ପୁରୀ: ପରିକ୍ରମା ପ୍ରକଳ୍ପ ଲୋକାର୍ପଣ ପାଇଁ ଚାଲିଛି ନିମନ୍ତ୍ରଣ ଯାତ୍ରା । ବିଭିନ୍ନ ଦେବାଦେବୀ ପୀଠକୁ କରାଯାଉଛି ନିମନ୍ତ୍ରଣ । ଏହି କ୍ରମରେ ଗୁଜରାଟର ସୋମନାଥ ମନ୍ଦିରରେ ପହଞ୍ଚି ନିମନ୍ତ୍ରଣ ପତ୍ର ବଣ୍ଟନ କରିଛନ୍ତି ସ୍ବତନ୍ତ୍ର ପ୍ରତିନିଧି ଦଳ । ପୁରୀରୁ ଯାଇଥିବା ଏହି ଟିମକୁ ଭବ୍ୟ ସ୍ବାଗତ କରାଯାଇଥିଲା । ସେହିପରି ମହାରାଷ୍ଟ୍ର ନାସିକରେ ଥିବା ତ୍ରୟମ୍ବକେଶ୍ବର ଶିବ ମନ୍ଦିରରେ ମଧ୍ୟ ନିମନ୍ତ୍ରଣ ପଣ୍ଟ ବଣ୍ଟ କରାଯାଇଛି । ପରିକ୍ରମା ପ୍ରକଳ୍ପ ଲୋକାର୍ପଣ ଉତ୍ସବରେ ସାମିଲ ହେବାକୁ ନିମନ୍ତ୍ରଣ କରିଛନ୍ତି ପ୍ରତିନିଧି ଦଳ । ସେହିପରି ବୋଧଗୟାର ବିଷ୍ଣୁପଦ ମନ୍ଦିର, ଗୟାଧାମ, ନବିମୁମ୍ବାଇର ଜଗନ୍ନାଥ ମନ୍ଦିରକୁ ମଧ୍ୟ ନିମନ୍ତ୍ରଣ କରାଯାଇଛି ।
ଅନ୍ୟପଟେ ଜମ୍ମୁର ପ୍ରସିଦ୍ଧ ବୈଷ୍ଣୋଦେବୀ ମନ୍ଦିରରେ ପହଞ୍ଚି ପରିକ୍ରମା ପ୍ରକଳ୍ପର ଲୋକାର୍ପଣ ଉତ୍ସବରେ ସାମିଲ ହେବାକୁ ନିମନ୍ତ୍ରଣ ପତ୍ର ବଣ୍ଟନ କରାଯାଇଛି । ପୁରୀରୁ ଯାଇଥିବା ସ୍ବତନ୍ତ୍ର ପ୍ରତିନିଧି ଦଳ ବୈଷ୍ଣୋଦେବୀ ମନ୍ଦିରର ସିଇଓଙ୍କୁ ପରିକ୍ରମା ନିମନ୍ତ୍ରଣ ପତ୍ର ବଣ୍ଟନ କରିଛନ୍ତି । ଲୋକାର୍ପଣ ଉତ୍ସବରେ ସାମିଲ ହେବାକୁ ସେବାୟତଙ୍କ ସହ ମନ୍ଦିର ପ୍ରଶାସନଙ୍କୁ ନିମନ୍ତ୍ରଣ କରାଯାଇଛି । ପୁରୀରୁ ଯାଇଥିବା ଟିମଙ୍କୁ ଭବ୍ୟ ସ୍ବାଗତ କରାଯାଇଥିଲା । ଏହାସହ ଓଡ଼ିଶା ସରକାର ଓ ଶ୍ରୀମନ୍ଦିର ପରିଚାଳନା କମିଟିର ଏଭଳି ଭବ୍ୟ ନିମନ୍ତ୍ରଣ ପାଇଁ ଧନ୍ୟବାଦ ଜଣାଇଥିଲେ ବୈଷ୍ଣୋଦେବୀ ମନ୍ଦିର କର୍ତ୍ତୃପକ୍ଷ ।
ଆସନ୍ତା ୧୭ ତାରିଖରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ଉତ୍ସବ । ଏଥିପାଇଁ ବରଗଡ଼ରେ ପହଞ୍ଚିଛି ପରିକ୍ରମା ନିମନ୍ତ୍ରଣ । ପ୍ରଭୁ ନୃସିଂହନାଥଙ୍କୁ ନିମନ୍ତ୍ରଣ କରିଛନ୍ତି ସ୍ବତନ୍ତ୍ର ଦଳ । ବରଗଡ଼ ଜିଲ୍ଲାର ଧାରୋଲଠାରେ ସେବାୟତ ଓ ପ୍ରଶାସନିକ ଅଧିକାରୀଙ୍କୁ ଭବ୍ୟ ସ୍ବାଗତ କରାଯାଇଥିଲା । କୀର୍ତ୍ତନ ମଣ୍ଡଳୀ ଶୋଭାଯାତ୍ରା ମାଧ୍ଯମରେ ସମସ୍ତଙ୍କୁ ପାଛୋଟି ନେଇଥିଲେ । ପରେ ନୃସିଂହନାଥ ମନ୍ଦିରରେ ନିମନ୍ତ୍ରଣ ପତ୍ର ପ୍ରଦାନ କରାଯାଇଥିଲା । ଏହି ସମୟରେ ଏକ ଅନନ୍ୟ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିଲା ।
ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉତ୍ସବରେ ଯୋଗ ଦେବା ପାଇଁ ଶ୍ରୀମନ୍ଦିରରୁ ଆସିଥିବା ସେବାୟତମାନଙ୍କୁ କେନ୍ଦୁଝରରେ ଭବ୍ୟ ସ୍ଵାଗତ କରାଯାଇଛି । କେନ୍ଦୁଝରର ଆରାଧ୍ୟ ଦେବତା ପ୍ରଭୁ ଶ୍ରୀବଳଦେବଜିଉଙ୍କ ମନ୍ଦିର ସମ୍ମୁଖରେ ସୁଦୃଶ୍ୟ ରଙ୍ଗୋଲି ପକାଇ ବଡଦାଣ୍ଡରେ ନୃତ୍ୟଗୀତ ମାଧ୍ୟମରେ ସେମାନଙ୍କୁ ସ୍ଵାଗତ କରିଥିଲେ ସ୍ଥାନୀୟ ବାସିନ୍ଦା ଓ ଜିଲ୍ଲା ପ୍ରଶାସନ । ଘଣ୍ଟଘଣ୍ଟା, ମୃଦଙ୍ଗ ଓ ଝାଞ୍ଜର ତାଳେ ତାଳେ ବଳଦେବଜୀଉ ମନ୍ଦିର ପରିସରକୁ ପାଛୋଟି ନେଇଥିଲେ ପୂଜକ । ପ୍ରଭୁ ଶ୍ରୀ ବଳଦେବ ଜିଉଙ୍କର ମୁଖ୍ୟ ପୂଜକଙ୍କୁ ଆସନ୍ତା ଜାନୁଆରୀ ମାସରେ ହେବାକୁ ଥିବା ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟକ୍ରମରେ ଯୋଗଦେବାକୁ ପୁରୀ ସେବାୟତମାନେ ନିମନ୍ତ୍ରଣ ଜଣାଇଥିଲେ । ଏଥିସହ , ସେମାନେ ଘଟଗାଁ ମା ତାରିଣୀଙ୍କ ମୁଖ୍ୟ ପୂଜକଙ୍କୁ ମଧ ଏହି କାର୍ଯ୍ୟକ୍ରମରେ ଯୋଗ ଦେବାକୁ ନିମନ୍ତ୍ରଣ କରିଛନ୍ତି ।
