ଜାମତାଡ଼ାରେ ଏବେ ଚାଲିଛି E-SIM ଫିଶିଂ ଫ୍ରଡ଼, ଗ୍ରାହକଙ୍କ ଅଜାଣତରେ ଗାୟବ ହେଉଛି ଟଙ୍କା
1 min read
ନୂଆଦିଲ୍ଲୀ: ଝାଡ଼ଖଣ୍ଡର ଜାମତାଡ଼ାରେ ଦୀର୍ଘ ଦିନ ଧରି କ୍ରେଡ଼ିଟ ଏବଂ ଡେବିଟ କାର୍ଡ଼କୁ ନେଇ ଠକାମି ଚାଲିଛି । ସମୟେ ସମୟେ ଏହି ଠକାମି କମ ତ ହୋଇଯାଏ, କିନ୍ତୁ ସମ୍ପୂର୍ଣ୍ଣ ଭାବରେ ଏହାକୁ ନେଇ କିଛି କୁହାଯାଇପାରିବ ନାହିଁ । ନିକଟରେ ଜାମତାଡ଼ା ନାମରେ ଏକ Netflix ସିରିଜ ମଧ୍ୟ ଆସିଥିଲା । ଯେଉଁଥିରେ କେମିତି ଫୋନ୍ କଲ ମାଧ୍ୟମରେ ଲୋକଙ୍କଠାରୁ ଟଙ୍କା ଲୁଟ୍ କରାଯାଉଛି ତାହା ଦେଖା ଯାଇଥିଲା । ଖବର ଅନୁସାରେ ଏବେ ପୁଣିଥରେ ଜାମତାଡ଼ାରେ ଠକାମି ଖେଳ ଆରମ୍ଭ ହୋଇଛି । କିନ୍ତୁ ଏବେ ଚାଳିଛି ଇ-ସିମ ଫିଶିଂ ଫ୍ରଡ଼ । ଏହି ଇ-ସିମ ଫିଶିଂ ଫ୍ରଡ଼ କ’ଣ ଏବଂ ଏଥିରୁ କିଭଳି ବଞ୍ଚିବେ ଆସନ୍ତୁ ଜାଣିବା ।
୨୩ ଜୁଲାଇକୁ ସାଇବରାବାଦ ପୋଲିସ କମିଶନରଙ୍କ ଟ୍ୱିଟର ହ୍ୟାଣ୍ଡେଲ ରୁ e-Si Card Swapping ଫ୍ରଡ଼ ବିଷୟରେ ସୂଚନା ମିଳିଛି । ଏହି ଟ୍ୱିଟରେ ଲେଖାଯାଇଛି କି ସାଇବର ଅପରାଧୀ ଲୋକଙ୍କୁ ଧୋକା ଦେବା ପାଇଁ ନୂଆ ନୂଆ ଯୋଜନା କରୁଛନ୍ତି । ଗ୍ରାହକଙ୍କୁ ଇ- ସିମ କାର୍ଡ଼ ପ୍ରଦାନକାରୀ କଂପାନୀଙ୍କ ନାମରେ ଫୋନ୍ ଆସୁଛି । ଆଉ ତା’ପରେ ବ୍ୟାଙ୍କ ଖାତାରୁ ଉଡ଼ି ଯାଉଛି ଟଙ୍କା । ତେବେ ଏହା ପ୍ରଥମ ଥର ନୁହେଁ ଏହା ପୂର୍ବରୁ ମଧ୍ୟ ଏଭଳି ଘଟଣା ଦେଖିବାକୁ ମିଳିଛି ।
ତେବେ ପ୍ରଥମେ ଜାଣନ୍ତୁ ଇ-ସିମ କ’ଣ?
ସିମ- ସାଧାରଣ ଭାବରେ ଫିଜିକାଲ ହୋଇଥାଏ । ଯାହାକୁ ଆପଣ ଫୋନର କାର୍ଡ଼ ସ୍ଲଟରେ ପକାନ୍ତି । କିନ୍ତୁ ଇ- ସିମକୁ ଫୋନରେ ପକାଯାଏ ନାହିଁ । ଏହା ଆପଣଙ୍କ ଫୋନରେ ପୂର୍ବରୁ ଇନ ବିଲ୍ଟ ଥାଏ । ଅବଶ୍ୟ ଭାରତରେ ହାତ ଗଣତି କିଛି କମ୍ପାନୀ ରହିଛି ଯେଉଁମାନେ ଇ-ସିମ ସର୍ଭିସ ସେବା ଯୋଗାଉଛନ୍ତି । କେବଳ ମୋବାଇଲ ଥିଲେ ହେବ ନାହିଁ, ବରଂ ନେଟଓ୍ୱର୍କ ସର୍ଭିସ ପ୍ରୋଭାଇଡରଙ୍କର ମଧ୍ୟ ଏଥିରେ ସପୋର୍ଟ ଦରକାର ହୋଇଥାଏ । ଯେମିତି ଆପଣ ମୋବାଇଲ ସିମ୍ ପାଇଁ କୌଣସି କଂପାନୀର ପ୍ଲାନ୍ ନେଉଛନ୍ତି,ସେମିତି ଆପଣଙ୍କୁ ଇ-ସିମ୍ ଲାଗି କୌଣସି ଏକ କଂପାନୀର ପ୍ଲାନ୍ ନେବାକୁ ପଡିବ ।
କିଭଳି କରାଯାଏ ଇ-ସିମ ଫ୍ରଡ଼ :
ସାଇବର ଅପରାଧୀ ପ୍ରଥମେ ଫୋନ ନମ୍ବର ମାଧ୍ୟମରେ ଆକ୍ସେସ ହାସଲ କରନ୍ତି । ଏହାପରେ ଟାର୍ଗେଟ ଗ୍ରାହକକୁ କଲ କରି ନିଜକୁ ଟେଲିକମ କମ୍ପାନୀର କର୍ମଚାରୀ ବୋଲି କୁହନ୍ତି । ପରବର୍ତ୍ତୀ ପର୍ୟ୍ୟାୟରେ ଗ୍ରାହକକୁ ଏକ ମେସେଜ ପଠାଯାଏ । ଯେଉଁଥିରେ ଓ୍ୱାର୍ଣ୍ଣିଂ ମେସେଜ ଦିଆଯାଏ । ଏଥିରେ KYC କରିବାକୁ କୁହାଯାଏ । ଏଭଳି ନ କଲେ ସିମ ବ୍ଲକ୍ ହୋଇଯିବ ବୋଲି କୁହାଯାଏ । କଲ କରି ପୁଣି ସିମ ଆକ୍ଟିଭେସନ ବିଷୟରେ କୁହାଯାଏ । ଏହାପରେ ସମ୍ପୂର୍ଣ୍ଣ ସୂଚନା ମଗାଯାଏ । ତା ପରେ ଦ୍ୱିତୀୟ ମେସେଜର ଲିଙ୍କ ପଠାଯାଏ । ସୂଚନା ଦେବାମାତ୍ରେ ଏହା ସିଧାସଳଖ ପହଞ୍ଚିଯାଏ ସାଇବର ଅପରାଧୀ ନିକଟରେ । ଟାର୍ଗେଟ ୟୁଜରଙ୍କୁ ପଞ୍ଜିକୃତ ଆଇଡିରୁ ନେଟଓ୍ୱର୍କ ସର୍ଭିସ ପ୍ରୋଭାଇଡଙ୍କୁ ଇ-ସିମ ଆକ୍ଟିଭେସନ ପାଇଁ ମେଲ କରିବାକୁ କୁହାଯାଏ । ଇ-ସିମ ଆକ୍ଟିଭେଟ ହେବା ପରେ QR କୋର୍ଡ଼ ପଠାଇବାକୁ କୁହାଯାଏ । ଏଭଳି ଭାବରେ ସେମାନେ ଏହି କୋର୍ଡ଼କୁ ହାସଲ କରି ଦିଅନ୍ତି ଏବଂ ନିଜ ଇ-ସିମ ସପୋର୍ଟ କରୁଥିବା ଫୋନରେ ଏହାକୁ ଆକ୍ଟିଭେଟ କରି ଦିଅନ୍ତି । ଏହାପରେ ଗ୍ରାହକର ସିମକୁ ଡିଆକ୍ଟିଭେଟ କରିଦିଆଯାଏ । ଏହାପରେ ସେହି ନମ୍ବର ସହିତ ଜଡ଼ିତ ଥିବା ପ୍ରତ୍ୟେକ ନମ୍ବରକୁ ସ୍କାନ କରିଦିଆଯାଏ । ଯେଉଁଠାରେ ବିନା ଏଟିଏମରେ ଟ୍ରାଞ୍ଜାକ୍ସନ ହୋଇଥାଏ, ସେହି ଆକାଉଣ୍ଟରୁ ଟଙ୍କା ଟ୍ରାନ୍ସଫର କରିଦିଆଯାଏ । କାରଣ ଫୋନ ନମ୍ବରର ଆକ୍ସେସ ସେମାନଙ୍କ ନିକଟରେ ଥାଏ । ଏଥିପାଇଁ ଓଟିପି ମଧ୍ୟ ଏଣ୍ଟର କରି ପାରନ୍ତି । ଫୋନ ନମ୍ବର ମାଧ୍ୟମରେ ବ୍ୟାଙ୍କ ଆକାଉଣ୍ଟସର ବିବରଣୀ ମଧ୍ୟ ନେଇ ଯାଆନ୍ତି ଏଭଳି ଅପରାଧୀ ।
ଏଥିରୁ ବଞ୍ଚିବାର ଗୋଟିଏ ଉପାୟ ହେଉଛି ଏଭଳ କଲ ଠାରୁ ଦୂରେଇ ରୁହନ୍ତୁ । କାହା ଉପରେ ଅତି ସହଜରେ ବିଶ୍ୱାସ କରନ୍ତୁ ନାହିଁ । କୌଣସି ଲିଙ୍କକୁ କ୍ଲିକ କରିବା ପୂର୍ବରୁ ସାବଧାନ ରୁହନ୍ତୁ । କୌଣସି କଲର ସହିତ ନିଜର ପିନ ଆଦି ଶେୟାର କରନ୍ତୁ ନାହିଁ ।
