spot_img
Home Blog Page 5697

ରାଜ୍ୟରେ କମୁଛି କରୋନା ସଂକ୍ରମଣ, ୬ ହଜାର ତଳକୁ ଖସିଲା କରୋନା ସଂକ୍ରମିତଙ୍କ ସଂଖ୍ୟା

ଭୁବନେଶ୍ୱର: ରାଜ୍ୟରେ ତଳମୁହାଁ କରୋନା ସଂକ୍ରମଣ। ଦିନକୁ ଦିନ ତଳକୁ ତଳକୁ ଖସିବାରେ ଲାଗିଛି ସଂକ୍ରମଣର ସଂଖ୍ୟା। ଗତକାଲି ରାଜ୍ୟରେ ୬୦୯୭ ଜଣ ସଂକ୍ରମିତ ବାହାରିଥିବା ବେଳେ ଆଜି ୬ହଜାର ତଳକୁ ଖସିଛି ସଂକ୍ରମଣ। ୨୪ ଘଣ୍ଟାରେ ରାଜ୍ୟରୁ ୫ହଜାର ୨୩୫ ଜଣ କରୋନା ସଂକ୍ରମଣ ଚିହ୍ନଟ ହେଇଛନ୍ତି । ସେଥିମଧ୍ୟରୁ ୨ ହଜାର ୯୫୭ ଜଣ କ୍ୱାରେଣ୍ଟାଇନ ସେଣ୍ଟରରୁ ଚିହ୍ନଟ ହୋଇଥିବା ବେଳେ ୨ ହଜାର ୨୭୮ ଜଣଙ୍କର ରହିଛି ଲୋକାଲ କଣ୍ଟାକ୍ଟ। ତେବେ ସର୍ବାଧିକ ଖୋର୍ଦ୍ଧାରୁ ୭୨୬ ଜଣ ଚିହ୍ନଟ ହୋଇଥିବା ବେଳେ କଟକରୁ ୫୫୭ ଜଣ ଚିହ୍ନଟ ହୋଇଛନ୍ତି। ସେହିପରି ଅନୁଗୁଳରୁ ୨୭୭, ବାଲେଶ୍ୱରରୁ ୩୨୦, ବରଗଡ଼ରୁ ୧୧୮, ଭଦ୍ରକରୁ ୨୧୭, ବଲାଙ୍ଗୀରରୁ ୪୧, ବୌଦ୍ଧରୁ ୮୩,  ଦେବଗଡ଼ରୁ ୧୪, ଢ଼େଙ୍କାନାଳରୁ ୧୩୭, ଗଜପତିରୁ ୨୩, ଗଞ୍ଜାମରୁ ୭୭, ଜଗତସିଂହପୁରରୁ ୧୪୮, ଯାଜପୁରରୁ ୩୪୯, ଝାରସୁଗୁଡ଼ାରୁ ୨୭, କଳାହାଣ୍ଡିରୁ ୪୮, କନ୍ଧମାଳରୁ ୩୭, କେନ୍ଦ୍ରାପଡ଼ାରୁ ୨୩୭, କେନ୍ଦୁଝରରୁ ୧୧୫, କୋରାପୁଟରୁ ୧୨୭, ମାଲକାନାଗିରିରୁ ୫୮, ମୟୂରଭଞ୍ଜରୁ ୨୮୫, ନବରଙ୍ଗପୁରରୁ ୧୮୬, ନୟାଗଡ଼ରୁ ୧୩୨, ନୂଆପଡ଼ାରୁ ୧୩, ପୁରୀରୁ ୨୩୪, ରାୟଗଡ଼ାରୁ ୧୨୯, ସମ୍ବଲପୁରରୁ ୬୬, ସୋନପୁରରୁ ୩୪, ସୁନ୍ଦରଗଡ଼ରୁ ୨୫୧, ଷ୍ଟେଟପୁଲରୁ ୧୨୪ ଜଣ କରୋନା ସଂକ୍ରମିତ ହୋଇଛନ୍ତି।

ମହାଦେବଙ୍କ ବାହାଘର ପାଇଁ ଆଜି କନ୍ୟା ଅନ୍ୱେଷଣ ଓ ନିର୍ବନ୍ଧ ନୀତି

ଭୁବନେଶ୍ୱର: ପ୍ରସିଦ୍ଧ ଶୀତଳଷଷ୍ଠୀ ଯାତ୍ରା ପାଇଁ ଆଜି ପତରପେଣ୍ଡି। ବାବା ମହାଦେବଙ୍କ ପାଇଁ କନ୍ୟା ଅନ୍ୱେଷଣ ଓ ନିର୍ବନ୍ଧ ଅନୁଷ୍ଠିତ ହେବ। କୋଭିଡ କଟକଣା ଭିତରେ ପତରପେଣ୍ଡି କରାଯିବାକୁ ପ୍ରସ୍ତୁତି ହୋଇଛି। ପ୍ରଥମ ପର୍ଯ୍ୟାୟରେ ନନ୍ଦପଡ଼ାର ବାବା ବାଲୁଙ୍କେଶ୍ୱର ପାଇଁ ଆଜି କନ୍ୟା ଅନ୍ୱେଷଣରେ ଯିବେ ସପ୍ତଋଷି। କନ୍ୟାପିତାଙ୍କୁ ପତ୍ରଦେଇ ବିବାହ ସ୍ଥିର କରାଯିବ। ସଂଧ୍ୟା ୬ଟାରୁ ୬.୩୦ ମଧ୍ୟରେ ପତରପେଣ୍ଡି ପାଇଁ ଲଗ୍ନସ୍ଥିର ହେବ। ଏନେଇ ସବୁଠି ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚି ଥିବାବେଳେ ଆସନ୍ତା ୧୫ ତାରିଖରେ ମାଆ ପାର୍ବତୀଙ୍କ ହାତ ଧରିବେ ଦେବଦେବ ମହାଦେବ।

ଆଜି ଉତ୍ତର-ବଙ୍ଗୋପସାଗରରେ ସୃଷ୍ଟିହେବ ଲଘୁଚାପ, ପ୍ରଭାବରେ ଚାରିଦିନ ପର୍ଯ୍ୟନ୍ତ ତୁହାକୁ ତୁହା ବର୍ଷା

ଭୁବନେଶ୍ୱର: ଆଜି ଉତ୍ତର-ବଙ୍ଗୋପସାଗରରେ ସୃଷ୍ଟିହେବ ଲଘୁଚାପ। ଫଳରେ ରାଜ୍ୟରେ ଚାରିଦିନ ପର୍ଯ୍ୟନ୍ତ ଲାଗି ରହିବ ତୁହାକୁ ତୁହା ବର୍ଷା। ଆସନ୍ତା ୨୪ ଘଣ୍ଟା ପାଇଁ ୯ଟି ଜିଲ୍ଲାକୁ ରେର୍ଡ ଆଲର୍ଟ। ୧୦ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରାଯାଇଛି। ଏହା ସହ ୧୧ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ୧୪ ତାରିଖ ଯାଏଁ ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷାର ସମ୍ଭାବନା ରହିଛି। ବର୍ଷା ଫଳରେ ନଦୀଗୁଡ଼ିକରେ ଜଳସ୍ତର ବଢ଼ିବା ଆଶଙ୍କା ରହିଛି। ଫ୍ଲାସ୍ ଫ୍ଲଡ୍ ଆଶଙ୍କା କରି ସଜାଗ ହୋଇଛି ଜଳସମ୍ପଦ ବିଭାଗ। ବିଭାଗୀୟ ସଚିବ ଅନୁ ଗର୍ଗ ଉପକୂଳବର୍ତ୍ତୀ ଜିଲ୍ଲାଗୁଡ଼ିକୁ ହାଇ ଆଲର୍ଟ ଜାରି କରିଛନ୍ତି। କଟକ, ଜଗତସିଂହପୁର, କେନ୍ଦ୍ରାପଡ଼ା, ଢେଙ୍କାନାଳ, ଅନୁଗୁଳ, ମୟୂରଭଞ୍ଜ, ବାଲେଶ୍ଵର, ଭଦ୍ରକ ଓ ଯାଜପୁର ଭଳି ଜିଲ୍ଲାକୁ ଫୋକସ୍ କରାଯାଇଛି। ଦୁର୍ବଳ ଥିବା ୨୦ଟି ନଦୀବନ୍ଧ ପ୍ରତି ଅଧିକ ଗୁରୁତ୍ୱ ଦିଆଯାଉଛି ବୋଲି ବିଭାଗୀୟ ସର୍ବୋଚ୍ଚ ଯନ୍ତ୍ରୀ କହିଛନ୍ତି। ଏହାସହ ଓଡ଼ିଶା ଛୁଇଁଛି ଦକ୍ଷିଣ-ପଶ୍ଚିମ ମୋସୁମୀ ବାୟୁ। ଆସନ୍ତା ୨୪ ଘଣ୍ଟାରେ ସମଗ୍ର ରାଜ୍ୟରେ ମୌସୁମୀ ବାୟୁ ପହଞ୍ଚିବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି।

ରାଜ୍ୟରେ ପେଟ୍ରୋଲ ଦର ବୃଦ୍ଧି ନେଇ ସମସ୍ତ ପେଟ୍ରୋଲ ପମ୍ପ ସାମ୍ନାରେ କଂଗ୍ରେସର ବିକ୍ଷୋଭ

ଭୁବନେଶ୍ୱର: ଦେଶରେ ହୁ ହୁ ହୋଇ ବଢିଚାଲିଛ ପେଟ୍ରୋଲ ଓ ଡିଜେଲ୍ ଦର। ଓଡ଼ିଶାରେ ବି ଦର ବଢିବାରେ ଲାଗିଛି। ସ୍ଥିତି ଏଭଳି ହୋଇଛି ରାଜ୍ୟରେ ଅନେକ ସ୍ଥାନରେ ପେଟ୍ରୋଲ ଲିଟର ପିଛା ୧୦୦ ଟଙ୍କା ଟପିଛି। ବଢୁଥିବା ତୈଳ ଦରକୁ ନେଇ ଆଜି ରାଜ୍ୟର ସମସ୍ତ ପେଟ୍ରୋଲ ପମ୍ପ ଆଗରେ ଧାରଣା ଦେବା ସହ ବିକ୍ଷୋଭ କରୁଛି କଂଗ୍ରେସ। ଏହି ବିକ୍ଷୋଭ ସକାଳ ୧୧ଟା ପର୍ଯ୍ୟନ୍ତ ଧାରଣା ଓ ବିକ୍ଷୋଭ କରିବାକୁ ଦଳ ନିଷ୍ପତ୍ତି ନେଇଛି। କରୋନାର ୨ୟ ଲହର ସାରା ଦେଶକୁ କବଳିତ କରିଥିବା ବେଳେ କେନ୍ଦ୍ର ସରକାର ଲଗାତାର ଭାବେ ପେଟ୍ରୋଲ ଓ ଡିଜେଲ ଦର ବଢାଇ ଚାଲିଛନ୍ତି । ଦେଶର ଅନେକ ଅଂଚଳରେ ପେଟ୍ରୋଲ ଓ ଡିଜେଲର ଦର ଲିଟର ପ୍ରତି ୧୦୦ ଟଙ୍କା ପାର କରିଥିବାବେଳେ ଘରୋଇ ସାମଗ୍ରୀ ଓ ନିତ୍ୟ ବ୍ୟବହୃତ ଖାଦ୍ୟ ସାମଗ୍ରୀର ଦର ଆକାଶଛୁଆଁରେ ପହଂଚିଛି। ଯାହାକୁ ନେଇ ପ୍ରତିବାଦ କରୁଛି ରାଜ୍ୟ କଂଗ୍ରେସ।

ସେପଟେ ପେଟ୍ରୋଲ,ଡିଜେଲ ଏବଂ ଗ୍ୟାସ ଦରବୃଦ୍ଧି ପ୍ରତିବାଦରେ ସମ୍ବଲପୁର ଜିଲ୍ଲା କଂଗ୍ରେସ କମିଟି ପକ୍ଷରୁ ସମସ୍ତ ପେଟ୍ରୋଲ ପମ୍ପରେ ବିକ୍ଷୋଭ ପ୍ରଦର୍ଶନ। କରୋନା ମହାମାରୀ ସମୟରେ ତୈଳ ଦର ବୃଦ୍ଧି କରି ସାଧାରଣ ଜନତାଙ୍କୁ ସରକାର ଶୋଷଣ କରୁଛନ୍ତି, ଏଣୁ ତୁରନ୍ତ ପ୍ରତ୍ୟାହାର ଦାବି କରିଛି କଂଗ୍ରେସ ଦଳ।

ପଦ୍ମଶ୍ରୀ ପ୍ରଫେସର ରାଧାମୋହନଙ୍କ ଚିକିତ୍ସାଧୀନ ଅବସ୍ଥାରେ ପରଲୋକ

ଭୁବନେଶ୍ୱର: ପଦ୍ମଶ୍ରୀ ପ୍ରଫେସର ରାଧାମୋହନଙ୍କ ପରଲୋକ। ଗତକାଲି ରାତିରେ ଚିକିତ୍ସାଧୀନ ଅବସ୍ଥାରେ ତାଙ୍କର ବିୟୋଗ ହୋଇଛି। କିଛି ଦିନ ହେବ ଅସୁସ୍ଥ ହୋଇ ସମ୍ ହସପିଟାଲରେ ଚିକିତ୍ସାଧୀନ ଥିଲେ। ଜଣେ ଶିକ୍ଷାବିତ୍, ସାମାଜିକ କର୍ମୀ ଓ ପରାମର୍ଶ ଦାତା ଭାବେ ବେଶ ପରିଚିତ ଥିଲେ ପ୍ରଫେସର ରାଧାମୋହନ। ଏହାସହ ଜଣେ ଆଗଧାଡିର ପରିବେଶବିତ ଭାବେ ମଧ୍ୟ ବେଶ ଜଣାଶୁଣା ଥିଲେ ପ୍ରଫେସର ରାଧାମୋହନ। ତାଙ୍କ ଅକାଳ ବିୟୋଗରେ ଓଡ଼ିଶା ଜଣେ ଗୁରୁ ଓ ପଥ ପ୍ରଦର୍ଶକଙ୍କୁ ହରାଇଛି।

ଶ୍ରୀଲଙ୍କା ସହ ଖେଳିବ ଭାରତ, ବିସିସିଆଇ ଘୋଷଣା କଲା ଟିମ

ଭୁବନେଶ୍ୱର:  ଭାରତ ଓ ଶ୍ରୀଲଙ୍କା ଦିନିକିଆ ଓ ଟି-୨୦ ମ୍ୟାଚ ପାଇଁ ଟିମ୍‌ ଘୋଷଣା କରିଛି BCCI  ।  ବିସିସିଆଇର ଘୋଷଣା ମୁତାବକ ଶିଖର ଧାଓ୍ବନ ହେଲେ ଦିନିକିଆ ଓ ଟି-୨୦ର କ୍ୟାପ୍‌ଟେନ  । ସେହିପରି ଭୁବନେଶ୍ୱର କୁମାର ହୋଇଛନ୍ତି ଭାଇସ କ୍ୟାପଟେନ୍‌ ଅର୍ଥାତ ଉପ ଅଧିନାୟକ  । ଶ୍ରୀଲଙ୍କା ବିପକ୍ଷରେ ଭାରତୀୟ ଟିମ  ଦିନିକିଆ ମ୍ୟାଚ୍‌ ଖେଳିବାକୁ ଯାଉଛି  । ଆସନ୍ତା  ୧୩, ୧୬, ୧୮ ଜୁଲାଇରେ ହେବ ଏହି ମ୍ୟାଚ  ।

ସେହିପରି ୨୧, ୨୩, ୨୫ ଜୁଲାଇରେ ଟି-୨୦ ମ୍ୟାଚ୍‌ ଅନୁଷ୍ଠିତ ହେବା ନେଇ ନିର୍ଦ୍ଧାରିତ ହୋଇଛି ସମୟ ଏବଂ ତାରିଖ  । ଘୋଷଣା ହୋଇଥିବା ଟିମରେ ଅନ୍ୟମାନଙ୍କ ମଧ୍ୟରେ ଟିମ୍‌ରେ ଅଛନ୍ତି ପୃଥ୍ୱୀ ଶ, ସୂର୍ଯ୍ୟକୁମାର ଯାଦବ, ମନିଷ ପାଣ୍ଡେ, ଇଶାନ କିଶାନ, ସଞ୍ଜୁ ସାମସନ୍‌, ଜୁଜୁବେନ୍ଦ୍ର ଚହଲ , କୁର୍ଣ୍ଣାଲ ପାଣ୍ଡ୍ୟା, କେଦାର ଯାଦବ, ଏନ ସାଇନ୍‌  । ସେହିପରି ବର୍ତ୍ତମାନ ଜାରି ରହୁଥିବା ଚର୍ଚ୍ଚା ମୁତାବକ ରାହୁଲ ଦ୍ରାବିଡ ଟିମ୍‌ ମୁଖ୍ୟ କୋଚ୍‌  ଭେବେ ନିଯୁକ୍ତ ହୋଇପାରନ୍ତି  ।

ପଶ୍ଚିମ ଓଡ଼ିଶାକୁ ନବୀନ ଦେଇଥିଲେ ୨୫ କୋଟି, ଭର୍ଚ୍ଚୁଆଲରେ ଲୋକାର୍ପଣ କରିବେ ଅନେକ ପ୍ରକଳ୍ପ

ଭୁବନେଶ୍ୱର: ବହୁ ଗୁରୁତ୍ବପୂର୍ଣ୍ଣ କାର୍ଯ୍ୟରେ ଲାଗୁଛି ମୁଖ୍ୟମନ୍ତ୍ରୀଙ୍କ ୨୫ କୋଟି ଟଙ୍କାର ସହାୟତା । କୋଭିଡ୍‌ ମୁକାବିଲା ପାଇଁ ପଶ୍ଚିମ ଓଡ଼ିଶା ବିକାଶ ପରିଷଦକୁ ମୁଖ୍ୟମନ୍ତ୍ରୀ ଦେଇଥିଲେ ୨୫ କୋଟି ଟଙ୍କା । ଏହି ଅର୍ଥରେ ଅକ୍ସିଜେନ ସିଲିଣ୍ଡର, ମାସ୍କ, ଗ୍ଲୋବ୍‌ସ କିଣା ପରେ ଏବେ ହାତକୁ ନିଆଯାଇଛି ଅନେକ ଯୋଜନା । ଆର୍‌ଟି-ପିସିଆର୍ ମେସିନ କିଣାଯାଇଥିବା ବେଳେ ଟେକ୍ନସିଆନ୍ ନିଯୁକ୍ତ ହୋଇଛନ୍ତି ।

ମୁଖ୍ୟମନ୍ତ୍ରୀଙ୍କ ସହାୟତା ଅର୍ଥରେ ଅନେକ ମେଡିକାଲରେ ଅତିରିକ୍ତ ଆଇସିୟୁ ବେଡ୍‌ ପ୍ରସ୍ତୁତ କରାଯାଇଛି । ଆବଶ୍ୟକ ସ୍ଥାନରେ ଅଟୋ-ସାନିଟାଇଜିଂ ମେସିନ୍‌ର ଲଗାଯାଇଛି । ଏହି ଟଙ୍କାରେ ବିଭିନ୍ନ ଡାକ୍ତରଖାନାରେ ବିଶୁଦ୍ଧ ପିଇବା ପାଣିର ସମସ୍ୟା ମଧ୍ୟ ଦୂର କରାଯାଇଛି । ଏହି ସୁବୁର ବ୍ୟବସ୍ଥାର ଶୁକ୍ରବାର ଭର୍ଚୁଆଲ ଜରିଆରେ ଲୋକାର୍ପଣ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଡବ୍ଲୁଓଡିସି ପୋଲ, ରାସ୍ତା, କ୍ଷୁଦ୍ର ଜଳସେଚନ ପ୍ରକଳ୍ପ କାମ ହାତକୁ ନେଉଥିବା ବେଳେ ପ୍ରଥମ ଥର ପାଇଁ ସ୍ୱତନ୍ତ୍ର ଭାବେ କୋଭିଡ୍‌ ମୁକାବିଲା ପାଇଁ ପଦକ୍ଷେପ ନିଆଯାଇଛି । ଏହି ପ୍ରୟାସ ଧୀରେ ଧୀରେ ଆଗକୁ ବଢ଼ିବ ବୋଲି ପରିଷଦର ଅଧ୍ୟକ୍ଷ ଅସିତ ତ୍ରିପାଠୀ ସୂଚନା ଦେଇଛନ୍ତି ।

ମେଡିକାଲରେ ପିନ୍ଧିଲେ ଶଙ୍ଖା ସିନ୍ଦୁର, ଭିଡ଼ିଓ କଲରେ କଲେ ସ୍ୱାମୀ ଦର୍ଶନ

ବ୍ରହ୍ମପୁର: କୋଭିଡ ବେଳେ ହୃଦୟ ଜିତିଛି ଏମିତି କିଛି ଚିତ୍ର  । ଯେତେବେଳେ କୋଭିଡ଼ ମହାମାରୀ  ସବୁକିଛି ବନ୍ଦ କରିଦେଇଛି  । ସେତେବେଳେ ଓଡ଼ିଆର ଅନ୍ୟନ ପର୍ବ ସାବିତ୍ରୀ ବନ୍ଦ ହୋଇ ଯାଇନାହିଁ  । କଟକଣା ମଧ୍ୟରେ ସମାପନ୍ନ ହୋଇଛି ପତ୍ନୀ ପତିର ଏହି ଅନ୍ୟନ ପରମ୍ପରା ।   ଜିଲା ପ୍ରଶାସନ ପ୍ରୋତ୍ସାହନରେ ଆଜି କୋଭିଡ଼ ମେଡିକାଲରେ ଚିକିତ୍ସିତ ହେଉଥିବା ମହିଳା ରୋଗୀଙ୍କୁ ବଣ୍ଟାଗଲା ଶଙ୍ଖା ସିନ୍ଦୁର।

ନର୍ସ ମାନେ ଚିକିତ୍ସିତ ହେଉଥିବା ମହିଳା ମାନଙ୍କୁ ନେଲ ପଲିଶ ଲଗାଇବା ସହ ଲାଲ ଶଙ୍ଖା ପିନ୍ଧାଇଥିଲେ। ଏଥି ସହ ମଥାରେ ଟିକିଲି ଓ ସିନ୍ଦୁର ଲଗାଇ ଦେଇଥିଲେ  ।
ମହିଳା ରୋଗୀ ମାନେ ଯେଭଳି ସେମାନଙ୍କ ସ୍ୱାମୀଙ୍କୁ ଦର୍ଶନ କରିବେ ସେଥିପାଇଁ ଭିଡ଼ିଓ କଲର ବ୍ୟବସ୍ଥା ମଧ୍ୟ କରାଯାଇଥିଲା। ଏଥି ସହ ଡାକ୍ତର ନିହାର ସାହୁଙ୍କ ତତ୍ୱବଧାନରେ ହସ୍ପିଟାଲ ମ୍ୟାନେଜର ଅଶ୍ୱିନୀ ଦାସ, ଶିବାନୀ ଦାସ ପ୍ରମୁଖ ରହି ଫଳ ବଣ୍ଟନ କରିଥିଲେ।

ଚୁଡି, ଶଙ୍ଖା ଓ ଅନ୍ୟାନ୍ୟ ସାମଗ୍ରୀ ଜିଲା ପ୍ରଶାସନ ପକ୍ଷରୁ ପ୍ରଦାନ ହୋଇଥିଲା। ଏଥିସହ ପୁରୁଷ ରୋଗୀଙ୍କୁ ସେମାନଙ୍କ ସ୍ତ୍ରୀ ମାନଙ୍କ ସହ ଭିଡ଼ିଓ କଲ ଯୋଗେ କଥା ବାର୍ତା କରାଯାଇଥିଲା। ପୂର୍ବରୁ ମେଡିକାଲ ଭିତରେ ରୋଗୀଙ୍କୁ ସେଭିଂ କରିବା, ମହିଳା ରୋଗୀଙ୍କ ଚୁଟି ବେଣୀ ପକାଇବା,ପାଉଡର ଲଗାଇବା ଆଦି କରି ଘର ପରିବେଶ ଭଳି ସୁବିଧା ଦିଆଯାଇଥିଲା। ଯାହାକୁ ନେଇ ରାଜ୍ୟସରକାର ପ୍ରଶଂସା କରିଥିଲେ।

ଓଡ଼ିଶା ଛୁଇଁଲା ମୌସୁମୀ ବାୟୁ, ୧୨ ତାରିଖରୁ ପ୍ରଚୁର ବର୍ଷା

ଭୁବନେଶ୍ୱର: ଓଡ଼ିଶା ଛୁଇଁଲା ଦକ୍ଷିଣ ପଶ୍ଚିମ ମୌସୁମୀ ବାୟୁ । ଦକ୍ଷିଣ ଓଡ଼ିଶାର ଅଧିକାଂଶ ଜିଲ୍ଲାରେ ଆଜି ଦକ୍ଷିଣ-ପଶ୍ଚିମ ମୋସୁମୀ ବାୟୁ ପ୍ରବେଶ କରିଛି । ଏନେଇ ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ଆସନ୍ତା ୪୮ ଘଣ୍ଟା ମଧ୍ୟରେ ମୌସୁମୀ ବାୟୁ ସାରା ରାଜ୍ୟରେ ଛୁଇଁବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି । ଆଜିଠୁ ୧୪ ତାରିଖ ଯାଏଁ ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷାର ସମ୍ଭାବନା ରହିଛି । ପାଣିପାଗ ବିଭାଗର ସୂଚନା ଅନୁସାରେ ଆସନ୍ତାକାଲି ଉତ୍ତର ବଙ୍ଗୋସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବ ।

ଏହାର ପ୍ରଭାବରେ ବର୍ଷର ପରିମାଣ ବଢିବ । ଏଥିପାଇଁ ୧୧ ଜିଲ୍ଲା କୁ ଅରେଞ୍ଜ ଏବଂ ୧୪ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ୧୨ ତାରିଖରେ ବର୍ଷା ର ପରିମାଣ ଆହୁରି ବୃଦ୍ଧି ହେବ । ଏଥିପାଇଁ ୯ ଜିଲ୍ଲା କୁ ରେଡ୍ ଆଲର୍ଟ ଜାରି ହୋଇଛି । ବର୍ଷାର ପ୍ରଭାବରେ ରାଜ୍ୟର ଅଧିକାଂଶ ନଦୀରେ ବନ୍ୟା ଜଳ ଆସିପାରେ । ଏପରିକି ପାହାଡ଼ିଆ ଅଞ୍ଚଳରେ ଅତଡ଼ା ଖସିବା ଆଶଙ୍କା ଥିବା ବେଳେ, ସମୁଦ୍ର ଜୁଆରିଆ ଓ ଅଶାନ୍ତ ରହିବ । ୧୧ ତାରିଖ ପରେ ସମୁଦ୍ରକୁ ନ ଯିବା ଲାଗି ମତ୍ସ୍ୟଜୀବୀମାନଙ୍କୁ ସତର୍କ କରିଦିଆଯାଇଛି । କ୍ଷୟକ୍ଷତି ରୋକିବା ଲାଗି ଆଗୁଆ ପଦକ୍ଷେପ ନେବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି ।

ବିଶେଷ କରି ପ୍ରଭାବିତ ହେବାକୁ ଥିବା ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରିବା ସହିତ ବାତ୍ୟା ଆଶ୍ରୟସ୍ଥଳୀ ଗୁଡ଼ିକ ପ୍ରସ୍ତୁତ ରଖିବା ଲାଗି କୁହାଯାଇଛି । ସେହିପରି ବନ୍ୟା ମୁକାବିଲା ପାଇଁ ଦୁର୍ବଳ ନଦୀବନ୍ଧ ଉପରେ ନଜର ରଖିବାକୁ କୁହାଯାଇଛି । ସହରାଞ୍ଚଳରେ ପାଣି ଖଲାସ କରିବା ଏବଂ ତଳିଆ ଅଞ୍ଚଳରେ ଯେମିତି ପାଣି ନ ଜମିବ ସେଥିପ୍ରତି ଦୃଷ୍ଟି ରଖିବା ଲାଗି ମଧ୍ୟ କୁହାଯାଇଛି । ପାଣିପାଗ ବିଭାଗର ପୂର୍ବାନୁମାନକୁ ଭିତ୍ତି କରି ସମସ୍ତ ଜିଲ୍ଲା ପ୍ରଶାସନକୁ ସତର୍କ କରିଛନ୍ତି ସ୍ବତନ୍ତ୍ର ରିଲିଫ କମିଶନର ପ୍ରଦୀପ ଜେନା ।

ରାମାୟଣ ଫିଲ୍ମରେ ‘ରାବଣ’ ଭୂମିକାରେ ନଜର ଆସିବେ ହ୍ରିତିକ୍

ମୁମ୍ବାଇ: ନିର୍ମାତା ମଧୁ ମଣ୍ଟେନାଙ୍କ ବହୁ ପ୍ରତିକ୍ଷୀତ ପ୍ରୋଜେକ୍ଟ ‘ରାମାୟଣ’କୁ ନେଇ ଫ୍ୟାନ୍ସଙ୍କ ଠାରେ ଆଗ୍ରହ ଦେଖାଦେଇଛି । ଫିଲ୍ମକୁ ନେଇ ବଲିଉଡରରେ ଆଲୋଚନା ହେଉଛି ଯେ ଏହି ଚଳଚ୍ଚିତ୍ରରେ ହ୍ରିତିକ ରୋଶନଙ୍କୁ ରାବଣ ଭୂମିକାରେ ଦେଖିବାକୁ ମିଳିବ। ସୂଚନା ଅନୁସାରେ, ଦୀପିକା ପାଦୁକୋନ ଏଥିରେ ହ୍ରିତିକଙ୍କ ବିପକ୍ଷରେ ନଜର ଆସିବେ। ଯଦିଓ ଫିଲ୍ମରେ ଏହି ଦୁଇ କଳାକାରଙ୍କ  ବିଷୟରେ ଏପର୍ଯ୍ୟନ୍ତ ବିଧିବଦ୍ଧ ଭାବେ ଘୋଷଣା କରାଯାଇ ନାହିଁ। ତଥାପି, ଏହି ଚଳଚ୍ଚିତ୍ର ବିଷୟରେ ଏକ ଭଲ ଖବର ଆସିଛି । ଏହି ଚଳଚ୍ଚିତ୍ରକୁ ଆହୁରି ଆକର୍ଷିତ କରିବାକୁ ନିର୍ମାତାମାନେ ହଲିଉଡର ବ୍ଲକବଷ୍ଟର ‘ଅବତାର’ର କଷ୍ଟ୍ୟୁମ ଡିଜାଇନରଙ୍କ ସହ ଆଲୋଚନା ଚିଲିଛି ।


Iwmbuzz ରେ ଏହି ଚଳଚ୍ଚିତ୍ରର ପୋଷାକ ବିଷୟରେ ଏକ ଖବର ପ୍ରକାଶ ପାଇଛି । କୁହାଯାଉଛି ଯେ, ରାମାୟଣର ନିର୍ମାତାମାନେ ଆମେରିକାର ଚର୍ଚ୍ଚିତ କଷ୍ଟ୍ୟୁମ ଡିଜାଇନରଙ୍କ ସହ କଥାବାର୍ତ୍ତା କରୁଛନ୍ତି । ଏହି ଡିଜାଇନର ଟିମ୍ ଲୋକପ୍ରିୟ ଚଳଚ୍ଚିତ୍ର ‘ଅବତାର’ର କଷ୍ଟ୍ୟୁମ ଡିଜାଇନ କରିଛନ୍ତି । ଯଦି ଏହା ହୁଏ ତେବେ ଏହି ଟିମ୍ ରାମାୟଣରେ ହ୍ରିତିକଙ୍କ ପୋଷାକ ଡିଜାଇନ କରିବେ ।

ଏହି ଚଳଚ୍ଚିତ୍ର ବିଷୟରେ ଅଧିକ ରୋଚକ ଜିନିଷ ସାମ୍ନାକୁ ଆସିଛି । ଏହି ଚଳଚ୍ଚିତ୍ରର ବଜେଟ୍ ବହୁତ ଅଧିକ ରହିବ । ଏପର୍ଯ୍ୟନ୍ତ ସୁଦ୍ଧା ଚଳଚ୍ଚିତ୍ରରେ ପ୍ରାୟ ୫୦୦ କୋଟି ଖର୍ଚ୍ଚ ହେବାକଥା କୁହାଯାଇଛି । ଫିଲ୍ମଟି 3D ରେ ସୁଟ୍ ହେବ ଏବଂ ଏହା ଏକ ଲାଇଭ୍ ଆକ୍ସନ୍ ଟ୍ରାଇଲୋଜି ହେବ । ଏହି ଚଳଚ୍ଚିତ୍ରଟି ହିନ୍ଦୀ, ତାମିଲ ଏବଂ ତେଲୁଗୁ ଭାଷାରେ ନିର୍ମିତ ହେବ। ଫିଲ୍ମଟିକୁ ମଧୁ ମଣ୍ଟେନା, ଅଲୁ ଅରବିନ୍ଦ ଏବଂ ନାମିତ ମଲହୋତ୍ରା ଏକାଠି ମିଶି ନିର୍ମାଣ କରିବେ । ହ୍ରିତିକଙ୍କ ଫିଲ୍ମ ‘ଯୁଦ୍ଧ’ରେ ତାଙ୍କର ଭୁମିକାକୁ ଖୁବ ପସନ୍ଦ କରାଯାଇଥିଲା । ଫିଲ୍ମରେ ହ୍ରିତିକଙ୍କ ବ୍ୟତୀତ ଏଥିରେ ମୁଖ୍ୟ ଭୂମିକାରେ ଟାଇଗର ଶ୍ରଫ୍ ମଧ୍ୟ ରହିଥିଲେ।