ନୂଆଦିଲ୍ଲୀ: ସମସ୍ତେ ଜୀବନରେ ଚାହାଁନ୍ତି ବଡ଼ କିଛି କରିବାକୁ, ନିଜର ବ୍ୟବସାୟ କରିବାକୁ । ସମସ୍ତଙ୍କ ପାଖେ କିଛି ନା କିଛି ଭିନ୍ନ ଚିନ୍ତାଧାରା ମଧ୍ୟ ଥାଏ । କିନ୍ତୁ, ନୂତନ ଚିନ୍ତାଧାରାରେ କାମ ନକରି ଲୋକ କେବଳ କଥା କୁହନ୍ତି । ତେବେ, ଏମିତି କିଛି କଥା ଯାହା ଆଖିରେ ନ ଦେଖିଲେ ବିଶ୍ୱାସ ହୁଏନି । ଏମିତି ଏକ କାହାଣୀ ହେଉଛି ଇଲାଙ୍କର । ଗୁରୁଗ୍ରାମର ଇଲା ପ୍ରଥମେ ଚାକିରି କରୁଥିଲେ । ପରେ ଚାକିରି ଛାଡ଼ି ଘରୁ ଆରମ୍ଭ କରିଥିଲେ ନିଜର ବ୍ୟବସାୟ । ଏବେ ଏହି ବ୍ୟବସାୟରୁ ଲକ୍ଷେ ଟଙ୍କାରୁ ଅଧିକ ଆୟ କରୁଛନ୍ତି ।
ଇଲା ୱେଲକମ୍ ଗ୍ରୁପ୍ ଗ୍ରାଜୁଏଟ୍ ଅଫ୍ ହୋଟେଲ ଆଡମିନଷ୍ଟ୍ରେସନରୁ ଗ୍ରାଜୁଏସନ୍ କରିଥିଲେ । ୨୦୦୭ ମସିହାରେ ଆରମ୍ଭ କରିଥିଲେ ବ୍ୟବସାୟ । ଘରୁ ପାଉଁରୁଟି ତିଆରି କରି ବିକ୍ରି କରିବା ଆରମ୍ଭ କରିଥିଲେ ।
୫ ହଜାର ଟଙ୍କା ଖଟାଇ ଇଲା ନିଜ ବ୍ୟବସାୟ ଆରମ୍ଭ କରିଥିଲେ । ଆଜିର ଦିନରେ ସେ ବ୍ୟବସାୟରୁ ଦୈନିକ ୧୦ ହଜାର ଟଙ୍କା ଆୟ କରୁଛନ୍ତି । ବେକରିରେ ସେ କେକ୍, ବ୍ରେଡ୍, କୁକିଜ୍, ଚକଲେଟ୍ସ ଭଳି ଖାଦ୍ୟ ସାମଗ୍ରୀ ତିଆରି କରୁଛନ୍ତି । ୪୦ରୁ ଅଧିକ ଖାଦ୍ୟ ପେଟିସ୍, ଷ୍ଟଫଡ୍ ବନ୍ସ, ପିଜ୍ଜା ଓ ଗିଫ୍ଟ ହ୍ୟାମ୍ପର ପୂରା ଏନସିଆରରେ ବିତରଣ କରୁଛନ୍ତି ।
ଗ୍ରାଜୁଏସନ ପରେ କେତେ ବର୍ଷ ଯାଏଁ ହସ୍ପିଟାଲିଟି ଇଣ୍ଡଷ୍ଟ୍ରୀରେ ସେ ଚାକିରି କରିଥିଲେ । ଏହା ପରେ ଦୁଇ ବର୍ଷ ଚେନ୍ନାଇର ଚୋଲ ରୋଟେସନରେ କାମ କରିଥିଲେ । ପରେ କୋଲକାତା ତାଜ ବଙ୍ଗାଳରେ ସେଲ୍ସ ମାର୍କେଟିଂ ଡିଭିଜନରେ ୫ ବର୍ଷ । ପରେ ବାହାଘର ହୋଇ ଯାଇଥିଲା । ସ୍ୱାମୀଙ୍କ ସହ ଗୁରୁଗ୍ରାମ ପଳାଇ ଯାଇଥିଲେ । ପରିବାର ସମ୍ଭାଳିବା ସହ ଅଢ଼େଇ ବର୍ଷ ଯାଏଁ ଛୁଆଙ୍କ ଧ୍ୟାନ ରଖିଥିଲେ ।
ଇଚ୍ଛା ଥିଲା କରିବାକୁ କିଛି ନୂଆ
ସେ ତାଙ୍କର ଜଣେ ସାଙ୍ଗକୁ କିଛି ନୂଆ କରିବାକୁ ଚାହୁଁଥିବା କହିଥିଲେ । ତାପରେ ଆରମ୍ଭ ହୋଇଥିଲା ବେକରି କାମ । କୌଣସି ମେନ୍ୟୁ ତିଆରି ନକରି ନିଜେ କାମ ଆରମ୍ଭ କରିଥିଲେ । ବିଜ୍ଞାପନ ଦେଇଥିଲେ । ଧିରେ ଧିରେ ତାଙ୍କୁ ଜନ୍ମଦିନ ଉତ୍ସବ ପାଇଁ ଅର୍ଡର ମିଳିବା ଆରମ୍ଭ ହୋଇଥିଲା । ସେହି ସମୟରେ ସୋସିଆଲ୍ ମିଡିଆର ଏତେ ବ୍ୟବହାର ନଥିଲା । ତେଣୁ, ତାଙ୍କୁ ବହୁତ ସଂଘର୍ଷ କରିବାକୁ ପଡ଼ିଥିଲା ।
ତେବେ, ସେହି ସମୟରେ ସହରରେ ଭଲ ପେଷ୍ଟ୍ରି ମିଳୁଥିବା ଦୋକାନ ନଥିଲା । ଲୋକଙ୍କୁ ଇଲାଙ୍କ ଚକଲେଟ୍ ଟ୍ରଫଲ ପସନ୍ଦ ଆସିଥିଲା । ଏହା ପରେ ସେ ବେକିଂ କାମ ଆରମ୍ଭ କରିଥିଲେ । ଏହାପରେ ସେ ଖାଦ୍ୟ ମେଳାରେ ଷ୍ଟଲ୍ ଲଗାଇବା ଆରମ୍ଭ କରିଥିଲେ । ଲୋକ ଜାଣିଲେ, ସୋସିଆଲ୍ ମିଡିଆ ମଧ୍ୟ ଆସିଥିଲା । ବ୍ୟବସାୟ ବଢ଼ିବା ସହ ଘରୁ ବେକରି ଆରମ୍ଭ କରିଥିଲେ । କାରଣ ଏହାଦ୍ୱାରା ସେ ତାଙ୍କୁ ଛୁଆଙ୍କୁ ସମୟ ଦେଇ ପାରୁଥିଲେ । ଏଥିରେ ତାଙ୍କୁ ସହଯୋଗ କରିଥିଲେ ତାଙ୍କ ସ୍ୱାମୀ । ସେ ନିଜ ଡେଲିଭରି ଦେବାକୁ ଯାଉଥିଲେ । ଫଳରେ ବ୍ୟବସାୟ ବଢ଼ିବା ସହ ଆୟ ବଢ଼ିଥିଲା ।
