ଭୁବନେଶ୍ୱର: ଜଳ କବଳରେ ଅଧାରୁ ଅଧିକ ଓଡ଼ିଶା । ରାଜ୍ୟର ୨୦ଟି ଜିଲ୍ଲା ବନ୍ୟା ଦ୍ୱାରା ପ୍ରଭାବିତ ହୋଇଛି । ଏନେଇ ସ୍ୱତନ୍ତ୍ର ରିଲିଫ୍ କମିଶନର ସୂଚନା ଦେଇଛନ୍ତି । ୨୦ ଜିଲ୍ଲାର ୧୧୨ଟି ବ୍ଲକରେ ବନ୍ୟାର ପ୍ରଭାବ ରହିଛି । ୮୯୬ଟି ପଞ୍ଚାୟତ ପ୍ରଭାବିତ ହୋଇଥିବା ବେଳେ ୩୨୫୬ଟି ଗାଁରେ ପଶିଛି ବନ୍ୟା ଜଳ । ରାଜ୍ୟର ୨୧ଟି ପୌରାଞ୍ଚଳର ୭୫ଟି ୱାର୍ଡ ମଧ୍ୟ ବନ୍ୟାରେ ପ୍ରଭାବିତ ହୋଇଛି । ଏଥିରେ ୧୪ ଲକ୍ଷ ୩୨ ହଜାର ୭୦୧ ଜଣ ପ୍ରଭାବିତ ହୋଇଛନ୍ତି ।
୩୪୦ଟି ଗାଁ ଜଳବନ୍ଦୀ ହୋଇ ରହିଛି । ୨ ଲକ୍ଷ ୬୫ ହଜାର ୭୨୩ ଲୋକ ଆଜି ସୁଦ୍ଧା ପାଣିଘେରରେ ଅଛନ୍ତି । ବନ୍ୟା ବିପନ୍ନଙ୍କ ପାଇଁ ୩୫୭ଟି ସ୍ଥାନରେ ମାଗଣା ଖାଦ୍ୟ ଯୋଗାଇ ଦିଆଯାଉଛି । ୫୭ ହଜାର ୮୨୪ ଜଣଙ୍କୁ ସହାୟତା ପ୍ରଦାନ କରାଯାଇଛି । ରାଜ୍ୟରେ ବନ୍ୟାଜନିତ ୧୭ ଜଣଙ୍କ ମୃତ୍ୟୁ ହୋଇଛି ଏଯାବତ୍ । ପ୍ରାୟ ୧୦ ହଜାର ୩୮୨ଟି ଘର କ୍ଷତିଗ୍ରସ୍ତ ହୋଇଛି ।
ବନ୍ୟା ପ୍ଲାବିତ ଅଞ୍ଚଳରେ ଲୋକଙ୍କୁ ସ୍ୱାସ୍ଥ୍ୟସେବା ଯୋଗାଇ ଦେବା ପାଇଁ ୪୫ଟି ମେଡିକାଲି ଟିମ୍ ନିୟୋଜିତ ହୋଇଛନ୍ତି । ଗୋପାଳିତ ପଶୁଙ୍କ ଚିକିତ୍ସା ପାଇଁ ନିୟୋଜିତ ହୋଇଛନ୍ତି ୪୨ଟି ଟିମ୍ । ବନ୍ୟା ଯୋଗୁଁ ୧ ଲକ୍ଷ ୬୮ ହଜାର ୯୦୪ ହେକ୍ଟର ଚାଷ କ୍ଷିତଗ୍ରସ୍ତ ହୋଇଛି । ଉଦ୍ଧାର ଓ ରିଲିଫ୍ କାର୍ଯ୍ୟରେ NDRFର ୧୪ଟି ଟିମ୍, ଓଡ୍ରାଫର ୧୭ଟି ଟିମ୍, ଅଗ୍ନିଶମ ବାହିନୀର ୨୨ଟି ଟିମ୍ ନିୟୋଜିତ ଅଛନ୍ତି । ୨୫୪ଟି ବୋଟ୍ ଉଦ୍ଧାର କାର୍ଯ୍ୟରେ ଲାଗିଛି । ୧୧ ଜିଲ୍ଲାର ୧୦୭ଟି ରାସ୍ତା କ୍ଷତିଗ୍ରସ୍ତ ହୋଇଛି । ୫ଟି ଜିଲ୍ଲାର ୩୨ଟି ସ୍ଥାନରେ ଘାଇ ସୃଷ୍ଟି ହୋଇଥିବା ଜଣାପଡ଼ିଛି ।
