ନନ୍ଦିଘୋଷବ୍ୟୁର: ଘରେ ପଶି କରୁଥିଲେ ଚୋରି । ଆଉ ଚୋରି ସୁନାରେ ଦେଖାଉଥିଲେ ହିରୋଗିରି । ବେକରେ ସୁନା ଚେନ୍, ହାତରେ ସୁନା ଅଳଙ୍କାର ଆଉ ରାଜକୀୟ ଠାଣିରେ ବୁଲେଟ୍ ରାଇଡ୍ । ଚୋରି ଟଙ୍କାରେ ଚାଲିଥିଲା ବିଳାସପୂର୍ଣ୍ଣ ଜୀବନ । ଏପରିକି ଚୋରି ସୁନା ପିନ୍ଧି ଇନଷ୍ଟାଗ୍ରାମ୍ରେ ରିଲ୍ସ କରି ଦେଖାଉଥିଲେ ନିଜର ଷ୍ଟାଇଲ୍ । ହେଲେ ସୋସିଆଲ୍ ମିଡିଆରେ ହିରୋଗିରି ଦେଖାଇବା ପଡ଼ିଲା ମହଙ୍ଗା ।
ଢେଙ୍କାନାଳ ପୋଲିସ ହାତରେ ଧରାପଡ଼ିଛି ୬ ଜଣିଆ ଯୁବ ଚୋର ଗ୍ୟାଙ୍ଗ୍ । ଗିରଫ ଓ କାବୁ ହୋଇଥିବା ଅଭିଯୁକ୍ତଙ୍କ ନିକଟରୁ ୬୦ ଗ୍ରାମରୁ ଅଧିକ ସୁନା ଅଳଙ୍କାର, ଗୋଟିଏ ବୁଲେଟ୍ ମୋଟରସାଇକେଲ୍ ଏବଂ ଗୋଟିଏ ଗ୍ୟାସ୍ ସିଲିଣ୍ଡର ଜବତ ହୋଇଛି ।
ତେବେ ପୋଲିସ ସୂଚନା ଅନୁସାରେ, ଅଭିଯୁକ୍ତମାନେ ବିଭିନ୍ନ ଘରେ ପଶି ସୁନା ଅଳଙ୍କାର ଚୋରି କରୁଥିଲେ । ପରେ ଚୋରି ସୁନାକୁ ବିକ୍ରି କରିବା ସହ ବିଭିନ୍ନ ସୁନା ଦୋକାନରେ ଏକ୍ସଚେଞ୍ଜ କରି ନୂଆ ଅଳଙ୍କାର ଆଣୁଥିଲେ । ଏହି କାର୍ଯ୍ୟରେ ଅଭିଯୁକ୍ତଙ୍କ ସ୍ତ୍ରୀମାନେ ମଧ୍ୟ ସହଯୋଗ କରୁଥିବା ପୋଲିସ ତଦନ୍ତରୁ ଜଣାପଡ଼ିଛି । ତେବେ ଚୋରି ସୁନାରେ କେହି ବୁଲେଟ୍ କିଣୁଥିବା ବେଳେ ଆଉ କେହି ସୁନା ଅଳଙ୍କାର ପିନ୍ଧି ସୋସିଆଲ୍ ମିଡିଆରେ ରିଲ୍ସ କରୁଥିଲେ । ଏହିପରି ଚୋରି ଟଙ୍କାରେ ଅଭିଯୁକ୍ତମାନେ ବିଳାସପୂର୍ଣ୍ଣ ଜୀବନ ମଧ୍ୟ ବିତାଉଥିଲେ ।
ଅଭିଯୁକ୍ତମାନେ ହେଲେ ଢେଙ୍କାନାଳ ଟାଉନ୍ ଥାନା ଅନ୍ତର୍ଗତ ସରଜଙ୍ଗ ସାହିର ମିଲୁ ନାଏକ, ଲିପୁ ନାଏକ, ଅମା ନାଏକ ଓ ଭୁଗୁ ନାଏକ । ଏମାନଙ୍କ ବୟସ ୧୯ରୁ ୨୧ ବର୍ଷ ମଧ୍ୟରେ । ଏମାନଙ୍କ ସହ ଚୋରି ଘଟଣାରେ ସମ୍ପୃକ୍ତ ଆଉ ଦୁଇ ନାବାଳକଙ୍କୁ ମଧ୍ୟ ପୋଲିସ କାବୁ କରିଛି । ତେବେ ଏହି ଗ୍ୟାଙ୍ଗ୍ କେତୋଟି ଘରେ କଳାକନା ବୁଲାଇଛି, ଜିଲ୍ଲାର ଆଉ କେଉଁ କେଉଁ ଚୋରି ଘଟଣାରେ ଏମାନଙ୍କ ସମ୍ପୃକ୍ତି ରହିଛି,ଏସବୁ ଦିଗକୁ ନେଇ ଖୋଳତାଡ଼ ଜାରି ରଖିଛି ଢେଙ୍କାନାଳ ପୋଲିସ ।
