spot_img
Home Blog Page 5839

ସ୍କୁଲ ମିଶ୍ରଣ ବିଜ୍ଞପ୍ତିକୁ ରଦ୍ଦ କଲେ ଓଡ଼ିଶା ହାଇକୋର୍ଟ

ଭୁବନେଶ୍ୱର: ଛାତ୍ରଛାତ୍ରୀ ଅଭାବରୁ ବିଭିନ୍ନ ସ୍କୁଲ ମିଶ୍ରଣ ପ୍ରସଂଗ । ରାଜ୍ୟ ସରକାରଙ୍କ ବିଜ୍ଞପ୍ତିକୁ ରଦ୍ଦ କଲେ ହାଇକୋର୍ଟ । ହାଇକୋର୍ଟରେ ଏନେଇ ଆପତ୍ତି କରିଥିଲେ ଅଭିଭାବକ । ସୂଚନା ଅନୁସାରେ ୨୦ରୁ କମ୍ ପିଲା ଥିବା ସ୍କୁଲ ନିକଟ ବିଦ୍ୟାଳୟ ସହ ମିଶ୍ରଣ ପାଇଁ ନିଷ୍ପତ୍ତି ନେଇଥିଲେ ସରକାର । ୨୦୨୦ ମାର୍ଚ୍ଚ ମାସରେ ଏନେଇ ବିଜ୍ଞପ୍ତି ପ୍ରକାଶ ପାଇଥିଲା । ଏହାକୁ ବିରୋଧ କରି ହାଇକୋର୍ଟରେ ଆପତ୍ତି ଉଠାଇଥିଲେ ଅଭିଭାବକ । ମାନ୍ୟବର କୋର୍ଟ ନିଜ ରାୟରେ ସ୍ପଷ୍ଟ କରିଛନ୍ତି ଯେ, ସ୍କୁଲ୍‌ରେ କମ୍ ସଂଖ୍ୟକ ଛାତ୍ର ପଢ଼ିବା ନେଇ ରାଜ୍ୟ ସରକାରଙ୍କ ପ୍ରଚଳିତ ଶିକ୍ଷା ବ୍ୟବସ୍ଥା ଦାୟୀ । ସ୍କୁଲଗୁଡ଼ିକୁ ଯଥେଷ୍ଟ ଭିତ୍ତିଭୂମି ଯାେଗାଇ ନଦେଇ ରାଜ୍ୟ ସରକାରଙ୍କ ପିଲା କମ୍ ଦୃଷ୍ଟିରୁ ଅନ୍ୟ ସ୍କୁଲ ସହ ମିଶାଇ ଦେବା ପ୍ରସ୍ତାବ ଏକ ବେଆଇନ୍ ପ୍ରସ୍ତାବ ବୋଲି କହିଛନ୍ତି ମାନ୍ୟବର କୋର୍ଟ । ତେବେ ଏହାରି ମଧ୍ୟରେ କିଛି ସ୍କୁଲର ମିଶ୍ରଣ ହୋଇସାରିଥିବା ବେଳେ ଅନ୍ୟ କିଛି ସ୍ଥାନରେ ମିଶ୍ରଣ ହେବାର ବାକି ଅଛି । କିନ୍ତୁ ଏହାକୁ ବିରୋଧ କରି କିଛି ଅଭିଭାବକ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏହା ପରେ ମାନ୍ୟବର କୋର୍ଟ ଅଭିଭାବକଙ୍କ ସପକ୍ଷରେ ରାୟ ଶୁଣାଇଛନ୍ତି ।

ଏଥିସହିତ ପଢ଼ନ୍ତୁ: ଓଡ଼ିଶା ପରେ ମଧ୍ୟପ୍ରଦେଶରେ ଜର୍ଣ୍ଣାଲିଷ୍ଟ ଯୋଦ୍ଧା

କରୋନା ନିୟମର ଖୋଲା ଉଲ୍ଲଂଘନ: ବାହାରେ ତାଲା ଭିତରେ ଚାଲିଥିଲା ପାଠ ପଢ଼ା

ଭୁବନେଶ୍ୱର: କରୋନା ନିୟମର ଖୋଲା ଉଲ୍ଲଂଘନ ଅଭିଯୋଗ । କୋଭିଡ କଟକଣାକୁ ଖାତିର ନକରି ସ୍କୁଲରେ ଚାଲିଛି ପାଠପଢ଼ା । ଆଉ କେଉଁଠି ନୁହେଁ  ରାଜଧାନୀ ଭୁବନେଶ୍ବରରେ ଦେଖିବାକୁ ମିଳିଛି ଏପରି ଦୃଶ୍ୟ । ଭୁବନେଶ୍ବରର ବଡ଼ଗଡ଼ ଓମ୍ ଗୁରୁକୁଳ ସ୍କୁଲରେ ବେଆଇନ ଭାବେ ଚାଲିଥିଲା ପଠପଢ଼ା । ୩୦ରୁ ଅଧିକ ପିଲାଙ୍କୁ ନେଇ ପାଠ ପଢ଼ାଯାଉଥିବା ଦେଖିବାକୁ ମିଳିଛି । ଖବର ପାଇ ବିଏମସି ସ୍କ୍ବାଡ ସମେତ କମିଶନରେଟ୍ ପୋଲିସ ପହଞ୍ଚି ଯାଞ୍ଚ କରୁଛି । ତେବେ ସେଠାରେ ଥିବା ପିଲାମାନେ ସେମାନଙ୍କ ସମ୍ପର୍କୀୟଙ୍କ ପିଲା । ସେମାନେ ସ୍ଥାୟୀ ଭାବେ ଏଠାରେ ରହୁଛନ୍ତି ବୋଲି ସଫେଇ ଦେଇଛନ୍ତି ସ୍କୁଲ କର୍ତ୍ତୃପକ୍ଷ ।  ସମ୍ପ୍ରତି ଦେଶ ଓ ରାଜ୍ୟରେ ସଂକ୍ରମିତଙ୍କ ସଂଖ୍ୟା ବଢ଼ୁଥିବାରୁ ଶିକ୍ଷାନୁଷ୍ଠାନକୁ ବନ୍ଦ ଘୋଷଣା କରିଛନ୍ତି ସରକାର । ଏଥିସହିତ ଦଶମ ଓ ଦ୍ୱାଦଶ ଶ୍ରେଣୀ ପରୀକ୍ଷା ମଧ୍ୟ ବାତିଲ କରାଯାଇଛି । ବର୍ତ୍ତମାନ ସ୍ଥିତି ଏଭଳି ହୋଇଛି ଯେ, ସରକାର ଲକ୍‌ଡାଉନ୍ ଲାଗୁ କରିବାକୁ ମଧ୍ୟ ବାଧ୍ୟ ହୋଇଛନ୍ତି । ଏଣୁ ଆସନ୍ତାକାଲି ଠାରୁ ରାଜ୍ୟରେ ଆରମ୍ଭ ହେବାକୁ ଯାଉଛି ଲକ୍‌ଡାଉନ୍ । ଏଭଳି ପରିସ୍ଥିତିରେ ରାଜଧାନୀରେ ଘରୋଇ ସ୍କୁଲରେ ଶିକ୍ଷାଦାନ ନିୟମର ଖୋଲା ଉଲ୍ଲଂଘନ ।

ଏଥିସହିତ ପଢ଼ନ୍ତୁ: ରାଜ୍ୟରେ ଆଉ ୮୨୧୬ କରୋନା ସଂକ୍ରମିତ ଚିହ୍ନଟ

୩୦ ହଜାରଙ୍କୁ ମାଗଣା ଟିକା ଦେବ ୟଶରାଜ ପ୍ରଡକ୍ସନ୍

ମୁମ୍ବାଇ: ସାରା ଦେଶରେ ଆତଙ୍କ ସୃଷ୍ଟି କରିଛି କରୋନାର ଦ୍ୱିତୀୟ ପର୍ଯ୍ୟାୟ । ଗୋଟିଏ ପଟେ ଦେଶରେ ଟୀକାକରଣ ପ୍ରକ୍ରିୟା ଆରମ୍ଭ ଜାରି ରହିଥିବା ବେଳେ ଦିନକୁ ଦିନ ହଜାର ହଜାର ସଂଖ୍ୟାରେ ମୃତ୍ୟୁ ସଂଖ୍ୟା ବୃଦ୍ଧି ମୁଣ୍ଡବ୍ୟଥାର କାରଣ ସାଜିଛି । ଏଭଳି ସ୍ଥିତିରେ କୋଭିଡ ଶଯ୍ୟା ଅଭାବ ଏବଂ ଅକ୍ସିଜେନର ଘୋର ଅଭାବ ଲୋକଙ୍କ ନିଦ ହଜେଇ ଦେଇଛି । ସାଧାରଣ ଲୋକଙ୍କ ଠାରୁ ଆରମ୍ଭ କରି ନେତା, ରାଜନେତା ଓ ବଲିଉଡ ସେଲିବ୍ରିଟି କେହି ମଧ୍ୟ ଏଥିରୁ ବାଦ୍ ପଡ଼ିନାହାଁନ୍ତି । ଏଭଳି ସ୍ଥିତିରେ କେବଳ ସଚେତନତା ହିଁ ଏକମାତ୍ର ଚାବିକାଠି । ଦେଶରେ ,ଏଭଳି ଦୁର୍ଦ୍ଦିନକୁ ନଜରରେ ରଖି ଅନେକ ଲୋକ ନିଜ ସକ୍ଷମ ଅନୁସାରେ ସାହାଯ୍ୟ କରିବା ପାଇଁ ଆଗେଇ ଆସୁଛନ୍ତି । ନିକଟରେ କରୋନା ସ୍ଥିତିକୁ ନଜରରେ ରଖି ଏକ ବଡ଼ ନିଷ୍ପତ୍ତି ନେଇଛି ୟଶରାଜ ଫିଲ୍ମ ପ୍ରଡକ୍ସନ । ୟଶରାଜ ପ୍ରଡକ୍ସନ ହାଉସ ୩୦ ହଜାର ସିନେ କର୍ମଚାରୀଙ୍କୁ ମାଗଣାରେ ଟୀକାକରଣ କରାଇବାକୁ ନିଷ୍ପତ୍ତି ନେଇଛି ।

ସୂଚନାଯୋଗ୍ୟ, ଏହି ଟୀକାକରଣର ସମ୍ପୂର୍ଣ୍ଣ ଖର୍ଚ୍ଚ ୟଶରାଜ ପ୍ରଡକ୍ସନ୍ ହାଉସ୍ ବହନ କରିବ । FWICE ସଭାପତି ବି. ଏନ.ତିୱାରୀ  ୟଶରାଜର ଏଭଳି ନିଷ୍ପତ୍ତିକୁ ସ୍ୱାଗତଯୋଗ୍ୟ କହିଛନ୍ତି ।  ନେଇ ଗଣମାଧ୍ୟମ ସହ ବିଶେଷ ଆଲୋଚନା କରିଛନ୍ତି  ବି. ଏନ ତିୱାରୀ । ତିୱାରୀଙ୍କ କହିବା ଅନୁସାରେ, ‘ଗତ କିଛି ଦିନ ହେବ ପ୍ରଡକ୍ସନ ହାଉସ ସହିତ ସିନେ କର୍ମଚାରୀଙ୍କୁ ସାହାଯ୍ୟ କରିବା ନେଇ ଆଲୋଚନା ହେଉଥିଲା । ତେବେ ତାଙ୍କ ଫେଡେରେସନକୁ ୟଶ ରାଜ ଫିଲ୍ମସ ପକ୍ଷରୁ ଏକ ଚିଠି ଆସିଛି । ଯେଉଁଥିରେ ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କଠାରୁ ଅନୁମତି ନିଆଯାଇଛି ଉଲ୍ଲେଖ ଅଛି। ଚିଠି ଅନୁଯାୟୀ, ୩୦ ହଜାର ସିନେ କର୍ମଚାରୀଙ୍କୁ ମାଗଣାରେ ଟିକା ଦିଆଯିବ। ୟଶରାଜ ଚଳଚ୍ଚିତ୍ର ଏହାର ଆୟୋଜନ ଏବଂ ସଚେତନତା ଅଭିଯାନ ପରି ଅନ୍ୟାନ୍ୟ ଖର୍ଚ୍ଚ ମଧ୍ୟ ବହନ କରିବ ।

ଏହି ବିଷୟରେ ଅଧିକ ଆଲୋଚନା କରୁଥିବାବେଳେ, ବି ଏନ ତିୱାରୀ କହିଛନ୍ତି, ତାଙ୍କ ଫେଡେରେସନ୍, FWICE କୁ ମଧ୍ୟ ୟଶରାଜ ବ୍ୟାନର ଆଦିତ୍ୟ ଚୋପ୍ରା, ସିଇଓ ଋଷଭ ଚୋପ୍ରାଙ୍କ ପକ୍ଷରୁ ଏକ ଚିଠି ପଠାଯାଇଛି । ଏହା ମାଧ୍ୟମରେ ଜଣାଯାଇଛି ଯେ ୟଶ ରାଜ ଫିଲ୍ମସ୍, ୩୦ ହଜାର କର୍ମଚାରୀଙ୍କୁ ଟିକା ଦେବା ପାଇଁ ମହାରାଷ୍ଟ୍ର ସରକାରଙ୍କଠୁ ଅନୁମତି ମାଗିଛନ୍ତି। ଅନ୍ୟ ବଡ଼ ଏବଂ ସମ୍ମାନିତ ପ୍ରଡକ୍ସନ ହାଉସ ଗୁଡ଼ିକ ମଧ୍ୟ ସହଯୋଗର ହାତ ବଢାଇବେ। ତାଙ୍କ ଫେଡେରେସନ୍ ୟଶ ରାଜଙ୍କ ଏହି ସହଯୋଗକୁ ପ୍ରଶଂସା କରିଛି ।

ସାମ୍ୱାଦିକଙ୍କୁ କୋଭିଡ ସମ୍ମୁଖ ଯୋଦ୍ଧାର ମାନ୍ୟତା ଦେଲେ ମୁଖ୍ୟମନ୍ତ୍ରୀ: ନିଷ୍ପତ୍ତିକୁ ସ୍ୱାଗତ କଲେ ରାଜ୍ୟପାଳ

ଭୁବନେଶ୍ୱର: ରାଜ୍ୟସରକାରଙ୍କ ନିଷ୍ପତ୍ତିକୁ ସ୍ବାଗତ କଲେ ମହାମହିମ ରାଜ୍ୟପାଳ ପ୍ରଫେଶର ଗଣେଶୀଲାଲ । ସାମ୍ବାଦିକଙ୍କୁ କୋଭିଡ ସମ୍ମୁଖ ଯୋଦ୍ଧା ଘୋଷଣାକୁ ସମ୍ମାନ ଜଣାଇଲେ ଗଣେଶୀ ଲାଲ । ଜନସାଧାରଣଙ୍କୁ ସଚେତନ କରିବାରେ ସାମ୍ବାଦିକଙ୍କ ଭୂମିକା ଖୁବ ରହିଛି । ଏପରି କୋଭିଡ ସମୟରେ ଲୋକଙ୍କ ପାଖରେ ସଠିକ ଖବର ପହଞ୍ଚାଉଛନ୍ତି ସାମ୍ବାଦିକମାନେ । ତେଣୁ ରାଜ୍ୟସରକାରଙ୍କ ଏ ନିଷ୍ପତ୍ତି ଖୁବ ସ୍ବାଗତଯୋଗ୍ୟ ବୋଲି ଟ୍ବିଟ୍ କରି ପ୍ରଶଂସା କରିଛନ୍ତି ରାଜ୍ୟପାଳ ।

ଗତ କିଛି ଦିନ ପୂର୍ବେ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସାମ୍ବାଦିକଙ୍କୁ ସମ୍ମୁଖ କରୋନା ଯୋଦ୍ଧା ମାନ୍ୟତା ଦେଇଛନ୍ତି । ଏହାଦ୍ୱାରା ରାଜ୍ୟର ୬ ହଜାର ୯୪୪ ଜଣ କାର୍ଯ୍ୟରତ ସାମ୍ବାଦିକ ଉପକୃତ ହେବେ । ଏହି ପ୍ରସ୍ତାବକୁ ମୁଖ୍ୟମନ୍ତ୍ରୀ କାର୍ଯ୍ୟକାରୀ କରିବା ସହ କହିଛନ୍ତି- ସାମ୍ବାଦିକମାନେ ନିରବଚ୍ଛିନ୍ନ ଭାବେ ଖବର ପ୍ରସାରଣ କରି ଲୋକଙ୍କୁ ସଚେତନ କରୁଛନ୍ତି । ମହାମାରୀ କୋଭିଡ୍ ସମୟରେ ଲୋକଙ୍କ ନିକଟରେ ପ୍ରତିଟି ଖବର ସମୟରେ ପହଞ୍ଚାଉଛନ୍ତି ସାମ୍ବାଦିକ । କୋଭିଡ୍ ବିରୋଧୀ ଯୁଦ୍ଧରେ ସାମ୍ବାଦିକ ସାହାଯ୍ୟ କରୁଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ । ଗୋପବନ୍ଧୁ ସାମ୍ବାଦିକ ସ୍ୱାସ୍ଥ୍ୟ ବୀମା ଯୋଜନାରେ ଅନ୍ତର୍ଭୁକ୍ତ ରାଜ୍ୟର ୬ ହଜାର ୯୪୪ ଜଣ କାର୍ଯ୍ୟରତ ସାମ୍ବାଦିକ ଏହାର ଲାଭ ପାଇବେ । ଏହି ଯୋଜନାରେ ସାମ୍ବାଦିକଙ୍କୁ ୨ ଲକ୍ଷ ଟଙ୍କାର ସ୍ୱାସ୍ଥ୍ୟବୀମା ଯୋଗାଇ ଦିଆଯାଉଛି ।

କୋଭିଡ୍ ସମୟରେ କାର୍ଯ୍ୟରତ କୌଣସି ସାମ୍ବାଦିକଙ୍କ ମୃତ୍ୟୁ ହେଲେ ତାଙ୍କ ନିକଟ ସମ୍ପର୍କୀୟଙ୍କୁ ୧୫ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ମିଳିବ ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀଙ୍କ ଏହି ଘୋଷଣାକୁ ରାଜ୍ୟ ସରକାରଙ୍କ ଗଣମାଧ୍ୟମ ପରାମର୍ଶଦାତା ମାନସ ମଙ୍ଗରାଜ ସ୍ୱାଗତ କରିଛନ୍ତି । ଏହା ସାମ୍ବାଦିକମାନଙ୍କୁ ବିଶେଷ ଭାବେ ସହାୟକ ହେବ । ସାମ୍ବାଦିକମାନଙ୍କ ପ୍ରତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ରାଜ୍ୟ ସରକାରଙ୍କ ପ୍ରତିବଦ୍ଧତା ଓ ଦୃଢ଼ ସହଯୋଗ ଥିବା ଟ୍ୱିଟ୍ କରିଛନ୍ତି ମାନସ ମଙ୍ଗରାଜ । ମୁଖ୍ୟମନ୍ତ୍ରୀଙ୍କ ଏହି ଘୋଷଣାକୁ ରାଜ୍ୟର ସାମ୍ବାଦିକମାନେ ମଧ୍ୟ ସ୍ୱାଗତ କରିଛନ୍ତି ।

ପିକ୍‌ରେ କରୋନା ସଂକ୍ରମଣ: ୩ଲକ୍ଷ ୫୭ ହଜାର ୨୨୯ ନୂଆ ସଂକ୍ରମିତ ଚିହ୍ନଟ

ନୂଆଦିଲ୍ଲୀ: ଦେଶରେ ପିକ୍‌ରେ କରୋନା ସଂକ୍ରମଣ । ଭୟଙ୍କର ଗତିରେ ମାଡ଼ିଚାଲିଛି ସଂକ୍ରମଣର ଦ୍ବିତୀୟ ଲହରୀ । ଦେଶରେ ୨କୋଟି ଟପିଲା କରୋନା ଆକ୍ରାନ୍ତଙ୍କ ସଂଖ୍ୟା । ଦିନକରେ ୩ଲକ୍ଷ ୫୭ହଜାର ୨୨୯ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୩ହଜାର ୪୪୯ଜଣଙ୍କ ଜୀବନ ନେଇଛି କିଲର କରୋନା । ୩ଲକ୍ଷ ୨୦ହଜାର ୨୮୯ଜଣ ସୁସ୍ଥ ହୋଇ ଘରକୁ ଫେରିଥିବା କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ ସୂଚନା ମିଳିଛି । ଦେଶରେ ମୋଟ୍ ସଂକ୍ରମିତଙ୍କ ସଂଖ୍ୟା ୨କୋଟି ୨ଲକ୍ଷ ୮୨ହଜାର ୮୩୩ରେ ପହଞ୍ଚିଥିବା ବେଳେ ମୋଟ୍ ସୁସ୍ଥ ହୋଇଛନ୍ତି କୋଟିଏ ୬୬ଲକ୍ଷ ୧୩ ହଜାର ୨୯୨ଜଣ । ମୋଟ୍ ମୃତ୍ୟୁସଂଖ୍ୟା ୨ଲକ୍ଷ ୨୨ହଜାର ୪୦୮ଥିବା ବେଲେ ଆକ୍ଟିଭ କେସ୍ ରହିଛି ୩୪ଲକ୍ଷ ୪୭ହଜାର ୧୩୩ । ଉତ୍ତର ପ୍ରଦେଶ, କର୍ଣ୍ଣାଟକ, କେରଳ, ଗୁଜରାଟ, ପଶ୍ଚିମବଙ୍ଗ ଓ ପଞ୍ଜାବରେ ସ୍ଥିତି ଜଟିଳ ରହିଛି । ବା ବେଳେ ମହାରାଷ୍ଟ୍ର ସହ ମଧ୍ୟ ପ୍ରଦେଶ, ଛତିଶଗଡ଼ ଓ ଦିଲ୍ଲୀରେ ମଧ୍ୟ କରୋନା ଗ୍ରାଫ୍ କମିଛି । କରୋନାର ମୁକାବିଲା କରିବା ପାଇଁ ଅନେକ ରାଜ୍ୟରେ ଲକଡାଉନ୍, ନାଇଟ୍ କର୍ଫ୍ୟୁ ଓ ସପ୍ତାହାନ୍ତ ସଟଡାଉନ୍ ଜାରି ରହିଛି । ଯେଭଳି ସଂକ୍ରମଣ ଆଗକୁ ନ ବ୍ୟାପେ ସେଥି ପ୍ରତି ଦୃଷ୍ଟି ଦେଉଛନ୍ତି ପ୍ରଭାବିତ ରାଜ୍ୟ ।

ଏଥିସହିତ ପଢ଼ନ୍ତୁ: ରାଜ୍ୟରେ ଆଉ ୮୨୧୬ କରୋନା ସଂକ୍ରମିତ ଚିହ୍ନଟ

ପଣସ ଭିତରେ ଗଞ୍ଜେଇ: ଜଳାପୁଟ ଅଞ୍ଚଳରୁ ଜବତ କଲା କୋରାପୁଟ ପୋଲିସ

ଲମତାପୁଟ: ପୋଲିସ ହାତରେ ଲାଗିଲା ୧ କୋଟି ଟଙ୍କାର ଗଞ୍ଜେଇ । ଅଭିନବ ଉପାୟରେ ଚାଲାଣ ବେଳେ ୧ କୋଟି ଟଙ୍କାର ଗଞ୍ଜେଇ ଜବତ କରିଛି କୋରାପୁଟ ପୋଲିସ । କୋରାପୁଟ ଜଳାପୁଟ ଅଞ୍ଚଳରୁ ଆନ୍ଧ୍ରପ୍ରଦେଶର ଗୁଣ୍ଟୁରକୁ ପଣସ ବୋଝେଇ ଟ୍ରକରେ ଚାଲାଣ ହେଉଥିଲା ଗଞ୍ଜେଇ । ତେବେ କୌଣସି ସୂତ୍ରରୁ ଖବର ପାଇଥିଲେ କୋରାପୁଟ ଏସପି । ଏସପିଙ୍କ ନିର୍ଦ୍ଦେଶ ପରେ ମାଛକୁଣ୍ଡ, ଲମତାପୁଟ ଓ ଜଳାପୁଟ ପୋଲିସ ୩ ଜଣିଆ ଟିମ ଗଠନ କରି ଟିକାପୁଟ ଛକରେ ଗାଡ଼ି ଯାଞ୍ଚ କରିଥିଲେ । ଏହି ସମୟରେ ପଣସ ବୋଝେଇ ଟ୍ରକକୁ ଅଟକାଇଥିଲା ପୋଲିସ । ଗାଡିକୁ ଯାଞ୍ଚ କରିବା ପରେ ଜବତ ହୋଇଥିଲା ବିପୁଳ ପରିମାଣର ଗଞ୍ଜେଇ । ମାଛକୁଣ୍ଡ ପୋଲିସ ଗଞ୍ଜେଇ ଭର୍ତ୍ତି ଟ୍ରକକୁ ଜବତ କରିବା ସହ ଆନ୍ଧ୍ରପ୍ରଦେଶ ଗୁଣ୍ଟୁର ଅଞ୍ଚଳର ୩ ଜଣଙ୍କୁ ଗିରଫ କରିଛି । ଟ୍ରକରୁ ୧ ହଜାର ୮ କେଜି ଗଞ୍ଜେଇ ଜବତ କରିଛି ପୋଲିସ । ଜବତ ଗଞ୍ଜେଇର ଆନୁମାନିକ ମୂଲ୍ୟ ୧କୋଟି ଟଙ୍କା ହେବ ବୋଲି ନନ୍ଦପୁର SDPO ସୂଚନା ଦେଇଛନ୍ତି । ଗିରଫ ଅଭିଯୁକ୍ତ ହେଲେ ଭି. ସତ୍ୟା, ଜି. ଶ୍ରୀଧର ଓ ଜି. ଶ୍ରୀମାନ ନାରାୟଣ । ସେମାନଙ୍କ ନିକଟରୁ ୪ଟି ମୋବାଇଲ ଓ ୩୫୦୦ ଟଙ୍କା ଜବତ କରାଯାଇଛି ।

ଏଥିସହିତ ପଢ଼ନ୍ତୁ: ଲକଡାଉନ୍ ବେଳେ ବି କରିହେବ ଅଭିଯୋଗ, ହାଇକୋର୍ଟ ପକ୍ଷରୁ ହ୍ୱାଟସଅପ ନମ୍ବର ଜାରି

କରୋନାରୁ ସୁସ୍ଥ ହେବା ପରେ ଗୋଟିଏ ଡୋଜ୍ ଯଥେଷ୍ଟ…

ନୂଆଦିଲ୍ଲୀ:  କରୋନାର ଦ୍ୱିତୀୟ ପର୍ଯ୍ୟାୟ ସାରା ଦେଶରେ ଆତଙ୍କ ସୃଷ୍ଟି କରିଛି । ଏଭଳି ସ୍ଥିତିରେ ଟିକାକୁ ନେଇ ଚାଲିଛି ଏକାଧିକ ଗବେଷଣା । ତେବେ ଗବେଷଣା ଦ୍ୱାରା ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ରିପୋର୍ଟ କହୁଛି, କରୋନା ବିରୋଧରେ ଆଣ୍ଟିବଡି ତିଆରି କରିବା ପାଇଁ ଟିକାର ଦୁଇଟି ଡୋଜ୍ ଆବଶ୍ୟକ। କିନ୍ତୁ ଏବେ ଏହି ଟିକାକୁ ନେଇ ଆସିଛି ଏକ ନୂଆ ତଥ୍ୟ । ଟିକାର ଦୁଇଟି ଡୋଜ୍ ବାଧ୍ୟତାମୂଳକ ହୋଇଥିବା ବେଳେ ନିକଟରେ ଏକ ଅଧ୍ୟୟନରେ ଏହାକୁ ନେଇ ଭିନ୍ନ ତଥ୍ୟ ସାମ୍ନାକୁ ଆସିଛି । ଅଧ୍ୟୟନ ଅନୁସାରେ କରୋନା ସଂକ୍ରମିତଙ୍କ ପାଇଁ ଦୁଇଟି ନୁହେଁ ବରଂ ଗୋଟିଏ ଡୋଜ୍ ହିଁ ଯଥେଷ୍ଟ । ତାହା ଶରୀରକୁ ପର୍ଯ୍ୟାପ୍ତ ସୁରକ୍ଷା ଦେବାରେ ପ୍ରଭାବଶାଳୀ ହେବ ।

ଲଣ୍ଡନର ଇମ୍ପେରିୟାଲ କଲେଜ, କ୍ୱିନ୍ ମ୍ୟାରି ବିଶ୍ୱବିଦ୍ୟାଳୟର କିଛି ବୈଜ୍ଞାନିକମାନଙ୍କ ଦ୍ୱାରା ଅଧ୍ୟୟନ ଅନୁସାରେ, କରୋନା ସଂକ୍ରମିତଙ୍କ ପାଇଁ ଗୋଟିଏ ମାତ୍ର ଟିକା ପର୍ଯ୍ୟାପ୍ତ ପରିମାଣର ଆଣ୍ଟିବଡି ଉତ୍ପାଦନ କରେ । ନିକଟ ଅତୀତରେ  ଦକ୍ଷିଣ ଆଫ୍ରିକାରେ କରୋନାର ଭ୍ୟାରିଏଣ୍ଟକୁ ନେଇ ଗବେଷଣା କରିଥିଲେ ବୈଜ୍ଞାନିକ । ଯେଉଁଥିରେ ବ୍ରାଜିଲ ଏବଂ ଭାରତର ଭ୍ୟାରିଏଣ୍ଟ ସାମିଲ ଥିଲା । କିନ୍ତୁ ଦକ୍ଷିଣ ଆଫ୍ରିକା ଭ୍ୟାରିଏଣ୍ଟ ଭାରତ ଏବଂ ବ୍ରାଜିଲ ଭ୍ୟାରିଏଣ୍ଟ ଠାରୁ ପ୍ରଭାବଶାଳୀ ହୋଇପାରେ ବୋଲି ବୈଜ୍ଞାନିକ ଦାବି କରିଛନ୍ତି । ତେବେ ଅଧ୍ୟନୟନରେ ବୈଜ୍ଞାନିକ Phizer ଏବଂ Bio N.techର ଟିକା ବ୍ୟବହାର କରିଥିଲେ ।

ଗବେଷଣାରୁ ତଥ୍ୟ ସାମ୍ନାକୁ ଆସିଲା ଯେ, ପ୍ରଥମେ କରୋନା ସଂକ୍ରମିତ ହୋଇଥିବା ବ୍ୟକ୍ତି ଏବଂ ସାମାନ୍ୟ ଲକ୍ଷଣ ଦେଖା ଦେଇଥିବା ବ୍ୟକ୍ତିଙ୍କ ନିକଟରେ ଟିକାର ଗୋଟିଏ ଡୋଜ୍ ହିଁ ଯଥେଷ୍ଟ । କେବଳ ସେତିକି ନୁହେଁ ବରଂ ଦକ୍ଷିଣ ଆଫ୍ରିକା ଭ୍ୟାରିଏଣ୍ଟ ଉପରେ ମଧ୍ୟ ଏହା ପ୍ରଭାବ ପକାଇଛି । ଅନ୍ୟପଟେ କୋଭିଡ ସଂକ୍ରମିତ ହୋଇନଥିବା ବ୍ୟକ୍ତି ପ୍ରଥମ ଡୋଜ୍ ନେବାପରେ ସେମାନଙ୍କ ନିକଟରେ ରୋଗ ପ୍ରତିରୋଧକ ଶକ୍ତି କମ୍ ରହିଥିଲା, ଅର୍ଥାତ୍ ଭୂତାଣୁ ସଂକ୍ରମଣର ଆଶଙ୍କା ରହିଥିଲା ।

ଇମ୍ପେରିଆଲ୍ କଲେଜର ପ୍ରଫେସର ରୋଜେମର୍ ବୟଣ୍ଟନ କହିଛନ୍ତି ଯେ, ଯେଉଁମାନେ ପ୍ରଥମ ଜୋଜ୍ ନେଇଛନ୍ତି ଏବଂ ଯେଉଁମାନେ ପୂର୍ବରୁ ସଂକ୍ରମିତ ହୋଇନାହାନ୍ତି ସେମାନଙ୍କର କରୋନାର ନୂଆ ଷ୍ଟ୍ରେନ୍ ଦ୍ୱାରା ସଂକ୍ରମିତ ହେବାର ଆଶଙ୍କା ରହିଛି। ସେଥିପାଇଁ ଲୋକମାନେ ଟୀକାକରଣର ଦ୍ୱିତୀୟ ଡୋଜ୍ ନେବା ଜରୁରୀ ବୋଲି ସେ କହିଛନ୍ତି । “କରୋନାର ନୂଆ ନୂଆ ଷ୍ଟ୍ରେନ୍ ଏବେ ସାମ୍ନାକୁ ଆସୁଛି । ଏଭଳି ପରିସ୍ଥିତିରେ ଅଧିକରୁ ଅଧିକ ଲୋକ ଭ୍ୟାକ୍ସିନ୍ ନେବା ଆବଶ୍ୟକ । ତେବେ ଯେଉଁମାନେ ଥରେ କରୋନା ସଂକ୍ରମିତ ହୋଇସାରିଛନ୍ତି, ସେମାନେ ଗୋଟିଏ ଟିକା ନେଲେ ମଧ୍ୟ ତାଙ୍କର ରୋଗ ପ୍ରତିରୋଧକ ଶକ୍ତି କମ ହୋଇଯାଇଥାଏ ।”

ଆଇଟିଆଇ ଛାତ୍ର ନିର୍ମାଣ କଲେ ଡ୍ରୋନ୍: ଜଙ୍ଗଲରେ କରିବ ପାଟ୍ରୋଲିଂ

କଟକ: ଏବେ ଡ୍ରୋନ କରିବ ଖଣି ମ୍ୟାପିଂ ସର୍ଭେ । ସୀମାରେ ପାଟ୍ରୋଲିଂ ସହ ପ୍ରାକୃତିକ ବିପର୍ଯ୍ୟୟର ସର୍ଭେ କରିବ ଡ୍ରୋନ । ସ୍କିଲ ଓଡ଼ିଶାର ସହାୟତାରେ କଟକ ଖପୁରିଆ ଆଟିଆଇ ଛାତ୍ରଙ୍କ ଦ୍ଵାରା ଏପରି ଏକ ଡ୍ରୋନ ପ୍ରସ୍ତୁତ କରାଯାଇଛି । ଡ୍ରୋନ ଏବଂ ଖପୁରିଆ ଆଟିଆଇ ମଧ୍ୟରେ ଚୁକ୍ତିନାମା ସ୍ଵାକ୍ଷର ହୋଇଛି ।

ସୀମା ଜଗିବ ଡ୍ରୋନ । ଜଙ୍ଗଲରେ କରିବ ପାଟ୍ରୋଲିଂ । ସୁରକ୍ଷାବଳଙ୍କୁ ସହଯୋଗ କରିବ ଡେଲଟା ୪୦୦ ସିରିଜର ଡ୍ରୋନ୍ । ଏହାକୁ ପ୍ରସ୍ତୁତ କରିଛନ୍ତି କଟକ ଖପୁରିଆ ଆଇଟିଆଇ ଛାତ୍ର । ସ୍କିଲ ଓଡିଶା ସହାୟତାରେ ପ୍ରସ୍ତୁତ କରାଯାଉଥିବା ଏହି ଡ୍ରୋନ ଅନେକ କାର୍ଯ୍ୟରେ ଲାଗି ପାରିବ । ଖଣି ମ୍ୟାପିଂ, ଶିଳ୍ପ, ସେତୁ ଯାଞ୍ଚ, ସୀମା ସୁରକ୍ଷା, ଜଙ୍ଗଲରେ ନିଆଁ ଲାଗିବା ଓ ବନ୍ୟା ସମୟରେ ଅନେକ କାମରେ ଆସିବ । ଅତ୍ୟାଧୁନିକ ଟେକ୍ନୋଲୋଜି ଓ ଜ୍ଞାନକୌଶଳକୁ ବ୍ୟବହାର କରି ଛାତ୍ର ଏବଂ ଶିକ୍ଷକମାନେ ଏହାକୁ ନିର୍ମାଣ କରିଛନ୍ତି । ଏଥିପାଇଁ ଡ୍ରୋନ୍ ଏବଂ ଖପୁରିଆ ଆଟିଆଇ ମଧ୍ୟରେ ଚୁକ୍ତିନାମା ସ୍ଵାକ୍ଷର ହୋଇଛି ।

ପ୍ରଥମ ପର୍ଯ୍ୟାୟରେ ଖଣି ସର୍ବେକ୍ଷଣ କ୍ଷେତ୍ରରେ ଏହାକୁ ବ୍ୟବହାର କରାଯିବ । ଏଥିରେ ବିଭିନ୍ନ ପ୍ରକାର ସେନ୍ସନର ସହ ହାଇ ରିଜୋଲ୍ୟୁସନ ଆରଜିବି କ୍ୟାମେରା ଖଞ୍ଜା ଯାଇଛି । ଏହି ସେନ୍ସର ମାଧ୍ୟମରେ ମାଟି ଉପରେ ସ୍ଥିତି ରହିଛି ତାର ସମ୍ପୂର୍ଣ୍ଣ ତଥ୍ୟ ମିଳିପାରିବ । ଫଳରେ ସର୍ବେକ୍ଷଣ କ୍ଷେତ୍ରରେ ସଠିକ ତଥ୍ୟ ମିଳିବା ସହ ଚୂଡାନ୍ତ ନିଷ୍ପତି ନିଆ ଯାଇପାରିବ । ଏହି ଡ୍ରୋନକୁ ସେଟଲାଇଟ ସହିତ ଯୋଗାଯୋଗ କରାଯିବ ଏବଂ ସେଟଲାଇଟ୍ ଦ୍ଵାରା ପରିଚାଳିତ ହେବ ।

ଏଥିସହିତ ପଢ଼ନ୍ତୁ: ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ସିଏମସିକୁ ୧୦ କୋଟି , ପରିପୃଷ୍ଟ ହେବ କୋଭିଡ ପରିଚାଳନା