ଆସିକା : ଆଖିରୁ ଧାର ଧାର ଲୁହ । ଥର ଥର ଓଠରେ ସାହାଯ୍ୟ ପାଇଁ ଗୁହାରୀ। ମନକୁ ଭାଙ୍ଗି ଅସୁମାରୀ ଦୁଃଖ ଦେଇଛି ବାତ୍ୟା ଅର୍ଣ୍ଣବ । ମୁଣ୍ଡ ଉପରୁ ଛାତ ଛଡାଇ ନେଇଛି । ଚାଷ ଉଜାଡି ପେଟକୁ ଲାତ ମାରିଛି । ସୁସୁ ଗର୍ଜନ କରି ଆସି ସୁନେଲି ସ୍ବପ୍ନ ଉପରେ ପାଣି ଢାଳିଦେଇଛି । ଏବେ ସରକାରୀ ସହୟତାକୁ ଅପେକ୍ଷା କରିଛି ବିପନ୍ନ । ଚାରିଆଡେ ପ୍ରଳୟଙ୍କରୀ ଚିତ୍ର । ଗଞ୍ଜାମ ଜିଲ୍ଲା ଆସିକା ବ୍ଲକର ନବରତ୍ନପୁର ଗାଁକୁ ଶ୍ରୀହୀନ କରିଦେଇଛି ବାତ୍ୟା ଅର୍ଣ୍ଣବ ।
ଦିନେ ସୁ ବିକ୍ଷାତ ଶୈବପୀଠ ଚନ୍ଦ୍ରକଳ୍ପେଶ୍ବରଙ୍କ ପାଇଁ ପରିଚୟ ପାଇଥିଲା ଗାଁ । ଆଜି ରାସ୍ତାଘାଟ, ଘର ଦ୍ବାର ସବୁ ପଙ୍କ ମୟ । ନଇ କୂଳିଆ ଗାଁର ଏ ଅବସ୍ଥା ଦେଖି ସମସ୍ତେ ହତବାକ । ମୁଣ୍ଡ ଝାଳ ତୁଣ୍ଡରେ ମାରି ଗୋଟି ଗୋଟି ଟଙ୍କା ସଞ୍ଚି ଗଢି ତୋଳିଥିଲେ ସ୍ବପ୍ନର ଘର । ହେଲେ ଆଜି ଘରର ଗୋଟି ଗୋଟି ପଥର ବିଲରେ ଗଡୁଛି । ବନ୍ୟା ପାଣି ଛାଡିଛି, ହେଲେ କ୍ଷୟକ୍ଷତିର ଗଭୀର କ୍ଷତ, ମନରୁ ଯାଉ ନଥିବା କହିଛନ୍ତି ବିପନ୍ନ । ଅନ୍ୟପଟେ ନବରତ୍ନପୁର ଗାଁର ବାପା, ମା ସୁରତରେ କାମ କରୁଥିଲେ। କିନ୍ତୁ ଝିଅ ନିଜ ବୃଦ୍ଧା ଆଇଙ୍କୁ ଧରି ଅନ୍ୟ ସ୍ଥାନକୁ ଚାଲି ଯାଇଥିଲେ।
ଜୀବନ ସିନା ବଞ୍ଚିଗଲା ହେଲେ ବନ୍ୟା ଜଳରେ ଘରଟି ସମ୍ପୂର୍ଣ୍ଣ ଭାଙ୍ଗି ଗଲା l ଆସିକା ସହରରେ ଶହ ଶହ କୋଟିର କ୍ଷୟ କ୍ଷତି ହୋଇଥିବା ଅଭିଯୋଗ ହୋଇଛି । ପ୍ରତିଟି ଲୋକ ଭୋକ ବିକଳରେ ଆଉଟୁ ପାଉଟୁ ହେଉଛନ୍ତି । ବିପର୍ଯ୍ୟୟ ବେଳେ ସରକାରଙ୍କ ସହାୟତା ସମୁଦ୍ରକୁ ଶଙ୍ଖେ ପାଲଟିଛି। ଏଭଳି ସ୍ଥିତିରେ ସ୍ବେଚ୍ଛାସେବୀ ସଙ୍ଗଠନ ଯୋଗାଉଥିବା ସହାୟତା କେତେ ଦିନ ବୋଲି ପ୍ରଶ୍ନ କରିଛନ୍ତି ବିପନ୍ନ ।
