ଭରାନଈରେ ବିପଦସଙ୍କୁଳ ଯାତ୍ରା, ବିବାହ କରି କାଠଡଙ୍ଗାରେ ଫେରିଲେ ନବଦମ୍ପତି
ବାଲିଗୁଡ଼ା: କନ୍ଧମାଳ ଜିଲ୍ଲାରୁ ସବୁବେଳେ ଏମିତି କିଛି ନା କିଛି ଖବର ଆସିଥାଏ ଯାହା ଆମକୁ ଆଶ୍ଚର୍ଯ୍ୟ କରିଥାଏ । କେତେବଳେ ଗ୍ରାମବାସୀ ମୌଳିକ ସୁବିଧାରୁ ବଞ୍ଚିତ, ତ ଆଉ କେତେବେଳେ ସ୍ୱାଧୀନତାକୁ ୭୦ ବର୍ଷ ପୁରିଥିଲେ ମଧ୍ୟ ଗାଁକୁ ରାସ୍ତା ନାହିଁ । ଏମିତି କି ଗାଁକୁ ପାନୀୟ ଜଳ ଯୋଗାଣ ସୁବିଧା ନଥିବା ବେଳେ ବିଜୁଳି ସଂଯୋଗ ମଧ୍ୟ ନଥାଏ । ଏଭଳି ତମାମ ଖବର ସାମ୍ନାକୁ ଆସିଥାଏ ।
ଠିକ୍ ସେହିଭଳି ଆଉ ଏକ ଘଟଣା ଏବେ ସାମ୍ନାକୁ ଆସିଛି । ଭରା ନଈରେ ବିପଦସଙ୍କୁଳ ଯାତ୍ରା । ତେବେ ଭରା ନଈରେ ବିପଦ ସଙ୍କୁଳ ଅବସ୍ଥାରେ ଯାତ୍ରା କରିବା କୌଣସି ନୂଆ କଥା ନୁହେଁ । କିନ୍ତୁ ଏଠି ବଡ଼ କଥା ହେଲେ ବିପଦ ସଙ୍କୁଳ ଅବସ୍ଥାରେ ଏକ କାଠ ଡଙ୍ଗାରେ ଭରା ନଈ ପାର୍ ହେଉଛନ୍ତି ନବ ଦମ୍ପତି । ଡଙ୍ଗାରେ କୌଣସି ସୁରକ୍ଷା ଉପକରଣ ନଥିବା ସହ କ୍ଷମତାଠାରୁ ଅଧିକ ଲୋକ ଯାତ୍ରା କରୁଥିବା ଦେଖାଯାଇଛି । ଖାଲି ସେତିକି ନୁହେଁ ଏହି ବିବାହ କାର୍ଯ୍ୟକ୍ରମରେ ଯୋଗଦେବା ପାଇଁ ବରଯାତ୍ରୀ ମଧ୍ୟ ଯାଇଥିଲେ ଡଙ୍ଗାରେ । ଆଉ ବିବାହ ସରିବାର ପରେ ନବଦମ୍ପତି ମଧ୍ୟ ଫେରିଛନ୍ତି ଡଙ୍ଗାରେ ।
ଏହି ଘଟଣା କନ୍ଧମାଳ ଜିଲ୍ଲା କେ. ନୂଆଗାଁ ବ୍ଲକ ସିର୍ତ୍ତିଗୁଡ଼ା ପଞ୍ଚାୟତର । ଝିଅ ଘରକୁ ଯିବା ପାଇଁ ରାସ୍ତା ନଥିବା ବେଳେ, ପ୍ରବଳ ପାଣି ଓ ସୁଅ ଥିବା କମାଙ୍ଗୀ ନଦୀ ପାର ହୋଇଯାଇଥିଲେ ବରଯାତ୍ରୀ । ସୂଚନା ଅନୁସାରେ ଦାରିଙ୍ଗବାଡ଼ି ବ୍ଲକ ସୁକାଲଦା ଗାଁର ଦିଗମ୍ବର ପ୍ରଧାନଙ୍କ ବାହାଘର ସିର୍ତ୍ତିଗୁଡା ପଞ୍ଚାୟତ କମଖଙ୍ଗିର ଭାନୁମତୀ ପ୍ରଧାନଙ୍କ ସହ ଧାର୍ଯ୍ୟ ହୋଇଥିଲା । ହେଲେ କରୋନା ପାଇଁ ବିବାହ ସ୍ଥଗିତ ରହିଥିଲା । ଏବେ ପୁଣି ଥରେ ବିବାହ ଧାର୍ଯ୍ୟ ହୋଇଥିବା ବେଳେ ବାଟ ଓଗାଳିଥିଲା କମାଙ୍ଗି ନଈ ।
ଝରଣା ଭସାଇନେଲା ଗୋଟିଏ ପରେ ଗୋଟିଏ କାର, ଜୀବନ ବଞ୍ଚାଇ ଦୌଡ଼ିବାକୁ ଲାଗିଲେ ଲୋକ
ଇନ୍ଦୋର: ସହର ନିକଟରେ ଥିବା ଏକ ପିକନିକ ସ୍ପଟରେ ରବିବାରକୁ ପିକନିକ କରିବାକୁ ଯାଇଥିବା କିଛି ଲୋକ ହଠାତ ଏକ ବଡ଼ ବିପଦର ସମ୍ମୁଖୀନ ହୋଇଛନ୍ତି । କିନ୍ତୁ ଆଶ୍ୱସ୍ତିକର କଥା ହେଉଛି କି ଗାଁ ଲୋକଙ୍କ ସାହାରାରେ ସେମାନେ ବଞ୍ଚିଗଲେ । ଯଦି ଗାଁ ଲୋକ ସେଠାରେ ଠିକ ସମୟରେ ପହଞ୍ଚିନଥାନ୍ତେ ତେବେ ଏକାଧିକ ଲୋକ ଜୀବନ ହରାଇଥାନ୍ତେ ।
ବାସ୍ତବରେ ଘଟଣା ଇନ୍ଦୋରର ମହୁ ତହସିଲ ସ୍ଥିତ ମାନପୁରର ଯୋଗିଭଡ଼କ ଝରଣାର । ଯେଉଁଠାରେ ରବିବାରକୁ ଝରଣାର ପାଣି ହଠାତ୍ ଉପରକୁ ମାଡ଼ି ଆସିବାରୁ ପରିସ୍ଥିତି ଅସମ୍ଭାଳ ହୋଇଗଲା । ଗୋଟିଏ ପରେ ଗୋଟିଏ କାର ଭାସିଯିବାକୁ ଲାଗିଲା । କିନ୍ତୁ ୩ଟି କାରକୁ ଗାଁ ଲୋକ ଭାସିଯିବା ପୁର୍ବରୁ ଅଟକାଇ ଦେଲେ । ସୂଚନା ଅନୁଯାୟୀ ଘଟଣା ସମୟରେ ବେଟାଲିୟା ଗାଁର କେତେକ ଲୋକ ସେଠାରେ ଉପସ୍ଥିତ ଥିଲେ । ଯେଉଁମାନେ ଏକ ବଡ଼ ଦୁର୍ଘଟଣାରୁ ଅନ୍ୟ ମାନଙ୍କୁ ରକ୍ଷା କଲେ ।
ଗାଁ ଲୋକଙ୍କ କହିବା ଅନୁସାରେ ରବିବାରକୁ ୪ଟାରେ ବର୍ଷା କାରଣରୁ ହଠାତ୍ ପାଣି ଜୋରରେ ବହିବାକୁ ଲାଗିଲା । ଯାହାଦ୍ୱାରା ଝରଣା ନିକଟରେ ଛିଡ଼ା ହୋଇଥିବା ୪ଟି କାରକୁ ପାଣି ଭସାଇନେଲା । ଆଶ୍ୱସ୍ତିକର କଥା ହେଉଛି କି କାର ମଧ୍ୟରେ କୌଣସି ବ୍ୟକ୍ତି ନଥିଲେ ।
DRDO ତିଆରି କରୁଛି ଲେଜର ଅସ୍ତ୍ର,ଦୂରରୁ ଧ୍ୱଂସ ପାଇବ ଶତ୍ରୁ ବିମାନ
ଭାରତୀୟ ସେନାଙ୍କ ପାଇଁ ନୂଆ ଅସ୍ତ୍ରଶସ୍ତ୍ର ତିଆରି କରୁଛି ଡିଆରଡିଓ । ଡାଇରେକ୍ଟ ଏନର୍ଜି ଓ୍ୱିପନ ବା ପ୍ରାକୃତିକ ଶକ୍ତି ବ୍ୟବହାର କରି ଅସ୍ତ୍ରଶସ୍ତ୍ର ତିଆରି କରାଯିବାକୁ ଯୋଜନା କରାଯାଉଛି । ସୂଚନା ମୁତାବକ ପ୍ରାକୃତିକ ଶକ୍ତି ବ୍ୟବହାର କରି ଲେଜର ବନ୍ଧୁକ ତିଆରି କରାଯାଇପାରିବ । ହଲିଉଡ ଫିଲ୍ମ ଷ୍ଟାରଓ୍ୱାରରେ ଯେମିତି ବନ୍ଧୁକ ବ୍ୟବହାର କରାଯାଉଥିଲା ଠିକ୍ ସେହିଭଳି ଅସ୍ତ୍ର ତିଆରି କରିବାକୁ ବ୍ଲୁପ୍ରିଣ୍ଟ ପ୍ରସ୍ତୁତ ହୋଇଛି । ୧୦୦ କିଲୋଓ୍ୱାଟ ପର୍ଯ୍ୟନ୍ତ ଶକ୍ତି ଏହି ଅସ୍ତ୍ରଶସ୍ତ୍ର ବ୍ୟବହାର କରିପାରିବ ।
ସ୍ୱଳ୍ପ ଓ ଦୀର୍ଘ ମିଆଦି ଲକ୍ଷ୍ୟକୁ ନେଇ ଡିଆରଡିଓ ଏହି ବ୍ଲୁପ୍ରିଣ୍ଟ୍ ପ୍ରସ୍ତୁତ କରିଛି । ଭାରତ ଓ ଚୀନ ମଧ୍ୟରେ ସୀମା ବିବାଦ ଭିତରେ ଏଭଳି ଅସ୍ତ୍ର ତିଆରି କରିବା ଭାରତ ପାଇଁ ଜରୁରୀ ହୋଇପଡିଛି । ଭାରତୀୟ ସେନା ଲେଜର ଅସ୍ତ୍ରଶସ୍ତ୍ର ବ୍ୟବହାର କଲେ ଶତ୍ରୁପକ୍ଷକୁ ମାତ୍ର କିଛି ମିନିଟରେ ଚକମା ଦେଇପାରିବେ । ଏଥିସହ ଡିଆରଡିଓ ପକ୍ଷରୁ ଦୁଇ ଆଣ୍ଟି ଡ୍ରୋନ ଡାଇରେକ୍ଟ ଏନର୍ଜି ଓ୍ୱିପନ ମାଧ୍ୟମରେ ତିଆରି ହୋଇଛି । ଆଗକୁ ଏହାକୁ ଅଧିକ ସଂଖ୍ୟାରେ ତିଆରି କରିବାକୁ ଯୋଜନା କରାଯାଇଛି । ଏହି ଡ୍ରୋନରେ କୌଣସି ପ୍ରକାର ବାରୁଦ ବା ଗୁଳିର ବ୍ୟବହାର କରାଯାଏନାହିଁ । ଲେଜର ମାଧ୍ୟମରେ ଟାର୍ଗେଟକୁ ଧ୍ୱଂଶ କରିଦେବ ଡ୍ରୋନ । ଆମେରିକା, ଋଷିଆ, ଚାଇନା, ଇସ୍ରାଏଲ ମଧ୍ୟ ଏଭଳି ଟେକ୍ନୋଲୋଜିର ବ୍ୟବହାର କରୁଛନ୍ତି ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କ ଦାବି, ଲକଡାଉନ ପାଇଁ ୭୮ ହଜାର ଲୋକଙ୍କ ଜୀବନ ବଂଚିଲା
ନୂଆଦିଲ୍ଲୀ: କରୋନା କଟକଣା ମଧ୍ୟରେ ସଂସଦର ମୌସୁମୀ ଅଧିବେଶନ ଆରମ୍ଭ ହୋଇଛି । ପ୍ରଥମେ ଲୋକସଭାରେ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କୁ ଶ୍ରଦ୍ଧାଞ୍ଜଳି ଦିଆଯାଇଥିଲା । ବାଚସ୍ପତି ଓମ୍ ବିର୍ଲା କହିଥିଲେ, ପ୍ରଣବ ଜଣେ ସଫଳ ବକ୍ତା ଓ ପ୍ରଶାସକ ଥିଲେ । ତାଙ୍କ ଜ୍ଞାନ ଓ ଅନୁଭବ ଥିଲା ଅଦ୍ୱିତୀୟ । ଏହାପରେ ଘଣ୍ଟାଏ ପାଇଁ ଲୋକସଭାକୁ ମୁଲତବି ରଖାଯାଇଥିଲା ।
ତେବେ ସଂସଦ ଆରମ୍ଭ ହେବା ପରେ କରୋନା ସଂକ୍ରମଣକୁ ନେଇ ବିବୃତି ରଖିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ । ସେ କହିଛନ୍ତି ଦେଶରେ ଲକଡାଉନ ଯୋଗୁଁ ୨୯ ଲକ୍ଷରୁ ଅଧିକ ଲୋକ କରୋନା ସଂକ୍ରମିତ ହେବାରୁ ବଞ୍ଚିଗଲେ । ଏଥିସହ ୭୮ ହଜାର ଲୋକ ମୃତ୍ୟୁ ମୁଖରୁ ମଧ୍ୟ ବର୍ତ୍ତିଗଲେ । ଲକଡାଉନ ନହୋଇଥିଲେ ଦେଶରେ ବର୍ତ୍ତମାନ ସୁଦ୍ଧା ସଂକ୍ରମିତ ସଂଖ୍ୟାର ବହୁ ଗଣା ହୋଇଥାନ୍ତା । କେନ୍ଦ୍ର ସରକାର ଠିକ ସମୟରେ ଉଚିତ ପଦକ୍ଷେପ ନେବା ଯୋଗୁଁ ଦେଶରେ କରୋନା ସ୍ଥିତି ଆୟତରେ ରହିଛି ବୋଲି ଗୃହରେ ବିବୃତି ରଖିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ।
ଏହା ସହ ପୂର୍ବରୁ ହର୍ଷବର୍ଦ୍ଧନ କହିଛନ୍ତି ଯେ, ୨୦୨୧ ଆରମ୍ଭରେ ଆସିପାରେ କରୋନା ଟିକା । ଟିକାକୁ ନେଇ ଯଦି ସନ୍ଦେହ ସୃଷ୍ଟି ହେବ ତେବେ ସେ ପ୍ରଥମେ ଟିକା ନେବେ ବୋଲି ସ୍ୱାସ୍ଥ୍ୟମନ୍ତ୍ରୀ କହିଛନ୍ତି । ତେବେ ଟିକା ଆସିବା ନେଇ କୌଣସି ନିର୍ଦ୍ଧିଷ୍ଟ ତାରିଖ ଘୋଷଣା ହୋଇନଥିବା କହିଛନ୍ତି ହର୍ଷବର୍ଦ୍ଧନ । ଟିକା ଆସିଲେ ପ୍ରଥମେ ବରିଷ୍ଠ ନାଗରିକ ତଥା କୋଭିଡ୍ ଯୋଦ୍ଧାଙ୍କୁ ଦିଆଯିବ । ଡିଜିଟାଲ ପ୍ଲାଟଫର୍ମରେ ଅନୁଷ୍ଠିତ ଏକ ଅନ୍ଲାଇନ୍ କାର୍ଯ୍ୟକ୍ରମରେ ଯୋଗଦେଇ ଏହା କହିଛନ୍ତି ଡାକ୍ତର ହର୍ଷବର୍ଦ୍ଧନ ।
ସେହିଭଳି ଗୃହରେ ଡ୍ରଗ୍ନ କାରବାର କଥା ଉଠାଇଛନ୍ତି ସାଂସଦ ରବି କିଷନ୍ । ପଞ୍ଜାବ ଓ ନେପାଳ ଦେଇ ସାରା ଭାରତକୁ ଚାଲାଣ ହେଉଛି ଡ୍ରଗ୍ସ । ଦେଶର ଯୁବପୀଢିଙ୍କୁ ମତିଭ୍ରମ କରିବା ପାଇଁ ଏହା ଏକ ଯୋଜନା ବୋଲି ବିଜେପି ସାଂସଦ ରବି କିଶନ ଆଜି ଲୋକସଭାରେ ବିବୃତି ରଖିଛନ୍ତି । କେନ୍ଦ୍ର ସରକାର ଏହା ଉପରେ ନଜର ରଖିବା ସହ ଦୃଢ କାର୍ଯ୍ୟାନୁଷ୍ଠାନ ନେବା ଦରକାର ବୋଲି କହିଛନ୍ତି । ସେ ଏଠାରେ ପରୋକ୍ଷ ଭାବେ ସୁଶାନ୍ତଙ୍କ ମୃତ୍ୟୁ ମାମଲାରେ ଡ୍ରଗ୍ସ କାରବାର କଥା ମଧ୍ୟ ଉଠାଇଛନ୍ତି । ଏନସିବି ଏହି ମାମଲାରେ ଭଲ ଭାବେ ତଦନ୍ତ କରୁଛି ବୋଲି ରବି କିଷନ କହିଛନ୍ତି । ଭାରତ ସରକାର ଏହି ପ୍ରସଙ୍ଗକୁ ଗୁରୁତ୍ୱର ସହ ନେଇ ପଦକ୍ଷେପ ନେବା ଦରକାର । ଯାହା ଦ୍ୱାରା ପଡୋଶୀ ଦେଶକୁ ମଧ୍ୟ ଉଚିତ ଜବାବ ମିଳିବ ବୋଲି ରବି କିଶାନ କହିଛନ୍ତି ।
ଲୁହ ଓ କୋହ ଭିତରେ ବିଦା ହେଲେ ବର୍ଷିୟାନ ଅଭିନେତା ଅଜିତ ଦାସ
ଭୁବନେଶ୍ୱର: ସରିଛି ଓଡ଼ିଆ ଚଳଚ୍ଚିତ୍ର ଜଗତର ବର୍ଷିୟାନ ଅଭିନେତା ଅଜିତ ଦାସଙ୍କ ଶେଷକୃତ୍ୟ । ଭୁବନେଶ୍ୱର ସତ୍ୟନଗର ଶ୍ମଶାନରେ ଗାର୍ଡ୍ ଅଫ ଅନର ସହ ଅଜିତଙ୍କ ଶେଷକୃତ୍ୟ ସମ୍ପନ୍ନ ହୋଇଥିଲା । କରୋନାରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିବା ବେଳେ ଗତକାଲି ତାଙ୍କର ପରଲୋକ ହୋଇଥିଲା । ୭୧ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି ଅଜିତ । ପ୍ରାୟ ୬୫ଟି ଫିଲ୍ମରେ ସେ ଅଭିନୟ କରିଥିଲେ । କେବଳ ଅଭିନୟ ନୁହେଁ ସେ ନିର୍ଦ୍ଦଶକ ଭାବେ ମଧ୍ୟ କିଛି ଫିଲ୍ମ କରିଥିଲେ । ତାଙ୍କ ଅଭିନୀତ ହାକିମବାବୁ ଫିଲ୍ମକୁ ମିଳିଥିଲା ଜାତୀୟ ଚଳଚ୍ଚିତ୍ର ପୁରସ୍କାର । ଏହି ଚଳଚ୍ଚିତ୍ର ପାଇଁ ଅଜିତ ଦାସ ଶ୍ରେଷ୍ଠ ଅଭିନେତା ଭାବେ ରାଜ୍ୟ ଚଳଚ୍ଚିତ୍ର ପୁରସ୍କାର ପାଇଥିଲେ । ଆହୁରି ଅନେକ ପୁରସ୍କାର ଓ ସମ୍ମାନର ଅଧିକାରୀ ଥିଲେ ଅଜିତ ଦାସ । ଉତ୍କଳ ସଂଗୀତ ନାଟକ ମହାବିଦ୍ୟାଳୟ ନାଟକ ବିଭାଗର ମୁଖ୍ୟ ଭାବେ ସେ ଅବସର ନେଇଥିଲେ ।
ମଞ୍ଚ ଓ ନାଟକରେ ଅଧିକ ରୁଚି ରଖିଥିବା ଅଜିତଙ୍କ ମୃତ୍ୟୁରେ କେବଳ ସିନେ ଜଗତ ନୁହେଁ ବରଂ ସାରା ଓଡ଼ିଶା ମର୍ମାହତ । ଗତକାଲି ଅଜିତଙ୍କ ପରଲୋକରେ ସିନେ କଳାକାରଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ପିସିସି ସଭାପତି ନିରଞ୍ଜନ ପଟ୍ଟନାୟକ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଦି ସୋସିଆଲ ମିଡିଆରେ ପୋଷ୍ଟ ଶେୟାର କରି ଦୁଃଖ ପ୍ରକାଶ କରିଥିଲେ ।
ଅଜିତ ଦାସ ଓଡିଶାର ମୟୂରଭଞ୍ଜ ଜିଲ୍ଲାର କରଞ୍ଜିଆଠାରେ ୧୯୪୯ ମସିହା ଜାନୁଆରୀ ୨୦ ତାରିଖରେ ଜନ୍ମଗ୍ରହଣ କରିଥିଲେ । ଅଜିତ ଦାସଙ୍କ ବଡ ବାପା ସୁଧିର ଚନ୍ଦ୍ର ଦାଶ ଜଣେ ନାଟକ ଅଭିନେତା ଥିଲେ । ତେଣୁ ସେ ପିଲାବେଳୁ ନାଟକ ପ୍ରତି ଆକର୍ଷିତ ହୋଇଥିଲେ । ମୟୂରଭଞ୍ଜରେ ତାଙ୍କର ଏକ ନାଟକ ଦଳ ମଧ୍ୟ ରହିଥିଲା । ସେ ୧୯୭୬ ମସିହାରେ ସିନ୍ଦୂର ବିନ୍ଦୁ ଫିଲ୍ମରେ ଅଭିନୟ କରି ଚଳଚିତ୍ର ଦୁନିଆରେ ପ୍ରବେଶ କରିଥିଲେ । ଏହି ଫିଲ୍ମରେ ତାଙ୍କୁ ଖଳନାୟକ ଭୂମିକାରେ ପ୍ରଥମ ସୁଯୋଗ ଦେଇଥିଲେ ଧୀର ବିଶ୍ୱାଳ । ଏହାପରେ ପରେ ସେ ଅନେକ ଓଡିଆ ଫିଲ୍ମରେ ନାୟକ ଭାବେ ଅଭିନୟ କରିଛନ୍ତି । ସେ ୬୦ରୁ ଅଧିକ ଚଳଚିତ୍ରରେ ଅଭିନୟ କରିଛନ୍ତି ।
ତାଙ୍କ ଅଭିନୀତ ସୁପରହିଟ୍ ଚଳଚ୍ଚିତ୍ର ଗୁଡିକ ହେଲା ହାକିମବାବୁ, କପାଳ ଲିଖନ, ସରରପଞ୍ଚ ବାବୁ, ପର ଝିଅ ଘର ଭାଙ୍ଗେନା, ଲୁଟତରାଜ ପରଦେଶୀ ଚଢେଇ । ତାଙ୍କ ଅଭିନୟରେ ସେ ଓଲିଉଡରେ ଅନେକ ଛାପ ଛାଡି ଯାଇଛନ୍ତି । ସୂଚନାଯୋଗ୍ୟ ହାକିମ ବାବୁ ଚଳଚତ୍ରରେ ତାଙ୍କ ଅଭିନୟରେ ମୁଗ୍ଧ ହୋଇ ଦର୍ଶକ ତାଙ୍କୁ ହାକିମ ବାବୁ ବୋଲି ଡାକିଥିଲେ ।
ତେବେ ନିଜର ନିଖୁଣ ଅଭିନୟ ପାଇଁ ଚିରଦିନ ପାଇଁ ଦର୍ଶକଙ୍କ ହୃଦୟରେ ଅମର ହୋଇ ରହିବେ ଅଜିତ୍ । ତାଙ୍କ ପରଲୋକରେ ତାଙ୍କ ଜନ୍ମସ୍ଥାନ ମୟୂରଭଞ୍ଜ ଜିଲ୍ଲା କରଞ୍ଜିଆ ଅଞ୍ଚଳରେ ମଧ୍ୟ ଶୋକର ଛାୟା ଖେଳିଯାଇଛି ।
ଲୋକସଭାରେ ଉଠିଲା ଡ୍ରଗ୍ସ ଚାଲାଣ ମାମଲା, ତଦନ୍ତ ଦାବି କଲେ ରବି କିଶନ
ନୂଆଦିଲ୍ଲୀ: ସୁଶାନ୍ତ ସିଂ ମୃତ୍ୟୁ ମାମଲାର ଗୁମର ଖୋଲୁ ଖୋଲୁ ଡ୍ରଗ୍ସ କାରବାର ରାଜ୍ ଖୋଲିଛି । ବଲିଉଡରେ ଡ୍ରଗ୍ସ ଚଳନକୁ ନେଇ ସୋମବାର ଦିନ ସଂସଦରେ ଆଲୋଚନା ହୋଇଛି । ଭୋଜପୁରୀ ସୁପରଷ୍ଟାର ଏବଂ ଭାରତୀୟ ଜନତା ପାର୍ଟିର ସାଂସଦ ରବି କିଶନ ଲୋକସଭାରେ ଡ୍ରଗ୍ସ ଚାଲାଣ ମାମଲାକୁ ଗୁରୁତ୍ୱ ଦେଇଛନ୍ତି । ଏହା ସହିତ ଏକ ବଡ଼ ଧରଣର ତଦନ୍ତ କରିବା ପାଇଁ କେନ୍ଦ୍ର ସରାକରଙ୍କୁ ଅନୁରୋଧ କରିଛନ୍ତି । ଶୂନ୍ୟକାଳ ସମୟରେ ରବି କିଶନ ଲୋକସଭାରେ ଡ୍ରଗ୍ସ କାରବାର ମାମଲା ବଢୁଥିବା କହିଛନ୍ତି । ଏହା ସହିତ ଚୀନ ଏବଂ ପାକିସ୍ତାନ ମାଧ୍ୟମରେ ଭାରତକୁ ନିଶାଦ୍ରବ୍ୟ ଆସୁଥିବା ସେ କହିଛନ୍ତି ।
ବିଜେପି ସାଂସଦଙ୍କ କହିବା ଅନୁସାରେ ଫିଲ୍ମ ଇଣ୍ଡଷ୍ଟ୍ରିରେ ମଧ୍ୟ ଏହାର ବ୍ୟବହାର କରାଯାଉଛି । ଏନସିବି ଜାଲରେ ଡ୍ରଗ୍ସ ମାମଲାରେ ସମ୍ପୃକ୍ତ ଥିବା କେତେକ ବ୍ୟକ୍ତି ଫସିଛନ୍ତି । ତେଣୁ ଉକ୍ତ ଘଟଣାକୁ ନେଇ ତଦନ୍ତ ଉପରେ ଅଧିକ ଗୁରୁତ୍ୱ ଦିଆଯାଉ ବୋଲି କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି ରବି କିଶନ୍ । ଏହା ସହିତ ସେ କହିଛନ୍ତି କି ଯୁବପୀଢିଙ୍କୁ ଡ୍ରଗ୍ସ ମାଧ୍ୟମରେ ବରବାଦ କରାଯାଉଛି । ତେଣୁ ଏହାକୁ ନେଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ୍ ।
ସୂଚନାଯୋଗ୍ୟ ସୁଶାନ୍ତ ସିଂ ମୃତ୍ୟୁ ମାମଲାର ତଦନ୍ତ କରିବା ପରେ ଏହି ଡ୍ରଗ୍ସ ମାମଲା ସାମ୍ନାକୁ ଆସିଛି । ଯେଉଁଥିରେ ପ୍ରଥମେ ସୁଶାନ୍ତଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀଙ୍କ ଡ୍ରଗ୍ସ କାରବାରକୁ ନେଇ ସମ୍ପୃକ୍ତି ଥିବା ଖବର ସାମ୍ନାକୁ ଆସିଥିଲା । ଯାହାପରେ ତାଙ୍କ ଭାଇ ସୌବିକ,ସୁଶାନ୍ତଙ୍କ ମ୍ୟାନେଜର ସାମୁଏଲ ମିରାଣ୍ଡା ଏବଂ କର୍ମଚାରୀ ନିରଜଙ୍କ ଡ୍ରଗ୍ସ କାରବାର ରାଜ୍ ଖୋଲିଛି । ଏହାପରେ ହଠାତ୍ ଗୋଆ ଏବଂ ମୁମ୍ବାଇରେ ଡ୍ରଗ୍ସକୁ ନେଇ ଏନସିବି ଚଢଉ କରିଥିଲା ଓ ଡ୍ରଗ୍ ପେଡଲରକୁ ମଧ୍ୟ ଗିରଫ କଲା । କେବଳ ସେତିକି ନୁହେଁ ବରଂ ରିୟା ନେଇଥିବା ୨୫ ଜଣ ବଲିଉଡ ସେଲିବ୍ରିଟିଙ୍କ ତାଲିକା ପ୍ରସ୍ତୁତ କରିସାରିଛି ଏନସିବି । ଯେଉଁଥିରେ ସାରା ଅଲି ଖାନ,ରକୁଲ ପ୍ରୀତ ଏବଂ ସିମୋନ ଖମ୍ବାଟାଙ୍କ ନାମ ସାମ୍ନାକୁ ଆସିଛି ।
ପୁଣି କଟକରୁ ଅସଲି ବ୍ରାଣ୍ଡର ନକଲି ଘିଅ-ସସ୍ କାରଖାନା ଠାବ
କଟକ: ପୁଣି କଟକରୁ ଅସଲି ବ୍ରାଣ୍ଡର ନକଲି ଜିନିଷ ଠାବ । ଗତ ସପ୍ତାହରେ କଟକର ମାଲଗୋଦାମ ଥାନା ଅଂଚଳରୁ ନକଲି ମହୁ, ଅଗୁରୁ ଓ ଗଙ୍ଗାଜଳ ଜବତ କରାଯାଇଥିବା ବେଳେ ସୋମବାର କଟକ ଚୌଦ୍ୱାର ଥାନା ଅଞ୍ଚଳରୁ ନକଲି ଘିଅ ଓ ସସ୍ ଜବତ ହୋଇଛି । ୯ ନମ୍ବର ୱାର୍ଡ ମହିଳା ଉଚ୍ଚ ବିଦ୍ୟାଳୟ ନିକଟରେ ଥିବା ଏକ ନକଲି ଘିଅ ଓ ସସ୍ କଂପାନୀ ଉପରେ ଚୌଦ୍ୱାର ପୋଲିସ ଚଢ଼ାଉ କରି ବିପୁଳ ପରିମାଣର ନାମୀ ଦାମୀ ବ୍ରାଣ୍ଡ ଘିଅ ଓ ସସ୍ ଜବତ କରିଛି ।
ମାଲିକକୁ ଅଟକ ରଖି କମିଶନରେଟ୍ ପୋଲିସ ପଚରାଉଚରା କରୁଛି । ଆଜିକୁ ଦୀର୍ଘଦିନ ହେବ ଏଠାରେ ନକଲି କଂପାନୀ ଚାଲୁଥିବା କହିଛି କମିଶନରେଟ୍ ପୋଲିସ । ଅନ୍ୟପଟେ ଚୌଦ୍ୱାର, ମଙ୍ଗୁଳି, ଟାଙ୍ଗି, ଜଗତପୁର, କଟକ ଅଂଚଳ ଏବେ ଅନେକ ନକଲି କମ୍ପାନୀ ଚାଲିଥିବା ବେଳେ ଲୋକ ଦେଖାଣିଆ ଭାବରେ କମିଶନରରେଟ୍ ପୋଲିସ ଚଢ଼ାଉ କରୁଥିବା ଅଭିଯୋଗ ହେଉଛି । ତେବେ ମୁଖ୍ୟତଃ ଖାଦ୍ୟ ପଦାର୍ଥ ବହୁ ପରିମାଣରେ ଅପମିଶ୍ରଣ କରି କୋଟି କୋଟି ଟଙ୍କା ମୁନାଫା କରୁଛନ୍ତି ଅପମିଶ୍ରଣକାରୀ ।
ପୋଲିସ ଡ୍ରୋନରେ ଲାଲଗଡ଼ର ଚିତ୍ର, ଜଙ୍ଗଲରେ ଏମିତି ଚାଲିଛି ରାଜୁତି
ପୋଲିସର ଡ୍ରୋନରେ ଲାଲଗଡ଼ର ଚିତ୍ର । ମାଲକାନଗିରି ସୀମାନ୍ତ ଛତିଶଗଡ଼ର ସୁକମା ଜିଲ୍ଲାରେ ମାଓବାଦୀଙ୍କ ନିର୍ଦ୍ଦେଶରେ ଯାଉଥିବା ଗ୍ରାମବାସୀଙ୍କ ଚିତ୍ର ସାମ୍ନାକୁ ଆସିଛି । ମାଓବାଦୀଙ୍କ ନିର୍ଦ୍ଦେଶରେ ଶହଶହ ଗ୍ରାମବାସୀ ରାସ୍ତା କାଟିବାକୁ ଯାଉଥିଲେ । ପୋଲିସର ଡ୍ରୋନରେ ଏହି ସମୟର ଚିତ୍ର କଏଦ ହୋଇଛି । କିସ୍ତରାମ ଥାନା ପାଲୋଡି ଅଞ୍ଚଳରେ ଏହି ଚିତ୍ର କଏଦ ହୋଇଛି ।
ଲୋକମାନେ ପାଲୋଡି ଜଙ୍ଗଲରେ ନାଳପାରି ହେଉଥିବା ବେଳେ ଡ୍ରୋନ୍ ଉଡ଼ାଇଥିଲା ପୋଲିସ । ସେମାନେ ଜାତୀୟ ରାଜପଥକୁ କାଟି ରାସ୍ତା ଅବରୋଧ କରିବାକୁ ଯାଉଥିବା କୁହାଯାଉଛି। ମାଓବାଦୀମାନଙ୍କ ସହ ଶହ ଶହ ନିରୀହ ଗ୍ରାମବାସୀମାନେ ଥିବାରୁ ସେମାନଙ୍କ ଉପରେ ଆକ୍ରମଣ ସମ୍ଭବ ହୋଇ ପାରି ନଥିବା ସୁକମା ଏସପି ଶାଲାବ ସିହ୍ନା କହିଛନ୍ତି। ତେବେ ପୋଲିସ ପକ୍ଷରୁ ମାଓବାଦୀମାନଙ୍କ ଗତବିଧି ଉପରେ କଡ଼ା ନଜର ରଖାଯାଇଛି ବୋଲି ସେ ସୂଚନା ଦେଇଛନ୍ତି।