spot_img
Home Blog Page 6003

ମେଡିକାଲ ଓ ଇଞ୍ଜିନିୟରିଂ କଲେଜରେ ମିଳିବ ୧୫ % ସଂରକ୍ଷଣ, ବିଧାନସଭାରେ ସଂକଳ୍ପ ଆଣିଲେ ମୁଖ୍ୟମନ୍ତ୍ରୀ

ଭୁବନେଶ୍ୱର: ସରକାରୀ ସ୍କୁଲ ଛାତ୍ରଛାତ୍ରୀଙ୍କୁ ବୈଷୟିକ ଶିକ୍ଷା ପାଇଁ ସଂରକ୍ଷଣ । ମେଡିକାଲ ଓ ଇଞ୍ଜିନିୟରିଂ କଲେଜରେ ଏଣିକି ମିଳିବ ୧୫ % ସଂରକ୍ଷଣ । ବିଧାନସଭାରେ ଏନେଇ ସଂକଳ୍ପ ଆଣିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀଙ୍କ ସଂକଳ୍ପକୁ ସ୍ୱାଗତ କରିଛନ୍ତି ବିରୋଧୀ ଦଳ ନେତା ଓ କଂଗ୍ରେସ ବିଧାୟକ ଦଳ ନେତା । ସଂରକ୍ଷଣ ପାଇଁ କ୍ୟାବିନେଟରେ ଆସିଥିଲା ପ୍ରସ୍ତାବ ।

ହାଇକୋର୍ଟର ଅବସରପ୍ରାପ୍ତ ବିଚାରପତିଙ୍କ ଅଧ୍ୟକ୍ଷତାରେ ଏକ କମିଟି ଗଠନ ହୋଇଥିଲା । ଏହି କମିଟିର ଆଜି ବିଧାନସଭାରେ ରିପୋର୍ଟ ପ୍ରଦାନ କରିଥିଲା । ଏହା ଉପରେ ସଙ୍କଳ୍ପ କରାଯାଇ ସର୍ବସମ୍ମତିକ୍ରମେ ପାରିତ ହୋଇଛି । ଏଣିକି ବୈଷୟିକ ଶିକ୍ଷାନୁଷ୍ଠାନମାନଙ୍କରେ ସରକାରୀ ସ୍କୁଲ ଛାତ୍ରଛାତ୍ରୀଙ୍କ ପାଇଁ ୧୫ ପ୍ରତିଶତ ସଂରକ୍ଷଣ ନୀତି ଲାଗୁ ହେବ ବୋଲି ସଙ୍କଳ୍ପ ପାରିତ ହୋଇଛି ।

‘ଜାତିର ପିତା ମହାତ୍ମା ଗାନ୍ଧୀଙ୍କ ହୃଦୟରେ ଓଡ଼ିଶା ଏକ ବିଶେଷ ସ୍ଥାନ ଅଧିକାର କରିଥିଲା’- ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

ଭୁବନେଶ୍ୱର: ଜାତିର ପିତା ମହାତ୍ମା ଗାନ୍ଧୀଙ୍କ ହୃଦୟରେ ଓଡ଼ିଶା ଏକ ବିଶେଷ ସ୍ଥାନ ଅଧିକାର କରିଥିଲା । ମହାତ୍ମା ଆଠଥର ଓଡ଼ିଶା ଗସ୍ତ କରିଥିଲେ ଏବଂ ତାଙ୍କର ଓଡ଼ିଶା ଗସ୍ତର ଶହେ ବର୍ଷ ପୂର୍ତ୍ତି ଅବସରରେ ବିଧାନସଭା ତାଙ୍କୁ ସ୍ମରଣ କରୁଛି । ୨୩ ମାର୍ଚ୍ଚ ୧୯୨୧ରେ ସେ ଓଡ଼ିଶା ଆସିଥିବାର ସ୍ମୃତିଚାରଣ କରି ସେ ଖୁବ ଖୁସି ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ପଦଯାତ୍ରା କରି ଗାନ୍ଧୀଜୀ ଓଡିଶାର ଲୋକଙ୍କ ହୃଦୟର ଅତି ନିକଟତର ହୋଇପାରିଥିଲେ । ତାଙ୍କର ଏହି ଗସ୍ତ ସ୍ୱାଧୀନତା ଆନ୍ଦୋଳନକୁ ଶକ୍ତି ଦେବା ବ୍ୟତୀତ ବିଭିନ୍ନ ସାମାଜିକ ସମସ୍ୟା ବିଷୟରେ ଅଧିକ ସଚେତନତା ସୃଷ୍ଟି କରିଥିଲା ବୋଲି ମୁଖ୍ୟମନ୍ତ୍ରୀ ବିଧାନସଭାରେ ମତ ରଖିଛନ୍ତି । ବିଶ୍ୱକୁ ଗାନ୍ଧୀ ଦର୍ଶନ ଏବଂ ତାଙ୍କ ବାର୍ତ୍ତା ଭାରତର ବିଶେଷ ଅବଦାନ ।

ଦେଶ ଏବେ ମହାମାରୀ କରୋନାରୁ ମୁକୁଳିବାକୁ ସଂଗ୍ରାମ ଚଳାଇଛି । ତେବେ ଗାନ୍ଧୀଜୀଙ୍କ ନୀତି ଅନୁସାରେ ଯଦି ଜନସଂଖ୍ୟାର ବଡ଼ ଭାଗ ଦାରିଦ୍ର୍ୟ ତଥା ଦୁର୍ବଳତା ଭିତରେ ବସବାସ କରନ୍ତି ତେବେ ଧନ ଏବଂ ଅଭିବୃଦ୍ଧିର କୌଣସି ମୂଲ୍ୟ ନାହିଁ । ବ୍ୟକ୍ତିଗତ ଲୋଭରୁ ଦୂରେଇ ରହିବା ଏବଂ ସମ୍ପ୍ରଦାୟ ବିଷୟରେ ଭାବିବା ପାଇଁ ତାଙ୍କର ବାର୍ତ୍ତା ଏବେ ବି ଆବଶ୍ୟକ କରୁଛି । ବିଶ୍ୱରେ ବିଭାଜନ ବୃଦ୍ଧି ପାଉଥିବାରୁ ମହାତ୍ମାଙ୍କ ଅହିଂସା ଅସ୍ତ୍ର ଆଜି ବି ଜରୁରୀ ହୋଇପଡିଛି । ଅହିଂସ ପ୍ରତିରୋଧ ହେଉଛି ଏକ ସ୍ପାର୍କ ଯାହା ସାରା ବିଶ୍ୱରେ ଶାନ୍ତିପୂର୍ଣ୍ଣ ଆନ୍ଦୋଳନକୁ ପ୍ରଜ୍ୱଳିତ କରିଛି ବୋଲି ନବୀନ କହିଛନ୍ତି ।

ଭୁଲରେ ବି ଗୁଗୁଲରେ ଏସବୁ କରନ୍ତୁ ନାହିଁ ସର୍ଚ୍ଚ, ନହେଲେ…

ବର୍ତ୍ତମାନ ଚାଲିଛି ଡିଜିଟାଲ ଯୁଗ । ପ୍ରାୟ ସମସ୍ତେ ଏବେ ଇଣ୍ଟରନେଟ ବ୍ୟବହାର କରୁଛନ୍ତି। ଆଜିର ଯୁଗରେ ଯେତେବେଳେ ବି ଆମକୁ କିଛି ସୂଚନା ଆବଶ୍ୟକ ହୁଏ ଆମେ କେବଳ ଗୁଗୁଲ୍ ସର୍ଚ୍ଚ ଉପରେ ନିର୍ଭର କରୁ। ସେ କୌଣସି ଠିକଣା ହେଉ, ଇତିହାସ ସ୍ୱାସ୍ଥ୍ୟ ସମ୍ବନ୍ଧୀୟ ସୂଚନା ହେଉ କିମ୍ବା କୌଣସି ଫିଲ୍ନ ବି ହେଉନା କାହିଁକି । ସବୁ କିଛି ଆମକୁ ଗୁଗୁଲରେ ମିଳିଯାଏ। ବର୍ତ୍ତମାନର ଲାଇଫ ଷ୍ଟାଇଲେ ଗୁଗୁଲ୍ ସର୍ଚ୍ଚ ଆମର ସବୁଠୁ ଭଳ ବନ୍ଧୁ। ହେଲେ କେବଳ ଗୁଗୁଲ୍ ସର୍ଚ୍ଚ ଉପରେ ନିର୍ଭର କରିବା ଆପଣଙ୍କୁ ବେଳେବେଳେ ଅସୁବିଧାରେ ବି ପକାଇପାରେ । କାରଣ ଗୁଗୁଲରେ ଆପଣ ପାଇଥିବା ଅଧିକାଂଶ ସୂଚନା ଯାଞ୍ଚ କରାଯାଏ ନାହିଁ । ଆଉ ସାଇବର ଠକମାନେ ଏହାର ଫାଇଦା ଉଠାନ୍ତି। ଗୁଗୁଲରେ ମିଳୁଥିବା ବିଷୟବସ୍ତୁର ସତ୍ୟତା ଯାଞ୍ଚ କରିବା କଷ୍ଟକର । କାରଣ ଗୁଗୁଲ ସର୍ଚ୍ଚ କେବଳ ଏକ ଅନଲାଇନ୍ ପ୍ଲାଟଫର୍ମ ଯେଉଁଠାରେ ଆପଣ ୱେବସାଇଟ୍ ଖୋଜନ୍ତି ଯାହା ଆପଣଙ୍କୁ ଆବଶ୍ୟକ କରୁଥିବା ସୂଚନା ପ୍ରଦାନ କରିଥାଏ। ବିଷୟବସ୍ତୁଠାରୁ ଅଧିକ, ଗୁଗୁଲ୍ ସର୍ଚ୍ଚରେ ଆପଣ କେଉଁ ଫଳାଫଳ ଦେଖିବାକୁ ପାଇବେ ଏହା ପଛରେ SEO ବା ସର୍ଚ୍ଚ ଇଞ୍ଜିନ ଅପ୍ଟିମାଇଜେଶନ ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ତେଣୁ ଗୁଗୁଲ ସର୍ଚ୍ଚର ରେଜଲ୍ଟ ଉପରେ ସମ୍ପୂର୍ଣ୍ଣ ଭରୋସା କରନ୍ତୁ ନାହିଁ । ତେବେ ଆପଣ ଯଦି ଗୁଗୁଲ ସର୍ଚ୍ଚ କରି ସବୁ ସୂଚନା ପାଉଛନ୍ତି ତେବେ ସର୍ଚ୍ଚ ସମୟରେ ଏହି  ୮ଟି ଜିନିଷ ପ୍ରତି ବହୁତ ସତର୍କ ରୁହନ୍ତୁ ।

୧)  କଷ୍ଟମର କେୟାର ନମ୍ବର: ଗୁଗୁଲରେ କଷ୍ଟମର କେୟାର ନମ୍ବର ସର୍ଚ୍ଚ କଲାବେଳେ ସତର୍କ ରୁହନ୍ତୁ। ସାଇବର ଠକମାନେ ଅନେକ ଫେକ୍ ନମ୍ବର ସବୁ ପୋଷ୍ଟ କରି ଫାଇଦା ଉଠାନ୍ତି । ଆପଣଙ୍କୁ ଜଣାଇଦେଉଛୁ ଯେ କେବେ ହେଲେ କୌଣସି କଷ୍ଟମରକେୟାର ମୋବାଇଲ ନମ୍ବର ନଥାଏ । ଏହା ସବୁବେଳେ ଟୋଲଫ୍ରି ଲ୍ୟାଣ୍ଡଲାଇନ୍ ନମ୍ବର ହିଁ ରହିଥାଏ । ଆଜିକାଲି ପ୍ରାୟ ଆପ୍ କେବେଳ ୱିଣ୍ଡୋ ଚ୍ୟାଟିଂ ମାଧ୍ୟମରେ ଗ୍ରାହକଙ୍କ ସହ କଥା ହେଉଛନ୍ତି ଏମିତିକି କୌଣସି ଫୋନ୍ ନମ୍ବର ବି ଦେଉନାହାଁନ୍ତି। ତେଣୁ ସବୁବେଳେ ସତର୍କ ରୁହନ୍ତୁ।

୨) ଅନଲାଇନ୍ ବ୍ୟାଙ୍କିଙ୍ଗ୍ ୱେବସାଇଟ୍: ଯଦି ଆପଣ ପ୍ରକୃତ ଅଫିସିଆଲ୍ URL ଜାଣି ନାହାଁନ୍ତି ତେବେ ଆପଣଙ୍କର ବ୍ୟାଙ୍କର ଅନଲାଇନ୍ ବ୍ୟାଙ୍କିଙ୍ଗ୍ ୱେବସାଇଟ୍ ଖୋଜିବା ପାଇଁ ଗୁଗୁଲ୍ ସର୍ଚ୍ଚ ନକରିବା ଅତ୍ୟନ୍ତ ଭଲ। କାରଣ ସ୍କାମରମାନେ ବିଭିନ୍ନ ଫେକ ୱେବସାଇଟ୍ କରି ଆପଣଙ୍କର ଲଗଇନ୍ ବିବରଣୀରୁ ଆପଣଙ୍କ ସମସ୍ତ ବ୍ୟକ୍ତିଗତ ଡାଟା ଟ୍ରାକ୍ କରିନିଅନ୍ତି । ତେଣୁ  ସର୍ବଦା, ବ୍ୟାଙ୍କର ଅନଲାଇନ୍ ବ୍ୟାଙ୍କିଙ୍ଗ ପୋର୍ଟାଲର ଅଫିସିଆଲ୍ URLରେ ହିଁ ପ୍ରବେଶ କରନ୍ତୁ ।

୩) ଆପ୍ ଓ ସଫ୍ଟୱେର୍ ଡାଉନଲୋଡ୍: କେବେ ହେଲେ କୌଣସି ଆପ୍ କିମ୍ବା ସଫ୍ଟୱେର୍ ଡାଉନଲୋଡ କରିବାକୁ ଗୁଗୁଲରେ ସର୍ଚ୍ଚ କରନ୍ତୁ ନାହିଁ । ସବୁବେଳେ ଅଫିସିଆଲ୍ ଆପ୍ ଷ୍ଟୋର୍‌ଗୁଡିକରୁ ହିଁ ଡାଉନଲୋଡ କରନ୍ତୁ । ଆଣ୍ଡ୍ରଏଡ୍ ୟୁଜର ପ୍ଲେଷ୍ଟୋର୍ ଏବଂ ଆଇଫୋନ୍ ୟୁଜର ଆପ୍ ଷ୍ଟୋର୍ରୁ ଆପ୍ ଡାଉନଲୋଡ କରିପାରିବେ । କାରଣ ଗୁଗୁଲ ବହୁତ ଫେକ୍ ସଫ୍ଟୱେର୍ ଏବଂ ଆପ୍ସର ଲିଙ୍କ୍ ସହିତ ଜଡ଼ିତ ଥାଏ।

୪) ସ୍ୱାସ୍ଥ୍ୟ ସମ୍ବନ୍ଧୀୟ ସୂଚନା: ଯଦି ଆପଣ ଅସୁସ୍ଥ ଅଛନ୍ତି, ତେବେ ଡାକ୍ତରଙ୍କ ପାଖକୁ ଯାଆନ୍ତୁ। ଔଷଧ କିମ୍ବା ସ୍ୱାସ୍ଥ୍ୟ ସମ୍ବନ୍ଧିୟ ପରାମର୍ଶ ପାଇଁ ଗୁଗୁଲ୍ ଏକ ଉଚିତ ମାଧ୍ୟମ ନହେଁ। ଯଦି ଆପଣ ଆପଣ ଅସୁସ୍ଥ ତେବେ ଡାକ୍ତରଙ୍କ ସହ ପରାମର୍ଶ କରି ଔଷଧ ଖାଆନ୍ତୁ । କେବେ ହେଲେ ବିନା ଡାକ୍ତରଙ୍କ ପରାମର୍ଶରେ ଗୁଗୁଲ୍ ରୁ ଖୋଜି ଔଷଧ ଖାଆନ୍ତୁ ନାହିଁ। ଏପରି କରିବା ଶରୀର ପକ୍ଷେ ଅତ୍ୟନ୍ତ ବିପଜ୍ଜନକ ।

୫) ହେଲ୍ଥ ଟିପ୍ସ: ପ୍ରତ୍ୟେକ ମଣିଷର ଶରୀର ଅଲଗା ଏବଂ ଏହା ଭିନ୍ନ ଭାବରେ ମଧ୍ୟ କାର୍ଯ୍ୟ କରିଥାଏ। ତେଣୁ, ଗୁଗୁଲରୁ ଓଜନ ହ୍ରାସ କିମ୍ବା ଅନ୍ୟାନ୍ୟ ଡାଏଟ୍ ଟିପ୍ସ ଉପରେ ପରାମର୍ଶ ନିଅନ୍ତୁ ନାହିଁ । ଯଦି ଆପଣ ନିଜ ଡାଏଟ୍ ବଦଳାଇବାକୁ ଚାହୁଁଛନ୍ତି ତେବେ ଡାଏଟିସିଆନ୍ ବା ନ୍ୟୁଟ୍ରିସିଆନଙ୍କ ସହ ପରାମର୍ଶ୍ୟ କରନ୍ତୁ । ଯଦି ଆପଣ ଓଜନ ହ୍ରାସ  କିମ୍ବା ବଢ଼ାଇବାକୁ  ଚାହୁଁଛନ୍ତି, ତେବେ ପ୍ରଥମେ ଡାକ୍ତରଙ୍କ ପରାମର୍ଶ ନିଅନ୍ତୁ ଏବଂ ତା’ପରେ ଆଗକୁ ବଢ଼ନ୍ତୁ।

୬) ଷ୍ଟକ୍ ମାର୍କେଟ ଟିପ୍ସ: ସ୍ୱାସ୍ଥ୍ୟ ଭଳି ପର୍ସନାଲ ଫାଇନାନ୍ସ ବି ସମସ୍ତଙ୍କ ପାଇଁ ଅଲଗା ହୋଇଥାଏ । ମନେରଖନ୍ତୁ ଏମିତି କୌଣସି ଫାଇନାନ୍ସ ବା ଇନଭେଷ୍ଟମେଣ୍ଟ ପ୍ଲାନ ନାହିଁ ଯାହା ସମସ୍ତଙ୍କୁ ଧନୀ କରିଦେବ। ତେଣୁ ଆପଣ ଯଦି ନିଜର ଟଙ୍କା କୌଣସି କ୍ଷେତ୍ରରେ ଇନଭେଷ୍ଟ କରିବାକୁ ଚାହୁଁଛନ୍ତି କିମ୍ବା କୌଣସି ବାମା କରିବାକୁ ଚାହୁଁଛନ୍ତି। ତେବେ କେବେ ହେଲେ ଏଥିପାଇଁ ଗୁଗୁଲ ସର୍ଚ୍ଚ ଉପରେ ବିଶ୍ୱାସ କରନ୍ତୁ ନାହିଁ।

୭) ସରକାରୀ ୱେବସାଇଟ୍: ବ୍ୟାଙ୍କିଙ୍ଗ୍ ୱେବସାଇଟ୍ ପରି, ମ୍ୟୁନିସିପାଲିଟି ଟ୍ୟାକ୍ସ, ଡାକ୍ତରଖାନା ଇତ୍ୟାଦି ସରକାରୀ ୱେବସାଇଟ୍ ବି ସାଇବର ଠକଙ୍କ ଅିକ ଟାର୍ଗେଟରେ ରୁହେ । ଏଭଳି ୱେବସାଇଟ ଗୁଡ଼ିକ କେଉଁଟା ଅସଲି କେଉଁଟା ନକଲି ଚିହ୍ନଟ କଷ୍ଟକର । ତେଣୁ ଗୁଗୁଲରେ ଖୋଜିବା ପରିବର୍ତ୍ତେ ସର୍ବଦା ନିର୍ଦ୍ଦିଷ୍ଟ ସରକାରୀ ୱେବସାଇଟ୍ ହିଁ ପରିଦର୍ଶନ କରନ୍ତୁ।

୮) କୁପନ୍, ଅଫର୍: ବିଭିନ୍ନ ଇ-କମର୍ସ ୱେବସାଇଟର ଅଫର ଯୁକ୍ତ ନକଲି ୱେବ୍ ପେଜଗୁଡ଼ିକ ଗୁଗୁଲ୍ ସର୍ଚ୍ଚରେ୍ ଭର୍ତ୍ତି ହୋଇ ରହିଛି। ଏହା ହେଉଛି ଅନ୍ୟ ଏକ କ୍ଲାସିକ୍ ସ୍କାମ । ଯେଉଁଥିରେ ବସାଇବର କ୍ରିମିନାଲ ମାନେ ଲୋକମାନଙ୍କୁ ବିଭିନ୍ନ ଲୋଭନୀୟ ଅଫର୍ ଓ କୁପନ ଦେଇ ଗ୍ରାହକଙ୍କ ଅନଲାଇନ୍ ବ୍ୟାଙ୍କିଙ୍ଗ୍ ଲଗ୍ଇନ୍ ବିବରଣୀ ଚୋରି କରିଥାନ୍ତି।

୨ବର୍ଷ ପରେ ଭାରତ- ପାକିସ୍ତାନର ଆଲୋଚନା, ସିନ୍ଧୁନଦୀର ଜଳବଣ୍ଟନ ପ୍ରସଙ୍ଗରେ ଦୁଇଦିନିଆ ବୈଠକ

ନୂଆଦିଲ୍ଲୀ: ୨ବର୍ଷ ପରେ ଭାରତ- ପାକିସ୍ତାନ କରିବେ ଆଲୋଚନା। ସିନ୍ଧୁନଦୀର ଜଳବଣ୍ଟନ ପ୍ରସଙ୍ଗରେ ଉପୁଜି ଥିବା ସମସ୍ୟା ନେଇ ଉଭୟ ଦେଶ ବୈଠକ କରିବେ । ଆଜି ଓ ଆସନ୍ତାକାଲି ୨ଦିନ ଧରି  ଦିଲ୍ଲୀରେ ଏହି ବୈଠକ ଅନୁଷ୍ଠିତ ହେବ। ଏଥିରେ ଭାରତ ଓ ପାକିସ୍ତାନର ସରକାରୀ ଅଧିକାରୀମାନେ ଆଲୋଚନା କରିବେ।

ଲଦାଖରେ ଭାରତ ମଞ୍ଜୁରି ଦେଇଥିବା କେତୋଟି ଜଳବିଦ୍ୟୁତ୍‌ ପ୍ରକଳ୍ପ ଉପରେ ପାକିସ୍ତାନ ଆପତ୍ତି ଉଠାଇଛି । ଆଜି ନୂଆଦିଲ୍ଲୀରେ ‘ପର୍‌ମାନେଣ୍ଟ୍‌ ଇଣ୍ଡସ୍‌ କମିସନ୍‌’ର ୧୧୬ତମ ବୈଠକ ହେବ ବୋଲି ପୂର୍ବରୁ ପାକିସ୍ତାନର ବୈଦେଶିକ କାର୍ଯ୍ୟାଳୟ ମୁଖପାତ୍ର ଜାହିଦ ହଫିଜ୍‌ ଚୌଧୁରୀ ସୂଚନା ଦେଇଛନ୍ତି। ବୈଠକରେ ଯୋଗ ଦେଇ ଜଳଜନିତ ବିଭିନ୍ନ ସମସ୍ୟା ସଂକ୍ରାନ୍ତରେ ଆଲୋଚନା କରିବା ଲାଗି ଜଳ ବିଶେଷଜ୍ଞଙ୍କ ଏକ ଭାରତ ଗସ୍ତରେ ଆସିବେ।

ବିଲରେ କାମ କରୁଥିବାବେଳେ କାମୁଡ଼ିଲା ନାଗ, ସାପ ଧରି ମେଡିକାଲରେ ପହଞ୍ଚିଲେ ଯୁବକ

ଉମରକୋଟ: ଜମିରେ କାମ କରୁଥିବାବେଳେ କାମୁଡିଦେଲା ନାଗସାପ । କାଳବିଳମ୍ବ ନକରି ସାହସ ଜୁଟାଇ ସାପଟିକୁ କାବୁକଲେ ପୀଡିତ । ଖାଲି କାବୁ କଲେନି ବାଇକରେ ଏହାକୁ ଧରି ପହଞ୍ଚିଗଲେ ମେଡିକାଲରେ । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ଅଞ୍ଚଳରେ । ଏହି ସାହସୀ ଯୁବକ ଜଣଙ୍କ ହେଲେ ଝରିଗାଁ ପଞ୍ଚାୟତ ଛୋଟାଗୁଡା ଗାଁର ସୁଧାଂଶୁ ସିଲ । ଚିକିତ୍ସା ପରେ ସେ ସୁସ୍ଥ ଥିବା ଜଣାପଡିଛି।

 

ସୂଚନା ଅନୁସାରେ,  ସୁଧାଂଶୁ ନିଜ ଜମିରେ କାମ କରୁଥିଲେ । ଏହି ସମୟରେ ଏକ ନାଗସାପ ତାଙ୍କୁ କାମୁଡି ଦେଇଥିଲା । ସାପଟି ଘଟଣାସ୍ଥଳରୁ ଚାଲି ଯାଉଥିବା ବେଳେ ସୁଧାଂଶୁ ଏହାକୁ ତୁରନ୍ତ ଧରି କାବୁ କରିଥିଲେ । କିଛି ଅଘଟଣ ଘଟିବା ପୂର୍ବରୁ ସୁଧାଂଶୁ ସାପଟିକୁ ଧରି ବାଇକ୍ ଯୋଗେ ଉମରକୋଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ଯାଇଥିଲେ ।

ବିନା ଦ୍ୱିଧାରେ ସୁଧାଂଶୁ ସାପଟିକୁ ଧରି ନିଜର ଚିକିତ୍ସା ପାଇଁ ଡାକ୍ତରଙ୍କୁ କହିଥିଲେ । ସାପଟିକୁ ଦେଖି ମେଡିକାଲ କର୍ତ୍ତୃପକ୍ଷ ପ୍ରଥମେ ଭୟଭୀତ ହୋଇ ପଡିଥିଲେ । ପରେ ସୁଧାଂଶୁଙ୍କର ଚିକିତ୍ସା ଆରମ୍ଭ କରିଥିଲେ । ଚିକିତ୍ସା ପରେ ସେ ବିପଦମୁକ୍ତ ଥିବା ସମ୍ପୃକ୍ତ ଡାକ୍ତର ସୂଚନା ଦେଇଛନ୍ତି କହିଛନ୍ତି ।

ଲୋନ୍ ମୋରାଟୋରିୟମ ମାମଲାରେ ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ, ସଂପୂର୍ଣ୍ଣ ଋଣ ଛାଡ଼ ସମ୍ଭବ ନୁହେଁ

ନୂଆଦିଲ୍ଲୀ: ଲୋନ୍ ମୋରାଟୋରିୟମ ବା ଋଣ ଆଦାୟ ବନ୍ଦ ଅବଧି ମାମଲାରେ ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ । ଋଣ ନେଇଥିବା ସଂସ୍ଥା ବା ବ୍ୟକ୍ତିବିଶେଷଙ୍କୁ କରୋନା ପାଇଁ ଛାଡ଼ କରାଯିବନି ସୁଧ । ୨୦୨୦ ଅଗଷ୍ଟ ୩୧ ପରଠାରୁ ସଂସ୍ଥାଗୁଡ଼ିକୁ ଚକ୍ରବର୍ତ୍ତୀ ସୁଧ ଦେବାକୁ ହେବ ବୋଲି ଖଣ୍ଡପୀଠ ରାୟ ଶୁଣାଇଛନ୍ତି । କରୋନା ମହାମାରୀ ପାଇଁ ସୁଧ ସମ୍ପୂର୍ଣ୍ଣ ଛାଡ଼ କରିବା ସହ ମୋରାଟୋରିୟମ ସମୟ ବଢ଼ାଇବାକୁ କେତେକ ସେକ୍ଟର ଦାବି କରିଥିଲେ ।

ମାତ୍ର ଗତ ଅଗଷ୍ଟ ୩୧ ପରଠାରୁ ସମସ୍ତ ସେକ୍ଟର ଓ ବ୍ୟକ୍ତିବିଶେଷଙ୍କୁ ଚକ୍ରବର୍ତ୍ତୀ ସୁଧ ଦେବାକୁ ପଡ଼ିବ ବୋଲି ଉଚ୍ଚତମ ନ୍ୟାୟାଳୟ କହିଛନ୍ତି । ସରକାରଙ୍କ ସପକ୍ଷରେ ଯାଇ କୋର୍ଟ କହିଛନ୍ତି, କେବଳ କମ୍ପାନୀ ନୁହନ୍ତି, କରୋନା ମହାମାରୀ ବେଳେ ସରକାର ମଧ୍ୟ କ୍ଷତି ସହିଛନ୍ତି । ସରକାର ଓ ରିଜର୍ଭ ବ୍ୟାଙ୍କ ଉପରେ ଆଉ ଚାପ ପକାଯାଇପାରିବ ନାହିଁ । ଜଷ୍ଟିସ୍ ଅଶୋକ ଭୂଷଣ, ଜଷ୍ଟିସ୍ ଆର୍ ସୁଭାଷ ରେଡ୍ଡୀ ଓ ଜଷ୍ଟିସ୍ ଏମ୍ ଆର୍ ଶାହାଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟ ଶୁଣାଇଛନ୍ତି ।

କୋର୍ଟଙ୍କ ନିଷ୍ପତ୍ତି ପରେ ରିୟଲ ଇଷ୍ଟେଟ୍ ଭଳି କେତେକ ସେକ୍ଟରକୁ ଝଟ୍‌କା ଲାଗିଛି । ଏହାଛଡ଼ା ଦେଶର ଅର୍ଥନୀତି ମାମଲାରେ ହସ୍ତକ୍ଷେପ କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି । କୌଣସି ଯାଜନା ଠିକ୍ ବା ଭୁଲ୍ ସେ ନେଇ କୋର୍ଟ ନିଷ୍ପତ୍ତି ନେବେ ନାହିଁ । ମାତ୍ର ସେହି ଯୋଜନା ଆଇନ ସମ୍ମତ କି ନୁହେଁ, ତାହା କୋର୍ଟ ସୂଚିତ କରିବେ ବୋଲି ଖଣ୍ଡପୀଠ କହିଛନ୍ତି । ପୂର୍ବରୁ ଏହି ମାମଲାରେ କେନ୍ଦ୍ର ସରକାର ସତ୍ୟପାଠ ଦାଖଲ କରିଥିଲେ । ଯେଉଁଥିରେ, କମ୍ପାନୀଗୁଡ଼ିକୁ ଅଧିକ ଆର୍ଥିକ ସହାୟତା ଯୋଗାଇବା ସମ୍ଭବ ନୁହେଁ ବୋଲି ଉଲ୍ଲେଖ କରାଯାଇଥିଲା ।

ଟିକାକୁ ନେଇ ବଢ଼ିଲା ସନ୍ଦେହ, ୨ ଡୋଜ୍ ନେବା ପରେ ବି ସଂକ୍ରମିତ ହେଲେ ଡାକ୍ତର ଓ ନର୍ସ

ନୂଆଦିଲ୍ଲୀ: ଗୋଟେପଟେ ଦେଶରେ କରୋନା ଟିକାକରଣ ଚାଲିଥିବାବେଳେ ଅନ୍ୟପଟେ ଦିନକୁ ଦିନ କରୋନା ଗ୍ରାଫ ବି ବଢ଼ିବାରେ ଲାଗିଛି। ତେବେ କୋରନା ଟିକାର ୨ଟି ଡ଼ୋଜ ନେବା ପରେ ମଧ୍ୟ କରୋନା ସଂକ୍ରମିତ ହେଉଥିବା ଦେଖିବାକୁ ମିଳିଛି। ଦିଲ୍ଲୀସ୍ଥିତ ଏକ ସରାକାରୀ ହସ୍ପିଟାଲରେ କାର୍ଯ୍ୟରତ ନର୍ସ ଫେବୃଆରୀ ୧୭ରେ ଟିକା ନେଇଥିବା ବେଳେ ତାଙ୍କର କରୋନା ରିପୋର୍ଟ ପଜିଟିଭ ଆସିଛି। ବର୍ତ୍ତମାନ ସେ ହୋମ ଆଇସୋଲେସନରେ ଅଛନ୍ତି।

ସେହିପରି ଉତ୍ତର ପ୍ରଦେଶର ଲକ୍ଷ୍ନୌରେ କୋଭିଡ-୧୯ର ୨ଟି ଡୋଜ ନେବା ପରେ ମଧ୍ୟ ଜଣେ ଡାକ୍ତର କରୋନା ପଜିଟିଭ ଚିହ୍ନଟ ହୋଇଛନ୍ତି। ଡାକ୍ତର ନିତିନ ମିଶ୍ରା ଲକ୍ଷ୍ନୌର ଏକ ସରକାରୀ ଡାକ୍ତରଖାନାରେ କାର୍ଯ୍ୟରତ। ସେ ଗତ ୧୬ ତାରିଖରେ କରୋନା ଟିକାର ଦ୍ୱିତୀୟ ଡୋଜ୍ ନେବା ପରେ ମାର୍ଚ୍ଚ ୨୦ରେ ତାଙ୍କର ନମୁନା ପରୀକ୍ଷା କରାଯାଇଥିଲା । ତେବେ ଦିନକ ପରେ ସେ କରୋନା ପଜିଟିଭ ଥିବା ଜଣାପଡ଼ିଛନ୍ତି। ଏହି ଘଟଣା ସବୁ ସାମ୍ନାକୁ ଆସିବା ପରେ ବର୍ତ୍ତମାନ କୋରନା ଟିକାକୁ ନେଇ ଲୋକଙ୍କ ମନରେ ସନ୍ଦେହ ଉପଜୁଛି।

ଯାଜପୁର ବୈତରଣୀ ନଦୀ ଗର୍ଭରେ ମିଳିଲା ଶିବ ଲିଙ୍ଗ, ମାଆ ଲକ୍ଷ୍ମୀ ଓ ବାସୁଆ ବଳଦଙ୍କ ମୂର୍ତ୍ତି

ଯାଜପୁର: ଯାଜପୁର ବୈତରଣୀ ନଦୀ ଗର୍ଭରେ ପୁଣି ମିଳିଲା ପ୍ରାକୃତିକ କୀର୍ତ୍ତିରାଜି । ଦେବୀଗଡ଼ା ଘାଟରୁ ଶିବ ଲିଙ୍ଗ, ଲକ୍ଷ୍ମୀଙ୍କ ମୂର୍ତ୍ତୀ ଓ ବାସୁଆ ବଳଦର ମୂର୍ତ୍ତି ଦେଖିବାକୁ ମିଳିଛି । ତେବେ ନଦୀ ଗର୍ଭରେ ମୂର୍ତ୍ତି ବାହାରିବା ପରେ ଦେଖିବାକୁ ସ୍ଥାନୀୟ ଲୋକଙ୍କ ଭିଡ଼ ଲାଗିଛି । କିଛି ଦିନ ପୂର୍ବେ ସିଧେଶ୍ୱର ମନ୍ଦିର ପାଖରୁ ପୁରାତନ ମନ୍ଦିର ଓ ଶିବ ଲିଙ୍ଗ ବାହାରିଥିଲା । ନଦୀ ଗର୍ଭରୁ ମୂର୍ତ୍ତି ବାହାରୁଥିବାରୁ ପ୍ରତ୍ନତତ୍ତ୍ୱ ବିଭାଗ ଉକ୍ତ ସ୍ଥାନରେ ସମୀକ୍ଷା  କରିବାକୁ ଦାବି ହୋଇଛି । ସେପଟେ ବାସୁଆ ବଳଦକୁ ନଦୀ ଗର୍ଭରୁ ଆଣି ଏକ ବରଗଛ ମୂଳରେ ରଖି ପୂଜାର୍ଚ୍ଚନା କରୁଛନ୍ତି ଲୋକେ ।

ବିଧାନସଭାରେ ଗାନ୍ଧିଚର୍ଚ୍ଚା: ବାପୁଙ୍କ ଓଡ଼ିଶା ଆଗମନର ଶହେ ବର୍ଷ ପୂର୍ତ୍ତି ଅବସରରେ ସ୍ୱତନ୍ତ୍ର ଆଲୋଚନା

ଭୁବନେଶ୍ୱର: ଶହେ ବର୍ଷ ପୂର୍ବେ ଆଜିର ଦିନରେ ଓଡ଼ିଶା ଆସିଥିଲେ ଜାତିର ପିତା ମହାତ୍ମା ଗାନ୍ଧୀ । ସେହି ସ୍ମୃତିକୁ ମନେ ପକାଇବା ପାଇଁ ଆଜି ବିଧାନସଭାରେ କେବଳ ବାପୁଙ୍କ ଉପରେ ଆଲୋଚନା ହେଉଛି। ଜାତିର ପିତା ମହାତ୍ମା ଗାନ୍ଧୀଙ୍କ ଓଡ଼ିଶା ଆଗମନକୁ ଆଜି ଶହେ ବର୍ଷ ପୁରୁଥିବାରୁ ବିଧାନସଭାରେ ସ୍ୱତନ୍ତ୍ର ଆଲୋଚନା ହେଉଛି ।

 

ଗୃହରେ ସଙ୍କଳ୍ପ ଅଣାଯିବା ସହ ପାରିତ କରାଯିବ । ପ୍ରଶ୍ନକାଳ, ଶୂନ୍ୟକାଳ, ମୁଲତବୀ ପ୍ରସ୍ତାବ ଆଲୋଚନାକୁ ବାତିଲ କରାଯାଇ ଗୃହରେ ସ୍ୱତନ୍ତ୍ର ଆଲୋଚନା କରାଯାଉଛି । ସକାଳ ୧୦ଟା ୩୦ ମିନିଟରୁ ଆରମ୍ଭ ହୋଇଥିବା ଆଲୋଚନା ଅପରାହ୍ନ ସାଢ଼େ ଗୋଟାଏ ମିନିଟ ପର୍ଯ୍ୟନ୍ତ ଚାଲିବ । ବିଶେଷକରି ମହାତ୍ମା ଗାନ୍ଧୀଙ୍କ ଓଡ଼ିଶା ଆଗମନର ବିଭିନ୍ନ ଦିଗ ଉପରେ ଆଲୋଚନା କରାଯିବ ବୋଲି ବାଚସ୍ପତି ସୂର୍ଯ୍ୟନାରାୟଣ ପାତ୍ର ସୂଚନା ଦେଇଛନ୍ତି ।

ମହାତ୍ମାଙ୍କ ଓଡ଼ିଶା ଆଗମନର ୧୦୦ ବର୍ଷ ପୂର୍ତ୍ତି ଅବସରରେ ଅହିଂସା ଶଦ୍ଦକୁ ଭାରତୀୟ ସମ୍ବିଧାନର ମୁଖବନ୍ଧରେ ସ୍ଥାନ ଦେବାକୁ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ସରକାରଙ୍କୁ ପ୍ରସ୍ତାବ ଦେଇଛନ୍ତି । ଏହା ବାପୁଙ୍କ ପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ । ଏହି ସମ୍ବନ୍ଧରେ ବିଧାନସଭାରେ ଆଜି ଏକ ସଂକଳ୍ପ ପାରିତ ହୋଇପାରେ । ଅଧିବେଶନ ଆରମ୍ଭ ପୂର୍ବରୁ ବିଧାନସଭା ପରିସରରେ ଥିବା ଗାନ୍ଧି ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ ବାଚସ୍ପତିଙ୍କ ସମେତ ସବୁ ବିଧାୟକ ଓ ମନ୍ତ୍ରୀ ।

ବଢ଼ୁଛି ସଂକ୍ରମଣ, ବଢ଼ୁଛି ଚିନ୍ତା; ୨୪ ଘଣ୍ଟାରେ ୪୦ ହଜାର ପାର୍ କଲା ସଂକ୍ରମିତଙ୍କ ସଂଖ୍ୟା

ନୂଆଦିଲ୍ଲୀ: ଦେଶରେ ପୁଣି ବେକାବୁ ହେଉଛି କରୋନା। ଦିନକୁ ଦିନ କରୋନା ଗ୍ରାଫ୍ ପୁଣି ଥରେ ଉପରମୁହାଁ ହେଉଥିବାବେଳେ ବିଭିନ୍ନ ରାଜ୍ୟରେ ଗତବର୍ଷର ରେକର୍ଡ଼ ଭାଙ୍ଗୁଛି ସଂକ୍ରମଣ। ଗତ ୨୪ ଘଣ୍ଟାରେ ଦେଶରେ ଆଉ ୪୦ ହଜାର ୭୧୫ ସଂକ୍ରମିତ ଚିହ୍ନଟ ହୋଇଛନ୍ତି। ସେହିପରି ଗୋଟିଏ ଦିଗରେ ୧୯୯ଜଣଙ୍କ ଜୀବନ ଯାଇଛି।

ସଂକ୍ରମଣ ହାର ବଢୁଥିବା ବେଳେ ସ୍ୱାସ୍ଥ୍ୟ ମନ୍ତ୍ରଣାଳୟର ଚିନ୍ତା ବଢ଼ିଛି । ଗୁଜୁରାଟରେ ଗତ ୨୪ ଘଣ୍ଟାର ସଂକ୍ରମଣ ପୂର୍ବର ସବୁ ରେକର୍ଡ଼ ଭାଙ୍ଗିଛି । ସେହିପରି ପଞ୍ଜାବରେ ଗୋଟିଏ ଦିନରେ ୨ହଜାର ୨୯୯ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଦିନକୁ ଦିନ ସଂକ୍ରମିତଙ୍କ ସଂଖ୍ୟା ବଢୁଥିବାରୁ ବିଭିନ୍ନ ରାଜ୍ୟରେ କଡ଼ା କଟକଣା ଜାରି କରାଯାଇଛି। ମହାରାଷ୍ଟ୍ର, ପଞ୍ଜାବ, ଗୁଜୁରାଟ ସମେତ କେତେକ ରାଜ୍ୟରେ ପୁଣି ଲକଡାଉନ ଓ ନାଇଟ କର୍ଫ୍ୟୁ ଭଳି କଟକଣା ଲଗାଯାଇଛି।

ଏହାକୁ ଦୃଷ୍ଟିରେ ରଖି ଚଳିତବର୍ଷ ହୋଲି ଓ ମେଲଣ ଉତ୍ସବ ଉପରେ କଟକଣା ଲଗାଇଛନ୍ତି ରାଜ୍ୟ ସରକାର। ଘରେ ଘରେ ହୋଲି ଉତ୍ସବ ପାଳନ କରିବାକୁ ପଞ୍ଜାବ ସରକାର ନିର୍ଦ୍ଦେଶ ଜାରି କରିଛନ୍ତି । ସେପଟେ ୟୁପିରେ କରୋନାକୁ କାବୁ କରିବା ପାଇଁ ଆସନ୍ତା ୩୧ ତାରିଖ ଯାଏ ସ୍କୁଲ ବନ୍ଦ ରିଦିଆଯାଇଛି। ବନାରସ ହିନ୍ଦୁ ୟୁନିଭରସିଟିରେ ବି ସଂକ୍ରମିତଙ୍କ ସଂଖ୍ୟା ବଢୁଥିବାରୁ ଅଫଲାଇନ କ୍ଲାସ ବନ୍ଦ କରିବାକୁ କର୍ତ୍ତୃପକ୍ଷ ନିଷ୍ପତ୍ତି ନେଇଛନ୍ତି। ଏହାଛଡ଼ା ପିଲାମାନଙ୍କୁ ହଷ୍ଟେଲ ଖାଲି କରିବାକୁ କୁହାଯାଇଛି।