ବଲାଙ୍ଗୀର : ଆୟୁର୍ବେଦିକ କଲେଜ ଅଧ୍ୟକ୍ଷଙ୍କ ଘରେ ରେଡ୍ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବଲାଙ୍ଗୀର ଆୟୁର୍ବେଦିକ କଲେଜ ଆଣ୍ଡ୍ ହସ୍ପିଟାଲ୍ର ଅଧ୍ୟକ୍ଷ ପ୍ରଫେସର ସୁଦର୍ଶନ ବେହେରାଙ୍କ ଘରେ ଭିଜିଲାନ୍ସ ଚଢାଉ କରିଛି।
ଏକକାଳୀନ ୬ଟି ସ୍ଥାନରେ ଜାରି ରହିଛି ଚଢାଉ । ପୁରୀ ଜିଲ୍ଲାରେ ଥିବା ତାଙ୍କର ୪ଟି ଘରେ ଭିଜିଲାନ୍ସ ଟିମ୍ର ଚଢାଉ ଚାଲିଥିବା ବେଳେ ସମ୍ବଲପୁର ସ୍ଥିତ ସୁଦର୍ଶନ ପତ୍ନୀଙ୍କ କ୍ୱାର୍ଟର୍ସ, ବଲାଙ୍ଗିର ଅଫିସ୍ ଓ ତାଙ୍କ ସମ୍ପର୍କୀୟଙ୍କ ଘରେ ମଧ୍ୟ ଚାଲିଛି ରେଡ୍ । ଏହି ଚଢାଉରେ ୮ ଡିଏସପି ଓ ୬ ଇନିସପେକ୍ଟର ସାମିଲ ଅଛନ୍ତି।
ବେଙ୍ଗାଲୁରୁ : ଚତୁର୍ଥ ଦଳ ଭାବେ କିଏ ପାଇବ ବିଶ୍ବକପ ସେମିଫାଇନାଲ ଟିକେଟ । ସେମି ଆଶା ପକ୍କା କରିବାକୁ ଆଜି ଶ୍ରୀଲଙ୍କା ସହ ଲଢିବ ନ୍ୟୁଜିଲାଣ୍ଡ । ସେମିର ୪ର୍ଥ ଦଳ ଦୌଡ଼ରେ ଏବେ ରହିଛନ୍ତି ନ୍ୟୁଜିଲାଣ୍ଡ, ପାକିସ୍ତାନ । ନ୍ୟୁଜିଲାଣ୍ଡ ଓ ପାକିସ୍ତାନ ଯଦି ନିଜ ନିଜର ଶେଷ ମ୍ୟାଚ ଜିତନ୍ତି ତେବେ ନେଟ୍ ରନରେଟ ଅନୁସାରେ ୪ର୍ଥ ଦଳ ନିର୍ଦ୍ଧାରଣ ହେବ । ବର୍ତ୍ତମାନର ରନରେଟ ଅନୁସାରେ ନ୍ୟୁଜିଲାଣ୍ଡ ପାକିସ୍ତାନଠାରୁ ଆଗୁଆ ରହିଛି । ବେଙ୍ଗାଲୁରୁର ଚିନ୍ନାସ୍ବାମୀ ଷ୍ଟାଡିୟମଠାରେ ନ୍ୟୁଜିଲାଣ୍ଡ ନିଜର ଶେଷ ଲିଗ୍ ମ୍ୟାଚ ଶ୍ରୀଲଙ୍କା ବିପକ୍ଷରେ ଖେଳିବ ।
ଆଫଗାନିସ୍ତାନକୁ ଅଷ୍ଟ୍ରେଲିଆ ପରାଜିତ କରିବା ପାକିସ୍ତାନ ଓ ନ୍ୟୁଜିଲାଣ୍ଡ ପାଇଁ ଖୁସି ଖବର ଆଣିଛି । ଉଭୟ ଟିମର ସେମିଫାଇନାଲ ଟିକେଟ ହାତେଇବା ଆଶା ଆହୁରି ଉଜ୍ଜିବୀତ ହୋଇଛି । ଆଜି ନ୍ୟୁଜିଲାଣ୍ଡ ବିଜୟୀ ହେଲେ ସେମିଫାଇନାଲ ରେସରେ ସବୁଠୁ ଆଗରେ ରହିବ ।
ମାତ୍ର ନ୍ୟୁଜିଲାଣ୍ଡ ଶ୍ରୀଲଙ୍କା ନିକଟରୁ ପରାଜିତ ହେଲେ ପାକିସ୍ତାନ ଶେଷ ମ୍ୟାଚରେ ଇଂଲଣ୍ଡକୁ ହରାଇ ସେମିଫାଇନାଲରେ ପହଞ୍ଚିପାରିବ । କିନ୍ତୁ ନ୍ୟୁଜିଲାଣ୍ଡ ଓ ଶ୍ରୀଲଙ୍କା ମ୍ୟାଚରେ ବର୍ଷା ସମ୍ଭାବନା ରହିଛି, ଯଦି ବର୍ଷା ହୁଏ ତେବେ ନ୍ୟୁଜିଲାଣ୍ଡକୁ ଏକ ପଏଣ୍ଟ ମିଳିବ । ଯାହା ପାକିସ୍ତାନ ଓ ଆଫଗାନିସ୍ତାନର ସେମିଫାଇନାଲ ସମ୍ଭାବନାକୁ ଆହୁରି ବଳ ଯୋଗାଇବ ।
୧୦ ତାରିଖରେ ଦକ୍ଷିଣ ଆଫ୍ରିକା ବିପକ୍ଷରେ ଆଫଗାନିସ୍ତାନ ମୈଦାନକୁ ଓହ୍ଲାଇବାକୁ ଥିବାବେଳେ ୧୧ ତାରିଖରେ ଇଂଲଣ୍ଡ ବିପକ୍ଷରେ ଖେଳିବ ପାକିସ୍ତାନ । ତେବେ ଆଜି ଶ୍ରୀଲଙ୍କା ବିପକ୍ଷରେ ବୃହତ ବିଜୟ ହାସଲ କରି ପାକିସ୍ତାନ ଓ ଆଫଗାନିସ୍ତାନର ସେମିଫାଇନାଲ ଆଶା ଧୂଳିସାତ କରିବାକୁ ଆଶା ରଖିଛି ନ୍ୟୁଜିଲାଣ୍ଡ ।
ଭୁବନେଶ୍ୱର : ରାଜ୍ୟରେ ଖସୁଛି ପାରଦ, ଧୀରେଧୀରେ ବଢୁଛି ଶୀତ । ରାଜ୍ୟରେ ତାପମାତ୍ରା ଖସିବା ଆରମ୍ଭ ହୋଇଛି । ଦେଶର ମଧ୍ୟଭାଗରେ ଏକ ଗୁରୁଚାପବଳୟ ସକ୍ରିୟ ହେଉଥିବାରୁ ରାଜ୍ୟ ମଧ୍ୟକୁ ଉତ୍ତର-ପଶ୍ଚିମ ତଥା ଉତ୍ତର ଦିଗରୁ ଶୁଷ୍କ-ଥଣ୍ଡା ବାୟୁ ପ୍ରବାହିତ ହେଉଛି। ଏଥିପାଇଁ କିଛି ସ୍ଥାନରେ ତାପମାତ୍ରା ଖସିଛି ।
ଅନେକ ସ୍ଥାନରେ ୧-୨ ଡିଗ୍ରୀ ତାପମାତ୍ରା ହ୍ରାସ ହୋଇଥିବା ବେଳେ ଆଗାମୀ ୨ ଦିନ ମଧ୍ୟରେ ତାପମାତ୍ରାରେ ଆହୁରି ୨ରୁ ୩ ଡିଗ୍ରୀ ପର୍ଯ୍ୟନ୍ତ ହ୍ରାସ ପାଇବାର ସମ୍ଭାବନା ରହିଛି । କେତେକ ସ୍ଥାନରେ ଘନ କୁହୁଡ଼ି ମଧ୍ୟ ଦେଖାଦେଉଛି । ଆସନ୍ତା ସପ୍ତାହେ ପର୍ଯ୍ୟନ୍ତ ରାଜ୍ୟରେ ପାଗ ଶୁଖିଲା ରହିବ ।
୧୪ ତାରିଖ ପରେ ଶୀତ ଆହୁରି ବଢିପାରେ ବୋଲି ପାଣିପାଗ କେନ୍ଦ୍ର ଆକଳନ କରିଛି । ଉତ୍ତର ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାରେ ୩ ଡିଗ୍ରୀ ତାପମାତ୍ରା କମିବା ସମ୍ଭାବନା ରହିଛି । ସେପଟେ ଦୀପାବଳିରେ ପାଗ ଅନୁକୂଳ ରହିବ। ବର୍ଷା ହେବାର ଆଶଙ୍କା ନାହିଁ ।
ଭୁବନେଶ୍ୱର : ମହକିବ ମାଣ୍ଡିଆ, ମିଲେଟ୍ ସହ ଯୋଡ଼ିହେବ ବିଶ୍ବ । ଆଜିଠୁ ଭୁବନେଶ୍ବରରେ ଦୁଇ ଦିନିଆ ଆନ୍ତର୍ଜାତୀୟ ମିଲେଟ୍ ସମ୍ମିଳନୀ । ସମ୍ମିଳନୀର ବିଷୟବସ୍ତୁ ରହିଛି ଆଧୁନିକ ଯୁଗର ଆହ୍ବାନ ନିମନ୍ତେ ପ୍ରାଚୀନ ଶସ୍ୟ ମିଲେଟସ୍ । ଓଡ଼ିଶା ମିଲେଟ୍ ମିଶନକୁ ପରବର୍ତ୍ତୀ ପର୍ଯ୍ୟାୟକୁ ନେବା ପାଇଁ ଭାରତର ପ୍ରଥମ ରାଜ୍ୟ ଭାବେ ଓଡ଼ିଶା ଦୁଇ ଦିନିଆ ଆନ୍ତର୍ଜାତୀୟ ମିଲେଟ୍ ସମ୍ମିଳନୀ ଆୟୋଜନ କରୁଛି ।
ଭୁବନେଶ୍ବରର ଜନତା ମଇଦାନରେ ଆୟୋଜନ ହେଉଛି ବିରାଟ କାର୍ଯ୍ୟକ୍ରମ । ପୂରାଦେଶ ପାଇଁ ସମ୍ମିଳନୀରେ ମିଲେଟ୍ ପଲିସି ରୋଡମ୍ୟାପ୍ ପ୍ରସ୍ତୁତ ହେବ । ମାଣ୍ଡିଆ ଚାଷୀଙ୍କୁ ସ୍ବତନ୍ତ୍ର ପ୍ରୋତ୍ସାହନ ସହ ଘରେଘରେ ମିଲେଟ୍ ବ୍ୟବହାର ବୃଦ୍ଧି ପାଇଁ କୃଷି ଓ କୃଷକ ସଶକ୍ତିକରଣ ବିଭାଗ ଲକ୍ଷ୍ୟ ରଖିଛି । ଦୁଇଦିନିଆ ଆନ୍ତର୍ଜାତିକ ସମ୍ମିଳନୀରେ ରାଉଣ୍ଡ ଟେବୁଲ ବୈଠକ, ବିଟୁ ବି ମିଟିଂ, ଖାଦ୍ୟ ମହୋତ୍ସବ, ମିଲେଟ୍ ଉପରେ କୁଇଜ ଓ ରନ୍ଧନ ପ୍ରତିଯୋଗିତା ହେବ ।
ଜାତିସଂଘର ବିଭିନ୍ନ ସଂସ୍ଥା, କୃଷି ସଂଗଠନ, ବିଶ୍ବ ଖାଦ୍ୟ କାର୍ଯ୍ୟକ୍ରମ, ଇଣ୍ଟରନ୍ୟାସନାଲ ଫଣ୍ଡ ଫର ଏଗ୍ରିକଲଚରାଲ ଡେଭଲମେଣ୍ଟ, ଆଫ୍ରିକୀୟ ଓ ୟୁରୋପୀୟ ଦେଶର କୃଷି ପରାମର୍ଶଦାତା ସାମିଲ ହେବେ । ଗ୍ରାମୀ ପୁରସ୍କାର ବିଜେତା ରିକି କେଜ୍, ଖାତନାମା ସେଫ୍ ବିକାଶ ଖାନ୍ନା ପ୍ରମୁଖ ସାମିଲ ହେବେ । ୨୦୧୭ରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମାର୍ଗଦର୍ଶନରେ କୃଷି ଓ କୃଷକ ସଶକ୍ତିକରଣ ବିଭାଗ ମିଲେଟ ମିଶନ ଆରମ୍ଭ କରିଛି । ବୈଜ୍ଞାନିକ ପଦ୍ଧତି ଏବଂ ପାରମ୍ପରିକ ଜ୍ଞାନକୌଶଳର ମିଶ୍ରଣରେ ଓଡ଼ିଶାର ୩୦ଟି ଜିଲ୍ଲାର ୧୭୭ ବ୍ଲକକୁ ସଂପ୍ରସାରଣ କରାଯାଇଛି ମିଲେଟ୍ ଚାଷ । ଦିନକୁ ଦିନ ମିଲେଟ ମିଶନ ସଫଳତାର ସିଡ଼ି ଚଢୁଛି । ଆଗମୀ ଦିନରେ ଏହି ପଲିସି ରୋଡମ୍ୟାପ୍ ବେଶ୍ ସହାୟକ ହେବ ।
ସମ୍ୱଲପୁର : ଶେଷ ପର୍ଯ୍ୟାୟରେ ମାଆ ସମଲେଶ୍ବରୀଙ୍କ ମନ୍ଦିରର ରୂପାନ୍ତରଣ କାର୍ଯ୍ୟ । ଝଟକିଲାଣି ବେଢା, ପ୍ରସ୍ତୁତ ହେଲାଣି ହେରିଟେଜ୍ କରିଡର । ଆସନ୍ତାମାସ ସୁଦ୍ଧା ମନ୍ଦିରର ରୂପାନ୍ତରଣ ସାରିବାକୁ ରାଜ୍ୟ ସରକାର ଲକ୍ଷ୍ୟ ରଖିଥିବାବେଳେ ସକାଳୁସକାଳୁ ପୀଠ ପରିସରରେ ପହଞ୍ଚି ରୂପାନ୍ତରଣର ଅନୁଧ୍ୟାନ କରିଛନ୍ତି 5T ଓ ନବୀନ ଓଡ଼ିଶାର ଅଧ୍ୟକ୍ଷ ଭିକେ ପାଣ୍ଡିଆନ ।
ସକାଳ ୬ଟାରୁ ମାଆ ସମଲେଶ୍ବରୀଙ୍କ ପୀଠରେ ପହଞ୍ଚି ରୂପାନ୍ତରଣ କାର୍ଯ୍ୟର ଅଗ୍ରଗତିର ସମୀକ୍ଷା କରିଛନ୍ତି ପାଣ୍ଡିଆନ । ମନ୍ଦିରର ଉନ୍ନତିକରଣ ନେଇ ସେବାୟତ ଓ ନିର୍ମାଣକାରୀ ସଂସ୍ଥା ସହିତ ଆଲୋଚନା କରିଛନ୍ତି । ନୂତନ ମନ୍ଦିର ବେଢା ନିର୍ମାଣ, ପାର୍କିଂ ସ୍ଥଳୀ, ପୋଡିୟମ, ଧାଡି ପରିଚାଳନା ବ୍ୟବସ୍ଥା, କ୍ଲକ ରୁମ ସହ ମନ୍ଦିର ଚାରିପାଖକୁ ସୌନ୍ଦର୍ଯ୍ୟକରଣ କରାଯାଉଛି ।
ଭେଣ୍ଡିଂ ଜୋନ, ସୂଚନା କେନ୍ଦ୍ର, ତୀର୍ଥଯାତ୍ରୀ ସୁବିଧା, ମନ୍ଦିର ସୁବିଧା କେନ୍ଦ୍ର କାମ ଜାରି ରହିଛି । ମନ୍ଦିର ରୂପାନ୍ତରଣର ୭୦ ପ୍ରତିଶତରୁ ଅଧିକ ଶେଷ ହେଲାଣି । ପ୍ରତି କାମକୁ ଦେଖିବା ସହ ଏହାର ଗୁଣାବତ୍ତା ସମ୍ପର୍କରେ ଆଲୋଚନା କରିବା ସହ ନୂଆବର୍ଷ ପୂର୍ବରୁ କାମ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି ଭିକେ ପାଣ୍ଡିଆନ ।
ନନ୍ଦିଘୋଷ ବ୍ୟୁରୋ: ପୁଣି କ୍ୟାମ୍ପସରେ ରାଗିଂ । ଛାତ୍ର ମାନୁନାହାଁନ୍ତି ନିୟମକାନୁନ । କୋଏମ୍ବାଟୁର ପିଏସଜି କଲେଜରେ ରାଗିଂ ଅଭିଯୋଗ । ଘଟଣାରେ ୭ଜଣଙ୍କୁ ଗିରଫ କରିଛି ପୋଲିସ । ପିଏସଜି କଲେଜ ଅଫ ଟେକନୋଲୋଜିର ୭ଜଣ ସିନିୟର ଛାତ୍ର ସେହି କଲେଜର ଜୁନିୟର ଛାତ୍ରଙ୍କୁ ବ୍ଲାକମେଲିଂ କରିବା ସହ ମାରପିଟ କରିଥିବା ଅଭିଯୋଗ ହୋଇଛି । ପୀଡିତ ଜଣକ ହେଉଛନ୍ତି ଇଞ୍ଜିନିୟରିଂ ବିଭାଗର ଦ୍ୱିତୀୟ ବର୍ଷ ଛାତ୍ର । କିଛି ଦିନ ଧରି କିଛି ସିନିୟର ଛାତ୍ର ତାଙ୍କୁ ଲଗାତାର ରାଗିଂ କରିବା ସହିତ ବେଲ୍ଟରେ ପିଟୁଥିଲେ । ନିର୍ଯାତନାରେ ଅତିଷ୍ଠ ହୋଇ ପୋଲିସର ଦ୍ୱାରସ୍ଥ ହୋଇଥିଲେ ଛାତ୍ର । ଖବର ପାଇ ଘଟଣାର ତଦନ୍ତ କରୁଛି ପୋଲିସ । ସେପଟେ କଲେଜ ପ୍ରଶାସନ ପକ୍ଷରୁ ଦୋଷୀକୁ ଉଚିତ୍ ଶାସ୍ତି ଦିଆଯିବା ପାଇଁ ସମସ୍ତ ପ୍ରକାର ସହାୟତା କରିବେ ବୋଲି ଆଶ୍ୱାସନା ଦେଇଛନ୍ତି ।
ସମ୍ବଲପୁର: ସମ୍ବଲପୁର ସରଲାରେ ମେମୁ ପାସେଞ୍ଜର ଲାଇନଚ୍ୟୁତ । ଗୋରୁ ସାମ୍ନାକୁ ଚାଲି ଆସିବାରୁ ଲାଇନଚ୍ୟୁତ ହୋଇଛି ଝାରସୁଗୁଡା-ସମ୍ବଲପୁର ମେମୁ ଟ୍ରେନ । ଦୁର୍ଘଟଣାରେ ଗୋଟିଏ ବଗି ଲାଇନଚ୍ୟୁତ ହୋଇଛି । କେହି ମୃତାହତ ହୋଇନଥିବା ସୂଚନା ରହିଛି । ଏବେ ରେଳ ଧାରଣାରେ ମରାମତି କାମ ଚାଲିଛି । ଦୁଇ ଘଣ୍ଟା ମଧ୍ୟରେ ମରାମତି କାମ ଶେଷ ହୋଇଯିବ ବୋଲି ବରିଷ୍ଠ ଅଧିକାରୀଙ୍କ ଦ୍ବାରା କୁହାଯାଇଛି ।
ଭୁବନେଶ୍ବର: ଘର ଛାଡି ଯାଉଥିଲେ ସାବଧାନ। ବାହାରକୁ ଯିବା କଥା ଅଜଣା ଲୋକଙ୍କୁ ଜଣାନ୍ତୁ ନାହିଁ । ସୋସିଆଲ ମିଡିଆରେ ବି ଫଟୋ ପୋଷ୍ଟ କରନ୍ତୁନି। ଗତ ମାସକରେ ରାଜଧାନୀରେ ଥିବା ୨୧ଟି ଆପାର୍ଟମେଣ୍ଟରୁ ଲୁଟ ପରେ ଲୋକଙ୍କୁ ସତର୍କ କରାଇଛି କମିଶନରେଟ ପୋଲିସ । ପୋଲିସକୁ ଦୋଷ ନଦେଇ ନିଜେ ସଚେତନ ହେବାକୁ ପରାମର୍ଶ ଦେଇଛି ପୋଲିସ ।
ଆପାର୍ଟମେଣ୍ଟରେ ରହୁଥିଲେ ହୋଇଯାଆନ୍ତୁ ସାବଧାନ। ଘର ଛାଡ଼ି ଯାଉଥିଲେ ରୁହନ୍ତୁ ସଜାଗ। ଆପଣଙ୍କ ଧନ ସମ୍ପତ୍ତି ଉପରେ ପଡିପାରେ ଲୁଟେରାଙ୍କ ନଜର । ପୋଲିସ ଦୋଷ ନଦେଇ ନିଜେ ସୁରକ୍ଷିତ ରହିବା ଦିଗରେ ସଚେତନ କଲେ କମିଶନର । ଇନ୍ଫୋସିଟି ଥାନା ଠାରୁ ମାତ୍ର ଶହେ ମିଟର ଦୂର ପଥରଗାଡ଼ିଆ ରୋଡରେ ଥିବା ଏ ହେଉଛି ରାଜବାଟିକା କମ୍ପ୍ଲେକ୍ସ ଆପାର୍ଟମେଣ୍ଟ । ଆଉ ଏ ହେଉଛି ଅକ୍ଟୋବର ୧୫ ତାରିଖ ରାତିର ସିସିଟିଭି ଭିଜୁଆଲ । ଖାକିକୁ ଖୋଲା ଚ୍ୟାଲେଞ୍ଜ ଦେଇ ଆପାର୍ଟମେଣ୍ଟର ୩ ଟି ଫ୍ଲାଟ ନମ୍ବର H2 , I4, G4ରୁ ପାଖାପାଖି ୫ କୋଟି ଟଙ୍କାର ଆସବାବପତ୍ର ଲୁଟ କରିଥିଲେ ଲୁଟେରା । କାହାର ଝିଅ ବାହାଘର ପାଇଁ ସୁନା ଥିଲା ତ ଆଉ କାହାର ଜମି କିଣିବା ପାଇଁ ଥିବା ଟଙ୍କାକୁ ବ୍ୟାଗରେ ଭର୍ତ୍ତି କରି ଲୁଟି ନେଇଥିଲେ ଅଭିଯୁକ୍ତ । ଏନେଇ ଅଭିଯୋଗ ପରେ ପୋଲିସ, ସାଇଣ୍ଟିଫିକ ଟିମ ଓ ଡଗ ସ୍କ୍ବାର୍ଡ ଛାନଭିନ ଚଳାଇଥିଲେ ସୁଧା ଫଳ ଶୂନ ।
ଗତ ମାସକରେ କେବଳ ରାଜବାଟୀକା ଆପାର୍ଟମେଣ୍ଟ ନୁହଁ ରାଜଧାନୀରେ ଥିବା ୨୧ଟି ଆପାର୍ଟମେଣ୍ଟରେ କଳାକନା ବୁଲାଇଛନ୍ତି ଲୁଟେରା । ସିକ୍ୟୁରିଟି ଗାର୍ଡ ଓ ସିସିଟିଭିକୁ ସେମାନଙ୍କ ଖାତିର ନାହିଁ । କେବଳ ପୋଲିସକୁ ଦୋଷ ନଦେଇ ଲୋକେ ନିଜେ ସଚେତନ ହୁଅନ୍ତୁ । ଘର ଛାଡ଼ି ବାହାରକୁ ଯିବା ବେଳେ ଅଜଣା ଲୋକଙ୍କୁ ନଜଣାଇବା ସହ ସୋସିଆଲ ମିଡିଆରେ ଫଟୋ ଆସିବା ପର୍ଯ୍ୟନ୍ତ ପୋଷ୍ଟ ନକରିବା ପାଇଁ ଟୁଇନ ସିଟି ବାସୀଙ୍କୁ ସଚେତନ କରିଛନ୍ତି ପୋଲିସ କମିଶନର।
ଭୁବନେଶ୍ବର: ପାଠପଢା ସମୟରୁ ଉଦ୍ୟୋଗୀ ହେବାର ସୁଯୋଗ । ଉଦ୍ୟୋଗୀ ହେବା ନେଇ କଲେଜ ଛାତ୍ରଛାତ୍ରୀଙ୍କ ନୂଆ ଆଇଡିଆ ଓ ନୂଆ ଭାବନାକୁ ସାଉଁଟିବା ପାଇଁ ଚାଲିଛି ଷ୍ଟାର୍ଟ ଅପ୍ ଯାତ୍ରା । ସେପ୍ଟେମ୍ବର ୧୧ରେ ମୁଖ୍ୟମନ୍ତ୍ରୀ ଶୁଭାରମ୍ଭ କରିଥିବା ଏହି ଯାତ୍ରା ବିଭିନ୍ନ ଜିଲ୍ଲାର କଲେଜରେ ପହଞ୍ଚିଛି । ରାଜ୍ୟରେ ୫ହଜାର ନୂଆ ଆଇଡିଆ ସଂଗ୍ରହ କରି ଊଦୀୟମାନ ଉଦ୍ୟୋଗୀ ସୃଷ୍ଟି କରିବା ନେଇ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । ମହିଳା ସଶକ୍ତୀକରଣକୁ ଗୁରୁତ୍ବ ଦିଆଯାଉଥିବାରୁ ଛାତ୍ରୀଙ୍କ ଉପରେ ଅଧିକ ଫୋକସ କରାଯାଇଛି ।
ଷ୍ଟାର୍ଟ-ଅପ୍ କ୍ଷେତ୍ରରେ ଓଡ଼ିଶା ଦେଶର ଅଗ୍ରଣୀ ରାଜ୍ୟ । ମହିଳା ଉଦ୍ୟୋଗୀ ସୃଷ୍ଟି କରିବାରେ ଓଡ଼ିଶା ଜାତୀୟ ହାରଠାରୁ ଅନେକ ଆଗରେ । ପାଠପଢା ବେଳୁ ଉଦ୍ୟୋଗୀ ହେବାର ସ୍ବପ୍ନକୁ ସାକାର କରୁଛି ଷ୍ଟାର୍ଟଅପ୍ ଓଡ଼ିଶା । ସେପ୍ଟେମ୍ବର ୧୧ରୁ ମୁଖ୍ୟମନ୍ତ୍ରୀ ଶୁଭାରମ୍ଭ କରିଥିବା ଷ୍ଟାର୍ଟ-ଅପ୍ ଯାତ୍ରା ଏବେ ସବୁ ଜିଲ୍ଲାର ଅନେକ କଲେଜରେ ପହଞ୍ଚିଛି । ରମାଦେବୀ ମହିଳା ବିଶ୍ବବିଦ୍ୟାଳୟରେ ଷ୍ଟାର୍ଟ-ଅପ୍ ପାଇଁ ଆଇଡ଼ିଆ ଖୋଜା କ୍ୟାମ୍ପରେ ଅନେକ ଉତ୍ସାହ । ଏକାଡ଼େମିକ ପାଠ ସହ ନିଜ ଭିତରେ ଥିବା ନୂଆ ଚିନ୍ତାଧାରା, ଭାବନାକୁ ଉଦ୍ୟୋଗ ରୂପ ଦେବା ପାଇଁ ସହାୟତାର ହାତ ବଢାଇଛି ଷ୍ଟାର୍ଟ-ଅପ୍ ଓଡ଼ିଶା । ରାଜ୍ୟ ସରକାରଙ୍କ ବଳିଷ୍ଠ ନୀତି, ନୂଆ ଉଦ୍ୟୋଗ ପାଇଁ ମାସିକିଆ ପ୍ରୋତ୍ସାହନ, ପୁଞ୍ଜି ବିନିଯୋଗର ରାସ୍ତା ସାଙ୍ଗକୁ ମାର୍କେଟିଙ୍ଗ ପାଇଁ ସ୍ବତନ୍ତ୍ର ଖସଡ଼ା ଷ୍ଟାର୍ଟଅପ୍ ଓଡ଼ିଶାକୁ ସାରା ଦେଶରେ ଅଗ୍ରଣୀ କରିପାରିଛି ।
୨୦୨୫ ସୁଦ୍ଧା ରାଜ୍ୟରେ ୫ ହଜାର ଷ୍ଟାର୍ଟ ଅପ୍ କାର୍ଯ୍ୟକ୍ଷମ ହେବା ନେଇ ସରକାର ଲକ୍ଷ୍ୟ ରଖିଛନ୍ତି । ମୋବାଇଲ୍ ଭ୍ୟାନ୍ କ୍ୟାମ୍ପ ଦ୍ବାରା ସଂଗୃହୀତ ନୂଆ ଆଇଡିଆକୁ ସିଲେକସନ୍ କମିଟି ଅନୁଶୀଳନ କରି ସର୍ଟ୍ଲିଷ୍ଟ କରୁଛି । ୬୦ଟି ବୁଟ୍କ୍ୟାମ୍ପ୍ ଜରିଆରେ ଉଦ୍ୟୋଗୀ ଚୟନ ହେବାକୁ ଥିବା ବେଳେ କ୍ୟାମ୍ପ ଲାଗିଛି ରମାଦେବୀ ମହିଳା ବିଶ୍ବବିଦ୍ୟାଳୟରେ । ୨୦ଟି ସର୍ବଶ୍ରେଷ୍ଠ ନୂଆ ଚିନ୍ତନକୁ ଭୁବନେଶ୍ବର ଓ-ହବ୍ରେ ଇନ୍କ୍ୟୁବେସନ୍ ପାଇଁ ଅଣାଯିବ । କଲେଜ ପିଲାଙ୍କ ପାଇଁ ଉଦ୍ଦିଷ୍ଟ ୧୦ଟି ଅଭିନବ ସ୍ବତନ୍ତ୍ର ଷ୍ଟାର୍ଟ୍ ଅପ୍ ଆଇଡିଆକୁ ୩ ଲକ୍ଷ ଲେଖାଏଁ ନଗଦ ପୁରସ୍କାର ଦିଆଯିବ ।
୩୩ ପ୍ରତିଶତ ମହିଳା ଉଦ୍ୟୋଗୀ ସୃଷ୍ଟି କରିବାକୁ ସରକାର ଲକ୍ଷ୍ୟ ରଖିଥିବା ବେଳେ ଏହା ଏବେ ୪୧ ପ୍ରତିଶତରେ ପହଞ୍ଚିଛି, ଯାହା ଜାତୀୟ ହାରଠାରୁ ଅଧିକ । ୪ଲକ୍ଷ ବର୍ଗଫୁଟର ୨୭ଟି ଇନକ୍ୟୁବେଟରରେ ଏକାବେଳେ ୫ଶହ ଉଦ୍ୟୋଗୀ କାମ କରିବାର ସୁଯୋଗ ଦେଇଛନ୍ତି ସରକାର । ବିଶ୍ବବିଦ୍ୟାଳୟ ସ୍ତରରେ ପିଲାମାନଙ୍କ ଆଇଡ଼ିଆକୁ ବାସ୍ତବ ରୂପ ଦେବା ପାଇଁ ଇକୋ-ସିଷ୍ଟମ କରାଯାଇଛି । ନୂଆ ଷ୍ଟାର୍ଟ୍ ଅପ୍ ଉଦ୍ୟୋଗ ପ୍ରତିଷ୍ଠା କରିବା ପାଇଁ ଜମି ଓ ବ୍ୟାଙ୍କ ଋଣ ସହାୟତା ପ୍ରଦାନ ନେଇ ଓ-ହବ୍ ସବୁ ପ୍ରକାର ସହଯୋଗ ଯୋଗାଇ ଆସୁଛି । ଏବେ ସୁଦ୍ଧା ୧୭୭୩ ଜଣ ଷ୍ଟାର୍ଟଅପ୍ ଉଦ୍ୟୋଗୀ ସୃଷ୍ଟି ହୋଇସାରିଛନ୍ତି ।
ପାଟନା: ମହିଳାଙ୍କ ସମ୍ପର୍କରେ ଅରୁଚିକର ମନ୍ତବ୍ୟ ଦେଇ ଅଡୁଆରେ ବିହାର ସିଏମ ନୀତୀଶ କୁମାର । ଖୋଦ ବିଧାନସଭାରେ ଜନସଂଖ୍ୟା ନିୟନ୍ତ୍ରଣରେ ମହିଳାଙ୍କ ଭୂମିକାକୁ ନେଇ ଦେଇଥିବା ଟିପପଣୀ ଏବେ ଦେଶରେ ଜାଳିଛି ନିଆଁ । ସ୍ଥିତି ଏପରି ହେଲା ଯେ ଖୋଦ ବିଧାନସଭାରେ କ୍ଷମା ମାଗିଛନ୍ତି ଜାତୀୟ ରାଜନୀତିର ହେଭିଓ୍ବେଟ ନେତା ।
ଜାଣିଶୁଣି କହିଲେ ନା କହୁକହୁ କହିଦେଲେ? ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ବିବାଦୀୟ ବୟାନ ନେଇ ସାରା ଦେଶରେ ଝଡ଼ । ପଡୁଛି ଉଠୁଛି ଜାତୀୟ ରାଜନୀତି । ସ୍ଥିତି ଏପରି ହେଲା ଯେ କ୍ଷମା ମାଗିଲେ ସିନିଅର ପଲିଟିସିଆନ । ଗତକାଲି ବିହାର ବିଧାନସଭାରେ ନୀତୀଶ ଜନସଂଖ୍ୟା ହ୍ରାସ ସମ୍ପର୍କରେ ମହିଳାଙ୍କ ଉପରେ ଏପରି କିଛି ଟିପ୍ପଣୀ ଦେଇଥିଲେ ଯାହାକୁ ନେଇ ତେଜିଥିଲା କଥା କଟାକଟି । ବିବୃତିକୁ ନେଇ ଝଡ ସୃଷ୍ଟି ହୋଇଥିବାବେଳେ ନୀତୀଶଙ୍କୁ ସୁରକ୍ଷା ଦେବାକୁ ଆଗେଇ ଆସିଛନ୍ତି ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ । ସେ କହିଛନ୍ତି- ବିଦ୍ୟାଳୟରେ ସେକ୍ସ ଏଜୁକେସନ ପ୍ରସଙ୍ଗରେ ନୀତୀଶ କହିଥିଲେ । ଏହି ବିଷୟକୁ ଅନ୍ୟମାନେ ଭିନ୍ନାର୍ଥରେ ଗ୍ରହଣ କରିଛନ୍ତି । ବାସ୍ତବରେ ସ୍କୁଲରେ ସେକ୍ସ ଏଜୁକେସନ ଦିଆଯିବାର ଆବଶ୍ୟକତା ରହିଛି । ସେପଟେ ଏହି ପ୍ରସଙ୍ଗରେ ନୀତୀଶଙ୍କ ଉପରେ ବର୍ଷିଛନ୍ତି ଜାତୀୟ ମହିଳା କମିଶନ ଅଧ୍ୟକ୍ଷା ।
ଏବେ ଆସନ୍ତୁ ନଜର ପକାଇବା ମହିଳାଙ୍କ ସମ୍ପର୍କରେ କଣ କହିଥିଲେ ନୀତୀଶ । ସେ କହିଥିଲେ- ଜଣେ ଶିକ୍ଷିତ ମହିଳା ହିଁ ଅନ୍ତରଙ୍ଗ ପ୍ରକ୍ରିୟାରୁ କିଭଳି ଗର୍ଭଧାରଣରୁ ନିବୃତ୍ତ ରହିହେବ ତାହା ସେ ଜାଣିଛନ୍ତି । ଜନ୍ମହାର ବୃଦ୍ଧି କ୍ଷେତ୍ରରେ ସ୍ବାମୀଙ୍କ ଭୂମିକା ଅଧିକ ହୋଇଥାଏ । ଜଣେ ମହିଳା ଜାଣିଥାନ୍ତି ସେ କିଭଳି ଗର୍ଭଧାରଣ କରିବେ ନାହିଁ । ପୂର୍ବରୁ ବିହାରରେ ପ୍ରଜନନ ହାର ଥିଲା ୪.୩ । ଏବେ ତାହା ୨.୯କୁ ଖସିଛି । ଖୁବ୍ ଶୀଘ୍ର ଏହା ୨ରେ ପହଞ୍ଚିବ ବୋଲି କହିଥିଲେ ନୀତୀଶ ।
ବିହାର ବିଧାନସଭାରେ ଆଗତ ହୋଇଛି ଜାତିଗତ ସର୍ଭେ ରିପୋର୍ଟ । ଏସସି, ଏସଟି, ଓବିସି ଓ ଅଧିକ ପଛୁଆ ବର୍ଗଙ୍କ ସଂରକ୍ଷଣ ସୀମା ୫୦ ରୁ ୬୫ ପ୍ରତିଶତକୁ ବଢାଇବା ଲାଗି ସରକାର ଆଣିଛନ୍ତି ପ୍ରସ୍ତାବ । ସଂରକ୍ଷଣ ପ୍ରସଙ୍ଗରେ ରାଜ୍ୟ ସରକାର କ୍ରେଡିଟ ନେବାକୁ ନେଇ ନୀତୀଶଙ୍କୁ ବିରୋଧୀ କରିଛନ୍ତି ଅଧିକ ଟାର୍ଗେଟ ।
