ଢ଼େଙ୍କାନାଳ: କରୋନା ମହାମାରୀ ସମୟରେ ବାହାର ଲୋକଙ୍କ କଥା ଦୂରେ ଥାଉ ନିଜ ଲୋକ ବି ଭୁଲି ଯାଉଛନ୍ତି । ଏମିତିକି କରୋନା ରୋଗୀଙ୍କ ମୃତ୍ୟୁ ବେଳେ ନିଜ ପରିବାର ଲୋକ ବି ତାଙ୍କ ନିକଟକୁ ଆସୁନଥିବା ଅନେକ ଖବର ସାମ୍ନାକୁ ଆସିଛି । ଜଣେ ମୃତକଙ୍କ କୋକେଇ ଉଠାଇବା ପାଇଁ ୪କାନ୍ଧ ମଧ୍ୟ ମିଳୁନଥିବା ଖବର ମଧ୍ୟ ଅନେକ ସ୍ଥାନରୁ ଆସିଛି । କରୋନା ଯୋଗୁଁ କିଭଳି ନିଜର ମାନବିକତା ହରାଇ ବସୁଛନ୍ତି ଲୋକ, ସେନେଇ ଏକ ଘଟଣା ଏବେ ସମସ୍ତଙ୍କୁ ବିଚଳିତ କରିଛି ।

ଜଣେ କରୋନା ରୋଗୀକୁ କେହି ସାହାଯ୍ୟ କରିବା ତ ଦୂରର କଥା ଡାକ୍ତର ତଥା ସ୍ୱାସ୍ଥ୍ୟକର୍ମୀ ମଧ୍ୟ ରୋଗୀଠାରୁ  ଦୂରେଇ ରହୁଛନ୍ତି । ଏମିତି ଏକ ଘଟଣା ସାମ୍ନାକୁ ଆସିଛି ଢ଼େଙ୍କାନାଳ ଜିଲ୍ଲାରୁ ।  କରୋନା ପାଇଁ ହଟହଟା ହେଲେ ରୋଗୀ । କେହି ପଚାରିଲେନି କି ପାଖକୁ ଆସିଲେନି ।  ଛଟପଟ ହୋଇ ଚାଲିଗଲା ଜୀବନ । ଏପରି ଏକ ହୃଦୟ ବିଦାରକ ଦୃଶ୍ୟ ଢେଙ୍କାନାଳ ମୁଖ୍ୟ ଚିକିତ୍ସାଳୟ ସାମ୍ନାରେ ଘଟିଯାଇଛି । ଯାହାର ଭଡିଓ ଏବେ ସୋସିଆଲ ମିଡିଆରେ ଭାଇରାଲ୍‌ ହେବାରେ ଲାଗିଛି । ଭିଡିଓରେ ଦେଖିବାକୁ ମିଳିଛି ଅଭାବନୀୟ ଦୃଶ୍ୟ ।

ଜଣେ ବ୍ୟକ୍ତି ଢେଙ୍କାନାଳ ମୁଖ୍ୟ ଚିକିତ୍ସାଳୟ ସାମନାରେ ପଡ଼ି ରହିଛନ୍ତି ଓ ଅନ୍ୟ ଜଣେ ମହିଳା ତାଙ୍କ ଛାତିକୁ ବାରମ୍ଵାର ପମ୍ପିଂ କରୁଛନ୍ତି । ଆଉ ରୋଗୀ ଜଣକୁ ଚିକିତ୍ସା କରାଇବା ପାଇଁ ନେହୁରା ହେଉଛନ୍ତି । ହେଲେ, ପାଖରେ ଥିବା ସିକ୍ୟୁରିଟି ଗାର୍ଡ କି କୌଣସି କର୍ମଚାରୀ ସାହାଯ୍ୟର ହାତ ବଢାଉନାହାଁନ୍ତି । ସମସ୍ତେ ସାଜିଛନ୍ତି ଦେଖଣାହାରୀ ।

ସେପଟେ ଅସହାୟ ହୋଇ ମହିଳା ଜଣକ ଭୋ ଭୋ ହୋଇ କାନ୍ଦୁଛନ୍ତି ଓ ବିକଳ ହୋଇ ସାହାଯ୍ୟ ମାଗୁଛନ୍ତି । ବ୍ୟକ୍ତି ଜଣକ ଅନୁଗୁଳର ଜଣେ ସରକାରୀ କର୍ମଚାରୀ ଓ ତାଙ୍କ ଘର ଢେଙ୍କାନାଳ ଜିଲ୍ଲାରେ ବୋଲି ଜଣାପଡିଛି । ସେ ଗତକାଲି କୋଭିଡ୍‌‌ ଟେଷ୍ଟ ପାଇଁ ଢେଙ୍କାନାଳ ମୁଖ୍ୟ ଚିକିତ୍ସାଳୟକୁ ଆସିଥିଲେ । କୋଭିଡ୍‌ ପଜିଟିଭ ବାହାରିବା ପରେ ବ୍ୟକ୍ତି ଜଣକ ହଠାତ୍ ତଳେ ପଡିଯାଇଥିଲେ । କିନ୍ତୁ କୋଭିଡ ରୋଗୀ ଜାଣି ଆଉ କେହି ପାଖ ମାଡିନଥିଲେ । ସେପଟେ ବ୍ୟକ୍ତି ଜଣଙ୍କର କିଛି ସମୟ ପରେ ମୃତ୍ୟୁ ହୋଇଯାଇଥିଲା ।