ନୂଆଦିଲ୍ଲୀ: ଗାନ୍ଧୀ ପରିବାର ସହ ଜଡିତ ତିନୋଟି ଟ୍ରଷ୍ଟକୁ କେନ୍ଦ୍ର ଗୃହ ମନ୍ତ୍ରଣାଳୟ ତଦନ୍ତ କରିବ। ଏଥିପାଇଁ ଗୃହ ମନ୍ତ୍ରଣାଳୟ ଏକ ଆନ୍ତଃ ମନ୍ତ୍ରୀସ୍ତରୀୟ କମିଟି ଗଠନ କରିଛି, ଯାହା ରାଜୀବ ଗାନ୍ଧୀ ଫାଉଣ୍ଡେସନ, ରାଜୀବ ଗାନ୍ଧୀ ଚେରିଟେବୁଲ ଟ୍ରଷ୍ଟ ଏବଂ ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟର ଯାଞ୍ଚ କରିବ । ଇଡିର ଏକ ସ୍ୱତନ୍ତ୍ର ନିର୍ଦ୍ଦେଶକ ଏହାର ତଦନ୍ତ କରିବେ । ଗାନ୍ଧୀ ପରିବାରର ଦୁଇଟି ଟ୍ରଷ୍ଟ ନିୟମ ଉଲ୍ଲଂଘନ କରିଛନ୍ତି କି ନାହିଁ ତାହା ଏହି ଯାଞ୍ଚରୁ ଜଣାପଡିବ ।
ଭାରତ ଏବଂ ଚୀନ୍ ମଧ୍ୟରେ ଚାଲିଥିବା ବିବାଦ ମଧ୍ୟରେ ଯେତେବେଳେ କଂଗ୍ରେସ କ୍ରମାଗତ ଭାବରେ କେନ୍ଦ୍ରରେ ମୋଦୀ ସରକାରଙ୍କୁ ଘେରି ରହିଥିଲେ ଏଭଳି ପରିସ୍ଥିତିରେ ବିଜେପି ସଭାପତି ଜେପି ନଡ୍ଡା ଅଭିଯୋଗ କରିଥିଲେ ଯେ ରାଜୀବ ଗାନ୍ଧୀ ଫାଉଣ୍ଡେସନକୁ ଚୀନ୍ରୁ ଆର୍ଥିକ ସହାୟତା ମିଳୁଥିଲା। କେବଳ ଏତିକି ନୁହେଁ, ନଡ୍ଡା କହିଛନ୍ତି, ମନମୋହନ ସିଂ ଅର୍ଥମନ୍ତ୍ରୀ ଥିଲାବେଳେ ୧୯୯୧ ବଜେଟରେ ଫାଉଣ୍ଡେସନକୁ ୧୦୦ କୋଟି ଟଙ୍କା ଦେଇଛନ୍ତି । ତେବେ କଂଗ୍ରେସ ଏହି ଅଭିଯୋଗକୁ ପ୍ରତ୍ୟାଖ୍ୟାନ କରି କହିଛି ଯେ ସୀମା ବିବାଦ ପ୍ରସଙ୍ଗରୁ ଧ୍ୟାନ ଉଠାଇବା ପାଇଁ ବିଜେପି ଏଭଳି ଅଭିଯୋଗ କରୁଛି।
ରାଜୀବ ଗାନ୍ଧୀ ଫାଉଣ୍ଡେସନ କ’ଣ…?
ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସ୍ୱପ୍ନକୁ ପୂରଣ କରିବା ଏବଂ ତାଙ୍କ ଲକ୍ଷ୍ୟ ହାସଲ କରିବା ପାଇଁ ସୋନିଆ ଗାନ୍ଧୀ ୨୧ ଜୁନ୍ ୧୯୯୧ରେ ଏହି ଟ୍ରଷ୍ଟ ଆରମ୍ଭ କରିଥିଲେ। ଗାନ୍ଧୀ ପରିବାରଙ୍କ ଏହି ଫାଉଣ୍ଡେସନ୍ ସ୍ୱାସ୍ଥ୍ୟ, ଶିକ୍ଷା, ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା, ମହିଳା ଏବଂ ଶିଶୁ ବିକାଶ, ଭିନ୍ନକ୍ଷମ ସହାୟତା, ଶାରୀରିକ ଅକ୍ଷମ, ପଞ୍ଚାୟତ ରାଜ, ପ୍ରାକୃତିକ ସମ୍ପଦ ପରିଚାଳନା ଇତ୍ୟାଦି କ୍ଷେତ୍ରରେ କାର୍ଯ୍ୟ କରିଥାଏ । ସଂଘର୍ଷରେ ପ୍ରଭାବିତ ପିଲାମାନଙ୍କୁ ଶିକ୍ଷାଗତ ସହାୟତା, ଦିବ୍ୟାଙ୍କଙ୍କୁ ସହାୟତା ଏବଂ କେମ୍ବ୍ରିଜରେ ପଢିବା ପାଇଁ ଯୋଗ୍ୟ ଭାରତୀୟ ପିଲାମାନଙ୍କୁ ଆର୍ଥିକ ସହାୟତା ଭଳି କାର୍ଯ୍ୟକ୍ରମଗୁଡିକ ଏହି ଫାଉଣ୍ଡେସନ୍ ଦ୍ୱାରା ପରିଚାଳିତ ।
ରାଜୀବ ଗାନ୍ଧୀ ଫାଉଣ୍ଡେସନ ଲୋକମାନେ ଦେଉଥିବା ଅନୁଦାନ ଦ୍ୱାରା ପରିଚାଳିତ । ଏହି ଫାଉଣ୍ଡେସନର ଅଧ୍ୟକ୍ଷ ହେଉଛନ୍ତି ସୋନିଆ ଗାନ୍ଧୀ । ପୂର୍ବତନ ପ୍ରଧାନମନ୍ତ୍ରୀ ଡ଼ଃ ମନମୋହନ ସିଂ, ପୂର୍ବତନ ଅର୍ଥମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ପି ଚିଦାମ୍ବରମ୍, ମୋଟିକ୍ ସିଂ ଅହଲୁୱାଲିଆ, ସୁମନ ଦୁବେ, ରାହୁଲ ଗାନ୍ଧୀ, ଡକ୍ଟର ଶେଖର ରାହା, ସଞ୍ଜୀବ ଗୋଏଙ୍କା ଏବଂ ପ୍ରିୟଙ୍କା ଗାନ୍ଧୀ ଫାଉଣ୍ଡେସନର ଟ୍ରଷ୍ଟି ଅଛନ୍ତି।
ରାଜୀବ ଗାନ୍ଧୀ ଚାରିଟେବୁଲ ଟ୍ରଷ୍ଟର ଗଠନ
ରାଜୀବ ଗାନ୍ଧୀ ଚାରିଟେବୁଲ ଟ୍ରଷ୍ଟ ୨୦୦୨ ମସିହାରେ ଗଠିତ ହୋଇଥିଲା । ଏହାର ଉଦ୍ଦେଶ୍ୟ ହେଉଛି ଦେଶର ବଞ୍ଚିତ ସମାଜ ମୁଖ୍ୟତଃ ଗ୍ରାମାଞ୍ଚଳର ଗରିବ ଲୋକ ମାନଙ୍କ ବିକାଶମୂଳକ ଆବଶ୍ୟକତା ପୂରଣ କରିବାରେ ସାହାଯ୍ୟ କରିବା । ଏହି ଟ୍ରଷ୍ଟ ବର୍ତ୍ତମାନ ରାଜୀବ ଗାନ୍ଧୀ ମହିଳା ବିକାଶ ପ୍ରକଳ୍ପ, ଇନ୍ଦିରା ଗାନ୍ଧୀ ଚକ୍ଷୁ ଚିକିତ୍ସାଳୟ ଏବଂ ଅନୁସନ୍ଧାନ କେନ୍ଦ୍ର ପ୍ରକଳ୍ପ ଅଧୀନରେ ଉତ୍ତରପ୍ରଦେଶ ଏବଂ ହରିୟାଣାର ଅତ୍ୟନ୍ତ ପଛୁଆ ଅଞ୍ଚଳରେ କାର୍ଯ୍ୟ କରୁଛି । ଏହି ଟ୍ରଷ୍ଟ ଉତ୍ତରପ୍ରଦେଶ ସମେତ ଅନେକ ରାଜ୍ୟରେ ମହିଳା ସଶକ୍ତିକରଣ ପାଇଁ ସକ୍ରିୟ ରହିଛି ।
ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟର କାର୍ଯ୍ୟ
୧୯୮୪ରେ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ହତ୍ୟା ପରେ ୧୯୮୫ ରେ ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟ ପ୍ରତିଷ୍ଠା କରାଯାଇଥିଲା। ଏହି ଟ୍ରଷ୍ଟ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଜୀବନର ଆଦର୍ଶ ପ୍ରଚାର କରିବା ସହିତ ତାଙ୍କ ସ୍ମୃତିକୁ ବଞ୍ଚାଇ ରଖିବା ପାଇଁ କାର୍ଯ୍ୟ କରିଥାଏ | ଏହି ଟ୍ରଷ୍ଟ ମାଧ୍ୟମରେ କଂଗ୍ରେସ ନେହେରୁ-ଗାନ୍ଧୀଙ୍କ ବିଚାର ଉପରେ ଗବେଷଣା କରିବା ଠାରୁ ଆରମ୍ଭ କରି ସମସ୍ତ ସାମାଜିକ କାର୍ଯ୍ୟ କରିଥାଏ। ଏହା ବ୍ୟତୀତ ପ୍ରତିବର୍ଷ ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଫଟୋ ପ୍ରଦର୍ଶନୀ ଆୟୋଜନ କରିଥାଏ ।
ଇନ୍ଦିରା ଗାନ୍ଧୀ ମେମୋରିଆଲ୍ ଟ୍ରଷ୍ଟ ୧୯୮୬ ପରଠାରୁ ପ୍ରତିବର୍ଷ ସାମାଜିକ ସେବା, ନିରସ୍ତ୍ରୀକରଣ କିମ୍ବା ବିକାଶ କାର୍ଯ୍ୟରେ ଉଲ୍ଲେଖନୀୟ ଅବଦାନ ଦେଇଥିବା ବ୍ୟକ୍ତିଙ୍କୁ ଚୟନ କରି ‘ଇନ୍ଦିରା ଗାନ୍ଧୀ ଶାନ୍ତି, ନିରସ୍ତ୍ରୀକରଣ ଏବଂ ବିକାଶ ପୁରସ୍କାର’ ପ୍ରଦାନ କରାଯାଇଥାଏ । ଏହି ପୁରସ୍କାରରେ ୨୫ ଲକ୍ଷ ଟଙ୍କା ନଗଦ ପୁରସ୍କାର, ଟ୍ରଫି ଏବଂ ଏକ ନଥିପତ୍ର ରହିଛି । ଉଲ୍ଲେଖନୀୟ କାର୍ଯ୍ୟ ଏବଂ ସଫଳତା ପାଇଁ ଇନ୍ଦିରା ମେମୋରିଆଲ୍ ଟ୍ରଷ୍ଟ ଆଜି ପର୍ଯ୍ୟନ୍ତ ୩୦ ଟି ଆନ୍ତର୍ଜାତୀୟ ସେଲିବ୍ରିଟି ଏବଂ ଅନୁଷ୍ଠାନକୁ ସମ୍ମାନିତ କରିସାରିଛି ।
ଇନ୍ଦିରା ଗାନ୍ଧୀ ଶାନ୍ତି ପୁରସ୍କାର ପାଇବାକୁ ଯୋଗ୍ୟ ହେବା ପାଇଁ ଏକ ଲିଖିତ କାର୍ଯ୍ୟ ପ୍ରକାଶିତ ହେବା ଜରୁରୀ । ଜର୍ମାନ ଚାନ୍ସଲର ଅଙ୍ଗେଲା ମୈର୍କେଲଙ୍କୁ ୨୦୧୩ ରେ ଇନ୍ଦିରା ଗାନ୍ଧୀ ଶାନ୍ତି ପୁରସ୍କାର ପ୍ରଦାନ କରାଯାଇଥିଲା । ଏହା ବ୍ୟତୀତ, ୨୦୧୨ ରେ, ଲାଇବେରିଆର ରାଷ୍ଟ୍ରପତି ଏଲେନ୍ ଜାଁନସନ ସରଲିଫ ଏବଂ ୨୦୧୧ ମସିହାରେ ସାମାଜିକ କର୍ମୀ ଇଲା ରମେଶ ଭଟ୍ଟଙ୍କୁ ଇନ୍ଦିରା ଗାନ୍ଧୀ ଶାନ୍ତି ପୁରସ୍କାରରେ ସମ୍ମାନିତ ହୋଇଥିଲେ ।
