ନୂଆଦିଲ୍ଲୀ: ଯେତେବେଳେ ତାଙ୍କୁ ଟିକେଟ୍ ଦିଆଯାଇଥିଲା । ସୋସିଆଲ ମିଡିଆରେ ମଜା ଉଡ଼ାଇଥିଲେ ଲୋକେ। କହିଥିଲେ ଏହା ରାଜନୀତି ମଇଦାନ, ଫ୍ୟାସନ ସୋ ନୁହେଁ । ମନୋରଞ୍ଜନ ଏବଂ ଫ୍ୟାସନ କରୁଥିବା କେହି ଜଣେ ନିର୍ବାଚନ ଲଢ଼ିବାକୁ ଆସିଛି । ସେ କେବେ ମଧ୍ୟ ଜିତି ପାରିବେ ନାହିଁ । ସୋସିଆଲ ମିଡିଆରେ ତାଙ୍କୁ ଅନେକ ଟ୍ରୋଲ ମଧ୍ୟ କଲେ । କିନ୍ତୁ ଶେଷରେ ନିର୍ବାଚନରେ ବହୁ ସଂଖ୍ୟାରେ ଜିତି ସମାଲୋଚକଙ୍କ ମୁହଁକୁ ବନ୍ଦ କରି ଦେଇଛନ୍ତି । ମିଜୋରାମର ସର୍ବକନିଷ୍ଠ ବିଧାୟିକା ବେରିଲ ବତ୍ରୋଇହସଙ୍ଗୀ । ଯିଏକି ZMP ପକ୍ଷରୁ ଲଢ଼ି ନିର୍ବାଚନ ଜିତି ବେଶ ଚର୍ଚ୍ଚାରେ ରହିଛନ୍ତି । ସୋମବାର ମିଜୋରାମ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇଥିବାବେଳେ ବିଜୟ ହାସଲ କରିଛନ୍ତି । ତେବେ ଆସନ୍ତୁ ଜାଣିବା ମନୋରଞ୍ଜନ ଦୁନିଆରୁ ଆସିଥିବା ବେରିଲଙ୍କ ରାଜନୈତିକ ଯାତ୍ରା ସମ୍ପର୍କରେ କିଛି ଅଜଣା କଥା ।

ସିଲଙ୍ଗର ହିଲ ୟୁନିଭରସିଟିରେ ସାମ୍ବାଦିକତା ସାରିବା ପରେ ରେଡିଓ ଜକିଭାବେ ନିଜର କ୍ୟାରିୟର ଆରମ୍ଭ କରିଥିଲେ । ଆଉ ତାଙ୍କ ମିଠା ଭଏସ ଶ୍ରୋତାଙ୍କ ମନ ମୋହିଥିଲା । ଯାହାଦ୍ବାରା ସେ ଲୋକପ୍ରିୟତା ହାସଲ କରିଥିଲେ । ଏହାପରେ ରାଜନୈତିକ କ୍ୟାରିୟର କଥା ଯଦି କହିବା ତାହେଲେ ସେ ପ୍ରଥମେ ପୌର ନିର୍ବାଚନରେ ପ୍ରାର୍ଥୀ ହୋଇ ରାଜେନୖତିକ ମଇଦାନରେ ପାଦ ଥାପିଥିଲେ । ଆଉ କର୍ପୋରେଟର ହୋଇ ଜନସାଧାରଣଙ୍କ ପାଇଁ କାମ କରିଥିଲେ । କିନ୍ତୁ ଯେତେବେଳେ ସାଧାରଣ ନିର୍ବାଚନରେ ZMP ତାଙ୍କୁ ଟିକେଟ ଦେଇଥିଲା ସୋସିଆଲ ମିଡିଆରେ ତାଙ୍କୁ ବହୁ ସମାଲୋଚନା କରାଯାଇଥିଲା । ମଜା ଉଡ଼ାଇବା ସହ ୟୁଜର୍ସମାନେ ଭିନ୍ନ ଭିନ୍ନ କମେଣ୍ଟମାନ ଦେଇଥିଲେ । କିନ୍ତୁ ସେ ଏହାକୁ କର୍ଣ୍ଣପାତ ନକରି ପ୍ରଚାର କରିଥିଲେ । ଏହାସହ ନିଜର ରାଜନୈତିକ କ୍ୟାରିୟରକୁ ବେରିଲ କୁହନ୍ତି କି, ରାଜନୀତିରେ ପ୍ରବେଶ କରିବା ମୋ ପାଇଁ ସହଜ ନଥିଲା ।

ମହିଳାମାନଙ୍କୁ ଆଗକୁ ବଢ଼ିବାକୁ ସୁଯୋଗ ଦିଆଯାଉନଥିବାବେଳେ ଘରର ଚାରିକାନ୍ଥ ହିଁ ଆମ ଦୁନିଆ ବୋଲି ପିଲାଦିନରୁ ଶିଖା ଯାଇଥିଲା । କିନ୍ତୁ ଏହାକୁ ଅତିକ୍ରମ କରି ରାଜନୀତି ମଇଦାନରେ ପ୍ରବେଶ କରି ବିଧାୟିକାଭାବେ ଜିତିବାର ଯାତ୍ରା ବେଶ କଷ୍ଟସାଧ୍ୟ । ମିଜୋରାମରେ ଜିତିଥିବା ୩ଜଣ ମହିଳା ବିଧାୟିକା ମଧ୍ୟରେ ସେ ଜଣେ । ମହିଳାଙ୍କ ପାଇଁ ରାଜ୍ୟରେ ବହୁ କଡ଼ା ନୀତି ନିୟମ ସାଙ୍ଗକୁ ପ୍ରତିବନ୍ଧକ ରହୁଥିବାବେଳେ ଏହି ବିଜୟ ମହିଳାଙ୍କ ପାଇଁ ଉତ୍ସର୍ଗୀକୃତ ବୋଲି କହିଛନ୍ତି ବରେଲି । ଯେତେବେଳେ ସେ ସୋସିଆଲ ମିଡିଆରେ ସମାଲୋଚନାର ଶିକାର ହୋଇଥିଲେ ସେ ଭାଙ୍ଗ ପଡ଼ିନଥିଲେ । ଦୃଢ଼ ମନୋବଳ ସହ ନିର୍ବାଚନ ଲଢ଼ି ବିଜୟ ହାସଲ କରି ବିଧାନସଭାରେ ପ୍ରବେଶ କରିଥିବାବେଳେ ସମାଲୋଚକଙ୍କ ମୁହଁ ବନ୍ଦ କରି ଦେଇଛନ୍ତି ।