ଚେନ୍ନାଇ: ଆରମ୍ଭ ହେଲା ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୧ । ଉଦ୍ଘାଟନୀ ମ୍ୟାଚ୍ରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଲା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ମୁମ୍ୱାଇ ଇଣ୍ଡିଆନ୍ସ ବିପକ୍ଷରେ ପ୍ରାରମ୍ଭିକ ମ୍ୟାଚ୍ ଖେଳିବ ଆରସିବି । ତେବେ ବିନା ଦର୍ଶକରେ ହେବ ଆଇପିଏଲର ଚଳିତ ସଂସ୍କରଣ । ଏ ନେଇ ମୈଦାନ ପ୍ରସ୍ତୁତ ଥିବାବେଳେ ତୟାର ଅଛନ୍ତି ଖେଳାଳି । ଚେନ୍ନାଇରେ ଖେଳାଯିବ ଆରମ୍ଭ ହୋଇଥିବା ଏହି ହାଇଭୋଲଟେଜ୍ ଟକ୍କର । କରୋନା କଟକଣା ମଧ୍ୟରେ ହେବାକୁ ଯାଉଛି । ହାର୍ଡ ହିଟର ରୋହିତ ଓ କ୍ୟାପଟେନ୍ କୋହଲିଙ୍କ ମଧ୍ୟରେ ହେବ କଡା ମୁକାବିଲା । ଦେଶ ଓ ଦେଶ ବାହାରର ଖେଳାଳୀଙ୍କୁ ନେଇ ମୈଦାନକୁ ଓହ୍ଲାଇବେ ଉଭୟ ଟିମ୍ । ମ୍ୟାଚରେ ୫ଥର ଆଇପିଏଲ୍ ବିଜେତା ମୁମ୍ବାଇ ଇଣ୍ଡିଆନ୍ସ ଓ ବିରାଟ କୋହଲିଙ୍କ ଟିମ ଆରସିବି ମଧ୍ୟରେ ଖେଳାଯିବ ।
ଜାଲରେ ବଡ଼ ମାଛ ପଡ଼ିଥିବା ଭାବି ଧାଇଁ ଆସିଲେ, ମିଳିଲା ବାଇକ୍
ଭଦ୍ରକ: ଜାଲରେ ପଡ଼ିଛି ବଡ଼ ମାଛ । ଡକାଡକି ହୋଇ ମାଛ ପାଇଁ ସଭିଏଁ ଧାଇଁ ଆସିଲେ । ହେଲେ ଜାଲରେ ମାଛ ନଥିଲା, ଥିଲା ବାଇକ୍ । ଓଜନ ଲାଗିଲା ଜାଲ । ଭାବିଲେ ଜାଲରେ ପଡ଼ିଛି ବଡ଼ ମାଛ । ଏତେ ବଡ଼ ମାଛ ଯେ ୪ ଜଣ ଡକାଡକି ହୋଇ ଜାଲ ଟାଣିଲେ । ଜାଲ ଉପରକୁ ଆସିଲା ହେଲେ ମାଛ ପରିବର୍ତ୍ତେ ଥିଲା ଏକ ବାଇକ୍ । ଭଦ୍ରକ ଜିଲ୍ଲା ଧାମନଗର ବ୍ଲକ କାଞ୍ଜିଆପାଳ ଗ୍ରାମର ଆମ୍ବନାଳ ନିକଟରେ ଏଭଳି ଘଟଣା ଘଟିଛି ।

ଆମ୍ବ ନାଳରେ ଜାଲୁଆ ମାଛ ଧରୁଥିଲେ । ମାଛ ଧରିବା ବେଳେ ଜାଲ ଭାରି ଲାଗିଲା । ଯାହାଫଳରେ ସ୍ଥାନୀୟ ଯୁବକ ମାଛ ଧରିବାକୁ ଧାଇଁ ଆସିଲେ । ପରେ ଯୁବକ ମାନେ ପହଞ୍ଚି ଜାଲ ଟାଣିବାରୁ ଜାଲରେ ଏକ ବାଇକ୍ ଲାଗିଥିବା ଦେଖିଥିଲେ । ପରେ ବାଇକ୍ ଟିକୁ ଉପରକୁ ଆଣିଥିଲେ । ତେବେ ବାଇକ୍ କାହାର ସେ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । କୌଣସି ଅପରାଧୀ କିମ୍ବା ଡକାୟତ ବାଇକ୍ ଲୁଚାଇବା ପାଇଁ ନାଳକୁ ପିଙ୍ଗି ଥାଇପାରେ ବୋଲି ସନ୍ଦେହ କରାଯାଉଛି ।
IPL 2021: ଉଦଘାଟନୀ ମାଚରେ କିଏ କରିବ ବାଜିମାତ୍, ଭବିଷ୍ୟବାଣୀ କଲେ ପୂର୍ବତନ ଭାରତୀୟ କ୍ରିକେଟର୍
ଚେନ୍ନାଇ: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ର ୧୪ତମ ସଂସ୍କରଣ ଶୁକ୍ରବାର ଚେନ୍ନାଇର ଏମ ଚିଦାମ୍ବରମ୍ କ୍ରିକେଟ୍ ଷ୍ଟାଡିୟମରେ ଖେଳାଯିବ। ଉଦଘାଟନୀ ମ୍ୟାଚରେ ମଇଦାନକୁ ଓହ୍ଲାଇବେ ମୁମ୍ବାଇ ଇଣ୍ଡିଆନ୍ସ ଓ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର । ଯାହାକୁ ନେଇ କ୍ରିକେଟ୍ ପ୍ରେମୀଙ୍କ ଭିତରେ ଉତ୍କଣ୍ଠା ଦେଖାଦେଇଛି ।
ଡିଫେଣ୍ଡିଂ ଚାମ୍ପିଅନ୍ ବୋଲାଉଥିବା ମୁମ୍ବାଇ ଇଣ୍ଡିଆନ୍ସରେ ଅନେକ ଅଭିଜ୍ଞ ଓ ମ୍ୟାଚ୍ ୱିନର ଖେଳାଳି ରହିଛନ୍ତି। ଯାହା ପାଇଁ ହିଟ୍ ମ୍ୟାନ୍ ରୋହିତ ଶର୍ମାଙ୍କ ନେତୃତ୍ୱାଧୀନ ମୁମ୍ବାଇ ଇଣ୍ଡିଆନ୍ସ ଓ କିଙ୍ଗ କୋହଲିଙ୍କ ଆରସିବି ମଧ୍ୟରେ କଡା ଟକ୍କର ହେବ। ଗ୍ଲେନ୍ ମ୍ୟାକ୍ସୱେଲ ଏବଂ କାଇଲ୍ ଜାମିସନଙ୍କ ଭଳି ଖେଳାଳିଙ୍କ ଏଣ୍ଟ୍ରି ସହ ଆରସିବି ମଧ୍ୟ ଶକ୍ତିଶାଳୀ ପାଲଟିଛି | ଏଭଳି ପରିସ୍ଥିତିରେ ଭାରତର ପୂର୍ବତନ ବ୍ୟାଟ୍ସମ୍ୟାନ୍ ତଥା commentator ଆକାଶ ଚୋପ୍ରା ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍କୁ ନେଇ ପ୍ରେଡିକସନ୍ କରିଛନ୍ତି।

ଆକାଶଙ୍କ ମତରେ ଆଇପିଏଲରେ ମୁମ୍ବାଇ ଇଣ୍ଡିଆନ୍ସର ଦବଦବା ରହିଥିବା ବେଳେ ଏହା ପଛରେ ଅନେକ କାରଣବି ରହିଛି । ଟିମରେ ଅନେକ ମ୍ୟାଚ୍ ୱିନର ପ୍ଲେୟାର ରହିଥିବା ବେଳେ ହିଟ୍ ମ୍ୟାନଙ୍କ କ୍ୟାପଟେନସିପର ଜବାବ ନାହିଁ। ଗେମ୍ କୁ କିଭଳି ଖେଳା ଯାଏ ତାହା ତାଙ୍କୁ ବେଶ ଭଲଭାବେ ଜଣା। ରୋହିତ ଶର୍ମା, ସୂର୍ଯ୍ୟକୁମାର ଯାଦବ, ଇଶାନ କିସନ୍, ହାର୍ଦ୍ଦିକ, କୃଣାଳ, ବୁମରାହ ଓ ରାହୁଲ ଚହର ଭଳି ଖେଳାଳି ପ୍ଲେଇଙ୍ଗ ୧୧ରେ ଖେଳିବାର ସମ୍ଭାବନା ରହିଛି । ଆଉ ଏହି ଖେଳାଳି ମାନେ ହେଉଛନ୍ତି ଜଣେ ଜଣେ ମ୍ୟାଚ୍ ୱିନର । ଏଭଳି ପ୍ରତିଭାବାନ ଯୋଡି ଆପଣଙ୍କୁ ଆଉ କୌଣସି ଟିମରେ ଦେଖିବାକୁ ମିଳିବ ନାହିଁ। ଯାହା ଟିମକୁ ଅଧିକ ଶକ୍ତିଶାଳୀ କରୁଛି ।
ଆକାଶ କହିଛନ୍ତି ଯେ ପ୍ରଥମ ମ୍ୟାଚରେ ରୋହିତ ଶର୍ମାଙ୍କ ପଲଟନ୍ ବିରାଟ ବାହିନୀ ଉପରେ ଭାରୀ ପଡିପାରେ। କାହିଁକି ନା ରୋହିତଙ୍କ ଭଳି ବ୍ୟାଟ୍ସମ୍ୟାନ, ଜସପ୍ରିତ ବୁମରାହଙ୍କ ଭଳି ବୋଲର ଓ ହାର୍ଦ୍ଦିକ ପାଣ୍ଡ୍ୟାଙ୍କ ଭଳି ଅଲରାଉଣ୍ଡର ଆଉ କେଉଁଠି ଦେଖିବାକୁ ମିଳିବେ ନାହିଁ।

ଭାରତୀୟ ଦଳର ଏହି ପୂର୍ବତନ କ୍ରିକେଟର ଭବିଷ୍ୟବାଣୀ କରିଛନ୍ତି, ଏହି ମ୍ୟାଚରେ ସୂର୍ଯ୍ୟକୁମାର ଯାଦବ ଓ ରୋହିତ ମିଶି ବିରାଟ ଏବଂ ମ୍ୟାକ୍ସୱେଲଙ୍କଠାରୁ ଅଧିକ ରନ୍ ସ୍କୋର କରିପାରନ୍ତି। ଏମ ଚିଦାମ୍ବରମ ଷ୍ଟାଡିୟମ ପିଚକୁ ନଜରରେ ରଖି ଆକାଶ କହିଛନ୍ତି ଯେ ଟୁର୍ନାମେଣ୍ଟର ପ୍ରଥମ ମ୍ୟାଚରେ ସ୍ପିଡ୍ ବୋଲରଙ୍କ ଅପେକ୍ଷା ସ୍ପିନର ଅଧିକ ୱିକେଟ୍ ନେବେ। ଏମିତିକି ଉଭୟ ଦଳର ଓପନର୍ ମାନେ ଏକ ଦମଦାର ଇନିଂସ ଆରମ୍ଭ କରିବେ ବୋଲି ସେ ପ୍ରେଡିକସନ୍ କରିଛନ୍ତି ।
ମୁମ୍ବାଇର ଚାରିଜଣ ବିଦେଶୀ ଖେଳାଳି ଭାବରେ ଜେମ୍ସ ନିଶମ, ଟ୍ରେଣ୍ଟ ବୋଲ୍ଟ, ଆଡାମ ମିଲନେ, କିରୋନ ପୋଲାର୍ଡଙ୍କ ଉପରେ ଭରସା କରିଥିବା ବେଳେ ଆରସିବିର ଗ୍ଲେନ୍ ମ୍ୟାକ୍ସୱେଲ, ଏବି ଡିଭିଲିୟର୍ସ, ଡେନ କ୍ରିଷ୍ଟିଆନଙ୍କ ନାଁ ସେ ନେଇଛନ୍ତି। ତାଙ୍କ ମତରେ ଆରସିବିର ଚତୁର୍ଥ ସ୍ଥାନରେ ବିଦେଶୀ ଖେଳାଳିଙ୍କ ମଧ୍ୟରେ କେନ୍ ରିଚାର୍ଡସନ ଏବଂ କେଲ୍ ଜାମିସନଙ୍କୁ ନେବା ପାଇଁ ପରାମର୍ଶ ଦେଇଛନ୍ତି। ଯାହା ଟିମର ପ୍ରଦର୍ଶନକୁ ଅଧିକ ସୁଦୃଢ କରିପାରିବ।
୮ ଜିଲ୍ଲାକୁ ତିନି ଘଣ୍ଟା ପାଇଁ କାଳବୈଶାଖୀ ସତର୍କତା
ଭୁବନେଶ୍ୱର: କାଳବୈଶାଖୀ ନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ସତର୍କ ସୂଚନା ଜାରି କରିଛି । ୮ ଗୋଟି ଜିଲ୍ଲାକୁ ଜାରି ହୋଇଛି ୟେଲୋ ୱାର୍ଣ୍ଣିଂ । ମଧ୍ୟମଧରଣର କାଳବୈଶାଖୀ ବର୍ଷା ସହ ଘୂର୍ଣ୍ଣିଝଡ଼ ସମ୍ଭାବନା ରହିଛି । ପବନର ବେଗ ଘଣ୍ଟା ପ୍ରତି ୩୦ରୁ ୪୦ କିଲୋମିଟର ରହିବା ନେଇ ଆକଳନ କରାଯାଇଛି । ଆଗାମୀ ୩ ଘଣ୍ଟା ପାଇଁ କୋରାପୁଟ, ରାୟଗଡ଼ା, ଗଞ୍ଜାମ ଓ ଗଜପତି ଜିଲ୍ଲାକୁ ସତର୍କ କରାଇଛି ପାଣିପାଗ ବିଭାଗ ।
ସେହିପରି ହାଲକା କାଳବୈଶାଖୀ ବର୍ଷା ଓ ବଜ୍ରପାତ ନେଇ କନ୍ଧମାଳ, ନୟାଗଡ଼, କଟକ ଓ ଖୋର୍ଦ୍ଧା ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ଆଗାମୀ ତିନିଘଣ୍ଟା ଯାଏ ସତର୍କ ରହିବାକୁ କୁହାଯାଇଛି । ପାଗକୁ ଦେଖି ବଜ୍ରପାତରୁ ବର୍ତ୍ତିବା ଲାଗି ସୁରକ୍ଷିତ ସ୍ଥାନକୁ ଚାଲିଯିବାକୁ ପାଣିପାଗ ବିଭାଗ ପକ୍ଷରୁ କୁହାଯାଇଛି ।
କାଶୀ ବିଶ୍ୱନାଥ ମନ୍ଦିର- ଜ୍ଞାନଭାପି ମସ୍ଜିଦ ବିବାଦ: କୋର୍ଟଙ୍କ ରାୟଙ୍କୁ ଚ୍ୟାଲେଞ୍ଜ କରିବ ସୁନ୍ନି ସେଣ୍ଟ୍ରାଲ ଓ୍ୱାକଫ୍
ବାରାଣସୀ: କାଶୀ ବିଶ୍ୱନାଥ ମନ୍ଦିର ଏବଂ ଜ୍ଞାନବ୍ୟାପୀ ମସଜିଦ୍ ମାମଲାରେ ଏବେ ଆକ୍ଷେପ ପ୍ରତିଆକ୍ଷେପ ଆରମ୍ଭ ହୋଇଯାଇଛି । ସୁନ୍ନି ସେଣ୍ଟ୍ରାଲ ଓ୍ୱାକଫ୍ ବୋର୍ଡ ଓକିଲ କହିଛନ୍ତି ଯେ, ସେ କୋର୍ଟଙ୍କ ନିଷ୍ପତ୍ତିରେ ସନ୍ତୁଷ୍ଟ ନୁହଁନ୍ତି ଏବଂ ସେ ଏହି ରାୟକୁ ହାଇକୋର୍ଟରେ ଚ୍ୟାଲେଞ୍ଜ କରିବେ । ଅପରପକ୍ଷରେ ଏଆଇଏମ୍ଆଇଏମ୍ ଚିଫ୍ ଆସଦୁଦ୍ଦିନ ଓବେସୀ ମଧ୍ୟ ନିଜ ପ୍ରତିକ୍ରିୟା ରଖିଛନ୍ତି । ତେବେ ଆସିବା ଜାଣନ୍ତୁ କାଶୀ ବିଶ୍ୱନାଥ ଏବଂ ଜ୍ଞାନବ୍ୟାପୀ ମସଜିଦ୍ ମଧ୍ୟରେ କ’ଣ ବିବାଦ ରହିଛି । ଏବଂ ଏଏସ୍ଆଇ ଏ ମାମଲାରେ କ’ଣ ଦାୟିତ୍ୱ ମିଳିଛି ।
ବାରାଣାସୀ କାଶୀ ବିଶ୍ୱନାଥ ମନ୍ଦିର ଏବଂ ସେହି ଅଞ୍ଚଳରେ ସ୍ଥିତ ଜ୍ଞାନବ୍ୟାପୀ ମସଜିଦ୍ ମାମଲାରେ କୋର୍ଟ ଗୁରୁବାର ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି । ଯେଉଁଥିରେ ଜ୍ଞାନବ୍ୟାପୀ ପରିସରର ପ୍ରତ୍ନତାତ୍ତ୍ୱିକ ସର୍ବେକ୍ଷଣ କରିବା ନେଇ ଆର୍କଲୋଜିକାଲ୍ ସର୍ଭେ ଅଫ୍ ଇଣ୍ଡିଆ୍ (ଏଏସ୍ଆଇ)କୁ ଦିଆଯାଇଛି । ଏବଂ ରିପୋର୍ଟ ମଧ୍ୟ କୋର୍ଟରେ ଉପସ୍ଥାପନ କରିବାକୁ କୁହାଯାଇଛି । ଏହା ଦ୍ୱାରା ବହୁତ ଶୀଘ୍ର ସ୍ପଷ୍ଟ ହୋଇଯିବ ଯେ, ଜ୍ଞାନବ୍ୟାପୀ ମସଜିଦ୍ ତଳେ ଏବଂ ଆଖପାଖର ପୂରା ଅଞ୍ଚଳରେ ପ୍ରତ୍ନତାତ୍ତ୍ୱିକ ଅନୁଯାୟୀ ରହିଛି କି? ସେଠାରେ କାଶୀ ବିଶ୍ୱନାଥ ମନ୍ଦିର ସହ ଜଡ଼ିତ କୌଣସି ଅବଶେଷ ରହିଛି କି?
ତେବେ କୋର୍ଟ ପକ୍ଷରୁ ପ୍ରକାଶ ରାୟ ମନ୍ଦିର ପକ୍ଷଙ୍କ ଆଶା ବଢ଼ାଇଛି । କାହିଁକି ନା ମନ୍ଦିର ପକ୍ଷଙ୍କ ତରଫରୁ ଦାବି କରାଯାଇଛି ଯେ, ଜ୍ଞାନବ୍ୟାପୀ ମନ୍ଦିର ପରିସର ଏବଂ ଏହାର ତଳେ ମନ୍ଦିର ଅବଶେଷ ରହିଛି । ବାରାଣାସୀ ସିଭିଲ୍ ଜଜ୍ ସିନିୟର ଡିଭିଜନ୍ ଫାଷ୍ଟ ଟ୍ରାକ୍ କୋର୍ଟଙ୍କ ପକ୍ଷରୁ ରାୟ ଦିଆଯିବା ପରେ ଆଗାମୀ ଶୁଣାଣି ମେ’ ୩୧ ତାରିଖ ପାଇଁ ଧାର୍ଯ୍ୟ କରାଯାଇଛି । ବର୍ତ୍ତମାନ କୋର୍ଟ କାଶୀ ବିଶ୍ୱନାଥ ପକ୍ଷର ଲୋକଙ୍କ ସପକ୍ଷରେ ରାୟ ଦେଇଛନ୍ତି ।











