ପୁରୀ: ପୁରୀ ପ୍ରସ୍ତାବିତ ଶ୍ରୀ ମାର୍ଗ ନେଇ ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ । ଏନେଇ ଚୂଡଙ୍ଗ ସାହି ମୌଜାରୁ ଆଜି ଜମି ଅଧିଗ୍ରହଣ କରାଯାଉଛି । ସୁରକ୍ଷା ଦୃଷ୍ଟିକୋଣରୁ ପୋଲିସ ପ୍ରଶାସନ, ଅଗ୍ନିଶମ ବାହିନୀ, ସରକାରୀ ଅଧିକାରୀ ଉପସ୍ଥିତ ଥିଲେ । ମାଜିଷ୍ଟ୍ରେଟଙ୍କ ଉପସ୍ଥିତିରେ ଅଧିଗ୍ରହଣ ହେଉଛି । ଆଗରୁ ଏନେଇ ପ୍ରଶାସନ ପକ୍ଷରୁ ସୂଚନା ଦିଆଯାଇଥିବା ବେଳେ ସଭିଏଁ ସମ୍ମତି ପ୍ରକାଶ କରିଥିଲେ । ତେବେ ଏହି ରାସ୍ତା ସିଧାସଳଖ ଶ୍ରୀଜଗନ୍ନାଥ ପାର୍କିଂ ଓ ପିଲିଗ୍ରିମ ସେଣ୍ଟରରୁ ଦୋଳବେଦୀ କୋଣ ପର୍ଯ୍ୟନ୍ତ ସଂଯୋଗ ହେଉଛି । ଯାହାଦ୍ୱାରା ଭକ୍ତ ଶ୍ରଦ୍ଧାଳୁ ସେଠାରେ ଗାଡ଼ି ପାର୍କିଂ କରି ଶ୍ରୀମନ୍ଦିର ପର୍ଯ୍ୟନ୍ତ ଆସି ଦର୍ଶନର ସୁବିଧା ପାଇବେ ।
ବାରବାଟୀ ଷ୍ଟାଡିୟମକୁ ଦିଆଯିବ ନୂଆ ରୂପ: ଓସିଏ ବାର୍ଷିକ ସାଧାରଣ ପରିଷଦ ବୈଠକରେ ପ୍ରସ୍ତାବ
କଟକ: ଓଡିଶା କ୍ରିକେଟ ଆସୋସିଏସନର ବାର୍ଷିକ ସାଧାରଣ ପରିଷଦ ବୈଠକରେ ବାରବାଟୀ ଷ୍ଟାଡିୟମକୁ ନୂଆ କରି ଗଢିବାକୁ ପ୍ରସ୍ତାବ ଗ୍ରହଣ କରାଯାଇଛି । ସଭାପତି ପ୍ରଣବ ପ୍ରକାଶ ଦାସ, ସମ୍ପାଦକ ସଞ୍ଜୟ ବେହେରାଙ୍କ ଉପସ୍ଥିତରେ ଅନୁଷ୍ଠିତ ଏହି ବୈଠକରେ ୭୦ରୁ ଅଧିକ ସଦସ୍ଯ ଉପସ୍ଥିତ ଥିଲେ । ବାରବାଟୀ ଷ୍ଟାଡିୟମକୁ ନୂଆ କରି ଗଢିବାକୁ ମୁଖ୍ୟମନ୍ତ୍ରୀଙ୍କ ପାଖରେ ପ୍ରସ୍ତାବ ରଖାଯିବ ବୋଲି ଏଥିରେ ନିଷ୍ପତ୍ତି ନିଆଯାଇଛି । ଏହାସହ ବାରବାଟୀରେ ଶୀଘ୍ର ଟେଷ୍ଟ ମ୍ୟାଚ୍ ଆୟୋଜନ ନେଇ ବିସିସିଆଇକୁ ପ୍ରସ୍ତାବ ଦିଆଯାଇଛି ବୋଲି କହିଛନ୍ତି ଓସିଏ ସମ୍ପାଦକ ।
ନୂଆ ରୂପ ପାଇବ କଟକ ଐତିହାସିକ ବାରବାଟୀ ଷ୍ଟାଡିୟମ । ଶୀଘ୍ର ଆୟୋଜିତ ହେବ ଟେଷ୍ଟ ମ୍ୟାଚ୍ । ବାର୍ଷିକ ସାଧାରଣ ପରିଷଦ ବୈଠକରେ ଗୁରୁତ୍ବପୂର୍ଣ୍ଣ ପ୍ରସ୍ତାବ । ବାରବାଟୀ ଷ୍ଟାଡିୟମ ବହୁ ବର୍ଷର ପୁରୁଣା ଷ୍ଟାଡିୟମ ହୋଇ ଥିବାରୁ ଏହାକୁ ନୂଆ କରି ଗଢି ତୋଳିବାକୁ ପ୍ରସ୍ତାବ ଗ୍ରହଣ କରାଯାଇଛି । ସଭାପତି ପ୍ରଣବ ପ୍ରକାଶ ଦାସ, ସମ୍ପାଦକ ସଞ୍ଜୟ ବେହେରାଙ୍କ ଉପସ୍ଥିତିରେ ଅନୁଷ୍ଠିତ ବୈଠକରେ ଏନେଇ ହୋଇଛି ବିସ୍ତୃତ ଆଲୋଚନା । ଷ୍ଟାଡିୟମର ୪, ୫, ୬ ଓ ୭ ନମ୍ବର ଗ୍ୟାଲେରୀ ପୁରୁଣା ହେଲାଣି । ତେଣୁ ପୁରା ଷ୍ଟାଡିୟମକୁ ନୂଆ କରି ଗଢି ତୋଳିବାକୁ ଶୀଘ୍ର ଏକ ରିପୋର୍ଟ ପ୍ରସ୍ତୁତ କରାଯାଇ ମୁଖ୍ୟମନ୍ତ୍ରୀଙ୍କୁ ପ୍ରସ୍ତାବ ଦିଆଯିବ । ଏହାସହ ବାରବାଟୀ ଷ୍ଟାଡିୟମ ଜମି ଲିଜ ଅବଧୀ ସରି ଯାଇଥିବାରୁ ଏହାର ନବୀକରଣ ସହ ଉଭୟ ଓଡିଶା ଅଲିମ୍ପିକ ଆସୋସିଏସନ ଓ ଓସିଏକୁ ହସ୍ତାନ୍ତର କରିବାକୁ ସରକାରଙ୍କୁ ଅନୁରୋଧ କରାଯିବ ।
ଏହାଛଡା ବାରବାଟୀ ଷ୍ଟାଡିୟମରେ ଶୀଘ୍ର ଟେଷ୍ଟ ମ୍ୟାଚ୍ ହେବା ନେଇ ବିସିସିଆଇକୁ ପ୍ରସ୍ତାବ ଦିଆଯାଇଛି । ଆଗକୁ ଆଇସିସିର ଏକ ଟିମ ବାରବାଟୀ ଷ୍ଟାଡିୟମ ବୁଲି ଏଠାକାର ସ୍ଥିତି ଓ ବ୍ଯବସ୍ଥା ସମ୍ପର୍କରେ ରିପୋର୍ଟ ଦେବାପରେ ମ୍ୟାଚ ନେଇ ଚୂଡାନ୍ତ ନିଷ୍ପତ୍ତି ନିଆଯିବ ।
ଆଗାମୀ ଦିନରେ ଓସିଏ ଅନ୍ତ କ୍ଲବ, ଇଣ୍ଟର ସ୍କୁଲ, ଇଣ୍ଟର କଲେଜ ଟୁର୍ଣ୍ଣାମେଣ୍ଟ ଅଧିକରୁ ଅଧିକ କରି ପ୍ରତିଭା ବାହାର କରାଯିବ ବୋଲି ବୈଠକରେ ସ୍ଥିର ହୋଇଛି ।
କ୍ଲାଇମେଟ ଆକ୍ସନ ପ୍ଲାନ କରିବାରେ ଓଡିଶା ସାଜିଛି ଦେଶର ରୋଲ ମଡେଲ
କଟକ: କୂଳ ଲଂଘୁଛି ସମୁଦ୍ର । ୪୯ ବର୍ଷରେ ୯.୫ ସେଣ୍ଟିମିଟର ସମୁଦ୍ର ପତ୍ତନ ବୃଦ୍ଧି ପାଇଛି । ୧୨ ବର୍ଷରେ ସମୁଦ୍ରରେ ଲୀନ ହେଲାଣି ଉପକୂଳବର୍ତ୍ତୀ ୧୬ଟି ଗାଁ । ଗବେଷଣା ପରେ ଏମିତି ତଥ୍ୟ ଦେଇଛନ୍ତି କଟକ ରେଭେନ୍ସାର ପ୍ରାଧ୍ୟାପିକା ଡ. ମାଳିନୀ ପ୍ରଭା ସେଠୀ । ସେପଟେ କ୍ଲାଇମେଟ ଆକ୍ସନ ପ୍ଲାନ କରିବାରେ ଓଡିଶା ଦେଶର ପ୍ରଥମ ରୋଲ ମଡେଲ ସାଜିଛି । ୧୨ ବର୍ଷରେ ଆସିଛି ୧୬ଟି ପ୍ରାକୃତିକ ବିପର୍ଯ୍ୟାୟ । ଜିରୋ କାଜୁଆଲଟି ଉପରେ ରାଜ୍ୟ ସରକାର ସର୍ବଦା ଗୁରୁତ୍ୱ ଦେଇଛନ୍ତି । ପ୍ରାକୃତିକ ବିପର୍ଯ୍ୟୟ ଓ ଓଡ଼ିଶା ସରକାରଙ୍କ ଏହାର ମୁକାବିଲାକୁ ପାଇଁ ନେଇଛନ୍ତି କି ପଦକ୍ଷେପ ଆସନ୍ତୁ ଜାଣିବା ।
ପ୍ରତିବର୍ଷ ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟର ସାମ୍ନା କରୁଛି ଓଡିଶା । ସାଧାରଣତଃ ବର୍ଷାଦିନରେ ପ୍ରାକୃତିକ ବିପର୍ଯ୍ୟାୟ ହୋଇଥାଏ । କିନ୍ତୁ ବର୍ଷକରେ ଏକାଧିକ ଥର ଏହି ପ୍ରାକୃତିକ ବିପର୍ଯ୍ୟୟ ଘଟୁଛି । ଏହାର ମୁଖ୍ୟ କାରଣ ଜଳବାୟୁର ପରିବର୍ତ୍ତନ । ୧୯୬୬ରୁ ୨୦୧୫ ପର୍ଯ୍ୟନ୍ତ ୪୯ ବର୍ଷ ମଧ୍ୟରେ ସମୁଦ୍ର ପତ୍ତନ ୯.୫ ସେଣ୍ଟିମିଟର ବୃଦ୍ଧି ପାଇଛି । ଫଳରେ ଗତ ୧୨ ବର୍ଷ ମଧ୍ୟରେ ଉପକୂଳକବର୍ତ୍ତୀ ୧୬ଟି ଗାଁ ସମୁଦ୍ର ଲୀନ ହେଲାଣି । ବାଲେଶ୍ୱର, ଭଦ୍ରକ, ଜଗତସିଂହପୁର, ପୁରୀ, ଗଞ୍ଜାମ ଭଳି ଜିଲ୍ଲାର ବହୁ ଉପକୂଳବର୍ତ୍ତୀ ଲୋକ ଗାଁ ଛାଡ଼ିଛନ୍ତି । ଗଞ୍ଜାମ ଜିଲ୍ଲାରେ ସର୍ବାଧିକ ୨ଶହ ଘର ନିଚ୍ଛିନ୍ନ ହୋଇଯାଇଛି । କେନ୍ଦ୍ରାପଡା ଜିଲ୍ଲାର ସାତଭାୟା, ପାରାଦୀପ ବନ୍ଦର ଅଞ୍ଚଳ, ପୁରୀ ସମୁଦ୍ରକୂଳ ଏବଂ ଗୋପାଳପୁର ବନ୍ଦରର ବିଭିନ୍ନ ଅଞ୍ଚଳରେ ଉପକୂଳ କ୍ଷୟ ହେବା ସମ୍ଭାବନା ରହିଛି । ଏନେଇ ଇଣ୍ଟିଗ୍ରେଟେଡ କୋଷ୍ଟାଲ ଜୋନ ମ୍ୟାନେଜମେଣ୍ଟ ପ୍ରକଳ୍ପ ପୂର୍ବାନୁମାନ କରିଥିବା ରେଭେନ୍ସା ବିଶ୍ୱବିଦ୍ୟାଳୟ ଭୂଗୋଳ ବିଭାଗର ସହକାରୀ ପ୍ରାଧ୍ୟାପିକା ଡ. ମାଳିନୀ ପ୍ରଭା ସେଠୀଙ୍କ ଗବେଷଣାରୁ ଜଣାପଡିଛି । ଏସିଆନ ଡିଜାଷ୍ଟର ପ୍ରପେୟାର୍ଡନେସ ସେଣ୍ଟର ଦ୍ବାରା ଏହି ଗବେଷଣାର ଏକ ରିପୋର୍ଟ ମଧ୍ୟ ପ୍ରକାଶ ପାଇଛି ।
ଓଡିଶା ଦେଶର ଏକମାତ୍ର ରାଜ୍ୟ ଭାବେ ଏଭଳି ବିପର୍ଯ୍ୟୟର ମୁକାବିଲା ପାଇଁ କ୍ଲାଇମେଟ ଆକ୍ସନ ପ୍ଲାନ କରିଛି । ସମୁଦ୍ର ଜୁଆରର ଗତିକୁ ରୋକିବାକୁ ଉପକୂଳବର୍ତ୍ତୀ ଅଞ୍ଚଳରେ ଜଙ୍ଗଲ ଏବଂ ଘଞ୍ଚ ବନାନୀ ସୃଷ୍ଟି କରାଯାଉଛି । ଜିଓ ସିନ୍ଥେଟିକ ଟ୍ୟୁବ ଲଗାଯାଉଛି । ସହକାରୀ ପ୍ରଫେସର ଡ. ସେଠୀ ୬ ମାସ ଧରି ଓଡିଶାର ଉପକୂଳବର୍ତ୍ତୀ ଜିଲ୍ଲା ବୁଲି ତଥ୍ୟ ସଂଗ୍ରହ କରିଛନ୍ତି । ଆଇସିଜେଏମ୍ ପ୍ରକଳ୍ପରେ ରାଜ୍ୟ ସରକାର ଉପକୂଳବର୍ତ୍ତୀ ଅଞ୍ଚଳରେ ମାଟି ଉପରକୁ ଚେର କାଢି ବଢୁଥିବା ଗ୍ରୀଷ୍ମମଣ୍ଡଳୀୟ ଗଛ ଲଗାଉଛନ୍ତି । ଏହି ଗଛର ମୂଳ ଜୁଆର ଗତିକୁ ରୋକିବା ସହ ଏହାର ପତ୍ର ଦ୍ରୁତ ପବନ ଏବଂ ଘୂର୍ଣ୍ଣିବଳୟ ରୋକିବାର ସହାୟକ କରିଥାଏ ।
ଓଡ଼ିଶା ସରକାରଙ୍କ ପଦକ୍ଷେପ କେବଳ ଜଳବାୟୁ ପ୍ରଭାବକୁ ମୁକାବିଲା କରିବ ତାହା ନୁହେଁ ବରଂ ପ୍ରଦୂଷଣ ସ୍ତରକୁ ମଧ୍ୟ ହ୍ରାସ କରିବ ବୋଲି ରିପୋର୍ଟରେ ଦର୍ଶାଯାଇଛି ।
ଓଡ଼ିଶାରେ ନାହିଁ ଜାତିଗତ ରାଜନୀତି: ୨୦୩୬ ବେଳକୁ ହେବ ଦେଶର ଏକ ନମ୍ବର ରାଜ୍ୟ
ନୂଆଦିଲ୍ଲୀ: ଓଡ଼ିଶାରେ ନାହିଁ ଜାତିଗତ ରାଜନୀତି । ଦିନେ ବିହାରଠାରୁ ପଛରେ ଥିବା ଓଡ଼ିଶା ଆଜି ସାମାଜିକ ଓ ଅର୍ଥନୈତିକ ପ୍ରଗତିରେ ବିହାରକୁ ପଛରେ ପକାଇଛି । ଜାତୀୟସ୍ତରରେ ଏକ ଆଲ୍ଲେଖ୍ୟରେ ଏହା ଲେଖିଛନ୍ତି ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦ ସଦସ୍ୟା ଡ. ଶମିକା ରବି । ମହିଳା ସଶକ୍ତିକରଣ, ଯୁବକଙ୍କୁ ରୋଜଗାର, ଚାଷୀଙ୍କ ଆୟବୃଦ୍ଧି ଓ ମୁଣ୍ଡପିଛା ଆୟ ଦୁଇଗୁଣ କରିବାରେ ଦେଶର ଅନ୍ୟ ରାଜ୍ୟକୁ ପଛରେ ପକାଇଛି ଓଡ଼ିଶା । ଏପରି ବିକାଶଧାରା ଜାରି ରହିଲେ ୨୦୩୬ ବେଳକୁ ଓଡ଼ିଶା ଦେଶର ଏକ ନମ୍ବର ରାଜ୍ୟରେ ପରିଗଣିତ ହେବ ବୋଲି ବିଶେଷଜ୍ଞ ଆକଳନ କରିଛନ୍ତି ।
ଓଡ଼ିଶାରେ ବିକାଶକୁ ନେଇ ପୁଣି ଥରେ ଜାତୀୟସ୍ତରରେ ଚର୍ଚ୍ଚା ଆରମ୍ଭ ହୋଇଛି । ମହିଳାଙ୍କ ଆର୍ଥିକ ଉନ୍ନତି, ଚାଷୀଙ୍କ ଆୟବୃଦ୍ଧି, ମୁଣ୍ଡପିଛା ଆୟ ଦୁଇଗୁଣ କରିବାରେ ବିହାରକୁ ପଛରେ ପକାଇଛି ଓଡ଼ିଶା । ଜାତୀୟସ୍ତରରେ ଏପରି ଆଲ୍ଲେଖ୍ୟ ଲେଖି ଓଡ଼ିଶାକୁ ଉଦାହରଣ ଭାବେ ଦର୍ଶାଇଛନ୍ତି ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦ ସଦସ୍ୟା ପ୍ରଫେସର ଡ. ଶମିକା ରବି । ଓଡ଼ିଶାରେ କେବେ ବି ଜାତିଗତ ରାଜନୀତି ହୋଇନାହିଁ । ବିହାରରେ ସ୍ଥିତି ଠିକ୍ ଏହାର ଓଲଟା । ଜାତିଗତ ରାଜନୀତି ଯୋଗୁଁ ବିହାରରେ ଆର୍ଥିକ ଅଭିବୃଦ୍ଧି ସମ୍ଭବ ହୋଇପାରିନି । ବିହାର ସହିତ ଓଡ଼ିଶାକୁ ତୁଳନା କରିଛନ୍ତି ଡ. ଶମିକା ରବି । ଦିନଥିଲା ୧୯୯୧ରେ ବିହାରଠାରୁ ପଛରେ ଥିଲା ଓଡ଼ିଶା । କିନ୍ତୁ ଆଜି ଓଡ଼ିଶା ପ୍ରଗତି ପଥରେ ଆଗେଇ ଚାଲିଛି । ଅର୍ଥନୈତିକ ପରାମର୍ଶଦାତା ପରିଷଦ ସଦସ୍ୟଙ୍କ ଏପରି ଦାବି ଓଡ଼ିଆଙ୍କ ପାଇଁ ଗର୍ବ ଆଣିଛି । ୨୦୦୦ ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ଷମତାକୁ ଆସିବା ପରଠୁ ସବୁ କ୍ଷେତ୍ରରେ ଓଡ଼ିଶା ପ୍ରଗତି କରିଚାଲିଛି । ଖାଦ୍ୟଶସ୍ୟ ଉତ୍ପାଦନରେ ସ୍ବାବଲମ୍ବୀ ହେବା ସହ ମହିଳା ସଶକ୍ତିକରଣ, ଯୁବବର୍ଗଙ୍କୁ ରୋଜଗାର, ଚାଷୀଙ୍କ ଆୟ ସମେତ ମୁଣ୍ଡପିଛା ଆୟକୁ ଦୁଇଗୁଣ ବୃଦ୍ଧି କରିବାରେ ସଫଳ ହୋଇଛନ୍ତି ମୁଖ୍ୟମନ୍ତ୍ରୀ ।
ମହିଳା ସଶକ୍ତିକରଣ କ୍ଷେତ୍ରରେ ମିଶନ ଶକ୍ତି ସୃଷ୍ଟି କରିଛି ନୂଆ ଉଦାହରଣ । ମହିଳାଙ୍କ ଆର୍ଥିକ ବିକାଶ ସମ୍ଭବ ହେଲେ ପରିବାର ଓ ରାଜ୍ୟ ସମୃଦ୍ଧ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ଷମତାକୁ ଆସିବା ଦିନଠାରୁ ମହିଳା ସଶକ୍ତିକରଣକୁ ଜୋର ଦେଇଛନ୍ତି । ଆଜି ଓଡ଼ିଶା ଅର୍ଥନୈତିକ ପରିଚାଳନାରେ ଏକ ନମ୍ବର ବୋଲି ଖୋଦ ରିଜର୍ଭ ବ୍ୟାଙ୍କଠାରୁ ଆରମ୍ଭ କରି, ନୀତି ଆୟୋଗ ଓ ଅନ୍ତରାଷ୍ଟ୍ରୀୟସ୍ତରରେ ଆର୍ଥିକ ଏଜେନ୍ସି କହିସାରିଛନ୍ତି । ରାଜ୍ୟର ସବୁ ବର୍ଗର ଲୋକଙ୍କ ସମ ବିକାଶକୁ ଜୋର ଦେଇଛନ୍ତି ରାଜ୍ୟ ସରକାର । ସେଥିପାଇଁ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦ ସଦସ୍ୟା ଓଡ଼ିଶାକୁ ଉଦାହରଣ ଭାବେ ଦର୍ଶାଇଛନ୍ତି ।
ଓଡ଼ିଶାରେ ସ୍ବାସ୍ଥ୍ୟ, ଶିକ୍ଷା, କ୍ରୀଡା, ଶିଳ୍ପ ବିକାଶ କ୍ଷେତ୍ରରେ ଆସିଛି ବୈପ୍ଲବିକ ପରିବର୍ତ୍ତନ । 5T ଉପକ୍ରମ ପ୍ରଶାସନର ଉତ୍ତରଦାୟିତ୍ବକୁ ବଢାଇବା ସହିତ ଲୋକଙ୍କ ପାଖରେ ପ୍ରଶାସନ ପହଞ୍ଚିବାର ମାର୍ଗକୁ ପ୍ରଶସ୍ତ କରିଛି। ବିହାର ସହିତ ତୁଳନା କରି ଓଡ଼ିଶାର ପ୍ରଗତିକୁ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦ ମୋହର ମାରିଥିବା ଚର୍ଚ୍ଚା ହେଉଛି ।
ସଫ୍ଟଓ୍ବେର ଜରିଆରେ ଦିବ୍ୟାଙ୍ଗ ପାଇବେ ନୂଆ ଦିଗ: ୨୬ରେ ହାକାଥନ, ପ୍ରଦର୍ଶନ ହେବ ଟେକ୍ନୋଲୋଜି
ଭୁବନେଶ୍ବର: ସଫ୍ଟଓ୍ବେର ଜରିଆରେ ଦିବ୍ୟାଙ୍ଗଙ୍କୁ ଦିଆଯିବ ନୂଆ ଜୀବନ । ଏ ନେଇ ଆସନ୍ତା ଡିସେମ୍ବର ୨୬ରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ପକ୍ଷରୁ ଆୟୋଜନ କରାଯିବ ଦିନିକିଆ ହାକାଥନ । ଯେଉଁଥିରେ ଭୁବନେଶ୍ବର ଆଇଆଇଟି, ଭୁବନେଶ୍ବର ତ୍ରିପଲ ଆଇଟି, ଜାଭିଆର୍ସ ବିଶ୍ବବିଦ୍ୟାଳୟ ଓ କିଟ୍ ବିଶ୍ବବିଦ୍ୟାଳୟର ଛାତ୍ରଛାତ୍ରଙ୍କୁ ଭାଗ ନେବାକୁ ଚିଠି ଲେଖିଛନ୍ତି ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ । ଏଥିରେ ଦିବ୍ୟାଙ୍ଗଙ୍କ ପାଇଁ ଟେକ୍ନୋଲୋଜି ଦ୍ବାରା ସଫ୍ଟଓ୍ବେର ଡିଜାଇନ କରିଥିବା ଛାତ୍ରଛାତ୍ରୀ ଭାଗ ନେବେ ।
ଆଇଆଇଟି ଦିଲ୍ଲୀ ଓ ଆଇଆଇଟି କାନପୁର ଛାତ୍ରଛାତ୍ରୀ ଦୃଷ୍ଟିହୀନଙ୍କ ପାଇଁ ସ୍ମାର୍ଟ ଗ୍ଲାସ୍ ଡିଜାଇନ୍ କରିଛନ୍ତି । ଯାହାଦ୍ବାରା ଦୃଷ୍ଟିହୀନମାନେ ଡିଜିଟାଲ ରିଡିଙ୍ଗ କରି ପାରୁଛନ୍ତି । ଏହିପରି ଅନେକ ଟେକ୍ନୋଲୋଜି ରହିଛି, ଯାହା ଦିବ୍ୟାଙ୍ଗଙ୍କ ଅକ୍ଷମତା ଦୂର କରି ପାରିବ । ଏଥିପାଇଁ ଭୁବନେଶ୍ବର ଆଇଆଇଟି, ଭୁବନେଶ୍ବର ତ୍ରିପଲ ଆଇଟି, ଜାଭିଅର୍ସ ବିଶ୍ବବିଦ୍ୟାଳୟ ଓ କିଟ୍ ବିଶ୍ବବିଦ୍ୟାଳୟର ଛାତ୍ରଛାତ୍ରୀଙ୍କୁ ଗୋଟାଏ ପ୍ଲାଟଫର୍ମକୁ ଅଣାଯିବ । ଡିସେମ୍ବର ୨୬ରେ ହେବାକୁ ଥିବା ହାକାଥନ ଜରିଆରେ ସେମାନେ ଟେକ୍ନୋଲୋଜିକୁ ପ୍ରଦର୍ଶନ କରି ପାରିବେ । ଏଥିରେ ୟୁନାଇଟେଡ ନେସନ୍ସ ପପୁଲେସନ ଫଣ୍ଡ ବି ସହଯୋଗ କରୁଛି । ଏହି ହାକାଥନର ଶୀର୍ଷକ ହେଉଛି ‘ହାକାଥନ ଅନ ଆକ୍ସେସିଭ ଟେକ୍ନୋଲୋଜି’ । ଏଥିରେ ଏମସିଏ, ଏମ.ଟେକ୍ ଓ ରିସର୍ଚ୍ଚ ଛାତ୍ରଛାତ୍ରୀ ଭାଗ ନେବା ପାଇଁ ନାମ ପଞ୍ଜିକରଣ କରିବାକୁ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ଚିଠି କରିଛି । ହାକାଥନରେ ଦିବ୍ୟାଙ୍ଗଙ୍କ ପାଇଁ ସଫ୍ଟୱେର ଡିଜାଇନ୍ କରାଯିବ । ଭଲ ଡିଜାଇନଗୁଡ଼ିକୁ ପରବର୍ତ୍ତି ରିସର୍ଚ୍ଚ ପାଇଁ ୟୁନାଇଟେଡ ନେସନ୍ସ ପପୁଲେସନ ଫଣ୍ଡ ସହାୟତା ପ୍ରଦାନ କରିବ । ଦିବ୍ୟାଙ୍ଗଙ୍କ ପାଇଁ ଡିଜାଇନ୍ ହୋଇଥିବା ଟେକ୍ନୋଲୋଜି ଡ୍ରିଭେନ୍ ମେସିନକୁ ଏହି ସଫ୍ଟୱେର କଣ୍ଟ୍ରୋଲ କରିବ ।
ଦିବ୍ୟାଙ୍ଗମାନେ ସଫ୍ଟଓ୍ବେର ଜରିଆରେ କଣ୍ଟ୍ରୋଲ ମେକାନିଜିମର ଅଧିକାର ପାଇବେ । ସେମାନଙ୍କ ପାଇଁ ଡିଜାଇନ୍ ହୋଇଥିବା ରେଟ୍ରୋଫିଟେଡ୍ ଭେଇକେଲର ଇଂଜିନକୁ ସଫ୍ଟୱେର ଦ୍ବାରା ଡ୍ରାଇଭ୍ କରାଯିବ । ଯାହା ସେମାନଙ୍କ ଗମନାଗମନକୁ ସରଳ କରିବାରେ ସହାୟକ ହେବ । ଏଥିରେ AI ବା କୃତ୍ରିମ ବୁଦ୍ଧିମତା ପ୍ରୟୋଗ ଉପରେ ବି ଗୁରୁତ୍ବ ଦିଆଯିବା ନେଇ ମତ ଆସିଛି ।
ହାକାଥନରେ ୩୨ ଜଣ ଛାତ୍ରଛାତ୍ରୀଙ୍କୁ ଭାଗ ନେବାର ସୁଯୋଗ ଦିଆଯିବ । ପ୍ରତି ଶିକ୍ଷାନୁଷ୍ଠାନରୁ ୮ ଲେଖାଏଁ ଛାତ୍ରଛାତ୍ରୀ ନିଜ ଡିଜାଇନର ସଫ୍ଟଓ୍ବେରକୁ ପ୍ରଦର୍ଶନ କରିବେ । ପରିବହନ ଓ ଖାଦ୍ୟ ଖର୍ଚ୍ଚ ବହନ କରିବ ୟୁନାଇଟେଡ ନେସନ୍ସ ପପୁଲେସନ ଫଣ୍ଡ ।
ଅପାର ସମ୍ଭାବନା ସତ୍ତ୍ବେ କେନ୍ଦ୍ରର ଅଣଦେଖା: ଓଡ଼ିଶାକୁ ମିଳିଲାନି ଜଳ ବିଦ୍ୟୁତ ପ୍ରକଳ୍ପ
ଭୁବନେଶ୍ବର: ପୁଣି କେନ୍ଦ୍ରର ପ୍ରବଞ୍ଚନା । ଜଳ ବିଦ୍ୟୁତ୍ ପ୍ରକଳ୍ପ ନିର୍ମାଣରେ ପାତରଅନ୍ତର । ଦେଶରେ ୪୨ଟି ଜଳ ବିଦ୍ୟୁତ୍ ପ୍ରକଳ୍ପ ନିର୍ମାଣ ହେଉଥିବା ବେଳେ ଓଡ଼ିଶାରେ ଦେଲେନି ଗୋଟିଏ । ଜଳ ବିଦ୍ୟୁତ୍ ପ୍ରକଳ୍ପ ପାଇଁ ରାଜ୍ୟରେ ଅପାର ସୁଯୋଗ ରହିଛି । କିନ୍ତୁ ଓଡ଼ିଶାକୁ ଅଣଦେଖା କରିବାକୁ ଗଣ୍ଠି ବାନ୍ଧି ନେିଥିବା କେନ୍ଦ୍ର ସରକାର ଏହାକୁ ଦୃଷ୍ଟି ଦେଇନାହିଁ । ସେପଟେ ତାପଜ ବିଦ୍ୟୁତ୍ ଉତ୍ପାଦନ ଯୋଗୁଁ ଓଡ଼ିଶା ପ୍ରଦୂଷଣ ସହୁଥିବା ବେଳେ କ୍ଷତି ଭରଣା ପାଇଁ କେନ୍ଦ୍ର ଗ୍ରୀନ୍ ସେସ୍ ଦେଉନାହିଁ । ଏହା ଅବିଚାର ବୋଲି କଂଗ୍ରେସ ଓ ସମାଜବାଦୀ ପାର୍ଟି କହିଛନ୍ତି । ସେପଟେ ବିଜେଡି ଏହାର ତୀବ୍ର ବିରୋଧ କରିବା ଉଚିତ ବୋଲି ସମୀକ୍ଷକ ମତ ରଖିଛନ୍ତି ।
ସୂଚନାଯୋଗ୍ୟ, ଦେଶରେ ୪୨ଟି ଜଳ ବିଦ୍ୟୁତ୍ ପ୍ରକଳ୍ପ ନିର୍ମାଣ ହେଉଛି । ହେଲେ ଓଡ଼ିଶା ବାଣ୍ଟରେ ପଡ଼ିଲାନି ଗୋଟିଏ । ଓଡ଼ିଶା ପ୍ରତି କେନ୍ଦ୍ର ସରକାରଙ୍କ ବୈମାତୃକ ମନୋଭାବର ଏହା ଆଉ ଏକ ଉଦାହରଣ । କେନ୍ଦ୍ର ଅକ୍ଷୟ ଶକ୍ତିମନ୍ତ୍ରୀ ଆର୍. କେ ସିଂହଙ୍କ ଲିଖିତ ଉତ୍ତରରୁ ଓଡ଼ିଶା ପ୍ରତି ଅବହେଳା ସ୍ପଷ୍ଟ ହୋଇଛି । ବିଭିନ୍ନ ରାଜ୍ୟରେ ନିର୍ମାଣାଧୀନ ୪୨ଟି ଜଳ ବିଦ୍ୟୁତ୍ ପ୍ରକଳ୍ପ ମଧ୍ୟରୁ ୧୮ଟି କେନ୍ଦ୍ରୀୟ ପ୍ରକଳ୍ପ, ୧୫ଟି ରାଜ୍ୟ ପ୍ରକଳ୍ପ ଓ ୯ଟି ଘରୋଇ ପ୍ରକଳ୍ପ ରହିଛି । ହେଲେ ଓଡ଼ିଶାରେ କେନ୍ଦ୍ର କୌଣସି ଜଳ ବିଦ୍ୟୁତ୍ ପ୍ରକଳ୍ପ କରୁନଥିବାରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ହୀରାକୁଦ ଜଳ ବିଦ୍ୟୁତ ପ୍ରକଳ୍ପ ପ୍ରତିଷ୍ଠା କରିବାରେ ଦେଶରେ ଓଡ଼ିଶା ପ୍ରଥମ । ଜଳ ବିଦ୍ୟୁତ ପ୍ରକଳ୍ପ ପାଇଁ ଓଡ଼ିଶାରେ ପର୍ଯ୍ୟାପ୍ତ ସୁଯୋଗ ରହିଛି । କିନ୍ତୁ ଏକ୍ଷେତ୍ରରେ ଓଡ଼ିଶାକୁ କେନ୍ଦ୍ର ଅବହେଳା କରିଥିବାରୁ ପ୍ରତିବାଦର ସ୍ବର ତୀବ୍ର ହୋଇଛି । କଂଗ୍ରେସ ବିଧାୟକ ସୁରେଶ ରାଉତରାୟ ଏବଂ ସମାଜବାଦୀ ପାର୍ଟି ରାଜ୍ୟ ସଭାପତି ରବି ବେହେରା କେନ୍ଦ୍ରର ଏମିତି ପାତରଅନ୍ତର ନୀତିକୁ ଦୃଢ଼ ବିରୋଧ କରିଛନ୍ତି ।
ଦେଶରେ ୨୭ ହଜାର ୧୮୦ ମେଗାୱାଟ କ୍ଷମତା ବିଶିଷ୍ଟ ୨୦ଟି ତାପଜ ବିଦ୍ୟୁତ୍ ପ୍ରକଳ୍ପ ସ୍ଥାପନ କରାଯାଉଛି । ଓଡ଼ିଶାର ତାଳଚେରରେ ଏନଟିପିସି ପ୍ରକଳ୍ପ ରାଜ୍ୟ ତାଲିକାରେ ଅଛି । ଏନଟିପିସିର ଦୁଇଟି ନିର୍ମାଣାଧୀନ ୟୁନିଟର ଉତ୍ପାଦନ କ୍ଷମତା ୬୬୦ରୁ ୧୩ ଶହ ୨୦ ମେଗାୱାଟକୁ ବଢ଼ିବ । ତାପଜ ବିଦ୍ୟୁତ ପାଇଁ ରାଜ୍ୟର କୋଇଲା ବ୍ୟବହାର ହେଉଛି । ଲୋକ ପ୍ରଦୂଷଣର ଶିକାର ହେଉଛନ୍ତି । ପରିବେଶଜନିତ କ୍ଷତି ଭରଣା ଲାଗି ଗ୍ରୀନ ସେସରେ ରାଜ୍ୟର ଭାଗ ପାଇଁ ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜ ସଂସଦରେ ପ୍ରସଙ୍ଗ ଉଠାଇଥିଲେ । ଏଥିପ୍ରତି କେନ୍ଦ୍ର କର୍ଣ୍ଣପାତ କରିନାହିଁ । ଏସବୁ ବିରୋଧରେ ବିଜେଡି ଜୋରଦାର ପ୍ରତିବାଦ କରିବା ଉଚିତ ବୋଲି ବରିଷ୍ଠ ସମୀକ୍ଷକ jବି ଦାସ ମତ ଦେଇଛନ୍ତି ।
ଓଡ଼ିଶାର ବିକାଶ, ବିରୋଧୀଙ୍କୁ ଦେଖାଯାଉନି କି ରୂପାନ୍ତରଣକୁ ସହିପାରୁ ନାହାନ୍ତି: କାର୍ତ୍ତିକ ପାଣ୍ଡିଆନ
ବ୍ରହ୍ମପୁର: ଓଡ଼ିଶାର ରୂପାନ୍ତରଣକୁ ସହିପାରୁନାହାନ୍ତି ନାହାନ୍ତି ବିରୋଧୀ । ଗଞ୍ଜାମ ଜିଲ୍ଲା ଗସ୍ତ ବେଳେ ବିରୋଧୀଙ୍କୁ କଡ଼ା ଜବାବ ଦେଇ ଏମିତି କହିଛନ୍ତି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ବିରୋଧୀଙ୍କୁ ଟାର୍ଗେଟ କରି କହିଛନ୍ତି- ରୂପାନ୍ତରଣ କଥା ଆସିଲା ବେଳକୁ ବିରୋଧୀ ଅନ୍ଧ ହେଇଯାଉଛନ୍ତି । ଆଖି ଖୋଲିଲେ ସମଗ୍ର ଓଡ଼ିଶାର ସବୁଠି ବିକାଶ ଓ ରୂପାନ୍ତରଣ ଜଳଜଳ ହୋଇ ଦେଖାଯିବ । ବଡ଼ ସ୍ବପ୍ନ ଦେଖିବାକୁ ଗରିବଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସଶକ୍ତ କରିଛନ୍ତି । ସବୁ ପଞ୍ଚାୟତରେ ଥିବା ମନ୍ଦିରର ସୌନ୍ଦର୍ଯ୍ୟକରଣ ହେଉଛି । ମିଶନ ଶକ୍ତି, ଆମ ବ୍ୟାଙ୍କ ଭଳି ଅର୍ଥନୈତିକ ଅଭିଯାନ ଦ୍ବାରା ଲୋକଙ୍କ ଜୀବନଧାରା ବଦଳିଛି । ହେଲେ ଏସବୁ ବିରୋଧୀଙ୍କୁ ଦେଖାଯାଉନି ।
ସୂଚନାଯୋଗ୍ୟ ଦୁଇଦିନିଆ ଗଞ୍ଜାମ ଗସ୍ତରେ ଯାଇଥିଲେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ଆଜି ଦ୍ବିତୀୟ ଦିନରେ ଜିଲ୍ଲାର ବିଭିନ୍ନ ଅଞ୍ଚଳକୁ ଯାଇ ବିକାଶ କାର୍ଯ୍ୟର ସମୀକ୍ଷା କରିବା ସହ ସ୍ଥାନୀୟ ଲୋକ ଓ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ । ଏହି ଅବସରରେ ଗଞ୍ଜାମ ମାଟିରୁ ବିକାଶକୁ ବିରୋଧ କରୁଥିବା ବିରୋଧୀଙ୍କୁ କଡ଼ା ଜବାବ ଦେଇଛନ୍ତି 5T ଅଧ୍ୟକ୍ଷ । କହିଛନ୍ତି, ‘କିଛି ଲୋକଙ୍କୁ ବିକାଶ ଦେଖା ଯାଉନାହିଁ । ରୂପାନ୍ତରଣକୁ ଗ୍ରହଣ କରିପାରୁନାହାନ୍ତି । ରୂପାନ୍ତରଣ କଥା ଆସିଲା ବେଳକୁ ସେମାନେ ଅନ୍ଧ ହେଇଯାଉଛନ୍ତି । ଆଖି ଖୋଲିଲେ ସମଗ୍ର ଓଡ଼ିଶାର ସବୁଠି ବିକାଶ ଓ ରୂପାନ୍ତରଣ ଜଳଜଳ ହୋଇ ଦେଖାଯିବ । ଶିକ୍ଷାରୁ ସ୍ବାସ୍ଥ୍ୟସେବା, ଗମନାଗମନରୁ ଐତିହ୍ୟସ୍ଥଳୀ ସୌନ୍ଦର୍ଯ୍ୟକରଣ, ବିକାଶର ନୂଆ ଅଧ୍ୟାୟ ଲେଖୁଛି ଓଡ଼ିଶା । ଐତିହାସିକ ରୂପାନ୍ତରଣ ଦେଖି ବି କିଛି ଲୋକ ବାରମ୍ବାର ଅପପ୍ରଚାର କରୁଛନ୍ତି ।’
ସ୍ମାର୍ଟ କ୍ଲାସରୁମ୍, ଇ-ଲାଇବ୍ରେରୀ ସାଙ୍ଗକୁ ବିଭିନ୍ନ ସୁବିଧା ସହ ସ୍କୁଲ ରୂପାନ୍ତରଣ ହୋଇଛି । ରାଜ୍ୟରେ ସବୁ କଲେଜର ବଦଳୁଛି ରୂପରେଖ । ବଡ଼ ସ୍ବପ୍ନ ଦେଖିବାକୁ ଗରିବଙ୍କୁ ସଶକ୍ତ କରିଛନ୍ତି ମୁଖ୍ୟମନ୍ତ୍ରୀ । ଗରିବରୁ ଗରିବ ଲୋକ ନିଜ ସନ୍ତାନକୁ ଡାକ୍ତର, ଇଂଜିନିୟର, ଆଇଏଏସ୍ କରିବାର ସ୍ବପ୍ନ ଦେଖୁଛି ଓ ତାକୁ ସାକାର କରିବାର ସାମର୍ଥ୍ୟ ମଧ୍ୟ ରଖୁଛି । କେବଳ ସେତିକି ନୁହେଁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଦ୍ବାରା ବଡ଼ ହସ୍ପିଟାଲରେ ଗରିବଙ୍କୁ ଉନ୍ନତ ସ୍ବାସ୍ଥ୍ୟସେବା ମିଳିପାରୁଛି। ସାରା ରାଜ୍ୟରେ ଆମ ହସ୍ପିଟାଲ ଯୋଜନା କାର୍ଯ୍ୟକାରୀ ହୋଇଛି । ମେଡିକାଲ କଲେଜ ସଂଖ୍ୟା ବଢିଛି । ଏବେ ଡାକ୍ତର ବଳକା ରାଜ୍ୟ ହୋଇଛି ଓଡ଼ିଶା ବୋଲି ସେ କହିଛନ୍ତି ।
ଆଗକୁ କାର୍ତ୍ତିକ ପାଣ୍ଡିଆନ କହିଛନ୍ତି, ପୁରୀ ଶ୍ରୀମନ୍ଦିରରୁ ସମଲେଇ ମନ୍ଦିର, ଗୁପ୍ତେଶ୍ବରରୁ ଆଖଣ୍ଡଳମଣି ରାଜ୍ୟର ସବୁ ଐତିହ୍ୟସ୍ଥଳୀର ରୂପାନ୍ତର କରାଯାଇଛି । ସବୁ ପଞ୍ଚାୟତରେ ମନ୍ଦିରର ସୌନ୍ଦର୍ଯ୍ୟକରଣ କରାଯାଉଛି । ହେଲେ ପରିବର୍ତ୍ତନକୁ ସହି ପାରୁ ନଥିବା ଲେକେ ବିକାଶକୁ କେମିତି ସହିବେ ।
ମିଶନ ଶକ୍ତି, ଆମ ବ୍ୟାଙ୍କ ଭଳି ଅର୍ଥନୈତିକ ଅଭିଯାନ ଦ୍ବାରା ଲୋକଙ୍କ ଜୀବନଧାରା ବଦଳିଛି । ଲକ୍ଷ୍ମୀ ବସ୍ ଯୋଜନା, ରାସ୍ତା ଓ ବ୍ରିଜ୍ ନିର୍ମାଣ ଦ୍ବାରା ଗମନାଗମନ କ୍ଷେତ୍ରରେ ବ୍ୟାପକ ପରିବର୍ତ୍ତନ ଆସିଛି । ଯଦି ଏସବୁ ରୂପାନ୍ତରଣ କିଛି ଲୋକଙ୍କୁ ଦିଶୁନି, ତେବେ ସେମାନେ ଆଖି ଖୋଲିବା ଦରକାର ବୋଲି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ କହିଛନ୍ତି ।
ବିଜେଡିରେ ବିଧିବଦ୍ଧ ଭାବେ ଯୋଗ ଦେବା ପରେ ଗଞ୍ଜାମ ଜିଲ୍ଲାକୁ ପ୍ରଥମ ଗସ୍ତ କରିଛନ୍ତି କାର୍ତ୍ତିକ ପାଣ୍ଡିଆନ ।
ଗାନ୍ଧିଜୀଙ୍କ ସ୍ମୃତି ବହନ କରୁଥିବା ଚାରିବାଟିଆର ହେବ ବିକାଶ, ମୁଖ୍ୟମନ୍ତ୍ରୀ କଲେ ଆର୍ଥିକ ଅନୁଦାନ ଘୋଷଣା
ବାସୁଦେବପୁର: ଇତିହାସ ପ୍ରେରଣା ଯୋଗାଏ, ଆଗକୁ ବଢିବା ପାଇଁ ଶକ୍ତି ଦିଏ । ମହାପୁରୁଷଙ୍କ ଗାରିମାର ଗାଥା ଯୁବ ପିଢିଙ୍କୁ ଉତ୍ସାହିତ କରିଥାଏ । ଓଡ଼ିଶାର ଏଭଳି ଏକ ସ୍ଥାନ ହେଉଛି ଭଦ୍ରକ ଜିଲ୍ଲାର ଚାରବାଟିଆ । ଆଜି ପର୍ଯ୍ୟନ୍ତ ଏଠାକାର ପରିବେଶ ସ୍ବାଧୀନତାର ସ୍ମୃତି ବଖାଣୁଛି । ଆଜିର ଦିନରେ ଏଠାକୁ ଆସି ସ୍ବାଧୀନତା ସଂଗ୍ରାମୀମାନଙ୍କୁ ଗୁରୁମନ୍ତ୍ର ଦେଇଥିଲେ ବାପୁଜୀ । ଇତିହାସକୁ ଗୌରବମୟ କରିବାକୁ ମୁଖ୍ୟମନ୍ତ୍ରୀ ଏହି ସ୍ଥାନକୁ ପର୍ଯ୍ୟଟନ ସ୍ଥଳୀ ଘୋଷଣା କରିବା ସହ ଅଞ୍ଚଳର ବିକାଶ ପାଇଁ ଘୋଷଣା କରିଛନ୍ତି ଆର୍ଥିକ ଅନୁଦାନ ।
ଭାରତ ସ୍ବାଧୀନତାର ସ୍ମୃତି ବଖାଣୁଛି ଚାରବାଟିଆ । ମହାତ୍ମା ଗାନ୍ଧୀଙ୍କ ମହତ ଉଦ୍ଦେଶ୍ୟକୁ ଆଜି ବି ସାଇତି ରଖିଛି ଏହି ପୁଣ୍ୟସ୍ଥଳୀ । ବୀରମାଟିର ଲଢୁଆ ପୁଅ ଏଠାରୁ ଇଂରେଜଙ୍କ ବିରୋଧରେ ଦେଇଥିଲା ରଣ ହୁଙ୍କାର । ବାପୁଜୀଙ୍କ ଡାକରାରେ ଅହିଂସାକୁ ମୁଖ୍ୟ ଅସ୍ତ୍ର କରି ସ୍ବାଧୀନତା ସଂଗ୍ରାମକୁ ଝାସ ଦେଉଥିଲେ ଏଠାକାର ଅଗଣିତ ଯୁବକ ଯୁବତୀ । ଏନେଇ ଭଦ୍ରକର ଚାରବାଟିଆଠାରେ ଆଜିର ଦିନରେ ଆୟୋଜିତ ହୋଇଥିଲା ବିରାଟ ସଭା । ୧୯୨୭ ମସିହା ଡିସେମ୍ବର ୧୭ ତାରିଖରେ ଉପସ୍ଥିତ ସଂଗ୍ରାମୀଙ୍କୁ ଗୁରୁମନ୍ତ୍ର ଦେଇଥିଲେ ବାପୁଜୀ । ଲକ୍ଷ୍ୟ ଥିଲା ସ୍ବାଧୀନତା ସଂଗ୍ରାମକୁ ଗଣ ଆନ୍ଦୋଳନରେ ପରିଣତ କରିବା । ସେଦିନର ଭାଷଣ ଓ ଗାନ୍ଧିଜୀଙ୍କ ପାଦ ସ୍ପର୍ଶକୁ ଆଜି ବି ଝୁରୁଛନ୍ତି ଚାରବାଟିଆବାସୀ ।
ଏହି ଐତିହାସିକ ସ୍ଥଳୀର ବିକାଶ ପାଇଁ ଏବେ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର । ଚାରବାଟିଆକୁ ପର୍ଯ୍ୟଟନ ସ୍ଥଳୀର ମାନ୍ୟତା ପ୍ରଦାନ ସହ ୬୫ କୋଟିରୁ ଅଧିକ ଅର୍ଥ ପ୍ରଦାନ କରାଯାଇଛି । ଗାନ୍ଧି ସ୍ମୃତି ଭବନ, ବାଣିଜ୍ୟ କୋଠି ଓ ପାର୍କର ଉନ୍ନତ୍ତିକରଣ ପାଇଁ ୭୧ ଲକ୍ଷରୁ ଅଧିକ ଟଙ୍କା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗାନ୍ଧିଜୀ ଆସିଥିବା ମନ୍ତେଇ ନଦୀ ଉପରେ ୬୫ କୋଟି ଟଙ୍କାର ପୋଲ ନିର୍ମାଣ ହେବ । ଏନେଇ ମୁଖ୍ୟମନ୍ତ୍ରୀ ଏବଂ 5T ଅଧ୍ୟକ୍ଷଙ୍କୁ ଧନ୍ୟବାଦ ଜଣାଇଛନ୍ତି ଅଞ୍ଚଳବାସୀ ।
ଋଣ ଜାଲିଆତି: ୮୧ ମହିଳା ବୁଣାକାରଙ୍କ ଅଜାଣତରେ ଲକ୍ଷାଧିକ ଟଙ୍କା ଚଳୁ
କେନ୍ଦୁଝର: କେନ୍ଦୁଝର ଜିଲ୍ଲା ଘଷିପୁରା ବ୍ଲକ୍ ଅତାଠାରେ ଥିବା ମହିଳା ବୟନ କେନ୍ଦ୍ରରେ ଋଣ ଜାଲିଆତି । ପୂର୍ବତନ ସମ୍ପାଦକଙ୍କ ବିରୋଧରେ ଅଭିଯୋଗ ଆଣିଲେ ୮୧ ଜଣ ବୁଣାକାର । ସେମାନଙ୍କ ନାଁରେ ବ୍ୟାଙ୍କରୁ ଋଣ ଉଠାଇ ଲକ୍ଷ ଲକ୍ଷ ଟଙ୍କା ଚଳୁ କରିଥିବା ଅଭିଯୋଗ । ପରିଶୋଧ ପାଇଁ ନୋଟିସ୍ ଆସିବା ପରେ ବୁଣାକାରମାନେ ଚିନ୍ତାରେ । ଘଟଣାର ତଦନ୍ତ କରି କାର୍ଯ୍ୟନୁଷ୍ଠାନ ପାଇଁ ଦାବି କରାଯାଇଛି ।
ସୂଚନାଯୋଗ୍ୟ, ଏହି ବୁଣାକାରମାନେ କେବେ ଋଣ ନେଇ ନାହାନ୍ତି । ବ୍ୟାଙ୍କ ବାରଣ୍ଡା ମଧ୍ୟ ମାଡ଼ି ନାହାନ୍ତି । କିନ୍ତୁ ଋଣ ପରିଶୋଧ ପାଇଁ ଆସିଛି ନୋଟିସ । ୪୨୦ ବାବୁ ପଣସ ଖାଇ ପରମୁଣ୍ଡରେ ଅଠା ବୋଳି ଦେଇଥିବା ଅଭିଯୋଗ । କେନ୍ଦୁଝର ଜିଲ୍ଲା ଘଷିପୁରା ବ୍ଲକ୍ ଅତା ମହିଳା ବୟନ କେନ୍ଦ୍ରର ସଦସ୍ୟାମାନେ ଏହି ଅଭିଯୋଗ ଆଣିଛନ୍ତି । ବୁଣାକାର ସମବାୟ ସମିତିର ପୂର୍ବତନ ସମ୍ପାଦକ ଅକ୍ଷୟ କୁମାର ପାଗଳ ଋଣ ଟଙ୍କା ଚଳୁ କରିଥିବା ଅଭିଯୋଗ ହୋଇଛି । ଅକ୍ଷୟ କୁମାର ପାଗଳଙ୍କୁ ଦୁର୍ନୀତି ଅଭିଯୋଗରେ ୨୦୨୧ ମସିହା ଅଗଷ୍ଟ ମାସରେ ଉଚ୍ଚ କର୍ତ୍ତୃପକ୍ଷ ଚାକିରିରୁ ବହିଷ୍କୃତ କରିଥିଲେ l ଏବେ ତାଙ୍କ କଳା କାରନାମାରେ ଋଣ ଜାଲିଆତିର ଆଉ ଏକ ଫର୍ଦ୍ଦ ଯୋଡ଼ି ହୋଇଛି । ଅକ୍ଷୟ ପାଗଳ ପଦବୀରେ ଥିବା ବେଳେ ୨୦୧୬ରୁ ୧୮ ଆର୍ଥିକବର୍ଷ ମଧ୍ୟରେ ୮୧ ଜଣ ବୁଣାକାରଙ୍କ ନାଁରେ ବ୍ୟାଙ୍କ ଅଫ ଇଣ୍ଡିଆ ଘଷିପୁରା ଶାଖାରୁ ୫୦ ହଜାର ଟଙ୍କା ଲେଖାଏଁ ଋଣ ଉଠାଇ ସବୁ ଅର୍ଥ ଚଳୁ କରିଥିବା ଅଭିଯୋଗ ହୋଇଛି । ଏବେ ଋଣ ଖିଲାପୀ ଭାବେ ବ୍ୟାଙ୍କ ତରଫରୁ କୋର୍ଟ ନେଟିସ୍ ପରେ ମହିଳା ବୟନ କେନ୍ଦ୍ରର ସଦସ୍ୟାମାନେ ଚିନ୍ତାରେ ପଡ଼ିଛନ୍ତି ।
ସେପଟେ ଅଭିଯୋଗକୁ ନେଇ ବେଫିକର ବହିଷ୍କୃତ ସମ୍ପାଦକ । ଯିଏ ଋଣ ନେଇଛି ସେ ଶୁଝିବ । ନଚେତ ବ୍ୟାଙ୍କ କର୍ତ୍ତୃପକ୍ଷ ବୁଝିବେ ବୋଲି ଅକ୍ଷୟ କୁମାର ପାଗଳ କହିଛନ୍ତି । ନୋଟିସ ପାଇଥିବା ମହିଳାମାନେ ଏବେ କୋର୍ଟ ଓ ବ୍ୟାଙ୍କକୁ ଦୌଡୁଛନ୍ତି । ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ପ୍ରଶାସନ ନିକଟରେ ଦାବି କରିଛନ୍ତି ।
ଶିମିଳିପାଳରେ ପଡ଼ୁଛି ବରଫ, ପ୍ରବଳ ଥଣ୍ଡା ଯୋଗୁ ଅସ୍ତବ୍ୟସ୍ତ ଜୀବନ
ନନ୍ଦିଘୋଷ ବ୍ୟୁରୋ: ଥଣ୍ଡାର ପ୍ରକୋପରେ ଥୁଡୁକି ଯାଉଛି ଦେହ । ଭୋରରୁ ବାଟ ଚାଲିବା ମୁସକିଲ କରୁଛି କୁହୁଡି । ସକାଳ ୯ଟାରେ ବି ଘରୁ ବାହାରିବା ଅସମ୍ଭବ ହେଉଛି । ଶୀତରୁ ରକ୍ଷା ପାଇଁ ନିଆଁର ସାହାରା ନେଉଛନ୍ତି ଲୋକ । ମୟୂରଭଞ୍ଜ ଜିଲ୍ଲାରେ ଶୀତର ପ୍ରକୋପ ବଢିବାରେ ଲାଗିଛି । ଥଣ୍ଡାରେ ଅସ୍ତବ୍ୟସ୍ତ ହୋଇ ପଡିଛି ଜୀବନ । ଶିମିଳିପାଳରେ ସର୍ବନିମ୍ନ ତାପମାତ୍ରା ୧ ଡ଼ିଗ୍ରୀରେ ପହଞ୍ଚିଛି । ଫଳରେ ସକାଳୁ ସକାଳୁ ଘାସ ଉପରେ ବରଫ ପଡୁଥିବା ଦେଖିବାକୁ ମିଳିଛି ।
ସେପଟେ ଥଣ୍ଡାରେ ଥରୁଛି ସୁନ୍ଦରଗଡ଼ । ଚଳିତ ବର୍ଷ ଡେରିରେ ଆସିଛି ହେଲେ ଜନ ଜୀବନକୁ ଅସ୍ତବ୍ୟସ୍ତ କରିପକାଉଛି ଶୀତ । କିଛି ଦିନ ହେବ ସୁନ୍ଦରଗଡ ବିଭିନ୍ନ ସ୍ଥାନରେ ପାରଦ ୮ ଡିଗ୍ରୀ ତଳକୁ ଖସିଛି । ଲୋକେ ଥଣ୍ଡାରୁ କିଭଳି ନିଜକୁ ରକ୍ଷା କରିବେ ସେ ନେଇ ଯୋଗାଡ ଲଗାଇଛନ୍ତି ।
ଜଙ୍ଗଲୀ ଫୁଲରେ ମୋତି ଭଳି ଝଲସୁଛି ଶିଶିର ବିନ୍ଦୁ । ଶୀତଳ ଜଳକୁ ଢାଙ୍କି ରଖିଛି କୁହୁଡି। ଥଣ୍ଡାର ସ୍ପର୍ଶରେ ପ୍ରକୃତି ଅପରୂପ ଦୃଶ୍ୟ ଦେଖି ଆନମନା ହୋଇଛି କବି ମନ ।