ଆଜିଠୁ ଏସବିଆଇର ନୂଆ ନିୟମ । ଏଣିକି ଏସବିଆଇ ଏଟିମରୁ ଟଙ୍କା ଉଠାଇଲେ ମୋବାଇଲକୁ ଆସିବ ଓ୍ୱାନ ଟାଇମ୍ ପାସଓ୍ୱାର୍ଡ ବା ଓଟିପି । ଏଟିଏମରେ ବେଆଇନ କାରବାରକୁ ରୋକିବାକୁ ଏସବିଆଇ ଏହି ନୂଆ ନିୟମ ଲାଗୁ କରିଛି । ନୂଆ ନିୟମ ଅନୁସାରେ ଯ଼ଦି ଏସବିଆଇ ଗ୍ରାହକ ଏଟିଏମରୁ ଟଙ୍କା ଉଠାଇବେ ତେବେ ପଞ୍ଜୀକୃତ ମୋବାଇଲ ନମ୍ବରକୁ ଓଟିପି ଯିବ ।
ଏଟିଏମ ସ୍କ୍ରିନ ଉପରେ ଓଟିପି ଦେଲେ ହିଁ ଟଙ୍କା ଉଠାଇପାରିବେ । ତେବେ ରାତି ୮ଟାରୁ ସକାଳ ୭ଟା ମଧ୍ୟରେ ୧୦ହଜାରୁ ଅଧିକ ଟଙ୍କା ଉଠାଇଲେ ଏହି ନିୟମ ଲାଗୁ ହେବ । ତେବେ ଏସବିଆଇ ଗ୍ରାହକ ଯ଼ଦି ଅନ୍ୟ ବ୍ୟାଙ୍କରୁ ଟଙ୍କା ଉଠାଇବେ ତେବେ ଏହି ନିୟମ ଲାଗୁ ହେବ ନାହିଁ ।
ଭଦ୍ରକ: ନୂଆବର୍ଷ ରାତିରେ ଭୋଜିକୁ ନେଇ ଜଘନ୍ୟ ହତ୍ୟାକାଣ୍ଡ । ଭଦ୍ରକ ଜଳଙ୍ଗା ଗାଁରେ ଯୁବକଙ୍କୁ ପିଟିପିଟି ହତ୍ୟା । ମୃତକ ହେଉଛନ୍ତି ଗାଁର ସତ୍ୟବ୍ରତ ଶିଅଳ। ଗତକାଲି ରାତିରେ ନୂଆବର୍ଷ ପାଇଁ ଭୋଜି ଚାଲିଥିବା ବେଳେ ଗଣ୍ଡଗୋଳ ହୋଇଥିଲା ।
ଏହାପରେ ସତ୍ୟବ୍ରତଙ୍କୁ ଲୁହା ରଡରେ ପିଟିପିଟି ହତ୍ୟା କରାଯାଇଛି । ଏହାପରେ ୟୁକୋ ବ୍ୟାଙ୍କ ବାରଣ୍ଡାରେ ଦୁର୍ବୃତ୍ତମାନେ ତାଙ୍କ ମୃତଦେହ ରଖିଥିଲେ । ପରିବାର ଲୋକେ ସତ୍ୟବ୍ରତଙ୍କୁ ହସପିଟାଲକୁ ନେଇଥିଲେ, ତେବେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ତାଙ୍କ ମୃତଦେହର ବିଭିନ୍ନ ସ୍ଥାନରେ କ୍ଷତଚିହ୍ନ ରହିଛି । ତେବେ ହତ୍ୟାକାଣ୍ଡ କେମିତି ହେଲା, ଏଥିରେ କିଏ କିଏ ସଂପୃକ୍ତ, ସେନେଇ ତନାଘନା ଚଳାଇଛି ଗ୍ରାମାଞ୍ଚଳ ପୋଲିସ।
ଶ୍ରୀନଗର: ନୂଆବର୍ଷରେ କଶ୍ମୀରବାସୀଙ୍କୁ ସରକାରଙ୍କ ଭେଟି । ମଙ୍ଗଳବାର ମଧ୍ୟ ରାତ୍ରୀରୁ ଘାଟିରେ ପୁଣିଥରେ ଆରମ୍ଭ ହେଲା ଏସ୍ଏମ୍ଏସ୍ ସେବା । ଡିସେମ୍ବର ୩୧ ରାତି ୧୨ଟାରୁ ଜମ୍ମୁ-କଶ୍ମୀରରେ ଏସ୍ଏମ୍ଏସ୍ ସେବା ଲାଗୁ କରାଯାଇଛି ବୋଲି ଜଣାପଡ଼ିଛି ।
ସେଠାକାର ଲୋକେ ଏସ୍ଏମ୍ଏସ୍ ଜରିଆରେ ସମସ୍ତଙ୍କୁ ନୂଆବର୍ଷର ଶୁଭକାମନା ଜଣାଇଛନ୍ତି । ଏନେଇ ଜମ୍ମୁ-କଶ୍ମୀର ପ୍ରିନ୍ସିପାଲ ସେକ୍ରେଟାରୀ ରୋହିତ କାନସାଲ ସୂଚନା ଦେଇଛନ୍ତି । ସୂଚନାଯୋଗ୍ୟ, ଜମ୍ମୁ-କଶ୍ମୀରରେ ଅନୁଚ୍ଛେଦ ୩୭୦ ହଟାଯିବା ପରେ ଘାଟିରେ ସୁରକ୍ଷା ଦୃଷ୍ଟିରୁ ଗତ ଅଗଷ୍ଟରୁ ଇଣ୍ଟରନେଟ ସେବା ଓ ଏସ୍ଏମ୍ଏସ୍ ସେବା ବନ୍ଦ କରିଦିଆଯାଇଥିଲା । ସେବଟେ ସରକାରୀ ଡାକ୍ତରଖାନା ମାନଙ୍କରେ ଇଣ୍ଟରନେଟ ସେବାକୁ ମଧ୍ୟ ଆରମ୍ଭ କରାଯାଇଛି ।ବର୍ଷ ।
ଭୁବନେଶ୍ୱର: ନୂଆବର୍ଷ ସେଲିବ୍ରେସନରେ ନିଶା ସେବନ ପଡିଲା ମହଙ୍ଗା । ତଣ୍ଡ ଗଣିଲେ ରାଜଧାନୀବାସୀ । ରାତି ଅଧରେ ମଦ ପିଇ ଗାଡ଼ି ଚଲାଉଥିବାରୁ ଗଣିବାକୁ ପଡ଼ିଛି ତଣ୍ଡ । ସହରର ପ୍ରମୁଖ ଛକ ମାନଙ୍କରେ ଚାଲିଥିଲା ଜୋରଦାର ଚେକିଂ ।
ବିଭିନ୍ନ ଛକ ମାନଙ୍କରେ ନିୟୋଜିତ ହୋଇଥିଲେ ବରିଷ୍ଠ ଟ୍ରାଫିକ୍ ଏବଂ ପୋଲିସ ଅଧିକାରୀ ମାନେ । ଯେମିତି ରାଜଧାନୀ ଭିତରେ କୌଣସି ପ୍ରକାରର ଅସୁବିଧା ନହେବ ସେଥିପ୍ରତି ପୁରା କଡ଼ା ନଜର ରାଖାଯାଇଥିଲା ।
ନୂଆବର୍ଷରେ ମଦ ଦୋକାନ ଅଧିକ ସମୟ ପର୍ଯ୍ୟନ୍ତ ଖୋଲା ରହିବ ବୋଲି ପୂର୍ବରୁ ସୂଚନା ଦିଆଯାଇଥିଲା । କିନ୍ତୁ ରାସ୍ତାରେ ମଦ ପିଇ ଗାଡ଼ି ଚଲାଇବା ଉପରେ ପୁରା କଟକଣା ଲଗାଇଥିଲା କମିଶନରେଟ ପୋଲିସ । ସେପଟେ ନାଲ୍କୋ ଛକରେ ଭୁବନେଶ୍ୱର ଡିସିପି ଓ ଟ୍ରାଫିକ ଡିସିପି ଜୋରଦାର ଚେକିଂ କରୁଥିଲେ ।
ପୁରୀ: ନୂଆବର୍ଷକୁ ସ୍ୱାଗତ କରି ଆନ୍ତର୍ଜାତିକ ଖ୍ୟାତିସଂପନ୍ନ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ପୁରୀ ବେଳାଭୂମିରେ ବାଲୁକା କଳା ନିର୍ମାଣ କରିଛନ୍ତି । ଏଥିରେ ସମସ୍ତଙ୍କୁ ନୂଆବର୍ଷର ଶୁଭକାମନା ଜଣାଇଛନ୍ତି ।
୨୦୨୦ ବର୍ଷର ପବିତ୍ର କାର୍ତ୍ତିକ ମାସରେ ପଡୁଥିବା ଶ୍ରୀଜିଉଙ୍କ ନାଗାର୍ଜୁନ ବେଶ ବାଲୁକା କଳାରେ ସ୍ଥାନ ପାଇଛି । ଏଥିସହିତ ବାତ୍ୟା ଫନି ଦ୍ଵାରା ଘଟିଥିବା କ୍ଷୟକ୍ଷତିକୁ ମନେ ପକାଇ ପରିବେଶ ସନ୍ତୁଳନ ରକ୍ଷା ପାଇଁ ‘ଗୋ ଗ୍ରୀନ୍’ର ବାର୍ତ୍ତା ଦେଇଛନ୍ତି ସୁଦର୍ଶନ । ଏହି ବାଲୁକା କଳା ଦେଖିବା ପାଇଁ ପୁରୀ ବେଳାଭୂମିରେ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କ ଭିଡ଼ ଲାଗିଛି ।
ପୁରୀ: ସ୍ୱାଗତଂ ୨୦୨୦। ନୂଆ ବର୍ଷ ନୂଆ ଆଶା ନେଇ ଆସିଛି ସକାଳର ସୂର୍ଯ୍ୟ । ପୁରୁଣା ବର୍ଷକୁ ବିଦାୟ ଦେବା ସହ ସବୁ ତିକ୍ତତାକୁ ଭୁଲି ପରସ୍ପରକୁ ଜଣାଇଛନ୍ତି ନୂଆ ବର୍ଷର ଶୁଭେଚ୍ଛା । ଜିରୋ ନାଇଟ ସେଲିବ୍ରେସନରେ ନାଚି ଝୁମି ୨୦୧୯ ବର୍ଷକୁ ବିଦାୟ ଦେଇଛନ୍ତି ।
ଏଥିପାଇଁ ସବୁ ହୋଟେଲରେ ସ୍ୱତନ୍ତ୍ର ବ୍ୟବସ୍ଥା ହୋଇଥିଲା । ଏଥିପାଇଁ ପୁରୀରେ ଲାଗିଛି ଭକ୍ତଙ୍କ ପ୍ରବଳ ଗହଳି । ରାତି ଗୋଟାଏରୁ ଦର୍ଶନ ଦେଉଛନ୍ତି ମହାପ୍ରଭୁ । ସେପଟେ ଶ୍ରୀଜିଉଙ୍କ ଦର୍ଶନରୁ ବର୍ଷ ଆରମ୍ଭ କରିଛନ୍ତି ଶ୍ରଦ୍ଧାଳୁ । ସେପଟେବର୍ଷର ପ୍ରଥମ ଦିନରେ ଶ୍ରୀଜଗନ୍ନାଥଙ୍କୁ ଦର୍ଶନ କରିଛନ୍ତି ୫ଟି ସଚିବ ଭି. କାର୍ତ୍ତିକେୟ ପାଣ୍ଡିଆନ୍। ଆଜି ସକାଳୁ ପୁରୀରେ ପହଞ୍ଚି ସେ ଶ୍ରୀମନ୍ଦିର ଯାଇଥିଲେ। ସେଠାରେ ଶ୍ରୀଜିଉଙ୍କୁ ସେ ସପରିବାରେ ଦର୍ଶନ କରିଛନ୍ତି ।
ସେହିପରି ଚନ୍ଦ୍ରଭାଗାରେ ବର୍ଷର ପ୍ରଥମ ସୂର୍ଯ୍ୟୋଦୟ ଦେଖିଛନ୍ତି ହଜାର ହଜାର ଭକ୍ତ ।
ଦିଗପହଣ୍ଡି: ପାଟପୁର ଥାନା ASI ପ୍ରୀତି ମଞ୍ଜରୀ ଗଡ଼ନାୟକ ଓ ତାଙ୍କ ସ୍ୱାମୀଙ୍କ ନାଁରେ ଏତଲା । ଥାନାରେ ଡ୍ୟୁଟି ବଣ୍ଟନ ବେଳେ IICଙ୍କୁ ଆକ୍ରମଣ ଅଭିଯୋଗ । ASI ପ୍ରୀତି ମଞ୍ଜରୀଙ୍କୁ କାର୍ଯ୍ୟରୁ ନିଲମ୍ବିତ । ଘଟଣାର ତଦନ୍ତ କରୁଛନ୍ତି ଅତିରିକ୍ତ ଏସପି । ଗଞ୍ଜାମ ଏସପି ବ୍ରିଜେଶ ରାଏଙ୍କ ସୂଚନା ।
ଭୁବନେଶ୍ୱର: ଆଇଏଏସ ବିଜୟ କେତନଙ୍କ ଜାମିନ ଆବେଦନ ଖାରଜ । ଜାମିନ ଖାରଜ କଲେ ଭୁବନେଶ୍ୱର ସ୍ୱତନ୍ତ୍ର ଭିଜିଲାନ୍ସ କୋର୍ଟ । ୫ ଦିନିଆ ରିମାଣ୍ଡରେ ନେଲା ଭିଜିଲାନ୍ସ । ଆଜିରୁ ୫ ତାରିଖ ପର୍ଯ୍ୟନ୍ତ ଭିଜିଲାନ୍ସ ହେପାଜତରେ ରହିବେ ବିଜୟ କେତନ ।
୬ ଦିନ ଲାଗି ରିମାଣ୍ଡରେ ନେବାକୁ ଆବେଦନ କରିଥିଲେ ଭିଜିଲାନ୍ସ । କିନ୍ତୁ ୫ ଦିନ ଲାଗି ମଞ୍ଜୁର କରିଛନ୍ତି କୋର୍ଟ । ଲାଞ୍ଚ ମାମଲାର ଅଧିକ ଖୋଳତାଡ଼ କରିବ ଭିଜିଲାନ୍ସ ।
ବ୍ରହ୍ମପୁର: 5T ଆଧାରରେ ଗଞ୍ଜାମ ଜିଲ୍ଲା ପ୍ରଶାସନର କାର୍ଯ୍ୟାନୁଷ୍ଠାନ । ସ୍ୱଳ୍ପ କାର୍ଯ୍ୟ ଦକ୍ଷତାକୁ ନେଇ ୫ ଜଣ କର୍ମଚାରୀଙ୍କୁ କାର୍ଯ୍ୟକାଳ ଶେଷ ହେବା ପୂର୍ବରୁ ଅବସର ପାଇଁ ନୋଟିସ୍ ଜାରି କଲା ଜିଲ୍ଲା ପ୍ରଶାସନ ।
ଭୁବନେଶ୍ୱର: ଆଇପିଏସ୍ ସ୍ତରରେ ଅଦଳ ବଦଳ । ଜେଲ୍ ବିଭାଗର ଡିଜି ଭାବେ ୧୯୮୮ ବ୍ୟାଚ୍ ଆଇପିଏସ୍ ଏସ.କେ ଉପାଧ୍ୟାୟଙ୍କୁ ଦାୟିତ୍ୱ ଦିଆଯାଇଛି । ସେ ଏବେ ସିଆଇଡି-ସିବିର ଏଡିଜିପି ଭାବେ କାର୍ଯ୍ୟ କରୁଛନ୍ତି । ସେହିପରି ୧୯୯୩ ବ୍ୟାଚର ଆଇପିଏସ୍ ଅଫିସର ଆର.ପି. କୋଚେ SAP ଏଡିଜିପି ହୋଇଛନ୍ତି ।
ସୌମେନ୍ଦ୍ର ପ୍ରିୟଦର୍ଶୀଙ୍କୁ ଅତିରିକ୍ତ ଭାବେ ଏଡିଜି କ୍ରାଇମବ୍ରାଞ୍ଚ ଦାୟିତ୍ୱ ମିଳିଛି । ତା ସହ ସେ ଆଡିସନାଲ ଡିଜି ଆଇନ୍ ଓ ଶୃଙ୍ଖଳା ଦାୟିତ୍ୱରେ ରହିବେ ।
୨୦୦୦ ବ୍ୟାଚର ଆଇପିଏସ୍ ଅଫିସର ୱାଇ. କୋଏଲ ପୋଲିସ ମୁଖ୍ୟାଳୟରେ ଆଇଜିପି ଭାବେ କାର୍ଯ୍ୟ କରିବେ । ସେହି ବ୍ୟାଚର ଆଇପିଏସ୍ ଅଫିସର ଅନୁପ କୁମାର ସାହୁ ଅତିରିକ୍ତ ଭାବେ ଟ୍ୱିନ୍ ସିଟିର ଆଡିସନାଲ ପୋଲିସ କମିଶନର ଦାୟିତ୍ୱ ସମ୍ଭାଳିବେ । ସେ ବର୍ତ୍ତମାନ ଭୁବନେଶ୍ୱର ଡିସିପି ଅଛନ୍ତି ।
