ଆଠଗଡ଼: ବାବା ଧବଳେଶ୍ବରଙ୍କ ପୀଠରେ ଚାଲିଛି ପଞ୍ଚୁକ ବ୍ରତ । ବାବାଙ୍କ ପାଖରେ ଲାଗି ହୋଇଛି ପ୍ରସିଦ୍ଧ ଗଜ ଭୋଗ । ରାତି ଗୋଟାଏରୁ ନୀତିକାନ୍ତି ଆରମ୍ଭ ହୋଇ ମଙ୍ଗଳ ଆଳତୀ କରାଯାଇଥିଲା । ପରେ ୧୦୮ ସୁବାସିତ ଜଳ ଆଣି ସ୍ନାନ କରାଯାଇ ଖେଚୁଡି ଭୋଗ ଓ ଘର୍ଷଣ ପରେ ମହାସ୍ନାନ କରାଯାଇ ବଡସିଂହାର ବେଶରେ ସୁସଜ୍ଜିତ କରାଯାଇଥିଲା । ଏହାପରେ ଗଜଭୋଗ ଲାଗି କରା ଯାଇଥିଲା। ପୂଜକଙ୍କ ପରିବାର ପକ୍ଷରୁ ଚାଉଳ, ମୁଗ, ଗୁଡ, ନଡିଆ ସହ ବିଭିନ୍ନ ଦ୍ରବ୍ୟର ମିଶ୍ରଣର ଏହି ଗଜଭୋଗ ପ୍ରସ୍ତୁତି କରାଯାଇଥାଏ । ଏହି ଗଜ ଭୋଗକୁ ପାଇବା ପାଇଁ ଭକ୍ତ ବର୍ଷ ତମାମ ଅପେକ୍ଷା କରି ରହିଥାଏ ।
ଲକ୍ଷ୍ମୀନୃସିଂହ ବେଶରେ ଦର୍ଶନ ଦେବେ ମହାବାହୁ
ପୁରୀ: ଆଜି ପଞ୍ଚୁକର କାର୍ତ୍ତିକ ଶୁକ୍ଳ ଚତୁର୍ଦଶୀ । ଏହାକୁ ମହାକାର୍ତ୍ତିକ ମାସର ବୈକୁଣ୍ଠ ଚତୁର୍ଦ୍ଦଶୀ ତିଥି ମଧ୍ୟ କୁହାଯାଏ । ଏହି ଅବସରରେ ଶ୍ରୀବିଗ୍ରହଙ୍କୁ ଲକ୍ଷ୍ମୀନୃସିଂହ ବେଶରେ ସଜ୍ଜିତ କରାଯିବ । ଶ୍ରୀମନ୍ଦିର ଦ୍ୱାର ଫିଟା ପରେ ବିଭିନ୍ନ ନୀତିକାନ୍ତି ବଢ଼ି ଶ୍ରୀଜୀଉମାନଙ୍କ ଅବକାଶ ନୀତି ପରେ ଆଣମ୍ଭ ହେବ ଲକ୍ଷ୍ମୀନୃସିଂହ ବେଶ ।
ବିଭିନ୍ନ ପ୍ରକାରର ସୁବର୍ଣ୍ଣ ଅଳଙ୍କାରରେ ଶ୍ରୀଜୀଉମାନେ ବିଭୂଷିତ ହୋଇ ରତ୍ନସିଂହାସନରେ ବିରାଜମାନ କରି ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ସୋଲ ଓ ଜରିରେ ଡାଳି କରାଯାଇ ସେଥିରେ ରଙ୍ଗବେରଙ୍ଗର ଫୁଲ ସବୁକୁ ଶ୍ରୀମସ୍ତକରେ ଲଗାଯାଏ । ଏହି ଡାଳ ମଝି ମଝିରେ ଠିଆପାଖୁଡ଼ା ଆକୃତିର ସ୍ୱର୍ଣ୍ଣକିଆ ଖଞ୍ଜାଯାଇଥାଏ । ତେଣୁ ଏହାକୁ ଡାଳିକିଆ ବେଶ କୁହାଯାଏ ।
ସେପଟେ ପଞ୍ଚୁକକୁ ନେଇ ଚଳଚଞ୍ଚଳ ଶ୍ରୀକ୍ଷେତ୍ର ପୁରୀ । ବିଭିନ୍ନ ଅଞ୍ଚଳରୁ ଛୁଟି ଆସିଛନ୍ତି ହଜାର ହଜାର ହବିଷ୍ୟାଳି । ହବିଷ୍ୟାଳିଙ୍କ ସୁବିଧା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପ୍ରକାର ବ୍ୟବସ୍ଥା କରାଯାଇଛି ।
୨୬/୧୧ ମୁମ୍ବାଇ ଆକ୍ରମଣ: ମନେ ପଡ଼ିଲେ ଆଜି ବି ଶିହରୀ ଉଠେ ଛାତି
ଭୁବନେଶ୍ବର: ୨୬/୧୧ ଟେରର ଆଟାକ୍ । ୧୫ ବର୍ଷ ତଳେ ଆଜିର ଦିନରେ ମୁମ୍ବାଇରେ ଆତଙ୍କବାଦୀ ରଚିଥିଲେ ତାଣ୍ଡବ । ମୁମ୍ବାଇର ଛାତି ଥରାଇ ଦେଇଥିଲେ ୧୦ ଆତଙ୍କବାଦୀ । ସମୁଦ୍ର ପଥ ଦେଇ ପାକିସ୍ତାନରୁ ପଶି ଆସିଥିଲେ ଲସ୍କର-ଏ-ତୋଏବାର ଏହି ସଦସ୍ୟ । ନଭେମ୍ବର ୨୬ରୁ ୨୯ ମଧ୍ୟରେ ମୁମ୍ବାଇର ୧୨ଟି ଜାଗାରେ ବମିଂ ଓ ଗୁଳିମାଡ଼ ହୋଇଥିଲା । ଶତ୍ରୁଦେଶର ଯୋଜନା ସମ୍ପର୍କରେ ସାମାନ୍ୟ ସୁରାକ ପାଇପାରି ନଥିଲା ଭାରତୀୟ ଗୁଇନ୍ଦା ।
୪ ଦିନ ଧରି ରକ୍ତର ଖେଳ, ଗୁଳିଗୋଳା ମାଡ, ବୋମା ବିସ୍ଫୋରଣରେ ଥରି ଉଠିଥିଲା ମାୟାନଗରୀ । ସାଉଥ ମୁମ୍ବାଇର ଛତ୍ରପତି ଶିବାଜୀ ଟର୍ମିନସ୍, ଓବରଏ ଟ୍ରାଇଡେଣ୍ଟ, ତାଜ୍ ପ୍ୟାଲେସ୍ ଆଣ୍ଡ ଟାଓ୍ବର, ଲିଓପାର୍ଡ କାଫେ, କାମା ହସ୍ପିଟାଲ, ନରିମାନ ହାଉସ୍, ମେଟ୍ରୋ ସିନେମା, ଟାଇମ୍ସ ଅଫ ଇଣ୍ଡିଆ ବିଲ୍ଡିଂର ପଛ ଲେନ୍ ଓ ସେଣ୍ଟ ଜାଭିୟର କଲେଜରେ ହୋଇଥିଲା ଆକ୍ରମଣ । ମୁମ୍ବାଇ ପୋର୍ଟ ଏରିଆରେ ଓ ଭାଇଲ ପାରଲେଠାରେ ଏକ ଟ୍ୟାକ୍ସିରେ ବିସ୍ଫୋରଣ କରିଥିଲେ ଆତଙ୍କବାଦୀ ।
ଏହି ଆକ୍ରମଣରେ ପ୍ରାୟ ୧୭୫ ଜଣଙ୍କ ମୃତ୍ୟୁ ହୋଇଥିଲା । ୩ ଶହରୁ ଊର୍ଦ୍ଧ୍ବ ଲୋକ ଆହତ ହୋଇଥିଲେ । ୯ ଆତଙ୍କବାଦୀ ବି ନିହତ ହୋଇଥିଲେ । ବିସ୍ଫୋରଣର ମାଷ୍ଟର ମାଇଣ୍ଡ ୨୧ ବର୍ଷୀୟ ପାକିସ୍ତାନୀ ଆତଙ୍କବାଦୀ ଅଜମଲ ଅମୀର କସବଙ୍କୁ ଗିରଫ କରିଥିଲା ମୁମ୍ବାଇ ପୋଲିସ । ଟେରର ଆଟାକ ବେଳେ ୮୦ ଲୋକଙ୍କୁ କସାବ ହତ୍ୟା କରିଥିବା ପ୍ରମାଣିତ ହେବା ପରେ ତାକୁ ଫାଶି ଦଣ୍ଡ ଶୁଣାଇଥିଲେ ବମ୍ବେ ହାଇକୋର୍ଟ । ୨୧ ନଭେମ୍ବର ୨୦୧୨ରେ କସାବକୁ ୟେରଓ୍ବାଡା ସେଣ୍ଟ୍ରାଲ ଜେଲରେ ଫାଶି ଦିଆଯାଇଥିଲା ।
ବଙ୍ଗୋପସାଗରରେ ସୃଷ୍ଟି ହୋଇପାରେ ପୁଣି ଏକ ବାତ୍ୟା, କେଉଁଠି କରିବ ଲ୍ୟାଣ୍ଡଫଲ୍ ?
ଭୁବନେଶ୍ବର: ବଙ୍ଗୋପସାଗରରେ ସୃଷ୍ଟି ହେବାକୁ ଯାଉଛି ଆଉ ଏକ ଲଘୁଚାପ । ଏହା ନେଇପାରେ ବାତ୍ୟାର ରୂପ । ଯଦି ଲଘୁଚାପଟି ବାତ୍ୟାର ରୂପ ନିଏ ତେବେ କେଉଁଠି ଲ୍ୟାଣ୍ଡଫଲ୍ କରିବ ତାକୁ ନେଇ ବିଭିନ୍ନ ମଡେଲ ଆକଳନ କରିବା ଆରମ୍ଭ କରିଛନ୍ତି ।
କିଛି ମଡେଲ ବାତ୍ୟାଟି ବାଂଲାଦେଶରେ ଲ୍ୟାଣ୍ଡଫଲ କରିବା ନେଇ ଆକଳନ କରୁଥିବା ବେଳେ କିଛି ମଡେଲ ଆନ୍ଧ୍ର ଉପକୂଳ ଆଡକୁ ଇଙ୍ଗିତ କରୁଛି । ଆନ୍ତର୍ଜାତୀୟ ପାଣିପାଗ ବିଜ୍ଞାନୀ ଜାସନ୍ ନିକୋଲ୍ସ ବାତ୍ୟାର ଲ୍ୟାଣ୍ଡଫଲ ନେଇ ଆକଳନ କରି ନଥିଲେ ମଧ୍ୟ ବାତ୍ୟାର ପ୍ରଭାବ ଭାରତ କିମ୍ବା ବାଂଲାଦେଶରେ ପଡ଼ିପାରେ ବୋଲି ଆକଳନ କରିଛନ୍ତି ।
ବାତ୍ୟା ନେଇ ଆଇଏମଡି ପକ୍ଷରୁ କୌଣସି ଆକଳନ କରାଯାଇ ନଥିବା ବେଳେ କେବଳ ଅବପାତ ହେବ ବୋଲି ସୂଚନା ଦିଆଯାଇଛି । ଆଜି ସୁଦ୍ଧା ଦକ୍ଷିଣ ଆଣ୍ଡାମାନ୍ ସାଗରରେ ସୃଷ୍ଟି ହେବ ଘୂର୍ଣ୍ଣିବଳୟ । ପରବର୍ତ୍ତୀ ୨୪ ଘଣ୍ଟାରେ ଏହା ଲଘୁଚାପ ରୂପ ନେବ । ଦକ୍ଷିଣ ଆଣ୍ଡାମାନ୍ ସାଗର ପାର୍ଶ୍ବବର୍ତ୍ତୀ ଦକ୍ଷିଣପୂର୍ବ ବଙ୍ଗୋପସାଗର ଅଞ୍ଚଳରେ ଲଘୁଚାପ ସୃଷ୍ଟି ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ପରେ ଲଘୁଚାପଟି ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରିବା ସହ ୨୯ ତାରିଖ ବେଳକୁ ଆହୁରି ଘନୀଭୂତ ହୋଇ ଦକ୍ଷିଣ ପୂର୍ବ ବଙ୍ଗୋପସାଗରରେ ଅବପାତରେ ପରିଣତ ହେବ । ତେବେ ଅବପାତ ପ୍ରଭାବରେ କେଉଁଠି ବର୍ଷା ହେବ ସେ ନେଇ କୌଣସି ଆକଳନ ହୋଇନି । ଲଘୁଚାପ ସୃଷ୍ଟି ହେବାପରେ ତା’ର ଗତି କେଉଁଆଡେ ରହୁଛି ଓ କେଉଁ ଜିଲ୍ଲାରେ ବର୍ଷାର ପ୍ରଭାବ ରହିବ ସେ ନେଇ ସ୍ପଷ୍ଟ ସୂଚନା ମିଳିବ ।
କେରଳରେ ମ୍ୟୁଜିକ୍ କନସର୍ଟ ବେଳେ ଦଳାଚକଟା, ୪ ଛାତ୍ରଙ୍କ ମୃତ୍ୟୁ
କୋଚି: କେରଳର କୋଚିରେ ବଡ଼ ଧରଣର ଅଘଟଣ । କୋଚିନ ୟୁନିଭର୍ସିଟି ଅଫ୍ ସାଇନ୍ସ ଆଣ୍ଡ ଟେକ୍ନୋଲୋଜିରେ ଆୟୋଜିତ ମ୍ୟୁଜିକ୍ କନସର୍ଟରେ ଦଳାଚକଟା । ଦଳାଚକଟାରେ ୪ ଛାତ୍ରଙ୍କ ମୃତ୍ୟୁ । ଏକାଧିକ ଛାତ୍ରଛାତ୍ରୀ ଆହତ ।
ଘଟଣା ସମ୍ପର୍କରେ ସୂଚନା ଦେଇ କେରଳ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜ କହିଛନ୍ତି, ନିଖିତା ଗାନ୍ଧୀଙ୍କ ସଂଗୀତ ସମାରୋହ ସମୟରେ ଏହି ଅଘଟଣ ଘଟିଛି । ବିଶ୍ୱବିଦ୍ୟାଳୟ ପରିସରରେ ଖୋଲା ଆକାଶ ଅଡିଟୋରିୟମରେ ସଂଗୀତ କନସର୍ଟ ଆୟୋଜିତ ହୋଇଥିଲା । ଆହତଙ୍କ ଚିକିତ୍ସା ପାଇଁ କଲାମାସେରି ମେଡିକାଲ କଲେଜରେ ବ୍ୟବସ୍ଥା କରାଯାଇଛି । ନିଖିତା ଗାନ୍ଧୀଙ୍କ ସଂଗୀତ ସମାରୋହ ଚାଲିଥିବା ବେଳେ ଯେଉଁ ଛାତ୍ରମାନେ ପଛରେ ଛିଡ଼ା ହୋଇ ମ୍ୟୁଜିକ ଶୁଣୁଥିଲେ ହଠାତ୍ ବର୍ଷା ହେବାରୁ ସେମାନେ ସବୁ ଷ୍ଟେଜ୍ ଫ୍ରଣ୍ଟକୁ ଦଉଡିବାକୁ ଲାଗିଲେ । ଏଥିପାଇଁ ଦଳଚକଟା ହୋଇଥିବା ସୂଚନା ମିଳିଛି ।
ହଟ୍ଟଗୋଳ ନାଁରେ ବିରୋଧୀ ଲୋକଙ୍କ ଟଙ୍କାକୁ କଲେ ଅପଚୟ, ସରିଲା ଶୀତ ଅଧିବେଶନ
ଭୁବନେଶ୍ବର: ଶେଷ ହେଲା ବିଧାନସଭା ଶୀତକାଳୀନ ଅଧିବେଶନ । ହେଲେ ଅଧିବେଶନ ଶେଷ ହେବାକୁ ନେଇ ରାଜ୍ୟ ରାଜନୀତି ସରଗରମ । ଗୃହ ବନ୍ଦ ହେବା ପଛର ମୁଖ୍ୟ କାରଣ ବିରୋଧୀଙ୍କ ବିଶୃଙ୍ଖଳା ବୋଲି ଶାସକ ଦଳ କହିଛି । ଏଥିସହ ସରକାରୀ କାର୍ଯ୍ୟ ଦିବସ ନଥିବାରୁ ଗୃହକୁ ବାଚସ୍ପତି ଅନିର୍ଦ୍ଦିଷ୍ଟ କାଳ ପାଇଁ ମୁଲତବି ରଖିଛନ୍ତି । ଯାହାକୁ ନେଇ ମୁହାଁମୁହିଁ ହୋଇଛନ୍ତି ଶାସକ ଓ ବିରୋଧୀ ।
ଶୀତ ଅଧିବେଶନ ଶେଷ ହୋଇଥିଲେ ବି ସରିନି କାଦୁଅ ଫିଙ୍ଗା ରାଜନୀତି । ମାତ୍ର ୪ ଦିନ ବିଧାନସଭା ଚାଲିବା ନେଇ ଶାସକ ଓ ବିରୋଧୀ ମୁହାଁମୁହିଁ ହୋଇଛନ୍ତି । ସୂଚନାଯୋଗ୍ୟ, ଗୋଟିଏ ଦିନ ବି ସୁରୁଖୁରୁରେ ବିଧାନସଭା ଚାଲିପାରିଲାନି । ବିରୋଧୀଙ୍କ ହଟ୍ଟଗୋଳ ଭିତରେ ଅପଚୟ ହୋଇଗଲା ସମୟ । ଧୋଇଗଲା ପ୍ରଶ୍ନକାଳ, ଶୂନ୍ୟକାଳ, ମୁଲତବି ଆଲୋଚନା ପରି ଅନେକ କାର୍ଯ୍ୟସୂଚୀ । ୪ ଦିନରୁ ୨ଦିନ ପୂରା ଅଚଳାବସ୍ଥା ଜାରି ରହିଲା । ଫଳରେ ସରକାରୀ କାର୍ଯ୍ୟ ଦିବସ ନଥିବାରୁ ବିଧାନସଭାକୁ ଅନର୍ଦ୍ଦିଷ୍ଟ କାଳ ପାଇଁ ବନ୍ଦ କଲେ ବାଚସ୍ପତି ।
ଗତ ୨୧ ତାରିଖରୁ ଆରମ୍ଭ ହୋଇଥିଲା ବିଧାନସଭାର ଶୀତ ଅଧିବେଶନ । ପ୍ରଥମ ଦିନ ଦିଂବଗତଙ୍କୁ ଶ୍ରଦ୍ଧାଞ୍ଜଳି ପରେ ଗୃହକୁ ମୁଲତବି କରାଯାଇଥିଲା । ଦ୍ବିତୀୟ ଓ ତୃତୀୟ ଦିନରେ ଲାଗି ରହିଲା ହଟ୍ଟଗୋଳ । ବାଚସ୍ପତି ନିଜ ଆସନକୁ ଆସିବା କ୍ଷଣି ବିରୋଧୀ ବିଧାୟକମାନେ ହଟ୍ଟଗୋଳ କରିଥିଲେ । ବାରମ୍ବାର ଗୃହ ମୁଲତବି ରହିଲା । ଗୃହ ସୁପରିଚାଳନା ପାଇଁ ବାଚସ୍ପତି ସର୍ବଦଳୀୟ ବୈଠକ ଡାକି ଆଲୋଚନା କଲେ । ହେଲେ କିଛି ଲାଭ ହେଲାନି । ବିଧାନସଭାରେ ଆଉ କୌଣସି ସରକାରୀ କାର୍ଯ୍ୟ ଦିବସ ନଥିବାରୁ ଗୃହକୁ ଅନର୍ଦ୍ଦିଷ୍ଟ କାଳ ବନ୍ଦ କରିବାକୁ ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି ପ୍ରସ୍ତାବ ଆଣିଲେ । ଏଥିରେ ଗୃହ ସହମତ ହୋଇଥିଲା । ସେପଟେ କିନ୍ତୁ ବିଧାନସଭାକୁ ଅଚଳ କରି ବିରୋଧୀ ବିଧାନସଭା ଚାଲିବା ନେଇ ରାଜନୀତି ଆରମ୍ଭ କରିଛନ୍ତି ।
ବିଧାନସଭା ଚଳାଇ ନଦେଇ ରାଜନୈତିକ ସ୍ବାର୍ଥ ପାଇଁ ବାହାରେ ଦୁଇ ବିରୋଧୀ ଗଣତନ୍ତ୍ର ମନ୍ଦିରକୁ ନେଇ ରାଜନୀତି କରିବା ଦୁର୍ଭାଗ୍ୟଜନକ ବୋଲି ଶାସକ ଦଳ କହିଛି । ଶାସକ ଦଳ ସବୁବେଳେ ଗୃହ ଚାଲିବାରେ ସହଯୋଗ କରିବା ସହ ବିରୋଧୀଙ୍କୁ ମୁକାବିଲା କରିବାକୁ ପ୍ରସ୍ତୁତ ଥିଲା ବୋଲି ବିଜେଡି ବିଧାୟକ ରାଜକିଶୋର ଦାସ କହିଛନ୍ତି । ଲୋକଙ୍କ ଟିକସରେ ଗୋଟିଏ ଦିନ ବିଧାନସଭା ଚାଲିଲେ ୫୦ ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହେଉଥିବାରୁ ବିରୋଧୀ ଗୃହ କାର୍ଯ୍ୟ ଜାଣିଶୁଣି ବନ୍ଦ କରିବା ଦୁଃଖଦାୟକ ବୋଲି ଶାସକ ଦଳ କହିଛି ।
ଶୀତ ଅଧିବେଶନରେ ଗୋଟିଏ ବିଲ୍ ପାସ୍ ହୋଇଥିବା ବେଳେ ଗୋଟିଏ ମୁଲତବି ପ୍ରସ୍ତାବ, ୫୪ଟି କାଗଜ, ୧୭ଟି ବାର୍ଷିକ ରିପୋର୍ଟ, ୫ଟି ବେସକାରୀ ବିଲ୍ ଆଗତ ହୋଇଥିଲା ।
ଟନେଲ ଟ୍ରାଜେଡି: ଶ୍ରମିକଙ୍କ ଉଦ୍ଧାରରେ ଲାଗିପାରେ ସମୟ, ବଡ଼ଦିନ ପୂର୍ବରୁ ସମସ୍ତେ ଫେରିବେ
ଉତ୍ତରକାଶୀ: ଉତ୍ତରକାଶୀ ଟନେଲ ଟ୍ରାଜେଡିକୁ ନେଇ ବଡ଼ ସୂଚନା । ଆନ୍ତର୍ଜାତିକ ଟନେଲ ବିଶେଷଜ୍ଞ ଆର୍ଣ୍ଣୋଲଡ ଡିକ୍ସ କହିଲେ, ବଡ଼ଦିନ ପୂର୍ବରୁ ସମସ୍ତ ଶ୍ରମିକ ସୁରକ୍ଷିତ ଘରକୁ ଫେରିବେ । ତେବେ ତାଙ୍କ ବୟାନକୁ ନେଇ ଏକ ପ୍ରକାର ଭୟର ବାତାବରଣ ସୃଷ୍ଟି ହେଉଛି । ଆର୍ଣ୍ଣୋଲଡ ବଡ଼ଦିନକୁ ନିଜ ବୟାନରେ ସାମିଲ କରିଥିବାରୁ ଏବେ ପ୍ରଶ୍ନ ଉଠୁଛି କ’ଣ ଆହୁରି ମାସେ ଲାଗିବ ଶ୍ରମିକଙ୍କୁ ସୁରକ୍ଷିତ ଉଦ୍ଧାର କରିବା ପାଇଁ ?
ଟନେଲ ଭିତରେ ୧୪ ଦିନ ହେଲା ଶ୍ରମିକମାନେ ଫସି ରହିଥିବା ବେଳେ କେବେ ସେମାନଙ୍କୁ ସୁରକ୍ଷିତ ଉଦ୍ଧାର କରାଯିବ ତାକୁ ନେଇ କାହା ପାଖରେ କିଛି ସୂଚନା ନାହିଁ । ଏମିତି ସ୍ଥିତିରେ ସାରା ଦେଶରେ ଏକ ପ୍ରକାର ହତାଶା ଭାବ ଖେଳି ଯାଇଥିବା ବେଳେ ଟନେଲରେ ଡ୍ରିଲିଂ କରିବାକୁ ଯାଇଥିବା ଅଗର ମେସିନ ଅକାମୀ ହୋଇଯାଇଛି । ଫଳରେ ଏବେ ଅଗର ମେସିନ ବଦଳରେ ଆସନ୍ତାକାଲିଠାରୁ ଶ୍ରମିକମାନଙ୍କ ଜରିଆରେ ଖନନ କାମ କରାଯିବ । ସେପଟେ ଭର୍ଟିକଲ ଡ୍ରିଲିଂ କରାଯିବ । ସୁଡଙ୍ଗ ଉପରୁ ଏହି ଡ୍ରିଲିଂ କରାଯିବ । ଏଥିପାଇଁ ସୁଡଙ୍ଗ ଉପରକୁ ଖନନ ସରଞ୍ଜାମ ନିଆଯାଉଛି ।
ସୂଚନାଯୋଗ୍ୟ, ହରାଇଜେଣ୍ଟାଲ ଖନନରେ ପ୍ରାୟ ୪୮ ମିଟର ଖୋଳା ସରିଥିଲା । ଆଉ ମାତ୍ର ବାକି ରହି ଯାଇଥିଲା ୧୦ ମିଟର । ଯାହା ଦିନେ କି ଦୁଇଦିନ ମଧ୍ୟରେ ଶେଷ କରାଯାଇ ଶ୍ରମିକମାନଙ୍କୁ ଉଦ୍ଧାର କରାଯିବ ବୋଲି ସମସ୍ତେ ଆଶା ରଖିଥିଲେ । ହେଲେ ଅଗର ମେସିନ ମେଟାଲ କାଟିବାରେ ବିଫଳ ହେବା ପରେ ଏବେ ସ୍ଥିତି ପୁଣି ପୂର୍ବ ପରି ସନ୍ଦେହ ଘେରକୁ ଚାଲିଯାଇଛି ।
ସେପଟେ ଶ୍ରମିକଙ୍କୁ ପାଇପ ଯୋଗେ କିପରି ବାହାର କରାଯିବ ଏ ନେଇ ଅଭ୍ୟାସ କରିଛନ୍ତି ଏନଡିଆରଏଫ ଟିମ । ଉଦ୍ଧାର ପାଇଁ ପ୍ରାୟ ୯୦୦ ମିଲିମିଟରର ଯେଉଁ ପାଇପ ଖଞ୍ଜା ଯାଇଛି, ତା ମଧ୍ୟ ଦେଇ ଷ୍ଟ୍ରେଚରରେ ଶ୍ରମିକଙ୍କୁ ଦଉଡି ସାହାଯ୍ୟରେ ଟଣାଯିବ । ଚକ ଲାଗିଥିବା ଏକ ଷ୍ଟ୍ରେଚର ପ୍ରଥମେ ଭିତରକୁ ଯିବ । ବାହାର ପଟରୁ ଏକ ଶକ୍ତ ଦଉଡି ଏହି ଷ୍ଟ୍ରେଚରରେ ବନ୍ଧା ହୋଇଥିବ । ଏଥିରେ ଜଣେ ଜଣେ କରି ଶ୍ରମିକଙ୍କୁ ବାହାରକୁ ଅଣାଯିବ ।
ଝିଅ ସ୍ମୃତିରେ ବାପା ନିର୍ମାଣ କରୁଛନ୍ତି ଫିଲ୍ମ ‘ବୈଶାଳୀ ମ୍ୟାଡାମ୍’
ସୋର: ଜଣେ ଯୁବତୀଙ୍କ ସତ କାହାଣୀକୁ ନେଇ ଆସୁଛି ଏକ ଓଡ଼ିଆ ଫିଲ୍ମ । ଝିଅର ସ୍ମୃତିରେ ଫିଲ୍ମ ନିର୍ମାଣ କରୁଛନ୍ତି ତାଙ୍କ ବାପା । ଫିଲ୍ମର ନାଁ ରହିଛି ‘ବୈଶାଳୀ ମ୍ୟାଡାମ୍’ । ଜଣେ ଝିଅର ଜୀବନ ସଂଘର୍ଷକୁ ନେଇ ଫିଲ୍ମଟି ଆଗକୁ ବଢ଼ିଛି ।
ସୂଚନା ଅନୁସାରେ ଝିଅର ସ୍ମୃତିକୁ ତାଜା ରଖିବା ପାଇଁ ଏହି ଫିଲ୍ମ ନିର୍ମାଣ କରୁଛନ୍ତି ବାଲେଶ୍ୱର ଅଞ୍ଚଳର ଶ୍ରୀନାଥ ରଣା । ଶ୍ରୀନାଥଙ୍କର ଦୁଇ ଝିଅଙ୍କ ମଧ୍ୟରୁ ପ୍ରଥମ ଝିଅର ବାହାଘର ହୋଇଯାଇଛି । ଦ୍ୱିତୀୟ ଝିଅ ବୈଶାଳୀ ପରିବାରର ସମସ୍ତ ଦାୟିତ୍ବ ନେଇଥିଲେ । ସଂଘର୍ଷ କରି ବାହାନଗା ହାଇସ୍କୁଲରେ ଶିକ୍ଷୟିତ୍ରୀ ହୋଇଥିଲେ । ଶିକ୍ଷକତା ସହିତ ସମାଜସେବାରେ ନିୟୋଜିତ ଥିଲେ । ପୁଅ ଭଳି ପରିବାରର ସମସ୍ତ ଦାୟିତ୍ବ ନେଉଥିଲେ ବୈଶାଳୀ । ବୈଶାଳୀଙ୍କ ପାଇଁ ସବୁ କିଛି ଥିଲା ତାଙ୍କ ପରିବାର । ଏହାରି ଭିତରେ ରୋଗରେ ପଡ଼ିଛନ୍ତି ବୈଶାଳୀ ଓ ତାଙ୍କର ୨୭ ମାର୍ଚ୍ଚ ୨୦୨୨ରେ ମୃତ୍ୟୁ ଘଟିଛି । ଏହାପରେ ଶ୍ରୀନାଥ ସମ୍ପୂର୍ଣ୍ଣ ଭାଙ୍ଗି ପଡ଼ିଛନ୍ତି । ଆଉ ଝିଅର ଏହି ସ୍ମୃତିକୁ ସାଇତି ରଖିବା ସହ ଝିଅର ତ୍ୟାଗକୁ ଅନ୍ୟଙ୍କ ପାଖରେ ପହଞ୍ଚାଇବା ପାଇଁ ନିର୍ମାଣ କରିବାକୁ ଯାଉଛନ୍ତି ଫିଲ୍ମ ‘ବୈଶାଳୀ ମ୍ୟାଡାମ୍’ ।
ଗୋଟିଏ ଝିଅ ତା’ ବାପାମାଆଙ୍କ ପାଇଁ କେତେ ଜରୁରୀ ଫିଲ୍ମରେ ଆପଣ ଦେଖି ପାରିବେ । ଫିଲ୍ମରେ ଝିଅମାନଙ୍କ ତ୍ୟାଗ ଦେଖି ଆପଣଙକ ଆଖିରେ ବି ପାଣି ଆସିଯିବ । ସିନେମାର ଶୁଭ ମହୁରତ ବାହାନଗା ହାଇସ୍କୁଲରେ ଅନୁଷ୍ଠିତ ହୋଇଯାଇଛି ।
ହନ୍ତାଳଗୁଡା ଘାଟି ଦୁର୍ଘଟଣା: ମୃତକଙ୍କ ପରିବାର ପାଇଁ ୩ ଲକ୍ଷ ଲେଖାଏଁ ସହାୟତା ଘୋଷଣା
ଭୁବନେଶ୍ବର: ମାଲକାନଗିରି ହନ୍ତାଳଗୁଡା ଘାଟି ଦୁର୍ଘଟଣାର ସମସ୍ତ ମୃତକଙ୍କ ପରିବାର ପାଇଁ ଅନୁକମ୍ପା ସହାୟତା ଘୋଷଣା । ୩ ଲକ୍ଷ ଟଙ୍କା ଲେଖାଏଁ ଅନୁକମ୍ପା ସହାୟତା ଘୋଷଣା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଏହି ସହାୟତା ଘୋଷଣା କରାଯାଇଛି ।
ଶୋକସନ୍ତପ୍ତ ପରିବାର ବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ । ଦୁର୍ଘଟଣାରେ ଆହତ ୮ ଜଣଙ୍କୁ ମାଗଣାରେ ଚିକିତ୍ସା ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେବା ସହ ସେମାନଙ୍କ ଆଶୁ ଆରୋଗ୍ୟ କାମନା କରିଛନ୍ତି । ମୃତାହତ ସମସ୍ତ ଶ୍ରମିକ ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ଅଞ୍ଚଳରେ ।
ହତ୍ୟା ପରେ ମହିଳାଙ୍କୁ ୩୧ ଖଣ୍ଡ କରି ପୋତିଥିଲା ଅଭିଯୁକ୍ତ
ଉମରକୋଟ: ନବରଙ୍ଗପୁର ଜିଲ୍ଲା ରାଇଘର ଥାନା ମୁରୁମଡିହି ଜଙ୍ଗଲରେ ମହିଳାଙ୍କୁ ହତ୍ୟା କରି ପୋତିବା ଘଟଣାର ନୂଆମୋଡ । ମୃତଦେହ ମିଳିବା ପରେ ଆଶ୍ଚର୍ଯ୍ୟ ଚକିତ ହୋଇଗଲେ ତଦନ୍ତକାରୀ ଟିମ୍ । କାରଣ ହତ୍ୟା ଥିଲା ଏତେ ନିର୍ମମ ଯେ ଜାଣିଲେ ଆପଣଙ୍କ ଶରୀର ଶିହରୀ ଉଠିବ । ଅଭିଯୁକ୍ତ ଜଣଙ୍କ ମହିଳାଙ୍କୁ ହତ୍ୟା କରିବା ପରେ ୩୧ ଖଣ୍ଡ କରି ପୋତିଥିଲା ।
ଆଜି ତଦନ୍ତକାରୀ ଟିମ୍ ମହିଳାଙ୍କୁ ପୋତା ଯାଇଥିବା ସ୍ଥାନକୁ ଖୋଲିଥିଲେ । ଉଦ୍ଦେଶ୍ୟ ଥିଲା ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆଗକୁ ବଢ଼ାଯିବ । ମୃତଦେହ ପୋତା ଯାଇଥିବା ସ୍ଥାନ ଖୋଳା ଯାଇଥିଲା ଓ ମୃତଦେହ ବି ମିଳିଥିଲା । ହେଲେ ସମସ୍ତଙ୍କ ବିଶ୍ବାସର ବାହାରେ ମୃତଦେହ ଗୋଟିଏ ଶରୀରରେ ମିଳି ନଥିଲା । ୩୧ ଖଣ୍ଡ ହୋଇ ମିଳିଥିଲା । ଅର୍ଥାତ, ମହିଳାଙ୍କୁ ହତ୍ୟା କରିବା ପରେ ଅଭିଯୁକ୍ତ ମୃତଦେହକୁ ଖଣ୍ଡ ଖଣ୍ଡ କରି ୩୧ ପିସ୍ କରିଥିଲା । ଏହାପରେ ତାକୁ ମାଟିରେ ପୋତି ଦେଇଥିଲା ।
ମୃତ ମହିଳା ଜଣଙ୍କ ତିଲାବାଈ ଗଣ୍ଡ ବୋଲି ଜଣାପଡ଼ିଛି । ପ୍ରେମ ବ୍ୟାପାରରୁ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି । ହତ୍ୟାରେ ସମ୍ପୃକ୍ତ ଥିବା ଅଭିଯୋଗରେ ପୋଲିସ ଏକ ଦମ୍ପତିଙ୍କୁ ଅଟକ ରଖିଛି । ମୃତଦେହ ମିଳିବା ପରେ ରାଇଘର ଏସଡିପିଓ ସାଇଣ୍ଟିଫିକ୍ ଟିମ୍ ସହ ପହଞ୍ଚି ଘଟଣାର ତଦନ୍ତ କରୁଛନ୍ତି ।