ନନ୍ଦିଘୋଷ ବ୍ୟୁରୋ: ଚଳିତ ୨୦୨୩ ବିଶ୍ୱକପରେ ଲଗାତାର ୧୦ଟି ମ୍ୟାଚ୍ ଜିତି ରୋହିତ ସେନା ଫାଇନାଲରେ ପହଞ୍ଚିଥିଲା । କିନ୍ତୁ ଅଷ୍ଟ୍ରେଲିଆଠାରୁ ହାରିବାର କଷ୍ଟ ଆଉ ଯନ୍ତ୍ରଣା ହୁଏତ ବର୍ଷ ବର୍ଷ ଧରି ସେମିତି ରହିବ । କ୍ରିକେଟ ମଇଦାନରେ ଗୋଟିଏ ପଟେ ବିପକ୍ଷ ଦଳ ଖୁସିର ଉତ୍ସବ ପାଳନ କରୁଥିବାବେଳେ ଭାରତୀୟ ଖେଳାଳୀଙ୍କ ଭାବବିହ୍ୱଳ ହେବାର ଦୃଶ୍ୟ କିଏ ବା ଭୁଲିପାରିବ? କିନ୍ତୁ ନିଶ୍ଚିତ ଭାବରେ ପ୍ରତ୍ୟେକଙ୍କ ମନରେ ଗୋଟିଏ ପ୍ରଶ୍ନ ଆସୁଥିବ ଯେ ଯେତେବେଳେ ଆମେ ଦର୍ଶକ ହୋଇ ହାରିବାକୁ ଗ୍ରହଣ କରିପାରିନାହୁଁ ସେତେବେଳେ କେମିତି ଥିବ ଭାରତୀୟ ଖେଳାଳିଙ୍କ ସ୍ଥିତି ? କ’ଣ ସବୁ ଆଲୋଚନା ହେଉଥିବ । ହାରିବା ପରେ କେମିତି ଥିବ ଡ୍ରେସିଂ ରୁମର ଦୃଶ୍ୟ ?
ସବୁ ଥର ଭଳି ଏଥର କିନ୍ତୁ ଡ୍ରେସିଂ ରୁମରେ ସେ କ୍ରେଜ୍ ନଥିଲା । ପୂରା ଅନ୍ଧାର ଛାଇ ଯାଇଥିଲା । କିଛି ଚେହେରା ମିସିଂ ଥିଲା । ପ୍ରତି ଥର ଭଳି ଚଳିତ ଥର ଡ୍ରେସିଂ ରୁମରେ ଫିଲ୍ଡିଂ ପାଇଁ ମେଡାଲ ସେରମନି ହେବାର ଥିଲା । କିନ୍ତୁ କୌଣସି ଚେହେରାରେ ହସ ନଥିଲା । ଭଙ୍ଗା ହୃଦୟ ଆଉ ଉଦାସ ଚେହେରାରେ ସମସ୍ତେ ମନମାରି ବସିଥିବାବେଳେ ହଠାତ୍ ଏକ ସାନ୍ତ୍ୱନାର ସ୍ୱର ଶୁଣା ଯାଇଥିଲା । କେହି ଜଣେ ହଠାତ୍ ମନୋବଳ ବଢ଼ାଇବାକୁ ଚେଷ୍ଟା କଲେ ।
ଏହି କଣ୍ଠ ସ୍ୱର ଥିଲା ଫିଲ୍ଡିଂ କୋଚ୍ ଦିଲ୍ଲୀପଙ୍କର । ବିରାଟ କୋହଲି,ଶୁଭମନ ଗିଲ, ଶ୍ରେୟସ ଅୟର, ରବିନ୍ଦ୍ର ଜାଡେଜା, ମୋହମ୍ମଦ ସମି, ମୋହମ୍ମଦ ସିରାଜ ସମସ୍ତେ ଉଦାସ ଥିଲେ । କିନ୍ତୁ ଫିଲ୍ଡିଂ କୋଚ୍ ଟି ଦିଲ୍ଲୀପ ମନୋବଳ ଭାଙ୍ଗି ନଥିଲେ କି ଅନ୍ୟର ସାଥ୍ ମଧ୍ୟ ଛାଡ଼ିନଥିଲେ । ମାହୋଲକୁ ଠିକ୍ କରିବାକୁ ଖୁବ୍ ଚେଷ୍ଟା କରିଥିଲେ । ମ୍ୟାନ୍ ଇନ୍ ବ୍ଲୁର ମନୋବଳ ବଢ଼ାଇଥିଲେ । ସେ କହିଲେଯେ ମୁଁ ଜାଣିଛି ଏହା ଆମ ସମସ୍ତଙ୍କୁ ଖୁବ୍ କଷ୍ଟ ଦେଇଛି । କିନ୍ତୁ ଆମର ସବୁ ଚେଷ୍ଟା ପରେ ମଧ୍ୟ ପରିଣାମ ଆମ ପକ୍ଷରେ ନଥିଲା । ରାହୁଲ ଦ୍ରାବିଡଙ୍କ ବାର୍ତ୍ତା ମଧ୍ୟ ସେ ଦେଲେ । ଯେଉଁଥିରେ ରାହୁଲ କହିଥିଲେ ଆମେ ସମସ୍ତେ ନିଜକୁ ନେଇ ଗର୍ବ ଅନୁଭବ କରିପାରିବା । ମୁଁ ପ୍ରତ୍ୟେକ ଖେଳାଳିଙ୍କୁ ପ୍ରଶଂସା କରୁଛି । ଏହା ସହିତ ଅଭ୍ୟାସ ଶେସନ ସମୟରେ ଖେଳାଳୀଙ୍କ ଲକ୍ଷ୍ୟ ଏବଂ ଜୋଶକୁ ପ୍ରଶଂସା କଲେ ଟି ଦିଲ୍ଲୀପ । ତେବେ ପୂରା ମ୍ୟାଚରେ ଥିବା ଭାଇଚାରା ମୋତେ ବେଶ୍ ପସନ୍ଦ ଆସିଲା । ମଇଦାନରେ ସମସ୍ତେ ଗୋଟିଏ ଟିମ୍ ହୋଇ ଆଗକୁ ବଢ଼ିଥିଲେ ଏବଂ ପ୍ରତ୍ୟେକ ପରସ୍ପରର ସାଥ୍ ଦେଉଥିଲେ ବୋଲି ସେ କହିଛନ୍ତି ।
ଟି. ଦିଲ୍ଲୀପ ବିରାଟ କୋହଲିଙ୍କୁ ଟିମ୍ ଇଣ୍ଡିଆର ପ୍ଲେୟାର ଅଫ୍ ଦ ମ୍ୟାଚ୍ ଘୋଷଣା କଲେ । ଏହାପରେ ରବିନ୍ଦ୍ର ଜାଡେଜା କୋହଲିଙ୍କୁ ମେଡାଲ ପିନ୍ଧାଇଲେ । ଏହା ସହିତ ବିରାଟ ଜଣେ ଚମତ୍କାର ଖେଳାଳି ଏବଂ ମଇଦାନରେ ପାଦ ଦେବାମାତ୍ରେ ଚମତ୍କାର କରନ୍ତି ବୋଲି ଟି ଦିଲ୍ଲୀପ କହିଛନ୍ତି ।
