spot_img
Home Blog Page 6007

୨୦୧୯ ପାଇଁ ଗାନ୍ଧୀ ଶାନ୍ତି ସମ୍ମାନ ପାଇବେ ଓମାନର ପୂର୍ବତନ ସୁଲତାନ

ନୂଆଦିଲ୍ଲୀ: ୨୦୧୯ ପାଇଁ ଗାନ୍ଧୀ ଶାନ୍ତି ସମ୍ମାନ ଘୋଷିତ ହୋଇଛି । ୨୦୧୯ ପାଇଁ ଓମାନର ପୂର୍ବତନ ସୁଲତାନ ଦିବଙ୍ଗତ କାବୁସ ବିନ୍ ଅଲ ସୈଦଙ୍କୁ ଏହି ସମ୍ମାନ ପ୍ରଦାନ କରାଯିବ । ୧୯୯୫ ମସିହାରେ ମହାତ୍ମା ଗାନ୍ଧୀଙ୍କ ସମ୍ମାନରେ ଏହି ପୁରସ୍କାର ପ୍ରଦାନ କରାଯାଇ ଆସୁଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି,ସୁପ୍ରିମ କୋର୍ଟ ପ୍ରଧାନବିଚାରପତି ଓ ଲୋକସଭାରେ ବିରୋଧି ଦଳ ନେତାଙ୍କୁ ନେଇ ଗଠିତ ଜୁରି ସୁଲତାନ କାବୁସ ବିନଙ୍କ ନାମ ଏହି ସମ୍ମାନ ପାଇଁ ବାଛିଛନ୍ତି। ମାର୍ଚ୍ଚ ୧୯ ତାରିଖ ଦିନ ସର୍ବସମ୍ମତ ଭାବେ ସୁଲତାନଙ୍କ ନାମ ସମ୍ମାନ ପାଇଁ ଜୁରି ଚୟନ କରିଥିଲେ । ସାମାଜିକ, ଅର୍ଥନୈତିକ ଓ ରାଜନୈତିକ ସୁଧାର ଦିଗରେ ତାଙ୍କର ଯୋଗଦାନକୁ ଦୃଷ୍ଟିରେ ରଖି ତାଙ୍କୁ ଏହି ସମ୍ମାନ ମରୋଣପରାନ୍ତ ଭାବେ ପ୍ରଦାନ କରାଯିବ ।

ନେଲସନ ମଣ୍ଡେଲାଙ୍କଠାରୁ ବାବା ଆମତେ ଆଗରୁ ଗାନ୍ଧୀ ଶାନ୍ତି ସମ୍ମାନରେ ସମ୍ମାନିତ ହୋଇଛନ୍ତି । ବିବେକାନନ୍ଦ କେନ୍ଦ୍ର,ଅକ୍ଷୟ ପାତ୍ର ଭଳି ସଂଗଠନକୁ ମଧ୍ୟ ସାମାଜିକ କାର୍ଯ୍ୟ ପାଇଁ ଏହି ସମ୍ମାନରେ ସମ୍ମାନିତ କରାଯାଇଛି । ପୁରସ୍କାର ବାବଦରେ ଏକ କୋଟି ଟଙ୍କା ସହିତ ମାନପତ୍ର ପ୍ରଦାନ କରାଯାଇଥାଏ ।

ରାଜଧାନୀରେ ବଢ଼ୁଛି କରୋନା ସଂକ୍ରମିତଙ୍କ ସଂଖ୍ୟା; କଡ଼ାକଡ଼ି ହେବ କଟକଣା, ମାସ୍କ ପିନ୍ଧିବା ବାଧ୍ୟତାମୂଳକ

ଭୁବନେଶ୍ୱର: ଭୁବନେଶ୍ୱରରେ ବଢ଼ୁଛି କରୋନା ସଂକ୍ରମିତଙ୍କ ସଂଖ୍ୟା । ଏନେଇ ସୋମବାର ବିଏମ୍‌ସି କମିଶନର ପ୍ରେମ୍‌ଚାନ୍ଦ ଚୌଧରୀ ସୂଚନା ଦେଇଛନ୍ତି । ସେ କହିଛନ୍ତି ଗତ ଏକ ସପ୍ତାହ ହେବ ଭୁବନେଶ୍ୱରରେ କରୋନା ସଂକ୍ରମଣ ସଂଖ୍ୟା ପ୍ରତ୍ୟେକ ଦିନ ଦୁଇ ଅଙ୍କ ଛୁଉଁଛି । ତେଣୁ ଏହାକୁ ରୋକିବାକୁ ହେଲେ ପ୍ରଶାସନକୁ କଡ଼ା ପଦକ୍ଷେପ ନେବାକୁ ପଡ଼ିବ । ପୋଲିସ ପ୍ରଶାସନ ମାସ୍କ ବ୍ୟବହାର ଓ ସାମଜିକ ଦୂରତା ପ୍ରତି ଧ୍ୟାନ ଦେବେ । ସାଧାରଣ ଲୋକ ଯେପରି ମାସ୍କ ପିନ୍ଧିବେ ଓ ସାମାଜିକ ଦୂରତା ଅବଲମ୍ବନ କରିବେ ତାହା ଉପରେ ବିଏମ୍‌ସି ଓ ପୋଲିସ ପ୍ରଶାସନ ପକ୍ଷରୁ କଡ଼ା ନଜର ରହିବ ।

ଜାଭିୟର ଅନୁଷ୍ଠାନରେ ୨୮ ଜଣ କରୋନା ପଜିଟିଭ୍‌ ଚିହ୍ନଟ ହୋଇଥିବାରୁ ତାକୁ ସିଲ୍‌ କରିଦିଆଯାଇଛି । ସୋମାବାର ସେଠାରୁ ୨୦୧ ଜଣଙ୍କ ନମୁନା ସଂଗ୍ରହ କରାଯାଇଛି । ତେବେ ପ୍ରତ୍ୟେକ ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ କରାଯାଉଛି । ଯେଉଁମାନେ ଆକ୍ରାନ୍ତଙ୍କ ସଂସ୍ପର୍ଷରେ ଆସିଛନ୍ତି ସେମାନଙ୍କର ଟେଷ୍ଟିଂ କରାଯିବ । ତେବେ ଶନିବାର ଜାଭିୟରରେ ହୋଇଥିବା ସମାବର୍ତ୍ତନ ଉତ୍ସବ ପାଇଁ ବିଏମ୍‌ସି ଅନୁମତି ଦେଇନଥିଲା । ଏହି ଉତ୍ସବରେ ଅନେକ ଲୋକ ଜମା ହୋଇଥିଲେ ।

ତେବେ ଏଣିକି ଆଉ ଅବହେଳାକୁ ବରଦାସ୍ତ କରାଯିବନି । ରେଗୁଲାର ଚେକିଂ ହେବ । ଏନ୍‌ଫୋର୍ସମେଣ୍ଟ ଟିମ୍‌ ଏଣିକି ପ୍ରତ୍ୟେକ ଦିନ ଚଢ଼ାଉ କରିବେ । ଯେଉଁ ସବୁ ଅଞ୍ଚଳରେ ଗହଳି ଦେଖାଯିବ ସେଠାରେ ପ୍ରଶାସନର ନଜର ରହିବ । ରେଳ ଷ୍ଟେସନ ଓ ବିମାନବନ୍ଦର ଉପରେ ମଧ୍ୟ ତୀକ୍ଷ୍ଣ ନଜର ରହିବ । ତେବେ ଅନ୍ୟ ରାଜ୍ୟରୁ ତଥା ବିଦେଶରୁ ଫେରୁଥିବା ଯାତ୍ରୀଙ୍କ ଉପରେ ଅଧିକ ଫୋକସ୍‌ ରହିବ । RTPCR ଟେଷ୍ଟିଂ ସଂଖ୍ୟା ବୃଦ୍ଧି କରାଯିବ । ସ୍ମାର୍ଟସିଟିର ଅନ୍ୟ ଅଂଚଳରେ ବି ଚେକିଂ ହେବ ।

ବିଭିନ୍ନ ଶିକ୍ଷାନୁଷ୍ଠାନରେ ସ୍ୱତନ୍ତ୍ର ଧ୍ୟାନ ଦେବା ସହ ଟେଷ୍ଟିଂ କରାଯିବ । ଲିଙ୍ଗରାଜ ମନ୍ଦିରର ଜଣେ ସେବାୟତଙ୍କ ସମେତ ତାଙ୍କ ପରିବାରର ଅନ୍ୟ ୩ ଜଣ ପଜିଟିଭ ଚିହ୍ନଟ ହୋଇଛନ୍ତି ।

୬୭ ତମ ଜାତୀୟ ଫିଲ୍ମ ପୁରସ୍କାର: କଙ୍ଗନା ଶ୍ରେଷ୍ଠ ଅଭିନେତ୍ରୀ, ଛିଛୋରେ ବେଷ୍ଟ୍ ଫିଲ୍ମ

ନୂଆଦିଲ୍ଲୀ: ୬୭ ତମ ଜାତୀୟ ଫିଲ୍ମ ପୁରସ୍କାର ଘୋଷଣା ହୋଇଛି । ହାଇଲାଇଟରେ ଅଛନ୍ତି କଙ୍ଗନା ଓ ସୁଶାନ୍ତ ସିଂ ରାଜପୁତ । କଙ୍ଗନାଙ୍କୁ ମଣିକର୍ଣ୍ଣିକା ଓ ପଙ୍ଗା ଫିଲ୍ମ ପାଇଁ ଶ୍ରେଷ୍ଠ ଅଭିନେତ୍ରୀ ସମ୍ମାନ ମିଳିଥିବା ବେଳେ ସୁଶାନ୍ତ ସିଂଙ୍କ ଫିଲ୍ମ ଛିଛୋରେକୁ ମିଳିଛି ବେଷ୍ଟ୍ ଫିଲ୍ମର ରାଷ୍ଟ୍ରୀୟ ସମ୍ମାନ । ସେହିଭଳି ମନୋଜ ବାଜପାୟୀଙ୍କୁ ‘ଭୋଁସଲେ’ ଫିଲ୍ମ ପାଇଁ ଶ୍ରେଷ୍ଠ ଅଭିନେତାର ଆୱାର୍ଡ ମିଳିଛି ।

ବେଷ୍ଟ୍ ପ୍ଲେବ୍ୟାକ୍ ସିଙ୍ଗର ଆୱାର୍ଡ ଯାଇଛି ଫିଲ୍ମ କେଶରୀ ପାଇଁ ବି ପ୍ରାକଙ୍କ ଖାତାକୁ । ସର୍ବଶ୍ରେଷ୍ଠ ମରାଠି ଫିଲ୍ମ ଭାବେ ‘ବାରଦୋ’ ଚୟନ ହୋଇଛି । ‘ରବ ଦା ରେଡିଓ-୨’କୁ ସର୍ବଶ୍ରେଷ୍ଠ ପଞ୍ଜାବୀ ଫିଲ୍ମ, ‘ଛୋରି ଛୋରୋଁସେ କମ ନେହିଁ’ ହରିଆନି ଭାଷାରେ ଶ୍ରେଷ୍ଠ ଫିଲ୍ମ ଭାବେ ବିବେଚିତ ହୋଇଥିବା ବେଳେ ବେଷ୍ଟ ଆନିମେସନ୍ ଫିଲ୍ମ ଭାବେ ‘ରାଧା’ ଓ ବେଷ୍ଟ୍ ଇଣ୍ଟ୍ରେଷ୍ଟିଂ ଫିଲ୍ମ ଭାବେ ‘ଜାକାଲା’ (ମରାଠି) ମନୋନୀତ ହୋଇଛି ।

୨୦୨୦-୨୧ ସୁଦ୍ଧା ବିଭିନ୍ନ ସ୍ରୋତରୁ ରାଜ୍ୟ ସରକାର କରିଛନ୍ତି ୧ ଲକ୍ଷ ୩ ହଜାର ୪୧୦ କୋଟି ଋଣ

ଭୁବନେଶ୍ୱର: ବଢ଼ୁଛି ରାଜ୍ୟର ଋଣଭାର । କ୍ରମାଗତ ଭାବେ ରାଜ୍ୟର ଋଣଭାର ବଢ଼ିବାରେ ଲାଗିଛି । ୨୦୨୦-୨୦୨୧ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟର ଋଣଭାର ୧ ଲକ୍ଷ ୩ ହଜାର ୪୧୦ କୋଟି ଟଙ୍କା ରହିଥିବା ବିଧାନସଭାରେ ମନ୍ତ୍ରୀ ଉତ୍ତର ରଖିଛନ୍ତି । କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କ ପ୍ରଶ୍ନର ଉତ୍ତର ଦେବାକୁ ଯାଇ ଅର୍ଥମନ୍ତ୍ରୀ ନିରଞ୍ଜନ ପୁଜାରୀ ଏହି ତଥ୍ୟ ଦେଇଛନ୍ତି ।

ତେବେ ନିରଞ୍ଜନ ପୂଜାରୀ ନିଜ ଉତ୍ତରରେ କହିଛନ୍ତି ଯେ, ରାଜ୍ୟ ସରକାର ସାଧାରଣତଃ ବିଭିନ୍ନ ଆନ୍ତର୍ଜାତୀୟ ସଂସ୍ଥା, ଭାରତ ସରକାର, ଆଭ୍ୟନ୍ତରୀଣ ସୂତ୍ର, ଭବିଷ୍ୟନିଧି ପାଣ୍ଠି ଓ ଅନ୍ୟାନ୍ୟ ପାଣ୍ଠିରୁ ଋଣ ଆହରଣ କରିଥାନ୍ତି । ବାହ୍ୟ ସାହାଯ୍ୟପ୍ରାପ୍ତ ପ୍ରକଳ୍ପ ତଥା ଭିତ୍ତିଭୂମି ସୃଷ୍ଟି ପାଇଁ ରଜ୍ୟ ସରକାର ବିଭିନ୍ନ ଆନ୍ତର୍ଜାତୀୟ ଋଣ ପ୍ରଦାନକାରୀ ସଂସ୍ଥାମାନଙ୍କଠାରୁ ସହାୟତା ନେଉଛନ୍ତି । ବର୍ତ୍ତାମନ ଜଳସେଚନ, ଶକ୍ତି, ସଡ଼କ, ବିପର୍ଯ୍ୟୟ ପରିଚାଳନା, ସହରାଞ୍ଚଳ ଭିତ୍ତିଭୂମି ପରି ପ୍ରକଳ୍ପ ଗୁଡ଼ିକ ପାଇଁ ଓ୍ୱାର୍ଲ୍ଡ ବ୍ୟାଙ୍କ, ଏସିଆନ୍‌ ଡେଭଲପ୍‌ମେଣ୍ଟ ବ୍ୟାଙ୍କ, ଇଣ୍ଟରନାସନାଲ ଫଣ୍ଡ ଫର୍‌ ଏଗ୍ରିକଲ୍‌ଚରାଲ ଡେଭଲପ୍‌ମେଣ୍ଟ, ଜାପାନ ଇଣ୍ଟରନାସନାଲ କର୍ପୋରେସନ୍‌ ଏଜେନ୍ସି, କେଏଫ୍‌ଡବ୍ଲ୍ୟୁ ଡଭ୍‌ଲପ୍‌ମେଣ୍ଟ ବ୍ୟାଙ୍କ, ବ୍ରିକ୍ସ ବ୍ୟାଙ୍କ, ଏଆଇଆଇବି ଆଦି ସଂସ୍ଥା ମାନଙ୍କରୁ ବାହ୍ୟ ସହାୟତା ଗ୍ରହଣ କରାଯାଇଛି ।‌

ତେବେ ରାଜ୍ୟ ସରକାର ଋଣ କରିଥିବା ଏହି ୧ ଲକ୍ଷ ୩ ହଜାର ୪୧୦ କୋଟି ଟଙ୍କା ମଧ୍ୟରେ ୬ ହଜାର ୩୪୭ କୋଟି ଟଙ୍କା ବୈଦେଶିକ ଋଣ ସାମିଲ ରହିଛି । ନାବାର୍ଡ ଠାରୁ ରାଜ୍ୟ ସରକାର ୧୫ ହଜାର ୬୨୩ କୋଟି ଟଙ୍କା ଋଣ ଆଣିଛନ୍ତି । ରାଜ୍ୟ ସରକାରଙ୍କ ଆଭ୍ୟନ୍ତରୀଣ ଋଣର ପରିମାଣ ୫୩ ହଜାର ୩୮୫ କୋଟି ଟଙ୍କା ରହିଛି । ତେବେ ରାଜ୍ୟର ବର୍ତ୍ତମାନ ମୁଣ୍ଡପିଛା ଋଣଭାର ୨୩ ହଜାର ୫୨୪ ଟଙ୍କାରେ ପହଞ୍ଚିଥିବା ନିରଞ୍ଜନ ପୂଜାରୀ କରିଛନ୍ତି । ୨୦୦୯-୨୦୧୦ ମସିହାରେ ରାଜ୍ୟର ଋଣ ଭାର ୯୧୮୦ ଟଙ୍କା ରହିଥିଲା ବୋଲି ତଥ୍ୟ ରହିଛି ।

ଘରେ ପର୍ଣ୍ଣ ଦେଖୁଥିଲା ପୁଅ, ପୂରା ପରିବାରକୁ ଦଣ୍ଡ ଦେଲେ କିମ୍

ନୂଆଦିଲ୍ଲୀ: ନିଜର କଡା ଶାସନ ପାଇଁ ସବୁବେଳେ ଚର୍ଚ୍ଚାରେ ରହୁଥିବା ଉତ୍ତର କୋରିଆ ଶାସକ କିମ୍ ଜୋଙ୍ଗ ଉନ୍ ପୁଣିଥରେ ଚର୍ଚ୍ଚାକୁ ଆସିଛନ୍ତି । ପର୍ଣ୍ଣ ଦେଖିବା ନେଇ କଠୋର ଆଭିମୁଖ୍ୟ ଗ୍ରହଣ କରୁଥିବା କିମ୍ ଜଣେ ବାଳକ ଓ ତା’ର ପୂରା ପରିବାରକୁ ଉତ୍ତର କୋରିଆର ଏକ ଦୁର୍ଗମ ଅଞ୍ଚଳକୁ ପଠାଇ ଦେଇଛନ୍ତି ।

ଏକ ରିପୋର୍ଟ ମୁତାବକ, ଉତ୍ତର କୋରିଆର ଶତାରୁଢ ୱକର୍ସ ପାର୍ଟି ସ୍କୁଲ ଭିତରେ ପିଲା ମାନଙ୍କର ପର୍ଣ୍ଣ ଦେଖିବା ବିରୋଧରେ ଏକ ଅଭିଯାନ ଚଳାଇଛନ୍ତି । ତେବେ ଏକ ବାଳକ ଘରେ ପିତା ମାତା ନଥିବାର ସୁଯୋଗ ପାଇ ପର୍ଣ୍ଣ ଭିଡିଓ ଦେଖୁଥିଲା । ହେଲେ ଏନେଇ ଖବର ଜାଣିବା ପରେ  ପୋଲିସ ଘରେ ପହଞ୍ଚିଥିଲା । ପରବର୍ତ୍ତୀ ସମୟରେ ଦଣ୍ଡ ସ୍ୱରୂପ ସମ୍ପୃକ୍ତ ବାଳକ ଓ ତା’ର ପୂରା ପରିବାରକୁ ଏକ ଦୁର୍ଗମ ଅଞ୍ଚଳକୁ ପଠାଇ ଦିଆଯାଇଛି।

ଗତ ବର୍ଷ କିମ୍ ପର୍ଣ୍ଣ ଫିଲ୍ମ ଦେଖିବା ବିରୋଧରେ ଏକ ଅଭିଯାନ ଆରମ୍ଭ କରିଥିଲେ । କିମ୍ କହିଛନ୍ତି ଯେ ଅଣ ସମାଜବାଦୀ ବିଚାର ଏକ ଟ୍ୟୁମର ଭଳି ହୋଇପଡିଛି । ଯାହା ଏକତା କ୍ଷେତ୍ରରେ ବାଧା ସୃଷ୍ଟି କରୁଛି। ଏମିତିକି ପର୍ଣ୍ଣ ଫିଲ୍ମ ଉପରେ ଲଗାମ ଲଗାଇବା ପାଇଁ ସରକାର ଏକ ଆଇନ୍ ଗଢିଛନ୍ତି । ଯାହା ଅଧିନରେ ଦୋଷୀ ମାନଙ୍କୁ ୫ ବର୍ଷରୁ ୧୫ ବର୍ଷ ଯାଏଁ ଦଣ୍ଡ ସ୍ୱରୂପ ଜବରଦସ୍ତୀ କାମ କରାଯାଇପାରେ ।

କେବଳ ଏତିକି ନୁହେଁ ଆଜୀବନ କାରାଦଣ୍ଡ ଠୁ ଆରମ୍ଭ କରି ମୃତ୍ୟୁ ଦଣ୍ଡ ମଧ୍ୟ ଦିଆଯାଇଥାଏ । ଏହାବ୍ୟତୀତ ସ୍କୁଲ୍ ପ୍ରିନ୍ସିପାଲକୁ ମଧ୍ୟ ଆବଶ୍ୟକ ସ୍ଥଳେ କାମ କରିବା ଲାଗି ଜବରଦସ୍ତୀ ଲେବର କ୍ୟାମ୍ପକୁ ପଠାଯାଏ ।

ଫେସବୁକ, ଟ୍ୱିଟରକୁ ଉତ୍ତର ଦେବେ ଟ୍ରମ୍ପ୍; ଆରମ୍ଭ କରିବେ ନିଜର ସୋସିଆଲ ମିଡିଆ ଆପ୍

ନୂଆଦିଲ୍ଲୀ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ୍ ମିଡିଆକୁ ଫେରିବାକୁ ପ୍ରସ୍ତୁତ ହେଉଛନ୍ତ । ହେଲେ ସେ ଏଥର ନିଜର ସୋସିଆଲ୍ ମିଡିଆ ଆପ ଲଞ୍ଚ କରିବାକୁ ଯାଉଛନ୍ତି । ଏନେଇ ଟ୍ରମ୍ପଙ୍କ ପୁରୁଣା ପରାମର୍ଶ ଦାତା ଓ ପ୍ରବକ୍ତା ଜେସନ୍ ମିଲର ସୂଚନା ଦେଇଛନ୍ତି ।

ଏକ ଗଣମାଧ୍ୟମ ସହ ଆଲୋଚନା ବେଳେ ମିଲର କହିଛନ୍ତି ଯେ ଟ୍ରମ୍ପ ଆଗାମୀ ଦୁଇରୁ ତିନି ମାସ ମଧ୍ୟରେ ସୋସିଆଲ୍ ମିଡିଆ ଫ୍ଲାଟଫର୍ମକୁ ଫେରିବାକୁ ଯାଉଛନ୍ତି । ଆଉ ଏଥିପାଇଁ ସେ ନିଜର ପ୍ଲାଟଫର୍ମ ପ୍ରସ୍ତୁତ କରୁଛନ୍ତି । ଆଗାମୀ ଦିନରେ ଏହା ଗେମ୍ ଚେଞ୍ଜର ସାବ୍ୟସ୍ତ ହେବ ବୋଲି ମିଲର କହିଛନ୍ତି।

ତେବେ ଏନେଇ ସେ ଅଧିକ କିଛି କହିନାହାଁନ୍ତି । ସୂଚନାଯୋଗ୍ୟ, ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବେ ସୋସିଆଲ୍ ମିଡିଆରେ ନାହାଁନ୍ତି । ୨୦୨୧ ମସିହା ଜାନୁଆରୀ ୬ ତାରିଖରେ ଆମେରିକା କ୍ୟାପିଟାଲରେ ହିଂସାକୁ ଭଡକାଇବା ନେଇ ଟ୍ରମ୍ପଙ୍କ ଉପରେ ଅଭିଯୋଗ ଲାଗିଥିଲା । ଯାହା ପରେ ଟ୍ୱିଟର୍ ଓ ଫେସବୁକ୍ ପକ୍ଷରୁ ତାଙ୍କ ସୋସିଆଲ୍ ମିଡିଆ ଆକାଉଣ୍ଟକୁ ସସପେଣ୍ଡ କରାଯାଇଥିଲା ।

ବ୍ରହ୍ମପୁର ମେଡିକାଲ କଲେଜରେ ଖୋଲିବ Gastroenterology ବିଭାଗ

ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅନୁମୋଦନ କ୍ରମେ ବ୍ରହ୍ମପୁରର ମହାରାଜା କୃଷ୍ଣଚନ୍ଦ୍ର ଗଜପତି ମେଡିକାଲ କଲେଜ ଓ  ହସ୍ପିଟାଲରେ Gastroenterology ବିଭାଗ ଖୋଲିବାକୁ ଯାଉଛି।  ଏଥିପାଇଁ ମୁଖ୍ୟମନ୍ତ୍ରୀ ଉଭୟ surgical  ଓ medical Gastroenterology ପାଇଁ ୧୯ଟି ଶୈକ୍ଷିକ ଓ ଅଣଶୈକ୍ଷିକ ପଦବୀକୁ ମଞ୍ଜୁରୀ ପ୍ରଦାନ କରିଛନ୍ତି।

ଏମକେସିଜି ମେଡିକାଲ କଲେଜରେ ଉପରୋକ୍ତ ଦୁଇ Super specialty ବିଭାଗ ଖୋଲିବା ଫଳରେ ସମଗ୍ର ଦକ୍ଷିଣ ଓଡିଶାର ଜନସାଧାରଣ ବିଶେଷ ଭାବରେ ଉପକୃତ ହେବେ ବୋଲି ମୁଖ୍ୟମନ୍ତ୍ରୀ କହିଛନ୍ତି।  ବର୍ତ୍ତମାନ ବ୍ରହ୍ମପୁରରେ ଏହି ଅତ୍ୟାଧୁନିକ super speciality ଚିକିତ୍ସା ସୁବିଧା ଉପଲବ୍ଧ ହେବା ଦ୍ୱାରା ଦକ୍ଷିଣ ଓଡିଶାର ସ୍ୱାସ୍ଥ୍ୟ ସେବା କ୍ଷେତ୍ରରେ ଆଉ ଏକ ନୂଆ ଯୁଗର ଆରମ୍ଭ ହୋଇଛି ।

ଏମକେସିଜି ମେଡିକାଲ କଲେଜ, ବ୍ରହ୍ମପୁର ରାଜ୍ୟର ବିଶେଷକରି ଦକ୍ଷିଣ ଓଡିଶାର ଅଗ୍ରଣୀ ଚିକିତ୍ସା ପ୍ରତିଷ୍ଠାନ ଭାବରେ ସୁପରିଚିତ । ଦକ୍ଷିଣ ଓଡିଶାର ଜନସାଧାରଣଙ୍କୁ ଗୁଣାତ୍ମକ ଚିକିତ୍ସା ସେବା ଯୋଗାଇବା କ୍ଷେତ୍ରରେ ଏହା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସିଛି । ବର୍ତ୍ତମାନ ଏହି Super specialty ବିଭାଗ ଖୋଲିବା ଦ୍ୱାରା ଜନସାଧାରଣଙ୍କ ଅସୁବିଧା ଦୂର ହେବ।

ଗାଁରେ କୋଭିଡ ପରିଚାଳନା କମିଟିକୁ ସକ୍ରିୟ କରାଯିବ:SRC

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି। କିଛି ଦିନର କରୋନାରୁ ତ୍ରାହି ପରେ ପୁଣି ଡ଼ରାଇବା ଆରମ୍ଭ କଲାଣି ଅଦୃଶ୍ୟ ରାକ୍ଷସ। ପ୍ରଥମେ କଟକର କଲେଜ, ଆଶ୍ରମ ଏବଂ ସ୍କୁଲରୁ କରୋନା ପଜିଟିଭ ଚିହ୍ନଟ ହେବା ପରେ ଏବେ ଭୁବନେଶ୍ୱରର XIMB କଲେଜରୁ ସଂକ୍ରମିତ ଚିହ୍ନଟ ହୋଇଛନ୍ତି। ଜଣେ କି ଦୁଇଜଣ ନୁହେଁ । ଏକାଥରକରେ ୪୫ ଜଣ ସଂକ୍ରମିତ ଚିହ୍ନଟ ହୋଇଥିବା ସୂଚନା ମିଳିଛି। ଏଭଳି ଖବର ପରେ ରାଧାନୀରେ ଲୋକମାନଙ୍କର ଚିନ୍ତାର କାରଣ ପାଲଟିଛି କରୋନା।

ସେପଟେ ସଂକ୍ରମିତ ଚିହ୍ନଟ ହେବା ପରେ ସେମାନଙ୍କ ଟ୍ରାଭେଲ ହିଷ୍ଟ୍ରି ଟ୍ରାକ୍‌ ହୋଇଛି। ମୁଖ୍ୟତଃ ବାହାର ରାଜ୍ୟରୁ ଆସିଛନ୍ତି ସଂକ୍ରମିତ ହୋଇଥିବା ଛାତ୍ରଛାତ୍ରୀ। ଆସନ୍ତାକାଲି ଏନେଇ ମୁଖ୍ୟମନ୍ତ୍ରୀ ସମୀକ୍ଷା କରିବେ। ପୁଣି ଥରେ ସରପଞ୍ଚ, ଓ୍ୱାର୍ଡ ମେମ୍ବର, ଆଶାକର୍ମୀ ଓ ଅଙ୍ଗନବାଡିକୁ ଦାୟିତ୍ୱ ଦିଆଯିବ। ଯେଉଁମାନେ ଗାଁକୁ ବାହାରରୁ ଆସୁଥିବା ଲୋକଙ୍କ ଉପରେ ନଜର ରଖିବେ। ଗାଁର କୋଭିଡ ପରିଚାଳନା କମିଟିକୁ ପୁଣି ସକ୍ରିୟ କରାଯିବ। DGଙ୍କୁ ନିର୍ଦ୍ଦେଶ ଦିଆଯାଇଛି ବ୍ୟବସାୟିକ ପ୍ରତିଷ୍ଠାନ ଓ ମଲରେ କଡ଼ାକଡ଼ି ନିୟମ ପାଳନ ଉପରେ ନଜର ରଖିବାକୁ। ତେବେ ଆଗାମି ଦିନରେ ସ୍ଥିତିକୁ ନଜରରେ ରଖି ପୁଣିଥରେ ଲକଡାଉନ କି ଅନ୍ୟ ଦିଗ ଉପରେ ନିଷ୍ପତ୍ତି ନିଆଯିବ ବୋଲି SRC ପ୍ରଦୀପ ଜେନା କହିଛନ୍ତି।

ସେହିପରି ଗତ ୨୪ ଘଣ୍ଟା ଭିତରେ ରାଜ୍ୟରେ ୧୪୬ ଜଣ ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଜାନୁୟାରୀ ୨୨ ତାରିଖ ପରେ ଏହା ଦ୍ୱିତୀୟ ସର୍ବବୃହତ କରୋନା ସଂଖ୍ୟା। ଏହି ପ୍ରକାର ବୃଦ୍ଧିକୁ ଦେଖି ଉଭୟ ପ୍ରଶାସନ ଓ ଜନସାଧାରଣ ଆତଙ୍କିତ ହୋଇଛନ୍ତି। ତୁରନ୍ତ ଏହି ବୃଦ୍ଧିକୁ ନିୟନ୍ତ୍ରଣରେ ରଖିବା ଲାଗି ମୁଖ୍ୟ ରିଲିଫ୍ କମିଶନର ଜରୁରୀ ଆଲୋଚନା କରିଥିଲେ।

ଟ୍ରାଫିକ୍ ନିୟମ ଉଲ୍ଲଘଂନ ନେଇ ୩ ବର୍ଷରେ ୫୦ କୋଟିର ତଣ୍ଡ

ଭୁବନେଶ୍ୱର: ଗତ ୩ ବର୍ଷ ମଧ୍ୟରେ ୫୦ କୋଟି ଟଙ୍କା ତଣ୍ଡ ଗଣିଛନ୍ତି ଟ୍ୱିନ୍ ସିଟି ବାସିନ୍ଦା । ଟ୍ରାଫିକ୍ ନିୟମ ଉଲ୍ଲଘଂନ ମାମଲାରେ ବିଗତ ୩ ବର୍ଷ ଯଥା ୨୦୧୮,୨୦୧୯ ଓ ୨୦୨୦ ବର୍ଷରେ କଟକ ଓ ଭୁବନେଶ୍ୱର ସହରରୁ ମୋଟ ୫୦ କୋଟି ୬୪ ଲକ୍ଷ ୬୦ ହଜାର ୬୫୮ ଟଙ୍କା ଜରିମାନା ଆଦାୟ ପାଇଁ ଚାଲାଣ କଟାଯାଇଛି । ଉକ୍ତ ଜରିମାନା ଅର୍ଥରେ ଟ୍ରାଫିକ୍ ପୋଷ୍ଟର ଉନ୍ନତିକରଣ ସହ ଅଜଣା ଗାଡ଼ି ଧକ୍କାରେ ଆହତଙ୍କ ଚିକିତ୍ସା ବ୍ୟବସ୍ଥା ସମ୍ପାଦନ କରିବା ସମ୍ୱନ୍ଧରେ କୌଣସି ପ୍ରସ୍ତାବ ନଥିବା ଗୃହରେ ଉତ୍ତର ରଖିଛନ୍ତି ରାଷ୍ଟ୍ରମନ୍ତ୍ରୀ ଦିବ୍ୟ ଶଙ୍କର ମିଶ୍ର ।

ଟ୍ରାଫିକ୍ ନିୟମ ଉଲ୍ଲଂଘନ ମାମଲାରେ ବିଗତ ତିନିବର୍ଷରେ କଟକ ଓ ଭୁବନେଶ୍ୱର ସହରକୁ କେତେ ଅର୍ଥ ଜରିମାନା ଆଦାୟ ହୋଇଛି ଏହି ଜରିମାନା ଅର୍ଥରେ ଟ୍ରାଫିକ୍ ପୋଷ୍ଟର ଉନ୍ନତିକରଣ ସହ ଅଜଣା ଗାଡ଼ି ଧକ୍କାରେ ଆହାତଙ୍କ ଚିକିତ୍ସା ସମ୍ପାଦିକ ପାଇଁ ସରକାର ବ୍ୟବସ୍ଥା କରିବା ନେଇ ବୋଲି ଗୃହରେ ପ୍ରଶ୍ନ କରିଥିଲେ ବିଧାୟକ ସୌଭିକ ବିଶ୍ୱାଳ ।

ରେକର୍ଡ଼ ଭାଙ୍ଗିଲା କରୋନା ସଂକ୍ରମଣ, ରାଜ୍ୟ ଆତଙ୍କିତ

ଭୁବନେଶ୍ୱର: ରାଜ୍ୟକୁ ରାଜ୍ୟ ମାଡ଼ି ଚାଲିଛି କରୋନା ସଂକ୍ରମଣର ଦ୍ୱିତୀୟ ଲହଡ଼ି। ମହାରାଷ୍ଟ୍ର, ପଞ୍ଜାବ, କେରଳ, କର୍ଣ୍ଣାଟକ, ଗୁଜରାଟ ଓ ମଧ୍ୟପ୍ରଦେଶ ପରେ ଓଡ଼ିଶା ବି ଏଥିରେ ସାମିଲ ହେବାକୁ ଯାଉଛି। ଗତ ୨୪ ଘଣ୍ଟା ଭିତରେ ରାଜ୍ୟରେ ୧୪୬ ଜଣ ନୂଆ ରୋଗୀ କରୋନା ସଂକ୍ରମିତ ହୋଇଥିବା ଦେଖିବାକୁ ମିଳିଛି। ଜାନୁୟାରୀ ୨୨ ତାରିଖ ପରେ ଏହା ଦ୍ୱିତୀୟ ସର୍ବବୃହତ ବିସ୍ଫୋରଣ। ଏହି ପ୍ରକାର ବୃଦ୍ଧିକୁ ଦେଖି ଉଭୟ ପ୍ରଶାସନ ଓ ଜନସାଧାରଣ ଆତଙ୍କିତ ହୋଇଛନ୍ତି। ତୁରନ୍ତ ଏହି ବିସ୍ଫୋରଣକୁ ନିୟନ୍ତ୍ରଣରେ ରଖିବା ଲାଗି ମୁଖ୍ୟ ରିଲିଫ୍ କମିଶନର ଜରୁରୀ ଆଲୋଚନା କରିଛନ୍ତି।

ଜାନୁୟାରୀ ୨୨ ତାରିଖରେ ରାଜ୍ୟରେ ୧୫୦ ଜଣଙ୍କୁ କରୋନା ପଜିଟିଭ ଚିହ୍ନଟ କରାଯାଇଥିଲା। କ୍ରମାଗତ ଭାବେ ଏହି ସଂଖ୍ୟା କମିବା ପରେ ରାଜ୍ୟରେ କଟକଣା କୋହଳ ବି କରାଯାଇଥିଲା। ବାରମ୍ବାର ପ୍ରତିଶେଧକ ନେଇ ଗମନାଗମନ କରିବାକୁ ଆହ୍ୱାନ ଦିଆଯାଇଥିଲେ ମଧ୍ୟ ଜନସାଧାରଣ ତାହାକୁ ହାଲୁକା ଭାବେ ନେଉଥିଲେ। ଏହାର ପ୍ରଭାବ ଆଜି ଦେଖିବାକୁ ମିଳିଛି।

କେବଳ ଭୁବନେଶ୍ୱରରେ ୩୫ ଜଣ ସଂକ୍ରମିତଙ୍କୁ ଚିହ୍ନଟ କରାଯାଇଛି। ଯେଉଁଥିରୁ ୨୩ ଜଣ ହେଉଛନ୍ତି ଜାଭିଏର ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟର ଛାତ୍ରଛାତ୍ରୀ। ସେହିପରି କଟକରୁ ଆଜି ୨୩, ମୟୁରଭଞ୍ଜରୁ ୧୩, ନୂଆପଡ଼ା ଏବଂ ସୁନ୍ଦରଗଡ଼ରୁ ୧୨ ଜଣ ଲେଖାଏଁ ରୋଗୀଙ୍କୁ ଚିହ୍ନଟ କରାଯାଇଥିବା ବେଳେ ବଲାଙ୍ଗିରରୁ ୯ ଜଣଙ୍କୁ ଚିହ୍ନଟ କରାଯାଇଛି। ଏହାଦ୍ୱାରା ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ଏବେ ୮୬୭ରେ ପହଞ୍ଚିଛି। ଏମାନେ ରାଜ୍ୟର ବିଭିନ୍ନ ସ୍ଥାନରେ ଚିକିତ୍ସାଧୀନ ରହିଥିବା ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି।

ଅନ୍ୟପକ୍ଷରେ ଗଲା ୨୪ ଘଣ୍ଟା ଭିତରେ ଦେଶରେ ୪୬ ହଜାର ୯୫୧ଜଣ କରୋନା ରୋଗୀଙ୍କୁ ଚିହ୍ନଟ କରାଯାଇଛି। ଏଥିରୁ ୮୪.୪୯ ପ୍ରତିଶତ ସଂକ୍ରମିତଙ୍କୁ ମାତ୍ର ୫ଟି ରାଜ୍ୟରୁ ଚିହ୍ନଟ କରାଯାଇଛି। ଏହି ରାଜ୍ୟଗୁଡ଼ିକ ହେଉଛନ୍ତି ମହାରାଷ୍ଟ୍ର, ପଞ୍ଜାବ, କେରଳ, କର୍ଣ୍ଣାଟକ, ଗୁଜରାଟ ଏବଂ ମଧ୍ୟପ୍ରଦେଶ। ମହାରାଷ୍ଟ୍ରରେ ସର୍ବାଧିକ ୩୦ ହଜାର ୫୩୫ ଜଣ ଚିହ୍ନଟ ହୋଇଥିବାବେଳେ ପଞ୍ଜାବରୁ ୨୬୪୪ ଜଣ ଏବଂ କେରଳରୁ ୧୮୭୫ ଜଣ ନୂଆ ସଂକ୍ରମିତଙ୍କୁ ଚିହ୍ନଟ କରାଯାଇଛି।