ପୁରୀ: ପୁରୀ ଗସ୍ତରେ ଉପରାଷ୍ଟ୍ରପତିଙ୍କ ପତ୍ନୀ ସୁଦେଶ ଧନକର । ଆଜି ପୁରୀ ଆସି ଶ୍ରୀମନ୍ଦିର ଯାଇ ଶ୍ରୀଜୀଉଙ୍କୁ ଦର୍ଶନ କରିଛନ୍ତି । ଦୀର୍ଘ ଏକ ଘଣ୍ଟାରୁ ଅଧିକ ସମୟ ମନ୍ଦିରରେ ରହି ଶ୍ରୀବିଗ୍ରହଙ୍କୁ ଦର୍ଶନ ଓ ପୂଜା କରିଥିଲେ । ପରେ ବେଡା ପରିକ୍ରମା କରିବା ସହ ବିମଳା ଓ ମହଲଷ୍ମୀଙ୍କୁ ମଧ୍ୟ ଦର୍ଶନ କରିଥିଲେ । ପ୍ରଶାସନ ପକ୍ଷରୁ ଉପରାଷ୍ଟ୍ରପତିଙ୍କ ପତ୍ନୀଙ୍କ ଦର୍ଶନ ପାଇଁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଥିଲା । ମହାପ୍ରଭୁଙ୍କୁ ଦର୍ଶନ କରି ସେ ଆନନ୍ଦିତ ଥିବା କହିଛନ୍ତି ।
ଭୁବନେଶ୍ବର ଏମ୍ସରୁ ଟାଙ୍ଗୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଡ୍ରୋନରେ ଗଲା ଔଷଧ
ଭୁବନେଶ୍ବର: ପରୀକ୍ଷା ମୂଳକ ଭାବେ ସଫଳ ହେଲା ଡ୍ରୋନ ସେବା । ଦ୍ବିତୀୟ ଥର ପାଇଁ ଭୁବନେଶ୍ବର ଏମ୍ସରୁ ଡ୍ରୋନ ସେବା ଆରମ୍ଭ ହୋଇଛି । ଭୁବନେଶ୍ବର ଏମ୍ସରୁ ଖୋର୍ଦ୍ଧା ଜିଲ୍ଲା ଟାଙ୍ଗୀ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ପହଞ୍ଚିଲା ଜରୁରୀ ଔଷଧ ।
ଭୁବନେଶ୍ବର ଏମ୍ସରୁ ଟାଙ୍ଗୀ ମେଡିକାଲକୁ ଉଡ଼ାଣ ଭରିଥିବା ଡ୍ରୋନରେ ଥିଲା ଗୁରୁତର ରୋଗୀଙ୍କ ପାଇଁ ଇଞ୍ଜେକସନ । ଡ୍ରୋନ ଔଷଧ ପହଞ୍ଚାଇବା ପରେ ରୋଗୀଙ୍କୁ ଇଞ୍ଜେକ୍ସନ ଦିଆଯାଇଛି । ଏମ୍ସ ପକ୍ଷରୁ ଓଡିଶାରେ ଏହି ସେବା ପ୍ରଥମ ଥର ପାଇଁ ଆରମ୍ଭ ହୋଇଛି । ୭୦ କିଲୋମିଟର ଯିବା ପାଇଁ ଡ୍ରୋନକୁ ୩୫ ମିନିଟ ସମୟ ଲାଗୁଛି । ଆକାଶ ପଥରେ ପକ୍ଷୀଙ୍କ ଠାରୁ ଢେର ଉଚ୍ଚରେ ୪୦୦ ଫୁଟ ଉଚ୍ଚତାରେ ଏହି ଡ୍ରୋନ ଉଡାଣ କରିବାର ରହିଛି କ୍ଷମତା । ଏହାସହ ଡ୍ରୋନ ୫ କେଜି ଓଜନ ପରିବହନ ସହ ଅତି ଜରୁରୀ ପରିସ୍ଥିତିରେ ରୋଗୀଙ୍କୁ ଜରୁରୀ ଔଷଧ ସହ ରକ୍ତ ଯୋଗାଣର ବ୍ୟବସ୍ଥା କରାଯାଇଛି । ଡ୍ରୋନ ମାଧ୍ୟମରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରୁଥିବା ଲୋକେ ଅଧିକ ଉପକୃତ ହୋଇପାରିବେ ।
ଟ୍ରେନର ଲଗେଜ ବଗିରେ ଲାଗିଲା ନିଆଁ
ଅନୁଗୁଳ: ଅନୁଗୁଳ ବାମୁର ନିକଟରେ ଟ୍ରେନରେ ନିଆଁ ଲାଗିଥିବା ସୂଚନା । ରାଉରକେଲା ଭୁବନେଶ୍ବର ଇଣ୍ଟରସିଟି ଟ୍ରେନରେ ନିଆଁ ଲାଗିଥିଲା । ଲଗେଜ ବଗିରେ ନିଆଁ ଲାଗିଥିବା ସୂଚନା । ନିଆଁ ଲାଗିବାରୁ କୁଳଡଙ୍ଗିଆଣିରେ ଅଟକିଥିଲା ଟ୍ରେନ। ବ୍ରେକ ଏୟାର ଯୋଗୁଁ ଟ୍ରେନର ଲଗେଜ ବଗିରେ ନିଆଁ ଲାଗିଥିବା ଜଣାପଡିଛି । ତେବେ ନିଆଁକୁ ଆୟତ୍ତ ପରେ ଗଡିଲା ଇଣ୍ଟରସିଟି ଟ୍ରେନ ।
ନୂଆ ରୂପରେ ସମ୍ବଲପୁର ଜିଲ୍ଲା ମୁଖ୍ଯ ଚିକିତ୍ସାଳୟ, ରୋଗୀଙ୍କୁ ମିଳୁଛି ଉନ୍ନତ ସ୍ବାସ୍ଥ୍ୟସେବା
ଭୁବନେଶ୍ବର: ଓଡ଼ିଶା ସ୍ବାସ୍ଥ୍ଯ ସେବା କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ଆଣିଛି ରାଜ୍ଯ ସରକାରଙ୍କ ଆମ ହସ୍ପିଟାଲ । ଏହି କ୍ରମରେ ନୂଆ ରୂପ ପାଇଛି ସମ୍ବଲପୁର ଜିଲ୍ଲା ମୁଖ୍ଯ ଚିକିତ୍ସାଳୟ । ଆନୁସଙ୍ଗିକ ବ୍ଯବସ୍ଥା ସହ ରୋଗୀ ସେବା ହୋଇଛି ସହଜ । ରାଜ୍ଯ ସରକାରଙ୍କ ପକ୍ଷରୁ ଯୋଗାଇ ଦିଆଯାଇଛି ଅତ୍ଯାଧୁନିକ ସୁବିଧା । ସଦର ମେଡିକାଲରେ ସମସ୍ତ ସୁବିଧା ମିଳୁଥିବାରୁ ମୁଖ୍ଯମନ୍ତ୍ରୀଙ୍କୁ ଧନ୍ଯବାଦ ଜଣାଇଛନ୍ତି ଜିଲ୍ଲାବାସୀ ।
ଆମ ହସ୍ପିଟାଲ ମାଧ୍ୟମରେ ରୋଗୀଙ୍କୁ ମିଳୁଛି ଅତ୍ଯାଧୁନିକ ଚିକିତ୍ସା । ଉନ୍ନତ ଜ୍ଞାନକୌଶଳ ଓ ଅଭିଜ୍ଞ ଡାକ୍ତର ଟିମ ଦେଉଛନ୍ତି ସେବା । ରାଜ୍ଯ ସରକାରଙ୍କ ଉଦ୍ଯମରୁ ବଦଳୁଛି ସ୍ବାସ୍ଥ୍ଯା ସେବାର ପରିଭାଷା । ମୁଖ୍ଯମନ୍ତ୍ରୀ କହିଛନ୍ତି, ପ୍ରତିଟି ଜୀବନ ମୂଲ୍ଯବାନ । ଏଥିପାଇଁ ରାଜ୍ଯର ସବୁ ଡାକ୍ତରଖାନାରେ ରୋଗୀଙ୍କୁ ଯୋଗାଇ ଦିଆଯାଉଛି ସମସ୍ତ ସୁବିଧା । ବଦଳୁଛି ହସ୍ପିଟାଲର ରୂପରେଖ । ଏହି କ୍ରମରେ ସମ୍ବଲପୁର ଜିଲ୍ଲା ମୁଖ୍ଯ ଚିକିତ୍ସାଳୟର ବଦଳିଛି ଚିତ୍ର । ଚାରି ମହଲା ବିଶିଷ୍ଟ ମାଆ ଓ ଶିଶୁ ସ୍ବାସ୍ଥ୍ୟ ବିଭାଗଠୁ ଆରମ୍ଭ କରି ସମସ୍ତ ବିଭାଗରେ ଉନ୍ନତି ହୋଇଛି । ଔଷଧ ଠାରୁ ଆରମ୍ଭ କରି ସମସ୍ତ ସେବା ମାଗଣାରେ ପାଇ ଉପକୃତ ହେଉଛନ୍ତି ରୋଗୀ ।
ଦିନ ଥିଲା ଏଠାକୁ ରୋଗୀଟିଏ ଆସିଲେ ପରୀକ୍ଷା ଠାରୁ ଆରମ୍ଭ କରି ଚିକିତ୍ସା ପାଇଁ ଲଗାଇବାକୁ ପଡୁଥିଲା ଲମ୍ବା ଲାଇନ । ଏପରିକି କିଛି ପରୀକ୍ଷା ପାଇଁ ବାହାର କ୍ଲିନିକ ଉପରେ ନିର୍ଭର କରିବାକୁ ପଡ଼ୁଥିଲା । ହେଲେ ଆମ ହସ୍ପିଟାଲରେ ଏବେ ସବୁ ସେବା ଗୋଟିଏ ସ୍ଥାନରେ ମିଳୁଛି । ଏପରିକି ବ୍ଯୟବହୁଳ କିଡନୀ ଡାଇଲିସିସ୍ ପାଇଁ ଆଉ ବାହାରକୁ ଯିବାକୁ ପଡ଼ୁନି । ଉଭୟ ଅନଲାଇନ ଓ ଅଫଲାଇନରେ ମିଳୁଛି ସମସ୍ତ ସେବା । ଏଥିପାଇଁ ମୁଖ୍ଯମନ୍ତ୍ରୀଙ୍କୁ ଧନ୍ଯବାଦ ଜଣାଇଛନ୍ତି ଜିଲ୍ଲାବାସୀ ।
ରେଭ ପାର୍ଟିରେ ସାପ ବିଷ ବ୍ଯବହାର ମାମଲା, ୟୁଟ୍ଯୁବର ଏଲଭିସ ଯାଦବଙ୍କୁ ଜାମିନ
ଲକ୍ଷ୍ନୌ: ରେଭ ପାର୍ଟିରେ ସାପବିଷ ବ୍ଯବହାର ମାମଲା । ଅଭିଯୁକ୍ତ ୟୁଟ୍ଯୁବର ଏଲଭିସ ଯାଦବଙ୍କୁ ଜାମିନ ପ୍ରଦାନ କଲେ ଉତ୍ତରପ୍ରଦେଶର ଗୌତମବୁଦ୍ଧ ନଗର କୋର୍ଟ । ଗତ ରବିବାର ନୋଏଡା ପୋଲିସ ତାଙ୍କୁ କରିଥିଲା ଗିରଫ । ୫୦ ହଜାର ଲେଖାଏଁ ଟଙ୍କାର ଦୁଇଟି ବେଲ ବଣ୍ଡରେ ତାଙ୍କୁ ଜାମିନ ପ୍ରଦାନ କରାଯାଇଛି । ଗିରଫ ପରେ ସାପ ବିଷ ଯୋଗାଉଥିବା ନେଇ ସ୍ବୀକାର କରିଥିଲେ ଏଲଭିସ ।
ଗତବର୍ଷ ସାପ ବିଷ ଯୋଗାଉଥିବା ଅଭିଯୋଗରେ ଗିରଫ ହୋଇଥିଲେ । ବନ୍ୟଜନ୍ତୁ ସୁରକ୍ଷା ଆଇନ ଉଲ୍ଲଙ୍ଘନ ମାମଲାରେ ତାଙ୍କୁ ଗିରଫ କରାଯାଇଥିଲା । ଗତବର୍ଷ ସାପ ବିଷ ମାମଲାରେ ସେକ୍ଟର-୪୯ ନୋଏଡା ପୋଲିସ ତାଙ୍କ ବିରୋଧରେ ଏଫ୍ଆଇଆର୍ ରୁଜୁ କରିଥିଲା । ଏଥିପାଇଁ ଏଲଭିସଙ୍କୁ ପଚରାଉଚରା କରିବା ପାଇଁ ପୋଲିସ ଡାକିଥିଲା । ଦୀର୍ଘ ଘଣ୍ଟା ଧରି ପଚରାଉଚରା ପରେ କାଲି ଗିରଫ ହୋଇଥିଲେ ଏଲଭିସ । ଏଲଭିସ ରେଭ ପାର୍ଟିରେ ବିଷଧର ସାପର ବିଷ ବ୍ୟବହାର ସହ ଭିଡିଓ ସୁଟ୍ ପାଇଁ ସାପ ମଧ୍ୟ ବ୍ୟବହାର କରୁଥିବା ଅଭିଯୋଗ ରହିଛି । ନୋଏଡାରେ ସାପ ବିଷ ଯୋଗାଉଥିବା ଏକ ଗ୍ୟାଙ୍ଗର ପର୍ଦ୍ଦାଫାସ ସମୟରେ ଏଲଭିସ ଯାଦବଙ୍କ ନାଁ ତଦନ୍ତ ଘେରକୁ ଆସିଥିଲା । ମାମଲାରେ ପୋଲିସ ୪ ଜଣ ସାପ ଧରାଳିଙ୍କ ସମେତ ୫ ଜଣଙ୍କୁ ଗିରଫ କରିଥିଲା । ଚଢ଼ାଉ ବେଳେ ୯ଟି ସାପ ସହ ସାପ ବିଷ ଜବତ କରାଯାଇଥିଲା ।
ମାର୍ଚ୍ଚ ୨୮ ଯାଏଁ ଇଡି ହେପାଜତକୁ ଗଲେ କେଜ୍ରିଓ୍ବାଲ, କହିଲେ- ଜେଲରେ ରହି ବି ଦେଶ ପାଇଁ କାମ କରିବି
ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ଆପକୁ ଝଟକା । ମଦନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗିରଫ ହେବା ପରେ ଦଳରେ ନୈରାଶ୍ୟ । କେଜ୍ରିୱାଲ କହିଛନ୍ତି, ତାଙ୍କ ଜୀବନ ଦେଶ ଲାଗି ଉତ୍ସର୍ଗୀକୃତ । ତେଣେ ଦୁର୍ନୀତିରେ କେଜ୍ରିୱାଲ ସମ୍ପୃକ୍ତ ବୋଲି କୋର୍ଟରେ ଦର୍ଶାଇଛି ଇଡି । ଆସନ୍ତା ମାର୍ଚ୍ଚ ୨୮ ଯାଏଁ ପ୍ରବର୍ତ୍ତନ ନିର୍ଦ୍ଦେଶାଳୟ ହେପାଜତକୁ ଯାଇଛନ୍ତି କେଜ୍ରିୱାଲ ।
‘ମୋ ଜୀବନ ଦେଶ ଲାଗି ଉତ୍ସର୍ଗୀକୃତ । ଜେଲରେ ରହି ସୁଦ୍ଧା ଦେଶ ପାଇଁ କାମ କରିବି ।’ ମଦନୀତି ମାମଲାରେ ଗିରଫ ହେବା ପରେ ଏହି ମନ୍ତବ୍ଯ ଦେଇଛନ୍ତି ଦିଲ୍ଲୀ ମୁଖ୍ଯମନ୍ତ୍ରୀ ଅରବିନ୍ଦ କେଜ୍ରିୱାଲ । ଦେଶ ଇତିହାସରେ ପ୍ରଥମ ଥର ଲାଗି ଜଣେ କ୍ଷମତାସୀନ ମୁଖ୍ୟମନ୍ତ୍ରୀ ଭାବେ ଗିରଫ ହୋଇଥିବା କେଜ୍ରିୱାଲଙ୍କୁ ଆଜି ନ୍ୟୁ ରାଉସ ଆଭେନ୍ଯୁ କୋର୍ଟରେ ହାଜର କରାଯାଇଥିଲା । କୋର୍ଟରେ ଇଡି କହିଛି- ମଦନୀତି ମାମଲାରେ କେଜ୍ରିୱାଲ କିଙ୍ଗପିନ ଓ ମୁଖ୍ୟ ଷଡ଼ଯନ୍ତ୍ରକାରୀ । ମଦ ଦୁର୍ନୀତି ପରିମାଣ ୧୦୦ କୋଟି ନୁହଁ, ୬୦୦ କୋଟି । ଏହି ଟଙ୍କା ପଞ୍ଜାବ ଓ ଗୋଆ ନିର୍ବାଚନରେ ବ୍ୟୟ ହୋଇଥିଲା । ଏହି ଘଟଣାରେ ପୂର୍ବରୁ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଓ ରାଜ୍ଯସଭା ସାଂସଦ ସଞ୍ଜୟ ସିଂଙ୍କୁ ଗିରଫ କରାଯାଇଥିଲା ।
କେଜ୍ରିୱାଲଙ୍କ ଗିରଫଦାରୀ ପ୍ରତିବାଦରେ ଦିଲ୍ଲୀ, ପଞ୍ଜାବ ଓ ଗୋଆ ସମେତ ଅନ୍ଯାନ୍ଯ ସ୍ଥାନରେ ଜୋରଦାର ପ୍ରତିବାଦ କରିଛନ୍ତି ଆପ୍ କର୍ମୀ । ବିଭିନ୍ନ ସ୍ଥାନରେ ପୋଲିସ ସହ ଧସ୍ତାଧସ୍ତି ହୋଇଥିବାବେଳେ ଆନ୍ଦୋଳନକାରୀଙ୍କ ଉପରକୁ ପାଣିମାଡ଼ କରିଛି ପୋଲିସ । ତେଣେ ଦିଲ୍ଲୀ ଆଲିପୁର ଥାନାରେ ଆପ କର୍ମୀଙ୍କୁ ବି ଅଟକ ରଖିଥିଲା ପୋଲିସ ।
ଏବେ ପ୍ରଶ୍ନ ଉଠୁଛି କେଜ୍ରିଓ୍ବାଲଙ୍କ ପରେ କିଏ ନେବେ ଆପ୍ ନେତୃତ୍ବ ? କିଏ ହେବେ ପରବର୍ତ୍ତୀ ସିଏମ । ଚର୍ଚ୍ଚାରେ ପତ୍ନୀ ସୁନୀତା କେଜ୍ରିଓ୍ବାଲଙ୍କ ନାଁ । ସେ ଜଣେ ପୂର୍ବତନ ଆଇଆରଏସ ଅଧିକାରୀ । ସେହିପରି ଶିକ୍ଷା, ଅର୍ଥ, ପୂର୍ତ୍ତ, ରାଜସ୍ବ ବିଭାଗ ମନ୍ତ୍ରୀ ଆତିଶି ଓ ସ୍ବାସ୍ଥ୍ୟ ଓ ନଗର ବିକାଶ ମନ୍ତ୍ରୀ ସୌରଭ ଭରଦ୍ବାଜଙ୍କ ଉପରେ ରହିଛି ନଜର । ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନଙ୍କ ନାଁ ବି ରହିଛି ଚର୍ଚ୍ଚାରେ ।
ଲୋକସଭା ନିର୍ବାଚନ ପୂର୍ବରୁ କେଜ୍ରିୱାଲଙ୍କ ଗିରଫ ଆପ୍ ମହଲରେ ସୃଷ୍ଟି କରିଛି ଝଡ଼ । ନିକଟ ଇତିହାସ କହୁଛି ମନୀଷ ସିସୋଦିଆ ଓ ସଞ୍ଜୟ ସିଂଙ୍କ ପରି କେଜ୍ରିୱାଲଙ୍କୁ ମିଳି ନପାରେ ଜାମିନ ।
ଶ୍ରୀମନ୍ଦିର ପରିକ୍ରମା ମାର୍ଗରେ ସାଂସ୍କୃତିକ କାର୍ଯ୍ୟକ୍ରମ ସହ ଦୈନିକ ସକାଳୁ ହେବ ବେଦ ପାଠ
ପୁରୀ: ଶ୍ରୀମନ୍ଦିର ପରିକ୍ରମା ମାର୍ଗରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଆଯିବ ସ୍ବତନ୍ତ୍ର ପଦକ୍ଷେପ । ପ୍ରତ୍ୟେହ ଶ୍ରୀମନ୍ଦିର ପରିକ୍ରମା ମାର୍ଗରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ସହ ଦୈନିକ ସକାଳୁ ହେବ ବେଦ ପାଠ ଓ ନାମ ସଂକୀର୍ତ୍ତନ । ଏଥିରୁ ଶ୍ରୀମନ୍ଦିରକୁ ଆସୁଥିବା ଭକ୍ତ ସ୍ୱତନ୍ତ୍ର ଅନୁଭୂତି ନେଇ ଫେରିବେ । ସେଥିପାଇଁ ଆଗାମୀ ଦୋଳପୂର୍ଣ୍ଣିମାଠାରୁ ଏହି ସ୍ୱତନ୍ତ୍ର କାର୍ଯ୍ୟ ଆରମ୍ଭ କରାଯିବାକୁ ଥିବା ବେଳେ ଦୋଳବେଦୀକୁ ମଧ୍ୟ ନୂତନ ରୂପ ପ୍ରଦାନ କରାଯାଇଛି ।
ଶ୍ରୀଜଗନ୍ନାଥ ସଂସ୍କୃତିର ପ୍ରଚାର ସହ ବଢିବ ଆଧ୍ଯାତ୍ମିକ ଭାବନା । ନୂଆ ଓ ଭବ୍ଯ ଅନୁଭବ ନେଇ ଶ୍ରୀକ୍ଷେତ୍ରରୁ ଫେରିବେ ଶ୍ରଦ୍ଧାଳୁ । ଶ୍ରୀମନ୍ଦିର ପ୍ରଶାସନ ପକ୍ଷରୁ ସାଧାରଣ ଭକ୍ତ ଓ ଶ୍ରଦ୍ଧାଳୁଙ୍କ ମଧ୍ୟରେ ଆଧ୍ୟାତ୍ମିକ ଭାବନା ସୃଷ୍ଟି କରିବା ପାଇଁ ବ୍ୟବସ୍ଥା କରାଯିବ । ଏ ନେଇ ସ୍ବତନ୍ତ୍ର ବୈଠକରେ ନିଷ୍ପତ୍ତି ଅନୁସାରେ ଆସନ୍ତା ଦୋଳପୂର୍ଣ୍ଣିମାରୁ ଶ୍ରୀମନ୍ଦିର ପରିକ୍ରମା ମାର୍ଗରେ ପ୍ରତିଦିନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ପ୍ରତିଦିନ ସକାଳ ୬ଟାରୁ ୭ଟା ମଧ୍ୟରେ ସିଂହଦ୍ଵାର ସମ୍ମୁଖରେ ବେଦ ପାଠ ସହ ପରିକ୍ରମା ମାର୍ଗରେ ନାମ ସଂକୀର୍ତ୍ତନ ଅନୁଷ୍ଠିତ ହେବ । ସେହିପରି ପ୍ରତିଦିନ ସନ୍ଧ୍ୟା ସମୟରେ ଶ୍ରୀମନ୍ଦିର ପରିକ୍ରମା ମାର୍ଗର ପଶ୍ଚିମ ଓ ଉତ୍ତର ଦ୍ଵାର କୋଣରେ ଥିବା ସ୍ବତନ୍ତ୍ର ଗ୍ୟାଲେରୀରେ ଓଡ଼ିଶୀ, ଛାନ୍ଦ, ଚମ୍ପୁ, ଗୋଟିପୁଅ, ମାହାରୀ ନୃତ୍ୟ ସହିତ ମହାପ୍ରଭୁଙ୍କ ବିଭିନ୍ନ କଥାବସ୍ତୁକୁ ନେଇ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ ।
ଦୋଳପୂର୍ଣିମା ଅବସରରେ ଏହି ସ୍ୱତନ୍ତ୍ର ଆଧ୍ୟାତ୍ମିକ କାର୍ଯ୍ୟ ଆରମ୍ଭ ହେବାକୁ ଥିବା ବେଳେ ଦୋଳବେଦୀକୁ ସମ୍ପୂର୍ଣ୍ଣ ନୂଆ ରୂପ ପ୍ରଦାନ କରାଯାଇଛି । ଶ୍ରୀମନ୍ଦିରରେ ଭକ୍ତଙ୍କ ସଂଖ୍ୟା ବଢୁଥିବା ବେଳେ ସେମାନଙ୍କ ମଧ୍ୟରେ ଅଧିକ ଉତ୍ସାହ ମଧ୍ୟ ଦେଖାଯାଉଛି । ପରିକ୍ରମା ପ୍ରକଳ୍ପ ଉଦଘାଟନ ସମୟରେ ଆଧ୍ୟାତ୍ମିକ ବାତାବରଣ ସୃଷ୍ଟି ନେଇ ନାମ ସଂକୀର୍ତ୍ତନ ଓ ବେଦପାଠ କରାଯାଇଥିଲା । କାର୍ଯ୍ୟକ୍ରମରେ ସେବାୟତଙ୍କୁ ସାମିଲ କରାଯାଇଥିବାରୁ ସେମାନେ ବେଶ ଉତ୍ସାହିତ ଥିବା କହିଛନ୍ତି ।
ଶ୍ରୀଜଗନ୍ନାଥ ସଂସ୍କୃତିକୁ ବିଶ୍ୱବ୍ୟାପୀ କରିବା ନେଇ ପଦକ୍ଷେପକୁ ଚରିତାର୍ଥ କରିବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଆଯାଉଥିବା ଉଦ୍ୟମ ବେସ ପ୍ରଶଂସନୀୟ ବୋଲି କହିଛନ୍ତି ଶ୍ରଦ୍ଧାଳୁ ।
ଟିକେଟ ନମିଳିବା ଆଶଙ୍କାରେ ଭର୍ତ୍ତୃହରି ବିଜେଡି ଛାଡିଛନ୍ତି: ବିଜେଡି
ଭୁବନେଶ୍ବର: କଟକ ସାଂସଦ ଭର୍ତ୍ତୃହରି ମହତାବଙ୍କୁ ଘାରିଥିଲା ବିଜେଡିରୁ ଟିକେଟ୍ ନମିଳିବା ଡର । ଏହି ଆଶଙ୍କାରେ ବିଜେଡି ଛାଡିଛନ୍ତି ଭର୍ତ୍ତୃହରି । ଏନେଇ ପ୍ରେସମିଟ କରି କହିଛି ବିଜେଡି ।
ଦଳ ପକ୍ଷରୁ କୁହାଯାଇଛି, ନିଜ ନିର୍ବାଚନମଣ୍ଡଳୀରେ କୌଣସି ବିକାଶଧାରାରେ ଭର୍ତ୍ତୃହରିଙ୍କ ଅବଦାନ ନଥିଲା । ତାଙ୍କ ବିରୋଧରେ ବହୁତ ବଡ଼ ଅସନ୍ତୋଷ ଥିଲା । ୨୦୧୯ ମସିହାରେ ତାଙ୍କୁ ଯେତେବେଳେ କେହି ପ୍ରାର୍ଥୀ କରିବାକୁ ସୁଯୋଗ ଦେଇ ନଥିଲେ ସେତେବେଳେ ତାଙ୍କୁ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ପୁଣି ନିର୍ବାଚନ ଲଢିବାକୁ ସୁଯୋଗ ଦେଇଥିଲେ । ନିଜ ସଂସଦୀୟ କ୍ଷେତ୍ରରେ ସ୍ଥିତି ବହୁତ ଖରାପ ହୋଇଯାଇଥିଲା ବୋଲି ସେ ଆଗୁଆ ଅନୁଭବ କରିସାରିଥିଲେ । ସେଥିପାଇଁ ହୁଏତ ଆଉ ସେ ବିଜେଡିରୁ ସୁଯୋଗ ପାଇ ନପାରନ୍ତି ବୋଲି ଆଶଙ୍କା କରି ବିଜେଡି ଛାଡିଛନ୍ତି ।
ଦଳ ପକ୍ଷରୁ ଆଗକୁ କୁହାଯାଇଛି, ମୁଖ୍ଯମନ୍ତ୍ରୀ ତାଙ୍କୁ ସବୁବେଳେ ଶୁଣିଛନ୍ତି, ଅଗ୍ରାଧିକାର ଦେଇଛନ୍ତି । ଏବେ ସେ ବୁଝିଯାଇଛନ୍ତି ଯେ, ଆଉ ତାଙ୍କୁ ବିଜେଡି ପ୍ରାର୍ଥୀ କରି ନପାରେ । ଯେଉଁ ଦଳ ତାଙ୍କୁ ୬ ଥର ସୁଯୋଗ ଦେଲା ତାକୁ ଛାଡି ଚାଲିଯିବା ଅତ୍ଯନ୍ତ ଦୁଃଖର ବିଷୟ ବୋଲି କହିଛି ବିଜେଡି ।
ଢେଙ୍କାନାଳରେ ବିରାଟ ମିଶ୍ରମ ପର୍ବ: ବିଜେଡିରେ ମିଶିଲେ ବିଜେପିର ହଜାରେରୁ ଅଧିକ କର୍ମୀ
ଢେଙ୍କାନାଳ: ଢେଙ୍କାନାଳରେ ବିଜେଡିର ବିରାଟ ମିଶ୍ରଣ ପର୍ବ । ବଢ଼ିଲା ବିଜେଡି ବଳ । ୧ ହଜାରରୁ ଅଧିକ ବିଜେପି କର୍ମୀ ଯୋଗଦେଲେ ବିଜେଡିରେ । ଢେଙ୍କାନାଳ ମ୍ଯୁନିସିପାଲିଟିର ୬ ଜଣ କାଉନସିଲରଙ୍କ ସମେତ ବିଜେପିର ବହୁ ପୁରୁଖା କର୍ମୀ ଓ ନେତା ବିଜେଡିରେ ଯୋଗଦେଇଛନ୍ତି । ଏମାନଙ୍କ ମଧ୍ୟରେ ଅଛନ୍ତି ୨ ଶହରୁ ଅଧିକ ମହିଳା ।
ନିର୍ବାଚନ ପାଖେଇ ଆସୁଥିବା ବେଳେ ବିଜେପିକୁ ବଡ଼ ଝଟକା ଲାଗିଛି । ମୁଖ୍ୟମନ୍ତ୍ରୀଙ୍କ ଆଦର୍ଶ ଓ ଲୋକାଭିମୁଖୀ କାର୍ଯ୍ୟରେ ଅନୁପ୍ରାଣିତ ହୋଇ ୧ ହଜାରରୁ ଅଧିକ ବିଜେପି କର୍ମୀ ବିଜେଡିରେ ଯୋଗଦେଇଛନ୍ତି। ମିଶ୍ରଣ ପର୍ବରେ ଢେଙ୍କାନାଳ ବିଧାୟକ ସୁଧୀର କୁମାର ସାମଲ, ସାଂସଦ ମହେଶ କୁମାର ସାହୁ, ବିଜେଡି ଜିଲ୍ଲା ସଭାପତି ନୃସିଂହ ଚରଣ ସାହୁ, କାର୍ଯ୍ୟକାରୀ ସଭାପତି ଦେବୀ ପ୍ରସାଦ ଭୂତିଆ, ଉପ-ନଗରପାଳ ପ୍ରକାଶ ଚନ୍ଦ୍ର କୁଅଁର, ଓକିଲ ସଂଘ ସଭାପତି ଗୋପାଳ ଚନ୍ଦ୍ର ପାତ୍ର, ଜିଲ୍ଲା ମହିଳା ସଭାପତି ସାଗରିକା ମିଶ୍ର ପ୍ରମୁଖ ଉପସ୍ଥିତ ଥିଲେ ।
ରାଜ୍ୟରେ ଏକାକୀ ଲଢ଼ିବ ବିଜେଡି, ହାସଲ କରିବ ତିନି ଚତୁର୍ଥାଂଶରୁ ଅଧିକ ଆସନ
ଭୁବନେଶ୍ବର: ବିଜେପି-ବିଜେଡି ମେଣ୍ଟକୁ ନେଇ ଚାଲିଥିବା ଚର୍ଚ୍ଚାରେ ପୂର୍ଣ୍ଣଚ୍ଛେଦ । ରାଜ୍ୟରେ ଏକାକୀ ନିର୍ବାଚନ ଲଢ଼ିବ ବିଜେଡି । ଦଳ ୧୪୭ ବିଧାନସଭା ଓ ୨୧ ଲୋକସଭା ଆସନରେ ଏକାକୀ ଲଢ଼ିବ । ଏନେଇ ସୋସିଆଲ ମଡିଆ ଏକ୍ସରେ ସୂଚନା ଦେଇଛନ୍ତି ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ନିର୍ବାଚନରେ ଓଡ଼ିଶାବାସୀଙ୍କ ସମର୍ଥନ ଏବଂ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ନେୃତ୍ୱତ୍ୱରେ ବିଜେଡି ତିନି ଚତୁର୍ଥାଂଶରୁ ଅଧିକ ଆସନରେ ବିଜୟୀ ହେବ ବୋଲି ପ୍ରଣବ ଦୃଢୋକ୍ତି ପ୍ରକାଶ କରିଛନ୍ତି ।
ପ୍ରଣବ କହିଛନ୍ତି, ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ଓ ଓଡ଼ିଶାବାସୀଙ୍କ ଆସ୍ଥା ବଳରେ ବିଜେଡି ରାଜ୍ୟର ସେବା କରିବା ସହ ସବୁ କ୍ଷେତ୍ରରେ ବ୍ୟାପକ ରୂପାନ୍ତରଣ ଆଣିଛି । ରାଷ୍ଟ୍ର ଗଠନ ପାଇଁ ସହକାରୀ ସଂଘବାଦ ଓ ରାଷ୍ଟ୍ରନୀତିଜ୍ଞତା ମନୋଭାବ ସହିତ ଓଡ଼ିଶାବାସୀଙ୍କୁ ସବୁବେଳେ ଆଗଧାଡ଼ିରେ ରଖି ସେମାନଙ୍କ କଲ୍ୟାଣ ପାଇଁ ବିଜେଡି ନିଷ୍ପତ୍ତି ନେବ । ନୂତନ ଓ ସଶକ୍ତ ଓଡ଼ିଶା ବିଜେଡିର ଲକ୍ଷ୍ୟ ହେବ । ଲୋକପ୍ରିୟ ନେତା ନବୀନ ପଟ୍ଟନାୟକଙ୍କ ନେତୃତ୍ୱରେ ଏହାକୁ ହାସଲ କରିବା ଦିଗରେ ଦଳ ଆଗେଇ ଚାଲିଛି ।