ନୂଆଦିଲ୍ଲୀ: ବିଶ୍ୱ ସ୍ୱାସ୍ଥ୍ୟ ସଂଗଠନ ଉପରେ ଆମେରିକା ଖଫା । WHOକୁ ଦିଆଯାଉଥିବା ଫଣ୍ଡ ଉପରେ ରୋକ ଲଗାଇଲା ଆମେରିକା । ଏ ନେଇ ଆମେରିକୀୟ ପ୍ରଶାସନିକ ଅଧିକାରୀଙ୍କୁ ଏ ନେଇ ନିର୍ଦ୍ଦେଶ ଦେଇଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଆମେରିକୀୟ ରାଷ୍ଟ୍ରପତିଙ୍କ ଏଭଳି ନିଷ୍ପତ୍ତି ଉପରେ ପ୍ରତିକ୍ରିୟା ରଖିଛନ୍ତି ଜାତିସଂଘର ମହାସଚିବ ଆଣ୍ଟୋନିଓ ଗୁଟେରସ । ସେ କହିଛନ୍ତି, ଏଭଳି ସ୍ଥିତି ଟଙ୍କା କାଟିବାର ସମୟ ନୁହେଁ । କେବଳ ବିଶ୍ୱ ସ୍ୱାସ୍ଥ୍ୟ ସଂଗଠନ ନୁହେଁ ଯେଉଁ ମାନବିକ ସଂଗଠନ କୋଭିଡ-୧୯ର ମୁକାବିଲା କରୁଛନ୍ତି ସେମାନଙ୍କର ଟଙ୍କା କାଟିବା ଉଚିତ୍ ନୁହେଁ ବୋଲି ଗୁଟେରସ କହିଛନ୍ତି। ଏବେ ସାରା ବିଶ୍ୱକୁ ଏକାଠି ହୋଇ କରୋନା ଭାଇରସ ବିରୋଧରେ ଲଢ଼େଇ କରିବା ଦରକାର ବୋଲି ସେ କହିଛନ୍ତି ।

ବିଶ୍ୱ ସ୍ୱାସ୍ଥ୍ୟ ସଂଗଠନ କୋଭିଡ୍-୧୯ ମାମଲାରେ ଚାଇନାକୁ ସହଯୋଗ କରୁଥିବା ଅଭିଯୋଗ କରିଛି ଆମେରିକା। ଏହି କାରଣ ଦର୍ଶାଇ WHOକୁ ପାଣ୍ଠି ଯୋଗାଇବାକୁ ବାରଣ କରିଛନ୍ତି ଆମେରିକା ରାଷ୍ଟ୍ରପତି। ସୂଚନା ଯୋଗ୍ୟ ଯେ, ଆମେରିକା WHOକୁ ପ୍ରତିବର୍ଷ ୪୦୦ ମିଲିଅନରୁ ୫୦୦ ମିଲିଅନ ଡଲାର ସହାୟତା ପ୍ରଦାନ କରୁଛି  ।

ନୂଆଦିଲ୍ଲୀ: ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲକଡାଉନ୍ ବୃଦ୍ଧି ନେଇ ଏଲାନ କରିଥିଲେ । ତେବେ ଲକଡାଉନ୍ ଦ୍ୱିତୀୟ ପର୍ଯ୍ୟାୟ ସମ୍ବନ୍ଧରେ ଗୃହ ମନ୍ତ୍ରାଳୟ ଦ୍ୱାରା ବୁଧବାର ଏକ ଗାଇଡଲାଇନ ଜାରି କରାଯାଇଛି। ଲକଡାଉନ୍ ପାର୍ଟ ୨ରେ କିଛି କଟକଣାକୁ କୋହଳ କରିଛନ୍ତି କେନ୍ଦ୍ର ସରକାର । ତେବେ ଏହି ଗାଇଡଲାଇନ ଅନୁସାରେ ବିମାନ, ମେଟ୍ରୋ, ଘରୋଇ ବସ୍ ଚଳାଚଳ କରିବ ନାହିଁ। ଯେଉଁମାନଙ୍କୁ ପ୍ରଥମ ଲକଡାଉନ୍‌  ଚଳାଚଳ ପାଇଁ ଅନୁମତି ଦିଆଯାଇଥିଲା ସେମାନଙ୍କ ଚଳନ ଜାରି ରହିବ । ଏହା ବ୍ୟତୀତ କୃଷି ସମ୍ବନ୍ଧୀୟ କାର୍ଯ୍ୟ ପାଇଁ ଏଥର ରିହାତି ଦିଆଯାଇଛି । କେବଳ ଜରୁରୀକାଳୀନ ସେବାରେ ଥିବା କର୍ମଚାରୀ ଆବଶ୍ୟକସ୍ଥଳେ ଟ୍ରେନ୍ କିମ୍ବା ବସ୍‌ରେ ଯାତ୍ରା କରିବାକୁ ଅନୁମତି ଦିଆଯାଇଛି ।

ଗୃହ ମନ୍ତ୍ରଣାଳୟ ଏବଂ ପ୍ରଶାସନିକ ଅଧିକାରୀଙ୍କୁ ପଠାଯାଇଥିବା ଗାଇଡଲାଇନରେ ସ୍ପଷ୍ଟ କରାଯାଇଛି ଯେ, କୃଷି ସମ୍ବନ୍ଧୀୟ କାର୍ଯ୍ୟ ପାଇଁ ରିହାତି ଦିଆଯିବ। ଶିଳ୍ପ କାର୍ଯ୍ୟକଳାପ ଜଡିତ ସବୁ କାମ ଉପରେ ପ୍ରତିବନ୍ଧକ ଜାରି ରହିବ। ଅତ୍ୟାବଶୀକୟ ସାମଗ୍ରୀ ପରିବହନ ଗାଡ଼ି ଚଳାଚଳ କରିବ । ସର୍ବସାଧାରଣ ସ୍ଥାନରେ ମାସ୍କ ପିନ୍ଧିବା ବାଧ୍ୟତାମୂଳକ ହୋଇଛି ।

ସମସ୍ତ ଘରୋଇ ଓ ଆନ୍ତର୍ଜାତୀୟ ବିମାନ, ଟ୍ରେନ୍, ସମସ୍ତ ଶିକ୍ଷାଗତ କୋଚିଂ ସେଣ୍ଟର, ଇଣ୍ଡଷ୍ଟ୍ରିୟାଲ ଏବଂ ବ୍ୟବସାୟିକ କାର୍ଯ୍ୟ, ହୋଟେଲ, ଟ୍ୟାକ୍ସି, ଅଟୋ ରିକ୍ସା, ସିନେମା ହଲ୍, ସପିଂ କମ୍ପ୍ଲେକ୍ସ, ଜିମ୍, ସ୍ପୋର୍ଟସ୍ କମ୍ପ୍ଲେକ୍ସ, ସୁଇମିଂ ପୁଲ୍, ବାର୍, ଥିଏଟର, କୌଣସି ଇଭେଣ୍ଟ, ସହ ଧାର୍ମିକ ସ୍ଥାନ ବନ୍ଦ ରହିବ । ଏହା ବ୍ୟତୀତ ୨୦ ରୁ ଅଧିକ ଲୋକଙ୍କୁ କୌଣସି ଅନ୍ତିମ ସଂସ୍କାରରେ ସାମିଲ ହେବାକୁ ଅନୁମତି ଦିଆଯିବ ନାହିଁ ।

ଅତ୍ୟାବଶ୍ୟକ ସାମଗ୍ରୀ ଏବଂ ଔଷଧର ଉତ୍ପାଦନ ଜାରି ରହିବ । SEZ ରେ ଶିଳ୍ପ ଉତ୍ପାଦନ ଜାରି ରହିବ । ଏହା ବ୍ୟତୀତ କିଛି ଟ୍ରକଗୁଡ଼ିକୁ ଯାତ୍ରା କରିବାକୁ ଅନୁମତି ଦିଆଯାଇଛି। ଗ୍ରାମାଞ୍ଚଳରେ ଶିଳ୍ପ କାର୍ଯ୍ୟକଳାପ ଜାରି ରହିବ । କେବୁଲ ଟିଭି, DTH, ଟେଲିଫୋନ୍ ସହିତ ଜରୁରୀ ସେବା ଜାରି ରହିବ । ବିଦ୍ୟୁତ୍ ମେକାନିକ୍, ପ୍ଲମ୍ବର, କର୍ପୋରେଟରଙ୍କୁ ମଧ୍ୟ କାମ କରିବାକୁ ଅନୁମତି ଦିଆଯାଇଛି ।ଏହା ବ୍ୟତୀତ ଅତ୍ୟାବଶ୍ୟକ ସେବା ପାଇଁ ଯାତାୟାତ ଅନୁମତି, ସମସ୍ତ ଡାକ୍ତରଖାନା, କ୍ଲିନିକ୍ ଖୋଲା ରହିବ । ଏହା ସହ ପେଟ୍ରୋଲ ପମ୍ପ ଖୋଲା ରଖିବାକୁ ଅନୁମତି ଦିଆଯାଇଛି ।

କୃଷକମାନଙ୍କୁ କାମ କରିବାକୁ ସରକାର ଅନୁମତି ଦେଇଛନ୍ତି। ଚାଷୀଙ୍କୁ ଫସଲ କାଟିବା ପାଇଁ ମଧ୍ୟ ଅନୁମତି ଦିଆଯାଇଛି। ଏଥିସହ କୃଷକମାନଙ୍କର ଉତ୍ପାଦ କିଣିବାକୁ ଏଜେନ୍ସିଗୁଡ଼ିକୁ ଅନୁମତି ଦିଆଯାଇଛି। ମତ୍ସ୍ୟ ସମ୍ବନ୍ଧୀୟ କାର୍ଯ୍ୟକଳାପକୁ ଅନୁମତି ଦିଆଯାଇଛି । ସାମାଜିକ ଦୂରତା ବଜାୟ ରଖିବା ପାଇଁ ଆବେଦନ କରାଯାଇଛି । ଏହା ସହିତ ରାଜ୍ୟ ସରକାରଙ୍କ ଦ୍ୱାରା କରାଯାଉଥିବା କାର୍ଯ୍ୟରେ ମଧ୍ୟ ରିହାତି ଦିଆଯାଇଛି।

କରୋନାର ହଟସ୍ପଟ୍ ଅଞ୍ଚଳରେ କୌଣସି ରିହାତି କରାଯିବ ନାହିଁ । ଏହି କ୍ଷେତ୍ରରେ ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ଗାଇଡଲାଇନ୍ ପାଳନ କରାଯିବ। ଏଥିସହ କାହାକୁ ବାହାରକୁ ଯିବାକୁ ଦିଆଯିବ ନାହିଁ। ଏହି ଅଞ୍ଚଳର ସୁରକ୍ଷା ସହ ଜଡିତ କର୍ମଚାରୀ ଏବଂ ଡାକ୍ତରୀ କର୍ମଚାରୀଙ୍କ ଚଳନ ଜାରି ରହିବ ।

ଯେଉଁ ଅଞ୍ଚଳରୁ କରୋନା ମାମଲା ଆସିବ ନାହିଁ, ସେମାନଙ୍କୁ ରିହାତି ମିଳିବ । ଏପ୍ରିଲ୍ ୨୦ ତାରିଖ ସୁଦ୍ଧା ଏହାର ସମୀକ୍ଷା କରାଯିବ । ଏହି ସମୀକ୍ଷା ପରେ, କେତେକ କ୍ଷେତ୍ରରେ ମାମୁଲି ରିହାତି ଦିଆଯିବ । ଏହି ରିହାତି ଦେବା ପୂର୍ବରୁ ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନ ଗାଇଡଲାଇନକୁ ଅନୁସରଣ କରାଯିବ । ଏଥିସହିତ କାର୍ଯ୍ୟାଳୟ, କର୍ମକ୍ଷେତ୍ର, କାରଖାନା କିମ୍ବା ଅନୁଷ୍ଠାନରେ ସାମାଜିକ ଦୂରତା ଅନୁସରଣ କରାଯିବ।

ଗାନ୍ଧିନଗର: ଗୁଜରାଟ କଂଗ୍ରେସର ଜମାଲପୁର ଖଡିଆର ବିଧାୟକ ଇମ୍ରାନ ଖାଡେଓ୍ବାଲା କରୋନାରେ ସଂକ୍ରମିତ ହୋଇଛନ୍ତି । ଅସୁସ୍ଥ ଥିବାରୁ ସେ ଡାକ୍ତରଖାନାରେ ଟେଷ୍ଟ କରାଇଥିଲେ । ଗତକାଲି ତାଙ୍କ ରିପୋର୍ଟ ପଜିଟିଭ ଆସିଛି । ତାଙ୍କୁ ଗାନ୍ଧୀନଗରରେ ଥିବା ସ୍ୱତନ୍ତ୍ର କୋଭିଡ୍‌ ହସପିଟାଲରେ ଭର୍ତ୍ତି କରାଯାଇଛି। ରିପୋର୍ଟ ଆସିବା ପୂର୍ବରୁ ସେ ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୂପାଣିଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଯୋଗ ଦେଇଥିଲେ। ବୈଠକରେ ମୁଖ୍ୟମନ୍ତ୍ରୀଙ୍କ ସହ ଉପମୁଖ୍ୟମନ୍ତ୍ରୀ ନୀତୀନ ପଟେଲ୍‌ ଓ ଗୃହ ରାଜ୍ୟମନ୍ତ୍ରୀ ପ୍ରଦୀପ ସିଂହ ଜାଡେଜା ମଧ୍ୟ ସାମିଲ ହୋଇଥିଲେ। ଜମାଲପୁର-ଖଡିଆର ଅଞ୍ଚଳ ଏବେ କରୋନା ସଂକ୍ରମିତ। ତେଣୁ ଇମ୍ରାନ୍‌ କାହା ସଂସ୍ପର୍ଶରେ ଆସିଛନ୍ତି ସେନେଇ ତଥ୍ୟ ସଂଗ୍ରହ କରାଯାଉଛି।

ଅହମ୍ମଦାବାଦରେ ଅଧିକରୁ ଅଧିକ ପଜିଟିଭ ମାମଲା ସାମ୍ନାକୁ ଆସିଛି । ଗୁଜରାଟର ୬ଟି ଅଞ୍ଚଳ ଶାହାପୁର, କାଲୁପୁର, ଜମାଲପୁର-ଖାଡିଆ, ଗାଇକୱାଡ ହାଭେଲି ଏବଂ ଦରିଆପୁର ହଟସ୍ପଟ୍ ଅଧୀନରେ ରହିଛି। ସହର ବାହାରେ ଥିବା କିଛି ସ୍ଥାନରେ ମଧ୍ୟ କର୍ଫ୍ୟୁ ଘୋଷଣା କରାଯାଇଛି । ଏହି କ୍ଷେତ୍ରରେ ଅଧିକରୁ ଅଧିକ କରୋନା ସଂକ୍ରମିତ ମାମଲା ଥିବାରୁ ପ୍ରଶାସନ ତଦାରଖ କରୁଛି । ସ୍ୱାସ୍ଥ୍ୟ ଅଧିକାରୀଙ୍କ ସହ ସହଯୋଗ କରିବାକୁ ଲୋକଙ୍କୁ ନିର୍ଦ୍ଦେଶ ଦିଆଯାଉଛି । ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ବଢୁଥିବାରୁ ଭାରତରେ ଏବେ ଲକଡାଉନ୍ ଅବଧି ମଧ୍ୟ ବୃଦ୍ଧି କରାଯାଇଛି ।

ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ବଢିଚାଲିଛି । ୧୧ ହଜାର ୪ ଶହରୁ ଅଧିକ ସଂକ୍ରମିତ ଚିହ୍ନଟ ହୋଇସାରିଛନ୍ତି । ସେମାନଙ୍କ ମଧ୍ୟରୁ ୯୨୭୨ ସଂକ୍ରମଣ ସକ୍ରିୟ ରହିଥିବାବେଳେ ୧୧୯୦ ଆରୋଗ୍ୟ ଲାଭ କରି ସାରିଛନ୍ତି । ଏହାଛଡା କରୋନା ସଂକ୍ରମଣରେ ୩୫୩ ଜଣଙ୍କ ମୃତ୍ୟୁ ହୋଇସାରିଛି । ଅନ୍ୟ ଏକ ରିପୋର୍ଟ ଅନୁସାରେ ଗତ ୨୪ ଘଣ୍ଟା ମଧ୍ୟରେ ଭାରତରେ ୧୨୧୧ ନୂଆ ସଂକ୍ରମିତଙ୍କୁ ଚିହ୍ନଟ କରାଯାଇଛି । ବର୍ତ୍ତମାନର ସ୍ଥିତିରେ ଭାରତରେ ଯେଭଳି ଭାବରେ ସଂକ୍ରମଣ ବୃଦ୍ଧି ପାଉଛି ତାକୁ ନିୟନ୍ତ୍ରଣ କରିବାକୁ ଲକ୍‌ଡାଉନ ଅବଧି ବଢାଯାଇଛି ।

ତେବେ କୈାଣସି ନିର୍ଦ୍ଦିଷ୍ଟ ସ୍ଥାନରେ ୨୮ ଦିନ ଭିତରେ କୈାଣସି ନୂଆ ସଂକ୍ରମିତ ଚିହ୍ନଟ ନହେଲେ କରୋନା ଉପରେ ନିୟନ୍ତ୍ରଣ ହୋଇଛି ବୋଲି ସ୍ୱାସ୍ଥ୍ୟ ମନ୍ତ୍ର।ଳୟ ପକ୍ଷରୁ କୁହାଯାଇଛି । ଅପରପକ୍ଷରେ ଲକ୍‌ଡାଉନ ଅବଧି ବଢିବା ପରେ ଗରିବ ଶ୍ରେଣୀର ଲୋକେ ଯେମିତି କୈାଣସି ଅସୁବିଧାର ସମ୍ମୁଖୀନ ନହେବେ ସେଥିପାଇଁ ସରକାର ବିଭିନ୍ନ ଯୋଜନା ପ୍ରଣୟନ କରିଛନ୍ତି । ସ୍ୱୟଂ ସହାୟକ ଗୋଷ୍ଠୀ, ଗରିବ କଲ୍ୟାଣା ଯୋଜନା ଏବଂ ଉଜ୍ଜଳା ଯୋଜନାରେ ଲୋକଙ୍କୁ କେମିତି ସମସ୍ତ ସୁବିଧା ମିଳିପାରିବ ସେଥିପ୍ରତି ମଧ୍ୟ ସରକାର ବିଶେଷ ଧ୍ୟାନ ଦେଉଛନ୍ତି ।

ତେବେ ଆମେରିକାରେ କରୋନା ଯୋଗୁଁ ଦିନକୁ ଦିନ ଅବସ୍ଥା ବିଗିଡିବାରେ ଲାଗିଛି। ରିପୋର୍ଟ ଅନୁସାରେ ଗତ ୨୪ ଘଣ୍ଟା ମଧ୍ୟରେ ଆମେରିକାରେ କରୋନା ସଂକ୍ରମଣ ହେତୁ ୨୨୨୮ ଜଣଙ୍କର ମୃତ୍ୟୁ ହୋଇଛି । ଆମେରିକାର ନ୍ୟୁୟର୍କ ସବୁଠୁ ଅଧିକ ପ୍ରଭାବିତ ହୋଇଛି  । ନ୍ୟୁୟର୍କରେ କରୋନା କାରଣରୁ ୧୦,୦୦୦ରୁ ଅଧିକ ମୃତ୍ୟୁ ହୋଇଛି । ସେଠାରେ ଲକଡାଉନ୍ ଆଗକୁ ଜାରି ରହିବ ବୋଲି ଜଣାପଡିଛି । ଆମେରିକା ବ୍ୟତୀତ କରୋନା ଫ୍ରାନ୍ସରେ ହଇଚଇ ସୃଷ୍ଟି କରିଛି । ଗତ ୨୪ ଘଣ୍ଟା ମଧ୍ୟରେ ଫ୍ରାନ୍ସରେ ୭୬୨କରୋନା ସଂକ୍ରମିତ ଲୋକଙ୍କର ମୃତ୍ୟୁ ହୋଇଛି  । ଏଠାରେ କରୋନା ପଜିଟିଭ ଲୋକଙ୍କ ସଂଖ୍ୟା ୧୫ ହଜାର ୭୨୯ କୁ ବୃଦ୍ଧି ପାଇଛି  । ସ୍ୱିଡେନରେ ମଧ୍ୟ କରୋନା ଭାଇରସ ସଂକ୍ରମଣ ଯୋଗୁଁ ୧୧,୪୪୫ କରୋନା ସଂକ୍ରମିତ ମାମଲା ସାମ୍ନାକୁ ଆସିଛି।

ନୂଆଦିଲ୍ଳୀ: ୨୧୦ଟି ଦେଶରେ କରୋନା କହର ଜାରି ରହିଛି । ୧୯ ଲକ୍ଷ ୪୦ ହଜାର ଟପିଲାଣି ଆକ୍ରାନ୍ତଙ୍କ ସଂଖ୍ୟା । ୧ଲକ୍ଷ ୨୦ ହଜାର ଟପିଲାଣି ମୃତକଙ୍କ ସଂଖ୍ୟା । ବିଶ୍ୱର ସବୁଠାରୁ ଅଧିକ କରୋନା ଆକ୍ରାନ୍ତଙ୍କ ସଂଖ୍ୟା ଆମେରିକାରେ ଦେଖିବାକୁ ମିଳିଛି । ୫ ଲକ୍ଷ ୮୭ ହଜାର ଟପିଲାଣି ମାମଲା । ଗତ ୨୪ ଘଣ୍ଟାରେ ୨୩୨ରୁ ଅଧିକ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ମୃତ୍ୟୁ ସଂଖ୍ୟା ୨୩ ହଜାର ୭ ପହଁଚିଛି । ନ୍ୟୁୟର୍କରେ ସବୁଠୁ ଅଧିକ ଆକ୍ରାନ୍ତ ଚିହ୍ନଟ ହେଉଛନ୍ତି । ଆମେରିକା ପଛକୁ ରହିଛି ସ୍ପେନ୍‌ ଲକ୍ଷେ ୭୨ ହଜାର ଟପିଛି ଆକ୍ରାନ୍ତଙ୍କ ସଂଖ୍ୟା । ୧୮ ହଜାର ଟପିଛି ମୃତ୍ୟୁ ସଂଖ୍ୟା । ଏପଟେ ଇଟାଲୀ, ଫ୍ରାନ୍ସ, ଜର୍ମାନୀ, ବ୍ରିଟେନରେ ସ୍ଥିତି ସାଂଘାତିକ ହେଲାଣି । ଲକ୍ଷେ ପାର ହେଲାଣି ଆକ୍ରାନ୍ତଙ୍କ ସଂଖ୍ୟା । ତୁର୍କୀରେ ଏକ ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଛି, ପ୍ରାୟ ୬୧ ହଜାର ଲୋକେ ଆକ୍ରାନ୍ତ ହୋଇଛନ୍ତି । ଇରାନରେ ୪୫୦୦ ଲୋକଙ୍କ ଜୀବନ ଯାଇଥିବାବେଳେ ୭୩ ହଜାର ଲୋକେ ସଂକ୍ରମିତ ହୋଇଛନ୍ତି । ନେଦରଲ୍ୟାଣ୍ଡ ଓ ସୁଇଜରଲ୍ୟାଣ୍ଡରେ ମଧ୍ୟ ସ୍ଥିତି ଚିନ୍ତାଜନକ ରହିଛି । ସାରା ବିଶ୍ୱ ଏବେ ଲକଡାଉନରେ ରହିଛି । କିଛି କିଛି ଦିନରେ ଲକଡାଉନ ଧିରେ ଧିରେ ଉଠିବାରେ ଲାଗିଛି । ସ୍ଥିତି ସ୍ୱାଭାବିକ ହେବାକୁ ଆହୁରି ସମୟ ଲାଗିବ ବୋଲି ଅନୁମାନ କରାଯାଉଛି ।