spot_img
Home Blog Page 5796

୨ଦିନ ଭିତରେ ବ୍ରହ୍ମପୁରରେ କାର୍ଯ୍ୟକ୍ଷମ ହେବ ଅକ୍ସିଜେନ୍ ପ୍ଲାଣ୍ଟ

ବ୍ରହ୍ମପୁର: ୨ଦିନ ଭିତରେ ବ୍ରହ୍ମପୁରରେ କାର୍ଯ୍ୟକ୍ଷମ ହେବ ଅକ୍ସିଜେନ୍ ପ୍ଲାଣ୍ଟ । ଏମ୍‌କେସିଜିରେ ଲିକ୍ୟୁଇଡ୍‌ ଅକ୍ସିଜେନ ପ୍ଲାଣ୍ଟର କାମ ସରିଛି । ସିଧାସଳଖ ପାଇପ୍‌ ଯୋଗେ ଅକ୍ସିଜେନ୍ ଯୋଗାଇଦିଆଯିବ । ଏହି ପ୍ଲାଣ୍ଟ କାର୍ଯ୍ୟକ୍ଷମ ହେଲେ ବିଭିନ୍ନ ସ୍ଥାନକୁ ୨ ହଜାର ସିଲିଣ୍ଡର ଯୋଗାଇ ଦିଆଯାଇପାରିବ । ପର୍ଯ୍ୟାୟକ୍ରମେ ରାଜ୍ୟର ସମସ୍ତ ଜିଲ୍ଲାରେ ଲିକ୍ୟୁଇଡ ଅକ୍ସିଜେନ୍ ପ୍ଲାଣ୍ଟ ହେବ ବୋଲି ଏସିଏସ୍ ପ୍ରଦୀପ୍ତ ମହାପାତ୍ର ସୂଚନା ଦେଇଛନ୍ତି ।

ରାଜ୍ୟରେ ଅକ୍ସିଜେନ୍ ଅଭାବ ଦୂର କରିବାରେ ଏହି ପ୍ଲାଣ୍ଟ ସହାୟକ ହେବ । ସେହିପରି କେନ୍ଦ୍ର ସରକାର ଅକ୍ସିଜେନ୍ ଉତ୍ପାଦନ ପ୍ଲାଣ୍ଟ କରିବାକୁ ଯେଉଁ ପ୍ରସ୍ତାବ ମାଗିଥିଲେ ସେନେଇ ରାଜ୍ୟ ସରକାରଙ୍କ କେନ୍ଦ୍ରକୁ ତାଲିକା ପଠାଇଛନ୍ତି । ୩୦ଟି ଜିଲ୍ଲା, ଆଇଜିଏଚ୍, କ୍ୟାପିଟାଲ ହସ୍ପିଟାଲ ଓ ୮ ମେଡିକାଲ କଲେଜକୁ ମିଶାଇ ମୋଟ୍ ୪୦ଟି ସ୍ଥାନରେ ଅକ୍ସିଜେନ୍ ଉତ୍ପାଦନ ପ୍ଲାଣ୍ଟ କରିବା ପାଇଁ କେନ୍ଦ୍ରକୁ ରାଜ୍ୟ ତାଲିକା ଦେଇଛି ।

ଚଳଚଞ୍ଚଳ ପୁରୀ ରଥଖଳା: ଆରମ୍ଭ ହେଲା ମହାପ୍ରଭୁଙ୍କ ଘୋଷଯାତ୍ରା ପାଇଁ ରଥ ନିର୍ମାଣ କାର୍ଯ୍ୟ

ପୁରୀ: ଚଳଚଞ୍ଚଳ ହୋଇଛି ପୁରୀ ରଥଖଳା । ମହାପ୍ରଭୁଙ୍କ ଘୋଷଯାତ୍ରା ପାଇଁ ଆରମ୍ଭ ହୋଇଛି ରଥ ନିର୍ମାଣ କାମ । ଆଜି ପ୍ରାଥମିକ ପର୍ଯ୍ୟାୟରେ ୨୭ ଜଣ ସେବାୟତ ରଥ ନିର୍ମାଣ କାର୍ଯ୍ୟରେ ନିୟୋଜିତ ହୋଇଛନ୍ତି । ସେମାନଙ୍କ ରହିବା ପାଇଁ ଭକ୍ତ ନିବାସରେ ବ୍ୟବସ୍ଥା କରାଯାଇଛି । ଗତକାଲି ଅକ୍ଷୟ ତୃତୀୟ ଅବସରରେ ରଥ ନିର୍ମାଣର ଶୁଭାରମ୍ଭ ହୋଇଥିଲା ।

ମହାପ୍ରଭୁଙ୍କ ଘୋଷଯାତ୍ରା ପାଇଁ ଆରମ୍ଭ ହୋଇଛି ରଥ ନିର୍ମାଣ କାମ । ମଣି ବିମାନରେ ମଦନ ମୋହନ, ରାମକୃଷ୍ଣ ଓ ପଞ୍ଚ ମହାବୀର ସ୍ୱତନ୍ତ୍ର ପଟୁଆରରେ ଶ୍ରୀମନ୍ଦିରରୁ ଆସି ରଥଖଳାରେ ପହଞ୍ଚିଛନ୍ତି । ପୂର୍ବରୁ ରଖାଯାଇଥିବା ତିନି ରଥର ତିନିଖଣ୍ଡ କାଠରେ ଆଜ୍ଞା ମାଳ ଲାଗି ହେବା ପରେ ପଞ୍ଚପଚାରରେ ସୁନା କୁରାଢ଼ିରେ ସ୍ୱତନ୍ତ୍ର ନୀତିରେ ରଥ ନିର୍ମାଣର ଶୁଭାରମ୍ଭ ହୋଇଛି ।

ପରେ ରଥ ନିର୍ମାଣରେ ସଂପୃକ୍ତ ସେବାୟତଙ୍କୁ ଶାଢ଼ି ବନ୍ଧା ଯାଇଛି । ଭୋଇ ସେବକମାନେ ମହାପ୍ରସାଦ ଓ ନଡ଼ିଆ ରଖି ଶାବଳ ପୂଜା କରିଥିଲେ । ରଥ ନିର୍ମାଣ ଅନୁକୂଳ ପରେ ମହାପ୍ରଭୁଙ୍କ ଚଳନ୍ତି ପ୍ରତିମା ନରେନ୍ଦ୍ର ପୁଷ୍କରିଣୀକୁ ବିଜେ କରିଥିଲେ । ଏଥିପାଇଁ ଶ୍ରୀମନ୍ଦିର କାର୍ଯ୍ୟାଳୟଠାରୁ ନରେନ୍ଦ୍ର ପୁଷ୍କରିଣୀ ଯାଏଁ ୧୪୪ ଧାରା ଜାରି କରାଯାଇଛି ।

ରାଜ୍ୟରେ ସୁଟିଂ ଉପରେ ଲାଗିଲା କଟକଣା, ଫିଲ୍ମ ଓ ସିରିଅଲ ସୁଟିଂ ପାଇଁ ଆଉ ମିଳିବନି ଅନୁମତି

ଭୁବନେଶ୍ୱର: କରୋନା ସଂକ୍ରମଣ ରୋକିବାକୁ ରାଜ୍ୟରେ ସୁଟିଂ ଉପରେ ଲାଗିଲା କଟକଣା । ଫିଲ୍ମ ଓ ସିରିଏଲ ସୁଟିଂ ପାଇଁ ଆଉ ମିଳିବନି ଅନୁମତି । ଉଭୟ ଆଉଟଡୋର୍ ଓ ଇନଡୋର୍ ସୁଟିଂ ଉପରେ କଟକଣା ଲାଗିଛି । ରାଜ୍ୟ ସରକାର ଏହି ନିଷ୍ପତ୍ତି ନେଇଛନ୍ତି । ଏସ୍‌ଆରସିଙ୍କ ପକ୍ଷରୁ ଚିଠି ଜାରି ହୋଇଛି । ଗତବର୍ଷ ମଧ୍ୟ କରୋନା କାରଣରୁ ସବୁ ପ୍ରକାର ଫିଲ୍ମ ଓ ସିରିଏଲ ସୁଟିଂ ବନ୍ଦ କରାଯାଇଥିଲା । ରାଜ୍ୟରେ ଦିନକୁ ଦିନ ବଢ଼ିଚାଲିଛି କରୋନା ସଂକ୍ରମିତଙ୍କ ସଂଖ୍ୟା । ଏହାକୁ ନଜରରେ ରଖି ରାଜ୍ୟରେ ଫିଲ୍ମ ଏବଂ ସିରିଏଲ ସୁଟିଂ ଉପରେ କଟକଣା ଜାରି କରାଯାଇଛି ।

ସେହିପରି ରାଜ୍ୟରେ କରୋନା ସଂକ୍ରମଣ ମୁଣ୍ଡ ବିନ୍ଧାର କାରଣ ହୋଇଛି । ଆଜି ରାଜ୍ୟରେ ଆଉ ୧୧ହଜାର ୭୩୨ ସଂକ୍ରମିତ ଚିହ୍ନଟ ହୋଇଛନ୍ତି ୧୯ଜଣଙ୍କ ଜୀବନ ନେଇଛି କରୋନା । କ୍ୱାରେଣ୍ଟାଇନରୁ ୬୫୬୯ ଲୋକାଲ କେସ୍ ୫୧୬୩ । ଖୋର୍ଦ୍ଧାରୁ ସର୍ବାଧିକ ୧୭୧୦ ଆକ୍ରାନ୍ତ ଚିହ୍ନଟ ହୋଇଛନ୍ତି । କଟକରୁ ୮୭୦, ଅନୁଗୁଳରୁ ୭୦୦, ସୁନ୍ଦରଗଡ଼ରୁ ୬୪୧ ସଂକ୍ରମିତ ଚିହନଟ ହୋଇଛନ୍ତି । ମୋଟ୍ ସଂକ୍ରମିତଙ୍କ ସଂଖ୍ୟା ୬ଲକ୍ଷ ୧୨ହଜାର ୨୨୪ ଥିବା ବେଳେ ସୁସ୍ଥ ହେଲେଣି ୫ଲକ୍ଷ ୨ହଜାର ୪୫୫ ।

ରାଜ୍ୟରେ କରୋନା ଆକ୍ରାନ୍ତଙ୍କ ସହ ତାଳ ଦେଇ ବଢିଚାଲିଛି ସୁସ୍ଥ ସଂଖ୍ୟା । ଦୈନିକ ପ୍ରାୟ ୧୦ ହଜାର ସଂକ୍ରମିତ ଚିହ୍ନଟ ହେଉଥିବା ବେଳେ ସୁସ୍ଥ ସଂଖ୍ୟା ମଧ୍ୟ ସମାନ ଅନୁପାତରେ ବଢିଚାଲିଛି । ରାଜ୍ୟରେ ୫ ଲକ୍ଷରୁ ଅଧିକ ସଂକ୍ରମିତ ସୁସ୍ଥ ହୋଇସାରିଛନ୍ତି । ଅଧିକ ଟେଷ୍ଟିଂ କରାଯାଉଥିବାରୁ ଅଧିକ କରୋନା ରୋଗୀଙ୍କୁ ଚିହ୍ନଟ କରାଯାଉଛି । ରାଜ୍ୟରେ ସଂକ୍ରମଣ ଏବେ ପ୍ଲାଟ୍ୟୁ ଷ୍ଟେ୍‌ଜରେ ରହିଛି । ତେବେ ଲକ୍‌ଡାଉନ୍‌ ହଟାଗଲେ ସଂକ୍ରମଣ ବଢ଼ିପାରେ ବୋଲି ଆଶଙ୍କା କରାଯାଉଛି ।

ପାରା ଧରିବାକୁ ଯାଇ ପୋଡ଼ିଗଲେ ନାବାଳକ, କ୍ୟାପିଟାଲ ହସ୍ପିଟାଲରେ ଭର୍ତ୍ତି

ଭୁବନେଶ୍ୱର: ପାରା ଧରିବାକୁ ଯାଇ ପୋଡ଼ିଗଲେ ନାବାଳକ । ଭୁବନେଶ୍ୱର ମଞ୍ଚେଶ୍ୱର ରେଳ ଷ୍ଟେସନର ଇଲେକ୍ଟ୍ରି ଖୁଣ୍ଟରେ ଲାଗିଯାଇ ନାବାଳକ ଜଣକ ପୋଡ଼ି ହୋଇଯାଇଥିବା ଦେଖିବାକୁ ମିଳିଛି । ସୂଚନା ଅନୁଯାୟୀ ନାବାଳକ ଜଣକ ଷ୍ଟେସନରେ ଥିବା ଓଭରବ୍ରିଜ ଉପରେ ଚଢି ପାର ଧରୁଥିଲେ । ପାରା ଧରିବା ସମୟରେ ଟ୍ରେନ ଉପରେ ଲାଗିଥିବା ହାଇ ଭୋଲଟେଜ କରେଣ୍ଟ ଲାଗି ପୋଡ଼ି ହୋଇ ତଳେ ପଡିଯାଇଥିଲେ । ସ୍ଥାନୀୟ ଲୋକମାନେ ତାକୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି । ତେବେ ନାବାଳକ ଜଣଙ୍କ ଶରୀର ସମ୍ପୂର୍ଣ୍ଣ ଭାବେ ପୋଡି ଯାଇଛି ।

ନାବାଳକ ଜଣଙ୍କ ରେଳ ଷ୍ଟେସନ ଉପରେ ଚଢ଼ି ପାରା ଧରିବାକୁ ଉଦ୍ୟମ କରୁଥିଲେ । ଠିକ ସେତିକି ବେଳେ ବଗି ଉପର ଦେଇ ଯାଇଥିବା ହାଇଭେଲଟେଜ ତାର ସଂସ୍ପର୍ଶରେ ଆସି ନାବାଳକ ଜଣଙ୍କ ପୋଡ଼ିଯାଇଥିଲେ । ତାଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି ।

ଦେଶରେ ୨୪ ଘଣ୍ଟାରେ ୩ଲକ୍ଷ ୧୧ହଜାର ୧୭୦ କରୋନା ପଜିଟିଭ ଚିହ୍ନଟ, ୪୦୭୭ ମୃତ

ନୂଆଦିଲ୍ଲୀ: ଦେଶରେ ୨୪ ଘଣ୍ଟାରେ ୩ଲକ୍ଷ ୧୧ହଜାର ୧୭୦ କରୋନା ପଜିଟିଭ ଚିହ୍ନଟ ହୋଇଛନ୍ତି । ୪ହଜାର ୭୭ଜଣ ସଂକ୍ରମିତଙ୍କ ଜୀବନ ନେଇଛି ଭାଇରସ୍ । ଦିନକରେ ୩ଲକ୍ଷ ୬୨ହଜାର ୪୩୭ ସଂକ୍ରମିତ ସୁସ୍ଥ ହୋଇ ଘରକୁ ଫେରିଛନ୍ତି । ଦେଶରେ ମୋଟ୍ କରୋନା ଆକ୍ରାନ୍ତହ୍କ ସଂଖ୍ୟା ୨କୋଟି ୪୬ଲକ୍ଷ ୮୪ହଜାର ୭୭, ମୋଟ୍ ସୁସ୍ଥ ହେଲେଣି ୨କୋଟି ୭ଲକ୍ଷ ୯୫ହଜାର ୩୩୫ । ମୋଟ୍ କରୋନା ମୃତ୍ୟୁସଂଖ୍ୟା ୨ଲକ୍ଷ ୭୦ହଜାର ୨୮୪ ଥିବା ବେଳେ ଆକ୍ଟିଭ କେସ୍ ରହିଛି ୩୬ଲକ୍ଷ ୧୮ହଜାର ୪୫୮ । ଦେଶରେ ୧୮କୋଟି ୨୨ଲକ୍ଷ ୨୦ହଜାର ୧୬୪ଜଣଙ୍କୁ ଟିକାକରଣ କରାଗଲାଣି ବୋଲି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ ସୂଚନା ମିଲିଛି ।

ଦେଶରେ କରୋନା ସଙ୍କଟ ଉତ୍କଟ ହେଉଥିବା ଦେଖି କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି ରିଜର୍ଭ ବ୍ୟାଙ୍କର ପୂର୍ବତନ ଗଭର୍ଣ୍ଣର ରଘୁରାମ ରାଜନ । ସ୍ୱାଧୀନତା ପରେ କରୋନା ମହାମାରୀ ଦେଶ ପାଇଁ ସବୁଠୁ ବଡ଼ ଆହ୍ୱାନ ବୋଲି କହିଛନ୍ତି ରଘୁରାମ ରାଜନ । ସେ ଏହା ମଧ୍ୟ କହିଛନ୍ତି ଯେ, ବିଭିନ୍ନ ସ୍ଥାନରେ ଲୋକଙ୍କୁ ସାହାଯ୍ୟ କରୁନାହାନ୍ତି ସରକାର । ମହାମାରୀ ଭାରତ ପାଇଁ ବହୁତ ବଡ ଦୁଃଖଦ ଘଟଣା । ମହାମାରୀ ସମୟରେ ତାଲାବନ୍ଦ ପାଇଁ ଦେଶର ଅର୍ଥନୈତିକ ବ୍ୟବସ୍ଥା ଠିକ୍ ନଥିଲା । କିନ୍ତୁ ବର୍ତ୍ତମାନ ଯେଉଁ ପରିସ୍ଥିତି ଦେଖାଦେଇଛି, ଏଥପାଇଁ ଉଭୟ ଅର୍ଥନୈତିକ ସହ ଜୀବନ ଜୀବିକା ଦୁଇଟି ଯାକ ପ୍ରଭାବିତ ହୋଇଛି ।

ଦେଶରେ ପ୍ରତିଦିନ ୩ ଲକ୍ଷରୁ ଅଧିକ ମାମଲା ରିପୋର୍ଟ କରାଯାଉଛି । ସେହିପରି ମୃତ୍ୟୁ ସଂଖ୍ୟା ମଧ୍ୟ କ୍ରମାଗତ ଭାବେ ବୃଦ୍ଧି ପାଇବାରେ ଲାଗିଛି । କେନ୍ଦ୍ର ସରକାର ଅନେକ କ୍ଷେତ୍ରରେ ସହଯୋଗ କରୁନଥିବାରୁ ଦେଶରେ ଦେଶରେ ଉତ୍କଟ ରୂପ ନେଉଛି ମହାମାରୀ ।

କେନ୍ଦୁଝରରେ ଅଭାବନୀୟ ଘଟଣା, ସ୍ତ୍ରୀକୁ ପିଟି ପିଟି ହତ୍ୟା କଲା ସ୍ୱାମୀ

କେନ୍ଦୁଝର: କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ସତ୍ୟପାଳ ଗାଁରେ ଅଭାବନୀୟ ଘଟଣା । ସ୍ତ୍ରୀକୁ ପିଟି ପିଟି ହତ୍ୟା କରିଛି ସ୍ୱାମୀ । ମୃତ ମହିଳା ହେଲେ ଦୁଃଖୀ ପାତ୍ର । ସୂଚନା ଅନୁସାରେ, ଗତକାଲି ରାତିରେ ଉଭୟ ସ୍ୱାମୀ ସ୍ତ୍ରୀ ଖାଇସାରି ଶୋଇଥିଲେ । ପରେ ପରେ ଉଭୟଙ୍କ ମଧ୍ୟରେ ଝଗଡା ହୋଇଥିଲା । ଉତକ୍ଷୀପ୍ତ ହୋଇ ସ୍ୱାମୀ ବିମ୍ବାଧର ପାତ୍ର ତାଙ୍କ ସ୍ତ୍ରୀ ଦୁଃଖୀ ପାତ୍ରକୁ ପିଟିପିଟି ହତ୍ୟା କରିଥିଲା । ପଡୋଶୀ ଲୋକ ମହିଳା ଜଣଙ୍କୁ ହରିଚନ୍ଦନପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ହରିଚନ୍ଦନପୁର ପୋଲିସ୍ ଅଭିଯୁକ୍ତ ବିମ୍ବାଧରକୁ ଥାନାରେ ଅଟକ ରଖି ପଚରାଉଚରା କରୁଛି ।

ରାଜ୍ୟରେ ପୁଣି ଦୁଇ ସାମ୍ବାଦିକଙ୍କ ଜୀବନ ନେଲା କରୋନା

ଭୁବନେଶ୍ୱର: ରାଜ୍ୟରେ ପୁଣି ଦୁଇ ସାମ୍ବାଦିକଙ୍କ କରୋନାରେ ମୃତ୍ୟୁ । ବଲାଙ୍ଗୀର ପାଟଣାଗଡ଼ର ବରିଷ୍ଠ ସମ୍ବାଦିକ ୭୫ ବର୍ଷୀୟ କୈଳାସ ଚନ୍ଦ୍ର ସାହୁଙ୍କ ଦେହାନ୍ତ ହୋଇଛି । ସେ କିଛି ଦିନ ତଳେ କରୋନାରେ ପୀଡିତ ହେବାପରେ ଚିକିତ୍ସିତ ହୋଇ ଘରକୁ ଫେରିଥିଲେ । ଚିକିତ୍ସିତ ହେବା ପରେ ସେ ଅସୁସ୍ଥତା କାରଣରୁ ଘରେ ଥିଲେ । ଆଜି ସକାଳ ୫ଟା ସମୟରେ ତାଙ୍କ ମୃତ୍ୟୁ ଘଟିଥିବା ଖବର ମିଳିଛି । ଜଣେ ପରୋପକାରୀ ବରିଷ୍ଠ ସାମ୍ବାଦିକ ଭାବେ ସେ ପାଟଣାଗଡ଼ ଅଂଚଳରେ ବେଶ୍‌ ଜଣାଶୁଣା । ପାଟଣାଗଡ଼ ଅଂଚଳରେ ଜଣେ ଦକ୍ଷ ସାମ୍ବାଦିକ ଭାବେ ନିଜ ଦକ୍ଷତା ପ୍ରତିପାଦନ କରିଥିଲେ । ଏକ ଦୈନିକ ଖବର କାଗଜରେ ପ୍ରାୟ ୧୮ବର୍ଷ ଧରି କାର୍ଯ୍ୟ କରିବା ପରେ ଗତ ଜାନୁଆରୀ ମାସରେ କାର୍ଯ୍ୟରୁ ଅବ୍ୟାହତି ନେଇଥିଲେ ।

ସେହିପରି ବ୍ରହ୍ମପୁରର ସାମ୍ବାଦିକ ବିଷ୍ଣୁ ପ୍ରସାଦ ପାତ୍ରଙ୍କ କରୋନାରେ ମୃତ୍ୟୁବରଣ ହୋଇଛି । ଆଜି ସକାଳ ସମୟରେ କୋଭିଡ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ବିଷ୍ଣୁ ପ୍ରସାଦ ପାତ୍ରଙ୍କ ଦେହାନ୍ତ ହୋଇଛି । ସେ କିଛି ଦିନ ଧରି କରୋନାରେ ଆକ୍ରାନ୍ତ ହୋଇ ଚିକିତ୍ସାଧିନ ଥିଲେ । ସାମ୍ବାଦିକ ମହଲରେ ଶୋକର ଛାୟା ଖେଳିଯାଇଛି ।

ଚୋରା ଶାଳ କାଠ ବୋଝେଇ ପିକଅପ ଭ୍ୟାନ ଦୁର୍ଘଟଣାଗ୍ରସ୍ତ, ଜଣେ ମୃତ

କଟକ: କଟକ ଜିଲ୍ଲା ନରସିଂହପୁର ଥାନା କମଳାଦେଇପୁର ଛକ ଠାରେ ଚୋରା ଶାଳ କାଠ ବୋଝେଇ ପିକଅପ ଭ୍ୟାନ ଦୁର୍ଘଟଣାଗ୍ରସ୍ତ । ଗାଡିଟିର ଚକା ଫାଟି ଯିବାରୁ ଏଭଳି ଦୁର୍ଘଟଣା ହୋଇଛି । ଦୁର୍ଘଟଣାରେ ଜଣେ ଯୁବକ ମୃତ୍ୟୁବରଣ କରିଥିବା ବେଳେ ଘଟଣାସ୍ଥଳରୁ ଗାଡ଼ି ଡ୍ରାଇଭର ଫେରାର ହୋଇଯାଇଛି । ମୃତ ଯୁବକ ଜଣକ ହେଉଛନ୍ତି ବଡମ୍ବା ଥାନା ରତାପାଟ ଗାଁର ୨୨ ବର୍ଷୀୟ ରାକେଶ ଶାହାଣୀ । ରାକେଶ ଜଣେ ମଜୁରିଆ ଭାବେ ସେହି ଗାଡ଼ିରେ କାମ କରୁଥିଲା ।

ରାକେଶକୁ କାନପୁର ଡାକ୍ତରଖାନା କୁ ନିଆଯାଇଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ପିକ ଅପ ଭ୍ୟାନରେ ୨୨ ଖଣ୍ଡ ଚୋରା ଶାଳ ଗଣ୍ଡି ଚାଲାଣ ହେଉଥିଲା । ଶାଳ କାଠର ଆନୁମାନିକ ମୂଲ୍ୟ ୮୦ ହଜାର ଟଙ୍କା ହେବ ବୋଲି ବନ ବିଭାଗ ତରଫରୁ ସୂଚନା ମିଳିଛି । ଘଟଣାସ୍ଥଳରେ ନରସିଂହପୁର ପୋଲିସ ଓ ବନବିଭାଗ ପହଞ୍ଚି ତଦନ୍ତ କରୁଥିବା ବେଳେ ଏକ ଜେସିବି ସାହାଯ୍ୟରେ ଗାଡ଼ିଟିକୁ ନରସିଂହପୁର ବନବିଭାଗ କାର୍ଯ୍ୟାଳୟକୁ ନିଆଯାଇଛି ।

ଇସ୍ରାଏଲ ଓ ପାଲେଷ୍ଟାଇନ୍ ମଧ୍ୟରେ ବଢୁଛି ସଂଘର୍ଷ, ଗାଜା ବର୍ଡର ପରେ ୱେଷ୍ଟ ବ୍ୟାଙ୍କ ଉପରେ ଇସ୍ରାଏଲର ରକେଟ୍ ମାଡ

ଇସ୍ରାଏଲ: ମଧ୍ୟ ପ୍ରାଚୀରରେ ଯୁଦ୍ଧର କଳାବାଦଲ । ଇସ୍ରାଏଲ ଓ ପାଲେଷ୍ଚାଇନ୍ ମଧ୍ୟରେ ଆରମ୍ଭ ହୋଇଥିବା ସଂଘର୍ଷ ଯୁଦ୍ଧର ରୂପ ନେବାରେ ଲାଗିଛି । ଦୁଇ ଦେଶ ମଧ୍ୟରେ ଏଭଳି ସଂଘର୍ଷ ନେଇ ଚିନ୍ତାରେ ବିଶ୍ବ ସମୁହ । ଏନେଇ ଆଜି ଜାତିସଂଘ ନିରାପତ୍ତା ପରିଷଦରେ ଗୁରୁତ୍ବପୂର୍ଣ୍ଣ ବୈଠକ ବସିବ । ପାଲେଷ୍ଟାଇନ ଉପରେ ବାରମ୍ବାର ଆକ୍ରମଣ କରି ନିଜର ସ୍ଥିତି ଜାହିର କରିବା ପାଇଁ ଉଦ୍ୟମ କରୁଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ।

ଭାରି ମାତ୍ରାରେ ଗାଜା ବର୍ଡର ପାଖରେ ପହଞ୍ଚିବାରେ ଲାଗିଛନ୍ତି ଇସ୍ରାଏଲ ସୈନିକ । ଗାଜା ବର୍ଡର ପରେ ଓ୍ବେଷ୍ଟ ବ୍ୟାଙ୍କ ଉପରେ ଆଟାକ କରିଛି ଇସ୍ରାଏଲ । ଇସ୍ରାଏଲର ଆକ୍ରମଣରେ ପାଲେଷ୍ଟାଇନର ୧୨୭ ଜଣକ ମୃତ୍ୟୁ ହୋଇଥିବାବେଳେ ୬୦୦ରୁ ଅଧିକ ଆହତ ହୋଇଛନ୍ତି । ଏମାନଙ୍କ ମଧ୍ୟରେ ଅନେକ ଶିଶୁ ଓ ବୟସ୍କ ଅଛନ୍ତି ।

ଗାଜାରେ ଇସ୍ରାଏଲର ରକେର୍ଟ ମାଡରେ ଦୁଇଟି ବିଦେଶୀ ନ୍ୟୁଜ ଚ୍ୟାନେଲ ଧ୍ବଂଶ ହୋଇଥିବା ସୂଚନା ମିଳିଛି । ରକେଟ ମାଡର ମାତ୍ର ଦୁଇ ମିନିଟ୍‌ ଭିତରେ ଏକ ବହୁତଳ ପ୍ରାସାଦ ଧ୍ବଂଶ ହୋଇଯାଇଛି । ଏହି କୋଠାରେ ଦୁଇଟି ବିଦେଶୀ ନ୍ୟୁଜ୍‌ ଚ୍ୟାନେଲ ଧ୍ବଂଶ ହୋଇଯାଇଛି । ନ୍ୟୁଜ ଚ୍ୟାନେଲ ଅଲ୍ ଜଜିରା ଓ ଆମେରିକାର ନ୍ୟୁଜ୍ ଚ୍ୟାନେଲ ଆସୋସିଏଟ ପ୍ରେସ ସମ୍ପୂର୍ଣ୍ଣ ଧ୍ବଂଶ ହୋଇଯାଇଛି ।

ଆଜି ଅପରାହ୍ନରେ ସିଭିୟର ସାଇକ୍ଲୋନର ରୂପ ନେବ ବାତ୍ୟା ‘ତୌକତେ’, ୧୬୦ରୁ ୧୭୦ କିଲୋମିଟର ବେଗରେ ବହିବ ପବନ

ନୂଆଦିଲ୍ଲୀ: ବାତ୍ୟା ‘ତୌକତେ’ ପ୍ରଭାବରେ ଗୁଜରାଟ, କେରଳ, କର୍ଣ୍ଣାଟକରେ ଆରମ୍ଭ ହୋଇଛି ବର୍ଷା ସାଙ୍ଗକୁ ପବନ । ଆଜି ଦିନ ୧୧ଟା ୩୦ ସୁଦ୍ଧା ଅତି-ତୀବ୍ର ସାମୁଦ୍ରିକ ଝଡ଼ର ରୂପ ନେବା ସହ ୧୮ତାରିଖ ସକାଳ ବେଳକୁ ଗୁଜରାଟ ଉପକୂଳରେ ଲ୍ୟାଣ୍ଡଫଲ୍ କରିବା ସମ୍ଭାବନା ଅଛି । ପ୍ରଭାବିତ ହେବାକୁ ଥିବା ରାଜ୍ୟମାନଙ୍କୁ ଆଲର୍ଟ ରହିବା ପାଇଁ କୁହାଯାଇଛି । ବିଶେଷକରି ତଳି ଅଞ୍ଚଳରେ ଯେଭଳି କୌଣସି କ୍ଷୟକ୍ଷତି ନ ହୁଏ ସେଥି ପ୍ରତି ଧ୍ୟାନ ଦେବାକୁ ନିର୍ଦ୍ଦେଶ ରହିଛି ।

ଏନଡିଆରଏଫ ଓ ଉଦ୍ଧାରକାରୀ ଦଳ ସଜାଗ ହୋଇ ରହିଛନ୍ତି । ସେପଟେ ମାଙ୍ଗାଲୁରୁ ନିକଟରେ ବୋଟ ଓଲଟି ଜଣେ ମୃତ ହୋଇଥିବା ବେଳେ ୫ ଜଣ ନିଖୋଜ ଅଛନ୍ତି । ବାତ୍ୟା ଲ୍ୟାଣ୍ଡଫଲ ସମୟରେ ଘଣ୍ଟା ପ୍ରତି ୧୬୦ରୁ ୧୭୦ କିଲୋମିଟର ବେଗରେ ପବନ ବହିବା ନେଇ ଆକଳନ କରିଛି ଭାରତୀୟ ପାଣିପାଗ କେନ୍ଦ୍ର । ଏଥି ପାଇଁ ମାଙ୍ଗାଲୁରୁ ପୋରବନ୍ଦର ଓ ବେରାୱଲ, କଚ୍ଛ ଓ ଦ୍ୱାରକାରେ ରେଡ୍‌ ଆଲର୍ଟ ଜାରି କରାଯାଇଛି । ବାତ୍ୟା ଦ୍ବାରା ୫ଟି ରାଜ୍ୟ ଗୁଜରାଟ, କେରଳ, ଗୋଆ, କର୍ଣ୍ଣାଟକ ଓ ମହାରାଷ୍ଟ୍ରରେ ଅଧିକ ବର୍ଷା ହେବ ।

୨୦ ତାରିଖ ବେଳକୁ ପାଗ ସ୍ବାଭାବିକ ହେବ । ଓଡ଼ିଶା ଉପରେ ବାତ୍ୟା ତୌକତେର କୌଣସି ପ୍ରଭାବ ପଡିବ ନାହିଁ । କେବଳ ସାମାନ୍ୟ ପଶ୍ଚିମା ପବନ ବହିପାରେ ବୋଲି ପାଣିପାଗ ବିଶେଷଜ୍ଞ ପୂର୍ବାନୁମାନ କରିଛନ୍ତି ।