ନନ୍ଦିଘୋଷ ବ୍ୟୁରୋ : ଭୁବନେଶ୍ୱରସ୍ଥିତ କଳିଙ୍ଗ ଷ୍ଟାଡିୟମରେ ଆଜିଠାରୁ ବିଶ୍ୱ କଣ୍ଟିନେଣ୍ଟାଲ୍ ଟୁର୍ ଦୌଡ଼କୁଦ ପ୍ରତିଯୋଗିତା ଆରମ୍ଭ ହେଉଛି। ଅପରାହ୍ଣ ୪ଟାରୁ ରାତି ୮ଟା ପର୍ଯ୍ୟନ୍ତ ଏହି ମହାଦେଶୀୟ ଆଥଲେଟିକ୍ସ ପ୍ରତିଯୋଗିତା ଚାଲିବ, ଯେଉଁଥିରେ ୨୩ଟି ଦେଶରୁ ମୋଟ ୧୮୭ ଜଣ ଆଥଲେଟ୍ ଅଂଶଗ୍ରହଣ କରୁଛନ୍ତି। ପୁରୁଷ ଓ ମହିଳା ବର୍ଗରେ ୯ଟି ଲେଖାଏଁ ମୋଟ ୧୮ଟି ପ୍ରତିଯୋଗିତା ଅନୁଷ୍ଠିତ ହେବ।ଏହି ପ୍ରତିଯୋଗିତାରେ ଭାରତରୁ ୮୮ ଜଣ ଆଥଲେଟ୍ ଭାଗ ନେଉଛନ୍ତି। ଓଡ଼ିଶାରୁ ୬ ଜଣ ଆଥଲେଟ୍ ଶ୍ରାବଣୀ ନନ୍ଦ, କିଶୋର ଜେନା, ଅନିମେଷ କୁଜୁର, ବାପି ହାଁସଦା, ସ୍ୱାଧୀନ ମାଝୀ ଏବଂ ପ୍ରଜ୍ଞାପ୍ରଶାନ୍ତି ସାହୁ ଅଂଶଗ୍ରହଣ କରୁଛନ୍ତି। ଏହି ସ୍ଥାନୀୟ ଖେଳାଳିଙ୍କ ଉପରେ ସମସ୍ତ କ୍ରୀଡ଼ାପ୍ରେମୀଙ୍କ ନଜର ରହିଛି।
ମହାନଦୀ ଜଳ ବିବାଦ: ବୈଷୟିକ କମିଟି ଗଠନ କଲା CWC, ସେପ୍ଟେମ୍ବର ୧୭ରେ ପରବର୍ତ୍ତୀ ଶୁଣାଣି
ନନ୍ଦିଘୋଷ ବ୍ୟୁରୋ : ମହାନଦୀ ଜଳ ବଣ୍ଟନ ବିବାଦର ସ୍ଥାୟୀ ସମାଧାନ ପାଇଁ କେନ୍ଦ୍ରୀୟ ଜଳ ଆୟୋଗ (CWC) ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛନ୍ତି। ଓଡ଼ିଶା ଏବଂ ଛତିଶଗଡ଼ ଦ୍ୱାରା ଦାଖଲ କରାଯାଇଥିବା ତଥ୍ୟଗୁଡ଼ିକର ଅନୁଧ୍ୟାନ ଓ ବିଶ୍ଳେଷଣ ପାଇଁ CWC ଏକ ବିଶେଷ ବୈଷୟିକ କମିଟି ଗଠନ କରିଛି।
ଓଡ଼ିଶା ଆଡଭୋକେଟ୍ ଜେନେରାଲ୍ ପିତାମ୍ବର ଆଚାର୍ଯ୍ୟଙ୍କ ସୂଚନା ଅନୁସାରେ, ଉଭୟ ରାଜ୍ୟନନ୍ଦିଘୋଷ ବ୍ୟୁରୋ ନିଜ ନିଜର ଜଳ ଆବଶ୍ୟକତା ଓ ଦାବି ସମ୍ପର୍କିତ ବିସ୍ତୃତ ତଥ୍ୟ CWC କୁ ପ୍ରଦାନ କରିଛନ୍ତି। ଏହି କମିଟି ସେହି ତଥ୍ୟଗୁଡ଼ିକର ନିରପେକ୍ଷ ବୈଷୟିକ ଯାଞ୍ଚ କରୁଛି।
ସେପ୍ଟେମ୍ବର ୧୭ ରେ ମହାନଦୀ ଜଳ ବିବାଦ ଟ୍ରିବ୍ୟୁନାଲର ପରବର୍ତ୍ତୀ ଶୁଣାଣି ହେବାକୁ ଯାଉଛି। ଏହା ପୂର୍ବରୁ ବୈଷୟିକ କମିଟିର ଏହି ପଦକ୍ଷେପକୁ ବେଶ ଗୁରୁତ୍ୱପୂର୍ଣ୍ଣ ମନେକରାଯାଉଛି।
ଉଭୟ ଓଡ଼ିଶା ଓ ଛତିଶଗଡ଼ର ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟିପୂର୍ଣ୍ଣ ଆଭିମୁଖ୍ୟ, ସାରଗର୍ଭକ ଆଲୋଚନା ଏବଂ ପାରସ୍ପରିକ ବୁଝାମଣା ମାଧ୍ୟମରେ ଏହି ବହୁଦିନର ବିବାଦର ସୁଫଳ ସମାଧାନ ବାହାରିପାରିବ ବୋଲି ଶ୍ରୀ ଆଚାର୍ଯ୍ୟ ଆଶା ପ୍ରକାଶ କରିଛନ୍ତି।
ସର୍କିଟ ହାଉସରେ ଅପରାଧୀଙ୍କୁ ଆଶ୍ରୟ ଅଭିଯୋଗ, ପ୍ରକାଶ ପାଶଓ୍ଵାନଙ୍କୁ ଧରିବାକୁ ଚଢ଼ାଉ ଜାରି
ନନ୍ଦିଘୋଷ ବ୍ୟୁରୋ : ରାଉରକେଲା ସର୍କିଟ ହାଉସରୁ ବନ୍ଧୁକ ସହ ଅପରାଧୀ ଗିରଫ ଘଟଣାରେ ତଦନ୍ତ ଜୋରଦାର ହୋଇଛି। ଅପରାଧୀଙ୍କୁ ସର୍କିଟ ହାଉସରେ ରହିବା ପାଇଁ ସହଯୋଗ କରିଥିବା ଅଭିଯୋଗରେ ନିଲମ୍ବିତ ବିଜେପି ଯୁବନେତା ପ୍ରକାଶ ପାଶଓ୍ଵାନଙ୍କୁ ଗିରଫ କରିବା ପାଇଁ ପୋଲିସର ସ୍ୱତନ୍ତ୍ର ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ପ୍ରକାଶ ପାଶଓ୍ଵାନ ଫେରାର ଥିବାରୁ ତାଙ୍କୁ ଧରିବା ପାଇଁ ରାଜ୍ୟ ଭିତରେ ବିଭିନ୍ନ ସ୍ଥାନ ସମେତ ରାଜ୍ୟ ବାହାରେ ମଧ୍ୟ ୩ଟି ସ୍ୱତନ୍ତ୍ର ଟିମ୍ ଚଢ଼ାଉ ଜାରି ରଖିଛି। ଏପଟେ ପ୍ରକାଶ ପାଶଓ୍ଵାନଙ୍କ ଘରେ ପୋଲିସ ନୋଟିସ ଜାରି କରିଛି। ସୋମବାର ସୁଦ୍ଧା ଥାନାରେ ହାଜର ହେବାକୁ ନୋଟିସରେ କୁହାଯାଇଛି। ଯଦି ସେ ହାଜର ନହୁଅନ୍ତି, ତେବେ ତାଙ୍କ ବିରୋଧରେ NBW ଜାରି ପାଇଁ ପୋଲିସ କୋର୍ଟରେ ଆବେଦନ କରିପାରେ ବୋଲି ସୂଚନା ମିଳିଛି।
ଅନ୍ୟପଟେ, ଘଟଣାରେ ୪ଟି ବନ୍ଧୁକ ଓ ୧୧ଟି ଗୁଳି ଜବତ କରିବା ସହ ୭ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିଛି। ସମସ୍ତ ୭ ଜଣ ବର୍ତ୍ତମାନ ଜେଲ୍ ହାଜତରେ ଅଛନ୍ତି। ଆଉ ଦୁଇଜଣ ଅଭିଯୁକ୍ତ ଆଦର୍ଶ ସାହୁ ଓ ସୁରଜ ଗୁପ୍ତାଙ୍କୁ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି। ପଚରାଉଚରା ପରେ ଆଇନ ଅନୁସାରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ନିଆଯିବ।
ଗିରଫ ୭ ଜଣଙ୍କ ମଧ୍ୟରୁ ୩ ଜଣଙ୍କୁ ଦୁଇ ଦିନିଆ ରିମାଣ୍ଡରେ ଆଣି ପୋଲିସ ପଚରାଉଚରା କରିଥିଲା। ଏହି ପଚରାଉଚରାରୁ ପୋଲିସକୁ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଥିବା ସୂଚନା ରହିଛି। ଏହାସହ ପ୍ରକାଶ ପାଶଓ୍ଵାନ ବ୍ୟବହାର କରୁଥିବା କାରକୁ ମଧ୍ୟ ପୋଲିସ ଜବତ କରିଛି। ଗିରଫ ଅପରାଧୀଙ୍କ ସହ ପ୍ରକାଶ ପାଶଓ୍ଵାନଙ୍କ ସମ୍ପର୍କ ଥିବା ଏବଂ ସେମାନଙ୍କୁ ସର୍କିଟ ହାଉସରେ ରହିବା ପାଇଁ ସହଯୋଗ କରିଥିବା ନେଇ ଅଭିଯୋଗ ହୋଇଛି। ଏବେ ପ୍ରକାଶ ପାଶଓ୍ଵାନଙ୍କ ଗିରଫକୁ ନେଇ ପୋଲିସର ତଦନ୍ତ ଓ ଚଢ଼ାଉ ଜାରି ରହିଛି।
ମହିଳା ହକି ବିଶ୍ୱକପ: ନେଦରଲାଣ୍ଡସଠାରୁ ୦-୨ରେ ହାରିଲା ଭାରତ, ସେମିଫାଇନାଲ ଆଶା ଅଷ୍ଟ୍ରେଲିଆ ମ୍ୟାଚ୍ ଉପରେ
ନନ୍ଦିଘୋଷ ବ୍ୟୁରୋ : ମହିଳା ହକି ବିଶ୍ୱକପର ଦ୍ୱିତୀୟ ପର୍ଯ୍ୟାୟ ମ୍ୟାଚ୍ରେ ଭାରତକୁ ୦-୨ ଗୋଲରେ ପରାସ୍ତ କରିଛି ଆୟୋଜକ ତଥା ଡିଫେଣ୍ଡିଂ ଚାମ୍ପିଅନ୍ ନେଦରଲାଣ୍ଡସ। ଆରମ୍ଭରୁ ଡଚ୍ ଦଳ ଖେଳର ଗତି ଉପରେ ନିଜର ନିୟନ୍ତ୍ରଣ ରଖିଥିଲା। ଉଭୟ ହାଫରେ ଗୋଟିଏ ଲେଖାଏଁ ପେନାଲ୍ଟି କର୍ଣ୍ଣରରୁ ଗୋଲ୍ କରି ନେଦରଲାଣ୍ଡସ ବିଜୟ ହାସଲ କରିଥିଲା।
ତେବେ ପରାଜୟ ସତ୍ତ୍ୱେ ବିଶ୍ୱର ନମ୍ବର-୧ ଦଳ ବିପକ୍ଷରେ ଭାରତୀୟ ଦଳର ପ୍ରତିରକ୍ଷା ବେଶ୍ ଶୃଙ୍ଖଳିତ ଓ ଦୃଢ଼ ରହିଥିଲା। ଭାରତୀୟ ଖେଳାଳିମାନେ ନେଦରଲାଣ୍ଡସର ଆକ୍ରମଣକୁ ରୋକିବା ପାଇଁ ସାହସିକ ପ୍ରୟାସ କରିଥିଲେ। ଏହି ପରାଜୟ ପରେ ଭାରତର ସେମିଫାଇନାଲ ଆଶା ଏବେ ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ଉପରେ ନିର୍ଭର କରୁଛି। ସେମିଫାଇନାଲ ଆଶାକୁ ଜୀବନ୍ତ ରଖିବା ପାଇଁ ରବିବାର ଅଷ୍ଟ୍ରେଲିଆ ବିପକ୍ଷରେ ଭାରତକୁ ନିଶ୍ଚିତ ଭାବେ ବିଜୟ ହାସଲ କରିବାକୁ ପଡ଼ିବ।
ଲତା-ଆଶାଙ୍କ ଅମର ସଙ୍ଗୀତକୁ ଶ୍ରଦ୍ଧାଞ୍ଜଳି, ଜୟଦେବ ଭବନରେ ‘ଦ ମିରର୍’ ସଙ୍ଗୀତ ସନ୍ଧ୍ୟା
ନନ୍ଦିଘୋଷ ବ୍ୟୁରୋ : ଭୁବନେଶ୍ୱରର ଜୟଦେବ ଭବନରେ ଅନୁଷ୍ଠିତ ହୋଇଛି ସ୍ୱତନ୍ତ୍ର ସଙ୍ଗୀତ କାର୍ଯ୍ୟକ୍ରମ ‘ଦ ମିରର୍’। ମୂର୍ଚ୍ଛନା ମ୍ୟୁଜିକାଲ୍ ଗ୍ରୁପ୍ ପକ୍ଷରୁ ଆୟୋଜିତ ଏହି ସଙ୍ଗୀତ ସନ୍ଧ୍ୟା ଭାରତୀୟ ସଙ୍ଗୀତ ଜଗତର ଦୁଇ କିମ୍ବଦନ୍ତୀ ଗାୟିକା ଲତା ମଙ୍ଗେଶକର ଓ ଆଶା ଭୋସଲେଙ୍କ ଅମର ସଙ୍ଗୀତକୁ ଉତ୍ସର୍ଗ କରାଯାଇଥିଲା।
ଲତା ଓ ଆଶାଙ୍କ ଅଗଣିତ ଲୋକପ୍ରିୟ ଗୀତକୁ ନେଇ ଆୟୋଜିତ ଏହି ସଙ୍ଗୀତ ସନ୍ଧ୍ୟା ଦର୍ଶକଙ୍କୁ ଏକ ଭାବପୂର୍ଣ୍ଣ ଓ ସ୍ମରଣୀୟ ସଙ୍ଗୀତ ଯାତ୍ରାର ଅନୁଭୂତି ଦେଇଥିଲା। କଣ୍ଠଶିଳ୍ପୀମାନେ ନିଜ ନିଜ ସୁମଧୁର କଣ୍ଠରେ ଦୁଇ ମହାନ ଗାୟିକାଙ୍କ ଅମର ସ୍ୱରର ସ୍ମୃତିକୁ ଜୀବନ୍ତ କରିଥିଲେ। କାର୍ଯ୍ୟକ୍ରମରେ ଲତା ମଙ୍ଗେଶକର ଓ ଆଶା ଭୋସଲେଙ୍କ ସଙ୍ଗୀତ ଜୀବନ ଏବଂ ସେମାନଙ୍କ ଅବଦାନକୁ ସ୍ମରଣ କରାଯାଇଥିଲା। ସଙ୍ଗୀତ ପ୍ରେମୀ ଦର୍ଶକମାନେ ଏହି ମନୋରମ ସଙ୍ଗୀତ ସନ୍ଧ୍ୟାକୁ ଭରପୂର ଉପଭୋଗ କରିଥିଲେ।
ୟୁନିଟ୍-୧ ହାଟରେ ପୁଣି ଅଗ୍ନିକାଣ୍ଡ, ଜଳିଗଲା ଖଲି ଦୋକାନ; ଲକ୍ଷାଧିକ ଟଙ୍କାର ସାମଗ୍ରୀ ନଷ୍ଟ
ନନ୍ଦିଘୋଷ ବ୍ୟୁରୋ : ପୁଣି ରାଜଧାନୀର ୟୁନିଟ୍-୧ ହାଟରେ ଅଗ୍ନିକାଣ୍ଡ। ହାଟ ଭିତରେ ଥିବା ଏକ ଗ୍ରୋସରୀ ଦୋକାନ ଓ ଖଲି ଦୋକାନରେ ନିଆଁ ଲାଗି ଲକ୍ଷାଧିକ ଟଙ୍କାର ସାମଗ୍ରୀ ପୋଡ଼ିଯାଇଛି। ସର୍ଟ ସର୍କିଟ୍ରୁ ଅଗ୍ନିକାଣ୍ଡ ଘଟିଥିବା ପ୍ରାଥମିକ ଭାବେ ସନ୍ଦେହ କରାଯାଉଛି।
ମିଠା ପ୍ରିୟ ଲୋକେ ସାବଧାନ! ନାମୀଦାମୀ ମିଠା ଦୋକାନରେ ଚଢ଼ାଉ, ନଷ୍ଟ ହେଲା ଲକ୍ଷ ଲକ୍ଷ ଟଙ୍କାର ଖାଦ୍ୟ
ନନ୍ଦିଘୋଷ ବ୍ୟୁରୋ : କଳିଙ୍ଗ ଷ୍ଟାଡିୟମ ନିକଟରେ ଥିବା ଏକ ନାମୀଦାମୀ ମିଠା ଦୋକାନରେ ସକାଳୁ ଚଢ଼ାଉ କରାଯାଇଛି। ବାସି ଖାଦ୍ୟ ଓ ଅପମିଶ୍ରିତ ଖାଦ୍ୟ ବିକ୍ରି ନେଇ ଅଭିଯୋଗ ପରେ ଏହି ଯାଞ୍ଚ କରାଯାଇଛି। ମିଠା ବିକ୍ରି ସ୍ଥାନଠାରୁ ଆରମ୍ଭ କରି ରୋଷେଇ ଘର ପର୍ଯ୍ୟନ୍ତ ସବୁଠି ଯାଞ୍ଚ କରିଛନ୍ତି ଅଧିକାରୀ। ଚଢ଼ାଉ ସମୟରେ ମିଠା ପ୍ରସ୍ତୁତ ହେଉଥିବା ସ୍ଥାନର ଫ୍ଲୋରିଂ ଖରାପ ଥିବାରୁ ଦୋକାନୀଙ୍କୁ ୫ ହଜାର ଟଙ୍କା ଜରିମାନା କରାଯାଇଛି।
ଭୁବନେଶ୍ୱରର ବିଭିନ୍ନ ସ୍ଥାନରେ ରେଡ୍
କେବଳ କଳିଙ୍ଗ ଷ୍ଟାଡିୟମ ନିକଟରେ ନୁହେଁ, ରସୁଲଗଡ଼, ହଂସପାଳ, ପାତ୍ରପଡ଼ା, ୟୁନିଟ୍-୪ ଓ କଳିଙ୍ଗ ନଗର ସମେତ ଭୁବନେଶ୍ୱରର ବିଭିନ୍ନ ସ୍ଥାନରେ ମିଠା ଦୋକାନ ଓ ଛେନା ବ୍ୟବସାୟୀଙ୍କ ଉପରେ ଚଢ଼ାଉ କରାଯାଇଛି।
ଛେନା ଓ ପନିରରେ ଅପମିଶ୍ରଣ ଅଭିଯୋଗ
ଭୁବନେଶ୍ୱରର ବିଭିନ୍ନ ମିଠା ଦୋକାନକୁ ପିପିଲି, ନିଆଳି ଓ ଅଡ଼ଶପୁର ଅଞ୍ଚଳରୁ ଛେନା ଓ ପନିର ଆସୁଥିବା ବେଳେ ଏଥିରେ ପାରଦ ମିଶାଯାଉଥିବା ଅଭିଯୋଗ ସାମ୍ନାକୁ ଆସିଛି। ଏହାପରେ ଖାଦ୍ୟ ସୁରକ୍ଷା ବିଭାଗ ପକ୍ଷରୁ ଯାଞ୍ଚ ଓ ଚଢ଼ାଉକୁ ଜୋରଦାର କରାଯାଇଛି। ଗୁରୁବାର ସନ୍ଧ୍ୟାରେ ମଧ୍ୟ ରବୀନ୍ଦ୍ର ମଣ୍ଡପ ନିକଟରେ ଥିବା ଏକ ଛେନା ଦୋକାନରେ ରେଡ୍ କରାଯାଇଥିଲା। ସେଠାରୁ ପାଖାପାଖି ୭୦ କେଜି ଖାଦ୍ୟ ନଷ୍ଟ କରାଯାଇଥିଲା।
୭ ବ୍ୟବସାୟୀଙ୍କୁ ନୋଟିସ୍, ୧୦ ସ୍ଥାନରୁ ନମୁନା
ଏପର୍ଯ୍ୟନ୍ତ ୭ ଜଣ ବ୍ୟବସାୟୀଙ୍କୁ ନୋଟିସ୍ ଦିଆଯାଇଥିବା ବେଳେ ୧୦ଟି ସ୍ଥାନରୁ ଖାଦ୍ୟ ନମୁନା ସଂଗ୍ରହ କରି ପରୀକ୍ଷଣ ପାଇଁ ପଠାଯାଇଛି।
କଟକରେ ବି ଚଢ଼ାଉ, ନଷ୍ଟ ହେଲା ୧୭ ଲକ୍ଷର ପନିର
କେବଳ ଭୁବନେଶ୍ୱର ନୁହେଁ, କଟକରେ ମଧ୍ୟ ସମାନ ଭାବେ ଚଢ଼ାଉ ଚାଲିଛି। ମାତ୍ର ୨ ଦିନ ମଧ୍ୟରେ ଚଢ଼ାଉ କରାଯାଇ ୧୭ ଲକ୍ଷରୁ ଅଧିକ ଟଙ୍କାର ପନିର ନଷ୍ଟ କରାଯାଇଛି। ସଂଗ୍ରହ କରାଯାଇଥିବା ନମୁନାର ପରୀକ୍ଷଣ ରିପୋର୍ଟ ଆସିବା ପରେ ଆଇନ ଅନୁଯାୟୀ ଦୋଷୀ ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଧିକାରୀ ସୂଚନା ଦେଇଛନ୍ତି।