ନନ୍ଦିଘୋଷ ବ୍ୟୁରୋ : ପୁରୀ ଗଡିଶାଗୋଦା ଥାନା ଗୋଲାରା ଗାଁରେ ଦୁର୍ବୃତ୍ତଙ୍କ ଆତଙ୍କରାଜ । ଘରେ ପଶି ହାଣିଲେ । ଆଲମିରା ଭାଙ୍ଗି ଲୁଟିନେଲେ ଲକ୍ଷାଧିକ ଟଙ୍କାର ସୁନା ଅଳଙ୍କାର । ଗୋଲାରା ଗାଁର ବଡ଼ଜେନାଙ୍କ ଘରୁ ହୋଇଛି ଚୋରି । ଗତକାଲି ରାତ୍ର ପ୍ରାୟ ୧୧ଟା ସମୟରେ ୩ ଜଣ ମୁଖାପିନ୍ଧା ଦୁର୍ବୃତ୍ତ ବଡ଼ଜେନାଙ୍କ ଘରେ ପଶିଥିଲେ । ଘରେ ଥିବା ମହିଳାଙ୍କୁ ମାଡ଼ ମାରି ଛୁରୀରେ ହାତ କାଟିଦେଇ ଘରୁ ସୁନା ଗହଣା ଲୁଟିନେଇଛନ୍ତି । ଆହତଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି ।
ନାବାଳକ ଗୁଳିରେ ପୋଲିସ ଆହତ ; ଶିବ ମନ୍ଦିରରେ ପୂଜାର୍ଚ୍ଚନା ବେଳେ ପୋଲିସ ହାତରେ ବାଜିଲା ଗୁଳି
ନନ୍ଦିଘୋଷ ବ୍ୟୁରୋ : ନାବାଳକ ଗୁଳିରେ ପୋଲିସ ଆହତ । ବାସୁଦେବପୁର ବ୍ଲକ ଚୂଡାମଣି ଜେଠି ଶିବ ମନ୍ଦିରରେ ଘଟିଛି ଅଭାବନୀୟ ଘଟଣା । ଶିବ ମନ୍ଦିରରେ ପୂଜାର୍ଚ୍ଚନା ବେଳେ ପୋଲିସ ହାତରେ ବାଜିଛି ଗୁଳି । ଶାଶୂଭୁଆଶୁଣୀ ଗାଁର ମୁକ୍ତିକାନ୍ତ ମଳିକ ତାଙ୍କ ପୁଅ ପାଇଁ ଚୂଡାମଣି ଜେଠି ଶିବ ମନ୍ଦିରରେ ରୁଦ୍ରାଭିଷେକ କରୁଥିଲେ । ଯେଉଁଠାକୁ ମୁକ୍ତିକାନ୍ତ ମଳିକଙ୍କ ଶଳା ବି ଯାଇଥିଲେ । ଯିଏ କି କେନ୍ଦ୍ରାପଡାରେ ଇନ୍ସପେକ୍ଟର ଭାବେ SPଙ୍କ ଅଫିସରେ କାର୍ଯ୍ୟରତ । ଯେତେବେଳେ ଇନସପେକ୍ଟର ଜଣଙ୍କ ରୁଦ୍ରାଭିଷେକରେ ଯୋଗ ଦେବାକୁ ଯାଇଥିଲେ । ଗାଡ଼ିରେ ବସିଥିବା ତାଙ୍କ ଭଣଜା ଅଜଣାତରେ ବନ୍ଧୁକ ଟ୍ରିଗର ଚିପି ଦେବାରୁ ଗୁଳି ଫୁଟିଯାଇଥିଲା । ଗୁଳିଟି କିଛି ଦୂରତାରେ ବସି ପ୍ରସାଦ ସେବନ କରୁଥିବା ମାନସ ସେଠୀ ନାମକ ସ୍ପେଶାଲ ପୋଲିସ ଅଫିସରଙ୍କ ହାତରେ ବାଜିଥିଲା । ତାଙ୍କୁ ବାସୁଦେବପୁର ଡାକ୍ତରଖାନାରେ ଭର୍ତ୍ତି କରାଯାଇଛି । ତେବେ ନାବାଳକ ପୋଲିସ ଇନ୍ସପେକ୍ଟରଙ୍କ ଭଣଜା ହୋଇଥିବାରୁ, ଚୂଡାମଣୀ ସାମୁଦ୍ରିକ ଥାନା ଭାରପ୍ରାପ୍ତ ଅଧିକାରୀ ହରଡଘଣାରେ ପଡି ଯାଇଛନ୍ତି । ତେବେ ନାବାଳକ ହାତକୁ ବନ୍ଧୁକ ଆସିଲା କେମିତି ? ତାକୁ ନେଇ ଉଠିଛି ବଡ ପ୍ରଶ୍ନ ।
ମଣ୍ଡିରୁ ଉଠୁନି ଧାନ ; ପୁଣି ଅଦିନିଆ ଝଡ଼ବର୍ଷାରେ ଭିଜିଲା ହଜାର ହଜାର ଧାନ ବସ୍ତା
ନନ୍ଦିଘୋଷ ବ୍ୟୁରୋ : ମଣ୍ଡିରୁ ଉଠୁନି ଧାନ । ପୁଣି ଅଦିନିଆ ଝଡ଼ ବର୍ଷା ଭିଜିଲା ମଣ୍ଡିରେ ପଡିରହିଥିବା ହଜାର ହଜାର ଧାନ ବସ୍ତା । ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକରେ ସୁଧୁରୁନି ଚାଷୀ ସମସ୍ୟା । ନା ବୁଝୁଛି ପ୍ରଶାସନ ନା ବୁଝୁଛନ୍ତି ସରକାର। ଚାନ୍ଦବାଲି ବ୍ଲକର ଆରଡି, ନାନ୍ଦପୁର ସୁନ୍ଦରପୁର, ଓଳଗ ପଞ୍ଚାୟତରେ ଥିବା ୨ଟି ସମବାୟ ସମିତିରୁ ଧାନ ଉଠୁନି । ଆଖଣ୍ଡଳମଣି-ଭଦ୍ରକ ମୁଖ୍ୟରାସ୍ତା ପାର୍ଶ୍ଵରେ ଦୀର୍ଘ ଦିନ ହେଲା ପଡ଼ି ରହିଛି ଧାନ ବସ୍ତା । ଗତକାଲି ପୁଣି ଝଡ ବର୍ଷାରେ ଧାନ ଭିଜିଛି । ବର୍ଷାରେ ବାରମ୍ବାର ଭିଜୁଥିବାରୁ ଧାନ ଗଜା ହେବାକୁ ବସିଲାଣି । ଯାହାକୁ ନେଇ ଚିନ୍ତାରେ ଚାଷୀ । ଖାଲି ସେତିକି ନୁହେଁ ରାସ୍ତା ଉପରେ ଧାନ ପଡ଼ି ରହିଥିବାରୁ ଗାଡ଼ି ଯାତାୟତରେ ଅସୁବିଧା ହେଉଛି । ଏପରି ସମସ୍ୟା ଲାଗି ରହିଥିଲେ ମଧ୍ୟ ପ୍ରଶାସନ ନଜର ଦେବା ତ ଦୂରର କଥା ଚାଷୀଙ୍କ ଅଭିଯୋଗ ଶୁଣିବାକୁ ବି କାହାରି ପାଖରେ ସମୟ ନାହିଁ ।
ବନ୍ଧୁକ ଦେଖାଇ ୨୦ ଲକ୍ଷ ଟଙ୍କା ସହ ୩୦ ଲକ୍ଷ ଟଙ୍କାର ସୁନଗହଣା ଲୁଟ୍
ନନ୍ଦିଘୋଷ ବ୍ୟୁରୋ : ବାଲେଶ୍ଵର ନୀଳଗିରି ଥାନା କାହାଳିଆ ଗାଁରେ ଲୁଟ୍ । ବନ୍ଧୁକ ଦେଖାଇ ୨୦ ଲକ୍ଷ ଟଙ୍କା ସହ ୩୦ ଲକ୍ଷ ଟଙ୍କାର ସୁନା ଅଳଙ୍କାର ଲୁଟିନେଲେ ଦୁର୍ବୃତ୍ତ । ଗୋବିନ୍ଦା ସିଂଙ୍କ ଘରୁ ହୋଇଛି ଲୁଟ୍ । ୬ ଜଣ ଦୁର୍ବୃତ୍ତ ଗୋବିନ୍ଦା ସିଂହଙ୍କ ଘରେ ପଶି ପରିବାର ଲୋକଙ୍କ ହାତ ଗୋଡ଼ ବାନ୍ଧି ମୁଣ୍ଡରେ ବନ୍ଧୁକ ଲଗାଇ ବ୍ୟାପକ ସୁନା ଗହଣା ଲୁଟି ନେଇଛନ୍ତି । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରୁଛି ।
ବାଂଲାଦେଶ ରାଜବାରିରେ ମର୍ମନ୍ତୁଦ ବସ୍ ଦୁର୍ଘଟଣା ; ୨୩ ଜଣଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ : ବାଂଲାଦେଶ ରାଜବାରିରେ ମର୍ମନ୍ତୁଦ ବସ୍ ଦୁର୍ଘଟଣା। ପଦ୍ମା ନଦୀରେ ବସ୍ ଖସିଯିବାରୁ ୨୩ ଜଣଙ୍କ ମୃତ୍ୟୁ ଘଟିଛି। ଦୁର୍ଘଟଣାରେ ଅନେକ ଆହତ ହୋଇଛନ୍ତି। ରାତିରେ ବସ୍ ଦୁର୍ଘଟଣା ଘଟିବା ଯୋଗୁ ଉଦ୍ଧାର ପ୍ରକ୍ରିୟା ବିଳମ୍ବ ଘଟିଥିଲା। ଆହତମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ବର୍ତ୍ତମାନ ସୁଦ୍ଧା ୨୩ ଜଣଙ୍କ ମୃତଦେହ ଉଦ୍ଧାର ହୋଇଛି। କିଛି ଯାତ୍ରୀ ନିଖୋଜ ହୋଇଥିବା ସୂଚନା ମିଳିଛି। ଘଟଣାସ୍ଥଳରେ ଅଗ୍ନିଶମ ବାହିନୀ, ନୌସେନା, ପୋଲିସ ଓ ଅନ୍ୟ ବାହିନୀ ମୁତୟନ ହୋଇ ଉଦ୍ଧାର କରିଥିଲେ। ରାଜବାରି ଅନ୍ତର୍ଗତ ଦୌଲତାଦିଆରେ ଘଟିଥିଲା ଅଘଟଣ। ବସରେ ପ୍ରାୟ ୫୦ ଯାତ୍ରୀ ଥିଲେ। ଢାକାଠାରୁ ୧୨୮ କିଲୋମିଟର ଦୂରରେ ଘଟିଥିଲା ଦୁର୍ଘଟଣା। ଦୁର୍ଘଟଣାସ୍ଥଳରୁ ବସକୁ କ୍ରେନ ଜରିଆରେ ଉଠାଯାଇଥିଲା।
ଆଜି ବି ଭିଜିପାରେ ଓଡ଼ିଶା ; ୮ ଜିଲ୍ଲାକୁ ୟେଲୋ ଓ୍ବାର୍ଣ୍ଣିଂ ଜାରି
ନନ୍ଦିଘୋଷ ବ୍ୟୁରୋ : ଆଜି ବି ଭିଜିପାରେ ଓଡ଼ିଶା । ଟ୍ରପଲାଇନ୍ ପ୍ରଭାବରେ ରାଜ୍ୟରେ ବର୍ଷା ସମ୍ଭାବନା। ଗ୍ୟାଙ୍ଗୟ ପଶ୍ଚିମବଙ୍ଗରୁ ଦକ୍ଷିଣ ଛତିଶଗଡ଼ ପର୍ଯ୍ୟନ୍ତ ଟ୍ରପ ଲାଇନ ଲମ୍ବିଥିବା ବେଳେ ଏହାର ପ୍ରଭାବରେ ଅନେକ ସ୍ଥାନରେ ହାଲୁକା ବର୍ଷା ହେବ । ଦକ୍ଷିଣ ଓଡିଶା ସମେତ ଉତ୍ତର ଓଡ଼ିଶାର କୋରାପୁଟ, ରାୟଗଡା, ଗଂଜାମ ଗଜପତି, କେନ୍ଦୁଝର ମୟୂରଭଞ୍ଜ ବାଲେଶ୍ୱର ଓ ଭଦ୍ରକରେ ବିଜୁଳି ଘଡଘଡି ସହ ବଜ୍ରପାତ ହେବାର ସମ୍ଭାବନା ରହିଛି । ବର୍ଷା ବେଳେ ୫୦ କିମି ଝଟକା ପବନ ବାହିପାରେ । ଏହି ୮ ଜିଲ୍ଲାକୁ ୟେଲୋ ଓ୍ବାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ସେହିଭଳି କାଲି ରାୟଗଡା ,ଗଂଜାମ, ଗଜପତି ,କନ୍ଧମାଳ ,ବଲାଙ୍ଗୀର, ବରଗଡ଼, ଝାରସୁଗୁଡା , ସୁନ୍ଦରଗଡ ,କେନ୍ଦୁଝର ମୟୂରଭଞ୍ଜ, ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, କଟକ ଜଗତସିଂହପୁର, ଓ ଯାଜପୁର ଜିଲ୍ଲାରେ ବଜ୍ରପାତ ସହ ୪୦ ରୁ ୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି। ସେହିପରି ମାର୍ଚ୍ଚ ୨୮ ତାରିଖରେ କୋରାପୁଟ ,ରାୟଗଡା , ଗଂଜାମ ଗଜପତି ,ସୁନ୍ଦରଗଡ ,ମୟୂରଭଞ୍ଜ, କେନ୍ଦୁଝର ଓ ବାଲେଶ୍ୱର ଭଳି ୮ ଜିଲ୍ଲାରେ ବିଜୁଳି ଘଡଘଡି ସହ ୪୦ ରୁ ୫୦ କିମି ଝଟକା ପବନ ବହିବାର ସମ୍ଭାବନା ରହିଛି । ଏହି ସବୁ ଜିଲ୍ଲାକୁ ୟେଲୋ ଓ୍ବାର୍ଣ୍ଣିଂ ଜାରି କରାଯାଇଛି। ସେହିପରି ୨୯ ଓ ୩୦ ତାରିଖରେ କିଛି ଅଞ୍ଚଳରେ ପାଗ ସାଧାରଣ ହେବା ସତ୍ୱେ କିଛି ଜିଲ୍ଲାରେ ବିଜୁଳି ଘଡଘଡି ସହ ବର୍ଷା ବଜ୍ରପାତର ସମ୍ଭାବନା ଥିବା ପୂର୍ବାନୁମାନ କରିଛି ପାଣିପାଗ ବିଭାଗ।
ଆଜି ଅଶୋକାଷ୍ଟମୀ ; ଅଣଲେଉଟା ରୁକୁଣା ରଥରେ ଚଢ଼ି ରାମେଶ୍ବର ମନ୍ଦିରକୁ ଯିବେ ବାବା ଲିଙ୍ଗରାଜ
ନନ୍ଦିଘୋଷ ବ୍ୟୁରୋ : ଆଜି ଅଶୋକାଷ୍ଟମୀ । ଶ୍ରୀଲିଙ୍ଗରାଜଙ୍କ ରଥଯାତ୍ରା । ଅଣଲେଉଟା ରୁକୁଣା ରଥରେ ଚଢ଼ି ରାମେଶ୍ବର ମନ୍ଦିରକୁ ଯିବେ ବାବା ଲିଙ୍ଗରାଜ । ଏଥିପାଇଁ ଚଳଚଞ୍ଚଳ ଭୁବନେଶ୍ବର ଏକାମ୍ରକ୍ଷେତ୍ର । ରଥ ପ୍ରତିଷ୍ଠା ଓ ନେତ୍ର ଉତ୍ସବ ପାଇଁ ଚାଲିଛି ପ୍ରସ୍ତୁତି l ଗତକାଲି ରାତିରେ ହୋଇଛି ମରିଚି କୁଣ୍ଡ ଜଳ ନିଲାମ l ପରମ୍ପରା ଅନୁଯାୟି ମରିଚି କୁଣ୍ଡ ପ୍ରଥମ ଗରା ପାଣି ଆସିବା ପରେ ରଥ ପ୍ରତିଷ୍ଠା କରାଯାଇଛି l ଗତକାଲି ରାତିରେ ମୁକ୍ତେଶ୍ଵର ମନ୍ଦିର ନିକଟରେ ଥିବା ମରିଚି କୁଣ୍ଡରୁ ଜଳ ଆସି ରଥ ପ୍ରତିଷ୍ଠା କରାଯାଇଥିଲା l ଏହାସହ ଏହି ମରିଚି କୁଣ୍ଡ ଜଳରେ ସ୍ନାନ କଲେ ସନ୍ତାନ ପ୍ରାପ୍ତି ହୋଇଥାଏ ବୋଲି ବିଶ୍ୱାସ ରହିଛି । ତେଣୁ ପ୍ରତିବର୍ଷ ଭଳି ଚଳିତ ବର୍ଷ ପ୍ରଥମ ଗରା ଜଳ ରଥ ପ୍ରତିଷ୍ଠା ପାଇଁ ଯିବା ପରେ ଏହି ଜଳକୁ ନିଲାମ କରାଯାଇଥାଏ l ବଡୁ ସେବାୟତଙ୍କ ଦ୍ୱାରା ଏହି ନିଲାମ ପ୍ରକ୍ରିୟା କରାଯାଇଛି।
ଯୁଦ୍ଧର ଅବସାନ ନେଇ ପ୍ରଶ୍ନବାଚୀ ; ଶାନ୍ତି ପ୍ରତିଷ୍ଠା ଲାଗି ଟ୍ରମ୍ପଙ୍କ ୧୫ ସୂତ୍ରୀ ପ୍ରସ୍ତାବକୁ ମାନିଲାନି ଇରାନ
ନନ୍ଦିଘୋଷ ବ୍ୟୁରୋ : ପଶ୍ଚିମ ଏସିଆରେ ଯୁଦ୍ଧର ଅବସାନ ନେଇ ଅଚଳାବସ୍ଥା ଜାରି। ଶାନ୍ତି ପ୍ରତିଷ୍ଠା ଲାଗି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ୧୫ ସୂତ୍ରୀ ପ୍ରସ୍ତାବକୁ ଅଗ୍ରାହ୍ୟ କରିଛନ୍ତି ଇରାନ ବୈଦେଶିକ ମନ୍ତ୍ରୀ ଆବାସ ଆରାଗାଚି। ତେବେ ଏହି ପ୍ରସ୍ତାବ ଉପରେ ଶୀର୍ଷ ନେତୃତ୍ବ ଚିନ୍ତା କରୁଛନ୍ତି ବୋଲି ସେ କହିଛନ୍ତି। ଇରାନରେ ଶାସନ ପରିବର୍ତ୍ତନ ଓ ବିଜୟ ନେଇ ଟ୍ରମ୍ପ ଯେଉଁ ବାହାଦୂରୀ ମାରୁଛନ୍ତି ତାହାର କୌଣସି ଭିତ୍ତି ନାହିଁ ବୋଲି ସେ କହିଛନ୍ତି। ଇରାନ ସ୍ଥାୟୀ ସମାଧାନ ଚାହେଁ, ଦୀର୍ଘକାଳୀନ ଯୁଦ୍ଧ ଚାହେଁନାହିଁ। ଯୁଦ୍ଧର ଅନ୍ତ ଘଟିବା ଲାଗି ଟ୍ରମ୍ପଙ୍କ ନିର୍ଦ୍ଦେଶକୁ ଇରାନ ପାଳନ କରିବ ନାହିଁ ବୋଲି ଆରାଗାଚି କହିଛନ୍ତି। ସେପଟେ ଆମେରିକାର ଏକ ଏଫ-୧୮ ଲଢୁଆ ବିମାନକୁ ଇରାନ ଟାର୍ଗେଟ କରିଛି ବୋଲି କହିଛି ଆଇଆରଜିସି। ସେପଟେ ଭାରତର ଏଲପିଜି ସଙ୍କଟ ଟାଳିବାକୁ ସହଯୋଗର ହାତ ବଢାଇଛି ଆର୍ଜେଣ୍ଟିନା। ପ୍ରାୟ ୨୦ ହଜାର କିଲୋମିଟର ଦୂରରେ ଥିବା ଆର୍ଜେଣ୍ଟିନା ଭାରତକୁ ଅଧିକ ଏଲପିଜି ସହାୟତା ଦେବ ବୋଲି କହିଛି। ଚଳିତ ବର୍ଷ ଭାରତକୁ ଆର୍ଜେଣ୍ଟିନା ୫୦ ହଜାର ଟନ ଏଲପିଜି ଦେଇଥିବାବେଳେ ଗତବର୍ଷ ଦେଇଥିଲା ୨୨ ହଜାର ଟନ। ଯୁଦ୍ଧ ପରେ ପ୍ରାୟ ୩୯ ହଜାର ଟନ ଏଲପିଜି ଆର୍ଜେଣ୍ଟିନା ଭାରତକୁ ଦେଲାଣି। ବଡ଼କଥା ହେଉଛି ୨୦୨୪ ପୂର୍ବରୁ ଭାରତକୁ ଆର୍ଜେଣ୍ଟିନା ଏଲପିଜି ଦେଉ ନଥିଲା। ଗତ ମାର୍ଚ୍ଚ ୫ ତାରିଖରେ ଆର୍ଜେଣ୍ଟିନା ଅତିରିକ୍ତ ୧୧ ହଜାର ଟନ ଏଲପିଜି ପଠାଇଥିଲା। ଯୁଦ୍ଧର ଅବସାନ ଲାଗି ଉଭୟ ଚୀନ ଓ ପାକିସ୍ତାନ ଆଗ୍ରହ ପ୍ରକାଶ କରିଥିଲେ ବି ଏନେଇ ବିଶେଷ ଅଗ୍ରଗତ ହୋଇପାରିନାହିଁ। ସେପଟେ ଇରାନର ଇସଫାହନରେ ଭୟଙ୍କର ବିସ୍ଫୋରଣ ଘଟିଥିବା ସୂଚନା ମିଳିଛି।
ହାର୍ଡକୋର ଶୁକୃ ସହ ୫ ମାଓବାଦୀଙ୍କ ଆତ୍ମସମର୍ପଣ
ନନ୍ଦିଘୋଷ ବ୍ୟୁରୋ:ମାଓମୁକ୍ତ ଓଡ଼ିଶା ଅଭିଯାନର ଶେଷ ପାହାଚରେ କନ୍ଧମାଳ ଜିଲ୍ଲା l ହାର୍ଡକୋର ଶୁକୃ ସହ ୫ ମାଓବାଦୀଙ୍କ ଆତ୍ମସମର୍ପଣ । ଏକ ସ୍ବତନ୍ତ୍ର କାର୍ଯ୍ୟକ୍ରମ ଜରିଆରେ ସେମାନଙ୍କୁ ମୁଖ୍ୟ ସ୍ରୋତକୁ ସ୍ବାଗତ କରିଛନ୍ତି ନକ୍ସଲ ଅପରେସନ ଏଡିଜି ସଂଜୀବ ପଣ୍ଡା । ୪୯ ବର୍ଷୀୟ ଶୁକୃର ମୁଣ୍ଡ ଉପରେ ଥିଲା ୫୫ ଲକ୍ଷର ପୁରସ୍କାର ରାଶି । ସେ ୩୦ ବର୍ଷ ଧରି ମାଓ ସଂଗଠନରେ ସକ୍ରିୟ ଥିଲା । ପ୍ରାୟ ସମସ୍ତ ଟପ୍ କ୍ୟାଡର ମାଓନେତାଙ୍କ ମୃତ୍ୟୁ କିମ୍ବା ଆତ୍ମସମର୍ପଣ ପରେ ଏକମାତ୍ର ଶୁକୃ ପୋଲିସର ମୁଣ୍ଡବ୍ୟଥା ହୋଇ ରହିଥିଲା । କିଛି ସାଥୀଙ୍କୁ ଧରି କନ୍ଧମାଳ-ରାୟଗଡ଼ା-କଳାହାଣ୍ଡି ଜିଲ୍ଲା ସୀମାନ୍ତରେ ସେ ସକ୍ରିୟ ରହିଥିଲା ।
ପୋଲିସ ପାଖରେ ଗୋଟିଏ ଏକେ-୪୭ସହିତ ୫ଟି ଅତ୍ୟାଧୁନିକ ବନ୍ଧୁକ ମଧ୍ୟ ସମର୍ପଣ କରିଛନ୍ତି ଏହି ମାଓବାଦୀ । ଗତ ମାସ ୨୫ ତାରିଖରେ ଦାରିଙ୍ଗବାଡ଼ି ଥାନା ତର୍ଗତ ପକାରୀ ସଂରକ୍ଷିତ ଜଙ୍ଗଲ ଭିତରେ ସହଯୋଗୀ ମାଓନେତା ଅନ୍ଵେଷଙ୍କ ଗଳିତ ମୃତଦଦେହ ଉଦ୍ଧାର କରିଥିଲା ପୋଲିସ । ଅନ୍ଵେଷଙ୍କୁ ଶୁକୃ ଓ କିଛି ସହଯୋଗୀ ମାରି ପୋତି ଦେଇଥିବା ପୁଲିସକୁ ସୂଚନା ମିଳିଥିଲା । ଶୁକୃର ଆତ୍ମସମର୍ପଣ ପରେ କନ୍ଧମାଳରେ ମାଓବାହିନୀ ଏକପ୍ରକାର ଶେଷ ହୋଇଯାଇଛି । ଏବେ ଏମାନଙ୍କ ସଂଖ୍ୟା ୧୦ ତଳକୁ ଖସି ଆସିଛି ବୋଲି ଏଡିଜି ସଞ୍ଜୀବ ପଣ୍ଡା କହିଛନ୍ତି ।
ସାରା ଦେଶରେ ଏଲପିଜି ସଂକଟ ; ସଂସଦ ଭବନ ବାହାରେ ବିରୋଧୀ ସାଂସଦଙ୍କ ପ୍ରତିବାଦ
ନୂଆଦିଲ୍ଲୀ : ସାରା ଦେଶରେ ଏଲପିଜି ସଂକଟ । ହଜାର ହଜାର ଉପଭୋକ୍ତା ଗ୍ୟାସ ନପାଇ ହେଉଛନ୍ତି ହନ୍ତସନ୍ତ । ସେପଟେ ଏଲପିଜି ସଙ୍କଟ ନେଇ ସଂସଦ ଭବନ ବାହାରେ ବିରୋଧୀ ସାଂସଦ କରିଛନ୍ତି ପ୍ରତିବାଦ। ସରକାରଙ୍କୁ ଟାର୍ଗେଟ କରିଛନ୍ତି ବିରୋଧୀ । କଂଗ୍ରେସ, ଜେଏମଏମ ସମେତ ବହୁ ବିରୋଧୀ ଦଳର ସାଂସଦ କରିଛନ୍ତି ନାରାବାଜି ।
ଏଲପିଜି ସଙ୍କଟ ନେଇ ସରକାର ଫମ୍ପା ପ୍ରତିଶ୍ରୁତି ଦେଉଛନ୍ତି ବୋଲି ସେମାନେ ଅଭିଯୋଗ କରିଛନ୍ତି । ସେପଟେ ଦେଶର ବହୁ ସ୍ଥାନରେ ପେଟ୍ରୋଲ ଲାଗି ଅଧିକାଂଶ ପେଟ୍ରୋଲ ପମ୍ପରେ ଲାଗିଛି ଲମ୍ବା ଲାଇନ । ଖରାରେ ଠିଆ ହୋଇ ଶହ ଶହ ଲୋକ ଅପେକ୍ଷା କରିବା ଦେଖାଯାଇଛି ।