ଭୁବନେଶ୍ୱର: ମିଳିତ ସାମ୍ବାଦିକ ସମ୍ମିଳନୀରେ ବିଜେପି ଓ କଂଗ୍ରେସ ଉପରେ ବର୍ଷିଲେ ସୁଲତା ଦେଓ, ଶ୍ରିମୟୀ ମିଶ୍ର, ଲେଲିନ ମହାନ୍ତି । ସମ୍ବେଦନଶୀଳ ଘଟଣାକୁ ନେଇ ରାଜନୀତି ନକରିବାକୁ ବାରମ୍ବାର ବିଭିନ୍ନ ଦଳକୁ ଅନୁରୋଧ କରିଛି ବିଜେଡି । କିନ୍ତୁ ବିଜେପି ଓ କଂଗ୍ରେସ ଏହାକୁ ନେଇ ରାଜନୀତି କରୁଛନ୍ତି । ଏହା ନିନ୍ଦନୀୟ । ମୁଖ୍ୟମନ୍ତ୍ରୀ ଓ ରାଜ୍ୟ ସରକାର ଏ ନେଇ ସମ୍ବେଦନଶୀଳ । ଘଟଣାର ରାଜନୀତିକରଣ କରି ରାଜନୈତିକ ଫାଇଦା ହାସଲ କରିବାକୁ ଚେଷ୍ଟା କରୁଛନ୍ତି ବିରୋଧୀ । ବିଶେଷକରି ବିଜେପି ଏକ ଘୃଣ୍ୟ ପରମ୍ପରା ସୃଷ୍ଟି କରୁଛନ୍ତି ! ଯାହା ଘୃଣ୍ୟ ଓ ମହିଳା ଏବଂ ସମାଜ ବିରୋଧୀ । ତଦନ୍ତ ପ୍ରକ୍ରିୟାକୁ ପ୍ରଭାବିତ କରିବାକୁ ଚେଷ୍ଟା କରୁଛି ବିଜେପି । ଏଥିରେ ବିଜେପି ବିଫଳ ହେବ । ଗତ ନିର୍ବାଚନ ପରି ଅଗାମୀଦିନରେ ବିଫଳତାର ସ୍ଵାଦ ଚାଖିବ ବିଜେପି ।
କ୍ରିକେଟ ଇତିହାସରେ ବାରବାଟୀ ସୃଷ୍ଟି କରିବ ନୂଆ ଅଧ୍ୟାୟ, ବର୍ଷା ହେଲେ ଗ୍ରାଉଣ୍ଡରେ ପଡ଼ିବନି ଟୋପାଏ ପାଣି
ଭୁବନେଶ୍ୱର : ବାରବାଟୀ ଷ୍ଟାଡ଼ିୟମ ଏଥର କ୍ରିକେଟ୍ ଇତିହାସରେ ଏକ ନୂଆ ଅଧ୍ୟାୟ ରଚିବାକୁ ଯାଉଛି। ଅନେକ ସମୟରେ ଦେଖିବାକୁ ମିଳେ ଯେ, ଖେଳ ସମୟରେ ବର୍ଷା ବାଧାକ ଯୋଗୁ ମ୍ୟାଚ୍ ବାତିଲ ହୋଇଥାଏ। ହେଲେ ପ୍ରଥମ ଥର ପାଇଁ ବାରବାଟୀରେ ବର୍ଷାକୁ ଆଉ ଡ଼ର ରହିବ ନାହିଁ। ବାରବାଟୀ ମ୍ୟାଚ ସମୟରେ ଯଦି ବର୍ଷା ହୁଏ ତେବେ ସମସ୍ତ ଗ୍ରାଉଣ୍ଡକୁ କଭରଅପ୍ କରିବାକୁ ଓସିଏ ନିକଟରେ ସମସ୍ତ ସୁବିଧା ରହିଛି।
ପ୍ରଥମ ଥର ପାଇଁ ବାରବାଟୀ ଷ୍ଟାଡ଼ିୟମରେ ଏହି ସୁବିଧା ଉପଲବ୍ଧ ହୋଇଥିବା ପିଚ୍ କ୍ୟୁରେଟର କହିଛନ୍ତି। ପୂର୍ବରୁ ଭାରତରେ କେବଳ କୋଲକାତାର ଇଡେନ୍ ଗାର୍ଡେନ ଷ୍ଟାଡ଼ିୟମରେ ବର୍ଷା ହେଲେ ସମ୍ପୁର୍ଣ୍ଣ ଗ୍ରାଉଣ୍ଡକୁ ଘୋଡାଇବାର ସୁବିଧା ଥିବା ବେଳେ ଏବେ ବାରବାଟୀ ଷ୍ଟାଡ଼ିୟମରେ ଏହି ସୁବିଧା ଉପଲବ୍ଧ ହୋଇପାରିଛି। ଦୀର୍ଘ ଦିନ ପରେ ବାରବାଟୀକୁ ଅନ୍ତର୍ଜାତୀୟ ମ୍ୟାଚ ମିଳିଥିବାରୁ ଏହାକୁ କିପରି ସୁରୁଖୁରୁରେ ଆୟୋଜନ କରାଯିବ ସେ ନେଇ ରାତିଦିନ ଏକ କରିଦେଇଛି ଓସିଏ।
ମ୍ୟାଚ ପୂର୍ବରୁ ବାରବାଟୀ ଷ୍ଟାଡ଼ିୟମକୁ ନୂଆ ରୂପ ଦେବାକୁ ଓସିଏ ଠାରୁ ଆରମ୍ଭ କରି ପୋଲିସ ପ୍ରଶାସନ ଓ ବିଭିନ୍ନ ସଂସ୍ଥା ଲାଗି ପଡ଼ିଛନ୍ତି। ସମସ୍ତଙ୍କର ଆଶା ମ୍ୟାଚକୁ ସଫଳ କରି ବାରବାଟୀରେ ନୂଆ ଇତିହାସ ରଚିବା । କାରଣ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ବାରବାଟୀ ଯେଉଁ ବଦମାନ୍ ମୁଣ୍ଡାଇ ଥିଲା, ଏବେ ବେଳ ଆସିଛି ସେ ସବୁ କଳଙ୍କକୁ ପୋଛିବାକୁ । ତା ସହ ନୂଆ ମ୍ୟାନେଜମେଣ୍ଟ କିଭଳି ମ୍ୟାଚ୍ ପରିଚାଳନା କରୁଛି ତାକୁ ମଧ୍ୟ ବିସିସିଆଇ ଅନୁଧ୍ୟାନ କରିବ । ଏହା ଭିତ୍ତିରେ ହିଁ ବାଟବାଟୀ ନିଜର ନୂଆ କୀର୍ତ୍ତିମାନ ସ୍ଥାପନ କରିବା ବୋଲି ଆଶା ।
ଗୁଜରାଟ ସରକାରଙ୍କ ନୂଆ ନିଷ୍ପତ୍ତି, ହେଲମେଟ୍ ନପିନ୍ଧିଲେ ବି ପଡ଼ିବନି ଫାଇନ୍
ଅହମ୍ମଦାବାଦ : କେନ୍ଦ୍ର ସରକାରଙ୍କ ଦ୍ୱାରା ଲାଗୁ ହୋଇଥିବା ନୂଆ ମୋଟରଯାନ ଆଇନକୁ ସବୁ ରାଜ୍ୟ କଡ଼ା କଡ଼ି ଭାବେ ଲାଗୁ କରିଥିବା ବେଳେ ଗୁଜରାଟ ସରକାର ଭିନ୍ନ ଏକ ନିଷ୍ପତ୍ତି ନେଇଛନ୍ତି । ଗତ ସେପ୍ଟେମ୍ୱରରେ ଫାଇନ୍ ପରିମାଣରେ କମ୍ କରିବା ପରେ ଆଜିଠାରୁ ହେଲମେଟ୍ ପିନ୍ଧିବା ନେଇ ଥିବା ବାଧ୍ୟତାମୂଳକ ନିୟମକୁ କୋହଳ କରିଛନ୍ତି ସରକାର ।
ଗୁଜରାଟ ସରକାରଙ୍କ ନୂଆ ନିଷ୍ପତ୍ତି ଅନୁସାରେ ସହରାଞ୍ଚଳରେ ଆଉ ହେଲମେଟ୍ ପିନ୍ଧିବା ବାଧ୍ୟତାମୂଳକ ନୁହେଁ । ଯାହାର ଇଚ୍ଛା ହେବ ସିଏ ହେଲମେଟ୍ ପିନ୍ଧିବ ଏବଂ ଯିଏ ନ ଚାହିଁବ ସେ ଆଉ ହେଲମେଟ୍ ପିନ୍ଧିବ ନାହିଁ ବୋଲି ଗୁଜରାଟ ସରକାର ନିଷ୍ପତ୍ତି ନେଇଛନ୍ତି । ତେଣୁ ହେଲମେଟ୍ ନପିନ୍ଧିଲେ ବି ଫାଇନ୍ ପଡ଼ିବ ନାହିଁ ବୋଲି କ୍ୟାବିନେଟ୍ ନିଷ୍ପତ୍ତି ନେଇଛି । ମ୍ୟୁନିସିପାଲିଟି ଅଞ୍ଚଳରେ ଏହାକୁ ଲାଗୁ କରିବାକୁ ନିଷ୍ପତ୍ତି ହୋଇଛି । ଗୁଜରାଟ ସରକାରଙ୍କ ପରିବହନ ମନ୍ତ୍ରୀ ଆର.ସି ଫାଲଦୁ ଆଜି ଏ ନେଇ ସୂଚନା ଦେଇଛନ୍ତି ।
ଚମକିବ ଏସ୍ସି-ଏସ୍ଟି ହଷ୍ଟେଲ୍, ବଢ଼ିବ ଶିକ୍ଷାର ମାନ, ମିଳିବ ଅଧିକ ସୁବିଧା
ଭୁବନେଶ୍ୱର: ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକସେବା ଭବନରେ ‘ମିଶନ ସୁବିଦ୍ୟା’ ଯୋଜନାର ଶୁଭାରମ୍ଭ କରିଛନ୍ତି । ଏହି ଯୋଜନାର ଉଦ୍ଦେଶ୍ୟ ହେଉଛି ଅନୁସୂଚିତ ଜାତି ଓ ଜନଜାତି ପିଲାଙ୍କ ନିମନ୍ତେ ଉଦ୍ଦିଷ୍ଟ ହଷ୍ଟେଲ୍ରେ ଯୋଗାଇ ଦିଆଯାଉଥିବା ମୌଳିକ ସୁବିଧାର ମାନ ବୃଦ୍ଧି । ଏହି ଯୋଜନା ଅଧୀନରେ ହଷ୍ଟେଲ ବିଲ୍ଡିଂ, ଶୌଚାଳୟ, ବିଶୁଦ୍ଧ ପିଇବା ପାଣି ଭଳି ସୁବିଧାର ମାନ ସୁନିଶ୍ଚିତ କରାଯିବ । ଏନେଇ ରାଜ୍ୟ ସରକାର ଓ କ୍ୱାଲିଟି କାଉନସିଲ୍ ଅଫ୍ ଇଣ୍ଡିଆ, ଅକ୍ଷରା ଫାଉଣ୍ଡେସନ୍, TRIFED ମଧ୍ୟରେ ତିନିଟି ବୁଝାମଣାପତ୍ର ସ୍ୱାକ୍ଷର ହୋଇଛି ।
କ୍ୱାଲିଟି କାଉନସିଲ୍ ଅଫ୍ ଇଣ୍ଡିଆ ଏହି ହଷ୍ଟେଲଗୁଡ଼ିକୁ ISO 9001-2015 ମାନ୍ୟତା ପ୍ରାପ୍ତ କରାଇବାନେଇ କାର୍ଯ୍ୟ କରିବେ । ଏନେଇ କ୍ୱାଲିଟି କାଉନସିଲ ଅଫ୍ ଇଣ୍ଡିଆର ଡିଜି ଆର.ପି ସିଂହ ଏବଂ ଆଦିବାସୀ ବ୍ୟାପାର ନିର୍ଦ୍ଦେଶକ ସଚିନ୍ ଯାଦବ ବୁଝାମଣାପତ୍ର ସ୍ୱାକ୍ଷର କରିଛନ୍ତି ।
ପିଲାମାନେ କିପରି ଉନ୍ନତମାନର ଶିକ୍ଷା ପାଇପାରିବେ ସେ ଦିଗରେ ଅକ୍ଷରା ଫାଉଣ୍ଡେସନ୍ କାର୍ଯ୍ୟ କରିବ । ଏନେଇ ସଂସ୍ଥା ପକ୍ଷରୁ ସ୍ୱତନ୍ତ୍ର କାର୍ଯ୍ୟପନ୍ଥା ପ୍ରସ୍ତୁତ କରାଯାଇଛି । ଏହା ଦ୍ୱାରା ପ୍ରଥମ ପର୍ଯ୍ୟାୟରେ ପ୍ରାୟ ୨ ଲକ୍ଷ ଛାତ୍ରଛାତ୍ରୀ ଉପକୃତ ହେବେ ।
ଏଥିସହ ଆଦିବାସୀଙ୍କ ଦ୍ୱାରା ଉତ୍ପାଦ ସାମଗ୍ରୀ ନିମନ୍ତେ ବଜାର ସ୍ଥିର କରିବା ନେଇ ଏମ୍ଓୟୁ ସ୍ୱାକ୍ଷର ହୋଇଛି । ଟ୍ରାଇଫେଡ୍ର ଅମିତ ଭଟ୍ଟନାଗର ଓ TDCCOL ଏମ୍ଡି ଶରତ ମହାନ୍ତିଙ୍କ ବୁଝାମଣାପତ୍ର ସ୍ୱାକ୍ଷର ।
ମିଶନ୍ର ଶୁଭାରମ୍ଭ ନେଇ ଖୁସି ବ୍ୟକ୍ତି କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମିଶନ୍ ଦ୍ୱାରା SC-ST ହଷ୍ଟେଲରେ ଯୋଗାଇଦିଆଯାଉଥିବା ସୁବିଧାରେ ଗୁଣାତ୍ମକ ପରିବର୍ତ୍ତନ ଆଣିବାକୁ ଲକ୍ଷ୍ୟ ରଖାଯାଇଥିବା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ନାଗରିକ ସଂଶୋଧନ ବିଲକୁ ମଞ୍ଜୁରୀ
ନୂଆଦିଲ୍ଲୀ: କେନ୍ଦ୍ରୀୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ଶେଷ । ବୈଠକରେ ୬ ବିଲ୍ ପାସ୍ ହୋଇଛି । ଏଥିରେ ରହିଛି ଚର୍ଚ୍ଚିତ ନାଗରିକ ସଂଶୋଧନ ବିଲ୍, ପର୍ସନାଲ ଡାଟା ପ୍ରୋଟେକ୍ସନ, SC-ST ସଂରକ୍ଷଣ, ଜମ୍ମୁ-କଶ୍ମୀର ସଂରକ୍ଷଣ ବିଲ-୨୦୧୯ ଏବଂ ଅମ୍ୱ୍ରେଲା ବଣ୍ଡ୍ ଏକ୍ସଚେଞ୍ଜ ଟ୍ରେଣ୍ଡ ଫଣ୍ଡ୍ ।
ଆଗାମୀ ଦୁଇ ଦିନରେ ନାଗରିକତ୍ୱ ଆଇନ ୧୯୫୫କୁ ସଂଶୋଧନ କରାଯିବ । କ୍ୟାବିନେଟର ମଞ୍ଜୁରୀ ପରେ ଏବେ ଏହା ସଂସଦରେ ଆଗତ କରାଯିବ । ବିଲ୍ ଜରିଆରେ ଆଫଗାନିସ୍ତାନ, ବାଂଲାଦେଶ ଏବଂ ପାକିସ୍ତାନର ୬ଟି ଧାର୍ମିକ ସଂଖ୍ୟାଲଘୁ ହିନ୍ଦୁ, ଶିଖ୍, ବୌଦ୍ଧ, ଜୈନ, ପାରସି ଓ ଖ୍ରୀଷ୍ଟିଆନଙ୍କୁ ତୁରନ୍ତ ଭାରତୀୟ ନାଗରିକତ୍ୱ ଦେବାକୁ ଏଥିରେ ସଂଶୋଧନ କରାଯିବ । ୧୨ ପରିବର୍ତ୍ତେ ୬ ବର୍ଷ ଭାରତରେ ରହିଲେ ସେମାନେ ଭାରତର ନାଗରିକତ୍ୱ ପାଇପାରିବେ । ତେବେ ଏହି ବିଲ ସହ ସହମତ ନୁହନ୍ତି ବିରୋଧୀ ।
ଆଧାରରେ ସରକାର ନାଗରିକତ୍ୱ ପ୍ରଦାନ କରିବାକୁ ଯାଉଛନ୍ତି ବୋଲି କଂଗ୍ରେସ ଓ ଅନ୍ୟ ବିରୋଧୀ ଅଭିଯ଼ୋଗ କରିଛନ୍ତି । ଏହି ବିଲ ୧୫ ଜୁଲାଇ ୨୦୧୬ରେ ମଧ୍ୟ ଆଗତ ହୋଇଥିଲା । କିନ୍ତୁ ବିରୋଧ ଯୋଗୁଁ ଏହା ରାଜ୍ୟସଭାରେ କାଟ ଖାଇଥିଲା । ତେବେ ଏହି ବିଲ୍ ଅନୁସାରେ ନାଗରିକତ୍ୱ ପାଇବା ପୂର୍ବରୁ ଆବଶ୍ୟକ ଦସ୍ତାବିଜ ଦାଖଲ କରିବାକୁ ପଡ଼ିବ । ସେହିପରି ଲୋକସଭା ଓ ବିଧାନସଭାରେ SC-ST ସଂରକ୍ଷଣର ମିଆଦକୁ ୧୦ ବର୍ଷ ପାଇଁ ବଢ଼ାଯାଇଛି । ଏହା ଏବେ ୨୫ ଜାନୁଆରୀ ୨୦୨୦ ପର୍ଯ୍ୟନ୍ତ ବଢ଼ିଛି ।
ଭଡ଼ା ଘରେ ଦେହ ବେପାର, ଭବାନୀପାଟଣାରେ ବି ଚାଲିଥିଲା ଏମିତି
କଳାହାଣ୍ଡି: ଭବାନୀପାଟଣାରେ ଭଡ଼ାଘରୁ ସେକ୍ସ ରାକେଟ ଠାବ। ଭବାନୀପାଟଣା ନକଟିଗୁଡା ସତସଂଘ ବିହାର ନିକଟ ଏକ ଭଡ଼ାଘରେ ଦେହବ୍ୟବସାୟ ଚାଲିଥିବା ଖବର ପାଇ ପୋଲିସ ଚଢାଉ କରିଥିଲା । ଘଟଣା ସ୍ଥଳରୁ ଦୁଇ ବଙ୍ଗୀୟ ଯୁବତୀଙ୍କ ସହିତ ତିନି ଜଣ ଓଡ଼ିଆ ଯୁବତୀଙ୍କୁ ଅଟକ ରଖିଛି ପୋଲିସ । ଏହା ସହିତ ଅନ୍ୟ ୩ ଜଣ ଗ୍ରାହକଙ୍କୁ ମଧ୍ୟ ଅଟକ ରଖାଯାଇଛି । ଏମାନେ ଧର୍ମଗଡ଼ ଅଞ୍ଚଳର ବୋଲି ଜଣାପଡିଛି ।
ପୋଲିସର ସୂଚନା ଅନୁଯାୟୀ, ଏଠାରେ ସେକ୍ସ ରାକେଟ ଚାଲିଥିବା ବେଳେ ମୁଖ୍ୟ ଅଭିଯୁକ୍ତ ଫେରାର ରହିଥିବା କହିଛି । ଗତକାଲି ବିଳମ୍ବିତ ରାତିରେ କଳାହାଣ୍ଡି ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶରେ ପୋଲିସ ପକ୍ଷରୁ ଚଢାଉ କରାଯାଇଥିଲା ।
ଗତ କିଛି ଦିନ ତଳେ ଭୁବନେଶ୍ୱର ନୟାପଲ୍ଲୀରେ ଏକ ସେକ୍ସ ରାକେଟ୍ ଚଢ଼ାଉ ବେଳେ ବଙ୍ଗୀୟ ଯୁବତୀମାନେ ଧରାପଡ଼ିଥିଲେ ।
ଷଷ୍ଠ ଶ୍ରେଣୀ ଛାତ୍ର ୧୦ ଯାଏଁ ଡାକିପାରୁ ନାହାନ୍ତି ପଣକିଆ, ଚତୁର୍ଥ ଶ୍ରେଣୀ ପିଲା ପଢ଼ିପାରୁନାହାନ୍ତି ଓଡ଼ିଆ, ପ୍ରଧାନ ଶିକ୍ଷୟତ୍ରୀଙ୍କ ଦରମା ବନ୍ଦ କଲେ ମନ୍ତ୍ରୀ
ଭୁବନେଶ୍ୱର : ଗଣ ଶିକ୍ଷାମନ୍ତ୍ରୀ ସମୀର ଦାସଙ୍କ ଅଚାନକ୍ ସ୍କୁଲ ପରିଦର୍ଶନ ପରେ କାର୍ଯ୍ୟାନୁଷ୍ଠାନ । ଜଣେ ପ୍ରଧାନ ଶିକ୍ଷୟତ୍ରୀଙ୍କ ଦରମା ବନ୍ଦ ହୋଇଥିବା ବେଳେ ଅନ୍ୟ ଅଧିକାରୀଙ୍କ ବିରୋଧରେ ହେବ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ।
ଆଜି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ ଯାଆଁଳା ବିଇଓ ଅଫିସ ଓ ଯାଆଁଳା ନୋଡାଲ ସ୍କୁଲ ଅଚାନକ ପରିଦର୍ଶନ କରିଛନ୍ତି। ସେ ସ୍କୁଲ ଛାତ୍ରଛାତ୍ରୀଙ୍କ ଜ୍ଞାନ ପରୀକ୍ଷା କରିବା ସହ ଅଧିକାରୀ ଓ ଶିକ୍ଷକଙ୍କ ଉପସ୍ଥାପନ ଯାଞ୍ଚ କରିଛନ୍ତି । କିଛି ଛାତ୍ରଛାତ୍ରୀଙ୍କ ବହି ପଢ଼ିବା ଶୈଳୀ ଓ ଓଡ଼ିଆ ଉଚାରଣକୁ ଗଣଶିକ୍ଷା ମନ୍ତ୍ରୀ ନିରୀକ୍ଷଣ କରିଥିଲେ। ଏହି ସମୟରେ ମନ୍ତ୍ରୀ ଗଭୀର ଉଦବେଗ ପ୍ରକାଶ କରିଛନ୍ତି । ଷଷ୍ଠ ଶ୍ରେଣୀର ଛାତ୍ରଛାତ୍ରୀ ଦଶ ଯାଏ ପଣକିଆ ଡାକିପାରୁନଥିବା ବେଳେ ଚତୁର୍ଥ ଶ୍ରେଣୀର ଛାତ୍ର ଓଡି଼ଆ ପଢ଼ିନପାରିବାକୁ ନେଇ ମନ୍ତ୍ରୀ ଭୀଷଣ ରାଗିଥିଲେ ।
ଗସ୍ତ ସମୟରେ ବିଇଓ ଅଫିସରେ ଅଧିକାରୀ ଓ ଶିକ୍ଷକଙ୍କ ଅନୁପସ୍ଥିତି ନେଇ ଜବାବ ତଲବ ମଧ୍ୟ ହୋଇଛି। ଏପରିକି ଯାଆଁଳା ସ୍କୁକ ପ୍ରଧାନ ଶିକ୍ଷୟିତ୍ରୀ ସନ୍ଧ୍ୟାରାଣୀ ସେଠଙ୍କ ଦରମା ବନ୍ଦ କରାଯାଇଛି। ସେ ସ୍କୁଲକୁ ବାରମ୍ୱାର ଡେରିରେ ଆସୁଥିବାରୁ ଏଭଳି କାର୍ଯ୍ୟାନୁଷ୍ଠାନ ହୋଇଛି । ଅନ୍ୟାନ୍ୟ କାର୍ଯ୍ୟାନୁଷ୍ଠାନ ବି ଖୁବ ଶୀଘ୍ର ନିଆଯିବ ବୋଲି ମନ୍ତ୍ରୀ କହିଛନ୍ତି ।
ଛାତ୍ରଛାତ୍ରୀଙ୍କ ଉପସ୍ଥାପନ ରେଜିଷ୍ଟର ବି ଯାଞ୍ଚ କରିଛନ୍ତି ମନ୍ତ୍ରୀ। କିଛି ସରକାରୀ ଅଧିକାରୀ ଓ ଶିକ୍ଷକ ଜାଲ ଦସ୍ତଖତ କରିଥିବା କଥା ବି ମନ୍ତ୍ରୀ ଦେଖିବାକୁ ପାଇଛନ୍ତି । ସରକାରୀ ସୁବିଧା କିପରି ଲୋକଙ୍କ ପାଖରେ ପହଂଚୁଛି, ତାକୁ ତଦାରଖ କରିବା ପାଇଁ ବିଭାଗୀୟ ମନ୍ତ୍ରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ। ଯେଉଁଥି ପାଇଁ ମନ୍ତ୍ରୀମାନେ ଗ୍ରାଉଣ୍ଡ ଜିରୋ ଯାଇ ସବୁ ଯାଞ୍ଚ କରୁଛନ୍ତି ।
ବାହାଦଲପୁରରେ ମଧ୍ୟାହ୍ନ ଭୋଜନ କରିଥିଲେ ମନ୍ତ୍ରୀ ସମୀର ଦାସ । ଏହାପରେ ଯଦୁପୁର ସ୍କୁଲକୁ ପରିଦର୍ଶନରେ ଯାଇଥିଲେ ଗଣଶିକ୍ଷା ମନ୍ତ୍ରୀ ।