ଭୁବନେଶ୍ବର: ବରମୁଣ୍ଡା ବିଲ୍ଡର ଅଫିସରେ ସ୍ତ୍ରୀ ଉପରେ ସ୍ବାମୀର ଛୁରା ମାଡ଼ ଘଟଣାରେ କାର୍ଯ୍ୟାନୁଷ୍ଠାନ । ଗିରଫ ହେଲେ ସ୍ବାମୀ ସପନ କୁମାର । ସୋମବାର ସ୍ତ୍ରୀଙ୍କୁ ଛୁରୀରେ ଆକ୍ରମଣ କରି ଲହୁଲୁହାଣ କରିଥିଲା ଅଭିଯୁକ୍ତ । ସାର୍ଟ ଭିତରେ ଲୁଚାଇ ଧାରୁଆ ଛୁରୀ ଆଣିଥିଲା ଅଭିଯୁକ୍ତ । ସିସିଟିଭିରେ କଏଦ ହୋଇଥିଲା ଘଟଣା ବେଳର ଚିତ୍ର । ସେପଟେ ପଚରା ଉଚରା ପରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଭରତପୁର ପୋଲିସ ହାତରେ ଲାଗିଛି । ସପନର ଘର ବାଲେଶ୍ବର ଜିଲ୍ଲା ସୋର ଅଞ୍ଚଳରେ । ୫ ବର୍ଷ ତଳେ ସେ ମଧୁସ୍ମିତା ଦାସଙ୍କୁ ବିବାହ କରିଥିଲେ । ବିବାହ ପରେ ତୃତୀୟ ପୁରୁଷ ବା ପରକୀୟା ପ୍ରୀତିକୁ ନେଇ ସ୍ତ୍ରୀ ମଧୁସ୍ମିତାଙ୍କୁ ସନ୍ଦେହ କରୁଥିଲେ ସପନ । ଯାହାକୁ ନେଇ ପରିବାର ଭିତରେ ବାଦ ବିବାଦ ଲାଗି ରହିଥିଲା । ଦୁହିଁଙ୍କର ୨ ବର୍ଷର ଶିଶୁଟିଏ ରହିଛି । କିନ୍ତୁ ପାରିବାରିକ କନ୍ଦଳକୁ କେନ୍ଦ୍ର କରି ସ୍ତ୍ରୀ ମଧୁସ୍ମିତା, ସପନଙ୍କ ବିରୋଧରେ ସୋର ଥାନାରେ ଯୌନ ନିର୍ଯାତନା ଅଭିଯୋଗ ଆଣିଥିଲେ । ଯେଉଁ ମାମଲା ବର୍ତ୍ତମାନ ସୁଧା ତଦନ୍ତ ପରିସରଭୁକ୍ତ ହୋଇ ରହିଛି । ଦୁହେଁ ଭୁବନେଶ୍ବରରେ ଅଲଗା ଅଲଗା ରହୁଥିଲେ । ଗତକାଲି ମଧୁସ୍ମିତା କାମ କରୁଥିବା ବିଲ୍ଡର ଅଫିସରେ ପହଞ୍ଚି ଛୁରାମାଡ଼ କରିଥିଲେ ସ୍ବାମୀ ସପନ । ପରେ ପୋଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ଚିକିତ୍ସା ପାଇଁ ପଠାଇଥିବା ବେଳେ ଅଭିଯୁକ୍ତକୁ ଗିରଫ କରିଛି ।
ନେତାଜୀଙ୍କୁ କଲେଜ ଛାତ୍ରଙ୍କ ଅସମ୍ମାନ, ଭାଇରାଲ ହେଉଛି ଭିଡିଓ
ଅନୁଗୁଳ: ସୁବାଷ ବୋଷଙ୍କୁ ଅସମ୍ମାନ କଲେ କଲେଜ ଛାତ୍ର । ସୁବାଷ ବୋଷଙ୍କ ପ୍ରତିମୂର୍ତ୍ତି ଉପରେ କାନ୍ଧ ପକେଇ , ତାଙ୍କ ଚଷମା ଟାଣି ଇଂଷ୍ଟାଗ୍ରାମରେ ରିଲ କଲେ । ଯାହାର ଭିଡ଼ିଓ ଏବେ ଭାଇରାଲ ହେବା ପରେ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି । ଆଉ ଏହି ଘଟଣା ଟି ଅନୁଗୁଳ ସ୍ୱୟଂ ଶାସିତ ମହାବିଦ୍ୟାଳୟର ବୋଲି ଜଣା ପଡିଥିବା ବେଳେ ଛାତ୍ର ଜଣଙ୍କ ଯୁକ୍ତ 2 ର ଛାତ୍ର । ସୂଚନା ଅନୁସାରେ ଦିଲ କା ରାଜା ସନ୍ଦୀପ ନାମକ ଏକ ଇଂଷ୍ଟାଗ୍ରାମ ଆକାଉଣ୍ଟରେ ସମ୍ପୃକ୍ତ ଯୁବକ ଜଣଙ୍କ ଏକ ରିଲ କରି ଛାଡିଥିଲେ । ଅନୁଗୁଳ କଲେଜ ପରିସରରେ ଅନେକ ମହାପୁରୁଷଙ୍କ ପ୍ରତିମୂର୍ତ୍ତି ଥିବା ବେଳେ ଯୁବକ ଜଣଙ୍କ ସୁବାଷ ବୋଷଙ୍କ ପ୍ରତିମୂର୍ତ୍ତିକୁ ଧରି ତାଙ୍କ ଚଷମା ଟାଣି ଟାଣି ନାଚିଥିଲେ । କିଛି ସମୟ ପରେ ପ୍ରତିମୂର୍ତ୍ତିରେ ଲାଗିଥିବା ଚାଷମାକୁ ବଳ ପୂର୍ବକ ଟାଣି ଭାଙ୍ଗିଦେବା ସହ ସେହି ଚଷମାକୁ ପିନ୍ଧି ମଇନା ମୋର ମଇନା ଗୀତରେ ନାଚି ନାଚି ରିଲ କରିଥିଲେ। ତେବେ ଜଣେ କଲେଜ ପଢୁଆ ଛାତ୍ରଙ୍କ ଏଭଳି କାରନାମା ଦେଖି ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ଆରମ୍ଭ ହେଲା ବିଧାନସଭାର ଶୀତ ଅଧିବେଶନ
ଭୁବନେଶ୍ବର: ବିଧାନସଭାର ଶୀତ ଅଧିବେଶନ ଆରମ୍ଭ ହୋଇଛି । ମଙ୍ଗଳବାରଠାରୁ ଆରମ୍ଭ ହୋଇଥିବା ଏହି ଅଧିବେଶନ ଡିସେମ୍ବର ୩୦ ଯାଏ ଚାଲିବ । ତେବେ ବିଧାନସଭା ଆରମ୍ଭରେ ଗୃହରେ ଶୋକ ପ୍ରସ୍ତାବ ଆଗତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦିବଙ୍ଗତ ନେତାଙ୍କ ପାଇଁ ଶୋକପ୍ରକାଶ ଆଗତ କଲେ ମୁଖ୍ୟମନ୍ତ୍ରୀ । ପୂର୍ବତନ ବାଚସ୍ପତି ସ୍ବର୍ଗତଃ ମହେଶ୍ୱର ମହାନ୍ତି, ପୂର୍ବତନ ଉପ ମନ୍ତ୍ରୀ ସରସ୍ବତୀ ପ୍ରଧାନ, ପୂର୍ବତନ ସରକାରୀ ମୁଖ୍ୟ ସଚେତକ ଅଜୟ କୁମାର ଜେନା, ପୂର୍ବତନ ସଦସ୍ୟ ରବି ଦାସ, ପୂର୍ବତନ ସଦସ୍ୟ ଯୁଧିଷ୍ଠିର ସାମନ୍ତରାୟ, ପୂର୍ବତନ ଲାନସ ହାବିଲଦାର ସରୋଜ କୁମାର ଦାସ, ପୂର୍ବତନ କନେଷ୍ଟବଳ ବି.ଏସ.ଏଫ ପ୍ରକାଶ ଚନ୍ଦ୍ର ଶିଆଳଙ୍କ ଉଦ୍ଦେଶ୍ୟରେ ଶୋକ ପ୍ରସ୍ତାବ ଆଣିଲେ ମୁଖ୍ୟମନ୍ତ୍ରୀ । ଗୃହରେ ଆସିଥିବା ଶୋକ ପ୍ରସ୍ତାବକୁ ସମର୍ଥନ କରିଛନ୍ତି ବିରୋଧୀ ।
ଓ୍ବାର୍ଣ୍ଣର ଖେଳିବେନି ଭାରତ ବିପକ୍ଷ ଟି-୨୦ ସିରିଜ୍
ନୂଆଦିଲ୍ଲୀ: ଆସନ୍ତା ୨୩ ତାରିଖରୁ ଆରମ୍ଭ ହେବାକୁ ଯାଉଛି ଭାରତ- ଅଷ୍ଟ୍ରେଲିଆ ଟି-୨୦ ସିରିଜ୍ । ସୂର୍ଯ୍ୟକୁମାର ଯାଜବଙ୍କ ଅଧିନାୟକତ୍ବରେ ଦଳ କଙ୍ଗାରୁ ଦଳକୁ ଭେଟିବାକୁ ଥିବାବେଳେ ଭାରତୀୟ ପ୍ରଂଶସକଙ୍କ ପାଇଁ ଏକ ଖୁସି ଖବର । ଅଷ୍ଟ୍ରେଲିଆର ଧୂଆଁଧାର ବ୍ୟାଟ୍ସମ୍ୟାନ ଡେଭିଡ ଓ୍ବାର୍ଣ୍ଣର ନିଜ ନାମକୁ ପ୍ରତ୍ୟାହାର କରିଛନ୍ତି । ୩୭ ବର୍ଷୀୟ ଓ୍ବାର୍ଣ୍ଣର ଏହି ସିରିଜ ପାଇଁ ଦଳରେ ସ୍ଥାନ ପାଇଥିବାବେଳେ ସେ ସ୍ବେଦଶ ଫେରି ଯାଇଛନ୍ତି । ଚଳିତ ବିଶ୍ବକପରେ ୫୦୦ରୁ ଅଧିକ ସ୍କୋର କରିବା ସହ ଦମଦାର ଫର୍ମରେ ରହିଥିଲେ । ଏଣୁ ଟି-୨୦ରେ ମହଙ୍ଗା ସାବ୍ୟସ୍ତ ହୋଇଥାନ୍ତେ ବୋଲି ଚର୍ଚ୍ଚା ହେଉଥିଲା । ଟିମ ଇଣ୍ଡିଆର ସିନିୟର ଖେଳାଳିମାନେ ମଧ୍ୟ ଏହି ସିରିଜରେ ନଜର ଆସିବେନି । ବିରାଟ, ରୋହିତଙ୍କ ଭଳି ଖେଳାଳିଙ୍କୁ ବିଶ୍ରାମ ଦେଇଛି ବିସିସିଆଇ । ସେପଟେ ପାକିସ୍ତାନ ବିପକ୍ଷରେ ଡିସେମ୍ବର-ଜାନୁୟାରରେ ଖେଳାଯିବାକୁ ଥିବା ଟେଷ୍ଟ ମ୍ୟାଚ ଖେଳିବେ । ଏହା ତାଙ୍କର ଶେଷ ଟେଷ୍ଟ ସିରିଜ ହେବ । ଏହାପରେ ଟେଷ୍ଟ କ୍ରିକେଟରୁ ଓ୍ବାର୍ଣ୍ଣର ଅବସର ଘୋଷଣା କରିବେ ।
ସାଲୁଗା ପ୍ରଧାନ ହେଲେ ବିଧାନସଭାର ଉପବାଚସ୍ପତି, ମୁଖ୍ୟମନ୍ତ୍ରୀଙ୍କୁ ଜଣାଇଲେ କୃତଜ୍ଞତା
ଭୁବନେଶ୍ବର: ସାଲୁଗା ପ୍ରଧାନ ହେଲେ ବିଧାନସଭାର ଉପବାଚସ୍ପତି । ନିର୍ଦ୍ବନ୍ଦ୍ବରେ ଉପବାଚସ୍ପତି ଭାବେ ନିର୍ବାଚିତ ହୋଇଛନ୍ତି ସାଲୁଗା ପ୍ରଧାନ । ଆଜି ବିଧାନସଭାରେ ମୋସନ ଆଣିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ ନୂଆ ଉପବାଚସ୍ପତିଙ୍କୁ ସ୍ବାଗତ କରିଥିଲେ । ସେହିପରି ବିଜେପି ଓ କଂଗ୍ରେସ ମଧ୍ୟ ନୂଆ ଉପବାଚସ୍ପତିଙ୍କୁ ସ୍ବାଗତ କରିଥିଲେ । ଜି. ଉଦୟଗିରି ବିଧାୟକ ସାଲୁଗା ପ୍ରଧାନ ହୋଇଛନ୍ତି ବିଧାନସଭାର ପରବର୍ତ୍ତୀ ଉପବାଚସ୍ପତି । ଗତକାଲି ବିଧାନସଭା ସଚିବଙ୍କ ନିକଟରେ ସାଲୁଗା ପ୍ରଧାନ ଉପବାଚସ୍ପତି ପଦ ପାଇଁ ନାମାଙ୍କନ ପତ୍ର ଦାଖଲ କରିଥିଲେ । ୨୦୦୦ ଓ ୨୦୧୯ରେ ଜି.ଉଦୟଗିରି ବିଧାୟକ ଭାବେ ସାଲୁଗା ପ୍ରଧାନ ନିର୍ବାଚିତ ହୋଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ଉପରେ ଆସ୍ଥା ପ୍ରକଟ କରିଥିବାରୁ ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି । ନାମାଙ୍କନ ପତ୍ର ଦାଖଲ ପରେ ଗୃହକାର୍ଯ୍ୟରେ ପରିଚାଳନା ପାଇଁ ଉଭୟ ଶାସକ ଓ ବିରୋଧୀ ଦଳର ସଦସ୍ୟମାନଙ୍କ ସହଯୋଗ ଲୋଡ଼ିଛନ୍ତି ସାଲୁଗା ପ୍ରଧାନ ।
ଭାରତୀୟ ଟିମକୁ ପ୍ରଂଶସା କଲେ ପୂର୍ବତନ ପାକିସ୍ତାନ ଅଧିନାୟକ
ଇସଲାମବାଦ: ବିଶ୍ବକପ ଫାଇନାଲ ହାରିଛି ଭାରତ । ଦଳର ପ୍ରଦର୍ଶନକୁ ନେଇ ସମାଲୋଚନା କରାଯାଉଛି । ଏହାରି ଭିତରେ ପାକିସ୍ତାନର ପୂର୍ବତନ ଅଧିନାୟକ ଓ୍ବାସିମ ଆକ୍ରାମ ଟିମ ଇଣ୍ଡିଆର ପ୍ରଂଶସାରେ ଶତମୁଖ । ଭାରତୀୟ ଦଳ ଟୁର୍ଣ୍ଣାମେଣ୍ଟରେ କରିଥିବା ପ୍ରଦର୍ଶନକୁ ନେଇ ସେ ପ୍ରଂଶସା କରିଛନ୍ତି । ଲଗାତାର ୧୦ଟି ମ୍ୟାଚ ଭାରତ ଜିତିଥିବାବେଳେ ଦମଦାର ପ୍ରଦର୍ଶନ କରିଛି । ଖେଳରେ ହାର ଜିତ୍ ରହିଛି । ଏଣୁ ସେହିଦିନ ଭାରତ ପାଇଁ ଭଲ ନଥିଲା ବୋଲି ଭାବିବା କଥା । ଟିମ ଇଣ୍ଡିଆ ଉଚ୍ଚକୋଟିର ଖେଳ ପ୍ରଦର୍ଶନ କରିଛି । ଦଳ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ନିଜର ଆଧିପତ୍ୟ ବିସ୍ତାର କରିଥିଲା । କୋହଲି ଏବଂ ସାମିଙ୍କ ସହ ଦଳର ସମସ୍ତ ଖେଳାଳି ଭଲ ପ୍ରଦର୍ଶନ କରିଛନ୍ତି । କିନ୍ତୁ ଏତେ ସମାଲୋଚନା କରିବା ଯୁକ୍ତିଯୁକ୍ତ ନୁହେଁ ବୋଲି କହିଛନ୍ତି ଆକ୍ରାମ । ଫାଇନାଲରେ ଭାରତର ପରାଜୟ ପରେ ଖେଳାଳିମାନେ ଭାଙ୍ଗି ପଡ଼ିଛନ୍ତି ନିଶ୍ଚୟ କିନ୍ତୁ ଖେଳରେ ଏହା ରହିଛି । ଏଣୁ ଦୁଃଖ ନକରି ଏଭଳି ଭଲ ଖେଳ ଜାରି ରଖିବା ସହ ସେହିଦିନ ଖରାପ ଦିନ ଥିଲା ଭାବି ଭୁଲିଯିବା ଉଚିତ । ଭାରତ ଚତୁର୍ଥଥର ଫାଇନାଲ ଖେଳିଛି । ଦଳ ଏବେ ଭଲ ଫର୍ମରେ ରହିଛି ।
ପାହାଡ଼ପୁରରେ ରାଷ୍ଟ୍ରପତି
ମୟୂରଭଞ୍ଜ: ଜନ୍ମମାଟିରେ ମହାମହିମ । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ତିନିଦିନିଆ ଓଡ଼ିଶା ଗସ୍ତର ମଙ୍ଗଳବାର ଦ୍ବିତୀୟ ଦିନ । ଗତକାଲିଠୁ ରାଷ୍ଟ୍ରପତି ମୟୂରଭଞ୍ଜ ଗସ୍ତରେ ଥିବା ବେଳେ ଆଜି ଶାଶୂଘର ପାହାଡ଼ପୁର ଗସ୍ତ କରିଥିଲେ । ସ୍ବାମୀ ଶ୍ୟାମଚରଣ ମୁର୍ମୁଙ୍କ ପ୍ରତିମୂର୍ତ୍ତିରେ ପୁଷମାଲ୍ୟ ଅର୍ପଣ କରିଛନ୍ତି । ସେଠାରେ ଦକ୍ଷତା ବିକାଶ ତାଲିମ କେନ୍ଦ୍ରର ଉଦଘାଟନ କରିବା ସହ ଏସଏଲଏସ ସ୍କୁଲ ପରିଦର୍ଶନ କରିଛନ୍ତି । ବିଭିନ୍ନ ପ୍ରକଳ୍ପର ଶିଳାନ୍ୟାସ କରିବା ସହ ଅଞ୍ଚଳବାସୀଙ୍କ ସହ ଆଲୋଚନା କରିଛନ୍ତି । ସେଠାରୁ ବାଦାମପାହାଡ଼ ରେଳ ଷ୍ଟେସନରେ ନୂତନ ଭାବେ ଟାଟାନଗର-ବାଦାମପାହାଡ ମେମୁ ଟ୍ରେନ, ବାଦାମପାହାଡ-ରାଉରକେଲା ଏକ୍ସପ୍ରେସ ଓ ଶାଲିମାର- ବାଦାମପାହାଡ଼ ଏକ୍ସପ୍ରେସ ଟ୍ରେନର ଶୁଭାରମ୍ଭ କରିଛନ୍ତି ।
ଏଥିସହ ବାଦାମପାହାଡ଼ ଅମୃତ ରେଳଷ୍ଟେସନର ଶିଳାନ୍ୟାସ କରିଛନ୍ତି। ପରେ ରାଇରଙ୍ଗପୁର ଡାକ ଡିଭିଜନ୍ ଉଦଘାଟନ କରିବା ସହ ବିଭିନ୍ନ କାର୍ଯ୍ୟକ୍ରମରେ ଭିଡିଓ କନଫରେନ୍ସିଂ ଯୋଗେ ଯୋଡ଼ି ହେବାର କାର୍ଯ୍ୟକ୍ରମ ରହିଛି। ବାଦାମପାହାଡ଼ରୁ ରାଇରଙ୍ଗପୁର ରେଳ ଷ୍ଟେସନକୁ ଟ୍ରେନ ଯୋଗେ ଯାତ୍ରା କରି ସେଠାରୁ ହେଲିକପ୍ଟର ଯୋଗେ ସମ୍ୱଲପୁର ଅଭିମୁଖେ ଯାତ୍ରା କରିବେ। ସନ୍ଧ୍ୟା ୫ଟା ୪୫ରେ ସେ ମା’ ସମଲେଶ୍ବରୀ ମନ୍ଦିରକୁ ଯାଇ ପୂଜାର୍ଚ୍ଚନା କରିବେ। କାଲି ରାଷ୍ଟ୍ରପତି ସମ୍ବଲପୁରଠାରେ ବ୍ରହ୍ମକୁମାରୀ ସଂସ୍ଥାଦ୍ବାରା ଆୟୋଜିତ ଜାତୀୟ ଶିକ୍ଷା ଅଭିଯାନ- ନୂଆ ଭାରତ ପାଇଁ ନୂଆ ଶିକ୍ଷାକୁ ଶୁଭାରମ୍ଭ କରିବେ। ଏହାପରେ ସେଠାରୁ ଆନ୍ଧ୍ରପ୍ରଦେଶର ପୁଟ୍ଟପର୍ତ୍ତି ଗସ୍ତ କରିବେ ।
ପ୍ରଥମଥର ଆସିଲା ଟନେଲରେ ଫସିଥିବା ଶ୍ରମିକଙ୍କ ଭିଡିଓ
ଉତ୍ତରାଖଣ୍ଡ: ଖୁସି ଖବର । ଉତ୍ତରାଖଣ୍ଡର ଉତ୍ତରକାଶୀରେ ଟନେଲ ଭିତରେ ଫସି ରହିଥିବା ଶ୍ରମିକଙ୍କ ଏକ ଭିଡିଓ ଏବେ ସାମନାକୁ ଆସିଛି । ପ୍ରତମଥର ଲାଗି ଏହି ଭିଡିଓଟି ସାମନାକୁ ଆସିଛି । ଯାହାକୁ ଦେ୍ଖିବା ପରେ ଟିକେ ଆଶ୍ବସ୍ତୀ ମିଳିଛି । ନଭେମ୍ବର ୧୨ ତାରିଖରୁ ୪୧ ଜଣ ଶ୍ରମିକ ଏହି ଟେନଲ ଭିତରେ ଫସି ରହିଥିବାବେଳେ ରେସ୍କ୍ୟୁ ଅପରେସନ ଜାରି ରହିଛି । ଉଦ୍ଧାରକାରୀ ଦଳ ପକ୍ଷରୁ ପଠାଯାଇଥିବା କ୍ୟାମେରାରେ ଶ୍ରମିକଙ୍କ ଭିଡିଓ କଏଦ ହୋଇଛି । ସମସ୍ତେ ସୁରକ୍ଷିତ ଥିବା ନଜର ଆସିଛି । ତେବେ ଖୁବଶୀଘ୍ର ଶ୍ରମିକମାନେ ଉଦ୍ଧାର ହୋଇଯିବେ ବୋଲି କୁହାଯାଉଛି ।
ଦଶମ ଦିନରେ ରେସ୍କ୍ୟୁ ଅପରେସନ । ଉତ୍ତରକାଶୀରେ ଫସିଥିବା ୪୧ ଶ୍ରମିକଙ୍କ ଉଦ୍ଧାର ପ୍ରକ୍ରିୟାରେ ହେଉଛି ଅଗ୍ରଗତି । ୬ ଇଞ୍ଚର ପାଇପରେ ଖାଦ୍ୟପଦାର୍ଥ ଯୋଗାଇଦିଆଯାଉଥିବାବେଳେ ସେଠାରେ ଯୁଦ୍ଧକାଳୀନ ଭିତ୍ତିରେ ଚାଲିଛି ଅପରେସନ । ରାତିରେ ସ୍ବତନ୍ତ୍ର ଭାବେ ପ୍ରସ୍ତୁତ ଖେଚୁଡି ଓ ଡାଲି ସେମାନଙ୍କ ଲାଗି ପଠାଯାଇଛି । ସେପଟେ ପ୍ରତିରକ୍ଷା ଗବେଷଣା ଓ ବିକାଶ ସଂଗଠନର ଦୁଇଟି ରୋବଟକୁ ଟନେଲ ଭିତରକୁ ପଠାଯିବ । ସେହି ଦୁଇଟି ରୋବଟର ଓଜନ ୨୦ କେଜି ଓ ୫୦ କେଜି । ଫସିଥିବା ଶ୍ରମିକଙ୍କ ଲାଗି ସ୍ବତନ୍ତ୍ର ଖାଦ୍ୟ ପଦାର୍ଥ ବ୍ୟବସ୍ଥା କରାଯାଇଛି । ସେଥିଲାଗି ମେଡିକାଲ ବିଶେଷଜ୍ଞଙ୍କ ପରାମର୍ଶ ନିଆଯାଇଛି । କେତେକ ଶ୍ରମିକ ସାମାନ୍ୟ ଅସୁସ୍ଥ ହୋଇଥିବା ସୂଚନା ମିଳିଛି । ପାଇପ ଯୋଗେ ଏକ ଚାର୍ଜର ଓ ଏକ ଫୋନ ଟନେଲ ଭିତରକୁ ପଠାଯିବ ।
ପାହାଡ ଉପରକୁ ରାସ୍ତା କାମ ସରିଲେ ଶ୍ରମିକଙ୍କ ନିକଟରେ ପହଞ୍ଚିବା ଲାଗି ସମାନ୍ତରାଳ ଓ ଉପରୁ ଡ୍ରିଲିଂ କାର୍ଯ୍ୟ ଆରମ୍ଭ ହେବ । ଯଦି ଉପରୁ ଡ୍ରିଲିଂ କରାଯାଏ ତେବେ ଶ୍ରମିକଙ୍କଠାରୁ ସେହି ସ୍ଥାନର ଉଚ୍ଚତା ରହିବ ୯୦ ମିଟର । ବାମପାର୍ଶ୍ବରୁ ଦୂରତା ରହିଛି ୧୭୦ ମିଟର । ଡାହାଣ ପଟରୁ ଦୂରତା ରହିଛି ୨୦୦ ମିଟର । ଟନେଲର ବାରକୋଟ ଦିଗରୁ ଶ୍ରମିକ ଫସିଥିବା ସ୍ଥାନର ଦୂରତା ରହିଛି ୪୫୦ ମିଟର । ସିଲକୟାରା ପଟୁ ଦୂରତା ହେଉଛି ୭୦ ମିଟର, ଯେଉଁଥିରୁ ୨୨ ମିଟର ଯାଏ ପାଇପ ପଡିସାରିଛି । ଘଟଣାସ୍ଥଳକୁ ଡିଆରଡିଓର ରିମୋଟଲି ଅପରେଟେଡ ଭେହିକଲ ଦକ୍ଷକୁ ଅଣାଯାଇଛି ।
ଭାରତ ପରାଜୟର କାରଣ କହିଲେ ଆଫ୍ରିଦ୍, ସୋସିଆଲ ମିଡିଆରେ ଭାଇରାଲ ହେଉଛି ଭିଡିଓ
ଇସଲାମବାଦ: ବିଶ୍ବକପରେ ଭାରତର ପରାଜୟକୁ କେହି ମଧ୍ୟ ସହଜରେ ହଜମ କରିପାରୁନାହାନ୍ତି । ଫାଇନାଲ ମ୍ୟାଚ ସମୟରେ ଭାରତ ବ୍ୟାଟିଂ କରୁଥିବାବେଳେ ପାକିସ୍ତାନର ଏକ ଗଣମାଧ୍ୟମ ଡିବେଟରେ ବସିଥିବା ପୂର୍ବତନ ପାକିସ୍ତାନୀ କ୍ରିକେଟର ସାହିଦ ଆଫ୍ରିଦ ଦେଇଥିବା ଏକ ବିବୃତି ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଆଫ୍ରିଦ କହିଥିଲେ କି, ଭାରତ ଅତ୍ୟଧିକ ଆତ୍ମବିଶ୍ବାସ ପାଇଁ ମ୍ୟାଚ ହାରିବ । ଲଗାତାର ବିଜୟ ପରେ ଓଭର କନ୍ଫିଡେନ୍ସ ପାଇଁ ଭାରତ ହାରିବ ବୋଲି କହିଥିଲେ । ଭାରତ ବ୍ୟାଟିଂ ବିପର୍ଯ୍ୟୟ ଘଟୁଥିବାବେଳେ ଏଭଳି କହିଥିଲେ । ଏହି ଡିବେଟରେ ମହମ୍ମଦ ୟୁସୁଫ ମଧ୍ୟ ବସିଥିଲେ ।
ଯେତେବେଳେ ଭାରତର ତୃତୀୟ ଓ୍ବିକେଟର ପତନ ଘଟିଥିଲା ସେତେବେଳେ ଆଙ୍କର ଆଫ୍ରିଦଙ୍କୁ ପଚାରିଥିଲେ କି, ଏହା ବଡ଼ ଟୁର୍ଣ୍ଣାମେଣ୍ଟର ଚାପ କି? ଏହାର ଉତ୍ତରରେ କହିଥିଲେ କି, ଅତ୍ୟଧିକ ଆତ୍ମବିଶ୍ବାସ ପାଇଁ ଏଭଳି ହେଉଛି । ଯାହାକି ଭାରତ ପରାଜୟର କାରଣ ହେବ । ଏବେ ଏହି ଭିଡିଓଟି ବେଶ ଭାଇରାଲ ହେଉଥିବାବେଳେ ବହୁ ଭାରତୀୟ ପ୍ରଂଶସକମାନେ ଆଫ୍ରିଦଙ୍କୁ ଟ୍ରୋଲ ମଧ୍ୟ କରୁଛନ୍ତି ।
India 🇮🇳 will lose this World Cup because of their overconfidence – Shahid Afridi 😳pic.twitter.com/cBlNsAjR1F
— H A M Z A 🇵🇰 (@HamzaKhan259) November 19, 2023
ଆଜି ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖାରେ ହାଜର ହେବେ ଭାରତ ପେ’ ସହପ୍ରତିଷ୍ଠାତା ଅସନିର ଗ୍ରୋଭର ଓ ପତ୍ନୀ ମାଧୁରୀ ଜୈନ
ନୂଆଦିଲ୍ଲୀ: ୮୧ କୋଟି ଟଙ୍କାର ଆର୍ଥିକ ଘୋଟାଲା । ମଙ୍ଗଳବାର ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖାରେ ହାଜର ହେବେ ଭାରତ ପେ ସହପ୍ରତିଷ୍ଠାତା ଅସନିର ଗ୍ରୋଭର ଓ ପତ୍ନୀ ମାଧୁରୀ ଜୈନ । ଦିଲ୍ଲୀ ମନ୍ଦିର ମାର୍ଗସ୍ଥିତ ଦିଲ୍ଲୀ ପୋଲିସର ଅର୍ଥନୈତିକ ଅପରାଧ କାର୍ଯ୍ୟାଳୟରେ ସେମାନେ ଜେରାର ସମ୍ମୁଖୀନ ହେବେ । ଗତ ଗୁରୁବାର ଅସନିର ଓ ପତ୍ନୀ ନ୍ୟୁୟର୍କ ଯିବାକୁ ଉଦ୍ୟମ କରୁଥିବାବେଳେ ଦିଲ୍ଲୀ ବିମାନ ବନ୍ଦରରେ ସେମାନଙ୍କୁ ଅଟକ ରଖାଯାଇଥିଲା । ଅର୍ଥନୈତିକ ଅନିୟମିତତା ନେଇ ଗତ ମେ ମାସରେ ଅସନିର, ପତ୍ନୀ ମାଧୁରୀ, ପରିବାର ସଦସ୍ୟ ଦୀପକ ଗୁପ୍ତା, ସୁରେଶ ଜୈନ ଓ ଶ୍ବେତାଙ୍କ ଜୈନଙ୍କ ନାମରେ ଅର୍ଥନୈତିକ ଅପରାଧ ଶାଖା ମାମଲା ଦାୟର କରିଥିଲା ।
ଜାଲିଆତି କରି ଅଭିଯୁକ୍ତମାନେ ୮୧ କୋଟି ୩୦ ଲକ୍ଷ ଟଙ୍କା ବିଭିନ୍ନ ଜାଲ୍ ଆକାଉଣ୍ଟକୁ ଟଙ୍କା ପଠାଇଥିଲେ । ଫଳରେ କମ୍ପାନି କ୍ଷତିଗ୍ରସ୍ତ ହୋଇଥିବା ବୋଲି ଭାରତ ପେ ପକ୍ଷରୁ ଅଭିଯୋଗ ହୋଇଥିଲା । ଗତ ନଭେମ୍ବର ୭ ତାରିଖରେ କୋର୍ଟରେ ଷ୍ଟାଟସ ରିପୋର୍ଟ ଦାଖଲ କରିଥିଲା ଇଓଡବ୍ଲୁ । ଯଦି କୋର୍ଟରେ ସେମାନେ ଦୋଷୀ ସାବ୍ୟସ୍ତ ହୁଅନ୍ତି ସେମାନଙ୍କୁ ୧୦ ବର୍ଷରୁ ଆଜୀବନ ଜେଲଦଣ୍ଡ ମିଳିବା ଆଶଙ୍କା ରହିଛି । ଗତ ଡିସେମ୍ବର ୨୦୨୨ରେ ବି ଗ୍ରୋଭର ପରିବାର ବିରୋଧରେ ଦିଲ୍ଲୀ ହାଇକୋର୍ଟରେ ଏକ ସିଭିଲ ସୁଟ୍ ଦାୟର କରିଥିବା ଭାରତ ପେ । ଠକେଇ ମାମଲାରେ ୮୮ କୋଟି ୬୭ ଲକ୍ଷ ଟଙ୍କାର କ୍ଷତିପୂରଣ ଲାଗି ସିଭିଲ ସୁଟରେ କରାଯାଇଥିଲା ଆବେଦନ । ଗତ ୨୦୨୨ ମାର୍ଚ୍ଚରେ ଏମଡି ପଦରୁ ଇସ୍ତଫା ଦେଇଥିଲେ ଅସନିର ।