ନନ୍ଦିଘୋଷ ବ୍ୟୁରୋ: ବରଗଡ଼ରେ ଚାଞ୍ଚଲ୍ୟ । ମୃତ୍ୟୁର ମାସେ ପରେ ଗାତରୁ ବାହାରିଲା କଙ୍କାଳ । ଆଉ ଏବେ ସେହି କଙ୍କାଳ ଖୋଲିବ ମୃତ୍ୟୁର ରହସ୍ୟ । କିପରି ହୋଇଥିଲା ମୃତ୍ୟୁ ତାହା ଉପରୁ ହଟିବ ପରଦା । ମୃତକ ଜଣକ ହେଉଛନ୍ତି ପଣ୍ଡକିପାଲି ଗାଁର ଅମୃତ ବର୍ଗେ l ଗତ ଏକ ମାସ ପୂର୍ବରୁ ମୃତ୍ୟୁ ପରେ ପରିବାର ଲୋକେ ତାଙ୍କୁ ପୋତି ଦେଇଥିଲେ l ହେଲେ ମୃତ୍ୟୁକୁ ନେଇ ସନ୍ଦେହ ଉପୁଜିବା ପରେ ଏବେ ତାର ଖୋଳତାଡ ଆରମ୍ଭ ହୋଇଛି । ଥାନାରେ ହତ୍ୟା ମାମଲା ରୁଜୁ ପରେ ମୃତ୍ୟୁର ଅସଲ କାରଣ ଜାଣିବା ପାଇଁ ପୋଲିସ ଗାତକୁ ଖୋଳି ଶବକୁ ବାହାର କରିଛି । ସୋହେଲା ପୋଲିସ ଓ ସାଇଣ୍ଟିଫିକ୍ ଟିମ୍ ସହାୟତାରେ ଏହାର ତଦନ୍ତ କରାଯାଉଛି ।
ସୂଚନା ମୁତାବକ, ଗତ ମାସ ୮ ତାରିଖରେ ପଣ୍ଡକିପାଲି ଗାଁର ରଜନୀ ସାହୁ ଅମୃତ ବର୍ଗେଙ୍କୁ ବିଲ କାମ କରିବାକୁ ଘରୁ ଡାକି ନେଇଥିଲେ l କିଛି ସମୟ ପରେ ଅମୃତ ଚେତାଶୂନ୍ୟ ହୋଇ ଯାଇଥିବା ନେଇ ପରିବାରକୁ ଖବର ଦେଇଥିଲେ l ଖବର ପାଇବା ପରେ ପରିବାର ଲୋକେ ତାଙ୍କୁ ଏକ ଅଟୋ ସାହାଯ୍ୟରେ ମେଡିକାଲ ନେଇଥିଲେ । ଡାକ୍ତର ମୃତ ଘୋଷଣା କରିବା ପରେ ପରିବାର ଲୋକେ ନିଜ ଜମିରେ ମୃତଦେହ ପୋତି ଦେଇଥିଲେ । ଶବ ପୋତିବାର ମାସେ ପରେ ମୃତ ଅମୃତଙ୍କ ସ୍ତ୍ରୀ ତାଙ୍କ ଝିଅକୁ ପୂରା ଘଟଣା ବିଷୟରେ ଜଣାଇଥିଲେ l ହେଲେ ରଜନୀ ସାହୁ ଏହି ଘଟଣା କାହାକୁ କହିଲେ ଜୀବନରୁ ମାରି ଦେବାକୁ ଧମକ ଦେଇଥିବା ଅଭିଯୋଗ ହୋଇଥିଲା l ଫଳରେ ସେ ଏହି ଘଟଣା କାହାକୁ ଭୟରେ କହୁନଥିବା କଥା ମୃତକଙ୍କ ଝିଅ ଅଭିଯୋଗ କରିଛନ୍ତି । ଏନେଇ ସୋହେଲା ଥାନାରେ ଅଭିଯୋଗ ପରେ ଗାତ ଭିତରୁ କଙ୍କାଳ ବାହାର କରି ପୋଷ୍ଟମର୍ଟମ ପାଇଁ ପଠାଯାଇଛି ।
