ନନ୍ଦିଘୋଷ ବ୍ୟୁରୋ: ଚାଲିଛି ଗଣତନ୍ତ୍ରର ମହାପର୍ବ । ଦେଶରେ ଚାଲିଛି ଷଷ୍ଠ ଏବଂ ରାଜ୍ୟରେ ତୃତୀୟ ପର୍ଯ୍ୟାୟ ମତଦାନ । ତେବେ ଗଣତନ୍ତ୍ରର ମହାପର୍ବରେ ସାମିଲ ହୋଇ ମତଦାନ ସାବ୍ୟସ୍ତ କରିଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ଧଳ । ସେପଟେ ଅର୍ଥ ବିଭାଗ ପ୍ରମୁଖ ସଚିବ ସୁଜାତା ରାଉତ କାର୍ତ୍ତିକେୟନ ମଧ୍ୟ ଭୋଟ ଦେଇଛନ୍ତି । କଟକ ଲୋକସଭା ପ୍ରାର୍ଥୀ ସନ୍ତୃପ୍ତ ମିଶ୍ର ମଧ୍ୟ ନିଜ ପରିବାର ସହ ଆସି ମତଦାନ ସାବ୍ୟସ୍ତ କରିଛନ୍ତି ।
ଆଜି ହେବିଓ୍ବେଟ ନେତାଙ୍କ ଭାଗ୍ୟ ପରୀକ୍ଷା
ନନ୍ଦିଘୋଷ ବ୍ୟୁରୋ: ଆଜି ଦେଶରେ ଷଷ୍ଠ ଏବଂ ରାଜ୍ୟରେ ଚାଲିଛି ତୃତୀୟ ପର୍ଯାୟ ମତଦାନ । ଦେଶରେ ୫୮ ଆସନରେ ମତଦାନ ଚାଲିଥିବାବେଳେ ହେବିଓ୍ବେଟ ନେତାଙ୍କ ଭାଗ୍ୟ ପରୀକ୍ଷା ହେଉଛି । ଆଜି ମୋଟ ୮୮୯ ଜଣ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେଉଥିବାବେଳେ ଦେଶର ବହୁ ହେବିଓ୍ବେଟ ରହିଛନ୍ତି । ଏହି ପର୍ଯ୍ୟାୟରେ ମନୋଜ ତିଓ୍ବାରୀ, କହ୍ନେୟା ଲାଲ, ମେନକା ଗାନ୍ଧୀ, ମେହବୁବା ମୁଫତି, ଅଭିଜିତ ଗଙ୍ଗୋପଧାୟ, ମନୋହର ଲାଲ ଖଟର, ନବୀନ ଜିନ୍ଦଲ, ରାଜ ବବର, ବନ୍ସୁରୀ ସ୍ବରାଜ,ଦୀନେଶ ଲାଲ ଯାଦବଙ୍କ ଭଳି ବଡ଼ ନେତାଙ୍କ ଭାଗ୍ୟ ପରୀକ୍ଷା ହେଉଛି । ସେପଟେ ରାଜ୍ୟରେ ମଧ୍ୟ ହାଇପ୍ରୋଫାଇଲ ଆସନରେ ଭୋଟିଂ ହେଉଥିବାବେଳେ ବଡ଼ ନେତାଙ୍କ ଭାଗ୍ୟ ପରୀକ୍ଷା ହେଉଛି ।
ସମସ୍ତଙ୍କ ନଜରରେ ରହିଛି ସମ୍ବଲପୁର ଲୋକସଭା । କାରଣ ଏଠାରେ ଚାଲିଛି ହାଇଭୋଲଟେଜ ଫାଇଟ୍ । ଏଠାରେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ଲଢୁଥିବାବେଳେ ତାଙ୍କୁ ଟକ୍କର ଦେଉଛନ୍ତି ବିଜେପି ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କଂଗ୍ରେସ ନଗେନ୍ଦ୍ର ପ୍ରଧାନଙ୍କୁ ପ୍ରାର୍ଥୀ କରିଛି । ମୁଖ୍ୟତଃ ଲଢେଇ ପ୍ରଣବ ଓ ଧର୍ମେନ୍ଦ୍ରଙ୍କ ମଧ୍ଯରେ ହେଉଛି ।
ଅନ୍ୟତମ ହାଇଭୋଲଟେଜ ଆସନ ଭୁବନେଶ୍ବରରେ ବି ଆଜି ନିର୍ବାଚନ ହେଉଛି । ଏଠାରେ ବିଜେପିର ଅପରାଜିତା ଷଡ଼ଙ୍ଗୀ ଓ ବିଜେଡିର କ୍ଯାପନେଟ ମନ୍ମଥ ରାଉତରାୟଙ୍କ ମଧ୍ଯ ହେଉଛି ବଡ଼ ଫାଇଟ୍ । କଂଗ୍ରେସ ତରଫରୁ ୟାସିର ନଓ୍ବାଜ୍ ଲଢେଇ କରୁଛନ୍ତି ।
ପୁରୀରେ ଏଥର ବିଜେପିର ସମ୍ବିତ ପାତ୍ର ଓ ବିଜେଡିର ଅରୂପ ପଟ୍ଟନାୟକଙ୍କ ମଧ୍ଯରେ ବଡ଼ ଲଢେଇ ଦେଖିବାକୁ ମିଳୁଛି । କଂଗ୍ରେସରୁ ଜୟ ନାରାୟଣ ପଟ୍ଟନାୟକ ପ୍ରାର୍ଥୀ ହୋଇଛନ୍ତି ।
ଅନ୍ଯପଟେ କଟକ ଆସନ ଉପରେ ବି ସମସ୍ତଙ୍କର ନଜର ରହିଛି । ଏଠାରେ ଭର୍ତ୍ତୃହରି ମହତାବଙ୍କୁ ବିଜେପି ଟିକେଟ ଦେଇଥିବାବେଳେ ବିଜେଡିରୁ ପ୍ରାର୍ଥୀ ହୋଇଛନ୍ତି ସଂତୃପ୍ତ ମିଶ୍ର । ଏହି ଲୋକସଭା ବ୍ଯତୀତ ଢେଙ୍କାନାଳ ଓ କେନ୍ଦୁଝରରେ ବି ସଭିଙ୍କର ନଜର ରହିଛି ।
କେନ୍ଦୁଝରରେ ବିଜେଡି ଧନୁର୍ଜୟ ସିଦ୍ଧୁ, ବିଜେପି ଅନନ୍ତ ନାୟକ ଓ କଂଗ୍ରେସ ବିନୋଦ ବିହାରୀ ନାୟକଙ୍କୁ ଟିକେଟ ଦେଇଛି ।
ଢେଙ୍କାନାଳରେ ବିଜେଡିର ଅବିନାଶ ସାମଲ, ବିଜେପିର ରୁଦ୍ର ନାରାୟଣ ପାଣି ଓ କଂଗ୍ରେସର ସସ୍ମିତା ବେହେରାଙ୍କ ମଧ୍ଯରେ ଲଢେଇ ଦେଖିବାକୁ ମିଳୁଛି ।
୬ ବର୍ଷ ପରେ ଫାଇନାଲରେ ହାଇଦ୍ରାବାଦ
ନନ୍ଦିଘୋଷ ବ୍ୟୁରୋ: ଆଇପିଏଲ ୨୦୨୪ କ୍ବାଲିଫାୟର-୨ରେ ରାଜସ୍ଥାନ ରୟାଲ୍ସକୁ ହରାଇ ଫାଇନାଲରେ ପ୍ରବେଶ କରିଛି ସନରାଇଜର୍ସ ହାଇଦ୍ରାବାଦ । ଦୀର୍ଘ ୬ ବର୍ଷ ପରେ ଫାଇନାଲରେ ପ୍ରବେଶ କରିଛି ହାଇଦ୍ରାବାଦ । ସେପଟେ କୋଲକାତା ନାଇଟ ରାଇଡର୍ସ ହାଇଦ୍ରାବାଦକୁ ହରାଇ ପ୍ରଥମ ଦଳ ଭାବେ ଚଳିତ ବର୍ଷ ଫାଇନାଲରେ ପ୍ରବେଶ କରିଛି । ତେବେ ଶୁକ୍ରବାର ହାଇଦ୍ରାବାଦ ରାଜସ୍ଥାନକୁ ୩୬ ରନରେ ପରାସ୍ତ କରିଛି । ହାଇଦ୍ରାବାଦ ପ୍ରଥମେ ବ୍ୟାଟିଂ କରି ୧୭୫ ରନ ସଂଗ୍ରହ କରିଥିବାବେଳେ ରାଜସ୍ଥାନ ରୟାଲ୍ସ ମାତ୍ର ୧୩୯ ରନ ସଂଗ୍ରହ କରିବାରେ ସକ୍ଷମ ହୋଇଥିଲା ।
ଆଜି ଦେଶରେ ଷଷ୍ଠ ଏବଂ ରାଜ୍ୟରେ ତୃତୀୟ ପର୍ଯ୍ୟାୟ ମତଦାନ
ନନ୍ଦିଘୋଷ ବ୍ୟୁରୋ: ଆଜି ଦେଶରେ ଷଷ୍ଠ ଏବଂ ରାଜ୍ୟରେ ତୃତୀୟ ପର୍ଯ୍ୟାୟ ମତଦାନ । ଗଣତନ୍ତ୍ରର ମହାପର୍ବରେ ଗୋଟିଏ ପରେ ଗୋଟିଏ ପାହାଚ ଅତିକ୍ରମ କରୁଛି ଓଡ଼ିଶା । ୭ଟି ପାହାଚର ଆଜି ତୃତୀୟ ପାଦରେ ପ୍ରବେଶ କରିଛନ୍ତି ଓଡ଼ିଶାବାସୀ । ଆଜି ଅନୁଷ୍ଠିତ ହେଉଛି ଓଡ଼ିଶାର ତୃତୀୟ ପର୍ଯ୍ୟାୟ ନିର୍ବାଚନ । ଚଳିତ ନିର୍ବାଚନରେ ଆଜି ହେଉଛି ସବୁଠୁ ହାଇପ୍ରୋଫାଇଲ୍ ଲଢ଼େଇ । ବାଜିରେ ଲାଗିଛି ବଡ଼ ନେତାଙ୍କ ଭାଗ୍ଯ । ଆଜିର ଆସନ ଉପରେ ରହିଛି ସାରା ରାଜ୍ଯର ନଜର । ବିଜେପି ଓ ବିଜେଡିର ଶୀର୍ଷ ନେତୃତ୍ବଙ୍କର ଆଜି ହେଉଛି ଭାଗ୍ଯ ପରୀକ୍ଷା । ଲୋକସଭା କ୍ଷେତ୍ରକୁ ଦେଖିଲେ ଜଣେ କେନ୍ଦ୍ରମନ୍ତ୍ରୀ, ଦୁଇ ସାଂସଦ, ଜଣେ ପୂର୍ବତନ ମନ୍ତ୍ରୀ ଓ ଜଣେ ବିଧାୟକଙ୍କର ଭାଗ୍ଯ ପରୀକ୍ଷା ହେଉଥିବାବେଳେ ବିଧାନସଭା ଆସନରେ ୩୦ ବିଧାୟକ, ୧୨ ପୂର୍ବତନ ବିଧାୟକ, ୮ ମନ୍ତ୍ରୀ ଓ ୭ ପୂର୍ବତନ ମନ୍ତ୍ରୀଙ୍କ ରାଜନୈତିକ ଭବିଷ୍ଯତ ନିର୍ଦ୍ଧାରଣ ହେଉଛି । ଆସନ୍ତୁ ନଜର ପକାଇବା ଆଜି କେଉଁଠି ହେଉଛି ନିର୍ବାଚନ ଆଉ କିଏ କାହାକୁ ଦେଉଛି ଟକ୍କର ।
ଆଜି ସମ୍ବଲପୁର, ଢେଙ୍କାନାଳ, କେନ୍ଦୁଝର, କଟକ, ପୁରୀ, ଭୁବନେଶ୍ବର ଲୋକସଭା ଆସନ ଏବଂ ଅଧୀନସ୍ଥ ୪୨ଟି ବିଧାନସଭା ଆସନରେ ମତଦାନ ହେଉଛି । ବିଜେପି ଓ ବିଜେଡିର ବହୁ ହେଭିୱେଟ୍ ନିଜର ଭାଗ୍ୟ ପରୀକ୍ଷା କରୁଛନ୍ତି । ସମ୍ବଲପୁର ଲୋକସଭା ଆସନରେ ଚଳିତ ନିର୍ବାଚନର ସବୁଠୁ ବଡ଼ ଲଢ଼େଇ ହେଉଛି । ଏଠାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେଡିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ମଧ୍ୟରେ ହେଉଛି ହାଇଭୋଲଟେଜ ଲଢେଇ । ବିଜେପି ଓ ବିଜେଡି ପାଇଁ ଏହି ଆସନରେ ସମ୍ମାନର ଲଢ଼େଇ ହେଉଛି ।
କେବଳ ସମ୍ବଲପୁର ଲୋକସଭା ଆସନ ନୁହେଁ, ଭୁବନେଶ୍ବର ଲୋକସଭା ଆସନରେ ବିଜେପି ସାଂସଦ ଅପରାଜିତା ଷଡ଼ଙ୍ଗୀ ଓ ବିଜେଡି ନେତା ମନ୍ମଥ ରାଉତରାୟ, ପୁରୀରେ ବିଜେପିର ସମ୍ବିତ ପାତ୍ର ଓ ବିଜେଡିର ଅରୂପ ପଟ୍ଟନାୟକ, କଟକରେ ବିଜେପିର ଭର୍ତ୍ତୃହରି ମହତାବ ଓ ବିଜେଡିର ସନ୍ତୃପ୍ତ ମିଶ୍ରଙ୍କ ମଧ୍ୟରେ କଡ଼ା ଲଢ଼େଇ ହେଉଛି। ଏହି ୩ଟି ଆସନ ବି ଜିତିବାକୁ ଦୁଇ ଦଳ ପୂରା ଦମ୍ ଲଗାଇଛନ୍ତି। ଦୁଇ ଦଳର ଫୋକସରେ ଏହି ତିନିଟି ଆସନ ଥିବାରୁ କେହି କାହାକୁ ଟିକେ ବି ସୁଯୋଗ ଦେବା ମୁଡରେ ନାହାନ୍ତି । ଜଗତସିଂହପୁର ଓ କେନ୍ଦୁଝରରେ ବି ହେଉଛି କଡ଼ା ଫାଇଟ୍ ।
୪୨ଟି ବିଧାନସଭା ଆସନରେ ବି ଆଜି ଭୋଟ୍ ହେଉଛି । କୁଚିଣ୍ଡା, ରେଙ୍ଗାଲି, ସମ୍ବଲପୁର, ରେଢାଖୋଲ, ଦେବଗଡ଼, ତେଲକୋଇ, ଘଷିପୁରା, ଆନନ୍ଦପୁର, ପାଟଣା, କେନ୍ଦୁଝର, ଚମ୍ପୁଆ, କରଞ୍ଜିଆ, ଢେଙ୍କାନାଳ, ହିନ୍ଦୋଳ, କାମାକ୍ଷାନଗର, ପରଜଙ୍ଗ, ପାଲଲହଡା, ତାଳଚେର, ଅନୁଗୁଳ, ଛେଣ୍ଡିପଦା, ଆଠମଲ୍ଲିକ, ବଡ଼ମ୍ବା, ବାଙ୍କି, ଆଠଗଡ଼, ବାରବାଟୀ କଟକ, ଚୌଦ୍ବାର, କଟକ, କଟକ ସଦର, ପୁରୀ, ବ୍ରହ୍ମଗିରି, ସତ୍ୟବାଦୀ, ପିପିଲି, ଜୟଦେବ, ଭୁବନେଶ୍ବର ମଧ୍ୟ, ଭୁବନେଶ୍ବର ଉତ୍ତର, ଏକାମ୍ର ଭୁବନେଶ୍ବର, ଜଟଣୀ, ବେଗୁନିଆ, ଖୋର୍ଦ୍ଧା, ଚିଲିକା, ରଣପୁର, ଖଣ୍ଡପଡ଼ା, ନୟାଗଡ଼ରେ ଭୋଟ୍ ଗ୍ରହଣ ହେଉଛି ।
ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟୁଥିଲେ ବୁର୍ଲା ବିଶ୍ବବିଦ୍ୟାଳୟ କର୍ମଚାରୀ, ଧରି ପକାଇଲେ ସ୍ଥାନୀୟ ଲୋକେ
ବରଗଡ଼: ବୁର୍ଲା ଜଗନ୍ନାଥ ମନ୍ଦିର ନିକଟରେ ଟଙ୍କା ବାଣ୍ଟୁଛି ବିଜେପି । ବିଶ୍ଵ ନାମକ ବ୍ୟକ୍ତି ଜଣକ ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟୁଥିବା ବେଳେ ସ୍ଥାନୀୟ ଭୋଟରଙ୍କ ଦ୍ଵାରା ହଟହଟା ହେଉଛନ୍ତି । ଯାହାର ଭିଡିଓ ଭାଇରାଲ ହେବାରେ ଲାଗିଛି । ବ୍ୟକ୍ତି ଜଣକ ବୁର୍ଲା ବିଶ୍ବବିଦ୍ୟାଳୟରେ କାର୍ଯ୍ୟରତ ଥିବା ବେଳେ, ବୁର୍ଲା ଜଗନ୍ନାଥ ମନ୍ଦିର ନିକଟରେ ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟୁଥିବା କହିଛନ୍ତି ଭୋଟର ।
ଗ୍ରାସୀମ କମ୍ପାନୀରେ ଗ୍ୟାସ୍ ପାଇପ୍ ଫାଟି ୪ ଆହତ
ବ୍ରହ୍ମପୁର: ଗ୍ରାସୀମ କମ୍ପାନୀରେ ଅଘଟଣ । ଗ୍ୟାସ ପାଇପ ଫାଟି ୪ ଜଣ ଆହତ ହୋଇଥିବା ବେଳେ ଜଣେ ଗୁରୁତର । ବ୍ରହ୍ମପୁର ସହର ସ୍ଥିତ ଗ୍ରାସୀମ ଇଣ୍ଡଷ୍ଟ୍ରିଜରେ ଘଟିଛି ଅଘଟ ।
ଶୁକ୍ରବାର କମ୍ପାନୀ ପକ୍ଷରୁ ବିଦ୍ୟୁତ ସରବରହ ବନ୍ଦ କରାଯାଇ ଗ୍ୟାସ ପାଇପ ଗୁଡିକ ମରାମତି କାର୍ଯ୍ୟ ଚାଲିଥିଲା । ଅସାବଧାନତା ଯୋଗୁଁ ଗ୍ୟାସ ପାଇପଟି ହଟାତ ଫାଟି ଯାଇଥିଲା । ଗଞ୍ଜାମ ତହସିଲଦାର ଓ ଥାନା ଆଇଆଇସି ନମିତା ପାତ୍ର କମ୍ପାନୀ କର୍ମକର୍ତ୍ତାଙ୍କ ସହ ଆଲୋଚନା କରିଛନ୍ତି l ଆହତ ଶ୍ରମିକଙ୍କୁ କମ୍ପାନୀର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଚିକିତ୍ସା ପରେ ତାଙ୍କୁ ଘରକୁ ପଠାଇ ଦିଆଯାଇଛି ।
ଆହତମାନଙ୍କ ମଧ୍ୟରେ ଥିଲେ ରାହୁଲ ଯାଦବ, ଶଶିକାନ୍ତ ମହାରଣା, କେଶବ ସାହୁ ଓ ଲକ୍ଷ୍ମୀଧର ନାୟକ । ୪ ଜଣଙ୍କୁ ସାମାନ୍ୟ ଆହତ ଥିବା ବେଳେ ଅନ୍ୟ ଜଣଙ୍କ ଆଖି ଓ ଶରୀରରେ ଏସିଡ ଛିଟିକ ପଡ଼ିଥିବା ଜଣାପଡିଥିଲା । ସଲ୍ଫୁରିକ୍ ପ୍ଲାଣ୍ଟର ପାଇପ ଲାଇନ ଖୋଲୁଥିବା ସମୟରେ ଏହି ଦୁର୍ଘଟଣା ଘଟିଥିବା କୁହାଯାଉଛି ।
ନକ୍ସଲ-ଯବାନଙ୍କ ମଧ୍ୟରେ ଗୁଳି ବିନିମୟ, ଜଣେ ମାଓବାଦୀ ମୃତ
ନନ୍ଦିଘୋଷ ବ୍ୟୁରୋ: ଓଡ଼ିଶା ସୀମାନ୍ତ ଝାଡ଼ଖଣ୍ଡରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳି ବିନିମୟ । ସୁରକ୍ଷାକର୍ମୀଙ୍କ ଗୁଳିରେ ଜଣେ ମାଓବାଦୀ ନିହତ ହୋଇଥିବାବେଳେ ୩ ଜଣ ଖସିଯିବାରେ ସକ୍ଷମ ହୋଇଛନ୍ତି । ମୃତ ମାଓବାଦୀ ହେଲେ ଝାଡ଼ଖଣ୍ଡ ଖୁଣ୍ଟି ଜିଲ୍ଲା ଅଡ଼କି ଥାନା ଚାରିସିଉଦ ଗାଁର ବୁଧୁରାମ ମୁଣ୍ଡା ।
ଗୁଳି ବିନିମୟ ପରେ ସୁରକ୍ଷା କର୍ମୀ ଗୋଟିଏ ୯ ଏମଏମ ପିସ୍ତଲ, ୨୦ ରାଉଣ୍ଡ ଜୀବନ୍ତ ଗୁଳି ସହ ବହୁ ମାଓବାଦୀ ସାମଗ୍ରୀ ଜବତ କରିଛନ୍ତି । ଜରେଇକେଲା ଥାନା ଅନ୍ତର୍ଗତ ବଳିଆଡ଼ିହି ଜଙ୍ଗଲରେ ଚାରି ଜଣିଆ ମାଓବାଦୀ ଦଳ ଓ ସୁରକ୍ଷାକର୍ମୀ ମୁହାଁମୁହିଁ ହୋଇଥିଲେ । ମାଓବାଦୀମାନେ ସୁରକ୍ଷାକର୍ମୀଙ୍କୁ ଦେଖି ଗୁଳି ଚଳାଇବା ପରେ ସୁରକ୍ଷାକର୍ମୀ ପାଲଟା ଆକ୍ରମଣ କରିଥିଲେ । ସୁରକ୍ଷାକର୍ମୀଙ୍କ ଗୁଳିମାଡ଼ରେ ଜଣେ ମାଓବାଦୀ ନିହତ ହୋଇଥିବା ବେଳେ ତିନି ମାଓବାଦୀ ଖସି ପଳାଇବାକୁ ସକ୍ଷମ ହୋଇଛନ୍ତି ।
ଏକାଧିକ ପ୍ରସଙ୍ଗକୁ ନେଇ ବିଜେପି ବିରୋଧରେ ସିଇଓଙ୍କ ନିକଟରେ ଫେରାଦ ହେଲା ବିଜେଡି
ଭୁବନେଶ୍ବର: ଏକାଧିକ ପ୍ରସଙ୍ଗକୁ ନେଇ ବିଜେପି ବିରୋଧରେ ସିଇଓଙ୍କ ନିକଟରେ ଫେରାଦ ହେଲା ବିଜେଡି । ରାତିପାହିଲେ ତୃତୀୟ ପର୍ଯ୍ୟାୟ ନିର୍ବାଚନ ରହିଛି । ଏହାପୂର୍ବରୁ ବିଭିନ୍ନ ସ୍ଥାନରେ ବିଜେପି ସମର୍ଥକ ହିଂସାକାଣ୍ଡ ଘଟାଉଥିବା ଅଭିଯୋଗ ହୋଇଛି ।
କିଛିଦିନ ତଳେ ବିଜେପିର ବିଧାୟକ ପ୍ରାର୍ଥୀ ଏନେଇ ଧମକ ମଧ୍ଯ ଦେଇଥିଲେ । ଆଜି ସକାଳ ଲିଙ୍ଗରାଜ ମନ୍ଦିର ପାଖରେ ପୋଲିସଙ୍କୁ ମଧ୍ଯ ଗାଳିଗୁଲଜ କରିଥିଲେ । ନିର୍ଦ୍ଦିଷ୍ଟ ଗଣମାଧ୍ଯମ ମଧ୍ଯ ବିଜେପି ପାଇଁ ଟଙ୍କା ବାଣ୍ଟୁଥିବା ଅଭିଯୋଗ ହୋଇଛି । ପରଜଙ୍ଗ ନିର୍ବାଚନ ମଣ୍ଡଳୀର ବିଧାୟକ ପ୍ରାର୍ଥୀ ବିଭୂତି ପ୍ରଧାନଙ୍କ ଲୋକମାନେ ବିଜେଡି କର୍ମୀଙ୍କ ଉପରେ ଆକ୍ରମଣ କରିଛନ୍ତି । ଭୁବନେଶ୍ବର ଉତ୍ତର ନିର୍ବାଚନମଣ୍ଡଳୀରେ ଭାରତୀୟ ଜନତା ପାର୍ଟି ଗୋଟିଏ ବୁଥର ମାତ୍ର ୭୦ ମିଟର ଦୂରରେ ଦୁଇଟି ଛୋଟ ଅଫିସ କରିଛନ୍ତି । ଯାହା ନିର୍ବାଚନ ଆଚରଣବିଧି ଉଲ୍ଲଂଘନ କରୁଛି । ନିୟମ ଅନୁସାରେ ବୁଥ ଠାରୁ ଦଳୀୟ ଅଫିସ ୩୦୦ ମିଟର ଦୂରରେ ରହିବା କଥା । ଏଣୁ ବିଜେପି ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଦଳ ଦାବି କରିଛି ।
ମେ’ରେ ରେକର୍ଡ ପରିମାଣର ନିଶା ସାମଗ୍ରୀ ଜବତ, ୪୧୪୧ ମାଫିଆ ଗିରଫ
ଭୁବନେଶ୍ବର: ନିର୍ବାଚନ ସମୟରେ ଅବକାରୀ ଧରପଗଡ । ମେ’ ମାସରେ ରେକର୍ଡ ପରିମାଣର ବେଆଇନ ନିଶା ସାମଗ୍ରୀ ଜବତ । ୨୩ ଦିନରେ ୪ ହଜାର ୯୭୬ ମାମଲା, ୪ ହଜାର ୧୪୧ ନିଶା ମାଫିଆ ଗିରଫ ।
ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଅବକାରୀ ବିଭାଗ ମଦ ମାଫିଆ, ବେଆଇନ ବ୍ରାଉନସୁଗାର ବେପାରୀ ଓ ଗଞ୍ଜେଇ ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ଜୋରଦାର କରିଛି । ଚଳିତ ମାସରେ ୨୩ ତାରିଖ ପର୍ଯ୍ୟନ୍ତ ୨ ଲକ୍ଷ ୪୯ ହଜାର ୫୧୦ ଲିଟର ଦେଶୀ ମଦ, ୮୭ ଲିଟର ନକଲି ବିଦେଶୀ ମଦ, ୫୩ ଲିଟର ଟିକସ ଫାଙ୍କି ବିଦେଶୀ ମଦ, ୨ ହଜାର ୬୧୩ ଲିଟର ଭାରତ ତିଆରି ବିଦେଶୀ ମଦ, ୧୫ ହଜାର ୧୧୬ ଲିଟର ବିୟର, ୫ ହଜାର ୩୦୫ ଲିଟର ମହୁଲି, ୪୧୦ କିଲୋ ଭାଙ୍ଗ, ୧ ହଜାର ୮୫୨ ଲିଟର ଆସ୍କା ଫଟି ଓ ୮୪ ହଜାର ୧୬୩ କେଜି ମହୁଆ ଫୁଲ ଏବଂ ୪୩୪ଟି ଗାଡି ଜବତ । ସେହିପରି ବେଆଇନ ଗଞ୍ଜେଇ, ହେରୋଇନ୍ ଓ କଫ୍ ସିରପ୍ ମାଫିଆଙ୍କ ବିରୋଧରେ ଚାଲିଥିବା ନିରନ୍ତର ଓ ଜୋରଦାର ଅଭିଯାନ ମଧ୍ୟ ବହୁତ ଭଲ ଫଳାଫଳ ଦେଇଛି । ଏହି ଘଟଣାରେ ୧୧୪ଟି ମାମଲା ରୁଜୁ ହୋଇଥିବା ବେଳେ ୧୩୦ ଜଣ ମାଫିଆଙ୍କୁ ଗିରଫ କରାଯାଇଛି ।
ରାତି ପାହିଲେ ୬ ଲୋକସଭା, ୪୨ ବିଧାନସଭା ଆସନରେ ଭୋଟିଂ; ନିୟୋଜିତ ହେବେ ୩୫ ହଜାର ପୋଲିସ୍
ଭୁବନେଶ୍ବର: ରାତି ପାହିଲେ ଦେଶରେ ଷଷ୍ଠ ଓ ରାଜ୍ୟରେ ତୃତୀୟ ପର୍ଯ୍ୟାୟ ନିର୍ବାଚନ । ୬ ଲୋକସଭା ଓ ଏହାର ଅଧୀନରେ ଥିବା ୪୨ ବିଧାନସଭା ଆସନରେ ହେବ ଭୋଟିଂ । ଏଥିପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାିଛି । ଏହି ପର୍ଯ୍ୟାୟରେ ନିୟୋଜିତ ହେବେ ୩୫ ହଜାର ପୋଲିସ୍ ।
ଏହି ପର୍ଯ୍ୟାୟରେ ୧୨ଟି ପୋଲିସ ଜିଲ୍ଲାରେ ଥିବା ୧୦ ହଜାର ୫୫୧ଟି ବୁଥରେ ଭୋଟ ଗ୍ରହଣ କରାଯିବ । ୨୦ ପ୍ରତିଶତ ବୁଥ ସମ୍ବେଦନଶୀଳ ରହିଛି । ଏଥିପାଇଁ ନିୟୋଜିତ ହେବେ ୩୫ ହଜାର ଫୋର୍ସ । ୧୨ଟି ଜିଲ୍ଲାରେ ୧୨୧ କମ୍ପାନୀ ଅର୍ଦ୍ଧ ସାମରିକ ବାହିନୀ , ୧୦୬ ପ୍ଲାଟୁନ ଓଡିଶା ଆର୍ମଡ଼ ପୋଲିସ ମୁତୟନ ହେବେ । ସମ୍ବଲପୁର, କେଉଁଝର, ଖୋର୍ଦ୍ଧା, କଟକ ପାଇଁ ୪ ଜଣ ଆଇପିଏସ ଦାୟିତ୍ୱରେ ରହିବେ । ବୁଥ ତଦାରଖ ପାଇଁ ୭୬୩ଟି ମୋବାଇଲ ପାଟ୍ରୋଲିଂ ପାର୍ଟି କାମ କରୁଛି । ଜିପିଏସ୍ ଜରିଆରେ କଣ୍ଟ୍ରୋଲ ରୁମକୁ କରାଯିବ ମନିଟର । ସମ୍ବେଦନଶୀଳ ସ୍ଥାନରେ କୁଇକ ଆକ୍ସନ ଟିମ୍ କାମ କରିବ । ୧୨ଟି ଜିଲ୍ଲା ସୀମାରେ ଥିବା ୧୭ଟି ବର୍ଡର ଚେକପୋଷ୍ଟରେ କଡାକଡି ଚେକିଂ ଚାଲିଛି । ନିର୍ବାଚନ କମିଶନଙ୍କ ନିର୍ଦ୍ଦେଶ ମୁତାବକ ୩୩୧ଟି ଫ୍ଲାଇଙ୍ଗ ସ୍କ୍ବାଡ୍ ତଦାରଖ କରୁଛନ୍ତି । ଏହା ବ୍ୟତୀତ ୩୪୩ଟି ଷ୍ଟାଟିକ ସର୍ଭେଲାନ୍ସ ଟିମ ପରିଭ୍ରମଣ କରୁଛି । ଏହି ୧୨ଟି ଜିଲ୍ଲାରେ ୨୫ଟି ଇଭିଏମ ଷ୍ଟ୍ରଙ୍ଗ ରୁମ ରହିଛି ।
ଆଚରଣବିଧି ଉଲ୍ଲଂଘନ ନେଇ ୧୭ଟି କେସ୍ ହୋଇଥିବା ବେଳେ ସମୁଦାୟ ୭୮ଟି କେସ ରୁଜୁ ହୋଇଛି । ୮୯ ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି । ଜାନୁଆରୀ ପ୍ରଥମ ସପ୍ତାହରୁ ଆଜି ଭିତରେ ୩୪ ହଜାର ୪୦୩ ୱାରେଣ୍ଟ ଇସ୍ୟୁ ହୋଇଛି । ୪ ହଜାର ପଳାତକଙ୍କ ବିରୋଧରେ ଲଟକା ଲାଗିଛି । ଦଫା ୧୦୭, ୧୦୯, ୧୧୦ ଜରିଆରେ ଅଭିଯୁକ୍ତଙ୍କୁ ଦମନ କରାଯାଇଛି । ମୋଟ ୫୦ ହଜାରରୁ ଊର୍ଦ୍ଧ୍ବ ପ୍ରୋସିଡିଂ ଜାରି ହୋଇଛି । ଭୁବନେଶ୍ୱର କଟକରେ ୩ ଜଣଙ୍କୁ ତଡ଼ିପାର ଘୋଷଣା କରାଯାଇଛି । ୧୧ ଜଣଙ୍କୁ NSAରେ ବୁକ୍ କରାଯାଇଛି । ୨୫୪ ଜଣଙ୍କଠାରୁ ବେଆଇନ ଅସ୍ତ୍ରଶସ୍ତ୍ର ଜବତ କରାଯାଇଛି । ୩ଟି ବନ୍ଧୁକ ତିଆରି ସ୍ଥାନ ଠାବ କରାଯାଇ ୧୪ ଜଣଙ୍କୁ ଗିରଫ କରାଯାଇଛି । ୬ ଲକ୍ଷ ୭୮ ହଜାର ଲିଟର ମଦ ଜବତ ସହ ୨୫ ହଜାରରୁ ଅଧିକ NDPS କେସ ହୋଇଛି । ୮ କୁଇଣ୍ଟାଲ ଗଞ୍ଜେଇ ଜବତ କରି ୯୪୧ ଲୋକଙ୍କୁ ଗିରଫ କରାଯାଇଛି । ୫ କେଜି ବ୍ରାଉନସୁଗର ମଧ୍ୟ ଜବତ କରାଯାଇଛି । ଜବତ ନିଶା ସାମଗ୍ରୀର ଆନୁମାନିକ ମୂଲ୍ୟ ୮୯ କୋଟି ହେବ । SST ପକ୍ଷରୁ ଚଢ଼ାଉ କରାଯାଇ ଗାଡି ଭିତରୁ ୬ କୋଟିରୁ ଊର୍ଦ୍ଧ୍ବ ଟଙ୍କା ଜବତ କରାଯାଇଛି ।
ସୋସିଆଲ ମିଡିଆ ମନିଟରିଂ ସେଲ୍ ଗଠନ କରାଯାଇ ଆପତ୍ତିଜନକ ପୋଷ୍ଟ ହଟାଯାଇଛି । ଅଭିଯୁକ୍ତଙ୍କ ବିରୋଧରେ କେସ ରୁଜୁ ହୋଇଛି । ଅବାଧ, ମୁକ୍ତ, ନିରପେକ୍ଷ ନିର୍ବାଚନ ପାଇଁ ଓଡିଶା ପୋଲିସ ପ୍ରତିଶ୍ରୁତିବଦ୍ଧ ବୋଲି କହିଛନ୍ତି ପୋଲିସ ଡିଜିପି ।