ସମ୍ବଲପୁର: ସମ୍ବଲପୁରରେ 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ । ରବିବାର ସେ ବିଭିନ୍ନ କାର୍ଯ୍ଯକ୍ରମରେ ଯୋଗଦେବେ । ଭୋରୁ ମାଆ ସମଲେଶ୍ବରୀ ମନ୍ଦିର ଯାଇ ମାଆଙ୍କୁ ଦର୍ଶନ କରିବା ସହ ବିଭିନ୍ନ ଉନ୍ନୟନ କାର୍ଯ୍ୟର ସମୀକ୍ଷା କରିବେ । ପରେ ମହାନଦୀ ହାଫ-ମାରାଥନର ଶୁଭାରମ୍ଭ କରିବେ । ସେଠାରୁ ଭୀମସାର ଯାଇ ବିଭିନ୍ନ ଉନ୍ନିତାମୂଳକ କାର୍ଯ୍ୟକ୍ରମ ସମ୍ପର୍କରେ ଅନୁଧ୍ଯାନ କରିବେ । ସାରା ଦିନ ବିକାଶମୂଳକ କାର୍ଯ୍ଯର ସମୀକ୍ଷା ସହ କେନ୍ଦୁପତ୍ର ତୋଳାଳିଙ୍କୁ ସେ ଭେଟି ଆଲୋଚନା କରିବାର କାର୍ଯ୍ୟକ୍ରମ ରହିଛି ।
ଗଣମାଧ୍ଯମର ନହୋଇ ଜଣମାଧ୍ଯମର ପ୍ରତିନିଧି ସାଜିଛନ୍ତି କି ରୁବେନ୍ ବାନାର୍ଜୀ ?
ନନ୍ଦିଘୋଷ ବ୍ୟୁରୋ: ଜାତୀୟସ୍ତରର ନ୍ଯୁଜ ମାଗାଜିନ ଆଉଟଲୁକରୁ ବାହାରିବା ପରେ ଗଣମାଧ୍ଯମର ନହୋଇ ଜଣମାଧ୍ଯମର ପ୍ରତିନିଧି ସାଜିଛନ୍ତି କି ରୁବେନ୍ ବାନାର୍ଜୀ ? ନିଜ ଅସ୍ତିତ୍ବକୁ ବଂଚାଇ ରଖିବାକୁ ଅନେକ ସମୟରେ ବିବାଦୀୟ ବୟାନ ଦେଇ ଚର୍ଚ୍ଚାରେ ରହିବାକୁ ଚେଷ୍ଟା କରି ଆସୁଛନ୍ତି କି ରୁବେନ୍ ? ବିଜେପିକୁ ସମାଲୋଚନା କରୁଥିବା ଏବଂ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ଅମିତ ସାହାଙ୍କୁ ସମାଲୋଚନା କରୁଥିବା ସାମ୍ବାଦିକଙ୍କ ବକ୍ତବ୍ୟକୁ ନିଜର ପରୋକ୍ଷ କର୍ତ୍ତୃତ୍ବ ଥିବା ଚ୍ୟାନେଲରେ ପ୍ରସାରିତ କରିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦଳରେ ସ୍ଥିତି ନେଇ ସନ୍ଦେହ ତିଆରି କରିଛି । କହିବାର ତାତ୍ପର୍ଯ୍ୟ ହେଲା ଦଳରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସ୍ଥିତି ଆଉ ନାହିଁକି ?
ବିଜେପିର ଶୀର୍ଷ ନେତୃତ୍ବ ବନାମ ଧର୍ମେନ୍ଦ୍ର ପ୍ରଧାନ ! ପ୍ରଧାନମନ୍ତ୍ରୀଙ୍କ ସମାଲୋଚକ ଧର୍ମେନ୍ଦ୍ରଙ୍କ ଆପଣାର ! ପ୍ରଧାନମନ୍ତ୍ରୀ ଓ କେନ୍ଦ୍ର ଗୃହମନ୍ତ୍ରୀଙ୍କ ଦୃଢ ସମାଲୋଚକଙ୍କୁ କାହିଁକି ନିଜ ମୁଖପାତ୍ର ବନାଇଲେ ଧର୍ମେନ୍ଦ୍ର ? ଦଳରେ ଭଲନାହିଁ କି ଧର୍ମେନ୍ଦ୍ରଙ୍କ ସ୍ଥିତି ? ଏ ପ୍ରଶ୍ନ ଉଠିବାର ବି ଅନେକ ଯୁକ୍ତି ରହିଛି । ଏ ବ୍ଯକ୍ତିଙ୍କୁ ଚିହ୍ନିଥିବେ ନିଶ୍ଚୟ । ଦେଶର ଜଣାଶୁଣା ସାମ୍ବାଦିକ ରୁବେନ ବାନାର୍ଜୀ । ହେଲେ ଆଉଟଲୁକରୁ ବାହାରିବା ପରେ ସତେଯେମିତି ମିଡିଆ ଏଥିକ୍ସରୁ ବି ଆଉଟର ହୋଇଯାଇଛନ୍ତି । ଗଣମାଧ୍ଯମର ନହୋଇ ଜଣମାଧ୍ଯମର ପ୍ରତିନିଧି ସାଜିଛନ୍ତି । ଅସ୍ତିତ୍ବ ବଂଚାଇବାକୁ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କ ଭଳି ଶୀର୍ଷ ରାଜନେତାଙ୍କୁ ବି ଟାର୍ଗେଟ୍ କରିବାକୁ ପଛାଉ ନାହାଁନ୍ତି । ଭିତ୍ତିହୀନ ଓ ତଥ୍ଯହୀନ କଥାକୁ ମିଛର ରଙ୍ଗରେ ଫେଣ୍ଟାଫେଣ୍ଟି କରି ପାଠକଙ୍କୁ ବିଭ୍ରାନ୍ତ କରୁଥିବା ଜଣେ ଏପରି ବ୍ଯକ୍ତିଙ୍କୁ କାହିଁକି ଅସ୍ତ୍ର କରିଲେ ଧର୍ମେନ୍ଦ୍ର ? ପରୋକ୍ଷ କର୍ତ୍ତୃତ୍ବ ଥିବା ନିର୍ଦ୍ଦିଷ୍ଟ ଚ୍ୟାନେଲରେ ରୁବେନଙ୍କୁ ନେଇ କଣ ସନ୍ଦେଶ ଦେଲେ କେନ୍ଦ୍ର ଶିକ୍ଷାମନ୍ତ୍ରୀ ? ଯାହାକି ଧର୍ମେନ୍ଦ୍ର ପ୍ରଧାନଙ୍କ ଦଳରେ ସ୍ଥିତି ନେଇ ସନ୍ଦେହ ତିଆରି କରିଛି । ଅର୍ଥାତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସ୍ଥିତି ଆଉ ଭଲନାହିଁ କି ?
ଗୋଦି ମିଡିଆ ଭଳି ଶବ୍ଦର ସୂତ୍ରଧର ହେଉଛନ୍ତି ରୁବେନ୍ । ପ୍ରଶ୍ନ ଉଠୁଛି ସେ ଏବେ ଆନାଲିଟିକାଲ୍ ଷ୍ଟୋରୀ ନୁହେଁ ପେଡ୍ ନ୍ଯୁଜର ବାଦଶାହ ପାଲଟି ଯାଇଛନ୍ତି କି ? ବିଭିନ୍ନ ସମୟରେ ଦେଶରେ ଆରମ୍ଭ ହୋଇଥିବା ଆନ୍ଦୋଳନରେ ସାମିଲ୍ ଲୋକଙ୍କ ମନରେ ନରେନ୍ଦ୍ର ମୋଦିଙ୍କୁ ନେଇ ଘୃଣାଭାବ ସୃଷ୍ଟି କରିବାକୁ ସେ ଅପଚେଷ୍ଟା କରୁଥିବା ଅଭିଯୋଗ ହୋଇ ଆସୁଛି। ଗୁଜରାଟର ବହୁଚର୍ଚ୍ଚିତ ବିଲକିସ ବାନୋ ଗଣଦୁଷ୍କର୍ମ ଓ ହତ୍ୟା ମାମଲାରେ ଦୋଷୀଙ୍କ ରାଜକ୍ଷମା ଖାରଜ ଏବଂ ପୁଣିଥରେ ଜେଲ ପଠାଇବା ଘଟଣାରେ ଗୁଜରାଟ ସରକାରଙ୍କୁ ତୀବ୍ର ସମାଲୋଚନା କରିଥିଲେ ରୁବେନ । ସମ୍ପାଦକୀୟରେ ଲେଖା ପ୍ରକାଶ କରି କେନ୍ଦ୍ର ସହ ଗୁଜରାଟ ସରକାରଙ୍କୁ କଡ଼ା ଶବ୍ଦରେ ସମାଲୋଚନା କରିଥିଲେ। ପ୍ରଧାନମନ୍ତ୍ରୀ ଏବଂ ଗୃହମନ୍ତ୍ରୀଙ୍କ ମୁହଁରୁ ଗୋଟିଏ ପଦବି ଶୁଣିବାକୁ ନମିଳିବା ଓ ଗୁଜରାଟ ମୁଖ୍ୟମନ୍ତ୍ରୀ ପଦୁଟିଏ ନକହିବାକୁ ନେଇ ଭର୍ତ୍ସନା କରିଥିଲେ । ସିଧା ସିଧା ଗୁଜୁରାଟ ମଡେଲକୁ ନିଶାଣ କରିଥିଲେ ।
ଖାଲି ଏ ଗୋଟିଏ ଘଟଣା ନୁହେଁ, ୨୦୨୦ରେ ପାକିସ୍ତାନ ସୀମାଠାରୁ ମାତ୍ର ୨୦ ମିନିଟର ଦୂରତାରେ ବିକ୍ଷୋଭକାରୀମାନେ ପ୍ରଧାନମନ୍ତ୍ରୀଙ୍କ ବାଟ ରୋକିକା ଘଟଣାରେ ବି ମୋଦିଙ୍କୁ ସମାଲୋଚା କରିଥିଲେ ରୁବେନ୍ । ପୋଲିସ ବୟାନକୁ ଉପହାସ କରିବା ସହ ମୋଦି ଏଥିରୁ ମାଇଲେଜ ଉଠାଉଥିବା ନେଇ ସମାଲୋଚନା କରିଥିଲେ । ବରିଷ୍ଠ ସାମ୍ବାଦିକ ରୁବେନ ବାନାର୍ଜୀ କାହା ପାଇଁ କଣ ଲେଖିଲେ, କଣ ସମାଲୋଚନା କଲେ ତାହା ଏକ ଭିନ୍ନ ପ୍ରସଙ୍ଗ । କିନ୍ତୁ ବିଜେପିକୁ ସମାଲୋଚନା କରୁଥିବା ଏବଂ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ଅମିତ ସାହାଙ୍କୁ ସମାଲୋଚନା କରୁଥିବା ସାମ୍ବାଦିକଙ୍କ ବକ୍ତବ୍ୟକୁ ନିଜର ପରୋକ୍ଷ କର୍ତ୍ତୃତ୍ବ ଥିବା ଚ୍ୟାନେଲରେ ପ୍ରସାରିତ କରିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦଳରେ ସ୍ଥିତି ନେଇ ସନ୍ଦେହ ତିଆରି କରିଛି ।
ଓଡିଶା ବିକାଶର ସାରଥୀ ଫାଇଭ-ଟି ଓ ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । କେବେ ଗଣମାଧ୍ୟମ ସାମନାକୁ ଆସି ଡିଣ୍ଡିମ ପିଟିବାକୁ ଚାହୁଁନଥିବା କାର୍ତ୍ତିକ ପାଣ୍ଡିଆନ ନିକଟରେ ଜାତୀୟ ନ୍ୟୁଜ ଏଜେନ୍ସି ଏଏନଆଇକୁ ଏକ ସାକ୍ଷାତକାର ଦେଇ ତାଙ୍କ ରାଜନୈତିକ ଆଭିମୁଖ୍ୟ ସ୍ପଷ୍ଟ କରିଛନ୍ତି । ତେବେ ପାଣ୍ଡିଆନଙ୍କ ବକ୍ତବ୍ୟକୁ ନେଇ ବିଜେପିର କର୍ତ୍ତୃତ୍ବ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପରୋକ୍ଷ କର୍ତ୍ତୃତ୍ବରେ ଥିବା ଏକ ଚ୍ୟାନେଲ ବରିଷ୍ଠ ସାମ୍ବାଦିକ ରୁବେନ ବାନାର୍ଜୀଙ୍କ ମୁହଁରେ ବିଭିନ୍ନ ପ୍ରଶ୍ନ ଉଠାଉଛି ।
ନିଜ ବାସଭବନରେ ବିଧାୟକଙ୍କୁ ନଜରବନ୍ଦୀ କଲେ ତେଜସ୍ୱୀ
ପାଟନା: ରୋଚକ ହେଉଛି ବିହାର ରାଜନୀତି । ଆସନ୍ତା ୧୨ ତାରିଖରେ ହେବାକୁ ଯାଉଛି ବିହାରରେ ଆସ୍ଥା ଭୋଟ୍ । ପାଟନାସ୍ଥିତ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କ ବାସ ଭବନକୁ ଆରଜେଡି ବିଧାୟକ ଏବଂ ବାମପନ୍ଥୀ ବିଧାୟକମାନେ ଯାଉଛନ୍ତି । ତେବେ ଏହି ଫ୍ଲୋରଟେଷ୍ଟ ପୂର୍ବରୁ ବିଧାୟକଙ୍କୁ ନିଜ ଘରେ ନଜରବନ୍ଦୀ କରିଛନ୍ତି ତେଜସ୍ବୀ । କୁହାଯାଇଛି କି, ସମସ୍ତ ବିଧାୟକଙ୍କୁ କୁହାଯାଇଛି କି, ସେମାନେ ନିଜର ପୋଷାକ ନେଇ ସେଠାକୁ ଆସିବେ । ଏଣୁ ସମସ୍ତେ ଆସନ୍ତା ୧୨ ତାରିଖ ପର୍ଯ୍ୟନ୍ତ ସେଠାରେ ରହିବେ । ଏହି ସମସ୍ତ ବିଧାୟକ ଆସନ୍ତା ଦୁଇ ଦିନ ଏଠାରେ ରହିବେ ଏବଂ ସେମାନଙ୍କ ରହଣି ପାଇଁ ମଧ୍ୟ ବ୍ୟବସ୍ଥା କରାଯାଉଛି ବୋଲି କୁହାଯାଉଛି। ତେଜସ୍ୱୀଙ୍କ ବାସଭବନରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଗଣମାଧ୍ୟମ କର୍ମୀଙ୍କ ପ୍ରବେଶ ଉପରେ କଟକଣା ଲଗାଯାଇଛି। ସମସ୍ତ ବିଧାୟକଙ୍କୁ ବିଧାୟକମାନଙ୍କୁ ବାହାରକୁ ଯିବାକୁ ଅନୁମତି ଦିଆଯାଉନାହିଁ।
ଶଙ୍ଖ ଭବନରେ ରାଣୀ ମାଆଙ୍କୁ ଶ୍ରଦ୍ଧାଞ୍ଜଳି
ଭୁବନେଶ୍ବର: ରାଣୀ ମାଆଙ୍କୁ ଅନ୍ତିମ ବିଦାୟ। ପ୍ରଖ୍ୟାତ ରାଜନୀତିଜ୍ଞ, ପୂର୍ବତନ ବିଧାୟିକା ଭି.ସୁଜ୍ଞାନ କୁମାରୀ ଦେଓ ପାର୍ଥିବ ଶରୀର ଓଡ଼ିଶାରେ ପହଞ୍ଚିଛି। ମରଶରୀର ଏୟାରପୋର୍ଟରେ ପହଞ୍ଚିବା ପରେ ଶେଷ ଶୋଭାଯାତ୍ରାରେ ଆସିଥିଲେ ରାଣୀ ମାଆ । ସେଠାରୁ ଶଙ୍ଖ ଭବନକୁ ଆସିଥିଲା ପାର୍ଥିବ ଶରୀର । ସେଠାରେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ରାଣୀଙ୍କର ଅନ୍ତିମ ଦର୍ଶନ କରିବା ସହ ଶ୍ରଦ୍ଧାଞ୍ଜଳି ଜଣାଇଥିଲେ । ବିଜେଡି ନେତାମାନେ ତାଙ୍କର ଶେଷ ଦର୍ଶନ କରିବା ସହ ଶ୍ରଦ୍ଧାଞ୍ଜଳି ଜଣାଇଥିଲେ । ସେଠାରୁ ବିଧାନସଭା ପରିସରକୁ ନିଆଯାଇ ସେଠାରେ ଗାର୍ଡଅଫ ଅନର ପ୍ରଦାନ କରାଯାଇଛି । ବିଧାୟକ ଓ ଅନେକ ଦଳର ନେତାମାନେ ତାଙ୍କର ଶେଷ ଦର୍ଶନ କରିଥିଲେ । ସକାଳେ ୮୬ ବର୍ଷ ବୟସରେ ଚେନ୍ନାଇରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଥିଲା । ୧୦ ଥରର ବିଧାୟିକା ଥିବା ସୁଜ୍ଞାନ କୁମାରୀ ଏକାଧାରର ନେତ୍ରୀ, ସମାଜସେବୀ, ଆସୁ ଲେଖିକା, ଷ୍ଟାମ୍ପ ସଂଗ୍ରାହକ ଥିଲେ । ୧୯୩୭ ମସିହା ଅଗଷ୍ଟ ୫ରେ ଜନ୍ମଗ୍ରହଣ କରିଥିଲେ ସୁଜ୍ଞାନ। ପିତା ରାଜା ଆର.ଭି.ଏମ ନୀଳାଦ୍ରି ଦେଓଙ୍କ କନ୍ଯା ଭାବେ ସେ ରାଜକାର୍ଯ୍ୟରେ ନିଜକୁ ନିୟୋଜିତ କରିଥିଲେ ବି ସମାଜସେବାକୁ କରିଥିଲେ ଜୀବନର ବ୍ରତ। ସ୍ୱାମୀ ପୂର୍ଣ୍ଣଚନ୍ଦ୍ର ମର୍ଦ୍ଦରାଜ ଦେଓ ବହୁବର୍ଷ ଆଗରୁ ଇହଲୀଳା ସାଂଗ କରିଥିଲେ। ୧୯୬୧ ମସିହାରେ ଭି. ସୁଜ୍ଞାନ ରାଜନୈତିକ କ୍ୟାରିଅର ଆରମ୍ଭ କରିଥିଲେ। ୧୯୬୧, ୧୯୭୪, ୧୯୭୭, ୧୯୮୫, ୧୯୯୦, ୧୯୯୫, ୨୦୦୦, ୨୦୦୪, ୨୦୦୯ ଓ ୨୦୧୪ରେ ବିଧାୟିକା ନିର୍ବାଚିତ ହୋଇଥିଲେ । ପ୍ରବାଦପୁରୁଷ ବିଜୁବାବୁଙ୍କ ଅନ୍ୟତମ ଘନିଷ୍ଠ ସହଯୋଗୀ ଥିଲେ।
ଆର୍ଥିକ ପରିଚାଳନାରେ ପୁଣି ଓଡ଼ିଶାକୁ ସାର୍ଟିଫିକେଟ୍
ଭୁବନେଶ୍ବର: ଆର୍ଥିକ ପରିଚାଳନାରେ ପୁଣି ଓଡ଼ିଶାକୁ ସାର୍ଟିଫିକେଟ୍ । ବିଧାନସଭାରେ ଉପସ୍ଥାପିତ ସିଏଜି ରିପୋର୍ଟ ଅନୁସାରେ, ଓଡ଼ିଶାର ଋଣଭାର ଲଗାତାର ଭାବେ ହ୍ରାସ ପାଉଛି । କମୁଛି ଆର୍ଥିକ ବୋଝ । ଖୋଲା ବଜାରରୁ ଓଡ଼ିଶା ଋଣ ନଉଠାଇ ବିକାଶମୂଳକ କାର୍ଯ୍ୟକ୍ରମ ତ୍ବରାନ୍ବିତ କରିଛି । କ୍ରମାଗତ ଭାବେ ଓଡ଼ିଶା ପାଉଛି ରାଜସ୍ବ ବଳକା ରାଜ୍ୟର ମାନ୍ୟତା । ଭଲ ଆର୍ଥିକ ପରିଚାଳନା ଫଳରେ ଓଡ଼ିଶା ନିଜସ୍ବ ସମ୍ବଳରୁ ବହୁ ଯୋଜନା କରୁଛି । ଯାହା କି ବଡ଼ ସଫଳତା ।
ନିଅଣ୍ଟିଆରୁ ରାଜସ୍ବ ବଳକା। କମୁଛି ଋଣଭାର, ବଢୁଛି ମୁଣ୍ଡପିଛା ଆୟ । ସୁଦୃଢ଼ ହେଉଛି ଆର୍ଥିକ ପରିଚାଳନା । ସିଏଜିଙ୍କ ସାର୍ଟିଫିକେଟ୍ । ନବୀନଙ୍କ ନେତୃତ୍ବ ଦେଶକୁ ଦେଖାଉଛି ବାଟ । ଆର୍ଥିକ ପରିଚାଳନାରେ ଓଡ଼ିଶା ବଡ଼ବଡ଼ ରାଜ୍ୟଙ୍କୁ ପଛରେ ପକାଇ ଦେଇଛି । ଲଗାତାର ଭାବେ କମୁଛି ଋଣଭାର। ବଢ଼ି ଚାଲିଛି ମୁଣ୍ଡପିଛା ଆୟ । ମହାଲେଖାଗାରଙ୍କ ତଥ୍ୟ ଅନୁସାରେ, ୨୦୨୨-୨୩ ଆର୍ଥିକବର୍ଷରେ ରାଜ୍ୟ ସରକାରଙ୍କ ମୋଟ୍ ଆର୍ଥିକ ବୋଝ ୧ ଲକ୍ଷ ୧୧ ହଜାର ୯୫୨ ଟଙ୍କା ଥିଲା । ଯାହା ରାଜ୍ୟର ମୋଟ ଘରୋଇ ଉତ୍ପାଦ ବା ଜିଏସଡିପିର ୧୫ ପ୍ରତିଶତ । ୨୦୨୧ -୨୨ରେ ତୁଳନାତରେ ୨୦୨୨-୨୩ରେ ରାଜ୍ୟର ଆର୍ଥିକ ବୋଝ ୮୧୮୭ କୋଟି ଟଙ୍କାକୁ ହ୍ରାସ ପାଇଥିଲା । ସିଏଜି ରିପୋର୍ଟରେ ଦର୍ଶାଯାଇଛି ଯେ, ୨୦୨୧-୨୨ରେ ରାଜ୍ୟର ମୋଟ୍ ଆର୍ଥିକ ବୋଝ ଜିଏସଡିପିସିର ୧୯ ପ୍ରତିଶତ ଥିଲା । ୨୦୨୨-୨୩ରେ ଏହା ୧୫ ପ୍ରତିଶତକୁ ଖସିଛି । ସେହିପରି ସରକାରୀ ଋଣ ୨୦୨୧-୨୨ରେ ୧୧ ପ୍ରତିଶତ ଥିବା ବେଳେ ୨୦୨୨-୨୩ରେ ଜିଏସଡିପିର ୮ ପ୍ରତିଶତକୁ କମିଛି । ଓଡ଼ିଶାକୁ କ୍ରମାଗତ ଭାବେ ଏପରି ସଫଳତା ମିଳିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଇଁ ସମ୍ଭବ ହୋଇଥିବା ପୂର୍ବତନ ଅର୍ଥମନ୍ତ୍ରୀ ତଥା ବିଧାୟକ ଶଶିଭୂଷଣ ବେହେରା କହିଛନ୍ତି।
ଗୋଟିଏ ପଟେ ରାଜ୍ୟର ଆର୍ଥିକ ବୋଝ କମୁଛି। ରାଜ୍ୟ ସରକାରଙ୍କ ଜନକଲ୍ୟାଣ ଯୋଜନାଗୁଡ଼ିକର ସଫଳ ରୂପାୟନ ଯୋଗୁ ଅର୍ଥନୈତିକ ବିକାଶ ହେଉଛି। ଯାହା ସମୃଦ୍ଧ ଓ ରୂପାନ୍ତରିତ ଓଡ଼ିଶା ଗଠନରେ ବେଶ୍ ସହାୟକ ହେଉଛି ବୋଲି ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି କହିଛନ୍ତି । ମହାବାତ୍ୟା ବିଭୀଷିକାକୁ ପଛରେ ପକାଇ ବିତ୍ତୀୟ ପରିଚାଳନାରେ ଦେଶରେ ଅଗ୍ରଣୀ ରାଜ୍ୟ ହୋଇଛି ଓଡ଼ିଶା। ନିୟମ ଅନୁସାରେ ରାଜ୍ଯ ଜିଏସଡିପିର ୨୫ ପ୍ରତିଶତ ଋଣ କରିପାରିବ। କିନ୍ତୁ ରାଜ୍ୟ ସରକାର ଜିଏସଡିପିର ୧୦ ଦଶମିକ ୭୮ ପ୍ରତିଶତ ଋଣ କରିଛନ୍ତି। ଦେଶର ଅନ୍ୟ ବିକଶିତ ରାଜ୍ୟକୁ ଢେର୍ ପଛରେ ପକାଇଦେଇଛି ଓଡ଼ିଶା।
ଜନଜାତି ସଂସ୍କୃତିର ସଂରକ୍ଷଣ ପାଇଁ ରାଜ୍ୟ ସରକାର ଅନେକ ପଦକ୍ଷେପ ନେବେ: ମୁଖ୍ୟମନ୍ତ୍ରୀ
ଭୁବନେଶ୍ବର: ରାଜ୍ୟରେ ଆଦିବାସୀ ସମ୍ପ୍ରଦାୟର ସାମଗ୍ରିକ ବିକାଶ ଆଭିମୁଖ୍ୟ। ଏଥିରେ ଜନସାଧାରଣଙ୍କ ଅଂଶଗ୍ରହଣକୁ ପାଳନ କରି, ଅନୁସୂଚିତ ଜାତି ଓ ଜନଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗ ପକ୍ଷରୁ ସ୍ବତନ୍ତ୍ର ଉନ୍ନୟନ ପରିଷଦର ହିତାଧିକାରୀଙ୍କ ମହାସମାବେଶ ଅନୁଷ୍ଠିତ ହୋଇଛି । ଆଦିବାସୀ ସଂସ୍କୃତିର ସଂରକ୍ଷଣ ତଥା ସେମାନଙ୍କ ପରିଚୟ ବଜାୟ ରଖିବା ପାଇଁ ଏସଡିସିର ସଫଳତା ଏବଂ ସେମାନଙ୍କର ଅନନ୍ୟ ହସ୍ତକ୍ଷେପକୁ ପାଳନ କରିବା ଲାଗି ସ୍ଥାନୀୟ ଆଦିବାସୀ ପ୍ରଦର୍ଶନୀ ପଡ଼ିଆରେ ଆୟଜିତ କାର୍ଯ୍ୟକ୍ରମରେ ୧,୭୫୦ ହିତାଧିକାରୀଙ୍କ ସମେତ ୨୩ଟି ଏସଡିସିର ପ୍ରାୟ ୨,୦୦୦ ସଦସ୍ୟ ଅଂଶଗ୍ରହଣ କରିଥିଲେ l ସମାବେଶକୁ ଉଦଘାଟନ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି- ଏସଡିସି ଜରିଆରେ ଓଡ଼ିଶା ଏହି ନିଆରା ପଦକ୍ଷେପ ଗ୍ରହଣ କରିବା ସହ ଆଦିବାସୀ ସମ୍ପ୍ରଦାୟର ନୃତ୍ୟ, ସଙ୍ଗୀତ ଓ ପରିବେଶକୁ ସଂରକ୍ଷଣ କରିବାର ଗୌରବ ଅର୍ଜନ କରିଛି।
୧୩ଟି ଆଦିମ ଜନଜାତି ବା ପିଭିଟିଜି ସମେତ ୬୨ଟି ଆଦିବାସୀ ସମ୍ପ୍ରଦାୟର ସାମାଜିକ-ସାଂସ୍କୃତିକ ଆବଶ୍ୟକତାକୁ ପୂରଣ କରିବାରେ ଆମେ ଏସଡିସିମାନଙ୍କୁ ପୂର୍ଣ୍ଣ ସ୍ବାଧୀନତା ଦେଇଛୁ। ଓଡ଼ିଶାର ସାମଗ୍ରିକ ସଂସ୍କୃତିକୁ ଜନଜାତି କଳା ଓ ସଂସ୍କୃତି ସମୃଦ୍ଧ କରିଛି। ଏହାର ସଂରକ୍ଷଣ ଓ ପ୍ରସାର ପାଇଁ ରାଜ୍ୟ ସରକାର ଆହୁରି ଅନେକ ପଦକ୍ଷେପ ନେବେ ବୋଲି ସେ କହିଥିଲେ। ୧୧ ହଜାରରୁ ଅଧିକ ପବିତ୍ର ପୁଜସ୍ଥଳିର ସଂରକ୍ଷଣ କରାଯାଇଛି। ୨୧ଟି ଦ୍ଵିଭାଷିକ ଶବ୍ଦକୋଷ ମଧ୍ୟ ପ୍ରସ୍ତୁତ କରାଯାଇଛି ବୋଲି ସେ କହିଥିଲେ। ସଂସ୍କୃତିର ସଂରକ୍ଷଣ ଓ ପ୍ରଚାର ପ୍ରସାର ଦିଗରେ ଅବଦାନ ପାଇଁ କେନ୍ଦୁଝର ଦେବହୁଡ଼ିର “ହୋ ସମାଜ ସାଗନ ଅକଳାକୁ” ମୁଖ୍ୟମନ୍ତ୍ରୀ ସମ୍ବର୍ଦ୍ଧିତ କରିଥିଲେ। ପ୍ରଥମ ଥର ପାଇଁ ମୁଖ୍ୟମନ୍ତ୍ରୀ ମୟୂରଭଞ୍ଜର ୭ଟି ‘ଜାହିରା’କୁ ସାମୂହିକ ଜଙ୍ଗଲ ଅଧିକାରରେ ପଟ୍ଟା ପ୍ରଦାନ କରିଥିଲେ।
ଏହାବ୍ୟତୀତ ମାଲକାନଗିରିର କୋୟା ଆଦିବାସୀ ଦଳ, କନ୍ଧମାଳର କୁଟିଆ କନ୍ଧ ଆଦିବାସୀ ଦଳର ସଦସ୍ୟମାନଙ୍କୁ ବାଦ୍ୟଯନ୍ତ୍ର ଓ ନବରଙ୍ଗପୁରର ଗଣ୍ଡ ଆଦିବାସୀ ଗୋଷ୍ଠୀକୁ ନୃତ୍ୟ ପୋଷାକ ପ୍ରଦାନ କରିଥିଲେ ମୁଖ୍ୟମନ୍ତ୍ରୀ। ମୁଖ୍ୟମନ୍ତ୍ରୀ ‘ମୋ ପରିକଳ୍ପନା’ ରିପୋର୍ଟ ବି ଉନ୍ମୋଚନ କରିଥିଲେ।ଓଡ଼ିଆରେ ଅନୁବାଦିତ ୨୫ ଟି ସଉରା ଭାଷା ପୁସ୍ତକକୁ ମୁଖ୍ୟମନ୍ତ୍ରୀ ଉନ୍ମୋଚନ କରିଥିଲେ । ଆର୍ଥିକ କ୍ଷେତ୍ରରେ ୯ଟି ପୁରୁଣା ଏସଡିସିଙ୍କୁ ଏହାର ପ୍ରତିଷ୍ଠା ତାରିଖଠାରୁ ୨୦୨୨-୨୩ ବର୍ଷ ପର୍ଯ୍ୟନ୍ତ ୩୯୭ କୋଟି ଟଙ୍କା ଆବଣ୍ଟନ କରିଥିବା ବେଳେ ୨୦୨୩-୨୪ ଆର୍ଥିକ ବର୍ଷରେ ସମସ୍ତ ୨୩ଟି ଏସଡିସି ଜିଲ୍ଲା ପାଇଁ ମୋଟ ୪୦୧.୨୫ କୋଟି ଆବଣ୍ଟନ କରାଯାଇଛି । ରାଜ୍ୟ ସରକାର ଏହାର ପ୍ରତିଷ୍ଠା ଦିନରୁ ଏପର୍ଯ୍ୟନ୍ତ ଏସଡିସିମାନଙ୍କୁ ମୋଟ ୭୯୮.୨୫ କୋଟି ଟଙ୍କା ଆବଣ୍ଟନ କରିସାରିଛନ୍ତି ।
ଷ୍ଟ୍ରବେରୀ ଦେଖାଇଛି ଜୀବନ ଜିଇଁବାର ବାଟ
କନ୍ଧମାଳ: ଷ୍ଟ୍ରବେରୀ ଦେଖାଇଛି ଜୀବନ ଜିଇଁବାର ବାଟ । ମିଶନ ଶକ୍ତି ସହାୟତାରେ ବୃନ୍ଦାବତୀ ସ୍ବୟଂ ସହାୟିକା ଗୋଷ୍ଠୀର ଆଦିବାସୀ ମହିଳା ଷ୍ଟ୍ରବେରୀ ଚାଷ କରି ଲାଭାନ୍ବିତ ହେବା ସହ ନିଜେ ନିଜକୁ ସ୍ବାବଲମ୍ବୀ କରିବାରେ ସକ୍ଷମ ହୋଇଛନ୍ତି ଏବଂ ରାଜ୍ୟ ସରକାରଙ୍କ ସହଯୋଗକୁ ସାଧୁବାଦ ଜଣାଇଛନ୍ତି ।
ଲାଲ ଟହ ଟହ ଷ୍ଟ୍ରବେରୀ । ଛୋଟ ଛୋଟ ଗଛରେ ଫଳିଛି ପେନ୍ଥା ପେନ୍ଥା କୋଳି । ଭିନ୍ନ ଏକ ଚାଷ ଆଜି ମହିଳିଳାଙ୍କୁ କରିଛି ସ୍ବାବଲମ୍ବୀ। କନ୍ଧମାଳ ଜିଲ୍ଲା ବାଲିଗୁଡ଼ା ବ୍ଲକ୍ ଅନ୍ତର୍ଗତ ଆଦିବାସୀ ଅଧ୍ୟୁଷିତ ସିନ୍ଦ୍ରିଗାଁ ଗ୍ରାମ ପଞ୍ଚାୟତ ବୃନ୍ଦାବତୀ ସ୍ବୟଂ ସହାୟକ ଗୋଷ୍ଠୀର ମହିଳାମାନେ ଷ୍ଟ୍ରବେରୀ ଚାଷ କରି ଆଜି ଲାଭବାନ ହୋଇପାରିଛନ୍ତି । ବରିପଡ଼ା ନିକଟରେ ଅଢେଇ ଏକର ଜମିରେ ୫୫ ହଜାର ଚାରା ରୋପଣ କରି ଷ୍ଟ୍ରବେରୀ ଚାଷ କରିଛନ୍ତି ଏହି ଏସଏଚଜି ମହିଳା । କନ୍ଧମାଳ ଜିଲ୍ଲା ପ୍ରଶାସନ ଏବଂ ସ୍ଥାନୀୟ ବ୍ଲକ୍ ପ୍ରଶାସନର ସହଯୋଗରେ ଏବେ କ୍ଷେତରେ ଫଳୁଛି ଲାଲ୍ ଲାଲ୍ ଷ୍ଟ୍ରବେରୀ । ଏହାକୁ ବିକ୍ରି କରି ମହିଳା ଗୋଷ୍ଠୀ ଆତ୍ମସନ୍ତୋଷ ଲାଭ କରିବା ସହ ବେସ ଲାଭବାନ ହୋଇପାରିଛନ୍ତି । କର୍ମ ନିଯୁକ୍ତିର ସୁଯୋଗ ଦେଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ମହିଳା ।
ଷ୍ଟ୍ରବେରୀ କଣ ଅଞ୍ଚଳବାସୀ ଜାଣିନଥିଲେ । ହେଲେ ରାଜ୍ୟ ସରକାରୀ ପ୍ରୋତ୍ସାହନ ଯୋଗୁ ସିନ୍ଦ୍ରିଗାଁରେ ଆରମ୍ଭ ହୋଇଛି ଷ୍ଟ୍ରବେରୀ ଚାଷ । ଜିଲ୍ଲାପାଳଙ୍କ ସ୍ବତନ୍ତ୍ର ଦୃଷ୍ଟି ଓ ବ୍ଲକ୍ ପ୍ରଶାସନର ପ୍ରତ୍ୟକ୍ଷ ତତ୍ବାବଧାନରେ ଉନ୍ନତମାନର ଜ୍ଞାନକୌଶଳ ଶିକ୍ଷାଦାନ ଯୋଗୁଁ ଏହା ସଫଳ ହୋଇପାଛି । ଗ୍ରାମାଞ୍ଚଳର ଆଦିବାସୀ ମହିଳାଙ୍କୁ ସ୍ବାବଲମ୍ବୀ ଓ ସଶକ୍ତିକରଣ କରିବା ପାଇଁ ରାଜ୍ୟ ସରକାର ପଦକ୍ଷେପକୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।
ଗୋଟିଏ ସ୍କୁଲରେ ଅଙ୍ଗନଓ୍ବାଡିରୁ ଯୁକ୍ତ ୨
ଯାଜପୁର: 5T ରୂପାନ୍ତରିତ ଆଧାରରେ ବଦଳୁଛି ସରକାରୀ ସ୍କୁଲର ଚେହେରା। କିନ୍ତୁ ଏପରି ଏକ ସ୍କୁଲ ରହିଛି ଯେଉଁ ଠାରେ ଅଙ୍ଗନୱାଡି ଠାରୁ ଯୁକ୍ତ ଦୁଇ ପାଠ୍ୟକ୍ରମ ପାଇଁ ବ୍ୟବସ୍ଥା କରାଯାଉଛି। ଅତି ଆକର୍ଷଣୀୟ ଭାବେ ସ୍କୁଲ ନିର୍ମାଣ କରାଯାଉଥିବା ବେଳେ ରାଜ୍ୟର ଏହା ଶ୍ରେଷ୍ଠ 5T ସ୍କୁଲର ମାନ୍ୟତା ପାଇବାକୁ ଯାଉଛି। ଅତ୍ୟାଧୁନିକ ଶୈକ୍ଷିକ ବ୍ୟବସ୍ଥା ସହ ଉଚ୍ଚମାନର ରୂପାନ୍ତରଣ ହୋଇଥିବା ଏହି ସ୍କୁଲ ଆସନ୍ତା ୧୨ ତାରିଖରେ ଉଦଘାଟନ କରିବେ ମୁଖ୍ୟମନ୍ତ୍ରୀ । ଆଉ ଯାହାକୁ ନେଇ ବେଶ ଉତ୍ସାହର ସହ ଅପେକ୍ଷା କରିଛନ୍ତି ବିଦ୍ୟାଳୟର ଛାତ୍ରୀ ଓ ଶିକ୍ଷକ ଶିକ୍ଷୟତ୍ରି ।
ସୁନ୍ଦର ଦିଶୁଛି ସରକାରୀ ସ୍କୁଲ । ଛାତ୍ରଛାତ୍ରୀ ସହ ଅବିଭାବକଙ୍କୁ କରୁଛି ଆକର୍ଷିତ । ଗୋଟି ଛାତ ତଳେ ଅଙ୍ଗନବାଡି ଠାରୁ ଯୁକ୍ତ ଦୁଇ ପର୍ଯ୍ୟନ୍ତ ଶିକ୍ଷାଦାନ ପାଇଁ ବ୍ୟବସ୍ଥା । ମୋ ସ୍କୁଲ ଯୋଜନାରେ ରୂପାନ୍ତରିତ ହୋଇଛି ସ୍କୁଲ । ଯାଜପୁର ସରକାରୀ ବାଳିକା ଉଚ୍ଚବିଦ୍ୟାଳୟ ଏବେ ରାଜ୍ୟର ଶ୍ରେଷ୍ଠ 5T ସ୍କୁଲ ମଧ୍ୟରେ ପରିଚୟ ପାଇବାକୁ ଯାଉଛି। ୧୯୬୩ ମସିହାରେ ଏହି ସ୍କୁଲ ଜିଲ୍ଲାର ଏକ ସର୍ବପୁରାତନ ସ୍କୁଲ ହୋଇଥିବା ବେଳେ ସଫଳ ଛାତ୍ରଛାତ୍ରୀ ଗଢ଼ିବାରେ ସ୍କୁଲର ଭିନ୍ନ ପରିଚୟ ରହିଛି। ସଂପୂର୍ଣ୍ଣ ନୂଆ ରୂପରେ ଗଢ଼ି ଉଠିଥିବାଏହି ସ୍କୁଲକୁ ଚାହିଁଲେ ଆଖି ଲାଖି ଯାଉଛି। ସ୍କୁଲରେ ଅଙ୍ଗନୱାଡି ଶିକ୍ଷାଦାନ ଠାରୁ ଯୁକ୍ତ ଦୁଇ ପର୍ଯ୍ୟନ୍ତ ଶିକ୍ଷାଲାଭର ସୁବିଧା ରହିଛି। ହାଇସ୍କୁଲରେ ଅତ୍ୟାଧୁନିକ ବିଜ୍ଞାନଗାର,ପାଠାଗାର,ଶୌଚାଳୟ,ପାର୍କି ଏବଂ ଭୋଜନାଳୟ ରହିଛି। ଏପରିକି ସ୍କୁଲ ପରିସରରେ ପୁଡକୋର୍ଟ ନିର୍ମାଣ କରାଯାଇଥିବା ଦେଖିବାକୁ ମିଳିଛି । ଏଭଳି ସୁବିଧା ପାଇଁ ବେଶ ଖୁସି ଥିବା କହିଛନ୍ତି ଛାତ୍ରୀ ।
ହାଇସ୍କୁଲ ରୂପାନ୍ତରିତ କାର୍ଯ୍ୟରେ ରାଜ୍ୟ ବାହାରର ୩ଶହ ଶ୍ରମିକଙ୍କ ନିୟୋଜିତ ହୋଇଛନ୍ତି । ବିଦ୍ୟାଳୟରେ ପ୍ରଥମରୁ ଦଶମ ୩୫୩ ଜଣ ଛାତ୍ରୀ ପାଠପଢ଼ୁଥିବା ବେଳେ ୧୬ ଜଣ ଶିକ୍ଷକ ଶିକ୍ଷୟତ୍ରୀ ରହିଛନ୍ତି । ତେବେ ଏପରି ମଡେଲ ସ୍କୁଲ ପୁରା ଓଡିଶାରେ ନିଆରା ବୋଲି ଚର୍ଚ୍ଚା ହେଉଛି। ଏପରି ଉଦ୍ୟମ ପାଇଁ ଯାଜପୁର ଜିଲ୍ଲା ପ୍ରଶାସନ,ସ୍ଥାନୀୟ ବିଧାୟକ ଙ୍କ ସହ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ବିଦ୍ୟାଳୟର ଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀ ମାନେ ।
ପାକିସ୍ତାନରେ କିଏ ଗଢିବ ସରକାର?
ଇସଲାମବାଦ: ପାକିସ୍ତାନରେ କିଏ କରିବେ ସରକାର ଚାଲିଛି ପ୍ରକ୍ରିୟା। ପିଏମଏଲ-ଏନ ନେତା ନୱାଜ ସରିଫ ଓ ପିପିପି ନେତା ବିଲାୱାଲ ଭୁଟ୍ଟୋଙ୍କ ମଧ୍ୟରେ ସରକାର ଗଠନ ଲାଗି ଚାଲିଛି ଆଲୋଚନା। ସେପଟେ ନିର୍ବାଚନରେ ଉଭୟ ପିଏମଏଲ-ଏନ ନେତା ନଓ୍ବାଜ ସରିଫ ଓ ପାକିସ୍ତାନ ତେହରିକ-ଇ-ଇନସାଫ ନେତା ଇମ୍ରାନ ଖାଁ ନିଜ ଦଳ ସଂଖ୍ୟା ଗରିଷ୍ଠତା ହାସଲ ନେଇ ଦାବି କରିଛନ୍ତି । କାହାର ବିଜୟ ହୋଇଛି ସେ ନେଇ ସ୍ପଷ୍ଟ ଆସୁନାହିଁ । ଗତକାଲି ପିଏମଏଲ ଏକ ତୃତୀୟାଂଶ ଆସନରେ ବିଜୟୀ ହୋଇଛି ବୋଲି ସରିଫ ଦାବି କରିବା ସହ ସରକାର ଗଠନ ଲାଗି ପ୍ରକ୍ରିୟା ଆରମ୍ଭ ହୋଇଛି ବୋଲି କହିଥିଲେ । କୁହାଯାଉଛି ପିଟିଆଇ ବର୍ତ୍ତମାନ ସୁଦ୍ଧା ୯୯ ଆସନରେ ବିଜୟୀ ହୋଇଛି । ପିଏମଏଲ-ଏନ ୭୧, ପିପିପି ୫୩, ଏମକ୍ଯୁଏମ ୧୭ ଆସନ ହାସଲ କରିଛନ୍ତି । ସେପଟେ ଆର୍ଟିଫିସିଆଲ ଇଣ୍ଟେଲିଜେନସ ବ୍ୟବହାର କରି ଇମ୍ରାନଙ୍କ ଏକ ଭିଡିଓ ବାର୍ତ୍ତା ପ୍ରସାରିତ ହୋଇଛି । ଏହି ବାର୍ତ୍ତାରେ ସରିଫଙ୍କ ଦାବିକୁ ଇମ୍ରାନ ଅଗ୍ରାହ୍ୟ କରିଛନ୍ତି । ବାର୍ତ୍ତାରେ ଇମ୍ରାନ କହିଛନ୍ତି- ନଓ୍ବାଜ ସରିଫଙ୍କ ଲଣ୍ଡନ ପ୍ଲାନ ଫେଲ୍ ମାରିଛି । ଗତବର୍ଷ ଶେଷ ଭାଗରେ ତିନି ଥରର ପ୍ରଧାନମନ୍ତ୍ରୀ ସରିଫ ଲଣ୍ଡନରୁ ସ୍ବଦେଶ ଫେରି ନିର୍ବାଚନ ମଇଦାନରେ ଅବତୀର୍ଣ୍ଣ ହୋଇଥିଲେ । ସରକାର ଗଠନ ଲାଗି ପିପିପି ସହ ଆଲୋଚନା ହୋଇଥିବା ସେ ଦାବି କରିଛନ୍ତି । ତେଣେ ପାକିସ୍ତାନର ନିର୍ବାଚନ ନିୟମ ଅନୁସାରେ ସ୍ବାଧୀନ ସଦସ୍ୟମାନେ ସରକାର ଗଠନ କରିପାରିବେ ନାହିଁ ବୋଲି ନିୟମ ଥିବାରୁ ସମସ୍ୟା ଅଧିକ ଘନୀଭୂତ ହୋଇଛି । ତେବେ କୌଣସି ସ୍ବୀକୃତିପ୍ରାପ୍ତ ରାଜନୈତିକ ଦଳ ସହ ମିଶି ସେମାନେ ସରକାର କରିପାରିବେ । ତେଣେ ସରକାର ଗଠନ ଲାଗି ପିପିପି ଅଧ୍ୟକ୍ଷ ବିଲାଓ୍ବଲ ଭୁଟ୍ଟୋ ଜର୍ଦ୍ଦାରୀ ଓ ଉପାଧ୍ୟକ୍ଷ ଅସିଫ ଅଲ୍ଲୀ ଜର୍ଦ୍ଦାରୀଙ୍କ ସହ ନଓ୍ବାଜ ଆଲୋଚନା କରିଥିବା ସୂଚନା ମିଳିଛି ।
ମାଟ୍ରିକ ପ୍ରଶ୍ନପତ୍ର ଲିକ୍ କି ଭାଇରାଲ ହେଲେ ପ୍ରଧାନଶିକ୍ଷକ ଦାୟୀ ରହିବେ
କଟକ: ମାଟ୍ରିକ ପ୍ରଶ୍ନପତ୍ର ଲିକ୍ କି ଭାଇରାଲ ହେଲେ ଏଥିପାଇଁ ସଂପୃକ୍ତ ସ୍କୁଲର ପ୍ରଧାନଶିକ୍ଷକ ହିଁ ଦାୟୀ ରହିବେ । ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ପ୍ରଧାନ ଶିକ୍ଷକଙ୍କ ପଞ୍ଚମ ବ୍ଲକ ସ୍ତରୀୟ ମାସିକ ଆଲୋଚନା କାର୍ଯ୍ୟକ୍ରମରେ ଏନେଇ ଅବଗତ କରାଯାଇଛି । ମାଟ୍ରିକ ପରୀକ୍ଷା ପ୍ରଶ୍ନପତ୍ର ଭାଇରାଲ ରୋକିବାକୁ ରାଜ୍ୟ ସରକାର କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି । ପ୍ରଶ୍ନପତ୍ର ଲିକ୍ ହେଲେ ପ୍ରଧାନଶିକ୍ଷକ ଦାୟୀ ରହିବା ସହ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ପରୀକ୍ଷା ଚାଲିଥିବା ସମୟରେ ପରିଚାଳକଙ୍କ ବ୍ଯତୀତ ଅନ୍ଯ କେହି ମୋବାଇଲ ନେଇଯାଇପାରିବେ ନାହିଁ । ପ୍ରଶ୍ନପତ୍ର ଥିବା ଆଲମାରିର ଚାବିକାଠି ଦିଆଯିବା ପୂର୍ବରୁ ସଂପୃକ୍ତ ଅଧିକାରୀଙ୍କ ପରିଚୟ ବାବଦରେ ପରିଚାଳକ ଭଲଭାବେ ଅବଗତ ହେବେ।
ଅଚିହ୍ନା ବ୍ୟକ୍ତିକୁ ପରୀକ୍ଷା କେନ୍ଦ୍ରକୁ ପ୍ରବେଶ ଅନୁମତି ମିଳିବ ନାହିଁ । ପରୀକ୍ଷାରେ କପି ରୋକିବା ଓ ଶତ ପ୍ରତିଶତ ଉପସ୍ଥାନ ଉପରେ ଗୁରୁତ୍ବ ଦିଆଯାଇଛି। ପରୀକ୍ଷା କେନ୍ଦ୍ରରେ ୧୨ରୁ ୨୪ ଜଣ ପରୀକ୍ଷାର୍ଥୀଙ୍କ ପାଇଁ ଜଣେ ନିରୀକ୍ଷକ, ୪୮ରୁ ୯୬ ପରୀକ୍ଷାର୍ଥୀଙ୍କ ପାଇଁ ଜଣେ ରିଲିଭିଂ ନିରୀକ୍ଷକ ଓ ୨୪ରୁ ୨୮ ପରୀକ୍ଷାର୍ଥୀଙ୍କ ପାଇଁ ଜଣେ ଭ୍ରାମ୍ୟମାଣ ନିରୀକ୍ଷକ ରହିବେ। ନିରୀକ୍ଷକ ପ୍ରଶ୍ନପତ୍ର ବାଣ୍ଟିବେ, ରିଲିଭିଂ ପରୀକ୍ଷକ ମୂଳ ନିରୀକ୍ଷକଙ୍କ ଅନୁପସ୍ଥିତିରେ ଦାୟିତ୍ଵ ତୁଲାଇବେ, ଭ୍ରାମ୍ୟମାଣ ନିରୀକ୍ଷକ ପରୀକ୍ଷା କେନ୍ଦ୍ର ବାହାର ସ୍ଥିତି ଉପରେ ନଜର ରଖିବେ । ସକାଳ ୭ଟା ସକାଳ ୭ଟା ୩୦ରେ ପରୀକ୍ଷା କେନ୍ଦ୍ର ଖୋଲିବ । ୮ଟା ୩୦ରେ ଓଏମ୍ଆର ସିଟ୍, ୮ଟା ୪୫ରେ ପ୍ରଶ୍ନ-ଉତ୍ତର ପୁସ୍ତିକା ବଣ୍ଟନ କରାଯିବ । ଅନୁପସ୍ଥିତଙ୍କ ତାଲିକା ଓ ଅନୁପସ୍ଥିତ ରହିବାର କାରଣ ପ୍ରଧାନ ଶିକ୍ଷକମାନେ ଦର୍ଶାଇବେ । ଶିକ୍ଷକ-ଶିକ୍ଷୟିତ୍ରୀ ନିୟମିତ ଭାବେ ଅନୁପସ୍ଥିତ ରହୁଥିବା ଥିବା ଛାତ୍ରଛାତ୍ରୀଙ୍କ ଘରକୁ ଯାଇ ବୁଝାଇବେ ।