ନୂଆଦିଲ୍ଲୀ : ବଢିଲା ଟିଏମସି ସାଂସଦ ମହୁଆ ମୋଇତ୍ରାଙ୍କ ଅଡୁଆ । ସାଂସଦ ମହୁଆଙ୍କୁ ନେଇ ଆଜି ସଂସଦରେ ହଙ୍ଗାମା ଦେଖିବାକୁ ମିଳିଛି । ଟଙ୍କା ନେବା ଏବଂ ସଂସଦରେ ପ୍ରଶ୍ନ ପଚାରିବା ଘଟଣାରେ ଲୋକସଭା ବାଚସ୍ପତି ଓମ ବିର୍ଲାଙ୍କ ନିର୍ଦ୍ଦେଶ ଉପରେ ଅନୁସନ୍ଧାନ କରିଥିବା ଗୃହର ନୈତିକ କମିଟି ଲୋକସଭାରେ ଏହି ରିପୋର୍ଟ ଉପସ୍ଥାପନ କରିଛି। ଏହି ସମୟରେ ବିରୋଧୀ ସାଂସଦମାନେ ଗୃହରେ ହୋହାଲ୍ଲା କରିଥିଲେ। ଗୃହରେ ବିରୋଧୀ ସାଂସଦମାନେ ‘ଅନ୍ୟାୟକୁ ବରଦାସ୍ତ କରିବେ ନାହିଁ’ ସ୍ଲୋଗାନ ଦେଉଥିବାର ଦେଖିବାକୁ ମିଳିଥିଲା। ବିରୋଧୀଙ୍କ ହୋହାଲ୍ଲା ଯୋଗୁଁ ବାଚସ୍ପତି ପ୍ରଶ୍ନ କାଳରେ ଗୃହକୁ ମୁଲତବି ରଖିଥିଲେ। ଯେତେବେଳେ ମଧ୍ୟାହ୍ନ ୧୨ ଟାରେ ଗୃହ କାର୍ଯ୍ୟ ଆରମ୍ଭ ହେଲା, ସେତେବେଳେ ବିଜେପି ସାଂସଦ ବିଜୟ ସୋନକର ନୈତିକ କମିଟିର ରିପୋର୍ଟ ଉପସ୍ଥାପନ କରିଥିଲେ। ଏହି ସମୟରେ ବିରୋଧୀଙ୍କ ଆନ୍ଦୋଳନ ଜାରି ରହିଥିଲା ଏବଂ ବାଚସ୍ପତି ଗୃହ ପ୍ରକ୍ରିୟାକୁ ଅପରାହ୍ନ ୨ ଟା ପର୍ଯ୍ୟନ୍ତ ମୁଲତବି ଘୋଷଣା କରିଥିଲେ। ଅନ୍ୟପଟେ ଟିଏମସି ସାଂସଦମାନେ ଅଭିଯୋଗ କରିଛନ୍ତି ଯେ ନୈତିକ କମିଟି ରିପୋର୍ଟ କିପରି ଲିକ୍ ହେଲା ? ବିରୋଧୀ ଦଳର ମନୋଭାବକୁ ବିଚାରକୁ ନେଇ ରିପୋର୍ଟ ଗ୍ରହଣ କରିବା କିମ୍ବା ଟିଏମସି ସାଂସଦ ମହୁଆ ମୋଇତ୍ରାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାବେଳେ ଗୃହରେ ଭୋଟ୍ ଦେବାର ଆବଶ୍ୟକତା ଥାଇପାରେ। ଏହାକୁ ଦୃଷ୍ଟିରେ ରଖି ବିଜେପି ତାର ସମସ୍ତ ଲୋକସଭା ସାଂସଦଙ୍କୁ ଦିନସାରା ଗୃହରେ ରହିବାକୁ ନିର୍ଦ୍ଦେଶ ଦେଇଛି। 
ଆମେ ଆପଣଙ୍କୁ କହିରଖୁଛୁ ଯେ ମହୁଆ ମୋଇତ୍ରାଙ୍କ ମାମଲାରେ ନୈତିକ କମିଟି ଏହାର ତଦନ୍ତ ରିପୋର୍ଟକୁ ଗତ ମାସ ନଭେମ୍ବର ୧୦ରେ ଲୋକସଭା ବାଚସ୍ପତି ଓମ ବିର୍ଲାଙ୍କ ନିକଟକୁ ପଠାଇଥିଲା। ଲୋକସଭା ବାଚସ୍ପତି ବିର୍ଲାଙ୍କ ନିର୍ଦ୍ଦେଶରେ ସଂସଦରେ ଟଙ୍କା ନେବା ଏବଂ ପ୍ରଶ୍ନ ପଚାରିବା, ଘଟଣାର ଅନୁସନ୍ଧାନ ପରେ ନୈତିକ କମିଟି ପ୍ରାୟ ୫୦୦ ପୃଷ୍ଠାର ରିପୋର୍ଟ ପ୍ରସ୍ତୁତ କରିଥିଲା, ଯାହା ୬-୪ ମାର୍ଜିନରେ ଅନୁମୋଦିତ ହୋଇଥିଲା ।
ସୂଚନା ଅନୁଯାୟୀ, ନୈତିକ କମିଟି ମହୁଆ ମୋଇତ୍ରାଙ୍କ ବିରୋଧରେ ଆସିଥିବା ଅଭିଯୋଗକୁ ଅତ୍ୟନ୍ତ ଗୁରୁତର ସହ ନେଇଛି ଏବଂ ତାଙ୍କର ଏହି କାର୍ଯୟକୁ ଆପତ୍ତିଜନକ ଏବଂ ଅନୈତିକ ବୋଲି କହିଛି। ଏହାକୁ ଭିତ୍ତିକରି, ପୁଙ୍ଖାନୁପୁଙ୍ଖ ଅନୁସନ୍ଧାନ ରିପୋର୍ଟ ଆସିବା ପର୍ଯ୍ୟନ୍ତ କମିଟି ମହୁଆଙ୍କ ସଂସଦ ସଦସ୍ୟତା ବାତିଲ କରିବାକୁ କିମ୍ବା ତାଙ୍କ ସଦସ୍ୟତା ସ୍ଥଗିତ ରଖିବାକୁ ପରାମର୍ଶ ଦେଇଛି। ଏହି ରିପୋର୍ଟରେ କମିଟି ଭାରତ ସରକାରଙ୍କୁ ସମଗ୍ର ଘଟଣାର ଠିକ ସମୟରେ, ପୁଙ୍ଖାନୁପୁଙ୍ଖ, ଆଇନଗତ ଏବଂ ଆନୁଷ୍ଠାନିକ ତଦନ୍ତ ପାଇଁ ସୁପାରିଶ କରିଛି ଏବଂ ମହୁଆ ମୋଇତ୍ରା ଓ ହିରାନନ୍ଦାନୀଙ୍କ ମଧ୍ୟରେ ହୋଇଥିବା କାରବାରର ପୁଙ୍ଖାନୁପୁଙ୍ଖ ତଦନ୍ତ ପାଇଁ ମଧ୍ୟ ସୁପାରିଶ କରିଛି। କମିଟି ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ସୁପାରିଶ କରିଛି।
