କୋରାପୁଟ: ଧାନ କ୍ଷେତରେ ମନ୍ତ୍ରୀ ପଦ୍ମିନୀ ଦିଆନ । ହାତରେ ଦାଆ ଧରି କେଣ୍ଡା କେଣ୍ଡା ଧାନ କାଟି ଚାଲିଛନ୍ତି ପଦ୍ମିନୀ । ମନ୍ତ୍ରୀଙ୍କ ଏହି ଭିଡ଼ିଓ ଏବେ ଭାଇରଲ ହେବାରେ ଲାଗିଛି । ନିଜ ନିର୍ବାଚନ ମଣ୍ଡଳୀ କୋଟପାଡ଼ର ଢ଼ାମନାହାଣ୍ଡିରେ ପଦ୍ମିନୀକ୍ଷେତରୁ ଧାନ କାଟୁଥିବା ବେଳେ ତାଙ୍କ ସହିତ ଅନ୍ୟ ଶ୍ରମିକ ମଧ୍ୟ କାମ କରୁଥିବା ଏହି ଭିଡ଼ିଓରେ ଦେଖିବାକୁ ମିଳିଛି ।
ପୂର୍ବରୁ ବିଧାୟକ ନିତ୍ୟାନନ୍ଦ ଗଣ୍ଡ, ରଘୁରାମ ପଢାଲ, ମନୋହର ରନ୍ଧାରୀ, ପ୍ରୀତମ ପାଢ଼ୀ ମଧ୍ୟ ଚାଷ ଜମିରେ କାମ କରୁଥିବା ଦେଖିବାକୁ ମିଳିଥିଲା ।
୩ ବର୍ଷରୁ କମ ବୟସର ଶିଶୁଙ୍କ ପାଇଁ ‘ବାତ୍ସଲ୍ୟ’ ଅଭିଯାନର ଆରମ୍ଭ କରାଯାଇଛି । ଆଦ୍ୟ ଶୈଶବର ବିକାଶକୁ ତ୍ୱରାନ୍ୱିତ କରିବା କ୍ଷେତ୍ରରେ ଦେଶର ଅଗ୍ରଣୀ ରାଜ୍ୟ ଭାବେ ଓଡ଼ିଶା ଏହି ଅଭିଯାନର ଆରମ୍ଭ କରିଛି । ଅଙ୍ଗନବାଡ଼ିର ସେବା ସମୂହରେ ତିନି ବର୍ଷ ବୟସରୁ ଛୋଟ ଶିଶୁଙ୍କ ପାଇଁ ମୁଖ୍ୟତଃ ପରିପୂରକ ପୁଷ୍ଟିସାଧନ , ଟୀକାକରଣ ଓ ସ୍ୱାସ୍ଥ୍ୟ ପରୀକ୍ଷା ଆଦି କାର୍ଯ୍ୟକ୍ରମକୁ ଅଧିକ ଗୁରୁତ୍ୱ ଦିଆଯାବ। ବାତ୍ସଲ୍ୟ’ ଅଭିଯାନରେ ପୁଷ୍ଟି ଓ ସ୍ୱାସ୍ଥ୍ୟ ସେବା ସହିତ ଶିଶୁର ମସ୍ତିଷ୍କର ବିକାଶ ଉପରେ ସୂଚନା ଦିଆଯିବ। ଭର୍ଚୁଆଲ୍ ମୋଡ୍ରେ ଅନୁଷ୍ଠିତ କାର୍ଯ୍ୟକ୍ରମରେ ‘ବାତ୍ସଲ୍ୟ’ ଅଭିଯାନର ଲୋକାର୍ପଣ କରିଛନ୍ତି ବିଭାଗୀୟ ମନ୍ତ୍ରୀ ଟୁକୁନି ସାହୁ ।
ଏ ଅବସରରେ ଡିଜିଟାଲ୍ ମାଧ୍ୟମରେ ଶିଶୁମାନଙ୍କ ପାଇଁ କୁନି କାଲେଣ୍ଡର, ମାତୃଭାଷାଭିତ୍ତିକ ୧୧ଟି ପୋଷ୍ଟର, ଓଡ଼ିଆ ଭାଷାରେ ପ୍ୟରେଣ୍ଟସ୍ ପ୍ଲସ୍ ମଡୁ୍ୟଲ୍, ସୁଖଦ ଲାଳନପାଳନ ସଂପର୍କିତ ଫ୍ଲିପ୍ ବୁକ୍, ପ୍ରାକ୍ଶୈଶବ ଉଦ୍ଦୀପନା ସଂପର୍କିତ ଭିଡ଼ିଓ ଚିତ୍ର ସମ୍ବଳିତ ‘ବାତ୍ସଲ୍ୟ’ ପ୍ୟାକେଜ୍ ଉନ୍ମୋଚନ କରିଥିଲେ ମନ୍ତ୍ରୀ । ପ୍ରତି ମାସର ୧୯ ତାରିଖରେ ଅଙ୍ଗନବାଡ଼ି ଶିଶୁଙ୍କ ପାଇଁ ଅଙ୍କୁର ଦିବସ ପାଳନ, ମାତୃଭାଷାଭିତ୍ତିକ ପ୍ରାକ୍ଶିକ୍ଷା କାର୍ଯ୍ୟକ୍ରମ ବେଶ୍ ସଫଳ ହୋଇଥିବାବେଳେ ‘ବାତ୍ସଲ୍ୟ’ ଅଭିଯାନ ଦୀର୍ଘସ୍ଥାୟୀ ଏବଂ ଫଳପ୍ରଦ ହେବ ବୋଲି ଆଶା ରଖାଯାଇଛି ।
ନୂଆଦିଲ୍ଲୀ: ଦିଲ୍ଲୀରେ ତବଲିଗି ଜମାତ ପ୍ରସଙ୍ଗରେ ମିଡିଆ ରିପୋର୍ଟିଂକୁ ନେଇ କେନ୍ଦ୍ର ଉପରେ ବର୍ଷିଲେ ସୁପ୍ରିମକୋର୍ଟ । ମାମଲାରେ କେନ୍ଦ୍ର ସରକାର ଦାଖଲ କରିଥିବା ସତ୍ୟପାଠ ଉପରେ ଅସନ୍ତୁଷ୍ଟ ହୋଇଛନ୍ତି ସୁପ୍ରିମକୋର୍ଟ । ତବଲିଗି ଜମାତକୁ ନେଇ ପ୍ରସାରଣ ହୋଇଥିବା ଭଳି ଖବର ଉପରେ ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର କଣ ବ୍ୟବସ୍ଥା କରିଛନ୍ତି ତାହା ଉଲ୍ଲେଖ କରିବାକୁ କହିଛନ୍ତି ସୁପ୍ରିମକୋର୍ଟ । ଯଦି ସେମିତି କିଛି ବ୍ୟବସ୍ଥା ନାହିଁ ତାହେଲେ ତୁରନ୍ତ କରିବାକୁ ପରାମର୍ଶ ଦେଇଛନ୍ତି ।
କରୋନା ମହାମାରୀ ସମୟରେ ତବଲିଗି ଜମାତକୁ ନେଇ ପ୍ରସାରଣ ହୋଇଥିବା ଖବର ଉପରେ ସୁପ୍ରିମକୋର୍ଟ ଆପତ୍ତି ଜଣାଇଛନ୍ତି । ଟିଭିରେ ପ୍ରସାରଣ ହେଉଥିବା ଏଭଳି ଖବର ଉପରେ ନଜର ରଖିବା ପାଇଁ କେନ୍ଦ୍ରକୁ ସୁପ୍ରିମକୋର୍ଟ କହିଛନ୍ତି । ଏଭଳି କାର୍ଯ୍ୟକ୍ରମ ଫେକ ନ୍ୟୁଜ ବା ମିଥ୍ୟା ଖବର ପ୍ରସାରଣ ପାଇଁ ମଧ୍ୟ ପ୍ରୋତ୍ସାହନ ଦେଉଛି ।
ଦିଲ୍ଲୀରେ ତବଲିଗି ଜମାତରେ ସମାଗମ ପରେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବଢିଥିବା ନେଇ ଗତ ଏପ୍ରିଲ ଅନେକ ଗଣମାଧ୍ୟମ ଖବର ପ୍ରସାରଣ କରିଥିଲେ । ଏହାଦ୍ବାରା ଦେଶରେ ଗୋଟିଏ ବିଶେଷ ଧର୍ମ ପ୍ରତି ଲୋକଙ୍କ ଆଭିମୁଖ୍ୟରେ ପରିବର୍ତ୍ତନ ଆସିଥିଲା । ଏହାକୁ ନେଇ ସୁପ୍ରିମକୋର୍ଟରେ ମାମଲା ରୁଜୁ ହୋଇଥିଲା । ଏହାର ଶୁଣାଣି ବେଳେ କେନ୍ଦ୍ର ଉପରେ ପ୍ରବଳ ବର୍ଷିଛନ୍ତି ସୁପ୍ରିମକୋର୍ଟ ।
ଭୁବନେଶ୍ୱର: ସ୍ୱତନ୍ତ୍ର ସଂକ୍ଷିପ୍ତ ଭୋଟର ତାଲିକା ସଂଶୋଧନ ହେବା ନେଇ ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ । ଏନେଇ ଜିଲ୍ଲାପାଳମାନଙ୍କ ସହ ଲୋହାନୀଙ୍କର ଆଲୋଚନା ଶେଷ ହୋଇଛି । ଜାନୁଆରୀ ୧ ସୁଦ୍ଧା ୧୮ ବର୍ଷ ହୋଇଥିବା ସାବାଳକମାନଙ୍କୁ ପଞ୍ଜୀକୃତ କରିବା ପାଇଁ ସବୁ ପ୍ରକାର ପ୍ରସ୍ତୁତି ଚାଲିଛି । ଏହି ନୂଆ ଭୋଟରମାନେ ଆଗାମୀ ନିର୍ବାଚନରେ ଭୋଟ୍ ଦେଇପାରିବେ ।
ତେବେ ପଞ୍ଜୀକୃତ ହେବା ପାଇଁ ସାବାଳକମାନଙ୍କୁ ବୁଥ୍ ଶ୍ରେଣୀୟ ଅଧିକାରୀଙ୍କଠାରୁ ୬ ନମ୍ୱର ଫର୍ମ ନେଇ ଆବେଦନ କରିପାରିବେ । ସେହିଭଳି ଭୋଟ ପରିଚୟ ପତ୍ରରେ ତ୍ରୁଟି ଥିଲେ ସଂଶୋଧନ କରିପାରିବେ । ଏଥିପାଇଁ ଫର୍ମ ନମ୍ୱର ୮ର ଆବଶ୍ୟକ ହେବ । ସେହିଭଳି ୭ ନମ୍ୱର ଫର୍ମ ସହାୟତାରେ ଭୋଟର ତାଲିକାରୁ ନାମ ହଟାଇପାରିବେ । ତେବେ ଏହି ସମ୍ପୂର୍ଣ୍ଣ କାର୍ଯ୍ୟକ୍ରମ ପାଇଁ ଏକ ସ୍ୱତନ୍ତ୍ର ଅଭିଯାନ ଦିବସମାନ ଚୟନ ହୋଇଛି ।
ଚଳିତ ମାସର ୨୮, ୨୯ ଓ ଡିସେମ୍ୱର ୫ ଓ୬କୁ ଅଭିଯାନ ଦିବସ ଭାବେ ଗ୍ରହଣ କରାଯାଇଛି । ଅଭିଯାନ ଦିବସରେ ବୁଥସ୍ତରୀୟ ଅଧିକାରୀ ଓ କର୍ମଚାରୀ ଉପସ୍ଥିତ ରହିବେ । ସଂଶୋଧନ ପାଇଁ www. Nvsp.inରେ ମଧ୍ୟ ଲଗ୍ ଇନ୍ କରିପାରିବେ । ତେବେ ଜାନୁଆରୀ ୫ ତାରିଖ ମଧ୍ୟରେ ସଂଶୋଧନ କରିବାକୁ ପଡ଼ିବ । ଜାନୁଆରୀ ୧୫ରେ ସଂଶୋଧିତ ଭୋଟର ତାଲିକା ପ୍ରକାଶ ପାଇବ ।
ଭୁବନେଶ୍ୱର : ୧୭ ଦିନ ହେଲା ସାରୁଅ ଷ୍ଟୁଡିଓ ଆଗରେ ଠିକା କର୍ମଚାରୀଙ୍କ ଧାରଣା ଚାଲିଛି । ୩ ଜଣଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ସେମାନଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା। ଏବେ ବି ଜଣେ ଏମ୍ସରେ ଚିକିତ୍ସାଧୀନ ଅଛନ୍ତି । ସାରୁଅରୁ ରାଜଭବନ ପର୍ଯ୍ୟନ୍ତ ଆନ୍ଦୋଳନ ପହଂଚିଥିଲେ ମଧ୍ୟ ବିବାଦ ତୁଟିନାହିଁ । ଓଟିଭି କର୍ତ୍ତୃପକ୍ଷ ଧାରଣାସ୍ଥଳକୁ ଆସୁନାହାନ୍ତି କି ସରକାରଙ୍କ ଶ୍ରମ ବିଭାଗ ସହ ଆଲୋଚନା କରୁନାହାନ୍ତି । ଶ୍ରମ ବିଭାଗ ପକ୍ଷରୁ ନୋଟିସ ପାଇବା ପରେ ବି ଓଡିଶା ଇନ୍ଫ୍ରାଟେକ କର୍ତ୍ତୃପକ୍ଷ ସମୟ ଗଡାଇ ଚାଲିଛନ୍ତି। ସେପଟେ ଦାବି ପୂରଣ ନହେବା ପର୍ଯ୍ୟନ୍ତ ଧାରଣାରୁ ଉଠିବେ ନାହିଁ ବୋଲି କର୍ମଚାରୀ କହିଛନ୍ତି । ଆଗାମୀ ୧୮ ତାରିଖରେ ଶ୍ରମବିଭାଗ ଆଲୋଚନା ପାଇଁ ପୁଣି ନୋଟିସ କରିଛି ।
ଭୁବନେଶ୍ୱର: ସାରୁଅସ୍ଥିତ ଓଟିଭି ଷ୍ଟୁଡିଓ ମ୍ୟାନେଜର ଅନିରୁଦ୍ଧ ପଣ୍ଡାଙ୍କୁ ସର୍ତ୍ତମୂଳକ ଜାମିନ । ଜାମିନ ଆବେଦନର ଶୁଣାଣି କରି ସର୍ତ୍ତମୂଳକ ଜାମିନ ପ୍ରଦାନ କରିଛି ଅତିରିକ୍ତ ଜିଲ୍ଲା ଦୌରାଜଜ୍ କୋର୍ଟ । ୨୫ ହଜାର ବଣ୍ଡ ଓ ଦୁଇ ଜଣ ଜାମିନଦାରଙ୍କ ମୁଚାଲିକାରେ ଜାମିନ ମିଳିଛି । ଗତ ୧୦ତାରିଖରେ ଅନିରୁଦ୍ଧଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା । ତେବେ ସେହିଦିନ ସଂଧ୍ୟାରେ ତାଙ୍କୁ ଜାମିନ ମିଳିଥିଲା । ଦୁଇଟି ମାମଲାରେ ସହଯୋଗ କରିନଥିବା ସହ ତାଙ୍କ ବିରୋଧରେ ଆସିଥିବା ଅଭିଯୋଗରେ ତଥ୍ୟ ଓ ପ୍ରମାଣ ପାଇ ପୋଲିସ ତାଙ୍କୁ ଗିରଫ କରିଥିଲା। ତାଙ୍କୁ ୭ ଦିନ ପାଇଁ ମଧ୍ୟବର୍ତ୍ତି କାଳୀନ ଜାମିନ ମିଳିଥିଲା। ଯାହା ଆଜି ସରିଥିବାବେଳେ ପୁଣି ଜାମିନ ଆବେଦନର ଶୁଣାଣି ଥିଲା । ଯାହାର ଶୁଣାଣି ଶେଷ କରି ରାୟ ପ୍ରକାଶ କରିନାହାନ୍ତି କୋର୍ଟ ।
ନୂଆଦିଲ୍ଲୀ: ତାମିଲନାଡୁର ଘରୋଇ ଲକ୍ଷ୍ମୀ ଭିଲାସ ବ୍ୟାଙ୍କରୁ ଟଙ୍କା ଉଠାଣ ପ୍ରକ୍ରିୟାର ସୀମା ନିର୍ଧାରଣ କରିଛନ୍ତି କେନ୍ଦ୍ର ସରକାର । ଗ୍ରାହକମାନେ ବର୍ତ୍ତମାନ ଡିସେମ୍ବର ୧୬ ତାରିଖ ପର୍ଯ୍ୟନ୍ତ ବ୍ୟାଙ୍କରୁ ପ୍ରତିଦିନ ସର୍ବାଧିକ ୨୫ ହଜାର ଟଙ୍କା ଉଠାଇବା ପାଇଁ ସକ୍ଷମ ହେବେ । ଅର୍ଥ ମନ୍ତ୍ରଣାଳୟର ଏକ ବିବୃତ୍ତିରେ ଏହି ସୂଚନା ଦିଆଯାଇଛି । ଅର୍ଥ ମନ୍ତ୍ରଣାଳୟ ଅନୁଯାୟୀ, ଚିକିତ୍ସା, ଉଚ୍ଚଶିକ୍ଷା ତଥା ବିବାହ ଇତ୍ୟାଦି ପାଇଁ ଜମାକାରୀ କେତେକ ସର୍ତ୍ତ ପାଇଁ ରିଜର୍ଭ ବ୍ୟାଙ୍କର ଅନୁମତି କ୍ରମେ ୨୫,୦୦୦ ରୁ ଅଧିକ ଟଙ୍କା ଉଠାଇ ପାରିବେ । ପୂର୍ବରୁ ଆରବିଆଇ YES ବ୍ୟାଙ୍କ ଏବଂ ପିଏମସି ବ୍ୟାଙ୍କ ସହିତ ସମାନ ପଦକ୍ଷେପ ନେଇଥିଲା । ଏହି କାରଣରୁ ଗ୍ରାହକଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା ।
ଅର୍ଥ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ନିର୍ଦ୍ଦେଶ ଅନୁଯାୟୀ ଲକ୍ଷ୍ମୀ ଭିଲାସ ବ୍ୟାଙ୍କ ଉପରେ ଏକ ମାସର ମୋରାଟୋରିୟମ ଲାଗୁ କରାଯାଇଛି । ଏହା ୧୭ ନଭେମ୍ବରରୁ ୧୬ ଡିସେମ୍ବର ପର୍ଯ୍ୟନ୍ତ କାର୍ଯ୍ୟକାରୀ ରହିବ । ଆରବିଆଇ ଆକ୍ଟର ଧାରା ୪୫ ଅନୁଯାୟୀ ଏହି ଆଦେଶ ଅଣାଯାଇଛି ।
୨୦୧୯ ମାର୍ଚ୍ଚ ୩୧ ରେ PCA ଥ୍ରେସହୋଲ୍ଡର ଉଲ୍ଲଂଘନ ପରେ ବ୍ୟାଙ୍କକୁ ସେପ୍ଟେମ୍ବର ୨୦୧୯ ରେ ପ୍ରମ୍ପ୍ଟ ସଂଶୋଧନ ଆକ୍ସନ୍ (PCA) ଫ୍ରେମଓ୍ୱାର୍କରେ ରଖାଯାଇଥିଲା । ସେପ୍ଟେମ୍ବର ୩୦ ଶେଷ ହୋଇଥିବା ତ୍ରୟମାସିକ ପାଇଁ ବ୍ୟାଙ୍କରେ ୩୯୬.୯୯ କୋଟି ଟଙ୍କାର ସୁଦ୍ଧ କ୍ଷତି ହୋଇଥିଲା । ଯାହା ଅଣ-ପ୍ରଦର୍ଶନ ସମ୍ପତ୍ତିର ୨୪.୪୫ ପ୍ରତିଶତ ଅଟେ । ଗତ ବର୍ଷ ସମାନ ତ୍ରୟମାସରେ LVB ୩୫୭.୧୭ କୋଟି ଟଙ୍କା କ୍ଷତି ରେକର୍ଡ କରିଛି ।
ତେବେ ଲକ୍ଷ୍ମୀ ଭିଲାସ ବ୍ୟାଙ୍କ ପାଇଁ ଅସୁବିଧା ୨୦୧୯ରେ ଆରମ୍ଭ ହୋଇଥିଲା । ଯେତେବେଳେ ରିଜର୍ଭ ବ୍ୟାଙ୍କ ଇଣ୍ଡିଆ ବୁଲ୍ସ ହାଉସିଂ ଫାଇନାନ୍ସ ସହିତ ମିଶ୍ରଣ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲା । ସେପ୍ଟେମ୍ବରରେ ଅଂଶୀଦାରମାନଙ୍କ ତରଫରୁ ୭ ଜଣ ନିର୍ଦ୍ଦେଶକଙ୍କ ବିରୋଧରେ ଭୋଟ୍ ଦେବା ପରେ ରିଜର୍ଭ ବ୍ୟାଙ୍କ ମିତା ମାଖାନଙ୍କ ନେତୃତ୍ୱରେ ଏକ ତିନିଜଣିଆ କମିଟି ଗଠନ କରି ନଗଦ ଅର୍ଥରେ ଥିବା ଘରୋଇ ବ୍ୟାଙ୍କ ଚଳାଇବାକୁ କହିଥିଲେ । ନିକଟରେ YES ବ୍ୟାଙ୍କ ଅଧିକ କ୍ଷତି ସହୁଥିବା ସମୟରେ ଆରବିଆଇ ଏବଂ ସରକାର ମିଳିତ ଭାବରେ ଏହାକୁ ରକ୍ଷା କରିଥିଲେ । ଆଉ ଏବେ ଲକ୍ଷ୍ମୀ ଭିଲାସ ବ୍ୟାଙ୍କର ନମ୍ବର ଆସିଛି ।
ପୁରୀ: ଶ୍ରୀଜଗନ୍ନାଥଙ୍କୁ ଦେଖିବାକୁ ବ୍ୟାକୁଳ ଥିବା ଭକ୍ତଙ୍କୁ, ଆଉ ମାତ୍ର କିଛିଦିନ ଅପେକ୍ଷା କରିବାକୁ ପଡ଼ିବ । କାରଣ ଡିସେମ୍ବର ତୃତୀୟ ସପ୍ତାହରେ ଖୋଲିପାରେ ଶ୍ରୀମନ୍ଦିର । ଆସନ୍ତା ୩୦ ଦିନ ମଧ୍ୟରେ ଏ ସଂପର୍କରେ ଚୂଡାନ୍ତ ନିଷ୍ପତ୍ତି ନେବ ପ୍ରଶାସନ । ଏଥିପାଇଁ ଗଜପତି ମହାରାଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଆଲୋଚନା ହୋଇଛି । ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ନେତୃତ୍ୱରେ ଜିଲ୍ଲାପାଳ ଓ ଏସପିଙ୍କୁ ନେଇ ଏକ କମିଟି ଗଠନ କରାଯାଇ ଛତିଶା ନିଯୋଗ ସହିତ ଆଲୋଚନା ହେବ । ଏହାପରେ ଦର୍ଶନ ବ୍ୟବସ୍ଥା ସଂପର୍କିତ ଗାଇଡଲାଇନ୍ ଜାରି କରିବାକୁ ନିଷ୍ପତ୍ତି ହୋଇଛି ।
ଏହାସହିତ ଚଳିତ ଆର୍ଥିକ ବର୍ଷ ପାଇଁ ମନ୍ଦିରର ଆୟବ୍ୟୟ ବାବଦକୁ ୧୫୪ କୋଟିର ବଜେଟ ପାରିତ ହୋଇଛି । କରୋନା କାରଣରୁ ଖର୍ଚ୍ଚ ବୃଦ୍ଧି ହୋଇଥିବା ବେଳେ ଆୟ କମ୍ ରହିଛି । ପାଣ୍ଠି ବୃଦ୍ଧି କରିବାକୁ ଅନଲାଇନ୍ ଡୋନେସନ୍ କାର୍ଯ୍ୟକ୍ରମ ଆରମ୍ଭ କରିବାକୁ ନିଷ୍ପତ୍ତି ହୋଇଛି । ଐତିହ୍ୟ କରିଡର ନିର୍ମାଣ ନେଇ ଅଧିକୃତ ହୋଇଥିବା ଜମି ଶ୍ରୀମନ୍ଦିର ଖାତାକୁ ଆସିଥିବାରୁ ସରକାରଙ୍କ ପଦକ୍ଷେପକୁ ସ୍ୱାଗତ କରାଯିବା ସହ ପରିଚାଳନା କମିଟି ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦିଆଯାଇଛି । ଆସନ୍ତା ୧୯ ତାରିଖ ଦିନ ରୂପା କବାଟ ଡିଜାଇନ ଫାଇନାଲ ପାଇଁ ୨୦ ଜଣିଆ କମିଟି ନିଷ୍ପତ୍ତି ନେବ ।
ପ୍ରାଥମିକ ସ୍ତରରେ ଆଠଟି ଦ୍ୱାର ନିର୍ମାଣ ପାଇଁ କାର୍ଯ୍ୟ ଆରମ୍ଭ ହେବ । ୨୭ତାରିଖରେ ମହାପ୍ରଭୁଙ୍କ ନାଗାର୍ଜୁନ ବେଶକୁ ଶୃଙ୍ଖଳିତ ଭାବେ ସମାପନ କରିବା ଉପରେ ମଧ୍ୟ ଆଲୋଚନା ହୋଇଥିଲା । ଆଗାମୀ ଶନିବାର ଏନେଇ ଅଧିକ ଆଲୋଚନା ହେବ । ସେବାୟତ କଲ୍ୟାଣ ନେଇ କରୋନା ସମୟରେ ୪ ଥର ସହାୟତା ରାଶି ଯୋଗାଇ ଦିଆଯାଇଥିବା ବେଳେ ପଞ୍ଚମ ଥର ଦିଆଯିବା ପାଇଁ ନିଷ୍ପତି ଉପରେ ଆଜି ବୈଠକରେ ମଧ୍ୟ ଆଲୋଚନା କରାଯାଇଛି
ନୂଆଦିଲ୍ଲୀ: ଜୁନିଅର ଇଞ୍ଜିନିୟରଙ୍କର ପର୍ଣ୍ଣ ସାଇଡରୁ ଟଙ୍କା ଇନକମର ନିଶା । ପର୍ଣ୍ଣ ସାଇଡରେ ଭିଡିଓ ଏବଂ ଫଟୋ ଅପଲୋଡ କରି କରୁଥିଲେ ପୁଳା ପୁଳା ଟଙ୍କା ଇନକମ୍ । ପ୍ରଥମେ ନାବାଳିକାଙ୍କୁ ଦୁଷ୍କର୍ମ କରୁଥିଲେ ପରେ ଭିଡିଓ ଏବଂ ଫଟୋ ଉଠାଇ କରୁଥିଲେ ଅପଲୋଡ । ଜଣେ ନୁହେଁ କି ଦୁଇଜଣ ନୁହେଁ । ୫୦ରୁ ଅଧିକ ନାବାଳିକାଙ୍କ ସାଙ୍ଗରେ କରିଥିଲେ ଏମିତିକା ଘୃଣ୍ୟ କାମ । ୧୦ ବର୍ଷ ଧରି ଚଳାଇଲେ କଳଙ୍କିତ ସାମ୍ରାଜ୍ୟକୁ । ଘଟଣାଟି ପଦାକୁ ଆସିବା ପରେ ଜଣା ପଡ଼ିଥିଲା ଇଞ୍ଜିନିୟର ବାବୁଙ୍କର ପର୍ଣ୍ଣ ସାଇଡର ଉଛୁଳା ପ୍ରେମ ବିଷୟରେ । ଏମିତି ଏକ ଘଟଣା ଉତ୍ତରପ୍ରଦେଶରେ ଦେଖିବାକୁ ମିଳିଛି ।
ଉତ୍ତରପ୍ରଦେଶର ଜଳସେଚନ ବିଭାଗରେ କାର୍ଯ୍ୟ କରୁଥିବା ଜଣେ ଜୁନିୟର ଇଞ୍ଜିନିୟରଙ୍କୁ ସିବିଆଇ ଗିରଫ କରିଛି । ମଙ୍ଗଳବାର ଅଧିକାରୀମାନେ ଏହି ବିଷୟରେ ସୂଚନା ଦେଇଛନ୍ତି । ଅଧିକାରୀମାନେ କହିଛନ୍ତି ଯେ ଜେ ୧୦ ବର୍ଷ ଧରି ପିଲାମାନଙ୍କୁ ଯୌନ ଶୋଷଣ କରୁଥିବା ଅଭିଯୋଗ ହୋଇଥିଲା । କେବଳ ଏତିକି ନୁହେଁ, ଅଭିଯୁକ୍ତ ଏହି ଘୃଣ୍ୟ କାର୍ଯ୍ୟର ଭିଡିଓ କରି ଭିଡିଓ ଗୁଡ଼ିକୁ ଦୁନିଆରେ ଚାଲୁଥିବା ପର୍ଣ୍ଣ ସାଇଟରେ ବିକ୍ରି କରିଥିଲେ ।
ଅଧିକାରୀ କହିଛନ୍ତି ଯେ ଏହି ଘୃଣ୍ୟ କାର୍ଯ୍ୟର ଅଭିଯୁକ୍ତ ଇଞ୍ଜିନିୟର ପ୍ରାୟ ୫୦ ପିଲାଙ୍କୁ ଶୋଷଣ କରିଥିଲେ । ଏହି ପିଲାମାନଙ୍କର ବୟସ ୫ ରୁ ୧୬ ବର୍ଷ ମଧ୍ୟରେ ହେବ । ପୀଡ଼ିତ ନାବାଳିକା ମାନେ ହେଉଛନ୍ତି ବାନ୍ଦା, ଚିତ୍ରକୁଟ ଏବଂ ହମିରପୁରର । ଅଭିଯୁକ୍ତକୁ ଗିରଫ କରାଯାଇ ଅଧିକ ପଚରାଉଚରା କରୁଛି ପୋଲିସ ।
ସେପଟେ ସିବିଆଇ ସର୍ଚ୍ଚ ଅପରେସନ୍ ସମୟରେ ଆଠଟି ମୋବାଇଲ୍ ଫୋନ୍, ଆଠ ଲକ୍ଷ ନଗଦ ଟଙ୍କା , ସେକ୍ସ ଟଏ, ଲାପଟପ୍ ତଥା ଅନ୍ୟାନ୍ୟ ଡିଜିଟାଲ୍ ପ୍ରମାଣ ମିଳିଛି ।
ଗାଈ ବନ୍ଧାକୁ କେନ୍ଦ୍ରକରି ମହିଳାଙ୍କୁ ନିସ୍ତୁକ ମାଡ଼ । ଅତ୍ୟାଚାରର ସୀମା ସରହଦ ଟପି ଖୋର୍ଦ୍ଧାରେ ଘଟିଛି ଏଭଳି ଘଟଣା । ଖୋର୍ଦ୍ଧା ବୋଲଗଡ଼ ବ୍ଲକ୍ କଡ଼ବ ଗାଁର ମିନିକା ବଳବନ୍ତରାୟ ଓ ତାଙ୍କ ପଡ଼ୋଶୀଙ୍କ ଘର ମଧ୍ୟରେ ରାସ୍ତାରେ ଗାଈ ବନ୍ଧାକୁ ନେଇ ବିବାଦ ଉପୁଜିଥିଲା । ମିନିକା ନିଜ ଗାଈକୁ ରାସ୍ତା ବାନ୍ଧିଥିବା ହେତୁ ପଡୋଶୀ ଏନେଇ ତାଙ୍କୁ ତାଗିଦ୍ କରି ଆସୁଥିଲେ । ତେବେ ସେ ପଡୋଶୀଙ୍କ କଥାକୁ ଭ୍ରୁକ୍ଷେପ ନକରିବା ହେତୁ ଏହି ଗଣ୍ଡଗୋଳ ହୋଇଥିଲା ।
ଘଟଣା ଅନୁଯାୟୀ, ହଠାତ କିଛି ଲୋକ ଆସି ମିନିକାଙ୍କୁ ଆକ୍ରମଣ କରିଥିଲେ । ଏତିକିରେ ଆକ୍ରମଣକାରୀଙ୍କ ମନ ମାନି ନଥିଲା । ସେମାନେ ମିନିକାଙ୍କ ଘର ପୋଡ଼ି ଦେଇଥିବା ଅଭିଯୋଗ ହୋଇଛି । ବେଗୁନିଆ ଥାନରେ ଏତଲା ପରେ ଦୁଇଜଣଙ୍କୁ ଗିରଫ କରିଛି ପୋଲିସ ।
