କୋଲକାତା(ସୁଶାନ୍ତ କୁମାର ସାହୁ): ପଶ୍ଚିମବଙ୍ଗରେ ପ୍ରଥମ ପ୍ରର୍ଯ୍ୟାୟ ମତଦାନ ୨୭ ମାର୍ଚ୍ଚରୁ ଆରମ୍ଭ ହେବ । ନିର୍ବାଚନ ଲାଗି ଟିଏମସି, ବିଜେପି ଓ କଂଗ୍ରେସ-ବାମଦଳ ମେଣ୍ଟ ଜୋରଦାର୍ ପ୍ରଚାରରେ ଲାଗିଛନ୍ତି । ଏହାରି ଭିତରେ ପୂର୍ବ କୋଲକାତାର ତାଙ୍ଗଡ଼ା ଅଞ୍ଚଳରେ ଟିଏମସିର ପ୍ରଚାରକୁ ନେଇ ସମସ୍ତଙ୍କ ମନରେ ଅନେକ ପ୍ରଶ୍ନ । କାରଣ ତାଙ୍ଗଡ଼ାରେ ଟିଏମସି ଚୀନ୍ ଭାଷାରେ ପ୍ରଚାର କରୁଛି । ଲିଫ୍ଟଲେଟ୍ ଠୁ ନେଇ ବ୍ୟାନର ଆଉ ପୋଷ୍ଟର ସବୁକିଛି ଚାଇନିଜ୍ ଭାଷାରେ ଲେଖୁଛି ଟିଏମସି । ଚୀନ ଭାଷାରେ ଲେଖି ଟିଏମସି ପ୍ରାର୍ଥୀଙ୍କ ଲାଗି ଭୋଟ୍ ମାଗୁଛି । ଆପଣ ଭାବୁଥିବେ ପଶ୍ଚିମବଙ୍ଗ ଲୋକଙ୍କ ସହ ଚୀନ ଭାଷାର କଣ ରହିଛି ସମ୍ପର୍କ । ଏଥିପାଇଁ ଆମକୁ ଫେରିବାକୁ ପଡ଼ିବ ଫ୍ଲାସ ବ୍ୟାକକୁ… ଓଲଟାଇବାକୁ ପଡ଼ିବ ଇତିହାସର ପୋଥିକୁ…
ପ୍ରକୃତରେ ତାଙ୍ଗଡ଼ା ଅଞ୍ଚଳକୁ କୋଲକାତାର ଚାଇନା ଟାଉନ୍ କୁହାଯାଏ । ଏହି ଅଞ୍ଚଳରେ ପ୍ରାୟ ଚୀନର ପ୍ରାୟ ୨୦ ହଜାର ଭାରତୀୟ ନାଗରିକ ରହୁଥିଲେ । ସମୟକ୍ରମେ ସେମାନଙ୍କ ସଂଖ୍ୟା ୨ ହଜାର ପାଖାପାଖି ରହିଛି । କୋଲକାତାରେ ରହୁଥିବା ଏହି ଚୀନ ଭାରତୀୟ ସମୁଦାୟ ପାରମ୍ପରିକ ବ୍ୟବସାୟ ଟ୍ରେନିଂ ସହିତ ରେଷ୍ଟୁରାଣ୍ଟ ଗୁଡ଼ିକରେ ଦୀର୍ଘ ଦିନରୁ କାମ କରୁଛନ୍ତି । ଏବେ ବି ଏହି ଅଞ୍ଚଳ ଚୀନ ରେଷ୍ଟୁରାଣ୍ଟ ପାଇଁ ପରିଚିତ । ଯେଉଁଠି ପାରମ୍ପରିକ ଚୀନ-ଭାରତୀୟ ଖାଦ୍ୟର ମଜା ନେବାକୁ ଆସନ୍ତି । ଏଠାରେ ରହୁଥିବା ଚୀନର ମୂଳ ଅଧିବାସୀଙ୍କୁ କାମଚଳା ହିନ୍ଦୀ ଓ ବଙ୍ଗଳା କହି ଆସେ । ଏଥିପାଇଁ ଟିଏମସି ସେମାନଙ୍କ ମାତୃଭାଷାରେ ପ୍ରଚାର କରି ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଛି । ତେବେ, ତାଙ୍ଗଡ଼ା ଅଞ୍ଚଳରେ ରହୁଥିବା ଚୀନ ଲୋକଙ୍କ ସଂଖ୍ୟା ଏତେ ଅଧିକ ନୁହେଁ ଯେ ସେମାନେ ନିର୍ବାଚନ ଫଳାଫଳକୁ ପ୍ରଭାବିତ କରିପାରିବେ । ତଥାପି ବିଜୟ ଲାଗି ଟିଏମସି ଯଥା ସମ୍ଭବ ପ୍ରୟାସ କରୁଛି ।
୧୮ଶହ ଖ୍ରୀଷ୍ଟାଦ୍ଦରୁ ସମ୍ପର୍କ
ଚୀନ ଓ ପଶ୍ଚିମବଙ୍ଗର ସମ୍ପର୍କ ବହୁ ବର୍ଷର ପୁରୁଣା । କେତେକ ଗଣମାଧ୍ୟମ ରପୋର୍ଟ ଅନୁସାରେ, ୧୭୮୦ରେ ୟୋଙ୍ଗ ଅଟଚ୍ୟୁ ନାମକ ଚୀନ ନାଗରିକ ପଶ୍ଚିମବଙ୍ଗ ଆସିଥିଲେ । ସେଠାରେ ସେ ଆଖୁ ଚାଷ କରିବା ସହ ଚିନି ମିଲ୍ ସ୍ଥାପନ କରିଥିଲେ । ୧୮ ଶହ ଖ୍ରୀଷ୍ଟାଦ୍ଦ ଶେଷ ଭାଗରେ ଚୀନ ଶ୍ରମିକ ଭାରତ ଆସିବା ଆରମ୍ଭ କରିଥିଲେ । ପ୍ରଥମେ ପ୍ରଥମେ ଚୀନରୁ ଆସିଥିବା ଶ୍ରମିକ କେବଳ ଚମଡ଼ା କାମ କରୁଥିଲେ । ପରେ ସେମାନେ ରେଷ୍ଟୁରାଣ୍ଟ, କପଡ଼ା ସହିତ ଅନ୍ୟ କ୍ଷେତ୍ରରେ କାର୍ଯ୍ୟ କରିଥିଲେ । ୧୯୫୧ ମସିହାରେ ପ୍ରଥମ ଜନଗଣନାରେ କୋଲକାତାରେ ଏମାନଙ୍କ ସଂଖ୍ୟା ପ୍ରାୟ ୫ ହଜାର ୭୧୦ ଥିଲା ।
ପଶ୍ଚିମବଙ୍ଗ ରାଜନୀତିରେ ଚୀନ
ରାଜନୀତିକ ଦୃଷ୍ଟିକୋଣରୁ ଦେଖିଲେ ଚୀନ ଓ ପଶ୍ଚିମବଙ୍ଗ ମଧ୍ୟରେ ଗଭୀର ସମାନତା ରହିଛି । ପଶ୍ଚିମବଙ୍ଗରେ ଦୀର୍ଘ ବର୍ଷ ଧରି ବାମଦଳର ସରକାର ଥିଲା । ବାମଦଳକୁ ପ୍ରାୟତଃ ଚୀନ ସହ ଯୋଡ଼ା ଯାଇଥାଏ । ମିଡିଆ ରିପୋର୍ଟ ଅନୁସାରେ, ୧୯୬୦ ଓ ୧୯୭୦ ମସିହାରେ କୋଲକାତାର କାନ୍ଥରେ ଲେଖା ଯାଉଥିଲା ‘ଚୀନର ଅଧ୍ୟକ୍ଷ ହିଁ ଆମର ଅଧ୍ୟକ୍ଷ’ । ଯାହାକୁ ମାଓବାଦୀମାନେ ଲେଖୁଥିଲେ । ତେବେ, ସେତେବେଳେ ଏହା ବଙ୍ଗଳା ଭାଷାରେ ଲେଖା ଯାଉଥିଲା ।
