ନନ୍ଦିଘୋଷବ୍ୟୁର: ତାମିଲ ଟେଲିଭିଜନର ଲୋକପ୍ରିୟ ରିଆଲିଟି ଶୋ’ Bigg Boss ତାମିଲ’ ଜରିଆରେ ରାତାରାତି ଲୋକପ୍ରିୟତା ହାସଲ କରିଥିବା ଅଭିନେତା ବାଲାଜୀ ମୁରୁଗାଦାସ ପୁଣି ଚର୍ଚ୍ଚାରେ। ନିକଟରେ ତାଙ୍କ ଘରେ ନାର୍କୋଟିକ୍ସ ବିଭାଗ ଓ ପୋଲିସ ଟିମ୍ ପକ୍ଷରୁ ଚଢ଼ାଉ କରାଯାଇଛି। ଏହି ଘଟଣାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଅଭିନେତା। ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ପୋଷ୍ଟ କରି ପୋଲିସ ପ୍ରଶାସନକୁ ଅନେକ ପ୍ରଶ୍ନ ପଚାରିଛନ୍ତି ଅଭିନେତା ଏବଂ ତାଙ୍କର ଏହି ପୋଷ୍ଟ ଏବେ ସୋସିଆଲ ମିଡିଆରେ ଭାଇରାଲ ହେଉଛି।
ତାମିଲ ଟେଲିଭିଜନ ଜଗତରେ ‘ବିଗ୍ ବସ୍’ର ଲୋକପ୍ରିୟତା ବେଶ୍ ଅଧିକ। ଏହି ଶୋ’ରେ ଭାଗ ନେଉଥିବା ପ୍ରତିଯୋଗୀମାନେ ଘରେ ଘରେ ପରିଚିତ ହୋଇଯାଆନ୍ତି। ବାଲାଜୀ ମୁରୁଗାଦାସ ‘ବିଗ୍ ବସ୍ ତାମିଲ ସିଜନ୍ ୪’ରେ ରନର୍ସ ଅପ୍ ହୋଇଥିବା ବେଳେ ୨୦୨୨ରେ ପ୍ରସାରିତ ‘ବିଗ୍ ବସ୍ ଅଲ୍ଟିମେଟ୍ ସିଜନ୍ ୧’ର ବିଜେତା ହୋଇଥିଲେ। ଏହାପରେ ତାଙ୍କୁ ତାମିଲ ସିନେମାରେ କାମ କରିବାର ସୁଯୋଗ ମଧ୍ୟ ମିଳିଥିଲା। ବର୍ତ୍ତମାନ ସେ ଟିଭିରେ ପ୍ରସାରିତ କୁକିଂ ରିଆଲିଟି ଶୋ’ ‘ମାଷ୍ଟରସେଫ୍ ତାମିଲ’ରେ ପ୍ରତିଯୋଗୀ ଭାବେ ନଜର ଆସୁଛନ୍ତି।
ତେବେ ଏହି ଘଟଣା ପରେ ନିଜ ଏକ୍ସ ଆକାଉଣ୍ଟରେ ଏକ ପୋଷ୍ଟ କରି ବାଲାଜୀ ଲେଖିଛନ୍ତି, ମୁଁ ଜାଣିବାକୁ ଚାହୁଁଛି ଯେ ମୋ ବିରୋଧରେ ଅଭିଯୋଗ କିଏ କରିଛି। ସେ ମୁଖ୍ୟମନ୍ତ୍ରୀ ବିଜୟଙ୍କୁ ପ୍ରଶ୍ନ କରିଛନ୍ତି, ଅଭିଯୋଗ କିଏ ଏବଂ କେଉଁ କାରଣରୁ କରିଛି, ତାହା ଜାଣିବାର ମୋର ପୂରା ଅଧିକାର ରହିଛି। ବାରମ୍ବାର ପଚାରିବା ସତ୍ତ୍ୱେ ଅଧିକାରୀମାନେ ମୋତେ ଏନେଇ କୌଣସି ସୂଚନା ଦେଇନଥିଲେ। ମୁଁ ରକ୍ତ ପରୀକ୍ଷା କରାଇବାକୁ ମଧ୍ୟ ପ୍ରସ୍ତୁତ ଅଛି। କିନ୍ତୁ ଆପଣଙ୍କ ପୋଲିସ ବ୍ୟବସ୍ଥାକୁ ନେଇ ମୋତେ ଲଜ୍ଜା ଲାଗୁଛି।
ଆଗକୁ ସେ କହିଛନ୍ତି, ମୋ ଘରକୁ ୧୫ ଜଣ ପୋଲିସ କର୍ମଚାରୀ ଆସିଥିଲେ। କିନ୍ତୁ ଘରେ ଯାଞ୍ଚ କରିବା ସମୟରେ ସେମାନଙ୍କୁ କେବଳ ୩ଟି ବିଲେଇ ଓ ଗୋଟିଏ କୁକୁର ମିଳିଥିଲା। କେଉଁ ଆଧାରରେ ସେମାନେ ମୋ ଘରକୁ ଆସିଥିଲେ, ତାହା ମୁଁ ଜାଣିବାକୁ ଚାହୁଁଛି। ସେମାନଙ୍କ ପାଖରେ କୌଣସି ସର୍ଚ୍ଚ ୱାରେଣ୍ଟ ମଧ୍ୟ ନଥିଲା। ମୁଁ କୌଣସି ଭୁଲ୍ କାମ କରିନଥିବାରୁ ନିଜେ ସେମାନଙ୍କୁ ଘର ଭିତରକୁ ଆସିବାକୁ ଅନୁମତି ଦେଇଥିଲି। ତଥାପି ଏହି କାର୍ଯ୍ୟାନୁଷ୍ଠାନର ସ୍ପଷ୍ଟୀକରଣ ମୋତେ ଦରକାର।
ବିନା ସର୍ଚ୍ଚ ୱାରେଣ୍ଟରେ ୧୫ ଜଣ ପୋଲିସ କର୍ମଚାରୀ ଘରେ ପହଞ୍ଚି ଯାଞ୍ଚ କରିବା ଏବଂ ଏହାକୁ ନେଇ ବାଲାଜୀ ଉଠାଇଥିବା ପ୍ରଶ୍ନ ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି। ତାଙ୍କ ପୋଷ୍ଟକୁ ନେଇ ଅନେକ ଲୋକ ପ୍ରତିକ୍ରିୟା ଦେଉଛନ୍ତି। ତେବେ ଏହି ଘଟଣା ଉପରେ ପୋଲିସ ପ୍ରଶାସନ କିମ୍ବା ସମ୍ପୃକ୍ତ ଅଧିକାରୀଙ୍କ ପକ୍ଷରୁ ଆଗକୁ କଣ ପ୍ରତିକ୍ରିୟା ଆସୁଛି, ତାହା ଉପରେ ସମସ୍ତଙ୍କ ନଜର ରହିଛି।
