ଆଇପିଏଲ ସିଜିନ୍-୧୫; ମୁମ୍ବାଇରେ ଖେଳାଯାଇପାରେ ପୂରା ଟୁର୍ଣ୍ଣାମେଣ୍ଟ

ନୂଆଦିଲ୍ଲୀ: ସାରା ଦେଶରେ କରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଉଛି । ନୂଆବର୍ଷ ପରଠାରୁ କରୋନା ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ବଢ଼ିବାରେ ଲାଗିଛି । ଗତ ୨୪ ଘଣ୍ଟାରେ ଦେଶରେ ୧ ଲକ୍ଷ ୪୦ ହଜାରରୁ ଅଧିକ ଆକ୍ରାନ୍ତଙ୍କ ସଂଖ୍ୟା ଚିହ୍ନଟ ହୋଇଛି । ସ୍ୱାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ ଭାରତରେ ଫେବ୍ରୁଆରୀ କିମ୍ବା ମାର୍ଚ୍ଚରେ ତୃତୀୟ ଲହର ଆସିପାରେ । ଏସବୁ ଭିତରେ ବିସିସିଆଇ ଇଣ୍ଡିଆନ ପ୍ରିମିୟର ଲିଗ ୨୦୨୨ ପାଇଁ ପ୍ରସ୍ତୁତି ଆରମ୍ଭ କରିସାରିଛି ।

ଆଇପିଏଲର ଏହି ସିଜିନରେ ଦୁଇ ନୂଆ ଟିମ୍ ଆସିବା ଫଳରେ ମୋଟ ୧୦ ଟିମ୍ ହୋଇଯିବ । ଏପରି ସ୍ଥିତିରେ ବିସିସିଆଇ ଏହି ଟୁର୍ଣ୍ଣାମେଣ୍ଟକୁ ୧୦ଟି ସହରରେ କରିବାକୁ ଚିନ୍ତା କରିଥିଲା । କିନ୍ତୁ କରୋନାର ତୃତୀୟ ଲହର ପାଇଁ ଏହା ଆଉ ସମ୍ଭବ ହେବ ନାହିଁ । ମିଡିଆ ରିପୋର୍ଟ ଅନୁସାରେ କ୍ରିକେଟର ଏହି ମହାକୁମ୍ଭ ମାର୍ଚ୍ଚ ଶେଷ କିମ୍ବା ଏପ୍ରିଲର ପ୍ରଥମ ସପ୍ତାହରେ ଆରମ୍ଭ ହୋଇପାରେ । ରିପୋର୍ଟ ଅନୁଯାୟୀ ଭାରତରେ ବଢ଼ୁଥିବା କରୋନା ଆକ୍ରାନ୍ତଙ୍କ ପାଇଁ ବିସିସିଆଇ ଏହି ଟୁର୍ଣ୍ଣାମେଣ୍ଟର ପ୍ଲାନ-ବି ଯୋଜନା କରୁଛି । ଆଇପିଏଲର ସମସ୍ତ ମ୍ୟାଚ ମୁମ୍ବାଇର ତିନୋଟି ଷ୍ଟାଡିୟମରେ କରିବାକୁ ଚିନ୍ତା କରୁଛି ବିସିସିଆଇ । ବର୍ତ୍ତମାନ ବିସିସିଆଇ ପାଖରେ କେବଳ ଦୁଇଟି ବିକଳ୍ପ ରହିଛି । ପ୍ରଥମତଃ ଏହି ଟୁର୍ଣ୍ଣାମେଣ୍ଟର ସମସ୍ତ ମ୍ୟାଚ ୧୦ଟି ଅଲଗା ଅଲଗା ସହରରେ କରିବା । ଦ୍ୱିତୀୟତଃ ପୂରା ଟୁର୍ଣ୍ଣାମେଣ୍ଟ ମୁମ୍ବାଇର ତିନୋଟି ଷ୍ଟାଡିୟମରେ ଆୟୋଜନ କରିପାରେ ବିସିସିଆଇ ।