ଦିଘୋଷ ବ୍ୟୁରୋ: ଚାଷୀ ଭାଇ ସାବଧାନ! ବିଲକୁ ଯିବା ପୂର୍ବରୁ ସବୁ ଦିଗ ଦେଖିକି ଯାଅ । କାରଣ ବିଲରେ ମାତିଛି ସ୍କ୍ରବ ଟାଇଫସ । ଏହି ବ୍ୟାକ୍ଟେରିଆଲ ଇନଫେକ୍ସନ ଚିଗର ନାମକ କୀଟ କାମୁଡ଼ିଲେ ହେଉଛି । ଜ୍ବର ଆସୁ ଆସୁ ପରୀକ୍ଷା କରି ପ୍ରତିଶେଧକ ସେବନ ନ କଲେ, ମୃତ୍ୟୁ ହେବାର ଆଶଙ୍କା ରହିଛି । ସବୁ ହସ୍ପିଟାଲରେ ଏହାର ପରୀକ୍ଷା ପାଇଁ ସୁବିଧା ରହିଛି । ବରଗଡ଼, ନବରଙ୍ଗପୁର, ସୁନ୍ଦରଗଡ଼ ପରି ଜିଲ୍ଲାରେ ସ୍କ୍ରବ ଟାଇଫସ୍ ବ୍ୟାପିଛି । ହେଲେ ସର୍ବାଧିକ କେସ୍ କେନ୍ଦୁଝରରୁ ଆସୁଛି ।
ବିଲ କି ଜଙ୍ଗଲକୁ ଯିବା ସମୟରେ ଧ୍ୟାନ ଦିଅନ୍ତୁ । ଛୋଟ ପୋକଟିଏ କାମୁଡ଼ିଲେ ବି ଏହାକୁ ହାଲୁକା ଭାବେ ନିଅନ୍ତୁ ନାହିଁ । ଏହି ଛୋଟ ପୋକ ଆପଣଙ୍କ ଜୀବନ ନେଇପାରେ । ଚିଗର ନାମକ କୀଟ ବିଲ ଓ ଜଙ୍ଗଲରେ ସ୍ଥିତି ବଢାଇଲେଣି । ଫସଲ କି ପତ୍ରରେ ଲୁଚି ରହୁଛନ୍ତି । ଏହି କୀଟର କାମୁଡ଼ା ଏତେ ବିଷାକ୍ତ ଯେ ଶରୀରର ସେହି ଚର୍ମ ମରି ସ୍କ୍ରବ ଟାଇଫସରେ ରୋଗୀକୁ ଆକ୍ରାନ୍ତ କରୁଛି । ଏହାର କିଛି ସମୟ ଭିତରେ ଦେହହାତ ବିନ୍ଧା ହୋଇ ଜର ହେବା ସହ ଶରୀର ଲାଲ୍ ପଡ଼ିଯାଏ । ଧୀରେ ଧୀରେ ମୁଣ୍ଡବିନ୍ଧା ଆରମ୍ଭ ହୋଇ ଶରୀରର ତାପମାତ୍ରା ବଢିବାରେ ଲାଗେ ।
ଯାହା ୧୪ରୁ ୨୧ ଦିନ ଯାଏ ରୋଗୀକୁ ଅସୁସ୍ଥ କରିବା ସହ ଶରୀରରେ ଲାଲ୍ ଓ କଳା ପଡ଼ିଯିବା ଭଳି ବଡ଼ ବଡ଼ ଚିହ୍ନ ହୋଇଯାଏ । ଏହି ସମୟରେ ସ୍କ୍ରବ ଟାଇଫସ୍ ଏତେ ଭୟାଭୟ ହୋଇଯାଏ ଯେ ରୋଗୀକୁ ମୃତ୍ୟୁ ମୁଖକୁ ଠେଲି ଦେବାର ସମ୍ଭାବନା ରହିଛି । ଯେଉଁଥି ପାଇଁ ଜରର ପ୍ରଥମ ଷ୍ଟେଜରେ ହିଁ ଏହାର ପରୀକ୍ଷଣ ଆବଶ୍ୟକ । ପ୍ରଥମ ଷ୍ଟେଜରେ ରୋଗ ଚିହ୍ନଟ ହୋଇଗଲେ, ସାଧାରଣ ଆଣ୍ଟିବାୟୋଟିକ୍ କାମ ଦେବ । ଏହାର ପରୀକ୍ଷା ସବୁ ଜିଲ୍ଲା ହସ୍ପିଟାଲର ଡିପିଏଜଏଲରେ ଏଲିଶା ପଦ୍ଧତିରେ କରିବାର ବ୍ୟବସ୍ଥା ରହିଛି ।
ସ୍କ୍ରବ ଟାଇଫସ୍ ଯୋଗୁ ଚାଷୀଙ୍କ ଚିନ୍ତା ହଜି ଯାଇଛି । ଗୋଟାଏ ପଟେ ଜୀବିକା ପାଇଁ ବିଲ ଯିବାକୁ ପଡ଼ୁଛି, ତ ଅନ୍ୟପଟେ ବିଲରେ ଛକି ବସିଛି ଅଜଣା କୀଟ । ଓଡ଼ିଶାର ଭାତହାଣ୍ଡି ବରଗଡ଼ରେ ସ୍କ୍ରବ ଟାଇଫସ ଯୋଗୁ ୫ ଜଣଙ୍କ ମୃତ୍ୟୁ ହୋଇଥିବା ନେଇ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ ସୂଚନା ଦେଇଛନ୍ତି ।
