ଭୁବନେଶ୍ୱର: କରୋନା ହେଉଛି ଅଦୃଶ୍ୟ ଶତ୍ରୁ । ଏହା ବିଶ୍ୱରେ ପ୍ରଥମ ଥର ପାଇଁ ଦେଖାଯାଇଛି । କରୋନା ଆସିବାର ୨ରୁ  ଅଢ଼େଇ ମାସ ସରିଲାଣି । ଏଥିରୁ ଅନେକ ଶିକ୍ଷା ମିଳିଛି ଓଡ଼ିଶା ସରକାରଙ୍କୁ । କରୋନା ଲଢ଼େଇରେ ପ୍ରଶାସନର ପୂର୍ବ ପ୍ରସ୍ତୁତି ଅନେକ କ୍ଷେତ୍ରରେ ସଫଳ ହୋଇଛି । ଯୋଜନା ବଦ୍ଧ ଭାବେ କାମ କରିବାରୁ ଓଡ଼ିଶା ସରକାରଙ୍କୁ ଲଢ଼େଇରେ କିଛି ମାତ୍ରାରେ ସଫଳତା ମିଳିଛି । କରୋନା ହେଉଛି ଏକ ଲମ୍ବା ଲଢ଼େଇ । ଏହା ଆଗକୁ ବି ଜାରି ରହିବ ।

ସେହିଭଳି ଓଡ଼ିଶା ବାଟ ଦେଇ ଅମ୍ଫାନ ଗତି କରିଛି । ହେଲେ ଓଡ଼ିଶା ସରକାରଙ୍କ ପୂର୍ବ ପ୍ରସ୍ତୁତି ଏବଂ ମୁକାବିଲା ପାଇଁ ପ୍ରସ୍ତୁତ ଥିବାରୁ ବିଶେଷ କ୍ଷୟକ୍ଷତି ହୋଇପାରି ନାହିଁ । ତେଣୁ ଅମ୍ଫାନ୍‌ ମୁକାବିଲାରେ ଓଡ଼ିଶାକୁ କେନ୍ଦ୍ର ସରକାରଙ୍କ ପକ୍ଷରୁ ଅନେକ ପ୍ରଶଂସା ମିଳିଛି ।

ଓଡ଼ିଶାରେ କରୋନା ସଂକ୍ରମଣ ହାର ଦେଶ ତୁଳନାରେ କମ୍‌ ରହିଛି । ସେହିଭଳି କରୋନା ଜନିତ ମୃତ୍ୟୁରେ ମଧ୍ୟ ଜାତୀୟ ତୁଳନାରେ ରାଜ୍ୟର ହାର ବହୁ୍ତ କମ୍‌ ରହିଛି । ଯାହା ରାଜ୍ୟ ପାଇଁ ଭଲ ଖବର । ଅନ୍ୟ ରାଜ୍ୟ ତୁଳନାରେ ଓଡ଼ିଶାରେ ଅଧିକ ମାତ୍ରାରେ ଟେଷ୍ଟିଂ ମଧ୍ୟ କରାଯାଇଛି । ରେଡ୍‌ ଅରେଞ୍ଜ ଆଉ ଗ୍ରୀନ୍‌ ଜୋନ୍‌ ଏବଂ କଣ୍ଟେନ୍‌ମେଣ୍ଟ ଜୋନ୍‌ କରି ଅନେକ ସଫଳତା ମିଳିଛି । ଓଡ଼ିଶାରେ ପଞ୍ଚାୟତ ସ୍ତରରେ ଏହାକୁ ଅଧିକ ଗୁରୁତ୍ୱ ଦିଆଗଲା । ଯାହା ଦ୍ୱାରା କରୋନା ଲଢ଼େଇରେ ଅନେକ ସଫଳତା ମିଳିଛି ।

ପଞ୍ଚାୟତ ମାନଙ୍କରେ କ୍ୱାରେଣ୍ଟାଇନ୍‌ ସେଣ୍ଟର ଅତ୍ୟନ୍ତ ଫଳପ୍ରଦ ହୋଇଛି ଓଡ଼ିଶା ପାଇଁ । ପଞ୍ଚାୟତ ସ୍ତରରେ କ୍ୱାରେଣ୍ଟାଇନ୍‌ ସେଣ୍ଟର କରିବା ହେଉଛି ଏକ ବିଶେଷ ଯୋଜନା । ସରପଞ୍ଚମାନଙ୍କୁ ଦାୟିତ୍ୱ ଦିଆଗଲା, ତେଣୁ ସେମାନେ ମଧ୍ୟ ଗରୁତ୍ୱର ସହ ଏହି ଲଢ଼େଇରେ ନିଜକୁ ସାମିଲ କଲେ ଏବଂ ଦାହିତ୍ୱ ତୁଲାଇଲେ ।

ଶ୍ରମିକ ସ୍ପେସାଲ ଟ୍ରେନ୍‌ରେ ଯେଉଁ ଓଡ଼ିଆ ଭାଇ ଭଉଣୀମାନେ ଆସିଲେ ସେମାନଙ୍କୁ ଅତି ଦାୟିତ୍ୱର ସହ କ୍ୱାରେଣ୍ଟାଇନ୍‌ରେ ରଖାଗଲା । ତାହା ମଧ୍ୟ ଏକ ଭଲ ଏବଂ ବଡ଼ ପଦକ୍ଷେପ ଥିଲା ।

କ୍ୱାରେଣ୍ଟାଇନ୍‌ ସେଣ୍ଟରରେ ବୟସ୍କ, ଗର୍ଭବତୀ ଏବଂ ଶିଶୁମାନଙ୍କୁ ଅଧିକ ଯତ୍ନ ନିଆଯାଇଛି । ଯେଉଁମାନଙ୍କର କରୋନା ଜନିତ ଲକ୍ଷଣ ଦେଖାଯାଉଛି ସେମାନଙ୍କୁ କୋଭିଡ୍‌ କେୟାର ହସ୍ପିଟାଲରେ ରଖାଯାଉଛି ।

କେନ୍ଦ୍ର ସରକାରଙ୍କ ଗାଇଡ୍‌ ଲାଇନ୍‌ ତୁଳନାରେ ଓଡ଼ିଶାରେ ଗାଇଡ୍‌ ଲାଇନ୍‌ ଅଧିକ କଡ଼ା କଡ଼ି ରହିଛି । ସରପଞ୍ଚମାନଙ୍କୁ ବଡ଼ ଦାୟିତ୍ୱ ଦିଆଯାଇଛି । ସେମାନେ ନିଜର ଦାୟିତ୍ୱ ସୂଚାର ରୂପେ ତୁଲାଉଛନ୍ତି । ଏବେ ସୁଦ୍ଧା ଏକ ଲକ୍ଷ ଲୋକ କ୍ୱାରେଣ୍ଟାଇନ୍‌ ଅବଧି ପୂରଣ କରି ଘରକୁ ଫେରିଛନ୍ତି । ରାଜ୍ୟରେ ବିଭିନ୍ନ କ୍ୱାରେଣ୍ଟାଇନ୍‌ କେନ୍ଦ୍ରରେ ମୋଟ ୮ ଲକ୍ଷ ଶଯ୍ୟା ସରକାର ପ୍ରସ୍ତୁତ ରଖିଥିବା ବେଳେ ଏବେ ସୁଦ୍ଧା ୩ଲକ୍ଷ ଶଯ୍ୟା ପୂରଣ ହୋଇଛି ।

ଆଠଗଡ଼: ଆଠଗଡ଼ ବନଖଣ୍ଡରେ ପୁଣି ବଜ୍ରକାପ୍ତା ଉଦ୍ଧାର । ଗତକାଲି ଆଠଗଡ଼ ବନଖଣ୍ଡ ବଡ଼ମ୍ବା ରେଞ୍ଜ ଅଞ୍ଚଳରେ ଥିବା ଏକ କ୍ୱାରେଣ୍ଟାଇନ ସେଣ୍ଟରରୁ ଏକ ବଜ୍ରକାପ୍ତା ଉଦ୍ଧାର କରାଯାଇଛି । ମହୁଲିଆ ସରପଞ୍ଚଙ୍କ ସୂଚନା ଅନୁସାରେ ବଜ୍ରକାପ୍ତାକୁ ଉଦ୍ଧାର କରିଛି ଆଠଗଡ଼ ବନବିଭାଗ । ବଜ୍ରକାପ୍ତା ଟିର ୪ କିଲୋ ଓଜନ ହୋଇଥିବାବେଳେ ଏବେ ସେ ସୁସ୍ଥ ଅଛି । ସ୍ୱାସ୍ଥ୍ୟ ପରୀକ୍ଷା ପରେ ତାକୁ ଜଙ୍ଗଲରେ ଛଡ଼ାଯିବ ।

ଯେହେତୁ କ୍ୱାରେଣ୍ଟାଇନ କେନ୍ଦ୍ରରୁ ଧରାପଡିଛି ତେଣୁ ତାର କରୋନା ପରୀକ୍ଷା ମଧ୍ୟ କରାଯିବ । ତେବେ ବଜ୍ରକାପ୍ତାଟି କିପରି କ୍ୱାରେଣ୍ଟାଇନ ସେଣ୍ଟରକୁ ଆସିଲା ସେ ବାବଦରେ ଅଧିକ ତଦନ୍ତ ଚଳାଇଛି ବନ ବିଭାଗ । ଅନ୍ୟପଟେ ଆଠଗଡ଼ ବନଖଣ୍ଡରେ ପୁଣି ସକ୍ରିୟ ହୋଇଛନ୍ତି ବଜ୍ରକାପ୍ତା ରାକେଟ । ଗତ ୪ ମାସ ଭିତରେ ତିନିଟି ଜୀବନ୍ତ ଓ ଗୋଟିଏ ମତ ବଜ୍ରକାପ୍ତା ସହ ଅନେକ କାତି ଉଦ୍ଧାର କରାଯାଇଛି ।

ବଜ୍ରକାପ୍ତା ଚୋରା ଚାଲାଣରେ ଏବେ ସୁଦ୍ଧା ମୋଟ ୩୦ରୁ ଅଧିକ ଲୋକଙ୍କୁ କୋର୍ଟ ଚାଲାଣ କରାଯାଇଛି । ଗତ ଦୁଇ ଦିନ ମଧ୍ୟରେ ୩ ଜଣଙ୍କୁ କଟକ ନୂଆପାଟଣା ମଧୁସୂଦନ ସେତୁ ନିକଟରୁ ଗିରଫ କରିଛି ଆଠଗଡ଼ ବନ ବିଭାଗ । ସେମାନଙ୍କ ମଧ୍ୟରୁ ଜଣେ କେନ୍ଦ୍ରାପଡ଼ାର ହୋଇଥିବାବେଳେ ଆଉ ଦୁଇ ଜଣ କଟକ ଶିଖରପୁର ବୋଲି ଜଣାପଡିଛି । ତୃତୀୟ ଜଣକ ଅନୁଗୁଳର ବୋଲି ଜଣାପଡିଛି ।

କୋଣାର୍କ: ପ୍ରେମ ଘରଠାରୁ ଦୁରେଇ ନେଇଥିଲା । କରୋନା ଘରକୁ ଫେରାଇ ଆଣିଛି । କରୋନା ଦୁଇ ଜଣଙ୍କୁ ସାତଜନ୍ମ ପାଇଁ ଏକାକାର କରିଦେଇଛି ।  ପ୍ରେମ ରାସ୍ତରେ ପରିବାର,ସମାଜ ପ୍ରତିବନ୍ଧକ ଥିଲା,ତେଣୁ ସେମାନେ ଦୁଇ ଜଣ ଲୁଚିକରି ଭିଟାମାଟି ଛାଡିଥିଲେ । କିନ୍ତୁ କରୋନା ଘରକୁ ଫେରିବାକୁ ବାଧ୍ୟ କରିଥିଲା । ଆଉ ସେଇ କରୋନା ପାଇଁ ଉଭୟଙ୍କ ସମ୍ପର୍କକୁ ମିଳିଛି ସାମାଜିକ ସ୍ୱୀକତି । ଲୋକ କହୁଛନ୍ତି..କରୋନା ପାଇଁ ଜିତିଗଲା ପ୍ରେମ ।

ପ୍ରେମ ହେଉଛି ସାଶ୍ୱତ । ନିଚ୍ଛକ ପ୍ରେମ ପାଇବା କେବେ ବି ଏକ ସହଜ କାମ ନୁହେଁ ।  ପ୍ରେମକୁ ସାର୍ଥକ କରିବାକୁ ହେଲେ ଆମକୁ ଦୁନିଆ ସହ ମଧ୍ୟ ଲଢ଼ିବାକୁ ପଡ଼େ । କାରଣ ପ୍ରେମ ଏଭଳି ଏକ ସମ୍ପର୍କ ଯାହାକୁ ନଲଢି ତମେ କେବେ ଯିତି ପାରିବନି । ଆଉ ଏହି ଲଢ଼େଇରେ ପ୍ରେମୀ ଯୁଗଳଙ୍କ ପାଇଁ ଅସ୍ତ୍ର ସାଜିଲା କରୋନା ।  ପ୍ରେମକୁ ଘର ଲୋକ ସ୍ୱୀକୃତି ଦେଇନଥିଲେ । ହେଲେ କରୋନା ଏବେ ଏମାନଙ୍କୁ ଏକ୍‌ କରିଦେଇଛି । ଯେତେବେଳେ ଘରେ ପ୍ରେମର ବିରୋଧ ହେଲେ ସେତେବଳେ ପ୍ରେମ ଚଢ଼େଇ ଉଡ଼ିଗଲେ ଦୁର ରାଇଜକୁ । ଆଉ କରୋନା କାଳରେ ଘରକୁ ଫେରିବା ପାଇଁ ରହିବାକୁ ପଡିଲା କରୋନା କ୍ୱାରେଣ୍ଟାଇନ୍ କେନ୍ଦ୍ରରେ । ସେଇ କେନ୍ଦ୍ରରେ ଏବେ ସେମାନେ ପରସ୍ପରକୁ ଜୀବନସାଥୀ ଭାବେ ଗ୍ରହଣ କରିଛନ୍ତି ।  ନିମାପଡା ନକ୍ସା ସଂଗରୋଧ କେନ୍ଦ୍ରରୁ ଆସିଛି ଏପରି ନିଆରା ଚିତ୍ର । ପ୍ରେମ ପାଇଁ ଘରୁ ପଳାଇଥିବା ଦୁଇଜଣ ପ୍ରେମୀ ଯୁଗଳ ଲକଡାଉନ ପରେ ଘରକୁ ଫେରିବା ପରେ କ୍ୱାରେଣ୍ଟାଇ ସେଣ୍ଟରରେ ବିବାହ କରିଛନ୍ତି ।

ସୂଚନା ଅନୁଯାୟୀ, ଶଗଡା ଗାଁର ସୌରଭ ଦାସ ଓ ଡେଲାଙ୍ଗ ଘୋରଡିଆ ଗାଁ ପିଙ୍କି ଦାସଙ୍କ ମଧ୍ୟରେ ପ୍ରେମ ସଂପର୍କ ଗଢିଉଠିଥିଲା । ହେଲେ ପରିବାର ସ୍ୱୀକୃତି ନମିଳିବାରୁ ଉଭୟ ଗୁଜୁରାଟର ଅହମଦାବାଦକୁ ପଳାଇଥିଲେ । ଘର ଛାଡିବାର ମାତ୍ର ୪ ମାସ ପରେ କରୋନା କଟକଣା ଲାକଡାଉନ ପାଇଁ ଉଭୟ ଫସି ରହିଥିଲେ । ଲକଡାଉନ ପାଇଁ ସବୁଠି ତାଲା ବନ୍ଦ ହେବାରୁ ଉଭୟ ଗତ ୧୦ ତାରିଖରେ ଓଡ଼ିଶା ଫେରିଆସିଥିଲେ । ଆସିବା ପରେ ସେମାନଙ୍କୁ ଶଗଡାସ୍ଥିତ ଅଙ୍ଗନୱାଡ଼ି କ୍ୱାରେଣ୍ଟାଇନ ସେଣ୍ଟରରେ ରଖାଯାଇଥିଲା । ସେମାନଙ୍କ ରିପୋର୍ଟ ନେଗେଟିଭ ଆସିବା ପରେ ୧୪ ଦିନ ପୂରଣ କରି ସେମାନେ ସେଣ୍ଟର ଛାଡିଥିଲେ । ସ୍ଥାନୀୟ ଲୋକେ ଏବଂ ସେଣ୍ଟରର ଅଧିକାରୀ ସେମାନଙ୍କ ବିଷୟରେ ସବୁ ଜାଣିଥିଲେ । ତେବେ ସ୍ଥାନୀୟ ଲୋକଙ୍କ ଉଦ୍ୟମ କ୍ରମେ ସେମାନଙ୍କ ବିବାହ କାର୍ଯ୍ୟ ସମ୍ପନ୍ନ ହୋଇଛି ।  ରୀତିନୀତି ଅନୁସାରେ ସେମାନଙ୍କର ବିବାହ ସରିବା ପରେ ଉଭୟଙ୍କ ଭବିଷ୍ୟତ ପାଇଁ ମଙ୍ଗଳ କାମନା କରିଥିଲେ ।