ନୂଆଦିଲ୍ଲୀ : ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନାଙ୍କ ଘରବାହୁଡ଼ା। କଂଗ୍ରେସକୁ ପୁଣି ଫେରିଛନ୍ତି ଶ୍ରୀକାନ୍ତ। ଦିଲ୍ଲୀରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ହୋଇଛି ମିଶ୍ରଣ ପର୍ବ। ୨୦୧୯ରେ ତାଙ୍କୁ କେତେକ କାରଣରୁ କଂଗ୍ରେସରୁ ବହିଷ୍କାର କରାଯାଇଥିଲା। କଂଗ୍ରେସର ମୁଖ୍ୟ କାର୍ଯ୍ୟାଳୟରେ ଓଡ଼ିଶା କଂଗ୍ରେସ ପ୍ରଭାରୀ ଅଜୟ କୁମାର ଓ କଂଗ୍ରେସ ନେତା ବିନୀତ ପୁନିଆ ଉପସ୍ଥିତି ରେ ସେ କଂଗ୍ରେସରେ ସାମିଲ ହୋଇଥିଲେ।
ମେଣ୍ଟ ସମ୍ଭାବନାକୁ ନେଇ ବିଜେଡି ପ୍ରତିକ୍ରିୟା, ରାଜ୍ୟ ସ୍ୱାର୍ଥ ପାଇଁ ଯାହା ଆବଶ୍ୟକ ତାହା କରାଯିବ
ଭୁବନେଶ୍ୱର : ବିଜେପି ଓ ବିଜେଡି ମଧ୍ୟରେ ଆଗାମୀ ସାଧାରଣ ନିର୍ବାଚନରେ ମେଣ୍ଟ ହୋଇପାରେ । ଏଭଳି ଚର୍ଚ୍ଚାକୁ ବଳ ଦେଇଥିଲା ବୁଧବାର ଦିନ ଭୁବନେଶ୍ୱର ଓ ନୂଆଦିଲ୍ଲୀରେ ଦୁଇ ଦଳଙ୍କର ହାଇଲେଭଲ ମିଟିଂ । ଅପରାହ୍ନରେ ଭୁବନେଶ୍ୱରରେ ବିଜେଡିର ବରିଷ୍ଠ ନେତୃତ୍ୱ ନବୀନ ନିବାସର ଏକାଠି ହୋଇଥିଲେ । ଅନ୍ୟପକ୍ଷରେ ନୂଆଦିଲ୍ଲୀରେ ରାଜ୍ୟ ବିଜେପିର ନେତା କେନ୍ଦ୍ରୀୟ ନେତୃତ୍ୱ ସହିତ ସଂଧ୍ୟାରେ ବୈଠକ କରିଥିଲେ । ନବୀନ ନିବାସରେ ବିଜେଡିର ଗୁରୁତ୍ବପୂର୍ଣ୍ଣ ବୈଠକ ପରେ ଏକ ପ୍ରେସ ବିଜ୍ଞପ୍ତି ମାଧ୍ଯମରେ ଦଳର ଆଭିମୁଖ୍ଯ ନେଇ ସୂଚନା ଦେଇଛନ୍ତି ବିଜେଡି ସାଧାରଣ ସଂପାଦକ ତଥା ସାଂସଦ ମାନସ ମଙ୍ଗରାଜ । ୨୦୩୬ ଓଡିଶାକୁ ୧୦୦ ବର୍ଷ ପୂର୍ତ୍ତି ପାଇଁ ମୁଖ୍ଯମନ୍ତ୍ରୀ ଯେଉଁ ଲକ୍ଷ୍ଯ ଧାର୍ଯ୍ୟ କରିଛନ୍ତି ତାହାକୁ ହାସଲ କରିବା ପାଇଁ ବୃହତ୍ତର ସ୍ବାର୍ଥ ଦୃଷ୍ଟିରୁ ଯେଉଁ ନିଷ୍ପତ୍ତି ଆବଶ୍ଯକ ସେହି ନିଷ୍ପତ୍ତି ବିଜେଡି ନେବ ବୋଲି ବିଜ୍ଞପ୍ତିରେ କୁହାଯାଇଛି ।
ଏହାରି ଭିତରେ ସଂଧ୍ୟା ବେଳେ ବିଜେଡି ତରଫରୁ ଆସିଥିଲା ପ୍ରତିକ୍ରିୟା । ନବୀନ ନିବାସରୁ ବୈଠକରୁ ବାହାରି ବରିଷ୍ଠ ବିଜେଡି ନେତା ଅରୁଣ ସାହୁ କହିଥିଲେ ଯେ, ରାଜ୍ଯ ସ୍ବାର୍ଥ ଅନୁସାରେ ନିଷ୍ପତ୍ତି ନିଆଯିବ । ଠିକ ସମୟରେ ଠିକ ନିଷ୍ପତ୍ତି ନିଆଯିବ । ସେହିପରି ବିଜେଡିର ବରିଷ୍ଠ ଉପସଭାପତି ଦେବୀ ମିଶ୍ର କହିଛନ୍ତି, ବୈଠକରେ ଆଗାମୀ ସାଧାରଣ ନିର୍ବାଚନ ଏବଂ ବିଭିନ୍ନ ଦିଗ ନେଇ ଆଲୋଚନା ହୋଇଛି । ଓଡ଼ିଶା ଆଜି ସଫଳତା ପାଇ ଚାଲିଛି । ରାଜ୍ଯକୁ ଉଚ୍ଚତର ସୋପାନକୁ ନେବା ପାଇଁ ପ୍ରୟାସ ଜାରି ରହିଛି । ୧୨ ବର୍ଷ ପରେ ଶହେ ବର୍ଷ ପୂରଣ କରୁଛି ସ୍ବତନ୍ତ୍ର ଓଡ଼ିଶା ଭାବେ । ଏଥିପାଇଁ ଯେଉଁ ମାଇଲଷ୍ଟୋନ ମୁଖ୍ଯମନ୍ତ୍ରୀ ଧାର୍ଯ୍ଯ କରିଛନ୍ତି ସେଥିପାଇଁ ଯାହା ଆବଶ୍ଯକ ପଡ଼ିବ ଦଳ ସେ ନିଷ୍ପତ୍ତି ନେବ ବୋଲି କହିଛନ୍ତି ଦେବୀ ମିଶ୍ର ।
ବୈଠକରେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ, ଫାଇଭ-ଟି ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ, ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର, ମନ୍ତ୍ରୀ ଟୁକୁନି ସାହୁ, ଅଶୋକ ଚନ୍ଦ୍ର ପଣ୍ଡା, ବିଜେଡି ସାଧାରଣ ସଂପାଦକ ସଞ୍ଜୟ ଦାଶ ବର୍ମା, ସାଂସଦ ମାନସ ମଙ୍ଗରାଜ, ମନ୍ତ୍ରୀ ପ୍ରଦୀପ ଅମାତ, ପ୍ରୀତିରଞ୍ଜନ ଘଡେ଼ଇ, ପ୍ରତାପ ଦେବ, ଉଷା ଦେବୀ, ବିକ୍ରମ ଆରୁଖ, ଜଗନ୍ନାଥ ସାରକା, ପ୍ରଫୁଲ ମଲ୍ଲିକ, ଅତୁନ ସବ୍ୟସାଚି ନାୟକ, ବରିଷ୍ଠ ଉପସଭାପତି ଦେବୀ ମିଶ୍ର, ବିଧାୟକ ଅରୁଣ ସାହୁ, ପ୍ରଣବ ବଳବନ୍ତରାୟ, ସୁଶାନ୍ତ ରାଉତ ପ୍ରମୁଖ ଉପସ୍ଥିତ ଥିଲେ ।
ଅନ୍ୟପକ୍ଷରେ ନୂଆଦିଲ୍ଲୀରେ ମେଣ୍ଟ ସମ୍ଭାବନା ଉପରକେ ପ୍ରତିକ୍ରିୟା ରଖି ବିଜେପିର ବରିଷ୍ଠ ନେତା ଜୁଏଲ ଓରାମ କହିଥିଲେ ଯେ, ବୈଠକରେ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଥିଲା । ମେଣ୍ଟ ହେବ କି ନାହିଁ ତାହା କେନ୍ଦ୍ରୀୟ ନେତୃତ୍ୱ ନିଷ୍ପତି ନେବ । ବୈଠକରେ ସବୁ ଲୋକସଭା ଆସନ ଓ ବିଧାନସଭା ଆସନ ନେଇ ଆଲୋଚନା ହୋଇଥିଲା ବୋଲି ସେ କହିଥିଲେ । ତେବେ ମେଣ୍ଟକୁ ନେଇ ସେ ସିଧାସଳଖ କୌଣସି ପ୍ରତିକ୍ରିୟା ଦେଇନଥିଲେ ।
ମେଣ୍ଟ ହେବ କି ନାହିଁ, କାହାକୁ ଟିକେଟ ମିଳିବ ସବୁ ନିଷ୍ପତ୍ତି କେନ୍ଦ୍ର ନେବ: ଜୁଏଲ ଓରାମ
ନୂଆଦିଲ୍ଲୀ : ଦିଲ୍ଲୀରେ ଓଡ଼ିଶା ବିଜେପିର କୋର୍ କମିଟି ବୈଠକ ଶେଷ ହୋଇଛି। ବୈଠକ ସମ୍ପର୍କରେ ସାଂସଦ ଜୁଏଲ ଓରାମ ଦେଇଛନ୍ତି ସୂଚନା । ସେ କହିଛନ୍ତି, ବୈଠକରେ ସମସ୍ତ ସିଟ ଉପରେ ଆଲୋଚନା ହୋଇଛି । ରାଜନୈତିକ ସ୍ଥିତି ଉପରେ ଆଲୋଚନା ହୋଇଛି ।ମେଣ୍ଟ ଉପରେ ନିର୍ଦ୍ଦିଷ୍ଟ ଆଲୋଚନା ହୋଇନାହିଁ। ତେବେ ମେଣ୍ଟ ସମ୍ପର୍କରେ ଶେଷ ନିଷ୍ପତ୍ତି ଶୀର୍ଷ ନେତୃତ୍ୱ ନେବେ । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଅଧ୍ୟକ୍ଷତାରେ ବସିଥିଲା ଏହି ବୈଠକ।
କୋର୍ କମିଟିରେ ଥିବା ୧୮ ଜଣ ସଦସ୍ଯ ବୈଠକରେ ସାମିଲ ହୋଇଥିଲେ। ବୈଠକରେ ଗୃହମନ୍ତ୍ରୀ ଅମିତ ଶାହ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ବିନୀ ବୈଷ୍ଣବ ଉପସ୍ଥିତ ଥିବାବେଳେ ଓଡ଼ିଶା ବିଜେପି ସଭାପତି ମନମୋହନ ସାମଲ ଉପସ୍ଥିତ ଥିଲେ । ଏହା ସହ ପ୍ରଭାରୀ ବିଜୟପାଲ ସିଂହ ତୋମର ବି ଉପସ୍ଥିତ ଥିଲେ।
ଭୁଲ ଅପରେସନ ପାଇଁ ଡ଼ାକ୍ତରଙ୍କୁ ଦଣ୍ଡ; ମାର୍ଚ୍ଚ ୧ ରୁ ୩ ମାସ ଯାଏଁ ଡାକ୍ତରଙ୍କ ପଞ୍ଜୀକରଣ ବାତିଲ
ଭୁବନେଶ୍ୱର : ଭୁଲ ଅପରେସନ ପାଇଁ ଡ଼ାକ୍ତରଙ୍କୁ ଦଣ୍ଡ। ମାର୍ଚ୍ଚ ୧ ରୁ ୩ ମାସ ଯାଏଁ ଡାକ୍ତରଙ୍କ ପଞ୍ଜୀକରଣ ବାତିଲ କରିଛି ଓଡ଼ିଶା କାଉନସିଲ ଅଫ ମେଡିକାଲ୍ ରେଜିଷ୍ଟ୍ରେସନ। ସ୍ତ୍ରୀ ଓ ପ୍ରସୂତି ବିଭାଗର ଜଣେ ଡ଼ାକ୍ତର ମହିଳାଙ୍କର ପ୍ରସବ ଜନିତ ଅସ୍ତ୍ରୋପଚାର କରିବାକୁ ଯାଇ ପେଟରେ ଗଜକନା ଛାଡ଼ି ଦେଇଥିଲେ ।
ଡାକ୍ତରଙ୍କ ଏହି ଭୁଲ ଅପରେସନ ପାଇଁ ୨୦୨୧ରୁ ମୃତ୍ୟୁ ସହ ସଂଗ୍ରାମ କରୁଛନ୍ତି ମହିଳା। ବ୍ୟାଙ୍କରେ କାମ କରୁଥିବା ଆନନ୍ଦ କୁମାର ପ୍ରସୂତି ପାଇଁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ପତ୍ନୀଙ୍କୁ ଭର୍ତ୍ତି କରିଥିଲେ। ସେଠାରେ ସେ ସମୟରେ କାର୍ଯ୍ୟ କରୁଥିବା ଡାକ୍ତର ଏହି ଭୁଲ ଅପରେସନ କରିଥିବା ଅଭିଯୋଗ ହୋଇଥିଲା । ଏ ସଂପର୍କରେ ସଂପୃକ୍ତ ଘରୋଇ ହସପିଟାଲ କର୍ତ୍ତୃପକ୍ଷ ଓ ଡାକ୍ତରଙ୍କ ପ୍ରତିକ୍ରିୟା ନେବାକୁ ଉଦ୍ୟମ କରାଯାଇଥିଲା । ହେଲେ ସେମାନଙ୍କ ପ୍ରତିକ୍ରିୟା ମିଳିପାରିନଥିଲା
ବୋର୍ଡ ପରୀକ୍ଷା ବେଳେ ୨ ମହଲା ଝରକାରେ ଲଟକି ଯୋଗାଇଲେ କପି
ନନ୍ଦିଘୋଷ ବ୍ୟୁରୋ : ନା ଅଛି ପରୀକ୍ଷକଙ୍କ ଡର , ନା ଅଛି ଧରାପଡିବାର ଭୟ । ବୋର୍ଡ ପରୀକ୍ଷାରେ ବେଧଡକ କପି କଲେ ଛାତ୍ରଛାତ୍ରୀ । ହରିୟାଣାରେ ବୋର୍ଡ ପରୀକ୍ଷା ଚାଲିଥିବା ବେଳେ ଗୁରୁଗ୍ରାମର ଏକ ପରୀକ୍ଷା କେନ୍ଦ୍ରରେ ଏପରି କପି ହେବାର ଦୃଶ୍ୟ ସାମ୍ନାକୁ ଆସିଛି ଯାହାକୁ ଦେଖିଲେ ଯେ କେହି ମୁଣ୍ଡରେ ହାତ ଦେବେ । ଯାହାର ଫଟୋ ଏବେ ସୋସିଆଲ ମିଡ଼ିରେ ଭାଇରାଲ ହେବାରେ ଲାଗିଛି ।
ସୂଚନା ଅନୁଯାୟୀ, ଚନ୍ଦ୍ରବାତୀ ନାମକ ଏକ ସ୍କୁଲର ପରୀକ୍ଷା କେନ୍ଦ୍ରରେ ଦଶମ ବୋର୍ଡ ପରୀକ୍ଷା ଚାଲିଥିବା ବେଳେ କପି କରିବାର ସବୁ ସୀମା ଲଂଘି ଯାଇଛନ୍ତି ଛାତ୍ରଛାତ୍ରୀ । ମଙ୍ଗଳବାର ପରୀକ୍ଷା ଆରମ୍ଭ ହେବାର କିଛି ସମୟ ପରେ ହିଁ କାଗଜ ଫିଙ୍ଗିବା ଏବଂ ଛାତ, ଝରକାରେ ଚଢି ସହଯୋଗୀଙ୍କୁ କପି ଯୋଗାଇବା ପରି କାମ ଆରମ୍ଭ ହୋଇଯାଇଥିଲା । ଭାଇରାଲ ହୋଉଥିବା ଫଟୋରେ କିଛି ଲୋକ ପରୀକ୍ଷା କେନ୍ଦ୍ରର ପ୍ରଥମ ଏବଂ ଦ୍ୱିତୀୟ ମହଲା ଝରକାକୁ ଚଢି କପି ଯୋଗାଉଥିବାର ଚିତ୍ର ସାମ୍ନାକୁ ଆସିଛି ।
ପରୀକ୍ଷା ରୁମରେ ଏପରି ଭୟଙ୍କର କପି ଚାଲିଥିଲେ ମଧ୍ୟ ପରୀକ୍ଷକ କିଛି ଆକ୍ସନ ନେଇଛନ୍ତି କି ନାହିଁ ତାହା ଜଣା ପଡି ନାହିଁ । ଏସବୁ ଚାଲିଥିବା ବେଳେ ସ୍କୁଲ ବାହାରେ ଡ୍ୟୁଟିରେ ଥିବା ପୋଲିସ ମଧ୍ୟ କିଛି ଆପତ୍ତି ଜଣାଇନଥିବା ସ୍ଥାନୀୟ ଲୋକ କହିଛନ୍ତି । ଏହି ଚିତ୍ରକୁ ଭିଡ଼ ଭିତରେ ଥିବା କେହି ବ୍ୟକ୍ତି ଫଟୋ ଉଠାଇ ଏହାକୁ ସୋସିଆଲ ମିଡିଆରେ ସେୟାର କରିଥିଲା । ଯାହା ପରେ ବହୁ ପରିମାଣରେ ଭାଇରାଲ ହେଉଥିବା ଦେଖିବାକୁ ମିଳିଛି ।
ମହିଳାଙ୍କୁ ସ୍ଵାବଲମ୍ବୀ କରିଛି ମିଶନ ଶକ୍ତି କାଫେ
ଜଗତସିଂହପୁର : ମିଶନ ଶକ୍ତି କାଫେ ମହିଳାଙ୍କୁ କରିଛି ସ୍ଵାବଲମ୍ବୀ । ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଖୋଲିଛି ମିଶନ ଶକ୍ତି କାଫେ । ପରିଚାଳନା ଦାୟିତ୍ଵ ନେଇଛନ୍ତି ଜ୍ଯୋତି ମହାସଂଘ । ୧୧ ଜଣ ସଦସ୍ଯାଙ୍କୁ ନେଇ ଚାଲୁଛି ମିଶନ ଶକ୍ତି କାଫେ । ଏଠାରେ ସକାଳ ଓ ସନ୍ଧ୍ଯାରେ ଟିଫିନ ଓ ମିଲ ପ୍ରସ୍ତୁତ କରାଯାଉଛି । ବିଶେଷ କରି ଏଠାରେ ମିଲେଟରେ ସ୍ନାକ୍ସ, ବିଭିନ୍ନ ବିସ୍କୁଟ, ପାଉଁରୁଟି ପିଠା ତିଆରି ହେଉଛି । ମେଡିକାଲକୁ ଆସୁଥିବା ଆଟେନଣ୍ଡାଣ୍ଟ ମାନଙ୍କର ଏଠାରେ ଲାଗୁଛି ଭିଡ।
ଚିକିତ୍ସାଳୟରେ ମୁଖ୍ଯମନ୍ତ୍ରୀ ଶହେ ଶର୍ଯ୍ଯା ବିଶିଷ୍ଟ ମାତୃ ଓ ଶିଶୁ ସ୍ୱାସ୍ଥ୍ୟ କେନ୍ଦ୍ରର ଲୋକାର୍ପଣ ପରେ ଏହାର ପାଖରେ ଖୋଲିଛି ମିଶନ ଶକ୍ତି କାଫେ। ଏଠାରେ ମହିଳା ମାନେ ଖାଦ୍ଯ ପ୍ରସ୍ତୁତ କରି ନିଜେ ରୋଜଗାରକ୍ଷମ ହେବା ସହିତ ଅନ୍ଯକୁ ଦେଉଛନ୍ତି ରୋଜଗାର । ମିଶନ ଶକ୍ତି କାଫେରେ ପ୍ରସ୍ତୁତ ହେଉଥିବା ସମସ୍ତ ଖାଦ୍ଯ ସ୍ଵାଦିଷ୍ଟ ବୋଲି ମେଡିକାଲ ଅଧିକାରୀ ମାନେ କହିଛନ୍ତି । ମୁଖ୍ଯମନ୍ତ୍ରୀଙ୍କୁ ଧନ୍ଯବାଦ ଜଣାଇଛନ୍ତି ମିଶନ ଶକ୍ତି ସଦସ୍ଯା
ରାଜସ୍ଥାନ ପୋଲିସର ୧୪ ଇନସପେକ୍ଟର ଗିରଫ, ଲିକ୍ ପେପର ସାହାଯ୍ୟରେ ହୋଇଥିଲେ ପାସ
ନନ୍ଦିଘୋଷ ବ୍ୟୁରୋ : ରାଜସ୍ଥାନ ପୋଲିସ ସବଇନସ୍ପେକ୍ଟର ଭର୍ତ୍ତି ପରୀକ୍ଷା ୨୦୨୧ ର ପେପର ଲିକ୍ ଘଟଣା । ସାମ୍ନାକୁ ଆସିଲା ବଡ଼ ଖୁଲାସା । ଲିକ୍ ପେପର ସାହାଯ୍ୟରେ ପାସ୍ ହୋଇଥିଲେ ପରୀକ୍ଷାର୍ଥୀ । ଏହି ଘଟଣାରେ ଗିରଫ ହୋଇଥିବା ୧୪ ଟ୍ରେନି ପୋଲିସଙ୍କ ମଧ୍ୟରେ ପୋଲିସ ଡିଏସପିଙ୍କ ପୁଅ ମଧ୍ୟ ଏଥିରେ ସାମିଲ ଅଛନ୍ତି । ଡିଏସପିଙ୍କ ପୁଅ କରଣପାଲ ଗୋଦାରା ଏହି ପରୀକ୍ଷାରେ ୨୨ନଂ ରାଙ୍କ ହାସଲ କରିଥିଲେ । ସୂଚନା ଅନୁସାରେ କରଣପାଲଙ୍କ ପିତା ଓମପ୍ରକାଶ ଗୋଦାରା ଏବେ ନାଗୌର ଠାରେ ପୋଲିସ ଉପାଧ୍ୟକ୍ଷ ଅଛନ୍ତି । ଗିରଫ ହୋଇଥିବା ୧୪ ତାଲିମପ୍ରାପ୍ତ ପୋଲିସଙ୍କର ଆଜି ଫଟୋ ସାମ୍ନାକୁ ଆସିଛି । ଏମାନଙ୍କ ମଧ୍ୟରେ ଟପ୍ପର ନରେଶ କୁମାରଙ୍କୁ ମଧ୍ୟ ଗରିଫ କରାଯାଇଛି ।
ପୋଲିସ ଅନୁଯାୟୀ, ଏହି ମାମଲାରେ ପେପର ଲିକ୍ ହେଇଥିବା ଜୟପୁରର ପରୀକ୍ଷା କେନ୍ଦ୍ରର ଅଧ୍ୟକ୍ଷ ରାଜେଶ ଖଡେଲଓ୍ୱାଲଙ୍କୁ ମଧ୍ୟ ଗରଫ କରାଯାଇ ପଚରାଉଚରା କରାଯାଉଛି । ଗିରଫ ହୋଇଥିବା ଟ୍ରେନି ପୋଲିସଙ୍କ ମଧ୍ୟରୁ ଅଧିକାଂଶ ଜାଲୋର , ସାନଚୋର, ବାରମର୍, ଯୋଧପୁର ଏବଂ ଚୁରୁ ଜିଲ୍ଲାର ଅଟନ୍ତି ।
ବହୁ ଚର୍ଚ୍ଚିତ ରାମ ବେହେରା ହତ୍ୟା ମାମଲା : ୫ ଅଭିଯୁକ୍ତଙ୍କୁ ଫାଶୀ ଦଣ୍ଡାଦେଶ
କେନ୍ଦୁଝର : କେନ୍ଦୁଝର ଜିଲ୍ଲାର ବହୁ ଚର୍ଚ୍ଚିତ ରାମ ବେହେରା ହତ୍ୟା ମାମଲା । ୫ ବର୍ଷ ପରେ ଆସିଲା ରାୟ । ୫ ଅଭିଯୁକ୍ତଙ୍କୁ ଫାଶୀ ଦଣ୍ଡାଦେଶ ଶୁଣାଇଲେ ଆନନ୍ଦପୁର ଅତିରିକ୍ତ ଜିଲ୍ଲା ଦୌରାଜଜ । ୫୩ ଜଣ ସାକ୍ଷୀଙ୍କ ବୟାନ ଓ ତଥ୍ଯ ପ୍ରମାଣ ଆଧାରରେ କୋର୍ଟ ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି ।
ଦଫା ୩୦୨, ୧୨୦B, ୨୦୧ ଓ ଆର୍ମସ ଆକ୍ଟର ଧାରା ୨୫ ଓ ୨୭ ଅନୁଯାୟୀ ଦଣ୍ଡାଦେଶ ହୋଇଛି । ଘସିପୁରା ନିର୍ବାଚନମଣ୍ଡଳୀର ପୂର୍ବତନ ବିଧାୟକ ପ୍ରାର୍ଥୀ ତଥା ଆନନ୍ଦପୁର ବ୍ଲକ ର ପୂର୍ବତନ ଅଧ୍ୟକ୍ଷ ରାମଚନ୍ଦ୍ର ବେହେରା । ତାଙ୍କୁ ୨୦୧୯ ମସିହା ମାର୍ଚ୍ଚ ୨୫ ତାରିଖ ରାତିରେ ପୂର୍ବ ଶତ୍ରୁତାରୁ ଘରୁ ଡାକିନେଇ ହତ୍ଯା କରିଥିଲେ ଅଭିଯୁକ୍ତ । ସଂଘବଦ୍ଧ ଭାବେ ତାଙ୍କ ହାତ ଗୋଡ଼ ହାଣିଦେଇ ଅତି ନିର୍ମମ ଭାବେ ହତ୍ୟା କରାଯାଇଥିଲା । ହତ୍ୟା ପରେ କଟା ହାତକୁ ଗାଁରେ ବୁଲାଇବା ସହିତ କଟା ହାତର ମାଂସ ମଧ୍ଯ ଖାଇଥିଲେ। ଯାହାର ଭିଡିଓ ଭାଇରାଲ ହୋଇଥିଲା।
ପୋଲିସ ତଦନ୍ତ କରି ଛଅ ଜଣଙ୍କୁ ଗିରଫ କରିଥିଲା । ସେମାନଙ୍କ ମଧ୍ଯରେ ଜଣେ ନାବାଳକ ହୋଇଥିବାବେଳେ ଅନ୍ଯ ୫ ଅଭିଯୁକ୍ତଙ୍କୁ ଫାଶୀ ଦଣ୍ଡାଦେଶ ହୋଇଛି । ନାବାଳକ ପ୍ରମୋଦ ଦାସ କେନ୍ଦୁଝର ଜୁଭେନାଲ କୋର୍ଟରେ ବିଚରାଧୀନ ଭାବେ ରହିଥିବା ବେଳେ ଅନ୍ଯ ୫ ଅଭିଯୁକ୍ତ ହେଲେ ସଂଜିତ ପୃଷ୍ଟି, ଅଜିତ ପୃଷ୍ଟି, , ଅରୁଣ ପୃଷ୍ଟି, ଅଲେଖ ପୃଷ୍ଟି, ଓ ଦୋଳ ବୋଇତେଇ ।
ପାରମ୍ପରିକ ପେଟ୍ରୋଲ ଓ ଡିଜେଲ ଯାନ ତୁଳନାରେ ଇଭି ପ୍ରଦୂଷଣ ଅଧିକ
ନୂଆଦିଲ୍ଲୀ : ସାରା ବିଶ୍ବରେ ଏବେ ଇଲେକ୍ଟ୍ରିକ ଭେହିକଲ ବା ଇଭିର ଲୋକପ୍ରିୟତା ବଢୁଛି । ସରକାର ବି ଇଭି ଶିଳ୍ପକୁ ପ୍ରାଧାନ୍ୟ ଦେଉଛନ୍ତି । ହେଲେ ବର୍ତ୍ତମାନର ଏକ ଗବେଷଣାର ରିପୋର୍ଟ ଇଭିକୁ ନେଇ ଅନେକ ପ୍ରଶ୍ନ ଉଠାଇଛି ।
ପାରମ୍ପରିକ ପେଟ୍ରୋଲ ଓ ଡିଜେଲ ଯାନ ତୁଳନାରେ ଇଭିର ପ୍ରଦୂଷଣ ମାତ୍ରା ବହୁ ଅଧିକ ବୋଲି ଏକ ଗବେଷଣାରୁ ଜଣାପଡିଛି । ପେଟ୍ରୋଲ ଓ ଡିଜେଲ ଗାଡି ତୁଳନାରେ ଇଭିର ପ୍ରଦୂଷଣ ବହୁ ଗୁଣ ଅଧିକ ବୋଲି ରିପୋର୍ଟରେ ଦର୍ଶାଇଛି ଏମିସନ ଆନାଲିଟିକ୍ସ । ଇଭି ଓ ଗ୍ୟାସୋଲିନ ଚାଳିତ କାରଗୁଡିକର ବ୍ରେକ ଓ ଟାୟାରରୁ ବାହାରୁଥିବା କଣିକା ପ୍ରଦୂଷଣ ଲାଗି ଅଧିକ ସହାୟକ ବୋଲି ତଥ୍ଯରେ କୁହାଯାଇଛି ।
ଇଭି ଓ ଗ୍ଯାସୋଲନିଚାଳିତ କାରର ଓଜନ ବହୁଅଧିକ ହୋଇଥିବାରୁ ଏହାର ବ୍ରେକ ଓ ଟାୟାରରୁ ଅଧିକ କଣିକା ନିର୍ଗତ ହୋଇଥାଏ ଯାହାକି ପେଟ୍ରୋଲ ଓ ଡିଜେଲଚାଳିତ ଯାନର ପ୍ରଦୂଷଣ କଣିକାଠାରୁ ୧୮୫୦ ଗୁଣ ଅଧିକ । ଟାୟାରରୁ ବାହାରୁଥିବା ରାସାୟନିକ ପଦାର୍ଥ ବାୟୁମଣ୍ଡଳ ଲାଗି ଅଧିକ କ୍ଷତି ପହଞ୍ଚାଇଥାଏ ।ସାଧାରଣତଃ ଇଭିଗୁଡିକର ଟାୟାର ସିନ୍ଥେଟିକ ରବରରୁ ପ୍ରସ୍ତୁତ ଯାହାକି ଅଶୋଧିତ ତୈଳରୁ ରାସାୟନିକ ପ୍ରକ୍ରିୟାରୁ ତିଆରି ହୋଇଥାଏ । ପୁଣି ପାରମ୍ପରିକ ଗ୍ୟାସୋଲିନ ଇଞ୍ଜିନ ତୁଳନାରେ ଇଭିର ଇଞ୍ଜିନ ଅଧିକ ଓଜନ ହୋଇଥିବାରୁ ଅଧିକ ବ୍ରେକ ବ୍ଯବହାର ହୋଇଥାଏ ।
ନବୀନ ନିବାସରେ ବିଜେଡିର ଗୁରୁତ୍ବପୂର୍ଣ୍ଣ ବୈଠକ; ମୁଖ୍ଯମନ୍ତ୍ରୀଙ୍କ ଚାଲିଛି ଅଧ୍ଯକ୍ଷତାରେ ଆଲୋଚନା
ଭୁବନେଶ୍ୱର : ନବୀନ ନିବାସରେ ବସିଛି ବିଜେଡିର ଗୁରୁତ୍ବପୂର୍ଣ୍ଣ ବୈଠକ । ଦଳର ବରିଷ୍ଠ ନେତାଙ୍କ ସହ ମୁଖ୍ଯମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆଲୋଚନା କରୁଛନ୍ତି । ଲୋକଙ୍କ ପାଖରେ ରାଜ୍ଯ ସରକାରଙ୍କ ବିକାଶ ମୂଳକ ଯୋଜନା କେତେ ପହଞ୍ଚି ପାରିଛି ଓ ଜନସାଧାରଣ କେତେ ଉପକୃତ ହେଉଛନ୍ତି ସେନେଇ ଆଲୋଚନା କରାଯାଉଛି ।
ଯୋଜନା ସବୁ ଲୋକଙ୍କ ପାଖରେ କିପରି ପହଞ୍ଚିବ ସେନେଇ ବରିଷ୍ଠ ନେତାଙ୍କ ସହ ଆଲୋଚନା କରୁଛନ୍ତି ମୁଖ୍ଯମନ୍ତ୍ରୀ । ସେବାରେ ବିଶ୍ବାସ କରୁଥିବା ବିଜେଡି ସବୁବେଳେ ବିକାଶକୁ ଗୁରୁତ୍ବ ଦେଇଛି । ସବୁ ଯୋଜନା ଦ୍ବାରା ଯେପରି ଲୋକମାନେ ଉପକୃତ ହେବେ ତାହାକୁ ପ୍ରାଥମିକତା ଦେଇଛନ୍ତି ମୁଖ୍ଯମନ୍ତ୍ରୀ । ଏଥିପାଇଁ ବରିଷ୍ଠ ନେତାମାନଙ୍କୁ ଦାୟିତ୍ବ ଦିଆଯାଇଛି । ବିଏସକେୱାଇ, ଲକ୍ଷ୍ମୀ, ଆମ ଓଡ଼ିଶା ନବୀନ ଓଡ଼ିଶା ଭଳି ପ୍ରମୁଖ ଯୋଜନା ରାଜ୍ଯର ବିକାଶକୁ ନୂଆ ଗତି ଦେଇଛି ।
ବିଭିନ୍ନ ଯୋଜନାରେ ସହାୟତା ରାଶି ସହ ବାର୍ଦ୍ଧକ୍ଯ, କଳାକାର ଭତ୍ତା ବୃଦ୍ଧି ସହ ମମତା ସହାୟତାକୁ ଦୁଇଗୁଣା କରିଛନ୍ତି ରାଜ୍ଯ ସରକାର । ଲୋକ ଏହାଦ୍ବାରା କେତେ ଉପକୃତ ହେଉଛନ୍ତି ଓ ଆଉ କଣ ଅସୁବିଧା ରହିଛି ସେନେଇ ନେତାଙ୍କଠାରୁ ଅପଡେଟ୍ ନେଉଛନ୍ତି ମୁଖ୍ଯମନ୍ତ୍ରୀ । ଯୋଜନାର କାର୍ଯ୍ୟକାରିତା ସହ ସଫଳ ରୂପାୟନ ପାଇଁ ବୈଠକରେ ଆଲୋଚନା କରାଯାଉଛି ।
ବୈଠକରେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ, ସାଂସଦ ମାନସ ମଙ୍ଗରାଜ, ସସ୍ମିତ ପାତ୍ର, ମନ୍ତ୍ରୀ ଟୁକୁନି ସାହୁ, ଅଶୋକ ପଣ୍ଡା, ରଣେନ୍ଦ୍ର ପ୍ରତାପ ସ୍ବାଇଁ, ଅତନୁ ସବ୍ୟସାଚୀ ନାୟକ, ସ୍ନେହାଙ୍ଗିନୀ ଛୁରିଆ, ଉଷାଦେବୀ, ବିକ୍ରମ କେଶରୀ ଆରୁଖ, ପ୍ରସନ୍ନ ଆଚାର୍ଯ୍ୟ, ସଞ୍ଜୟ ଦାଶବର୍ମା ପ୍ରମୁଖ ଯୋଗ ଦେଇଛନ୍ତି ।