spot_img
Home Blog Page 5848

ଅଶ୍ୱିନଙ୍କ ପରିବାରର ୧୦ ଜଣ କରୋନା ସଂକ୍ରମିତ

ନୂଆଦିଲ୍ଲୀ: ଭାରତୀୟ ତଥା ଦିଲ୍ଲୀ କ୍ୟାପିଟାଲର ଅଫ ସ୍ପିନର ବିଚନ୍ଦ୍ରନ ଅଶ୍ୱିନ ଗତ ରବିବାର ଦିନ ଆଇପିଏଲ ଛାଡ଼ିବାକୁ ନିଷ୍ପତ୍ତି ନେଇଥିଲେ। ସେ କରୋନା ଭଳି କଠିନ ସମୟରେ ନିଜ ପରିବାର ସହ ରହିବାକୁ ଟୁର୍ଣ୍ଣାମେଣ୍ଟ ଅଧାରୁ ଛାଡ଼ିବାକୁ ନିଷ୍ପତ୍ତି ନେଇଥିଲେ। ତେବେ ବର୍ତ୍ତମାନ ଅଶ୍ୱିନଙ୍କ ପରିବାର ୧୦ ଜଣ କରୋନାରେ ସଂକ୍ରମି ହୋଇଛନ୍ତି। ଅଶ୍ୱିନଙ୍କ ପତ୍ନୀ ପ୍ରୀତି ନାରାୟଣ ଅଶ୍ୱିନ ଏ ନେଇ ଟ୍ୱିଟ୍ କରି ସୂଚନା ଦେଇଛନ୍ତି।

https://twitter.com/prithinarayanan/status/1388147885993185280?s=20

ପ୍ରୀତି ଲେଖିଛନ୍ତି ଯେ, ‘ଗୋଟିଏ ସପ୍ତାହରେ ପରିବାରର ୬ ଜଣ ବୟସ୍କ ଏବଂ ଚାରି ଜଣ ପିଲା ପଜିଟିଭ୍ ଚିହ୍ନଟ ହୋଇଛନ୍ତି। ସମସ୍ତଙ୍କୁ ବିଭିନ୍ନ ଡାକ୍ତରଖାନାରେ ଭର୍ତ୍ତି କରାଯାଇଛି, ଏହି ଦୁଇ ସପ୍ତାହ ଏକ ଖରାପ୍ ସ୍ୱପ୍ନ ଭଳି ଥିଲା, ତିନିଜଣ ବୟସ୍କଙ୍କ ମଧ୍ୟରୁ ଜଣେ ଘରକୁ ଫେରିଛନ୍ତି।’
ପ୍ରୀତି ଟ୍ୱିଟ୍ କରି ସମସ୍ତଙ୍କୁ ଅପିଲ୍ କରି ଲେଖିଛନ୍ତି, ଟିକା ନିଅନ୍ତୁ। ଏହି ମହାମାରୀରୁ ନିଜକୁ ଏବଂ ନିଜ ପରିବାରକୁ ରକ୍ଷା କରନ୍ତୁ।’

ପ୍ରୀତି ତାଙ୍କ ଟ୍ୱିଟରେ ଆହୁରି ଲେଖିଛନ୍ତି, ମାନସିକ ଭାବେ ସୁସ୍ଥ ରହିବା ଅପେକ୍ଷା ଶାରୀରିକ ଭାବେ ସୁସ୍ଥ ରହିବା ସହଜ। ପଞ୍ଚମରୁ ଅଷ୍ଟମ ଦିନ ସବୁଠାରୁ ଖରାପ ସମୟ ଥିଲା, ସମସ୍ତେ ସାହାଯ୍ୟର ହାତ ବଢ଼ାଇଥିଲେ କିନ୍ତୁ ଆପଣଙ୍କ ସହିତ କେହି ନଥିଲେ। ଏହି ରୋଗ ଆପଣଙ୍କୁ ସଂପୂର୍ଣ୍ଣ ଏକାକୀ କରିଦିଏ।’
ସୂଚନାଯୋଗ୍ୟ, ଅଶ୍ୱିନ୍ ସୋସିଆଲ ମିଡିଆରେ ଟ୍ୱିଟ୍ କରି ଆଇପିଏଲ୍ ଛାଡ଼ିବା ବିଷୟରେ ସୂଚନା ଦେଇଥିଲେ। ସେ ଲେଖିଥିଲେ, ‘ମୁଁ ଆଇପିଏଲ ସିଜିନରୁ ବ୍ରେକ୍ ନେଉଛି, ମୋ ପରିବାର କୋଭିଡ -19 ସହ ସଂଗ୍ରାମ କରୁଛନ୍ତି ଏବଂ ମୁଁ ଏହି କଷ୍ଟ ସମୟରେ ସେମାନଙ୍କ ସହ ରହିବାକୁ ଚାହୁଁଛି। ଯଦି ସବୁ ଠିକ୍ ରହେ, ତେବେ ମୁଁ ଆଇପିଏଲକୁ ପୁଣି ଫେରିବି ବୋଲି ଆଶା କରୁଛି।’

ଉତ୍କଳ ୟୁନିଭରସିଟି ସିଣ୍ଡିକେଟ୍ ସଦସ୍ୟ ଭାବେ ପ୍ରଫେସର ଜୟନ୍ତ ମହାପାତ୍ରଙ୍କ ସମେତ ୩ ମନୋନୀତ

ଭୁବନେଶ୍ୱର: ଉତ୍କଳ ୟୁନିଭରସିଟିର ସିଣ୍ଡିକେଟ୍ ସଦସ୍ୟ ଭାବେ ମନୋନୀତ ହୋଇଛନ୍ତି ଖ୍ୟାତନାମା ଶିକ୍ଷାବିତ୍ ପ୍ରଫେସର ଜୟନ୍ତ କୁମାର ମହାପାତ୍ର । ବ୍ରହ୍ମପୁର ୟୁନିଭରସିଟିର ପୂର୍ବତନ ଭାଇସ୍ ଚାନ୍ସଲର ଭାବେ କାର୍ଯ୍ୟ କରିଥିବା ପ୍ରଫେସର ମହାପାତ୍ର ୪ ବର୍ଷ ପାଇଁ ସିଣ୍ଡିକେଟ୍ ସଦସ୍ୟ ଭାବେ କାର୍ଯ୍ୟ କରିବେ ।

          ଉଚ୍ଚ ଶିକ୍ଷା ବିଭାଗ ପକ୍ଷରୁ ସିଣ୍ଡିକେଟ୍ ସଦସ୍ୟ ଭାବେ ମନୋନୀତ ହୋଇଥିବା ୩ ଜଣ ସଦସ୍ୟଙ୍କ ମଧ୍ୟରେ ସେ ଜଣେ । ଏ ନେଇ ଶୁକ୍ରବାର ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଅନ୍ୟ ୨ ମନୋନୀତ ସିଣ୍ଡିକେଟ୍ ସଦସ୍ୟ ହେଲେ ଡିଏମ୍‌ଇଟି ନିର୍ଦ୍ଦେଶିକା ଡ. ସୋନାମାଲି ବାଗ୍ ଓ  ବାରିପଦା ଶ୍ରୀରାମ ଚନ୍ଦ୍ର ଭଞ୍ଜ ଦେଓ ୟୁନିଭରସିଟିର ଭାଇସ୍ ଚାନ୍ସଲର ସଂଘମିତ୍ରା ମହାନ୍ତି ।

ଏଥିସହିତ ପଢ଼ନ୍ତୁ: ଅଭିନୟ ପୂର୍ବରୁ ଦିନେ ଭାରତୀୟ ସେନାରେ ଥିଲେ ବିକ୍ରମଜୀତ କୁଅଁରପାଲ

ଦିଲ୍ଲୀରେ ସପ୍ତାହେ ବଢିଲା ଲକଡାଉନ ଅବଧି

ନୂଆଦିଲ୍ଲୀ: କରୋନା ସଂକ୍ରମଣ ଦିନକୁ ଦିନ ବଢୁଥିବା ବେଳେ ଦିଲ୍ଲୀରେ ଲକଡାଉନ ଅବଧିକୁ ଆଉ ସପ୍ତାହେ ଯାଏଁ ବଢାଯାଇଛି। ଏନେଇ ଟ୍ୱିଟ୍ କରି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ।

ଦିଲ୍ଲୀରେ ଲଗାତାର ବଢିଚାଲିଛି କରୋନା ସଂକ୍ରମିତଙ୍କ ସଂଖ୍ୟା। କରୋନା ସଂକ୍ରମଣକୁ ଦୃଷ୍ଟିରେ ରଖି ନିଆଯାଇଛି ଏହି ନିଷ୍ପତି।

ଏହାକୁ ମିଶାଇ ଦ୍ୱିତୀୟ ଥର ପାଇଁ ଦିଲ୍ଲୀରେ ଲକଡାଉନ୍ ଅବଧିକୁ ବୃଦ୍ଧି କରାଯାଇଛି। ଦିଲ୍ଲୀର ବତ୍ରା ହସ୍ପିଟାଲରେ ଶନିବାର ଦିନ ପ୍ରାୟ ଘଣ୍ଟାଏ ଧରି ଅକ୍ସିଜେନ୍ ଅଭାବ ଯୋଗୁଁ ଜଣେ ଡାକ୍ତରଙ୍କ ସହ ୮ ଜଣ ରୋଗୀଙ୍କ ମୃତ୍ୟୁ ହୋଇଥିଲା।

ଅଧିକ ପଢନ୍ତୁ- ଘଣ୍ଟାଏ ଯାଏ ବନ୍ଦ ରହିଲା ଅକ୍ସିଜେନ୍ ବିତରଣ, ବତ୍ରା ହସ୍ପିଟାଲରେ ଚାଲିଗଲା ୮ ଜଣଙ୍କ ଜୀବନ 

ଉଲ୍ଲେଖଯୋଗ୍ୟ, ଦିଲ୍ଲୀ ଓ ମହାରାଷ୍ଟ୍ରରେ ସ୍ଥିତି ଏବେବି ଚିନ୍ତାଜନକ ରହିଛି । ଦିଲ୍ଲୀରେ ଗତ ୨୪ ଘଣ୍ଟାରେ ୨୭ ହଜାର ୪୭ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ସେହିଭଳି କରୋନାରେ ୩୭୫ ଜଣଙ୍କ ମୃତ୍ୟୁ ହୋଇଛି । ମହାରାଷ୍ଟ୍ରରେ ଦିନକରେ ୬୨ ହଜାର ୯୧୯ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ୮୨୮ ଜଣଙ୍କ ମୃତ୍ୟୁ ହୋଇଛି ।

କରୋନାରେ ଚାଲିଗଲେ ବରିଷ୍ଠ ସାମ୍ୱାଦିକ ପ୍ରୀତିମାନ : ଶୋକବ୍ୟକ୍ତ କଲେ ମାନସ ମଙ୍ଗରାଜ

ଭୁବନେଶ୍ୱର:  ଆଉ ଜଣେ ସାମ୍ବାଦିକଙ୍କ ଜୀବନ ନେଲା କରୋନା । ସାମ୍ବାଦିକ ପ୍ରୀତିମାନ ମହାପାତ୍ରଙ୍କ ମୃତ୍ୟୁ । ଟାଇମ୍ସ ଅଫ୍ ଇଣ୍ଡିଆ ଖବରକାଗଜରେ କାର୍ଯ୍ୟରତ ଥିଲେ ପ୍ରୀତିମାନ । କରୋନାରେ ଆକ୍ରାନ୍ତ ହୋଇ ସେ ଭୁବନେଶ୍ବରର ଏକ ଘରୋଇ ହସପିଟାଲରେ ଥିଲେ ଚିକିତ୍ସାଧୀନ । ପ୍ରୀତିମାନଙ୍କ ପତ୍ନୀ ମଧ୍ୟ କରୋନାରେ ଆକ୍ରାନ୍ତ ହୋଇଛନ୍ତି । ପ୍ରୀତିମାନଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି ରାଜ୍ୟ ସରକାରଙ୍କ ଗଣମାଧ୍ୟମ ପରାମର୍ଶଦାତା ମାନସ ମଙ୍ଗରାଜ । କରୋନାରେ ଜଣେ ଭଲ ବନ୍ଧୁଙ୍କୁ ହରାଇଲି ବୋଲି ଟ୍ବିଟ କରି କହିଛନ୍ତି ମାନସ । ତେବେ ବର୍ତ୍ତମାନ ସୁଦ୍ଧା ୧୨ ଜଣ ସାମ୍ବାଦିକଙ୍କ ଜୀବନ ନେଲାଣି କରୋନା ।

ସୂଚନା ଯୋଗ୍ୟ ଯେ, ଗତକାଲି ମଧ୍ୟ ଜଣେ ବରିଷ୍ଠ ସାମ୍ୱାଦିକଙ୍କ ଦେହାନ୍ତ ହୋଇଛି । ପଶ୍ଚିମଓଡ଼ିଶା  ପ୍ରତିଷ୍ଠିତ ସାମ୍ୱାଦିକ ଦେବେନ୍ଦ୍ର ସାମନ୍ତରାୟଙ୍କ ଶୁକ୍ରବାର କରୋନାରେ ପରଲୋକ ଘଟିଛି । ସେ ଗତ କିିଛି ଦିନ ତଳେ କରୋନାରେ ସଂକ୍ରମିତ ହୋଇ ଚିକିତ୍ସିତ ହେଉଥିଲେ । ମୃତ୍ୟୁ ବେଳକୁ ତାଙ୍କୁ ୫୨ ବର୍ଷ ବୟସ ହୋଇଥିଲା ।  ପଶ୍ଚିମ ଓଡ଼ିଶାରେ ଦୀର୍ଘବର୍ଷ ଧରି ସାମ୍ବାଦିକତା କରିଆସୁଥିଲେ ।

ଏଥିସହିତ ପଢ଼ନ୍ତୁ: କୋଭିଡ ପଜିଟିଭ୍ ପରେ ହୃଦଘାତରେ ବରିଷ୍ଠ ସାମ୍ବାଦିକ ରୋହିତ ସରଦାନାଙ୍କ ଦେହାନ୍ତ

ବାବା ଆଖଣ୍ଡଳମଣିଙ୍କ ପିଠରେ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିଲା ସାଧାରଣ ଦର୍ଶନ

ଆରଡ଼ି: ସମଗ୍ର ଦେଶରେ କରୋନାର ଦ୍ୱିତୀୟ ପ୍ରବାହ ଯୋଗୁଁ ସ୍ଥିତି ଗମ୍ଭୀର ହେବାରେ ଲାଗିଛି । ଦିନକୁ ଦିନ ସଂକ୍ରମିତଙ୍କ ସଂଖ୍ୟା ବଢ଼ିବା ସହ ରୋଗୀଙ୍କ ମୃତ୍ୟୁ ମଧ୍ୟ ହେଉଛି । ଅପେକ୍ଷାକୃତ ଭାବେ ଓଡ଼ିଶାରେ ସ୍ଥିତି ସେତେଟା ଗମ୍ଭୀର ନଥିଲେ ପୂର୍ବପେକ୍ଷା ଅଧିକ ସଂକ୍ରମିତ ଚିହ୍ନଟ ହେବାରେ ଲାଗିଛନ୍ତି । ଏହାକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ବିଭିନ୍ନ ସତର୍କତା ମୂଳକ ପଦକ୍ଷେପ ଗ୍ରହଣ କରାଯାଇଛି । ଏଭଳି କି ଧର୍ମାନୁଷ୍ଠାନରେ ସାଧାରଣ ଦର୍ଶନକୁ ମଧ୍ୟ ବାରଣ କରାଯାଇଛି । ପୁରୀ ଶ୍ରୀମନ୍ଦିରରେ ମଧ୍ୟ ମହପ୍ରଭୁଙ୍କ ସାଧାରଣ ଦର୍ଶନ ବନ୍ଦ ରଖାଯାଇଛି । ସେହିଭଳି ଭଦ୍ରକ ଜିଲ୍ଳା ପ୍ରଶାସନ ଆଜିଠାରୁ ବାବା ଆଖଣ୍ଡଳମଣିଙ୍କ ମନ୍ଦିରରେ ସାଧାରଣ ଭକ୍ତଙ୍କ ଦର୍ଶନ ଉପରେ ଅନିର୍ଦ୍ଦିଷ୍ଟ କାଳ ପ୍ରଯ୍ଯନ୍ତ ରୋକ ଲଗାଇଛନ୍ତି । ଏପରି ସୂଚନା ଦେଇଛନ୍ତି ଭଦ୍ରକ ଉପଜିଲାପାଳ ତଥା ମନ୍ଦିର ଟ୍ରଷ୍ଟି ପିତାମ୍ବର ସାମଲ।

ଏଥିସହିତ ପଢ଼ନ୍ତୁ: ରିଲାଏନ୍ସର ମିଶନ ଅକ୍ସିଜେନ୍ : ଦୈନିକ ୧୦୦୦ ଟନ୍ ମେଡିକାଲ ଅମ୍ଳଜାନ ଉତ୍ପାଦନ ସହ ମାଗଣାରେ ଯୋଗାଉଛି

ଭାରତରୁ ଅଷ୍ଟ୍ରେଲିଆ ଫେରୁଥିଲେ ୫ବର୍ଷ ଜେଲ୍ ସହ ଭରିବାକୁ ପଡ଼ିବ ମୋଟାଅଙ୍କର ଜୋରିମାନା

ନୂଆଦିଲ୍ଲୀ: ପ୍ରଥମ ଥର ପାଇଁ ଅଷ୍ଟ୍ରେଲିଆ ସରକାର ତା’ର ନାଗରିକ ମାନଙ୍କ ଉପରେ ପ୍ରବେଶ କଟକଣା ଲଗାଇଛନ୍ତି । ଯଦି କେହି ବ୍ୟକ୍ତି ଭାରତରୁ ଅଷ୍ଟ୍ରେଲିଆ ଯାଉଛନ୍ତି ତାହେଲେ ସେମାନଙ୍କୁ ମୋଟା ଅଙ୍କର ଜୋରିମାନା ଦେବା ସହ ୫ ବର୍ଷ ଯାଏଁ ଜେଲ୍ ଦଣ୍ଡାଦେଶ ହୋଇପାରେ ।

ସୂଚନା ଅନୁଯାୟୀ ଯଦି କେହି ନାଗରିକ ଭାରତରେ ୧୪ ଦିନ ବିତାଇଥିବେ ତାହେଲେ ସେମାନେ ଅଷ୍ଟ୍ରେଲିଆକୁ ଫେରିପାରିବେ ନାହିଁ । ଭାରତରେ କରୋନା ସଂକ୍ରମଣ ଦ୍ରୁତ ଗତିରେ ବଢିବା ପରେ ନିଜ ନାଗରିକ ମାନଙ୍କ ପାଇଁ ଅଷ୍ଟ୍ରେଲିଆ ସରକାର ଶନିବାର ଏଭଳି କଟକଣା ଲଗାଇଛନ୍ତି ।

ଅଷ୍ଟ୍ରେଲିଆ ଗଣମାଧ୍ୟମ ଅନୁଯାୟୀ, ଗତ ୧୪ ଦିନ ମଧ୍ୟରେ ଯେଉଁମାନଙ୍କର ଟ୍ରାଭେଲ୍ ହିଷ୍ଟ୍ରି ଭାରତ ରହିଛି ସେମାନଙ୍କ ଉଡାଣ ଉପରେ ପ୍ରତିବନ୍ଧକ ଲଗାଇବା ପାଇଁ ସରକାର ବାୟୋସିକ୍ୟୁରିଟି ଆକ୍ଟ ପାସ୍ କରାଇଛନ୍ତି । ଏଥିସହ ଫେରିଥିବା ବ୍ୟକ୍ତିଙ୍କ ବିରୋଧରେ ଅପରାଧିକ ମାମଲା ଚାଲିବ ବୋଲି ଅଷ୍ଟ୍ରେଲିଆ ସରକାର କହିଛନ୍ତି । ମେ ୧୫ ପର୍ଯ୍ୟନ୍ତ ଏହି କଟକଣା ଲଗାଯାଇଥିବା ବେଳେ ସରକାର ଏହାକୁ ଗୁରୁତର ସହ ନେଉଛନ୍ତି ବୋଲି ଚେତାଇ ଦେଇଛନ୍ତି ।

ଅଷ୍ଟ୍ରେଲିଆ ସରକାରଙ୍କ ପକ୍ଷରୁ ପୂର୍ବରୁ ଭାରତକୁ ସମସ୍ତ ଉଡାଣ ବାତିଲ କରାଯାଇଥିଲା । ସରକାରୀ ସୁତ୍ର ଅନୁଯାୟୀ ଅଷ୍ଟ୍ରେଲିଆର ପାଖାପାଖି ୯ ହଜାର ଲୋକ ଭାରତରେ ରହୁଛନ୍ତି । ସେମାନଙ୍‌କ ମଧ୍ୟରୁ ୬୦୦ କରୋନା କବଳିତ ହୋଇଥିବା ଆଶଙ୍କା ରହିଛି ।

ଜୁନ୍ ୨୭ ଯାଏଁ ବନ୍ଦ ରହିବ ସୁପ୍ରିମକୋର୍ଟ: ଗ୍ରୀଷ୍ମକାଳୀନ ଅବକାଶ ଘୋଷଣା କଲେ ପ୍ରଧାନ ବଚାରପତି

ନୂଆଦିଲ୍ଲୀ: ସୁପ୍ରିମକୋର୍ଟରେ ଗ୍ରୀଷ୍ମକାଳୀନ ଅବକାଶ ଘୋଷଣା । ମେ’ ୧୦ରୁ ଜୁନ୍‌ ୨୭ ପର୍ଯ୍ୟନ୍ତ ବନ୍ଦ ରହିବ ସୁପ୍ରିମକୋର୍ଟ  । କୋରନା ସଂକ୍ରମଣ ଯୋଗୁଁ ଅବକାଶ ଘୋଷଣା କଲେ ପ୍ରଧାନ ବିଚାରପତି ଏନ.ଭି ରମନା । ଛୁଟି ଘୋଷଣା ପାଇଁ ବିଭିନ୍ନ ବାର୍‌ ପୂର୍ବରୁ ନିବେଦନ କରିଥିଲେ । ବର୍ତ୍ତମାନ ରାଜଧାନୀ ଦିଲ୍ଲୀରେ କରୋନା ସ୍ଥିତି ଅତି ଗମ୍ଭୀର ରହିଛି । ଦିଲ୍ଲୀର ବାତ୍ରା ହସ୍ପିଟାଲରେ ଅକ୍ସିଜେନ୍ ଅଭାବର ଚାଲିଗଲା ୮ ରୋଗୀଙ୍କ ଜୀବନ ।  ଦିଲ୍ଲୀ ହାଇକୋର୍ଟରେ ଏନେଇ ତଥ୍ୟ ରଖିଛି ଦିଲ୍ଲୀର ବାତ୍ରା ହସ୍ପିଟାଲ । ହସ୍ପିଟାଲ ପକ୍ଷରୁ କୁହାଯାଇଛି, ପ୍ରାୟ ଘଣ୍ଟାଏ ଧରି ଅକ୍ସିଜେନ୍ ଅଭାବ ଯୋଗୁଁ ଜଣେ ଡାକ୍ତରଙ୍କ ସହ ୮ ଜଣଙ୍କ ମୃତ୍ୟୁ ହୋଇଛି । ହସ୍ପିଟାଲ ପକ୍ଷରୁ କୋର୍ଟରେ କୁହାଯାଇଛି, ଆମେ ସମୟରେ ଅକ୍ସିଜେନ୍ ପାଇଲୁ ନାହିଁ । ଦିନ ପ୍ରାୟ ୧୨ଟା ବେଳେ ଅକ୍ସିଜେନ୍ ସରିଗଲା । ଆମେ ଜଣେ ଡାକ୍ତରଙ୍କୁ ମଧ୍ୟ ହରାଇଛୁ । ପ୍ରାୟ ଘଣ୍ଟାଏ ଧରି ଅକ୍ସିଜେନ୍ ବିନା ଆମେ ଚିକିତ୍ସା ଜାରି ରଖିଥିଲୁ । ଅକ୍ସିଜେନ୍ ଅଭାବ ନେଇ ବାତ୍ରା ହସ୍ପିଟାଲ ଜରୁରୀ ମେସେଜ୍ ପଠାଇଥିଲା । ମାତ୍ର ୧୦ ମିନିଟ୍ ପାଇଁ ଅକ୍ସିଜେନ୍ ଅଛି, ମେଡିକାଲରେ ୩୨୬ ଜଣ ଆଡମିଟ୍ ଅଛନ୍ତି ବୋଲି ହସ୍ପିଟାଲ ପକ୍ଷରୁ କୁହାଯାଇଥିଲା । ଏନେଇ ଦିଲ୍ଲୀର ମନ୍ତ୍ରୀ ରାଘବ ଚଢ଼ା କହିଛନ୍ତି- ଜରୁରୀ ମେସେଜର ମାତ୍ର ୫ ମିନିଟ ମଧ୍ୟରେ ଅକ୍ସିଜେନ୍ ଟ୍ୟାଙ୍କର ମେଡିକାଲରେ ପହଞ୍ଚିଥିଲା ।

ଅଭିନୟ ପୂର୍ବରୁ ଦିନେ ଭାରତୀୟ ସେନାରେ ଥିଲେ ବିକ୍ରମଜୀତ କୁଅଁରପାଲ

ମମ୍ବାଇ: କରୋନା ଦିତ୍ୱୀୟ ପ୍ରବାହ ଏବେ ସାରା ବିଶ୍ୱରେ ଆତଙ୍କ ସୃଷ୍ଟି କରିଛି । ଧନୀ ହେଉ କିମ୍ବା ଗରିବ, ସାଧାରଣ ଲୋକ ହେଉ କିମ୍ବା ରାଜନେତା କାହାକୁ ବି ଛାଡୁନି ଏଇ ମହାମାରୀ । ପ୍ରତ୍ୟେକ ଦିନର ସକାଳ ଖରାପ ଖବର ନେଇ ଆସୁଛି, ଯାହା ପ୍ରତ୍ୟେକଙ୍କ ମନକୁ ଆଘାତ ପହଂଚାଉଛି । ଏହି କରୋନା ମହାମାରୀ କବଳରେ ବଲିଉଡର ଅନେକ କଳାକାର କବଳିତ ହୋଇଚାଲିଛନ୍ତି । ତାଙ୍କ ଭିତରୁ କିଏ କରୋନା ସହ ଲଢି ଜିତାପଟ ହାସଲ କରୁଛି ତ ପୁଣି କିଏ ଜୀବନ ଯୁଦ୍ଧରେ ହାର ମାନିଯାଉଛି। ଆଉ ଏହି ଯୁଦ୍ଧରେ ଆଜି ଆଉ ଜଣେ ବଲିଉଡ କଳାକାର ମଧ୍ୟ ହାର ମାନିଯାଇଛନ୍ତି।

ଯିଏକି ନିଜ ନିଖୁଣ ଅଭିନୟରେ ପ୍ରତ୍ୟେକ ଫିଲ୍ମରେ ମନୋରଞ୍ଜନର ଏକ ଭିନ୍ନସ୍ୱାଦ ଦର୍ଶକଙ୍କୁ ଯୋଗାଇ ଦେଇଥାନ୍ତି। ସେ ହେଉଛନ୍ତି ବିକ୍ରମଜୀତ କୁଅଁରପାଲ। ବିକ୍ରମଜୀତଙ୍କୁ ପରଦାରେ ଆପଣମାନେ ଅନେକ ଚରିତ୍ରରେ ଦେଖିଥିବେ କିନ୍ତୁ ତାଙ୍କ ପ୍ରକୃତ ଜୀବନରେ ବି ସେ ଭିନ୍ନ ଚରିତ୍ର ପ୍ଲେ କରିଛନ୍ତି। ଆଜ୍ଞା ହଁ ବିକ୍ରମଜୀତ ଅଭିନୟର ଏହି ରଙ୍ଗାରଙ୍ଗ ଦୁନିଆରେ ପାଦ ଥାପିବା ପୂର୍ବରୁ ସେନାରେ ନିଜର ଯୋଗଦାନ ଦେଇଥିଲେ।

 

ହିମାଚଳ ପ୍ରଦେଶର ସୋଲେନରେ ଜନ୍ମ ହୋଇଥିବା ବିକ୍ରମଜୀତ ପିଲାଦିନୁ ଭାରତୀୟ ସେନାରେ ଯୋଗ ଦେବା ପାଇଁ ସ୍ୱପ୍ନ ଦେଖୁଥିଲେ। ଆଉ ତାଙ୍କୁ ସେ ଉତ୍ସାହ ତାଙ୍କ ବାପା ଦ୍ୱାରକାନାଥ କୁଅଁରପାଲଙ୍କ ଯୋଗୁଁ ହିଁ ମିଳିଥିଲା । କାହିଁକି ନା ବିକ୍ରମଜୀତଙ୍କ ପିତା ଜଣେ ଆର୍ମୀ ଅଫିସର ଥିଲେ ଓ ୧୯୬୩ ମସିହାର ଯୁଦ୍ଦରେ ତାଙ୍କ ବାହାଦୁରୀ ପାଇଁ ତାଙ୍କୁ କିର୍ତ୍ତୀ ଚକ୍ର ପୁରସ୍କାରରେ ସମ୍ମାନିତ କରାଯାଇଥିଲା । ସେଥିପାଇଁ ବାପାଙ୍କ ଆଦର୍ଶରେ ଅନୁପ୍ରାଣିତ ହୋଇ ବିକ୍ରମଜୀତ ୧୯୮୯ରେ ଭାରତୀୟ ସେନାରେ ଯୋଗଦେଲେ । ଆଉ ଅନେକ ଦିନ ସେନାରେ କାର୍ଯ୍ୟରତ ରହିବା ପରେ ୨୦୦୨ରେ ମେଜର ହୋଇ ଆର୍ମିରୁ ଅବସର ନେଲେ ।

ସାଧାରଣତଃ ଅବସର ପରେ ଆର୍ମୀ ଅଫିସରମାନେ ବହୁତ କଠୋର ଓ ସମୟାନୁବର୍ତ୍ତୀ ହୋଇ ସାଧାରଣ ଜୀବନକୁ ଅତିବାହିତ କରନ୍ତି । କିନ୍ତୁ ବିକ୍ରମଜୀତଙ୍କ କ୍ଷେତ୍ରରେ ଏହିଭଳି ହୋଇନଥିଲା । ସେ ଅବସର ନେବାପରେ ନିଜ ଜୀବନକୁ ଆହୁରୀ ସ୍ମରଣୀୟ କରିବା ପାଇଁ ୨୦୦୩ରେ ବଲିଉଡରେ ପ୍ରଥମଥର ପାଇଁ ନିଜର ଡେବ୍ୟୁ କଲେ। ଆଉ ଏହିଠାରୁ ହିଁ ଆରମ୍ଭ ହେଲା ତାଙ୍କ ଜୀବନର ନୂଆ ଅଧ୍ୟାୟ। ତେବେ ଅଧିକାଂଶ ଚଳଚିତ୍ରରେ ସେ ସପୋର୍ଟିଂ ଆକ୍ଟର ଭାବରେ କାମ କରିଛନ୍ତି । ହେଲେ ତାହା ନେଗେଟିଭ ହେଉ କିମ୍ବା ପଜିଟିଭ ସବୁ ଚରିତ୍ର ତାଙ୍କ ପାଇଁ ଖୁବ୍ ଖାସ୍ ଥିଲା । ତେଣୁକରି ତାଙ୍କ ଅଭିନୟ ମାଧ୍ୟମରେ ସେ ସେହି ଚରିତ୍ରକୁ ଅଧିକ ଜୀବନ୍ତ କରିଦିଅନ୍ତି ।

୧୮ବର୍ଷର ଏହି ବଲିଉଡ ଯାତ୍ରାରେ ସେ କେବେ ବି ନିଜ ଦର୍ଶକଙ୍କୁ ନିରାଶ କରିନାହାନ୍ତି । ଫିଲ୍ମ ଓ ଟିଭି ଶୋରେ ତାଙ୍କର ଉପସ୍ଥିତି ପାଇ ଦର୍ଶକେ ଖୁବ୍ ଉତ୍ସାହିତ ହୁଅନ୍ତି । ହେଲେ ଆଉ ପରଦାରେ ଦେଖିବାକୁ ମିଳିବନି ତାଙ୍କ ଅଭିନୟ। କରୋନାରେ ପିଡିତ ଥିବାରୁ ମେ ୧ ତାରିଖ ଦିନ ୫୨ବର୍ଷ ବୟସରେ ସେ ତାଙ୍କ ଶେଷ ନିଶ୍ୱାସ ତ୍ୟାଗ କରିଛନ୍ତି।

ରିଲାଏନ୍ସର ମିଶନ ଅକ୍ସିଜେନ୍ : ଦୈନିକ ୧୦୦୦ ଟନ୍ ମେଡିକାଲ ଅମ୍ଳଜାନ ଉତ୍ପାଦନ ସହ ମାଗଣାରେ ଯୋଗାଉଛି

ମୁମ୍ବଇ/ଭୁବନେଶ୍ୱର: ସମଗ୍ର ଭାରତ କୋଭିଡ ମହାମାରୀର ଅପ୍ରତ୍ୟାଶିତ ନୂଆ ଲହରକୁ ନେଇ ଗୁରୁତର ସଙ୍କଟର ସମ୍ମୁଖୀନ ହେଉଥିବାବେଳେ ରିଲାଏନ୍ସ ଇଣ୍ଡଷ୍ଟ୍ରିଜ ମୂଲ୍ୟବାନ ଜୀବନ ବଞ୍ଚାଇବା ପାଇଁ ସମସ୍ତ ପ୍ରୟାସ ଜାରି ରଖିଛି । ସାଂପ୍ରତିକ ସମୟରେ ସମଗ୍ର ଦେଶରେ ଅତି ଗୁରୁତର ରୋଗୀମାନଙ୍କର ଚିକିତ୍ସା ପାଇଁ ଅମ୍ଳଜାନ ସବୁଠାରୁ ଜରୁରୀ ଆବଶ୍ୟକତା ହୋଇଛି । ରିଲାଏନ୍ସ ପାରମ୍ପରିକ ଭାବେ ତରଳ ଅମ୍ଳଜାନର ଉତ୍ପାଦନକାରୀ ହୋଇନଥିବାବେଳେ ସଂପ୍ରତି ଗୋଟିଏ ସ୍ଥାନରେ ଏହି ଜୀବନ ରକ୍ଷାକାରୀ ସମ୍ବଳର ଦେଶରେ ସର୍ବବୃହତ ଉତ୍ପାଦନକାରୀ ହୋଇଛି । ଜାମନଗରସ୍ଥିତ ଏହାର ବିଶୋଧନାଗାର-ତଥା-ପେଟ୍ରୋରସାୟନ କମ୍ପ୍ଳେକ୍ସ ତଥା ଏହାର ଅନ୍ୟାନ୍ୟ ୟୁନିଟରେ ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ ସମ୍ପ୍ରତି ଦୈନିକ ୧୦୦୦ ମେଟ୍ରିକ ଟନ୍‌ରୁ ଅଧିକ ମେଡିକାଲ ଗ୍ରେଡ ତରଳ ଅମ୍ଳଜାନ ଉତ୍ପାଦନ କରୁଛି । ଯାହା ଭାରତରେ ହେଉଥିବା ମୋଟ ଉତ୍ପାଦନର ୧୧ ପ୍ରତିଶତ । ଏହି ଅନୁସାରେ ଏହା ପ୍ରତି ଦଶ ଜଣରେ ଜଣେ ରୋଗୀଙ୍କର ଅମ୍ଳଜାନ ଆବଶ୍ୟକତା ପୂରଣ କରୁଛି । ଏହି ଅମ୍ଳଜାନ କୋଭିଡ-୧୯ରେ ସଂକ୍ରମିତ ଗୁରୁତର ରୋଗୀଙ୍କ ପାଇଁ ମାଗଣାରେ ଯୋଗାଇ ଦିଆଯାଉଛି ।

ରିଲାଏନ୍ସର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ମୁକେଶ ଅମ୍ବାନିଙ୍କ ପ୍ରତ୍ୟକ୍ଷ ତତ୍ୱାବଧାନରେ ରିଲାଏନ୍ସ ପକ୍ଷରୁ ଭାରତରେ ମେଡିକାଲ ଅକ୍ସିଜେନ ଉପଲବ୍ଧ ସ୍ଥିତି ମଜଭୁତ କରିବାକୁ ଜାମନଗରଠାରେ ୨ ସୂତ୍ରୀ ଆଭିମୁଖ୍ୟ କାର୍ଯ୍ୟକାରୀ କରାଯାଉଛି । ପ୍ରଥମତଃ ରିଲାଏନ୍ସର ଜାମନଗର ଏବଂ ଅନ୍ୟାନ୍ୟ ୟୁନିଟରେ ଥିବା ଶିଳ୍ପଭିତିକ ପ୍ରକ୍ରିୟାରେ ମେଡିକାଲ ଗ୍ରେଡ ତରଳ ଅମ୍ଳଜାନ ଉତ୍ପାଦନକୁ ଅଗ୍ରାଧିକାର ଦିଆଯାଉଛି । ଦ୍ୱିତୀୟରେ ଉତ୍ପାଦିତ ଅମ୍ଳଜାନକୁ କରୋନା ପ୍ରଭାବିତ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସୁରୁଖୁରୁରେ ଓ ନିରାପଦରେ ପଠାଇବାକୁ ବୋଝେଇ ଓ ପରିବହନ ବ୍ୟବସ୍ଥାକୁ ଅଧିକ ସୁସଂହିତ କରାଯାଉଛି । କୋଭିଡ ମହାମାରୀ ପୂର୍ବରୁ ରିଲାଏନ୍ସ ମେଡିକାଲ ଗ୍ରେଡ ତରଳ ଅମ୍ଳଜାନ ଉତ୍ପାଦନ କରୁନଥିଲା । ତେବେ ରିଲାଏନ୍ସର ଇଞ୍ଜିନିୟରମାନେ ଖୁବ କମ ସମୟ ମଧ୍ୟରେ ବିଶୋଧନାଗାର ଏବଂ ପେଟ୍ରୋରସାୟନ ଗ୍ରେଡ ଅମ୍ଳଜାନ ଉତ୍ପାଦନ ଡିଜାଇନକୁ ଅତ୍ୟନ୍ତ ଶୁଦ୍ଧ ମେଡିକାଲ ଗ୍ରେଡ ଅମ୍ଳଜାନରେ ରୂପାନ୍ତରିତ କରିବା ଏବଂ ଉତ୍ପାଦନ ବୃଦ୍ଧି ଘଟାଇବା କାର୍ଯ୍ୟ ସମ୍ପାଦନ କରିଥିଲେ । ମେଡିକାଲ ଗ୍ରେଡ ତରଳ ଅକ୍ସିଜେନକୁ ସାଧାରଣତଃ ତରଳ ଆକାରରେ ବିଯୁକ୍ତ ୧୮୩ ଡିଗ୍ରୀ ସେଲସିୟସ ତାପମାତ୍ରାରେ ପ୍ରସ୍ତୁତ କରାଯାଇଥାଏ ଯାହା ପ୍ରାୟତଃ ୯୯.୫% ଶୁଦ୍ଧ ହୋଇଥାଏ । ସେଥିପାଇଁ ଏହି ଅମ୍ଳଜାନ ଉତ୍ପାଦନ ଏବଂ ଏହାର ପରିମାଣ ବୃଦ୍ଧି କରିବା କ୍ଷେତ୍ରରେ ଅନେକ ଆପଦ ରହିଥାଏ । ରିଲାଏନ୍ସ ସମ୍ପ୍ରତି ତାହାର ମେଡିକାଲ ଗ୍ରେଡ ଅମ୍ଳଜାନ ଉତ୍ପାଦନ ବସ୍ତୁତଃ ଶୂନ୍ୟ ସ୍ତରରୁ ଦିନକୁ ୧୦୦୦ ଟନ୍‌କୁ ଖୁବ କମ ସମୟ ମଧ୍ୟରେ ପହଂଚାଇବା ସହିତ ଉତ୍ପାଦନ ବୃଦ୍ଧି କରାଇ ପାରିଛି । ରିଲାଏନ୍ସ ଇଞ୍ଜିନିୟରମାନେ ଅକ୍ଳାନ୍ତ ଭାବରେ କାର୍ଯ୍ୟକରି ଏବଂ କ୍ରାୟୋଜେନିକ ବାୟୁ ପୃଥକିକରଣ ୟୁନିଟଗୁଡିକକୁ ସର୍ବାଧିକ କାର୍ଯ୍ୟକ୍ଷମ କରାଇ ତଥା ସେଥିରେ ଆବଶ୍ୟକ ପରିବର୍ତନ ଆଣି ଏହା ସମ୍ଭବ କରିପାରିଛନ୍ତି । ସଂପ୍ରତି ରିଲାଏନ୍ସ ଦେଶରେ ଉତ୍ପାଦିତ ମୋଟ ମେଡିକାଲ ଗ୍ରେଡ ତରଳ ଅମ୍ଳଜାନର ୧୧ ପ୍ରତିଶତରୁ ଅଧିକ ଉତ୍ପାଦନ କରୁଛି । ସମଗ୍ର ଦେଶରେ ବିଭିନ୍ନ ରାଜ୍ୟ ସରକାର ଏବଂ କେନ୍ଦ୍ରଶାସିତ ଅଂଚଳଗୁଡିକୁ ଏହି ଅମ୍ଳଜାନ ମାଗଣାରେ ଯୋଗାଇ ଦିଆଯାଉଛି ଏବଂ ଏହା ପ୍ରତିଦିନ ୧ଲକ୍ଷରୁ ଅଧିକ ରୋଗୀଙ୍କୁ ତୁରନ୍ତ ଆଶ୍ୱସ୍ତି ପ୍ରଦାନ କରୁଛି । କେବଳ ଅପ୍ରେଲ୍ ମାସରେ ରିଲାଏନ୍ସ ୧୫୦୦୦ ମେଟ୍ରିକ୍ ଟନ୍ ମେଡିକାଲ ଗ୍ରେଡ ତରଳ ଅମ୍ଳଜାନ ଯୋଗାଇଥିବା ବେଳେ ୨୦୨୦ ମାର୍ଚ୍ଚରେ ମହାମାରୀ ଆରମ୍ଭ ହେବା ଦିନଠାରୁ ଏପର୍ଯ୍ୟନ୍ତ ରିଲାଏନ୍ସ ସମଗ୍ର ଦେଶରେ ୫୫,୦୦୦ ମେଟ୍ରିକ ଟନ୍ ମେଡିକାଲ ଗ୍ରେଡ ତରଳ ଅମ୍ଳଜାନ ଯୋଗାଇ ସାରିଛି ।

ବିଦ୍ୟାଳୟ ରୂପାନ୍ତର ଯୋଜନାରେ କେନ୍ଦୁଝର ଜିଲ୍ଲାର ୧୦୦ ସ୍କୁଲ ସାମିଲ: ଉଦ୍‌ଘାଟନ୍ କଲେ ୫-ଟି ସଚିବ

କେନ୍ଦୁଝର: ସ୍ମାର୍ଟ ସ୍କୁଲ ହେବ ସରକାରୀ ଉଚ୍ଚ ବିଦ୍ୟାଳୟ । ବିଦ୍ୟାଳୟ ରୂପାନ୍ତର ଯୋଜନାରେ ବଦଳିବ ସ୍କୁଲର ରୂପରେଖ । କେନ୍ଦୁଝର ଜିଲ୍ଲାରେ ୧୦୦ଟି ସ୍କୁଲକୁ ସାମିଲ କରାଯାଇଛି । ୫-ଟି ସଚିବ ଭିକେ ପାଣ୍ଡିଆନ ଭିଡିଓ କନଫରେନ୍ସ ଜରିଆରେ ଏହାର ଉଦଘାଟନ କରିଛନ୍ତି । ଏହି ଯୋଜନାରେ ସାମିଲ ହାଇସ୍କୁଲଗୁଡିକରେ ସ୍ମାର୍ଟ କ୍ଲାସରୁମ୍, ଇ- ଲାଇବ୍ରେରୀ , ସାଇନ୍ସ ଲାବୋରଟୋରୀ, ଉନ୍ନତ କ୍ରୀଡା ଭିତ୍ତିଭୂମି ସହ ଅନ୍ୟାନ୍ୟ ସୁବିଧା ଯୋଗାଇଦିଆଯିବ । ଏନେଇ କେନ୍ଦୁଝର ଜିଲ୍ଲାପାଳ ଆଶିଷ ଠାକରେ ଏକ ବୁକଲେଟ୍ ଉନ୍ମୋଚନ କରିଛନ୍ତି । ତେବେ ଯୋଜନାର ଉଦଘାଟନ ଅବସରରେ ଫାଇଭ-ଟି ସଚିବ ଭିଡିଓ କନଫରେନ୍ସି ଜରିଆରେ ବିଭିନ୍ନ ଅଧିକାରୀ , ଶିକ୍ଷକମାନଙ୍କ ସହିତ ଆଲୋଚନା କରିଛନ୍ତି । ଏଥିରେ ବାଂଶପାଳ ବ୍ଲକର ୬ ଟି ସରକାରୀ ହାଇସ୍କୁଲ, ଚମ୍ପୁଆ ବ୍ଲକର ୬ଟି, ଘଷିପୁରା ବ୍ଲକର ୭ଟି, ଘଟଗାଁ ବ୍ଲକର ୭ଟି, ହାଟଡିହି ବ୍ଲକର ୯ଟି, ହରିଚନ୍ଦନପୁର ବ୍ଲକର ୭ଟି, ଝୁମୁରା ବ୍ଲକର ୯ଟି, ଯୋଡା ବ୍ଲକର ୧୩ଟି, କେନ୍ଦୁଝର ସଦର ବ୍ଲକର ୧୨ଟି ସରକାରୀ ହାଇସ୍କୁଲ , ପାଟଣା ବ୍ଲକର ୬ ଟି ସ୍କୁଲ, ତେଲକୋଇ ବ୍ଲକର ୬ଟି ସରକାରୀ ହାଇସ୍କୁଲ ମିଶାଇ ୧୦୦ଟି  ସ୍କୁଲକୁ ସାମିଲ କରାଯାଇଥିବା ଜଣାପଡ଼ିଛି ।

ଏଥିସହିତ ପଢ଼ନ୍ତୁ: କରୋନାରେ ରୋଗୀଙ୍କ ପାଇଁ ଦେବଦୂତ ସାଜିଲେ ମନ୍ତ୍ରୀ ସୁଶାନ୍ତ ସିଂହ