ଲକ୍ଷ୍ଣୌ: ଅଯୋଧ୍ୟା ରାମ ମନ୍ଦିର ଜମିକୁ ନେଇ ମୁଣ୍ଡ ଟେକିଛି ବିବାଦ । ୨ କୋଟି ଟଙ୍କାର ଜମି କିପରି ୧୮ କୋଟିରେ ବିକ୍ରି ହେଲା, ତାକୁ ନେଇ ଉଠିଛି ପ୍ରଶ୍ନ । ୧୦ ମିନିଟ୍ ପୂର୍ବରୁ ୨ କୋଟି ଥିବା ଜମି ୧୮କୋଟିର ହୋଇଗଲା । ଜମି କିଣାରେ ହେରଫେର ନେଇ କେବଳ ପ୍ରଶ୍ନ ଉଠିନି, ବରଂ କେଉଁ କାରଣରୁ ଓ ଏତେ ମହଙ୍ଗା ଜମି କିଣିବାକୁ କିଏ ଦେଇଥିଲା ଅନୁମତି, ଏହାକୁ ନେଇ ବି ଉଠିଛି ପ୍ରଶ୍ନ । ରାମ ମନ୍ଦିର ନିର୍ମାଣର ପୂରା ଦାୟିତ୍ୱ ଟ୍ରଷ୍ଟ ହାତରେ ରହିଛି । ଏହି ସମୟରେ ଜମି କେଳେଙ୍କାରୀ ଟ୍ରଷ୍ଟର କାର୍ଯ୍ୟଦକ୍ଷତା ଉପରେ ଅଙ୍ଗୁଳି ଉଠାଇଛି । ଏହାର ସିବିଆଇ ଓ ଇଡି ତଦନ୍ତ ଦାବି କରିଛନ୍ତି ଆପ୍ ନେତା ସଞ୍ଜୟ ସିଂହ । ପୂର୍ବତନ ମନ୍ତ୍ରୀ ପବନ ପାଣ୍ଡେ ମଧ୍ୟ ଟ୍ରଷ୍ଟ ଉପରେ ଆରୋପ ଲଗାଇଛନ୍ତି ।
ପାଟପୁରରେ ନକଲି ମୃଦୁ ପାନୀୟ କାରଖାନା ଠାବ
ଦିଗପହଣ୍ଡି: ବେଆଇନ ପାଣି ଫ୍ୟାକ୍ଟ୍ରି ଉପରେ ଚଢ଼ାଉ ପୋଲିସର ଚଢ଼ାଉ । ପାଟପୁର ଥାନା ଖଣ୍ଡଦେଉଳି ଗାଁର ଏକ ଘରେ ଚାଲିଥିବା ବେଆଇନ୍ ଫ୍ୟାକ୍ଟ୍ରି ଉପରେ ଚଢ଼ାଉ କରିଛି । ବିଭିନ୍ନ ନକଲି ବ୍ରାଣ୍ଡର ପାଣି ମୃଦୁ ପାନୀୟ, କୁରକୁରେ ସହିତ ପେକିଂ ମେସିନ କେମିକାଲ ବିପୁଳ ପରିମାଣର ପ୍ରସ୍ତୁତ ସାମଗ୍ରୀ ଏବଂ ଲୋଗୋ ଜବତ କରିଥିବା ଜଣାପଡ଼ିଛି । ଏନେଇ ପାଟପୁର ଅତିରିକ୍ତ ଜିଲ୍ଲା ଆରକ୍ଷୀ ଅଧିକ୍ଷକ ଠାକୁର ପ୍ରସାଦ ପାତ୍ର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଘଟଣା ସମ୍ପୃକ୍ତ ଥିବା ଆଶିଷ କୁମାର ମଣ୍ଡଳକୁ ପୋଲିସ ଗିରଫ 190/21ରେ ମାମଲା ରୁଜୁ କରିବା ସହ କୋର୍ଟ ଚାଲାଣ କରିଛଇ । ଜବତ ମୃଦୁ ପାନୀୟକୁ ଫୁଡ଼ ସେଫାଟି ବିଭାଗ କୁ ପଠାଯାଇଛି। ବେଆଇନ ଭାବେ ଚାଲିଥିବା ମୃଦୁ ପାନୀୟ ପ୍ରସ୍ତୁତ କରିବାକୁ ବିଭିନ୍ନ ନାମିଦାମୀ ଲେବେଲ ବ୍ରହ୍ମପୁର ଅଣୁଥିବା ନେଇ ଅଭିଯୁକ୍ତ ସ୍ୱୀକାର କରିଛନ୍ତି।

ଏଥିସହିତ ପଢ଼ନ୍ତୁ: ପୂରା ରାଜ୍ୟରେ ସକ୍ରିୟ ମୌସୁମୀ ବାୟୁ, ଆଜି ୮ ଜିଲ୍ଲା ଓ କାଲିଠୁ ୧୩ ଜିଲ୍ଲାରେ ପ୍ରବଳ ବର୍ଷିବ
ଲୋକ ଜନଶକ୍ତି ପାର୍ଟିରେ ବିଦ୍ରୋହ: ଦଳ ଛାଡ଼ିବେ ୫ ସାଂସଦ
ପାଟଣା: ବିହାରର ଲୋକ ଜନଶକ୍ତି ପାର୍ଟି ବା LJPରେ ବଡ଼ ଧରଣର ବିଦ୍ରୋହ । ଦଳର ୫ ଜଣ ସାଂସଦ ପାର୍ଟି ଛାଡ଼ିବାକୁ ନିଷ୍ପତ୍ତି ନେଇଥିବା ଜଣାପଡ଼ିଛି । ସେମାନେ ଲୋକସଭା ବାଚସ୍ପତିଙ୍କୁ ସାକ୍ଷାତ କରିବାକୁ ସମୟ ମାଗିଛନ୍ତି । LJPର ରାଷ୍ଟ୍ରୀୟ ନେତା ଚିରାଗ ପାଶୱାନଙ୍କୁ ବିରୋଧ କରି ଏମାନେ ଦଳ ଛାଡ଼ିବାକୁ ମନସ୍ଥ କରିଥିବା ଚର୍ଚ୍ଚା ହେଉଛି । ତେବେ ଚିରାଗଙ୍କ ନିଜ କକା ତଥା ହାଜିପୁରର ସାଂସଦ ପଶୁପତି କୁମାର ପାରଶ ଏହାର ନେତୃତ୍ୱ ନେଉଥିବା କୁହାଯାଉଛି । ସେମାନେ JDU ସଂପର୍କରେ ରହି ଏଭଳି କରୁଥିବା ଚର୍ଚ୍ଚା ହେଉଛି । ତେବେ ଚିରାଗଙ୍କ କକା ଏହାକୁ ଖଣ୍ଡନ କରିଥିଲେ ମଧ୍ୟ ତାଙ୍କ ଦିଲ୍ଲୀ ବାସଭବନରେ ପୁତୁରା ଚିରାଗ ପାଶଓ୍ୱାନ ପହଞ୍ଚିଛନ୍ତି । ୨୦୨୦ରେ ରାମବିଳାଶ ପାଶଓ୍ୱାନଙ୍କ ଦେହାନ୍ତ ପରେ ଦଳର ନେତୃତ୍ୱ କିଏ ନେବ ତାକୁ ନେଇ ପ୍ରଶ୍ନ ଉଠିଥିଲା । ଏବେ ଦଳରେ ବିଦ୍ରୋହ ବଢ଼ିବାରେ ଲାଗିଛି ।
ଏଥିସହିତ ପଢ଼ନ୍ତୁ: ପୁଣି ବଢ଼ିଲା ତେଲ ଦର: ମାଲକାନଗିରିରେ ୧୦୦ ଟପିଲା ପେଟ୍ରୋଲ
ପୁଣି ବଢ଼ିଲା ତେଲ ଦର: ମାଲକାନଗିରିରେ ୧୦୦ ଟପିଲା ପେଟ୍ରୋଲ
ଭୁବନେଶ୍ୱର: ଦେଶରେ କ୍ରମାଗତ ଭାବେ ବଢ଼ି ଚାଲିଛି ତେଲ ଦର । ତେଲ କମ୍ପାନୀମାନେ ଆଜି ପୁଣି ଥରେ ଲିଟର ପିଛା ୨୯ ପଇସା ଓ ଡିଜେଲ ଲିଟର ପିଛା ୩୦ରୁ ୩୧ ପଇସା ବୃଦ୍ଧି କରିଛନ୍ତି । ଏହା ଫଳରେ ଦେଶରେ ତେଲଦର ଏକ ନୂଆ ଉଚ୍ଚତାକୁ ଛୁଇଁଛି । ଓଡ଼ିଶାର ମାଲକାନଗିରିରେ ଉଭୟ ପେଟ୍ରୋଲ ଓ ଡିଜେଲ୍ ଦର ଲିଟର ପିଛା ୧୦୦ ଟଙ୍କା ଟପିଛି । ଜିଲ୍ଲାରେ ଏବେ ପେଟ୍ରୋଲ ୧୦୨.୨୩ ଓ ଡିଜେଲ ୧୦୦.୦୧ରେ ବିକ୍ରି ହେଉଛି । ଅନ୍ୟପକ୍ଷରେ ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୯୭.୧୬ରେ ପହଞ୍ଚିଥିବା ବେଳେ ଡିଜେଲ ୯୫.୧୧ରେ ପହଞ୍ଚିଛି । ସେହିପରି ଦିଲ୍ଲୀରେ ପେଟ୍ରୋଲ ଲିଟର ପିଛା ୯୬.୪ ଓ ଡିଜେଲ ଲିଟର ପିଛା ୮୭.୨୮ରେ ବିକ୍ରି ହେଉଛି । ସେହିପରି ମୁମ୍ୱାଇରେ ପେଟ୍ରୋଲ ଲିଟର ପିଛା ୧୦୨.୫୮ ଓ ଡିଜେଲ ଲିଟର ପିଛା ୯୪.୭୦ରେ ବିକ୍ରି ହେଉଛି ।
ଏଥିସହିତ ପଢ଼ନ୍ତୁ: ରାଜ୍ୟରେ ତଳମୁହାଁ ସଂକ୍ରମଣ: ଆଉ ୪ ହଜାର ୩୩୯ ସଂକ୍ରମିତ ଚିହ୍ନଟ
ଗୌତମ ଆଦାନୀଙ୍କୁ ଝଟକା: କମ୍ପାନୀ ସେୟାର ୨୦ ପ୍ରତିଶତ ଯାଏଁ ହ୍ରାସ
ମୁମ୍ୱାଇ: ଏସିଆର ଅନ୍ୟତମ ଧନୀ ତଥା ଦେଶର ଦ୍ୱିତୀୟ ଧନୀ ବ୍ୟକ୍ତି ଗୌତମ ଆଦାନୀଙ୍କୁ ଶକ୍ତ ଝଟ୍କା । ଆଦାନୀ ପରିବାର ଦ୍ୱାରା ପରିଚାଳିତ ଆଦାନୀ ଗ୍ରୁପର ଏକାଧିକ କମ୍ପାନୀର ସେୟାର ଆଜି ହଠାତ୍ ୨୦ ପ୍ରତିଶତରୁ ଅଧିକ ହ୍ରାସ ପାଇଛି । ସୂଚନା ଅନୁସାରେ ନ୍ୟାସନାଲ୍ ସିକ୍ୟୁରିଟିଜ୍ ଡିପୋଜିଟୋରି ଲିମିଟେଡ୍ ବା NSDL ପକ୍ଷରୁ ତିନିଟି ବିଦେଶୀ ଫଣ୍ଡ ସଂସ୍ଥାର ଆକାଉଣ୍ଟକୁ ଫ୍ରିଜ୍ କରାଯିବା ପରେ ଏଭଳି ସ୍ଥିତି ଦେଖିବାକୁ ମିଳିଛି । ଅଲବୁଲା ଇନଭେଷ୍ଟମେଣ୍ଟ ଫଣ୍ଡ, କ୍ରେଷ୍ଟା ଫଣ୍ଡ ଏବଂ APMS ଇନେଭେଷ୍ଟମେଣ୍ଟ ଫଣ୍ଡର ଆକାଉଣ୍ଟକୁ ଫ୍ରିଜ୍ କରିଛି NSDL । ଏମାନଙ୍କ ପାଖରେ ଆଦାନୀ ଗ୍ରୁପର ୪୩ ହଜାର ୫ ଶହ କୋଟି ଟଙ୍କାର ସେୟାର ରହିଛି । ସେମାନେ ଏହାକୁ ବିକ୍ରି କରିବାର ସମ୍ଭାବନା ମଧ୍ୟ ରହିଛି । ଆଦାନୀ ଏଣ୍ଟରପ୍ରାଇଜେସରେ ୬ ଦଶମିକ ୮୨ ପ୍ରତିଶତ, ଆଦାନୀ ଟ୍ରାନ୍ସମିସନରେ ୮ ଦଶମିକ ୦୩ ପ୍ରତିଶତ, ଆଦାନୀ ଟୋଟାଲ ଗ୍ୟାସରେ ୫ ଦଶମିକ ୯୨ ପ୍ରତିଶତ, ଆଦାନୀ ଗ୍ରୀନରେ ୩ ଦଶମିକ ୫୮ ପ୍ରତିଶତ ସେୟାର ଏହି ୩ଟି ଫଣ୍ଡ ଏଜେନ୍ସିର ଥିଲା । ଗତ ବର୍ଷକ ମଧ୍ୟରେ ଆଦାନୀ ଗ୍ରୁପର ବିଭିନ୍ନ କମ୍ପାନୀରେ ୬୦୦ ପ୍ରତିଶତରୁ ଅଧିକ ବୃଦ୍ଧି ହୋଇଥିଲା । ଆଜି ଆଦାନୀ ପୋର୍ଟର ସେୟାର ମଧ୍ୟ ୧୮ ପ୍ରତିଶତ ହ୍ରାସ ହୋଇଛି । ଚର୍ଚ୍ଚା ହେଉଛି ଯେ, ମେ ୩୧ ପୂର୍ବରୁ NSDL ଏ ସବୁ ଫ୍ରିଜ୍ କରିଥିଲା । ଯଦି ୧୪ ଦିନ ପୂର୍ବରୁ ଫ୍ରିଜ୍ କରାଯାଇଥିଲା, ତେବେ ଆଜି କାହିଁକି ଏତେ ବଡ଼ ହ୍ରାସ ଦେଖିବାକୁ ମିଳିଲା ବୋଲି ମାର୍କେଟ ବିଶେଷଜ୍ଞ ପ୍ରଶ୍ନ ଉଠାଇଛନ୍ତି ।
ଏଥିସହିତ ପଢ଼ନ୍ତୁ: ପୂରା ରାଜ୍ୟରେ ସକ୍ରିୟ ମୌସୁମୀ ବାୟୁ, ଆଜି ୮ ଜିଲ୍ଲା ଓ କାଲିଠୁ ୧୩ ଜିଲ୍ଲାରେ ପ୍ରବଳ ବର୍ଷିବ
କରୋନାରେ ଚାଲିଗଲେ ବିଶିଷ୍ଟ ଶିଳ୍ପପତି ତଥା ଦୈନିକ ‘ଇଶ୍ୱର’ର ପରିଚାଳନା ସମ୍ପାଦକ ସୁନୀଲ ମହାପାତ୍ର
ଭୁବନେଶ୍ୱର: ରାଉରକେଲାର ବିଶିଷ୍ଟ ଶିଳ୍ପପତି ତଥା ଦୈନିକ ‘ଇଶ୍ୱର’ର ପରିଚାଳନା ସମ୍ପାଦକ ସୁନୀଲ ମହାପାତ୍ରଙ୍କ ପରଲୋକ ଘଟିଛି । କରୋନାରେ ଆକ୍ରାନ୍ତ ଶ୍ରୀ ମହାପାତ୍ର ଚିକିତ୍ସାଧୀନ ଅବସ୍ଥାରେ ଏକ ଘରୋଇ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ତାଙ୍କୁ ୬୩ ବର୍ଷ ହୋଇଥିଲା । ସେ ବିଶିଷ୍ଟ ସାହିତ୍ୟିକ ଖଗେଶ୍ୱର ମହାପାତ୍ରଙ୍କ ପୁତ୍ର ଏବଂ ବରିଷ୍ଠ ଲେଖିଲା ତଥା ଦୈନିକ ‘ଇଶ୍ୱର’ର ପ୍ରକାଶକ ସମ୍ପାଦିକା ମଞ୍ଜୁ ନାୟକଙ୍କ ସ୍ୱାମୀ । ମୃତ୍ୟୁ ବେଳକୁ ତାଙ୍କ ନିକଟରେ ଦୁଇ ପୁତ୍ର ଓ ବୋହୂଙ୍କ ସମେତ ଜ୍ଞାତି କୁଟୁମ୍ୱ ଉପସ୍ଥିତ ଥିଲେ । ସେ କରୋନା ସଂକ୍ରମିତ ଥିବାରୁ ବିଏମ୍ସି ପକ୍ଷରୁ ସତ୍ୟ ନଗର ଶ୍ମଶାନରେ ତାଙ୍କ ଶେଷକୃତ୍ୟ ସମ୍ପନ୍ନ କରାଯାଇଥିଲା । ପୁତ୍ର ସ୍ୱୟଂ ମହାପାତ୍ର ମୁଖାଗ୍ନି ଦେଇଥିଲେ । ତାଙ୍କର ଆକସ୍ମିକ ମୃତ୍ୟୁ ଖବର କାଗଜ ଦୁନିଆ ସହ ସେ ଜଡ଼ିତ ଥିବା ବିଭିନ୍ନ ଶିକ୍ଷାନୁଷ୍ଠାନ, ବ୍ୟାଙ୍କ ତଥା ଶୁଭେଚ୍ଛୁ ବନ୍ଧୁମାନଙ୍କ ମଧ୍ୟରେ ଶୋକୟ ଛାୟା ଖେଳିଯାଇଛି । ସେ ଜଣେ ଅତ୍ୟନ୍ତ ଭଦ୍ର, ଅମାୟିକ, ପରୋଉପକାରୀ ବ୍ୟକ୍ତି ଭାବେ ବେଶ୍ ପରିଚିତ୍ ଥିଲେ ।
ଏଥିସହିତ ପଢ଼ନ୍ତୁ: ରାଜ୍ୟରେ ତଳମୁହାଁ ସଂକ୍ରମଣ: ଆଉ ୪ ହଜାର ୩୩୯ ସଂକ୍ରମିତ ଚିହ୍ନଟ

