ଭୁବନେଶ୍ୱର: ରାଜରାସ୍ତାରେ ବେଧଡକ ଚାଲୁଛି ବେନିୟମ ଯାନବାହାନ । ନମ୍ବର ନାହିଁ କି ପରମିଟ୍‌ ବି ନାହିଁ । ପରିବହନ ନିୟମର ହେଉଛି ଖୋଲାଖୋଲି ଉଲଂଘନ । ସପ୍ତାହକ ମଧ୍ୟରେ ଜବତ ହେଲାଣି ୮ ଯାତ୍ରୀବାହୀ ବସ୍ । କରୋନା କାଳରେ ଚାଲିଛି ବେନିୟମ ବସ୍‌ କାରବାର । ବିନା ପରମିଟ୍‌, ବିନା ଟିକସ ଏପରିକି ବିନା ନମ୍ବରରେ ରାଜରାସ୍ତାରେ ଗଡୁଛି ଯାତ୍ରୀବାହୀ ବସ୍ । ପରିବହନ ବିଭାଗର ସବୁ ନିୟମକୁ କରାଯାଉଛି ଖୋଲାଖୋଲି ଉଲଂଘନ ।

ଏସବୁକୁ ଧରିବାକୁ ଗଠିତ ହୋଇଛି ଜଏଣ୍ଟ ଏନଫୋର୍ସମେଣ୍ଟ ସ୍କ୍ୱାର୍ଡ । ନିୟମିତ ଜାରି ରହିଛି ଚଢଉ । ସପ୍ତାହକ ମଧ୍ୟରେ ଧରାପଡିଲାଣି ୮ଟି ଯାତ୍ରୀବାହୀ ବସ୍‌ । ପୂର୍ବରୁ ୩ଟି ବସ୍‌ ଧରାପଡିଥିବା ବେଳେ ସେମାନଙ୍କ ଠାରୁ ୭ଲକ୍ଷରୁ ଅଧିକ ଟଙ୍କାର ଚାଲାଣ କଟାଯାଇଛି । ଏବେ ପୁଣି ଧରାପଡିଛି ୫ଟି ବସ୍‌ । ଆରଟିଓ-୧ ଦ୍ୱାରା ୩ଟି ଓ ଆରଟିଓ-୨ ଦ୍ୱାରା ଆଉ ୨ଟି ବସ୍‌ ଜବତ ହୋଇଛି । ଟ୍ୟୁରିଷ୍ଟ ପରମିଟ୍‌ରେ ଆନ୍ଧ୍ରରୁ ଓଡିଶା ଯାତାୟତ କରୁଥିବା ବସ୍‌ ସହିତ ରାଜ୍ୟ ଭିତରେ ଚଳାଚଳ କରୁଥିବା ବସ୍‌ ମଧ୍ୟ ଏଥିରେ ସାମିଲ ରହିଛି ।

ସେପଟେ ପରିବହନ ବିଭାଗ ପକ୍ଷରୁ ଜାରି ରହିଥିବା ଚଢଉକୁ ବିଭିନ୍ନ ମହଲରେ ସ୍ୱାଗତ କରାଯାଇଛି । ଏପରିକି ଘରୋଇ ବସ୍‌ ମାଲିକ ସଂଘ ମଧ୍ୟ ଏହି ଚଢଉକୁ ବହୁ ପୂର୍ବରୁ କରିବା ଉଚିତ ଥିଲା ବୋଲି ମତ ଦେଇଛନ୍ତି । ଗାଡିର କାଗଜପତ୍ର ସଠିକ୍‌ ନଥାଇ ଚଳାଚଳ ଦ୍ୱାରା କେବଳ ସରକାରଙ୍କ ରାଜସ୍ୱ ହାନୀ ହେଉଛି ଏହା ନୁହେଁ ବରଂ ଯାତ୍ରୀ ମଧ୍ୟ ଅସୁରକ୍ଷିତ । କେବଳ ଯାତ୍ରୀବାହୀ ବସ୍‌ ନୁହେଁ ବରଂ ମାଲବାହୀ ବା ଭାରୀଜାନ କ୍ଷେତ୍ରରେ ମଧ୍ୟ ଅନୁରୁପ ଅଭିଯୋଗ ରହିଛି ।

ସାଲେପୁର: ଗରିବ ହିତାଧିକାରୀଙ୍କ ପାଇଁ ରହିଛି ଅନେକ ସରକାରୀ ଯୋଜନା । ହେଲେ କିଛି ପ୍ରଶାସନିକ ଅଧିକାରୀଙ୍କ ଅବହେଳେ ଯୋଗୁଁ ଏହା ପ୍ରକୃତ ହିତାଧିକାରୀଙ୍କ ନିକଟରେ ପହଞ୍ଚିପାରୁ ନାହିଁ । ପଞ୍ଚାୟତରୁ ବ୍ଲକ ଦୌଡି ଦୌଡି ନୟାନ୍ତ ହେବା ପରେ ବି ମିଳିନି ଖଣ୍ଡିଏ ଘର । ବାଧ୍ୟ ହୋଇ ଭଙ୍ଗା ଚାଳ ଘରେ ବିତୁଛି ୪ ପ୍ରାଣୀଙ୍କ ଜୀବନ ।

ଦେଖନ୍ତୁ ଏହି ଘରଟିକୁ । ବାଉଁଶ ଓ ମାଟିର କାନ୍ଥ ଉପରେ ଚାଳ ଛପର । ସାମାନ୍ୟ ପବନରେ ସତେଯେମିତି ଉଡ଼ିଯିବ । ଚାଳରେ ସ୍ଥାନେ ସ୍ଥାନେ କଣା । ଏହି ଘରେ ରୁହନ୍ତି ନାରାୟଣ ଜେନାଙ୍କ ୪ ଜଣ ସଦସ୍ୟ । ଗାଁ କୁ ସ୍ୱଚ୍ଛ ଓ ବାହ୍ୟ ମଳମୁତ୍ର ଘୋଷଣା କରି ପ୍ରଶାସନ ମାରିଛି ବୋର୍ଡ । ହେଲେ ଗରୀବ ହିତାଧିକାରୀଙ୍କୁ କିନ୍ତୁ ମିଳୁନି ଅଧିକାର । ଘର ଖଣ୍ଡିଏ ପାଇଁ ପଞ୍ଚାୟତରୁ ବ୍ଲକ ଦୌଡ଼ି ଦୌଡ଼ି ନୟାନ୍ତ ହେଲେଣି । କିନ୍ତୁ ଗରୀବ ନାରାୟଣଙ୍କ କଥା କାହାରି କାନରେ ବାଜୁନି ।

ଇଏ ହେଉଛି କଟକ ଜିଲ୍ଲା ସାଲେପୁର ପାଟଣା ଗାଁର ଦୃଶ୍ୟ । ଦିନମଜୁରିଆ ନାରାୟଣ ବଡ଼ କଷ୍ଟରେ ନିଜ ପରିବାର ଚଳାନ୍ତି । ପୁଅ ଝିଅ କାମ ନପାଇ ଘରେ ବସିଛନ୍ତି । ଘର ଖଣ୍ଡିଏ କରିବାକୁ ସମ୍ବଳ ନଥିବାରୁ ସରକାରୀ ଯୋଜନାରେ ଘର ଖଣ୍ଡିଏ ପାଇଁ ଅନେକଥର ଆବେଦନ କରିଛନ୍ତି । ଏନେଇ ସରପଞ୍ଚ ବି କ୍ୟାମେରା ଆଗରେ କିଛି କହିବାକୁ ନାରାଜ ।

ଗରିବଙ୍କ ପାଇଁ ରହିଛି ଅନେକ ସରକାରୀ ଯୋଜନା । ହେଲେ କିଛି ପ୍ରଶାସନିକ ଅଧିକାରୀଙ୍କ ଅବହେଳାରୁ ଏହା ପ୍ରକୃତ ହିତାଧିକାରୀଙ୍କ ନିକଟରେ ପହଞ୍ଚି ପାରୁନାହିଁ ।

କେନ୍ଦୁଝର: ପୁନର୍ବିନିଯୋଗ ହେବ କଠିନ ବର୍ଜ୍ୟବସ୍ତୁ । ୪୫ ଦିନରେ ପ୍ରସ୍ତୁତ ହେବ କମ୍ପୋଷ୍ଟ । ଖତ ଆକାରରେ ମାର୍କେଟରେ ହେବ ବିକ୍ରି । ଏଣିକି ଏଣେ ତେଣେ ଆଉ ଫୋପାଡ଼ିବାକୁ ପଡ଼ିବ ନାହିଁ ଘରୁ ବାହାରୁ ଥିବା ବର୍ଜ୍ୟବସ୍ତୁ । କାରଣ କେନ୍ଦୁଝର ପୌର ପରିଷଦ ପକ୍ଷରୁ ନିଆଯାଇଛି ଏକ ନିଆରା ପଦକ୍ଷେପ ।

ମୁନିସିପାଲଟିରୁ ଦୈନିକ ବାହାରୁ ଥିବା ଅଳିଆ ଆବର୍ଜନାକୁ ଗୋଟିଏ ସ୍ଥାନରେ ଏକତ୍ର କରିବା ପାଇଁ ଆରମ୍ଭ ହୋଇଛି ବର୍ଜ୍ୟବସ୍ତୁ ପରିଚାଳନା କେନ୍ଦ୍ର । ଆଉ ଏଥିପାଇଁ ୨୦ ମହିଳା ସ୍ବଚ୍ଛ ସାଥୀ ନିୟୋଜିତ ହୋଇଥିବା ବେଳେ ଆବର୍ଜନାକୁ ପଚାଇ ପ୍ରସ୍ତୁତ କରୁଛନ୍ତି କମ୍ପୋଷ୍ଟ ଖତ ।

ସ୍ୱଚ୍ଛ ସାଥୀମାନେ ସଂଗୃହିତ ବର୍ଜ୍ୟବସ୍ତୁକୁ ପ୍ରଥମେ ପୃଥକୀକରଣ କରି ଅଦରକାରୀ ପଦାର୍ଥକୁ ଅଲଗା କରିଥାନ୍ତି । ପରେ ଏଥିରେ ଏକ ତରଳ ପଦାର୍ଥ ମିଶାଇ ୪୫ ଦିନ ଏକ କୁଣ୍ଡରେ ରଖିଥାନ୍ତି । ଏଥିରୁ ଜୀବାଣୁ ମୁକ୍ତ ହେବା ପରେ ଏହା କମ୍ପୋଷ୍ଟରେ ପରିଣତ ହୋଇଥାଏ ।

ଯାହାକୁ କିଲୋଗ୍ରାମ ପ୍ରତି ୨୦ ଟଙ୍କାରେ ବିକ୍ରି କରାଯାଉଛି । ତେବେ ଏହାଦ୍ୱାରା ପୌରପାଳିକା ସ୍ୱଚ୍ଛ ଓ ପରିଷ୍କାର ହେବାରେ ସହାୟକ ହେବା ବୋଲି କହିଛନ୍ତି କେନ୍ଦୁଝର ଜିଲ୍ଲାପାଳ ।

ପୂର୍ବରୁ ଜିଲ୍ଲାରେ ଏଭଳି ବର୍ଜ୍ୟବସ୍ତୁ ପରିଚାଳନା କେନ୍ଦ୍ର ରହିଥିବା ବେଳେ ଏଥିରୁ ପ୍ରସ୍ତୁତ କମ୍ପୋଷ୍ଟକୁ ଏବେ ବଜାରରେ ବିକ୍ରି କରାଯାଉଛି ।