ଗଞ୍ଜାମ: ମାଆ ପାଇଁ ମରିଗଲା ମମତା । ମାସ ପୁରିଯିବାରୁ ଘରେ ରଖିଲାନି ପୁଅ । ମାସ ପୁରିବା ପରେ ମାଆକୁ କିଏ ରଖିବ । ଯୋଡ଼ା ଆଶ୍ୱିନ ଯୋଗୁ ଛିଣ୍ଡିଲାନି ଭାଗବଣ୍ଟା । ଆଉ ଏଥିପାଇଁ ଜନ୍ମ କଲା ମାଆକୁ  ଜୀବନର ଅପରାହ୍ନରେ ସାହା ହେଲେନି ପୁଅ । ଘରୁ ବାହାର କରିଦେବା ପରେ ରାସ୍ତାରେ ରାତି କାଟିଲେ ୮୦ ବର୍ଷୀୟ ବୃଦ୍ଧା । ଏଭଳି ହୃଦୟ ବିଦାରକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ତୁମ୍ବା ଗାଁରେ ।

ନିସ୍ତେଜ ଆଖି ନରମିଲା ସ୍ୱର । କଥା କହିବାକୁ ଜୁ ବି ନାହିଁ । ରାସ୍ତା ମଝିରେ ଅସହାୟ ଅବସ୍ଥାରେ ବସିଥିବା ଏହି ବୁଢ଼ୀମାଆଙ୍କ ବୟସ ୮୦ । ଭଗବାନଙ୍କୁ ପ୍ରାର୍ଥନା କରି ଚାରି ପୁଅଙ୍କୁ ପାଇଥିଲା ମାଆ । ଦିନେ ପୁଅଙ୍କୁ ମଣିଷ କରିବାକୁ ଏ ମାଆ ଭୋକରେ ରହୁଥିଲା । ନିଜ ପେଟରେ ଓଦାକନା ପକାଇ ପୁଅ ମାନଙ୍କ ପେଟ ଭରୁଥିଲା । ହେଲେ ଆଜି ପୁଅ ମାନେ ଛାଡ଼ି ଦେଇଛନ୍ତି ଭୋକିଲା । ମାସ ପୁରିଗଲା, ହେଲେ ପାଳି ଛିଣ୍ଡିଲାନି । ଯୋଡା ଆଶ୍ୱିନ ମାସ ପଡିଥିବାରୁ ଘରୁ କାଢ଼ି ଦେଲେ । ଫଳରେ ଉପାୟ ନପାଇ ରାସ୍ତାରେ ରାତି କାଟିଲେ ବୁଢ଼ୀ ମାଆ ।

ଚାରି ପୁଅ ମଧ୍ୟରୁ ଦୁଇ ପୁଅଙ୍କ ମୃତ୍ୟୁ ହୋଇଥିବା ବେଳେ, ଜୀବିତ ଦୁଇ ପୁଅ ପାଳି କରି ମାଆଙ୍କୁ ଖାଇବାକୁ ଦେଉଥିଲେ । ତେବେ ଚଳିତବର୍ଷ ଯୋଡ଼ା ଆଶ୍ୱିନ ପଡିଥିବାରୁ ପୁଅ ମାନଙ୍କ ମଧ୍ୟରେ ପାଳି ଛିଣ୍ଡିନଥିଲା । ଶେଷରେ ରାସ୍ତାକଡ଼ରେ ରାତି କଟାଇଥିଲେ ଅସହାୟ ବୃଦ୍ଧା ଜଣକ । ଘଟଣାର ଭିଡିଓ ଭାଇରାଲ ହେବା ପରେ ଜରଡା ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ଦୁଇପୁଅଙ୍କୁ ବୁଝାସୁଝା କରିବା ପରେ ବୃଦ୍ଧାଙ୍କୁ ସାନପୁଅ ପାଖକୁ ନେଇଛି । ତେବେ ଘଟଣାକୁ ସବୁମଲରେ ନିନ୍ଦା କରାଯାଇଛି  । କାହିଁକି ମରିଯାଉଛି ମାଆ ପାଇଁ ମମତା । ଦିନେ ପୁଅଙ୍କୁ ଜନ୍ମ କରି ଗର୍ବିତ ହେଉଥିବା ମାଆ କେମିତି ହେଉଛି ନିର୍ଯାତିତା । ଏହାକଣ ନୁହେଁ କି ଅବକ୍ଷୟମୁଖୀ ସାମାଜିକ ଚରିତ୍ର ।

ଗଞ୍ଜାମ: ପାଦ ଆଗେଇ ଚାଲିଥିଲା ଭବିଷ୍ୟତ ଗଢ଼ିବା ପାଇଁ । ହେଲେ ଭବିଷ୍ୟତ ଗଢ଼ାର ଅଧା ରାସ୍ତାରେ ପଛରୁ ଟାଣି ଧରିଲା ଗରିବି ଓ ଅସହାୟତା । ଲଦି ହୋଇପଡ଼ିଲା ମେଧାବୀ ଛାତ୍ରଙ୍କ ମୁଣ୍ଡରେ ପରିବାର ବୋଝ । ଆଉ ବୋଝର ଓଜନରେ ଦବିହୋଇଗଲା ଆଗେଇଯିବାର ସ୍ୱପ୍ନ । ମାଆ ଓ ଭାଇଙ୍କ ଚିକିତ୍ସା ପାଇଁ ଅଧାରାସ୍ତାରେ ଅଟକି ଗଲା ପାଠ ପଢା । ଏବେ ଖାଲି ସମସ୍ୟାରୁ ମୁକୁଳିବା ପାଇଁ ସରକାରୀ ସହାୟତାକୁ ଅପେକ୍ଷା ।

ଏ ଦୁଃଖ ହେଉଛି ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ନୂଆଗଡ଼ ଗାଁର ରବୀନ୍ଦ୍ର ବେହେରାଙ୍କ । ସବୁକିଛି ଠିକ୍‌ ଚାଲିଥିଲା । ହଠାତ ବାପାଙ୍କ ଜଣ୍ଡିସରେ ମୃତ୍ୟୁ ପରେ ରବୀନ୍ଦ୍ରଙ୍କ ମୁଣ୍ଡରେ ପରିବାର ଦାୟିତ୍ୱ ଲଦି ହୋଇପଡ଼ିଲା । ପୂର୍ବରୁ ମା ତୁଳସା ଦେବୀ ଜଣେ ମାନସିକ ରୋଗୀ ହୋଇଥିବା ବେଳେ ଏବେ ସାନ ଭାଇ ଅଜଣା ରୋଗରେ ପୀଡିତ । ରବୀନ୍ଦ୍ରଙ୍କ ମୁଣ୍ଡରେ ଉପରେ ଏବେ ଉୟଭୟଙ୍କ ଚିକିତ୍ସା ଦାୟିତ୍ୱ । ନିଜ ମେଧାବୃତ୍ତିରୁ ପାଇଥିବା ୪୦ ହଜାର ଟଙ୍କା ଖର୍ଚ୍ଚ କରି ବ୍ରହ୍ମପୁର ମେଡିକାଲରେ ସାନଭାଇର ଚିକିତ୍ସା କରାଇଥିଲେ । ଦଶମ ପରୀକ୍ଷା ଏବଂ ଯୁକ୍ତ ଦୁଇ ପରୀକ୍ଷାରେ କୃତିତ୍ୱ ଅଜର୍ନ କରି ନିଜ ବ୍ଲକରେ ସୁନାମ ଅର୍ଜନ କରିଥିଲେ ସେ । ପରେ  ଯୁକ୍ତ ୩ ରେ ନାମଲେଖାଇ ଥିଲେବି ଏବେ ପରିବାର ବୋଝ ନାଙ୍କ ପାଠ ପଢାରେ ଡୋରି ପକାଇବାକୁ ବାଧ୍ୟ କରିଛି ।

ରବୀନ୍ଦ୍ରଙ୍କୁ ସହାୟତା ପାଇଁ ବଡ ଭଉଣୀ ମଧ୍ୟ ସୁଦୂର ବାଙ୍ଗାଲୁରୁରେ କାର୍ଯ୍ୟ କରୁଛନ୍ତି । ରବୀନ୍ଦ୍ରଙ୍କ କିଛି ଶିକ୍ଷକ ମଧ୍ୟ ତାଙ୍କୁ ସହାୟତାର ହାତ ବଢାଇଛନ୍ତି । ତେବ ରବୀନ୍ଦ୍ରଙ୍କ ସମସ୍ୟା ପାତ୍ରପୁର ବିଡିଓଙ୍କ ଦୃଷ୍ଟି ଆକର୍ଷଣ କରାଯିବାରୁ ରେଡକ୍ରସ ପାଣ୍ଠିରୁ ୨୦,୦୦୦ଟଙ୍କା ସହାୟତା ଦିଆଯାଇଛି । ମେଧାବୀ ଛାତ୍ର ପାଇଁ ବାଧକ ସାଜିଛି ପରିବାରର ବୋଝ, ମୃତ୍ୟୁ ସହ ସଂଗ୍ରାମ କରୁଥିବା ଭାଇକୁ ଚିକିତ୍ସାପାଇଁ ସରକାରୀ ସହାୟତାକୁ ଚାତକ ପରି ଚାହିଁ ବସିଛି ରବିନ୍ଦ୍ର ।

ଭୁବନେଶ୍ୱର: ବିଷ ବଳୟରେ ଭୁବନେଶ୍ୱର । ନିଶା ଚାଲାଣର ଟ୍ରାନଜିଟ ପଏଣ୍ଟ ସାଜିଛି ରାଜଧାନୀ । ଏଠାରୁ ରାଜ୍ୟ ବାହାରକୁ ଗଞ୍ଜେଇ ଚାଲାଣ ପାଇଁ ନୂଆ ନୂଆ ତରିକା ଆପଣାଉଛନ୍ତି ଦୁର୍ବୃତ୍ତ  । କେତେବେଳେ ପରିବା ଗାଡି ତ ଆଉ କେତେବେଳେ ଗ୍ରୋସରୀ ଗାଡିରେ ଓଡିଶା ଦେଇ ଚାଲାଣ ହେଉଛି ଗଞ୍ଜେଇ। ଏଥର ନଡିଆ କତା ବୋଝେଇ ଟ୍ରକରେ ଗଞ୍ଜେଇ ଚାଲାଣ । ଆନ୍ଧ୍ରପ୍ରଦେଶରୁ  ବିହାର ଭାୟା ଭୁବନେଶ୍ୱର ।

ଖୋର୍ଦ୍ଦା ଗୋଡିପଡ ଟୋଲ ଗେଟରେ ଯାଞ୍ଚ ବେଳେ ମାଡି ବସିଲା ନାର୍କୋଟିକସ କଣ୍ଟ୍ରୋଲ ବ୍ୟୁରୋ । କତା ଭିତରୁ ବାହରି ଥିଲା ବସ୍ତା ବସ୍ତା ଗଞ୍ଜେଇ  । ଟ୍ରକ ଡ୍ରାଇଭର କେ.ଶ୍ରୀନିବାସ ରାଓଙ୍କୁ ଗିରଫ କରିଛି ଏନସିବି । ୭୦୦ କେଜି ଗଞ୍ଜେଇ ଓ ଗୋଟିଏ ଟ୍ରକ ଜବତ କରାଯାଇଛି  । ଜବତ ଗଞ୍ଜେଇର ଆନୁମାନିକ ମୂଲ୍ଯ ୭୦ ଲକ୍ଷ ଟଙ୍କା ହେବ ବୋଲି ସୂଚନା ଦେଇଛି ପୋଲିସ  ।

ସେହିଭଳି ଭୁବନେଶ୍ୱର ଉପକଣ୍ଠ ପାହଳ ଅଞ୍ଚଳରେ ଧଳାଜହର କାରବାରର ପର୍ଦ୍ଦାଫାସ । ଆପାର୍ଟମେଣ୍ଟ ନିକଟରୁ ୩୨୦ ଗ୍ରାମ ବ୍ରାଉନସୁଗର ଜବତ କରିଛି କ୍ୟୁଏଟି ଓ  ପାହଳ  ଫାଣ୍ଡି ପୋଲିସ  । ଘଟଣାରେ ତିନି ଜଣଙ୍କୁ ଗିରଫ କରାଯାଇଛି  । ଜବତ ବ୍ରାଉନସୁଗରର ମୁଲ୍ୟ ୩୦ ଲକ୍ଷ ଟଙ୍କା ଉର୍ଦ୍ଧ୍ୱ ହେବ । ଜଳେଶ୍ୱରର ସେକ. ସଫିରୁଦ୍ଦିନ ଓ ସେକ୍. ରାଜା ଏବଂ ବାଲିଅନ୍ତା ଜଗନ୍ନାଥ ପୁରର ବାପି ନାୟକକୁ ଗିରଫ କରିଛି ପୋଲିସ।

ସେମାନଙ୍କ ଠାରୁ ୨ଟି ବାଇକ, ୩ଟି ମୋବାଇଲ ଓ ନଗଦ ୫୫ ହଜାର ଟଙ୍କା ଜବତ ମଧ୍ୟ କରାଯାଇଛି  । ଦିନକୁ ଦିନ ରାଜ୍ୟରେ ବଢି ଚାଲିଥିବା ନିଶା କାରବାର ଏବେ ଓଡ଼ିଶା ପୋଲିସ ସହ ଏନସିବିର ମୁଣ୍ଡ ବିନ୍ଧାର କାରଣ ପାଲଟିଛି ।