ଭୁବନେଶ୍ୱର: ଥଣ୍ଡା କମିବା ସହ ବଢ଼ିବାରେ ଲାଗିଛି ତାପମାତ୍ରା । ମାର୍ଚ୍ଚରୁ ଆଉ ନିସ୍ତାର ନାହିଁ । ବଢିବ ତାପମାତ୍ରା । ପାଣିପାଗ ବିଭାଗର ସୂଚନା ଅନୁସାରେ ଆସନ୍ତାମାସଠାରୁ ତାପମାତ୍ରା ବୃଦ୍ଧି ପାଇବ । ମେ‘ ମାସ ପର୍ଯ୍ୟନ୍ତ ତାପମାତ୍ରା ଅଧିକ ରହିବ । ତା‘ ପରଠୁ ତାତି ଆହୁରି ବୃଦ୍ଧି ପାଇପାରେ ।

ଉତ୍ତର ପଶ୍ଚିମ ଭାରତରେ ଶୂନ ଦଶମିକ ୫ ଡିଗ୍ରୀ ତାପମାତ୍ରା ବୃଦ୍ଧି ହେବ ବୋଲି ଅନୁମାନ କରାଯାଉଛି । ଏଥିସହ ଦେଶର ଅନ୍ୟ ଅଞ୍ଚଳରେ ୧ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଇବ ।

ଫେବ୍ରୁଆରୀର ତାପମାତ୍ରା ଦେଖି ପାଣିପାଗ ବିଭାଗ ଆଗାମୀ ମାସର ତାପମାତ୍ରା ଅନୁମାନ କରିଛି । ତେବେ ଚଳିତବର୍ଷ ଫେବ୍ରୁଆରୀ ମାସରେ ତାପମାତ୍ରା କମ ରହିଛି ।

ପୁରୀ: ଶ୍ରୀମନ୍ଦିର ଯାଇ ଶ୍ରୀଜିଉଙ୍କୁ ଦର୍ଶନ କଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ସକାଳ ୮ଟା ୧୦ରେ ଶ୍ରୀମନ୍ଦିର ସମ୍ମୁଖରେ ପହଞ୍ଚିବା ପରେ ଶାହଙ୍କୁ ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ସ୍ୱାଗତ କରାଯାଇଥିଲା। ଏହାପରେ କଡ଼ା ସୁରକ୍ଷା ବଳୟ ମଧ୍ୟରେ ତାଙ୍କୁ ଶ୍ରୀମନ୍ଦିରକୁ ନି‌ଆଯାଇଥିଲା। ପାଖାପାଖି ୩୫ ମିନିଟ ଧରି ମନ୍ଦିରରେ ରହିଥିଲେ ଗୃହମନ୍ତ୍ରୀ। ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ସହ ପୂଜାର୍ଚ୍ଚନା କରିଥିଲେ ।

ଶ୍ରୀଜିଉଙ୍କୁ ଦର୍ଶନ ପରେ କୀର୍ତ୍ତନ ଚକଡାରୁ ନୀଳଚକ୍ରଙ୍କୁ ଦର୍ଶନକରିଥଲେ ଶାହା । ମୁକ୍ତି ମଣ୍ଡପ ପାଖରେ ପହଞ୍ଚି ଶାହ ବ୍ରାହ୍ମଣଙ୍କ ଆର୍ଶୀବାଦ ଭିକ୍ଷା କରିଥିଲେ ଓ ପ୍ରଣାମି ମଧ୍ୟ ଦେଇଥିଲେ ।  ଏହି ସମୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ବିଜେପିର ବହୁ ନେତା ମଧ୍ୟ ଉପସ୍ଥିତ ଥିଲେ । କେନ୍ଦ୍ରମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ଶ୍ରୀମନ୍ଦିର ଚାରିପାଖରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା ।

ହୋଟେଲରୁ ମନ୍ଦିର ପର୍ଯ୍ୟନ୍ତ କଡ଼ା ସୁରକ୍ଷା ରହିଥିଲା । ସିଂହଦ୍ୱାର ସମ୍ମୁଖରେ ରେଡ୍ କାର୍ପେଟ ବିଛାଯିବା ସହ ବ୍ୟାପକ ପୁଲିସ୍‌ ମୁତୟନ କରାଯାଇଥିଲା  । ପରେ  ଫେରିଯାଇଥିଲେ ଶାହା।ମନ୍ଦିରରୁ ବାହାରି ସିଧା ମେ ଫେୟାର ହୋଟେଲ ଯାଇଛନ୍ତି ଶାହା । ସେଠାରେ ପ୍ରାୟ ୩୦ ମିନିଟ ରହଣି ମଧ୍ୟରେ ଜିଲ୍ଲାର ତୁଙ୍ଗ ନେତାଙ୍କ ସହ ଆଲୋଚନା କରିଥିଲେ ।

ଭୁବନେଶ୍ୱର: ସ୍ୱଚ୍ଛତା ଓ ପରିମଳ ଉପରେ ଗୁରୁତ୍ୱ ଦେଉଛି ବିଏମ୍‌ସି । ଏହାକୁ ଦୃଷ୍ଟିରେ ରଖି ମହାନଗର ନିଗମ ପକ୍ଷରୁ ନିଆଯାଇଛି ଅନେକ ପଦକ୍ଷେପ । ଆରମ୍ଭ ହୋଇଛି ‘‘ମୁଁ ସଫେଇବାଲା’’ ଅଭିଯାନ । ଅଭିଯାନରେ ନିଜେ ନିଜ ଅଞ୍ଚଳର ପରିମଳ ବ୍ୟବସ୍ଥାର ଦାୟିତ୍ୱ ନେବାକୁ ହେବ ।

ମହାଶିବରାତ୍ରୀ ପରଦିନ ପୁରୁଣା ଭୁବନେଶ୍ୱରରୁ ଅର୍ଥାତ୍‌ ଲିଙ୍ଗରାଜ ମନ୍ଦିର ଅଞ୍ଚଳରୁ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ଏଣିକି ପ୍ରତ୍ୟେକ ୱାର୍ଡରେ ଆରମ୍ଭ କରାଯାଇଛି । ଆଜି ୭ନମ୍ବର ୱାର୍ଡ ଅନ୍ତର୍ଗତ ଶୈଳଶ୍ରୀ ବିହାର ଅଞ୍ଚଳରେ ବିଏମ୍‌ସି ପକ୍ଷରୁ ମୁଁ ସଫେଇବାଲା କାର୍ଯ୍ୟକ୍ରମ କରାଯାଉଛି ।

ଏଥିରେ ନିଜେ ବିଏମ୍‌ସି କମିଶନର, ଛାତ୍ରଛାତ୍ରୀ, ବିଏମ୍‌ସି କର୍ମଚାରୀ, ସ୍ୱୟଂ ସହାୟିକା ଗୋଷ୍ଠୀ, ଅଞ୍ଚଳବାସୀ ଓ ଅଭିନେତାଙ୍କୁ ସାଙ୍ଗରେ ନେଇ ସଫେଇ କାର୍ଯ୍ୟ କରାଯିବ ।

ଭଦ୍ରକ: ରାଜ ରାସ୍ତାରେ ପ୍ରସବ । ମାନସିକ ବିକାରଗ୍ରସ୍ତ ମହିଳା ହେଲେ ମାଆ । ମାଆର ସୌଭାଗ୍ୟ ଅର୍ଜନ କରିଛନ୍ତି ସତ । କିନ୍ତୁ ସେ ମାଆର ସୁଖଠୁ ବହୁ ଦୂରରେ । କାରଣ ସେ ଜଣେ ମାନସିକ ବିକାରଗ୍ରସ୍ତ । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ବନ୍ତ ଛକରେ ।

ମିଳିଥିବା ସୂଚନା ଅନୁସାରେ ମହିଳା ଜଣଙ୍କ ମାନସିକ ବିକୃତ । ତେବେ ବଡ଼ କଥା ହେଉଛି ମହିଳାଙ୍କ ଅସହାୟତାର ସୁଯୋଗ ନେଇ ତାଙ୍କୁ କେହି ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଫଳରେ ସେ ଗର୍ଭବତୀ ଥିଲେ ।

ଶୁକ୍ରବାର ରାତିରେ ଜନଗହଳିପୂର୍ଣ୍ଣ ବନ୍ତ ଛକରେ ଯନ୍ତ୍ରଣାରେ ଛଟପଟ ହେଉଥିଲେ ମହିଳା । କିଛି ସାମାଜିକ ସଂଗଠନର ଲୋକ ମହିଳାଙ୍କୁ ଆମ୍ବୁଲାନ୍ସ ଯୋଗେ ମେଡିକାଲରେ ଭର୍ତ୍ତି କରିଛନ୍ତି । ଏନେଇ ଖବର ପ୍ରଚାରିତ ହେବା ପରେ ଉଭୟ ମାଆ ଓ ଶିଶୁପୁତ୍ରକୁ ଉଦ୍ଧାର କରିଛନ୍ତି ।