spot_img
Home Blog Page 5990

ପ୍ରକାଶ ପାଇଲା ରାଜ୍ୟ ଗୃହ ବିଭାଗର ଶ୍ବେତପତ୍ର, ୨୦୨୦ବର୍ଷରେ ଆଇନଶୃଙ୍ଖଳା ଶାନ୍ତିପୂର୍ଣ୍ଣ ଥିଲା

ଭୁବନେଶ୍ୱର: ପ୍ରକାଶ ପାଇଲା ରାଜ୍ୟ ଗୃହ ବିଭାଗର ଶ୍ବେତପତ୍ର। ରାଜ୍ୟ ସରକାର ୨୦୨୦ର ଶ୍ବେତପତ୍ର ପ୍ରକାଶ କରିଛନ୍ତି। ରାଜ୍ୟରେ ଆଇନଶୃଙ୍ଖଳା ପରିସ୍ଥତି ୨୦୨୦ବର୍ଷରେ ଶାନ୍ତିପୂର୍ଣ୍ଣ ଥିଲା। ଗତବର୍ଷ ୫ଟି ଜିଲ୍ଲା ମାଓମୁକ୍ତ ହୋଇଥିବାବେଳେ ୨୧ଜଣ ମାଓବାଦୀ ଆତ୍ମସମର୍ପଣ କରିଥିଲେ। ସେହିପରି ରାଜ୍ୟରେ କୌଣସି ଛାତ୍ର ଅଶାନ୍ତି ଦେଖାଯାଇନଥିଲା ବୋଲି ଶ୍ବେତପତ୍ରରେ ଉଲ୍ଲେଖ କରାଯାଇଛି । ରାଜ୍ୟରେ ୨୦୨୦ରେ ରୁଜୁ ହୋଇଥିବା ୫୧୪ଟି ଡକାୟତି ମାମଲା ମଧ୍ୟରୁ ୨୫୪ଟି ମାମଲାରେ ପୋଲିସ ଚାର୍ଜସିଟ୍ ଦାଖଲ କରିଛି ।

ସେହିପରି ୧୨ଜଣ ଆନ୍ତଃରାଜ୍ୟ ଡକାୟତଙ୍କ ସମେତ ୧ ହଜାର ୮୭୬ ଜଣଙ୍କ ଡକାୟତଙ୍କୁ ଗିରଫ କରାଯାଇଛି। ୨୦୨୦ ବର୍ଷରେ ୨ ହଜାର ୧୬୬ଟି ଲୁଣ୍ଠନ ମାମଲା ରୁଜୁ ହୋଇଥିଲା। ସିନ୍ଧିଚୋରି ୪ ହଜାର ୫୦୦ ଓ ଦୁଷ୍କର୍ମ ମାମଲା୨ ହଜାର ୯୮୪ଟି ରୁଜୁ ହୋଇଛି। ସେହିପରି ୯ ହଜାର ୮୧୭ଟି ମୋଟରଯାନ ଦୁର୍ଘଟଣା ଘଟିଥିବା ଶ୍ବେତପତ୍ରରେ ଉଲ୍ଲେଖ ଅଛି। ଗଞ୍ଜେଇ ଓ ବ୍ରାଉନସୁଗାର ଜବତରେ ରାଜ୍ୟକୁ ବଡ଼ ସଫଳତା ମିଳିଛି। ନିଶା ଦ୍ରବ୍ୟ କାରବାର ରୋକିବାରେ ସରକାରଙ୍କୁ ମିଳିଛି ବଡ ସଫଳତା।

ବର୍ଷକ ମଧ୍ୟରେ ୧ହଜାର ୩୭୪ କୁଇଣ୍ଟାଲ ଗଞ୍ଜେଇ ଓ ୩୪ କେଜି ବ୍ରାଉନସୁଗାର ଜବତ ସହିତ ୧୮ହଜାରରୁ ଅଧିକ ଏକର ଜମିରେ ବେଆଇନ ଗଞ୍ଜେଇ ଚାଷ ନଷ୍ଟ କରାଯାଇଛି । ସେହିପରି ୨୦୨୦ରେ ଅଗ୍ନିଶମ ବିଭାଗ ମଧ୍ୟ ବଡ଼ ସସଫଳତା ପାଇଛି । ୩୧୩କୋଟି ୯୬ଲକ୍ଷ ୨୪ ହଜାର ୯୦୦ଟଙ୍କା ମୂଲ୍ୟର ସମ୍ପତ୍ତି ନିଆଁ କବଳରୁ ରକ୍ଷା କରାଯାଇଛି । ୨୦୨୦ ବାତ୍ୟା ଅମ୍ପାନକୁ ମଧ୍ୟ ସଫଳତାର ସହିତ ମୁକାବିଲା କରାଯାଇଛି । ଯାହା ଶ୍ବେତପତ୍ରରେ ପ୍ରତିଫଳିତ ହୋଇଛି ।

ମୁଖ୍ୟମନ୍ତ୍ରୀଙ୍କ ଚିଠି ପରେ ପୁଣି ଚାଲିଲା NTPC TTPSର ଗୋଟିଏ ୟୁନିଟ୍

ଅନୁଗୁଳ: ଚାଲୁହେଲା NTPC TTPS ର ଗୋଟିଏ ୟୁନିଟ୍। ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ପରେ ବନ୍ଦ ଥିବା ୟୁନିଟ ମଧ୍ୟରୁ ଗୋଟିଏ ୟୁନିଟ ଆରମ୍ଭ ହୋଇଛି। ସକାଳ ୮ଟାରୁ ପ୍ଲାଣ୍ଟର ୩ ନମ୍ବର ୟୁନିଟ ଚାଲିବା ସହ ୬୦ ମେଗାଓ୍ବାଟ ବିଦ୍ୟୁତ ଉତ୍ପାଦନ ହେଉଛି। ଗତ ମଙ୍ଗଳବାର ପ୍ଲାଣ୍ଟର ସମସ୍ତ ୬ଟି ୟୁନିଟ ବନ୍ଦ କରାଯାଇଥିଲା। ଯାହାକୁ ନେଇ ଉଦବେଗ ପ୍ରକାଶ କରିଥିଲେ ମୁଖ୍ୟମନ୍ତ୍ରୀ। କେନ୍ଦ୍ରକୁ ଚିଠି ଲେଖି ପ୍ଲାଣ୍ଟ ବନ୍ଦ ନକରିବାକୁ ଅନୁରୋଧ କରିଥିଲେ ମୁଖ୍ୟମନ୍ତ୍ରୀ। ଏଥିସହ ଏନଟିପିସିର ଷ୍ଟେଜ୍ ୩ ସଂପ୍ରସାରଣକୁ କାର୍ଯ୍ୟକାରୀ କରିବାକୁ ଦାବି କରିଥିଲେ।

 

ଏନେଇ କେନ୍ଦ୍ର ଶକ୍ତିମନ୍ତ୍ରୀ ଆର କେ ସିଂହଙ୍କୁ ଚିଠି ଲେଖିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଶୀଘ୍ର ଏନଟିପିସି ଷ୍ଟେଜ-ଥ୍ରୀ ପ୍ରକଳ୍ପ କାର୍ଯ୍ୟକାରୀ କରିବାକୁ ସେ କେନ୍ଦ୍ର ମନ୍ତ୍ରୀଙ୍କୁ ଅନୁରୋଧ କରିଥିଲେ। NTPC ଷ୍ଟେଜ୍ ଥ୍ରୀ ପ୍ରକଳ୍ପର ସଂପ୍ରସାରଣ କରିବାକୁ ଅନୁରୋଧ କରିଥିଲେ ନବୀନ। ଯାହାଦ୍ବାରା ୧ ହଜାର ୩୨୦ ମେଗାୱାଟ ବିଦ୍ୟୁତ ଉତ୍ପାଦନ ହୋଇପାରିବ। TTPS ହେଉଛି NTPC ଷ୍ଟେଜ୍-ଥ୍ରୀର ପ୍ରକଳ୍ପ।

ନବୀନ ଲେଖିଥିଲେ, ଏଥିରେ ୬୬୦ ମେଗାୱାଟର ୨ଟି ୟୁନିଟ୍ ସ୍ଥାପନ ସହିତ ଷ୍ଟେସନର ଦକ୍ଷତା ବୃଦ୍ଧି କରାଯାଉ। ୨୦୧୦ରୁ ଏହି ପ୍ରସ୍ତାବ କେନ୍ଦ୍ର ସରକାରଙ୍କୁ ଦେଇଥିଲା ରାଜ୍ୟ। ହେଲେ ଏଯାଏଁ ଏହା କାର୍ଯ୍ୟକାରୀ ହୋଇନଥିବାରୁ ମୁଖ୍ୟମନ୍ତ୍ରୀ ଚିନ୍ତା ପ୍ରକଟ କରିଥିଲେ। ରାଜ୍ୟ ସରକାର TTPS ଷ୍ଟେଜ- ଥ୍ରୀ ପ୍ରକଳ୍ପକୁ ଅନୁମୋଦନ ଦେଇସାରିଛନ୍ତି। ତେବେ ଆଜି ଗୋଟିଏ ୟୁନିଟ ଚାଲୁ ହୋଇଛି ।

ରାଜ୍ୟରେ ପୁଣି ୨ଶହ ପାର କରୋନା ସଂକ୍ରମଣ, ୨୩୪ ନୂଆ ମାମଲା ଚିହ୍ନଟ

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି। କିଛି ଦିନର କରୋନାରୁ ତ୍ରାହି ପରେ ଏବେ ପୁଣି କରୋନା ତାର କାୟା ବିସ୍ତାର କରିବାରେ ଲାଗିଛି। ଆଜି ପୁଣି ୨୩୪ ଟି କରୋନା ସଂକ୍ରମିତ ମାମଲା ରାଜ୍ୟରୁ ଚିହ୍ନଟ କରାଯାଇଛି। ଗତକାଲି ୨ଶହ ପାର ସଂକ୍ରମଣ ହୋଇଥିବା ବେଳେ ଆଜି ମଧ୍ୟ ୨ ଶହ ପାର ସଂକ୍ରମିତ ଚିହ୍ନଟ ହୋଇଛନ୍ତି। ସଂକ୍ରମଣ ବଢ଼ିବା ଯୋଗୁଁ ରାଜ୍ୟରେ ଚିନ୍ତାର କାରଣର ପାଲଟିଛି।

ତେବେ ନୂଆପଡ଼ାରୁ ସର୍ବାଧିକ ୩୩ ଜଣ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ଖୋର୍ଦ୍ଧାରେ ରହିଛି ଦ୍ୱିତୀୟ ସର୍ବାଧି ୩୨ ଜଣ। ଅନୁଗୁଳରୁ ୩, ବାଲେଶ୍ୱରରୁ ୩, ବରଗଡ଼ରୁ ୨୪, ଭଦ୍ରକରୁ ୮, ବଲାଙ୍ଗୀରରୁ ୧୫, କଟକରୁ ୨୯, ଦେବଗଡ଼ରୁ ୧, ଢ଼େଙ୍କାନାଳରୁ ୧, ଗଞ୍ଜାମରୁ ୨, ଜଗତସିଂହପୁରରୁ ୬, ଯାଜପୁରରୁ ୪, ଝାରସୁଗୁଡ଼ାରୁ ୪, କଳାହାଣ୍ଡିରୁ ୧୭, କେନ୍ଦ୍ରାପଡ଼ାରୁ ୪, କେନ୍ଦୁଝରରୁ ୧, ମୟୂରଭଞ୍ଜରୁ ୫, ନୟାଗଡ଼ରୁ ୧, ପୁରୀରୁ ୬, ରାୟଗଡ଼ାରୁ ୨, ସମ୍ବଲପୁରରୁ ୧୧, ସୁନ୍ଦରଗଡ଼ରୁ ୧୫ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି ।

 

ରେଭେନସା ମହାନଦୀ ହଷ୍ଟେଲରୁ ପୁଣି ୨ ଜଣ ବିଦ୍ୟାର୍ଥୀ କରୋନା ପଜିଟିଭ ଚିହ୍ନଟ

କଟକ: ରେଭେନସା ମହାନଦୀ ହଷ୍ଟେଲରୁ ପୁଣି ୨ ଜଣ ବିଦ୍ୟାର୍ଥୀ କରୋନା ପଜିଟିଭ ଚିହ୍ନଟ। ପଜିଟିଭ୍ ଚିହ୍ନଟ ପରେ ଉଭୟଙ୍କୁ ଆଇସୋଲେସନରେ ରଖାଯାଇଛି। ଏହାକୁ ମିଶାଇ ରେଭେନ୍‌ସାରେ ମୋଟ ୫ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି। ପୂର୍ବରୁ ଜଣେ ଛାତ୍ରଙ୍କ ସହିତ ମନସ୍ତତ୍ବ ବିଭାଗରେ ଦୁଇ ଅଧ୍ୟାପିକା ମଧ୍ୟ ପଜିଟିଭ୍ ଚିହ୍ନଟ ହୋଇଥିଲେ। ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ପିଲାଙ୍କୁ ଚିହ୍ନଟ କରାଯାଇ ଟେଷ୍ଟିଂ ଜାରି ରହିଛି। ବିଶ୍ବବିଦ୍ୟାଳୟ ପରିସରକୁ ବାହାର ଲୋକଙ୍କ ପ୍ରବେଶକୁ ବାରଣ କରାଯାଇଛି। ସେପଟେ କରୋନା ସଂକ୍ରମିତ ଚିହ୍ନଟ ହେବା ପରେ ବିଶ୍ବବିଦ୍ୟାଳୟର ହେବାକୁ ଥିବା ପିଜି, ୟୁଜି ପରୀକ୍ଷାକୁ ସ୍ଥଗିତ ରଖାଯାଇଛି। ପରବର୍ତ୍ତୀ ନୋଟିସ ପର୍ଯ୍ୟନ୍ତ ପରୀକ୍ଷା ସ୍ଥଗିତ ରହିବ । ୧୪ ଦିନ ପର୍ଯ୍ୟନ୍ତ ଅଫଲାଇନ କ୍ଲାସ ବନ୍ଦ କରି କେବଳ ଅନଲାଇନ କ୍ଲାସ କରିବାକୁ ବିଶ୍ବବିଦ୍ୟାଳୟ କର୍ତ୍ତୁପକ୍ଷ ନିଷ୍ପତ୍ତି ନେଇଛନ୍ତି।

କରୋନା କାଳରେ ୪୯୭ ଦିନ ପରେ ବିଦେଶ ଯାତ୍ରା କଲେ ପ୍ରଧାନମନ୍ତ୍ରୀ, ବାଂଲାଦେଶ ସହିତ ହେବ ଏହି ଚୁକ୍ତି

ନୂଆଦିଲ୍ଲୀ: ଆଜିଠାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇ ଦିନିଆ ବାଂଲାଦେଶ ଗସ୍ତ କରିଛନ୍ତି । ସାରା ବିଶ୍ୱରେ କରୋନା ସଂକ୍ରମଣ ହେତୁ ପିଏମ ମୋଦି ୪୯୭ ଦିନ ପରେ ଏକ ବିଦେଶ ଗସ୍ତ କରିଛନ୍ତି। ଏହାପୂର୍ବରୁ ସେ ନଭେମ୍ବର ୨୦୧୯ ରେ ବ୍ରାଜିଲ ଗସ୍ତ କରିଥିଲେ। ଗତ ଏକ ବର୍ଷ ଧରି, ପ୍ରଧାନମନ୍ତ୍ରୀ କେବଳ ଭିଡିଓ କନଫରେନ୍ସିଂ ମାଧ୍ୟମରେ ବିଶ୍ର ଗୁରୁତ୍ୱପୂର୍ଣ୍ଣ ଇଭେଣ୍ଟରେ ଅଂଶଗ୍ରହଣ କରୁଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୁଇ ଦିନିଆ ଗସ୍ତ ସମୟରେ ନୂଆଦିଲ୍ଲୀ ଏବଂ ଢ଼ାକା ମଧ୍ୟରେ ଅତି କମରେ ପାଞ୍ଚଟି ଏମଓୟୁ ସ୍ୱାକ୍ଷର ହେବାର ସମ୍ଭାବନା ରହିଛି ବୋଲି ବାଂଲାଦେଶ ଗୁରୁବାର କହିଛି।

ବାଂଲାଦେଶ ତାର ସ୍ୱାଧୀନତାର ସୁବର୍ଣ୍ଣ ଜୟନ୍ତୀ ଉତ୍ସବ ତଥା ଏହାର ପ୍ରତିଷ୍ଠାତା ଶେଖ ମୁଜିବୁର ରହମାନଙ୍କ ଜନ୍ମ ଶତବାର୍ଷିକୀ ଉତ୍ସବରେ ଯୋଗଦେବା ପାଇଁ ମୋଦି ବାଂଲାଦେଶ ଗସ୍ତ କରିଛନ୍ତି । ୨୬ ରୁ ୨୭ ମାର୍ଚ୍ଚ ମଧ୍ୟରେ ଦୁଇ ଦିନିଆ ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦି ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କ ସହ ପ୍ରତିନିଧୀ ସ୍ତରୀୟ ଆଲୋଚନା ମଧ୍ୟ କରିବେ। ବାଂଲାଦେଶ ବୈଦେଶିକ ମନ୍ତ୍ରୀ ଡକ୍ଟର ଏ.କେ ଅବଦୁଲ ମୋମେନ କହିଛନ୍ତି ଯେ ଏମଓୟୁ ସଂଖ୍ୟା ଅଧିକ କିମ୍ବା କମ ହୋଇପାରେ, କିନ୍ତୁ ଅତି କମରେ ପାଞ୍ଚଟି ଏମଓୟୁ ସ୍ୱାକ୍ଷର ହେବାର ସମ୍ଭାବନା ରହିଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର କହିଛନ୍ତି ଯେ ଦୁଇ ଦିନିଆ ବାଂଲାଦେଶ ଗସ୍ତ ସମୟରେ ସେ ଶେଖ ହସିନାଙ୍କ ସହ ବିଭିନ୍ନ ପ୍ରସଙ୍ଗରେ ‘ଗଭୀର ଆଲୋଚନା’ କରିବେ। ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଛନ୍ତି । ବାଂଲାଦେଶ ଯିବା ପୂର୍ବରୁ ଜାରି ଏକ ବିବୃତ୍ତିରେ ପ୍ରଧାନମନ୍ତ୍ରୀ କହିଛନ୍ତି, ‘ମୁଁ ଖୁସି ଯେ କୋଭିଡ -୧୯ ମହାମାରୀ ଆରମ୍ଭ ହେବା ପରେ ପଡୋଶୀ ବନ୍ଧୁ ଦେଶକୁ ଏହା ମୋର ପ୍ରଥମ ବୈଦେଶିକ ଯାତ୍ରା। ଯେଉଁଥିରେ ଭାରତର ସାଂସ୍କୃତିକ, ଭାଷା ଏବଂ ଉଭୟ ଦେଶ ମଧ୍ୟରେ ଗଭିର ସମ୍ପର୍କ ରହିଛି ।

୨୪ ଘଣ୍ଟାରେ ଦେଶରୁ ୫୯ ହଜାରରୁ ଅଧିକ କରୋନା ସଂକ୍ରମିତ ଚିହ୍ନଟ, ୨୫୭ ଜଣଙ୍କର ମୃତ୍ୟୁ

ନୂଆଦିଲ୍ଲୀ: ଦେଶରେ କରୋନା ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି। ଦେଶରେ କରୋନାଭାଇରସ୍ ର ନୂଆ ଷ୍ଟ୍ରେନ୍‌ ପ୍ରତିଦିନ ନୂଆ ରେକର୍ଡ ସୃଷ୍ଟି କରୁଛି। ଆକଳନରୁ ଜଣାପଡ଼ିଛି ଦେଶରେ ପ୍ରତିଦିନ ୫୦ ହଜାରରୁ ଅଧିକ କରୋନା ସଂକ୍ରମିତ ଚିହ୍ନଟ ହେଉଛନ୍ତି। ସ୍ୱାସ୍ଥ୍ୟ ମନ୍ତ୍ରଣାଳୟର ତଥ୍ୟ ଅନୁଯାୟୀ, ମହାରାଷ୍ଟ୍ର, ପଞ୍ଜାବ, କେରଳ, କର୍ଣ୍ଣାଟକ, ଛତିଶଗଡ଼ ଏବଂ ଗୁଜରାଟର ରୁ ୮୦ ପ୍ରତିଶତ ନୂତନ କରୋନା ମାମଲା ଆସିଛି। ଗତ ୨୪ ଘଣ୍ଟା ମଧ୍ୟରେ ସାରା ଦେଶରେ ୫୯ ହଜାର ୧୧୮ କାରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି ୨୫୭ ଜଣଙ୍କର ମୃତ୍ୟୁ ହୋଇଛି। ନୂତନ ମାମଲା ଆସିବା ପରେ ଦେଶରେ ସଂକ୍ରମିତ ରୋଗୀଙ୍କ ସଂଖ୍ୟା ଏକ କୋଟି ୧୮ ଲକ୍ଷ ୪୬ ହଜାର ୬୫୨ କୁ ପହଞ୍ଚିଛି।

ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ ବର୍ତ୍ତମାନ ସୁଦ୍ଧା ଦେଶରେ ୧ କୋଟି ୧୨ ଲକ୍ଷ ୬୪ ହଜାର ୬୩୭ ଜଣ ଲୋକ କରୋନାରୁ ସୁସ୍ଥ ହୋଇ ଘରକୁ ଫେରିଛନ୍ତି।  ବର୍ତ୍ତମାନ ୪ ଲକ୍ଷ ୨୧ ହଜାର ୬୬ଟି ମାମଲା ସକ୍ରିୟ ରହିଛି। ଗତ ୨୪ ଘଣ୍ଟା ମଧ୍ୟରେ ଦେଶରେ ୨୫୭ ଜଣଙ୍କର ମୃତ୍ୟୁ ପରେ ଦେଶରେ ମୃତ୍ୟୁ ସଂଖ୍ୟା ୧ ଲକ୍ଷ ୬୦ ହଜାର ୯୪୯ କୁ ବୃଦ୍ଧି ପାଇଛି।

ଓ୍ୱାଣ୍ଡେ ସିରିଜ୍‌କୁ ସିଲ୍‌ କରିବା ପାଇଁ ଆଜି ମଇଦାନକୁ ଓହ୍ଲାଇବ ବିରାଟ ବାହିନୀ

ନୂଆଦିଲ୍ଲୀ: ଭାରତ ଏବଂ ଇଂଲଣ୍ଡ ମଧ୍ୟରେ ଚାଲିଥିବା ତିନି ଦିନିକିଆ ସିରିଜର ଦ୍ୱିତୀୟ ମ୍ୟାଚ୍ ଆଜି ପୁଣେରେ ଖେଳାଯିବ। ପ୍ରଥମ ଦିନିକିଆ ମ୍ୟାଚରେ ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦଳ ଭ୍ରମଣକାରୀ ଇଂଲିସ ଟିମ୍‌କୁ ୬୬ ରନରେ ପରାସ୍ତ କରିଥିଲା। ଆଜି ହେବାକୁ ଯାଉଛି ଦ୍ୱିତୀୟ ମ୍ୟାଚ। ଟି ୨୦ ମ୍ୟାଚ ସିରିଜକୁ ଭାରତ ଅକ୍ତିଆର କଲାଭଳି ଓ୍ୱାଣ୍ଡେ ସିରିଜକୁ ମଧ୍ୟ ହାତେଇ ବାକୁ ଚେଷ୍ଟରା କରିବ ଭାରତ।

ଟେଷ୍ଟ ରାଙ୍କିଙ୍ଗରେ ଏକ ନମ୍ବର ଭାରତୀୟ ଦଳ ODI ରେ ମଧ୍ୟ ପ୍ରଥମ ସ୍ଥାନରେ ରହିବା ପାଇଁ ଆଜି ଚେଷ୍ଟା କରିବ। ଏଥିପାଇଁ ଭାରତକୁ ଆଗାମୀ ଦୁଇଟି ମ୍ୟାଚ୍ ଜିତିବା ସହିତ ଇଂଲଣ୍ଡକୁ କ୍ଲିନ୍‌ ସୁଇପ୍‌ କରିବାକୁ ପଡ଼ିବ। ଯଦି ଏହି ସିରିଜରେ ଭାରତ ତିନୋଟି ମ୍ୟାଚ୍ ଜିତେ ତେବେ ଭାରତୀୟ ଦଳ ତିନୋଟି ରେଟିଂ ପଏଣ୍ଟ ହାସଲ କରିବ ଏବଂ ୧୨୦ ପଏଣ୍ଟ ସହ ODI ରେ ନମ୍ବର ଓ୍ୱାନ୍‌ ସ୍ଥାନରେ ରହିବ।

୧୯୮୪ ପରେ ଇଂଲଣ୍ଡ ଭାରତରେ ODI ସିରିଜ୍ ଜିତି ନାହିଁ

ଭାରତ ତାର ଭଲ ଫର୍ମକୁ ଆସି ପ୍ରଥମ ଓ୍ୱାଣ୍ଡେ ମ୍ୟାଚକୁ ଅକ୍ତିଆର କରିଛି । ଏହା ପରେ ଇଂଲଣ୍ଡ ବିପକ୍ଷରେ ଆଉ ଦୁଇଟି ମ୍ୟାଚ ଜିତିବା ପାଇଁ ଆଶା ବଢ଼ିଛି। ନିଜ ଦେଶରେ ଇଂଲଣ୍ଡ ବିପକ୍ଷରେ ଭାରତର ରେକର୍ଡ ବହୁତ ଭଲ ରହିଛି। ଦୁଇ ଦେଶ ମଧ୍ୟରେ ଭାରତରେ ୯ ଟି ODI ସିରିଜ୍ ହୋଇଛି। ଏଥିମଧ୍ୟରୁ ଭାରତ ୬ ଟି ଏବଂ ଇଂଲଣ୍ଡ ଗୋଟିଏ ଜିତିଛି। ଅବଶିଷ୍ଟ ଦୁଇଟି ସିରିଜ୍ ଡ୍ର ରହିଛି । ଯେଉଁଥିପାଇଁ ଏପର୍ଯ୍ୟନ୍ତି ଇଂଲଣ୍ଡ ଭାରତରେ ଗୋଟିଏବି ସିରିଜ ଜିତିନାହିଁ ।

 

ବ୍ୟାଙ୍କରେ ନିଆଁ ଲାଗି ପୋଡ଼ିଗଲା ଲକ୍ଷାଧିକ ଟଙ୍କାର ସମ୍ପତ୍ତି

କଟକ: ବ୍ୟାଙ୍କରେ ନିଆଁ ଲାଗି ପୋଡିଗଲା ଲକ୍ଷାଧିକ ଟଙ୍କାର ସମ୍ପତ୍ତି। କଟକ ମହାନଦୀ ବିହାର ସ୍ଥିତ ଓଡିଶା ଗ୍ରାମ୍ୟବ୍ୟାଙ୍କ ରିଜୋନାଲ ଅଫିସରେ ଅଗ୍ନିକାଣ୍ଡ। ବ୍ୟାଙ୍କରେ ଥିବା ଏ.ସି, କମ୍ପ୍ୟୁଟର ସହ ବିଭିନ୍ନ କାଗଜପତ୍ର ପୋଡି ନଷ୍ଟ ହୋଇଯାଇଛି। ସ୍ଥାନୀୟ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି । ସଟ୍ ସର୍କିଟ୍ ଯୋଗୁ ନିଆଁ ଲାଗିଥିଵା ଅନୁମାନ କରାଯାଉଛି।

ଜଙ୍ଗଲରେ ବଳଦକୁ ଖାଇଗଲା ବାଘ, ଲୋକେ ଆତଙ୍କିତ

ବାଘ ଖାଇଦେଲା ବଳଦ। ଏଭଳି ଖବର ପରେ ଲୋକ ମାନଙ୍କ ଆଦ୍ୟରେ ଆତଙ୍କ ଖେଳିଯାଇଛି। ବଳଦକୁ ଜଙ୍ଗଲି ଯନ୍ତୁ ଖାଇ ଦେଇଥିବାରୁ ଲୋକେ ଏହା ବାଘ ଖାଇଛି ବୋଲି ଅଭିଯୋଗ କରିଛନ୍ତି। ଏଭଳି ଏକ ଘଟଣା କନ୍ଧମାଳ ଜିଲ୍ଲା ବେଲଘର ବନାଞ୍ଚଳର ଗୁମା ସେକ୍ସନ ଅନ୍ତର୍ଗତ ତଗାପାଙ୍ଗା ଜଙ୍ଗଲରେ ଦେଖିବାକୁ ମିଳିଛି। ବାଘ ଆତଙ୍କ ପରେ ଏବେ ଲୋକେ ଭୟରେ ଘରୁ ବାହାରିବା ବାହାର କରିଦେଇଛନ୍ତି। ଗୋଟିଏ ବଳଦକୁ ବାଘ ଖାଇଦେଇଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ। ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି। ବାଘ ଆତଙ୍କ ଦେଖାଦେଇଥିବାରୁ ଅଞ୍ଚଳବାସୀଙ୍କୁ ଜଙ୍ଗଲକୁ ନଯିବା ପାଇଁ ପରାମର୍ଶ ଦେଇଛି ବନବିଭାଗ। ଏଥିସହ ବନ କର୍ମଚାରୀଙ୍କ ପକ୍ଷରୁ ପାଟ୍ରୋଲିଂ କଡ଼ାକଡ଼ି କରାଯାଇଛି। କିନ୍ତୁ ବାଘ ଏପର୍ଯ୍ୟନ୍ତ କାହାରି ନଜରରେ ଆସିନାହିଁ।

ଟ୍ରାକ୍ଟରରୁ ଜବତ ହେଲା ୩୦ ଲକ୍ଷରୁ ଉର୍ଦ୍ଧ୍ୱ ଟଙ୍କାର ଗଞ୍ଜେଇ

କୋରାପୁଟ: କୋରାପୁଟ ଜିଲ୍ଲା ଲମତାପୁଟ ପୋଲିସକୁ ମିଳିଛି ବଡ଼ ସଫଳତା। ଏକ ଗଞ୍ଜେଇ ବୋଝେଇ ଟ୍ରାକ୍ଟରକୁ ଲମତାପୁଟ ପୋଲିସ ଧରିବାରେ ସଫଳ ହୋଛନ୍ତି। ଟ୍ରାକ୍ଟରରେ ପ୍ରାୟ ୩୦ ଲକ୍ଷରୁ ଉର୍ଦ୍ଧ୍ୱ ଟଙ୍କାର ଗଞ୍ଜେଇ ଧରିଥିବା ବେଳେ ୨ଜଣ ଘଟଣାସ୍ଥଳରେ ଟ୍ରାକ୍ଟର ଛାଡ଼ି ଫେରାର ହୋଇଯାଇଛନ୍ତି। ଆନ୍ଧ୍ରପ୍ରଦେଶ ସୀମାନ୍ତ ବାଙ୍ଗୁରୁପଡା ନଦୀ ଘାଟରୁ ଲମତାପୁଟକୁ ଗଞ୍ଜେଇ ଚୋରା ଚାଲାଣ ନେଇ  ଲମତାପୁଟ ପୋଲିସ ଖବର ପାଇଥିଲେ। ପରେ ଲମତାପୁଟ ପୋଲିସ ଏକ ଟିମ୍‌ ଗଠନ କରି ବାଙ୍ଗୁରୁପଡା ନିକଟରେ ଚଡାଉ କରିଥିଲେ। ପୋଲିସକୁ ଦେଖି ଘଟଣାସ୍ଥଳରେ ଗଞ୍ଜେଇ ଭର୍ତ୍ତି  ଟ୍ରାକ୍ଟରକୁ ଛାଡ଼ି ଡ୍ରାଇଭର ଓ ଗଞ୍ଜେଇ ମାଫିଆ ଫେରାର ହୋଇଯାଇଥିଲେ। ଗଞ୍ଜେଇ ଭର୍ତ୍ତି ଟ୍ରାକ୍ଟରକୁ ଲମତାପୁଟ ଥାନାକୁ ଆଣିବା ପରେ ସେଥିରୁ ୩୮୭ କେଜି ୮୦୦ ଗ୍ରାମ ଗଞ୍ଜେଇ ଜବତ କରାଯାଇଥିଲା । ଜବତ ଗଞ୍ଜେଇ ମୂଲ୍ୟ ପ୍ରାୟ ୩୦ ଲକ୍ଷ ଟଙ୍କାର ହେବ ବୋଲି ପୋଲିସ ପ୍ରକାଶ କରିଛି।