ଭୁବନେଶ୍ୱର: ପିପୁଲ ଫର ସେବା ତରଫରୁ ରେଳବାଇ ଥାନାରେ ସମାଜସେବୀ ଆଦିତ୍ୟ ଦାଶଙ୍କୁ ହତ୍ୟା କରାଯାଇଛି ବୋଲି ଏତଲା ଦାଏର କରାଯାଇଛି । ସଂଗଠନର ସଭାପତି ପ୍ରୀତମ ମିଶ୍ର ଏତଲା ଦାଏର କରିଛନ୍ତି । ଏହାରି ଭିତରେ ଆସିଛି ଆଦିତ୍ୟ ଦାଶଙ୍କ ପୋଷ୍ଟମର୍ଟମ ରିପୋର୍ଟ । ରିପୋର୍ଟରେ ଆଦିତ୍ୟଙ୍କ ମୃତ୍ୟୁ ମୁଣ୍ଡରେ ଶକ୍ତ ଆଘାତ କାରଣରୁ ହୋଇଛି ବୋଲି କୁହାଯାଇଛି ।

ଆଦିତ୍ୟଙ୍କ ସହ କାନ୍ଧରେ କାନ୍ଧ ମିଳାଇ ସମାଜ ସେବା କରୁଥିବା ପିପୁଲ ଫର ସେବାର କର୍ମକର୍ତ୍ତା ତାଙ୍କୁ ହତ୍ୟା କରାଯାଇଛି ବୋଲି କହୁଛନ୍ତି । ଏହା ସହ ଯଦି ଆଦିତ୍ୟ ଆତ୍ମହତ୍ୟା କରିଛନ୍ତି ତେବେ ଏଥିପାଇଁ ତାଙ୍କ ଉପରେ ଯିଏ ଚାପ ପକାଇଛି ତାକୁ ଖୋଜି ବାହାର କରାଯାଉ ବୋଲି ସେବାର କର୍ମକର୍ତ୍ତା କହୁଛନ୍ତି ।

ପିପୁଲ ଫର ସେବାର କର୍ମକର୍ତ୍ତାଙ୍କ କହିବାକୁ ଯଦି ବିଶ୍ୱାସ କରାଯାଏ ତେବେ ପ୍ରଥମ ପ୍ରଶ୍ନ ଆଦିତ୍ୟଙ୍କ ପାରିବାରିକ ସମସ୍ୟାକୁ ନେଇ ଉଠୁଛି । ବାହାଘର ପରେ ଆଦିତ୍ୟଙ୍କ ମାନସିକ ଅବସ୍ଥା ଠିକ୍ ନଥିଲା ବୋଲି ସେମାନେ ଦାବି କରୁଛନ୍ତି ।

ବାହା ହୋଇ ଭୂଲା କରିଛି !

ଆଦିତ୍ୟଙ୍କ ବନ୍ଧୁ ବିକାଶଙ୍କ ଦାବି ହେଉଛି ଯେ, ବାହାଘର ପରଠାରୁ ସେ ମାନସିକ ଚାପରେ ଥିଲେ । ଆଶ୍ରମକୁ ବେସି ଆସୁନଥିଲେ କିମ୍ବା ସାମାଜିକ କାମରେ ଅଧିକ ସମୟ ବ୍ୟୟ କରୁନଥିଲେ । ନନ୍ଦିଘୋଷ ଟିଭିକୁ ଜିଆରପି ଥାନା ପରିସରରେ ଦେଇଥିବା ସାକ୍ଷାତକାରରେ ବିକାଶ ପୁଣିଥରେ ନିଜ କଥାକୁ ଦୋହରାଇଛନ୍ତି । ବିକାଶ କହିଛନ୍ତି, ଆଦିତ୍ୟ ତାଙ୍କୁ ବାହା ହୋଇ ଭୁଲ କରିଛି ବୋଲି କହିଥିଲେ । ବାହା ହେଲା ପରେ କ୍ଷମତା ଜଣକ ହାତରୁ ଆଉ ଜଣକ ହାତକୁ ଚାଲିଯାଏ ବୋଲି ଆଦିତ୍ୟ କୁଆଡେ ବିକାଶଙ୍କୁ କହିଥିଲେ । ବିକାଶଙ୍କ କହିବା ହେଲା,ଆଦିତ୍ୟ ବାହାଘରରେ ସନ୍ତୁଷ୍ଟ ନଥିଲେ । ଯଦି ପାରିବାରିକ ଅଶାନ୍ତି ଯୋଗୁ ସେ ଆତ୍ମହତ୍ୟା କରିଛନ୍ତି ତେବେ ତା’ର ତଦନ୍ତ କରାଯାଉ ବୋଲି ସେ ଦାବି କରିଛନ୍ତି ।

ଆଦିତ୍ୟଙ୍କ ଆଉ ଜଣେ ବନ୍ଧୁ ପପୁ ମଧ୍ୟ ସମାନ କଥା ଦୋହରାଇଛନ୍ତି । ସେ କହିଛନ୍ତି ଯେ, ଆଦିତ୍ୟଙ୍କ ପାଇଁ ଟଙ୍କା ପଇସା ବଡ କଥା ନଥିଲା । ଟଙ୍କାକୁ ନେଇ ସେ ମାନସିକ ଚାପରେ ନଥିଲେ । ଅର୍ଥ ପାଇଁ ଆଦିତ୍ୟ ଆତ୍ମହତ୍ୟା କରିଥିବା କଥାକୁ ବିକାଶ ମଧ୍ୟ ମାନିବାକୁ ପ୍ରସ୍ତୁତ ନାହାନ୍ତି । ଆଦିତ୍ୟ ଚାକିରି କରୁଥିଲେ ଓ ୟୁଟ୍ୟୁବରୁ ମାସିକ କିଛି ଅର୍ଥ ରୋଜଗାର କରୁଥିଲେ ବୋଲି ବିକାଶ କହିଛନ୍ତି ।

ବିକାଶ ପପୁ,କିଏ ?

ବୁଧବାର ଦିନ ଆଦିତ୍ୟଙ୍କର ତଥାକଥିତ ଡାଏରୀରେ ମଧ୍ୟ ପପୁ ଓ ବିକାଶଙ୍କ କଥା ଉଲ୍ଲେଖ ଥିଲା । ଯେଉଁଥିରେ ଆଦିତ୍ୟ ଲେଖିଛନ୍ତି ଯେ, ପପୁ  ୫୦ ହଜାର ଟଙ୍କା ଓ ବିକାଶ ୭୦ ହଜାର ଟଙ୍କା ନେଇଛନ୍ତି । ଏହା ସହ ସେ ପପୁଙ୍କୁ ଚେୟାରମ୍ୟାନ୍ ଓ ବିକାଶଙ୍କୁ ଟ୍ରେଜରର କରିବାକୁ ଡାଏରୀରେ ଲେଖିଥିଲେ ।

(ଭୁବନେଶ୍ୱରରୁ ଶକ୍ତିଧର ରାଜଗୁରୁଙ୍କ ରିପୋର୍ଟ)