ଭୁବନେଶ୍ୱର : ଆସନ୍ତା ଫେବ୍ରୁଆରୀ ୧୬ରୁ +୨ ପରୀକ୍ଷା । CHSE ପକ୍ଷରୁ ପରୀକ୍ଷା କାର୍ଯ୍ୟସୂଚୀ ପ୍ରକାଶ ପାଇଛି । ପ୍ରଥମ ଦିନ ଅର୍ଥାତ୍ ଫେବ୍ରୁଆରୀ ୧୬ରୁ ଯୁକ୍ତ ଦୁଇ ବିଜ୍ଞାନ ପରୀକ୍ଷା ଆରମ୍ଭ ହେବ। ୧୭ ତାରିଖରୁ କଳା ଓ ବାଣିଜ୍ୟ ପରୀକ୍ଷା ଆରମ୍ଭ ହେବ। ଏହି ପରୀକ୍ଷା ମାର୍ଚ୍ଚ ୨୦ ତାରିଖ ଯାଏଁ ଚାଲିବ। ଜାନୁଆରୀ ୨ ରୁ ୧୨ ତାରିଖ ଯାଏଁ ପ୍ରାକ୍ଟିକାଲ ପରୀକ୍ଷା ଚାଲିବ । ସିସିଟିଭି ନଜରରେ ରହିବ ସବୁ ପରୀକ୍ଷା କେନ୍ଦ୍ର। ଏନେଇ ସୂଚନା ଦେଇଛନ୍ତି ଉଚ୍ଚମାଧ୍ୟମିକ ଶିକ୍ଷା ପରିଷଦ। ୨୦୨୦ରେ ପଞ୍ଜୀକୃତ ଛାତ୍ରଛାତ୍ରୀ ପୁରୁଣା ସିଲାବସନୁସାରେ ପରୀକ୍ଷା ଦେବେ।
ଘର ଛାଡ଼ିବାର ସମୟ ଆସିଗଲା, ସଂସଦ ସ୍ମୋକ୍ କାଣ୍ଡ ଅଭିଯୁକ୍ତଙ୍କ ସିକ୍ରେଟ୍ ଡାଏରୀ
ନୂଆଦିଲ୍ଲୀ : ସଂସଦରେ ସୁରକ୍ଷା ତ୍ରୁଟି ଘଟଣାରେ ପୋଲିସ ହାତରେ ଲାଗିଲା ଅଭିଯୁକ୍ତର ସିକ୍ରେଟ୍ ଡାଏରୀ । ଗିରଫ ଅଭିଯୁକ୍ତ ସାଗର ଶର୍ମାର ଡାଏରୀ ପୋଲିସ ପାଇଛି । ଏହି ଡାଏରୀ ଦ୍ୱାରା ଘଟଣାର ଅନେକ ଖୁଲାସା ହେବ ବୋଲି ଆଶା କରାଯାଉଛି ।
ସଂସଦର ସୁରକ୍ଷା ଉଲ୍ଲଂଘନ ଅଭିଯୋଗରେ ସାଗର ଶର୍ମାଙ୍କ ଲକ୍ଷ୍ନୌ ସ୍ଥିତ ଘରୁ ପୋଲିସ ଏକ ଡାଏରୀ ପାଇଛି। ଯେଉଁଥିରେ ଚମକାଇଦେଲା ଭଳି ତଥ୍ୟ ସାମ୍ନାକୁ ଆସିଛି। । ଏଥିରେ ଲେଖାଯାଇଛି ଯେ, ଗୋଟିଏ ପଟେ ଭୟ ରହିଛି ଏବଂ ଅନ୍ୟ ପଟେ କିଛି କରିବାର ନିଆଁ ଅଛି ।
ସାଗର ଆହୁରି ମଧ୍ୟ ଲେଖିଛନ୍ତି, ‘ଘରକୁ ବିଦାୟ କହିବାର ସମୟ ପାଖେଇ ଆସିଛି। ଗୋଟିଏ ପାର୍ଶ୍ୱରେ ଭୟ ଅଛି ଏବଂ ଅନ୍ୟ ପଟେ କିଛି କରିବାର ନିଆଁ ଜଳୁଛି । ଭଲ ହୁଅନ୍ତା ଯଦି ମୁଁ ମାଆ ବାପାଙ୍କୁ ମୋ ପରିସ୍ଥିତି ଜଣାଇପାରିଥାନ୍ତି। କିନ୍ତୁ ସଂର୍ଘଷର ରାସ୍ତା ବାଛିବା ମୋ ପାଇଁ ସହଜ ନଥିଲା । ପ୍ରତ୍ୟେକ ଦିନ ଏହାକୁ ନେଇ ଚିନ୍ତା କରୁଥିଲି । ମୁଁ ୫ ବର୍ଷ ଧରି ଅପେକ୍ଷା କରିଥିଲେ ଯେ, ଗୋଟିଏ ଦିନ ଏମିତି ଆସିବ ଯେତେବେଳେ ମୁଁ ମୋର କର୍ତ୍ତବ୍ୟପଥ ଆଡକୁ ଆଗେଇବି। ଦୁନିଆର ସବୁଠାରୁ ଶକ୍ତିଶାଳୀ ବ୍ୟକ୍ତି ସିଏ ନୁହଁ ଯିଏ ଛଡ଼େଇ ନେବା ଜାଣନ୍ତି । ବରଂ ସବୁଠାରୁ ଶକ୍ତିଶାଳୀ ବ୍ୟକ୍ତି ସିଏ ହୋଇଥାଏ ଯିଏ ସୁଖ ତ୍ୟାଗ କରିବାର କ୍ଷମତା ରଖିଥାଏ ।
ସଂସଦରେ ସୁରକ୍ଷା ତ୍ରୁଟିକୁ ନେଇ ସାରା ଦେଶରେ ତୁମ୍ବି ତୋଫାନ ଲାଗି ରହିଛି। ଘଟଣାକୁ ନେଇ ସାରା ଦେଶ ସ୍ତବ୍ଧ ହୋଇଯାଇଛି। ବିଶେଷ କରି ଠିକ୍ ଡିସେମ୍ବର ୧୩ ୨୦୦୧ରେ ଘଟିଥିବା ସମାନ ଘଟଣା ପୁଣି ସମାନ ଦିନରେ ଘଟିବା ଆଉ ସେ ବି ନୂଆ ସଂସଦ ଭବନରେ ତାହା ସମସ୍ତଙ୍କୁ ତାଜୁବ କରିଛି। ଏନେଇ ଦିଲ୍ଲୀ ପୋଲିସର ସ୍ପେଶାଲ ଟିମ୍ ସଂସଦ ସୁରକ୍ଷା ତ୍ରୁଟି ଘଟଣାର ତଦନ୍ତ ଆରମ୍ଭ କରିଛି।
ଅନ୍ୟପଟେ ସଂସଦ ଷଡ଼ଯନ୍ତ୍ର ମାମଲାରେ ଆତ୍ମସମର୍ପଣ କରିଛି ମାଷ୍ଟର ମାଇଣ୍ଡ ଲଳିତ ଝା । ଦିଲ୍ଲୀ କର୍ତ୍ତବପଥ ଥାନାରେ ଆତ୍ମସମର୍ପଣ କରିଛି। ଆତ୍ମସମର୍ପଣ ପରେ ଅଭିଯୁକ୍ତ ଲଳିତକୁ ଗିରଫ କରିଛି ପୋଲିସ। ଘଟଣାରେ ପୂର୍ବରୁ ଗିରଫ ହୋଇଥିବା ୪ ଜଣଙ୍କୁ ୭ ଦିନିଆ ରିମାଣ୍ଡରେ ନେଇଛି ପୋଲିସ।
ଗାନ୍ଧୀ ପ୍ରତିମୂର୍ତ୍ତି ତଳେ ସସପେଣ୍ଡ ହୋଇଥିବା ସାଂସଦଙ୍କ ଧାରଣା
ନୂଆଦିଲ୍ଲୀ : ସଂସଦ ଭିତରେ ଓ ବାହାରେ ହଙ୍ଗାମା ପ୍ରସଙ୍ଗ। ସୁରକ୍ଷା ତ୍ରୁଟିକୁ ନେଇ ସଂସଦରେ ହୋହଲ୍ଲା କରିଥିବା ୧୪ ସାଂସଦଙ୍କୁ ସସପେଣ୍ଡ କରିବା ପ୍ରତିବାଦରେ ତାତିଛନ୍ତି ବିରୋଧୀ । ସୁରକ୍ଷା ତ୍ରୁଟି ପ୍ରସଙ୍ଗରେ ଗୃହରେ ସରକାର ବିବୃତି ରଖିବା ଦାବି ନେଇ ସାଂସଦମାନେ ହଙ୍ଗାମା କରିବାରୁ ୧୩ ଲୋକସଭା ଓ ଜଣେ ରାଜ୍ୟସଭା ସାଂସଦଙ୍କୁ ଗୃହରୁ ସସପେଣ୍ଡ କରାଯାଇଥିଲା। ସସପେଣ୍ଡ ହୋଇଥିବା ସାଂସଦଙ୍କ ମଧ୍ୟରେ ଅଛନ୍ତି କଂଗ୍ରେସର ୯, ସିପିଏମର ୨, ଡିଏମକେର ୨, ସିପିଆଇର ଜଣେ ସାଂସଦ।
ସେପଟେ ସଂସଦ ଭବନ ବାହାରେ ଗାନ୍ଧୀ ପ୍ରତିମୂର୍ତ୍ତି ତଳେ ସସପେଣ୍ଡ ହୋଇଥିବା ସାଂସଦଙ୍କ ଧାରଣାସ୍ଥଳକୁ ଯାଇ ଭେଟିଛନ୍ତି କଂଗ୍ରେସ ନେତ୍ରୀ ସୋନିଆ ଗାନ୍ଧୀ । ତେବେ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି- ବାଚସ୍ପତିଙ୍କ ନିର୍ଦ୍ଦେଶ ଅନୁସାରେ ସରକାର କାର୍ଯ୍ୟ କରୁଛନ୍ତି । ସଂସଦ ଭବନ ଭିତରେ ହଙ୍ଗାମା ଘଟଣାର ଉଚ୍ଚସ୍ତରୀୟ ତଦନ୍ତ ଜାରି ରହିଛି। ଗୃହରେ ପ୍ରବଳ ବାକ୍ ବିତଣ୍ଡା କାରଣରୁ ଲୋକସଭାକୁ ଅପରାହ୍ଣ ୨ଟା ଯାଏ ମୁଲତବୀ ଘୋଷଣା କରାଯାଇଥିଲା । ସେପଟେ ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେଙ୍କ କାର୍ଯ୍ୟାଳୟରେ ଇଣ୍ଡିଆ ମେଣ୍ଟ ନେତାମାନଙ୍କ ବୈଠକ ଅନୁଷ୍ଠିତ ହୋଇଛି ।
ଉଠା ଜଳସେଚନ ପଏଣ୍ଟକୁ ଭାଙ୍ଗି ଦୁଇଟି ପାଣି ମୋଟର ଚୋରି
ଢେଙ୍କାନାଳ: ଦୁଇଟି ପାଣି ମୋଟର ଚୋରି। ଢେଙ୍କାନାଳ ଜିଲ୍ଲା ଭୁବନ ବ୍ଲକ୍ ମଠକରଗୋଳା ଗାଁର ୧ ନମ୍ବର ମାଆ ମଙ୍ଗଳା ପାଣି ପଞ୍ଚାୟତ ଏବଂ ୩ ନମ୍ବର ଶ୍ରୀରାମ ପାଣି ପଞ୍ଚାୟତର ୨ଟି ଉଠା ଜଳସେଚନ ପଏଣ୍ଟରୁ ପାଣି ମୋଟର ଚୋରି ହୋଇଛି। ଗତକାଲି ରାତିରେ ଏହି ୨ଟି ଉଠା ଜଳସେଚନ ପଏଣ୍ଟକୁ ଭାଙ୍ଗି ମୋଟର ସହିତ ଏକ ସୋଲାର ମେସିନକୁ ମଧ୍ୟ ଦୁର୍ବୃତ୍ତ ଚୋରି କରିନେଇଛନ୍ତି । ଫଳରେ ପ୍ରାୟ ୫୦ ଏକର ଜମିରେ ଜଳସେଚନ ନେଇ ଆଶଙ୍କା ପ୍ରକାଶ ପାଇଛି।
ଗତବର୍ଷ ଏହି ସମୟରେ ୨ଟି ମୋଟର ଚୋରି ହୋଇଥିଲା। ବର୍ଷେ ନପୂରୁଣୁ ଚଳିତବର୍ଷ ସମାନ ଢଙ୍ଗରେ ଦୁର୍ବୃତ୍ତମାନେ ପାଣି ମୋଟର ଚୋରି କରିନେଇଛନ୍ତି। ତୁରନ୍ତ ୨ଟି ଯାକ ଉଠା ଜଳସେଚନ ପଏଣ୍ଟରେ ମୋଟର ଲଗାଇ ଚାଷଜମିରେ ପାଣି ମଡ଼ାଇବା ବ୍ୟବସ୍ଥା କରିବାକୁ ଚାଷୀମାନେ ଅନୁରୋଧ କରିଛନ୍ତି।
ଇଟାଭାଟିରେ ଶ୍ବାସରୁଦ୍ଧ ହୋଇ ୨ ଶ୍ରମିକ ମୃତ
ଢେଙ୍କାନାଳ: ଇଟାଭାଟିରେ ଶ୍ବାସରୁଦ୍ଧ ହୋଇ ଦୁଇ ଶ୍ରମିକ ମୃତ, ଜଣେ ଗୁରୁତର। ଢେଙ୍କାନାଳ ଜିଲ୍ଲା କମାଳଙ୍ଗରେ ଏହି ଅଘଟଣ ଘଟିଛି। ଇଟାଭାଟିରେ ଶ୍ବାସରୁଦ୍ଧ ହୋଇ ଦୁଇ ଶ୍ରମିକ ପ୍ରାଣ ହରାଇଥିବା ବେଳେ ଜଣେ ଗୁରୁତର ହୋଇପଡ଼ିଛନ୍ତି।
ସୂଚନା ଅନୁୟାୟୀ, ଶ୍ରମିକମାନେ ଶୋଇଥିବା ବେଳେ ଏହି ଅଘଟଣ ଘଟିଛି । ଜେନେରେଟର ଧୂଆଁରେ ଶ୍ୱାସରୁଦ୍ଧ ହୋଇ ଦୁଇ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇଥିବା ସୂଚନା ମିଳିଛି । ଗୁରୁତରଙ୍କୁ ପ୍ରଥମେ ଅନୁଗୁଳ ମେଡିକାଲରେ ଭର୍ତ୍ତି କରାଯାଇଥିଲା । ପରେ କଟକ ସ୍ଥାନାନ୍ତର କରଯାଇଛି । ସମସ୍ତ ଶ୍ରମିକ ଅନୁଗୁଳ ଜିଲ୍ଲାର ବୋଲି ଜଣାପଡିଛି ।
ସାଇବର ଲୁଟେରାଙ୍କ ଜାଲରେ IPS ଅଧିକାରୀ
ଭୁବନେଶ୍ୱର : ବରିଷ୍ଠ ଆଇପିଏସ ଅଫିସରଙ୍କୁ ବି ଛାଡ଼ିଲେନି ସାଇବର ଲୁଟେରା। ଅବକାରୀ କମିଶନରଙ୍କ ନାଁରେ ଫେକ୍ ଫେସବୁକ୍ ଆଇଡି ଖୋଲି ଲୁଟୁଛନ୍ତି ଟଙ୍କା । ଅବକାରୀ କମିଶନର ତଥା ବରିଷ୍ଠ ଆଇପିଏସ ଅଧିକାରୀ ନରସିଂହ ଭୋଳଙ୍କ ନାଁରେ ଫେକ୍ ଫେସବୁକ୍ ଆଇଡି ଖୋଲାଯାଇଛି । ଫେକ୍ ଫେସବୁକ୍ ଆଇଡି ଜରିଆରେ ୧ ଲକ୍ଷ ୩୫ ହାଜର ଟଙ୍କା ଲୁଟି ସାରିଲେଣି ସାଇବର ଲୁଟେରା। ନରସିଂହ ଭୋଳଙ୍କ ଫେସବୁକ୍ ସାଙ୍ଗଙ୍କଠାରୁ ସାଇବର ଲୁଟେରା ଏଭଳି ଲୁଟୁଛନ୍ତି । ଏନେଇ ଫେସବୁକରେ ସୂଚନା ଦେଇଛନ୍ତି ନିଜେ ନରସିଂହ ଭୋଳ । ସତର୍କ ରହିବାକୁ ପରାମର୍ଶ ଦେଇଛନ୍ତି ।
ଜୋରଦାର ହେଲା ମାଓ ନିପାତ ଅଭିଯାନ, ମାଓବାଦୀଙ୍କ ବିରୋଧରେ ବଡ଼ ଅପରେସନ
ବୌଦ୍ଧ: ବୌଦ୍ଧରେ ଜୋରଦାର ହେଲା ମାଓ ନିପାତ ଅଭିଯାନ । ମାଓବାଦୀଙ୍କ ବିରୋଧରେ ବଡ଼ ଅପରେସନ। ଜଙ୍ଗଲରେ ଲାଲବାହିନୀକୁ ଘେରିବାକୁ ସ୍ପେଶାଲ ପ୍ଲାନ। ଗତକାଲି ମନମୁଣ୍ଡା ଥାନା ପେନାଜୋର ଜଙ୍ଗଲରେ ମାଓବାଦୀ ଓ SOG ଯବାନଙ୍କ ମଧ୍ୟରେ ଗୁଳିବିନିମୟ ହୋଇଥିଲା । ଆଜି ବୌଦ୍ଧ ଓ କନ୍ଧମାଳ ଉଭୟ ପଟୁ କୁମ୍ବିଂ ଅପରେସନ ଜାରି ରହିଛି। କନ୍ଧମାଳପଟୁ ୭ଟି ଓ ବୌଦ୍ଧପଟୁ ୫ଟି ଟିମ୍ ଅପରେସନରେ ସାମିଲ ହୋଇଛନ୍ତି । ଜଙ୍ଗଲରୁ ବିପୁଳ ପରିମାଣର ମାଓ ସାମଗ୍ରୀ ଜବତ ହୋଇଥିବା ବୌଦ୍ଧ ଏସପି ସୂଚନା ଦେଇଛନ୍ତି। ଗତକାଲି ଶଗଡା ଅଞ୍ଚଳର ନଳୀକୁପା ଗାଁ ପାଖ ପେନାଜୋର ଜଙ୍ଗଲରେ ମାଓବାଦୀ ଓ SOG ଯବାନଙ୍କ ମଧ୍ୟରେ ୨ଘଣ୍ଟାରୁ ଅଧିକ ସମୟ ଧରି ଗୁଳିବିନିମୟ ହୋଇଥିଲା । ଏଥିରେ ସୁରକ୍ଷା ବାହିନୀର କୌଣସି ଯବାନଙ୍କ ମୃତ୍ୟୁ ହୋଇନଥିବା ଏସପି ସୂଚନା ଦେଇଛନ୍ତି। ବୌଦ୍ଧ-କନ୍ଧମାଳ ସୀମାନ୍ତ ନଳୀକୁପା, ବଲମତୁମ୍ବା, ଅଡ଼ସିଂ ଓ କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକର ମାଲାକିରା, ଗଙ୍ଗରମା ଓ କୁମ୍ଭାରୁଆ ଆଦି ଅଞ୍ଚଳରେ ମାଓ ଗତିବିଧି ରହିଥିବା ସୂଚନା ମିଳିଛି। କିଛିଦିନ ପୂର୍ବରୁ ଶଗଡ଼ା ଫାଣ୍ଡି ତିଲପଙ୍ଗା ଅଂଚଳରେ ମାଓ ପୋଷ୍ଟର ମଧ୍ୟ ଲାଗିଥିଲା।
ସେହିପରି ଗତ ମାସ ୧୯ ତାରିଖରେ ମନମୁଣ୍ଡା ଥାନା ଶଗଡ଼ା ଫାଣ୍ଡି ରାବଣେଶ୍ବର ଜଙ୍ଗଲରେ ୩୫ରୁ ୪୦ ଜଣ ମାଓବାଦୀ ବୁଲୁଥିବା ସୂଚନା ମିଳିଥିଲା। ବୌଦ୍ଧ ଡିଭିଏଫ ଓ ଏସଓଜି ଯବାନ କୁମ୍ବିଂ ଅପରେସନ କରିବା ବେଳେ ମାଓବାଦୀ ମାନେ ବୋମା ପକାଇଥିଲେ। ପରେ ଉଭୟ ପଟୁ ଗୁଳି ବିନିମୟ ହୋଇଥିଲା । ଶେଷରେ ମାଓବାଦୀ ମାନେ ଛତ୍ରଭଙ୍ଗ ଦେବା ସହ ସୁରକ୍ଷା ବାହିନୀ ବିପୁଳ ପରିମାଣର ମାଓ ସାମଗ୍ରୀ ଜବତ କରଥିଲା ।
ସଂସଦରେ ସୁରକ୍ଷା ତ୍ରୁଟି ମାମଲାରେ ୨ ଅଟକ, ଦିଲ୍ଲୀ ପୋଲିସର ସ୍ୱତନ୍ତ୍ର ସେଲ ଦ୍ୱାରା ଅଟକ
ନୂଆଦିଲ୍ଲୀ : ସଂସଦ ସୁରକ୍ଷାରେ ତ୍ରୁଟି ମାମଲା । ଦୁଇ ସନ୍ଦିଗ୍ଧଙ୍କୁ ଅଟକ ରଖିଲା ଦିଲ୍ଲୀ ପୋଲିସ। ଦିଲ୍ଲୀ ପୋଲିସର ସ୍ବତନ୍ତ୍ର ସେଲରେ ଦୁଇ ସନ୍ଦିଗ୍ଧଙ୍କୁ ଅଟକ ରଖି ପଚରାଉଚରା କରାଯାଉଛି। ଅଟକ ବ୍ୟକ୍ତି ହେଲେ ମହେଶ ଓ କୈଳାଶ। ଗିରଫ ଅଭିଯୁକ୍ତଙ୍କ ସହ ଏହି ଦୁଇ ସନ୍ଦିଗ୍ଧଙ୍କ ଲିଙ୍କ୍ ଥିବା ସନ୍ଦେହ କରାଯାଉଛି। ଅଭିଯୁକ୍ତମାନଙ୍କୁ ନେଇ ସିନ ରିକ୍ରିଏଟ କରିପାରେ ପୋଲିସ ।
ଗତକାଲି ରାତିରେ ମାଷ୍ଟରମାଇଣ୍ଡ ଲଳିତ ଝା ଦିଲ୍ଲୀର କର୍ତ୍ତବପଥ ଥାନାରେ ଆତ୍ମସମର୍ପଣ କରିଥିଲା । ଆତ୍ମସମର୍ପଣ ପରେ ଲଳିତକୁ ଗିରଫ କରିଥିଲା ପୋଲିସ । ପୂର୍ବରୁ ଗିରଫ ହୋଇଥିବା ୪ ଜଣଙ୍କୁ ୭ ଦିନିଆ ରିମାଣ୍ଡରେ ନେଇଛି ପୋଲିସ । ଅଭିଯୁକ୍ତଙ୍କୁ ଆତଙ୍କବାଦୀ ନିରୋଧୀ ଆଇନ, ୟୁଏପିଏ ଅଧୀନରେ ଗିରଫ କରାଯାଇଛି । ଅପରାଧିକ ଷଡ଼ଯନ୍ତ୍ର ପରି ସଂଗୀନ ଦଫା ମଧ୍ୟ ଲାଗିଛି । ମାଷ୍ଟରମାଇଣ୍ଡ କୁହାଯାଉଥିବା ଲଳିତ ଝା ହିଁ ଅନ୍ୟ ସମସ୍ତ ଅଭିଯୁକ୍ତଙ୍କୁ ଡାକିଥିଲା । ବୁଧବାର ହୋଇଥିବା ଏହି ସ୍କୋକ୍ ଗନ୍ ଆକ୍ରମଣ ଘଟଣାର ଭିଡିଓ ସୁଟ୍ କରି ସୋସିଆଲ ମିଡିଆରେ ଅପଲୋଡ୍ କରିଥିଲା ଲଳିତ। ୪ ଅଭିଯୁକ୍ତ ମାଷ୍ଟରମାଇଣ୍ଡ ଲଳିତ ସମ୍ପର୍କରେ ଥିଲେ। ସଂସଦ ଭିତରେ ପଶିବା ପୁର୍ବରୁ ସମସ୍ତଙ୍କ ଫୋନ ନେଇ ଯାଇଥିଲା ଲଳିତ। ସେଠାରୁ ସମସ୍ତ ଫୋନ ଧରି ଫେରାର ହୋଇଯାଇଥିଲା ।
ବଲିଉଡର ପ୍ରସିଦ୍ଧ ଗାୟକ ସୋନୁ ନିଗମ କାହିଁକି ପାକିସ୍ତାନୀ ଗାୟକକୁ କ୍ଷମା ମାଗିଲେ
ବ୍ୟୁରୋ ରିପୋର୍ଟ : ବଲିଉଡର ଫେମସ ସିଙ୍ଗର୍ ସୋନୁ ନିଗମ। ସୁମଧୁର ଗୀତ ଗାଇ ଦଶନ୍ଧି ଦଶନ୍ଧି ଧରି ଦର୍ଶକୁମାନଙ୍କୁ ବାନ୍ଧି ରଖିଛନ୍ତି । ବର୍ତ୍ତମାନ ତାଙ୍କୁ ନେଇ ଚର୍ଚ୍ଚା ଜୋର ଧରିଛି । ସୋସିଆଲ ମିଡିଆରେ ପାକିସ୍ତାନୀ ଗାୟକକୁ କ୍ଷମା ମାଗିଛନ୍ତି ପ୍ରସିଦ୍ଧ ଗାୟକ ସୋନୁ। ତେବେ କାହିଁକି କ୍ଷମା ମାଗିଛନ୍ତି ଚାଲନ୍ତୁ ଜାଣିବା । 
ନିକଟରେ ସୋନୁଙ୍କ ବିରୋଧରେ ପାକିସ୍ତାନୀ ଗାୟକ ଓମାର ନାଦିମ ଏକ ବଡ ଅଭିଯୋଗ କରିଛନ୍ତି। ଯାହାକୁ ନେଇ କିଛି ଦିନ ହେବ ଚର୍ଚ୍ଚା ଜୋର ଧରିଛି। ଓମାର କହିଛନ୍ତି ଯେ, ସୋନୁ ନିଗମ ତାଙ୍କ ଗୀତକୁ କପି କରିଛନ୍ତି। ବାସ୍ତବରେ, ଏହି ବିଷୟଟି ନିକଟରେ ରିଲିଜ୍ ହୋଇଥିବା ଗୀତ ‘ଶୁନ୍ ଜରା’ ସହିତ ଜଡିତ। ଡିସେମ୍ବର ୨ ରେ ଟି-ସିରିଜ୍ ୟୁଟ୍ୟୁବ୍ ଚ୍ୟାନେଲରେ ରିଲିଜ୍ ହୋଇଛି ‘ଶୁନ୍ ଜରା’ ଗୀତ। ଏହି ଗୀତଟିକୁ SRK ଲେଖିଥିବା ବେଳେ ସୋନୁ ନିଗମ ଏହାକୁ ଗାଇଥିଲେ। ଅଭିଯୋଗ ପରେ ସୋନୁ ନିଗମ ବର୍ତ୍ତମାନ ଓମାରଙ୍କୁ କ୍ଷମା ମାଗିଛନ୍ତି ।
ଓମାର ନାଦିମ ଇନଷ୍ଟାଗ୍ରାମରେ ଏକ ପୋଷ୍ଟ କରି କହିଛନ୍ତି ଯେ, ‘ଶୁନ୍ ଜରା’ ଗୀତଟି ତାଙ୍କର ୨୦୦୯ରେ ରିଜିଜ ହୋଇଥିବା ଗୀତ ‘ଏ ଖୁଦା’ରୁ କପି କରାଯାଇଛି। ତାଙ୍କର ଅଭିଯୋଗ ଥିଲା ଯେ, ତାଙ୍କ ଗୀତକୁ କପି କରାଯାଇଛି ହେଲେ ଏଥିପାଇଁ ତାଙ୍କୁ କ୍ରେଡିଟ ଦିଆଯାଇ ନାହିଁ। ଏହାସହ ସୋନୁଙ୍କର ବଡ ଫ୍ୟାନ ବୋଲି ଓମାର କହିଥିଲେ।
ଓମାରଙ୍କ ପୋଷ୍ଟରେ ମନ୍ତବ୍ୟ ଦେଇ ସୋନୁ ନିଗମ କହିଛନ୍ତି ଯେ, ଏହି ଗୀତଟିକୁ KRK ଲେଖିଛନ୍ତି। ସେ ଜଣେ ମୋର ଭଲ ବନ୍ଧୁ ଅଟନ୍ତି। ସେ ମୋତେ ଅନୁରୋଧ କରିବାରୁ ମୁଁ ଏହି ଗୀତଟିକୁ ଗାଇଥିଲି। ଆଗରୁ ସେ କେବେ ଓମାରଙ୍କ ଏହି ଗୀତ ଶୁଣି ନଥିଲେ। ଯଦି ଶୁଣିଥାନ୍ତେ ତେବେ କେବେ ହେଲେ ଗୀତଟିକୁ ଗାଇନଥାନ୍ତେ ବୋଲି ସୋନୁ କହିଛନ୍ତି। ମୁଁ ଦୁଃଖିତ ତମ ଗୀତ ଶୁଣିନଥିଲି। ଏବେ ଶୁଣିଲି ମୋ ଅପେକ୍ଷା ତମେ ଭଲ ଗାଇଛ ବୋଲି ସୋନୁ ଓମାରଙ୍କୁ କହିଛନ୍ତି ।
ସୋନୁ ନିଗମଙ୍କ କଥା ଉପରେ ଓମେର ମଧ୍ୟ ପ୍ରତିକ୍ରିୟା କଖିଛନ୍ତି। ସେ କହିଥିଲେ, “ଯଦି ଆପଣ ଏହା କହୁଛନ୍ତି ତେବେ ଏହା ମୋ ପାଇଁ ଏକ ବଡ଼ କଥା। ତେବେ ସୋନୁଙ୍କ ଏହି ପୋଷ୍ଟକୁ ସ୍କ୍ରିନସଟ ନେଇ ଓମେର ଇନଷ୍ଟାଗ୍ରାମରେ ସେୟାର କରିଛନ୍ତି ।
ବୋରୱେଲରୁ ଉଦ୍ଧାର ଶିଶୁ କନ୍ୟାର ଫୁଲୁଛି ପେଟ, ଭିମସାରର SNCUରେ ଚିକିତ୍ସା ଜାରି ରହିଛି
ସମ୍ୱଲପୁର: ବୋରଓ୍ବେଲରୁ ଶିଶୁକନ୍ୟା ଉଦ୍ଧାର ଘଟଣା। ବୁର୍ଲା ଭିମସାରର SNCUରେ ଶିଶୁକନ୍ୟାର ଚିକିତ୍ସା ଜାରି ରହିଛି। ଶିଶୁର ସ୍ବାସ୍ଥ୍ୟବସ୍ଥା ଏବେ ସ୍ଥିର ରହିଛି। ଆଭ୍ୟନ୍ତରୀଣ ରକ୍ତସ୍ରାବ ଯୋଗୁଁ ତାର ପେଟ ଫୁଲୁଥିବା ଜଣାପଡ଼ିଛି । ଅଲଟ୍ରାସାଉଣ୍ଡ ରିପୋର୍ଟରେ ଇଣ୍ଟରନାଲ ବ୍ଲିଡିଂ ହେଉଥିବା ସୂଚନା ମିଳିଛି। ଶିଶୁକୁ ହାଇପୋଥର୍ମିଆ ହୋଇଥାଇପାରେ ବୋଲି ସନ୍ଦେହ କରୁଛି ଡାକ୍ତରୀ ଟିମ୍। ଏଥିପାଇଁ ତାକୁ ଅବଜରଭେସନରେ ରଖାଯାଇଛି । ୫ ଜଣିଆ ଡାକ୍ତରୀ ଟିମ୍ ଶିଶୁକନ୍ୟାର ସ୍ବାସ୍ଥ୍ୟବସ୍ଥା ଉପରେ ନଜର ରଖିଛନ୍ତି। ଅନଃନଳୀରେ ରକ୍ତସ୍ରାବ ହେଉଥିବାରୁ ଶିଶୁ ଭବନ ସହ ଯୋଗାଯୋଗ ରଖାଯାଇଛି। ସ୍ଥିତି ଦେଖି କଟକ ସ୍ଥାନାନ୍ତର ନିଷ୍ପତ୍ତି ନିଆଯିବ ବୋଲି ବୁର୍ଲା ଭୀମସାର ମେଡିକାଲ ସୁପରିନଟେଣ୍ଡେଣ୍ଟ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ଶିଶୁଟିକୁ ଉଦ୍ଧାର କରାଯିବା ପରେ ପୋଲିସ ପକ୍ଷରୁ ଆରମ୍ଭ ହୋଇଛି ତଦନ୍ତ। ବର୍ତ୍ତମାନ ପର୍ଯ୍ୟନ୍ତ ଅଭିଯୁକ୍ତକର କୌଣସି ପତ୍ତା ମିଳିପାରିନିହିଁ । ଶିଶୁ କନ୍ୟାକୁ ହତ୍ୟା ଉଦ୍ୟମ କରିଥିବା ଅଜଣା ଅଭିଯୁକ୍ତ ବିରୋଧରେ ରେଙ୍ଗାଲି ଥାନାରେ ନିଜ ଆଡୁ ମାମଲା ରୁଜୁ କରି ତଦନ୍ତ ଜାରି ରହିଛି।